2017-12-18

Klevis Balliu: Zgjedhja e kryeprokurorit proces antikushtetues, kemi dosje që faktojnë lidhjen e qeverisë me krimin, ja çfarë e bashkon PD me LSI



Deputeti i PD Klevis Balliu gjatë një interviste për gazetën “SOT” ka folur rreth situatës të aktualitetit politik si dhe çështjes së kryeprokurorit. Sipas Balliut zgjidhja e kryeprokurorit të përkohshëm është një proces antikushtetues, pasi sipas tij, kryeministri po mundohet të kap institucionin e Prokurorit të Përgjithshëm në mënyrë që të ushtrojë presion politik. Por deputeti i demokrat nuk u ndal me kaq pasi theksoi se PD ka dosje që faktojnë lidhjen e qeverisë me krimin.

-Mazhoranca të mërkurën zhvilloi seancën dëgjimore me 7 kandidatët për postin e Kryeprokurorit të Përkohshëm. Pse opozita e bojkotoi këtë mbledhje?

Opozita e bojkotoi këtë mbledhje për shkakun se opozita shqiptare nuk mund të marrë pjesë në një proces antikushtetues. Dhe kjo dihet edhe për faktin se Rama për shkak të problemeve të Tahirit apo eksponentëve të lartë të Partisë Socialiste, eksponent të angazhuar në proceset zgjedhore apo dhe në bashkëqeverisjen e kryeministrit Rama, janë sot në çështje të ndryshme hetimore nga prokuroria. Në këtë situatë që ndodhet, Rama po tenton të kap kryeprokurorin në mënyrë që të ndryshojë prokurorët e çështjeve dhe që të ketë autoritetin për të bërë presion ndaj atyre prokurorëve që kanë çështje që implikojnë qeverinë e zotit Rama në krimin e organizuar.


-Javën tjetër pritet që emrat e 7 kandidatëve për prokuror t’i dërgohen seancës plenare për votim. A ka një plan veprimi Partia Demokratike apo do shohim sërish bojkot?

E para, bojkoti në vetvete nuk duhet parë si një tërheqje nga diskutimet. Bojkoti në vetvete është një aksion politik, i cili tregon haptas një qëndrim të një partie ndaj një procesi të posaçëm. Mendoj që nuk kemi akoma një vendim apo më saktë një plan veprimi sa i përket seancës që do të vijë, por mund të them që Partia Demokratike nuk do të tërhiqet nga veprimi i saj për mosbashkëpunimin me një qeveri të inkriminuar dhe aq më tepër për të thyer Kushtetutën. Ligji nuk mund të shkojë mbi Kushtetutën. Ligjet bëhen për të mbrojtur Kushtetutën. Nëqoftëse ne përdorim ligje të ndryshme për të ndryshuar Kushtetutën apo më keq akoma, siç është në rastin konkret, për të shkelur Kushtetutën atëherë drejtësia në Shqipëri merr fund.

-Disa javë më parë PD sulmoi fuqishëm qeverinë lidhur me krimin por ditët e fundit ka rënë intensiteti i demokratëve. Pse po ndodh një gjë e tillë?

Të jem i sinqertë nuk shohë një rënie të intensitetit të akuzave të Partisë Demokratike por shoh një rënie në aspektin mediatik të çështjes Tahiri. Nuk ka vendin e duhur çështja Tahiri në median e sotme dhe në fakt nuk e di pse po ndodh kjo gjë. Por pavarësisht kësaj sa i përket Partisë Demokratike fokusi kryesor i kësaj force është inkriminimi i qeverisë Rama, e cila lidhet fortë me çështjen Tahiri. Ndërkohë dua të them që Tahiri krahasuar me të gjitha parcelat e kanabisit apo ato qindra e mijëra ton kanabis është thjesht një cigare hashashi. Kupola e vërtetë dhe drejtuesit e kupolës së vërtetë janë ende sot ende në qeveri. Madje duke u ndalur tek çështja Tahiri ky i fundit ka qenë ministër dhe nuk duhet harruar se posti i ministrit është një post politik. Ndërkaq lidhjet e qeverisë me krimin u dukën dhe në rastin e tre policëve që janë në arrati, pasi janë këta të fundit që kanë funksion administratori. Por përveç këtyre kemi ende në detyrë drejtorin e Policisë zotin Haki Çako, i cili ka absolutisht përgjegjësinë kryesore si kryeadministratori i Policisë së Shtetit. Post që nuk po e menaxhon dot dhe nuk ka marrë përsipër asnjë përgjegjësi deri më tani. Mos heqja e Haki Çakos nga posti i Drejtorit të Përgjithshëm të Policisë tregon haptazi bashkëpunimin që ka pasur kryeministri Edi Rama me Tahirin në të gjitha çështjet e lidhura me kanabisin.

-Zoti Basha ka folur për disa dosje sekrete mbi lidhje të qeverisë me krimin. Çfarë po ndodh me këto dosje dhe a do bëhen publike?

Dosjet për të cilat po flitet, janë dosje që janë në hetim. Dhe nga vetë fjala “sekrete” janë të tilla që domethënë nuk mund të bëhen publike sepse ndërhyjmë pastaj në procesin e hetimit. Dhe kjo gjë do të ishte në dëm të hetimit nëse këto dosje do të tregoheshin. Por a janë të vërteta? Absolutisht që janë të vërteta dhe mund të them që janë një shumëllojshmëri dosjesh qoftë për kanabisin qoftë edhe për shumë gjëra të tjera që lidhen si me financat ashtu dhe me transparencën e parave të shpenzuara nga kjo qeveri.

-PD dhe LSI vendosën të rreshtoheshin krah njëra-tjetrës duke krijuar frontin opozitar. Si po ecën aleanca pasi nuk kemi parë qëndrime fort të përbashkëta?

Unë mendoj që bashkëpunimi i Lëvizjes Socialiste për Integrim me Partinë Demokratike është një bashkëpunim serioz dhe mendoj që do të japë frytet e veta. Aq më tepër që ka një traditë Partia Demokratike me Lëvizjen Socialiste për Integrim për bashkëpunimin. Një traditë që për hir të vërtetës është e suksesshme, madje mund të kujtojmë këtu koalicionin e këtyre dy forcave gjatë bashkëqeverisjes. Koalicion i cili prodhoi një seri reformash të suksesshme. Mund të përmendim këtu liberalizimin e vizave si dhe arrestimin e disa bandave kriminale. Kujtojë këtu se gjatë qeverisjes së Partisë Demokratike në tetë vjet janë kapur mbi 800 banda kriminale. Pra në këtë aspekt mendoj se do të jetë një bashkëpunim serioz, i cili do të jap fryte serioze si dhe do të ndihmojë Shqipërinë dhe shqiptarët që të shkëputen nga krimi organizuar dhe implikimi i tij në qeverisje. Sepse shqiptarët duhet ta dinë që nëse ka arsye se pse sot nuk po marrin atë që duhet dhe atë që u takon, apo dhe fakti se pse ekonomia shqiptare renditet kaq e dobët, është absolutisht bashkëpunimi i qeverisë me krimin pasi nuk mund të ketë krim ku nuk ka mjerim. Pra kjo qeveri promovon mjerimin në mënyrë që të forcojë krimin.

-PD ka nisur një proces analize sa i përket humbjes. Çfarë po ndodh kryesisht në bazë? A kanë filluar këto analiza dhe nëse kanë filluar a po shkojnë drejt përfundimit?

Po është e vërtetë që ka nisur një proces analize. Dhe unë personalisht mund të them që e kam mbyllur tashmë analizën. Pra jam në procesin e raportimit të atyre takimeve që kam bërë me grupseksionit. Ka patur absolutisht problematika të ndryshme që janë ngritur nga baza. Problematika që absolutisht do të merren parasysh pasi Partia Demokratike është ndryshe nga çdo parti tjetër për vetë faktin se ka një bazë të vërtetë, të pastër, të sinqertë dhe të papërfshirë në çështje imorale. Dhe është pikërisht ajo bazë që është virtyti i Partisë Demokratike, është ajo që i jep forcë PD, si dhe absolutisht është ajo bazë që duhet t’i jepet në dorë vendimmarrja për çështje madhore. Kjo për faktin se kemi një bazë me intelektualë, me njerëz që kanë vuajtur nga krimi i organizuar, me të përndjekur politik pra me pak fjalë kemi një bazë me të gjithë kategoritë e shqiptarëve. Dhe janë këta, ata që duhet të vendosin për fatet e tyre.

-Domethënë duke u bazuar tek përgjigjja juaj, i bie që në Pogradec është mbyllur procesi i analizës dhe po shkon drejt raportimit. Një gjë e tillë a ka ndodhur në të gjitha bazat e tjera dhe a do dal një përgjigje përfundimtare nga selia blu mbi analizën e përgjithshme?

Absolutisht që po. Analiza ka qenë e përcaktuar për një afat kohor prej tetë javësh dhe mendoj që në të gjithë qarqet duhet të jetë drejt përfundimit, pasi në këtë kohë duhet të jemi drejt raportimit të problematikave. Dhe ajo se çfarë do të thoja unë është se Partia Demokratike me patjetër duhet të dëgjojë bazën dhe të aplikojë propozimet e saj.

-PD festoi 27 vjetorin e themelimit më 11 dhjetor. Por pati akuza të forta nga emra si Patozi, Bregu etj.. Si i shihni qëndrimet e tyre?

E para, unë jam një person i rritur në Partinë Demokratike dhe figura të këtilla kanë qenë në një kohë kur unë e shihja parlamentin nga shtëpia dhe i mbështesja fjalimet e tyre. Por Partia Demokratike dhe kryetari, lidershipi i kësaj force është shprehur hapur për një bashkëpunim kurdoherë nëse kërkohet një bashkëpunim i vërtetë. Madje unë nuk mund të them se kush e kërkon dhe kush nuk e kërkon. Por nëqoftëse eksponentë të Partisë Demokratike do të kishin një problem me vetë Partinë Demokratike, i vetmi vend ku ky problem mund të zgjidhet është PD dhe asnjë parti tjetër. Pasi nuk mund të zgjidhësh problemet e Partisë Demokratike tek Partia Socialiste. E dyta mendoj që ka mënyra të tjera që tregojnë një seriozitet më të madh ndaj atyre problematikave që ngrenë disa njerëz, pasi nuk mund të them se janë të gjithë njësoj. Por unë mund të them që ndjej keqardhje që nuk pashë Arben Imamin në 27 vjetorin e themelimit. Pasi është absolutisht një figurë shumë e rëndësishme e Partisë Demokratike, me një kontribut të jashtëzakonshëm. Por gjithmonë e theksoj se vetmja zgjidhje që ata kanë për Partinë Demokratike, pra një zgjidhje e vërtetë që e ndihmon këtë forcë, duhet bërë brenda Partisë Demokratike. Ku mund të diskutohet, të sqarohet dhe të gjehet një vijë bashkëpunimi pasi edhe lidershipi i kësaj partie, për hir të së vërtetës, është treguar shumë i hapur në lidhje me bashkëpunimin. Megjithatë nuk e di me të vërtetë nëse shumë nga ata eksponentë që sot flasin kundër Partisë Demokratike kanë interes forcimin e partisë.

-Meqë jemi tek eksponentët e Partisë Demokratike. Po flitet se pas humbjes së zgjedhjeve janë krijuar tre klane brenda PD dhe po përpiqen të dominojnë me zërin e tyre duke krijuar dhe përçarje. A është e vërtetë një gjë e tillë?

Unë nuk e di se cilat klane. Nuk e di madje ka klane apo nuk ka klane brenda PD. Unë di që ka diskutime dhe diskutimet ndihmojnë një parti që të zhvillohet, të modernizohet dhe t’i bashkohet kohës ku ajo jeton. Nga vetë fjala “klane” i jepet një konotacion negativ por unë nuk e shoh si të tillë. Pastaj klane edhe mund të ketë pasi unë nuk mund ta verifikojë një gjë të tillë por të jeni i sigurt që Partia Demokratike nuk pëson absolutisht asnjë goditje nga klane të tilla, pasi ajo nuk është një parti që i përket njërit klan apo tjetrit. Ajo është një parti që i përket shqiptarëve dhe burimi i forcës së saj është nga shqiptarët. Dhe për sa kohë do të ketë shqiptarë ajo parti do të jetë aty dhe do të jetë e fortë, siç është edhe sot. E vërteta është se Partia Demokratike i fitoi zgjedhjet por krimi i organizuar dhe paratë e drogës e hoqën të drejtën e votës së qytetarëve shqiptarë. Praktikisht mund të them që zgjedhjet e 25 qershorit u vendosën në Katania, nga Habilajt, Balili, Tahiri, Rama e shumë e shumë të tjerë.

-Ju jeni deputet i Pogradecit. Sa është investuar në këtë qytet dhe si është marrëdhënia juaj me kryetarin e Bashkisë Pogradec? Sepse flitet që keni mosmarrëveshje.

“Fake news” pasi marrëdhëniet e mija me kryetarin e Bashkisë Pogradec janë shumë të mira për hir të së vërtetës dhe mund të them që dhe ai është një njeri i shumë i mirë. Ndërkohë meqë jemi tek investimet mund të them që në këtë zonë nuk ka asnjë investim. Si në Pogradec ashtu dhe në fshatra ku mund të përmend këtu Vleçanin, Proptishtin, Trebinjën, Starovën, Cerravën, Udenishtin e shumë të tjerë. Por përveç mungesës së investimeve kjo zonë përballet dhe me shumë probleme të tjera. Probleme që janë kryesisht në bujqësi në peshkim apo dhe në arsim për faktin se nuk ka pasur asnjë investim nga qeveria. Pastaj dhe unë si përfaqësues i kësaj zone ndihem i pafuqishëm për tu ardhur në ndihmë këtyre banorëve që tu përmirësojë jetën. Pasi lidhjet e qeverisë me krimin dhe me drogën ashtu siç e kam ritheksuar e kanë rritur mjerimin e qytetarëve.

Intervistoi: Endri Arizi

No comments:

Post a Comment