2017-03-22

Herojtë shkruan historinë e Kosovës

Nga Flori Bruqi

E SHKRUAN ME GJAK HISTORINË...

Në historinë më të re të Kosovës përmenden,kujtohen (me të drejtë) ngjarjet e vitit 1968, 1981,1997, 1998, 1999.

Por, tërësisht të lëna anash janë demonstratat e 28 marsit 1989.

Ata që harrojnë historinë, ajo mund tu përsëritet, thuhet jo rrallë.

Ka kohë, përkatësisht 28 vite që 28 marsi i vitit 1989 jo që po heshtet, por shumëkush (sidomos gjeneratat e reja) as që dinë se çka në fakt ka ndodhur në atë ditë.

Para lufte edhe pse institucionet nuk ishin si këto që kemi sot, kujtonin nëpër dhoma këtë datë Mars i Përflakur – kushtuar dëshmorit Ismet Avdi Qorraj
(21.01.1968 - 28.03.1989)etj.

****

Ndoshta nga shumë njerëz kjo datë është e harruar dhe i takon vetëm të kaluarës , mirëpo nëse rikthehemi mbrapa do të shohim se kjo datë ka qenë ndër pikat kyqe të qëndresës shqiptare ndaj
regjimit serbo-sllav , me protesta në mbrotje të shkollës shqipe, sovranitet të shtetit të Kosovës e deri tek çlirimi i saj.

Serbia pas protestave nëpër krejt ish Jugosllavinë “në mbrojtje të shtetësisë së saj” dhe jo rrallë edhe krijesës së Josip Broz Titos (Jugosllavisë), bëri çmos që të arrinte deri te suprimimi i Autonomisë së Kosovës.

Ajo po ndihmohej edhe nga vasalët, që nëpër tubime thoshin se: “Kosova nuk humb asgjë, derisa Serbia barazohet me republikat tjera”!

Për gjeneratat e reja që edhe s’mund t’i fajësojmë, po ua kujtoj se çfarë ndodhi në këtë ditë.

Poashtu, edhe injorantëve të asaj kohe e që sot “harrojnë” këtë ngjarje me peshë po ua “freskoj” kujtesën.

Serbia thoshte se po kthente elementët shtetëror, që kishte humbur me Kushtetutën e Kosovës të vitit 1974.

Tubimi kryesor u mbajt në Gazimestan, kur kasapi i Ballkanit Sllobodan Millosheviq kishte mbledhur rreth një milion serbo-malazezë ,... duke u premtuar  se Serbia do t’u dalë zot serbëve e malazezëve në Kosovë.

Mbaheshin mbledhje që nga lagjet e deri më lart, ku haptas populli shqiptar dhe jo vetëm ai, kundërshtonte ndryshimet kushtetuese.

Kujtojmë protestat gjithëpopullore të nëntorit 1988 dhe grevën e minatorëve në muajin shkurt 1989, që kundërshtuan paqësisht heqjen e elementit (shtetëror) konstituiv që pati Kosova, me
Kushtetutën e vitit 1974.

Mirëpo, më 28 mars 1989 Serbia me tanke e dhunë bëri që Kosovës t’i merrej elementi konstituiv, me ndryshimet e dhunshme
kushtetuese.

Kosova, deri në këtë kohë ishte pjesë e barabartë e Federatës së atëhershme Jugosllave.

Dhunshëm u ndërrua Kushtetuta e Kosovës.

Po të njëjtën ditë me 28 mars 1989 qytetarë të shumtë protestuan në shumë vendbanime të Kosovës.

Në Komunën e Prizrenit në mbrojtje të Kushtetutës ranë po atë ditë 5 dëshmorë (tre në Zhur e dy në Arbanë) dhe u plagosën dhjetëra të tjerë.

Në Komunën e Deçanit u vranë katër demostrues (Ismet Qorraj, Agim Kukleci, Mujë Mehmetaj dhe Sali Hadërgjonaj).

Populli i Kosovës duarthatë dhe paqësisht kishte dalë në mbrojtje të Kushtetutës.

Mirëpo, makineria serbe shkeli me dhunë gjithçka para vetes.

Vrau dhe shkatërroi gjithçka që i doli para.

Protestuesit si në Deçan, Zhur e në Arbanë i vunë gjokset e njoma tankeve dhe blindave serbe që bashkë me njësitet speciale qëllonin pamëshirshëm mbi ta.

Në Beograd okupatori bashkë me kolaboracionistët e kohës pinin shlivovicë të Shumadisë, ndërsa në Kosovë derdhej gjak shqiptari.

Kundërshtimet sa vinin e rriteshin.

Filloi dhe jeta e institucioneve të pavarura që organizuan mësimin, financat, kulturën e sportin, si mundësi e vetme e kundërshtimit e rezistencës aktive paqësore.

Kujtojmë edhe demonstratat e vitit 1990 dhe thirrjet për demokraci gjithandej nëpër Kosovë.

Durimit po i vinte fundi.

Shpërthimi i demonstratave të studentëve dhe mbështetja githëpopullore (1 tetor 1997) deri tek dalja publike e UÇK-së
dhe operacionet luftarake, ishin veprime se po vinin ditë më të mira dhe se okupimit po i vinte fundi.

Mbështetja e aleatëve dhe lufta e heroike e djemve dhe vashave çliruan vendin tonë të okupuar nga hordhitë sllavo-çetnike serbe.

Pa dashur të minimizoj rëndësinë e gjithë këtyre ngjarjeve që kaloi populli ynë, do ta rikujtojë  28 marsin e përgjakshëm të 1989-tës ,do ta kujtojë me po aq pietet si gjithë datat tjera.

Jemi dëshmitarë të asaj që po duan të na ndërrojnë apo rishkruajnë historinë.

Për të mos ndodhur një gjë e tillë, duhet që vetë ta shkruajmë atë.

Të paktën këtë që e jetuam dhe disa nga ne jemi dëshmitarë të saj.

Shoqëria dhe institucionet duhet të jenë më koshientë, që në historinë më të re të Kosovës, t’i kushtojnë rëndësi të veçantë kësaj date.

Assesi nuk bënë të harrojmë gjakun dhe veprën e: IsmetQorrajt,

 Kuklecit, Sali Hadërgjonajt, Mujë Mehmetaj (nga Komuna eDeçanit)
 dhe Muhamet Kabashit e Afrim Bytyqit nga Arbana, të Xhimshit, Xhylbehar e Hajrim Badallaj nga Zhuri dhe gjithë të rënëve tjerë në gjithë Kosovën në këtë ditë.

Derisa popujt tjerë nga balta bëjnë heronj, ne heronjtë po i bëjmë baltë!

Prishtinë, 22 mars 2017.

No comments:

Post a Comment