...Është një çupë që unë e dua....

 

Albina Idrizi u lind në fshatin Tërnoc të Bujanocit më 1966. Kreu Fakultetin Filologjik në Universitetin e Prishtinës-në Degën e Letërsisë dhe Gjuhës Shqipe.

Në vitin 1997 botoi përmbledhjen me poezi për të rritur "HESHTJA E MBARSUR" në botim të Rilindjes për të cilën recensent Agim Vinca thotë:’ Është një zë i veçantë, i pjekur  që në start.’
 Më pas, në nëntor të vitit 2007 boton përmbledhjen me poezi për fëmijë "ËNDËRRA ME YLBERË" .

Në mars të vitit 2009 paraqitet me poezitë e saja si bashkëautore e anttologjisë poetikie në gjuhën rumune"TEMPULLI I FJALËS"(TEMPLUL CUVÄNTULUI).
Romansierja Albina Idrizi në vitin  2009 para lexuesve doli me romanin  e shumëpritur  "HIJET E KULLAVE"(SHB "Rozafa" Prishtinë,2009)

Jeton  dhe punon në NT "Fauna "  në Gjilan.




 Për lexuesin e Floripress-it po sjellim disa vjersha nga  Albina Idrizi...

 JETA      

Athua kush mund ta lexojë deri në fund
     Pa u verbuar
     Kush mbeti pa e thither nektarin – farmak
     Apo farmakun- nectar
     E nëse në faqen e parë u gjenda
     Do të thotë se unë kam dale
     E nëse në faqen e dytë më gjete
     Do të thotë se unë fillova
     E nëse në faqen e tretë po çlodhem
     Do të thotë se unë mbarova
     Kjo na qenka jeta
     Miku im
     Që kënga ia ndërron fytyrën
     E të gjithë ecim nëpër lëkurë të njëri – tjetrit.                       
 
          
    MË DUHET    
  
             Më duhet të të gjej
                  Njeri,
                  që të mund ta dëgjosh
                  zërin tim, e
                  ta shohësh pjellën
                  e frymëzimeve të mia.
                  S’do të lodhem
                  duke të kërkuar
                  në ikje, në ardhje.
                  Nën këmbë a
                  mbi kokë, kudoqoftë.
                  Jam përplot e mbushur.
                  Heshtje e mbarsur me vite
                  sa, gati kam harruar si këndohet.
                  Madje
                  edhe zërit tim ia kam frikën.
                  Më duhet të të gjej
                  patjetër, Njeri
                  qoftë brendapërbrenda teje.   
        
PËRRALLA E GJYSHES       
  
  Të lutem gjyshe
          Përfundoje rrëfimin.
          Thuaj se bisha vdiq
          E njerëzit jetuan të lumtur
          Më shpejt gjyshe
          Të lutem
          Tregimi është i tmerrshëm
          E ti aq e ngathtë.       

DUKE KËRKUAR EMRIN TIM
      
Në këtë cast
      kur krahët e ftohtë të vetmisë
      përqafojnë trupin tim,
      loti merr rrugën e dhembjes.
      Shoh veten të tretur larg
      në shkretëtirën e harresës.
      Dhe ashtu e dërmuar bredh
      se mos gjej
      një pike shpresë
      për frymën time të etur.
      Më bëhet se atje tej
      shoh të shkruar në rërë
      emrin tim.
      Pluhuri i gjurmëve
      më bie në fytyrë
      duke fshehur qartësinë
      e shikimit tim.
      Sikur të pushonte era…
      është e pamundur, e di.       
Më kot
      mundohem t’i ndalë psherëtimat
      të mos dëgjohem më larg se dhembja,
      të mos shkojnë më larg
      se emri im i shkruar në rërë.
      Sepse për të bredh dhe luftoj me erën.
      Me frymën time të etur për jetë.
      Me zemrën time të etur për dashuri.                      

               
NGA DRITARJA     
         
Nga dritarja
             
gjithmonë duket më bukur.
             
Edhe fytyrat,
             
edhe dashuritë, madje
             
edhe vdekjet duken
             
më pak të tmerrshme.
              
Nga dritarja
            
  gjithmonë gënjehemi.   
                
TESTAMENTI     
        
Atëherë, kur diçka imja
             të cilën pak e kasha njohur, ushqyer,
             po vdiste në mua,
             më la trashëgim:
 - Nëse sundon vetveten, do të jesh
                                                
sundimtari më i madh!
- nëpër secilin mot,
   qoftë me shi, diell a dëborë,
   mbaj dietë!
- Mos u ngut të bëhesh
   i mençur – budalla, por ji
   budalla i mençur!
                                     
Me të parën arrita ku desha.
                                     
Me të dytën u bëra ai që desha.
                                     
Me të tretën fitova sa desha.
                                     
Të marrët më nderuan.
                                    
Të mençurit ma patën lakmi.  
                                     
                                          

MË PUQ

Më puq pak në faqe
të lutem Manushaqe.
S’jam treguar kot
më i miri,
xhentëlmeni,
trimi.
Nuk e pata lehtë
në matematikë,
nuk e pata lehtë
të të lëshoj karrikë.
Grushtin hundës
e hëngra,
krejt pa meritë.
Më puq pak në faqe
të lutem Manushaqe.

Ç’PO NDODH ME MUA

Ç’po ndodh, o babi,
kështu me mua,
sa herë shoh Zanën
zë në thua.
Saherë më flet
skuqem krejt,
nuk shoh as dëgjoj
fare përreth.
Nuk mund të flas
belbëzoj,
çdo fjalë që qes
e ngatërroj.
Më vjen të qaj
e të pëlcas,
në kupë të qiellit
të bërtas.
Të gjithë më njohin
për trim e lazdran,
kur jam me Zanën
krejt tjetër jam.
Ç’po ndodh, o babi,
kështu me mua,
t’ ka ngjarë dhe ty
a s’më thua?!

TELEFONIN UNË E MARR

Pritni, pritni pak
telefonin unë e marr.
Thirrja është për mua
është një çupë që unë e dua.
Është një çupë që mëson mirë
e ka pesë në matematikë.
Sa bukur reciton
lere më kur vallëzon.
Është e pastër dhe e mirë -
ta duash s’është vështirë.
Mami, babi, ju pse qesheni
s’ju ka ndodhur të pëlqeheni?!
Thirrja është për mua
është një çupë që unë e dua.

PROBLEM I ZGJIDHUR

Goni i vogël
pesë vjeçarë,
pyet gjyshen
kurreshtar.
Më thuaj, gjyshe,
ti ‘enciklopedi’,
si bëhet martesa
a bën ta di?
Si të gjej
nusen që më përket,
si të gjej
një grua vet?
Qeshet gjyshja
dhe përgjigjet,
s’është vështirë
kur di ”ligjet”.
Ligj nismëtarë -
ta pëlqesh me të parë,
ligj i dytë
ta duash me shpirt.
Dhe ajo
që do të përgjigjet,
poashtu
do t’i mësojë ”ligjet”.
Goni i vogël
ngrihet shpejt,
problem i zgjidhur
i duket krejt.
Qafon të ëmën
me dashuri,
dhe i thot
pa një pa dy.
Mami, unë
shumë të dua,
do martohesh
ti me mua?
Qeshet mami
e gjyshe ‘enciklopedi’,
për martesë
duhet tjetër dashuri.
Kur të rritesh
jeta do t’thotë,
të duash veç mamin
nuk mjafton dot.

MAMIN E KAM SHOQE

Tok me mamin në shitore,
tok me mamin n’ëmbëltore,
bashkë në punët e shtëpisë
bashkë detyrat e shtëpisë.
M’ep pak sandalet me taka
t’jem mes shoqeve më e larta,
m’ep pak buzëkuqin taze
se do  luajmë nuselale.
Me mamin bisedoj
për ″simpatinë″ i tregoj,
mos të na dëgjojë babi
mos të tallet vëllai Andi.
Mamin e kam shoqe.

PYET NJË FËMIJË
Të mëdhenjtë
pyet një fëmijë
pse në botë, ende
ka tmerr e uri.
Ende errësirë
ende lemeri,
i kujt është turpi
dua ta di.
Pse kaq frikë
pse kaq mërzi,
e zhurmë shumë
për pak dashuri.
Kujt i takon turpi
thoni,
thoni ta di.

PA RREGULLA

Ëndërrova
një natë,
një botë pa rregulla
gallatë.
Nuk kishte fare
fillim e mbarim,
as njësh as pesë
në mësim.
S’kishte ditë
e  s’kishte natë,
as fyerje
as lëvdatë.
U lodha shpejt
e u mërzita,
s’më shijonte gëzimi
e as frika.
U gëzova
kur më doli gjumi,
pa rregulla fare
do na mirrte lumi.

MË LINI TË JEM FËMIJË
Prind të dashur
e ju të tjerë,
gjithë sa njoh e di
më lini të jem fëmijë.
Rregulla, politikë
e gjithfarë marifete,
ju lutem
mbajini për vete.
Pa dhe bontonin
nëse s’e di,
më lini të jem
thjesht një fëmijë.
Botë e ëmbël
botë  e dlirë,
Piter Pançe -
shpirt  i lirë.

FTESË
 

Ftoj fëmijët
    anembanë.
        Në festë vallesh gjithë
 sa janë.
           Shotë, qyqek, ça ça ça,
       tango,samba,...
        Të qeshim, të lozim,
         deri në agim.
          Të njihemi, të duhemi
        pa dallim.

NUK E KUPTOJ

Nuk e  kuptoj fare
gjyshen time shakatare.
Përherë habitet
e nuk i tregon vitet.
Kur s’është në disponim
thotë i kam njëqind.
Kur qeshet me hare
thotë, as dhjetë si kam ende.

MËSUESJA S’MË BESON

Shpeshherë s’më beson
mësuesja jonë,
kur macja gishtin më kafshoi
për detyrat më qortoi.
As për ëndërrën që e pashë
as për gropën ku unë,
as për Barbin që volli natën
as për gripin që të dyja patëm.
Mësuesja s’më beson
ta them vjershën më kërkon,
nuk e mësova dot unë se
të luajmë Barbi më luti shumë.
Biseduam një natë
unë e Barbi gjerë e gjatë,
në fund erdhëm në përfundim
të ndahemi nganjëherë - obligim.
Ah si do na marrë malli
të dyjave, vaj halli.

NUK ËSHTË VETËM LOJË

Të luash me shokë
nuk është vetëm lojë.
Është edhe mjeshtri
për çfarë, gjithmonë
do t’kesh nevojë.
Të luash me shokë
nuk është vetëm lojë.
Të dish të falësh,
të dish të japësh,
të keshë shokë
përgjithmonë.
Të luash me shokë
nuk është vetëm lojë.
Të përbish dështimin,
 t’i urosh tjetrit fitoren,
t’i shtrish pa inat dorën.
Të luash me shokë
nuk është vetëm lojë.

I GJITHËDIJSHMI

Kur e këshillon,
kur e mëson,
kur diç i tregon,
ai nuk dëgjon.
Që në fjalën e parë
hidhet e thotë,
të gjitha i di
mos u mundo kot.
Babit, mamit
gjyshit, gjyshes,
kështu i thot
edhe mësueses.
Kalon viti
pa u ndjerë,
në klasë i gjithëdijshmi
për të dytën herë.

GJYSHE MUNDE KOHËN

Gjyshe, munde kohën
thotë i vogli nip,
ta përcjellësh modën
të jesh gjithmonë shik.
Flokët me ngjyrë
e pak briljantinë,
duart manikyrë
e në buzë karmin.
Do të të ndihmoj unë
do ta marrë detyrë,
s’do të njohësh veten
fare në pasqyrë.
Pastaj, do të dalim
bashkë në sheti,
gjithë sa na shohin
do t’na kenë lakmi.

Ç’KA TË RE NË DIZNILEND
Ç’ka të re në
Diznilend,
Tomi dhe Xheri
nuk zënë vend.
Mendojnë
të bien në ujdi,
të mos  ketë më
armiqësi.
Të ndalin luftrat
lidhën pakt,
të ftohen gjakrat
të pushojnë pak.
Po nuk zgjati
një ditë a dy,
Diznilendi mbet
pa fëmijë!
Ishte mërzi
po s’ shkonte ore,
Tomi e Xheri
dorë për dore?!
Që të dy
e panë qartë,
nuk ishin krijuar
për të qenë bashkë.
Ndryshe s’do kishte
të qeshura e risi,
Diznilend
e as fëmijë.

TË GJITHA NËNAT

Të gjitha nënat
njësoj janë,
thua një zemër
të gjitha e kanë.
Të gjitha fëmijët
adhurojnë,
të gjitha dashuri
dhurojnë.
Kur një nënë
të bekon,
jeta e bukur
t’duket gjithmonë.
Të gjitha nënat
njësoj janë,
thua një zemër
të gjitha e kanë.

TË NDËRROHEMI NJË DITË
 
Të lutem mami
ndërrohemi një ditë,
ti të bëhesh unë
e unë të bëhem ti.
Flokët të ti lidh
në bishtalecë,
të të vesh
si dua vetë.
Në kurs matematike
lojën  ta  shndërroj,
e kur të lodhesh
vjersha të t’mësoj.
E  të shohësh vetë
sa vështirë e kam,
e  të bindesh lehtë
se dembele s’jam.

FUQIA E FJALËS

Fjalë e duhur
Kur qëllon
Kodra zemre
Përtokë rrafshon
Shuan vullkane
Dimra e stuhi
Sjell të reshura
Diell e begati.


Përgatiti Flori Bruqi

Kosova

Kosova
rrafsh i lashte i dukagjineve
Kosova
Me ndarje dhe nendarje gjeografike
me ndarje dhe nendarje etnike
qe nga ujrat e kulluar te Ohrit
gjer ne erresiren  e minierave te Mitrovices
qe nga kaltersite e brigjeve te Ulqinit
gjer ne themelet  e gjakut ,ne Qelekullen e Nishit
Kosova
fushe e begatshme me miserishte e grunore
qe bie ere pranvere e tera lule molle
Kosova
male kreshnike
male pishe e bredhishte
qe dehin qiellin me arome rreshire
qe rrahin qiellin me krahe shqipesh
qe e ndezin qiellin me zbardhellime bore
Kosova
e manastirit ,e Prizerenit ,e Plaves dhe e gucise
Kosova e legjendave legjendare r Gjergj Elez Alise
Kosova
legjende e mbetur ne udhekryq te historise
Kosova
gjithnje ,ashtu si gjithnje
me dhembe shtrenguar e me shpirt ne dhembe
Kosova ku shqiptaret flasin nje gjuhe
dhe degjojne dy gjuhe
se bashku me gjuhen e nenes
edhe gjuhen e U D B -se
Kosova gjithnje ashtu
Bilal Xhaferri 


Ju dergoj me respekt kete poezi madhore te Bilal Xhaferit,ku te gjithe mund te lexojne dhe te kujtojne
Me respekt Drita Braho Berat

PSE TË FESTOJMË, KUR JEMI KËSHTU HUMBËS?!

Shkruan: Fadil SHYTI Politika e prapësive imperialiste në relacionin Moskë-Beograd-Paris-Athinë e gjetiu e ka krijuar problemin e paqenë kurrë të Mitrovicës së ndarë së bashku me kompromiset e poshtra të politikanëve të poshtër nga Prishtina-Tirana e gjetiu!... Deklaratat e Rajnihard, se: "Nuk do të lejomë përsëri një Berlin të dytë"; janë vetëm ca bombonierka të radhës për naivët politikë, -mirëpo, jo të gjithë shqiptarët i hanë këto bombonierka të përgatitura në kuzhinat e shteteve të lartëpërpendura. -Them kështu, kur dihet që, muri i “Berlinit Shqiptar”, ekziston në Prizren dhe mes përmes viseve shqiptare; qe 133 vjet! Ky mur i zi me kufij të përgjakur, duhet të hiqet një orë e më parë! Janë të parët tuaj z. Rajnihard që atëbotë e copëtuan si një mollë të kuqe –deri tek Molla e Kuqe –Shqipërinë Etnike. Ndërsa, ju pretendoni tani ta hedhni shigjetën gjetiu në pjesë të tjera të Shqipërisë Etnike të ricopëtuar. Ju fort mirë e dini z, se: Kosova ka forca të mjaftuara si Policinë e Kosovës, FSK-n , -e të tjera forca vullnetare që rrufeshëm si dikur armata heroike kroate e cila i shporri kolonialistët serbë nga Knini - pra, padyshim-do t´i dëbonin bandat kriminale serbo-çetnike; mirëpo, jeni pikërisht ju “miqtë” ndërkombëtarë që, me UNMIK-un, EULEX-in dhe KFOR-in, që tani e 12 vjet pas luftës jeni kthyer në SATELITË besnikë të sotëm të Serbisë në Kosovë e më gjerë, -pa harruar të përkujtoj edhe klasën servile politike "shqiptare" -që po e pengojnë çlirimin dhe ribashkimin e Mitrovicës së bukur dhe shumë të begatë -mbase, për të gllabëruar Trepçën e cila i ruan ndër shekujt vendburimet e pasurisë përrallore të Shqipërisë Etnike. Kjo, është PIKËSYNIMI i Serbisë fashiste dhe aleatëve të saj besnikë, që ta krijojnë edhe pas 133 vjetësh në veriun e Shqipërisë Etnike; një "Prizren të Dytë " -të ndarë me mashtrime e dhunë- me kufij imperialistë. Sa do ta arrijë këtë, -mbetet të shihet, -kur po deklarohet qartë kjo edhe gjatë bisedimeve që po zhvillohen nga klasa servile politike në mënyrë tejet të mbyllur (jo transparente) nga populli i Kosovës, atje në Bruksel, me këto bisedime "teknike", -këtë objektivë e ka gjakatarja Serbi. Vigjilencë o popull! Re të zeza po sillen mbi atdheun tonë të përflakur e të përgjakur në kurriz të të cilit “dikush” tani -po e feston 12 vjetorin e çlirimit - duke harruar marrëzisht e dinakrërisht se, shumë vise tona kanë mbetur sot e sot të ndara nga trungu AMË. E shtrenjta, e begatshmja dhe sokolesha trime, Kosova Lindore ende po heq të zitë e ullirit nën kthetrat sllave; poashtu simotrat tjera të saj Tetova Shqiptare, Malësia e Madhe dhe Çamëria Heroike, ende nuk iu bien rrezet e lirisë e të ribashkimit kombëtar për të cilën kanë derdhur lumë gjaku, gjatë shekujve. Suedi, 12 .06.2011

Letersia, historia dhe femijeria‏

Begzad Baliu: Fjala në pjesë e tretë për fëmijë të Orës letrare Lyra magjike

 

I nderuar Z. Kryetar i LSHK, Adem Demaçi

Të nderuar krijues të ardhur nga gjithë hapësira shqiptare dhe Ju mysafirë nga Turqia e Qiproja

Të nderuar Zonja e Zotërinj

Shumë të nderuar fëmijë dhe të rinj

 

Jam shumë i nderuar që më është besuar të hap një orë letrare për fëmijë dhe të rinj në këtë festë të madhe të shënimit të Lidhjes Shqiptare të Prizrenit, prandaj jo njëherë i kam thirrur mendjes, se si ta bëjë këtë në mënyrë që ta pëlqeni edhe ju.

Mendoja se a mund ta bëjë hapjen me një përrallë të gjyshërve tuaj, e cila flet për mbretin dhe mbretëreshën me kokën e mbuluar me kurora dafinash;

kam menduar ta hap me një tregim lozonjar me kalorësin mbi kalë dhe vajzën me flokë gështenjë e buzët e lyera me lëng dredhëzash të kuqe;

kam menduar, çka nuk kam menduar, dhe përsëri u jam  kthyer shkrimtarëve dhe nuk më ka rënë keq.

Prej poezisë së parë shqipe për fëmijë Ylli vogël lart në qiell, shkruar rreth dy shekuj më parë, prej romaneve fantastiko-shkencore të letërsisë së përbotshme, si 2000 milja nën det të Zhyl Vernit, si dhe prej veprave të tjera kam kuptuar se sa e madhe dhe reflektuese është imagjinata e krijuesve kur i referohen botës së tyre të pasur të fëmijërisë.

Dhe jo vetëm kaq: Mendimi kritik i letërsisë shqipe, sigurisht mbështetur edhe në mendimin kritik të letërsisë së përbotshme, ka ardhur në një përfundim sipas të cilit shkrimtar i madh është ai i cili arrin që në veprën e tij ta përjetojë përkatësisht ta përjetësojë fëmijërinë e tij.

Kanë pasur të drejtë apo jo, këtë e dëshmojnë edhe disa prej veprave, imazheve dhe situatave të papërsëritshme në letërsinë shqipe.

Kujtoni këtu imazhin e hyrjes së partizanëve në Prishtinë, në romanin e Adem Demaçit “Dashuria kuantike e filanit”, figurën emblematike të nënës në sytë e Xhezairit të Gjikës te romani i Rexhep Qosjes “Vdekja më vjen prej syve të tillë”, pamjen brilante të Gjirokastrës në sytë e fëmijërisë së Ismail Kadaresë, në romanin “Kronikë në gurë” etj.

Të dashur fëmijë!

Mbase ju mendoni se vetëm letërsia popullore apo vetëm letërsia e shkruar nuk bën pa ju?

Jo!

Unë dua të ju kujtoj se pa ju, pa dhimbjen dhe dashurinë për Ju, nuk ka kuptim as historia.

Historia jonë kombëtare ka shumë heronj epikë si Skënderbeu, shumë heronj legjendarë, si Oso Kuka e Mic Sokoli, por ka vetëm një Adem Jashar, jo pse e kishte kraharorin më të fuqishëm se Skënderbeu, jo pse ishte më trim se Oso Kuka, as se mund ta qante grykën e topit si Mic Sokoli, po sepse në vdekje për atdhe krahas Komandant Adem Jasharit shkonin edhe moshatarët tuaj: fëmijët e tij dhe të familjes së vet!

Para tyre, më parë se sa para krenarisë për Komandantin legjendar Adem Jashari, përulemi dhe dëgjojmë zërat e tyre që thërrasin për lirinë tonë, lotët nënave tona për ta (se nuk ka nënë që nuk i qanë zemra për fëmijët e vrarë edhe atëherë kur në ninulla e këndon Ti mu bëfsh si Mic Sokoli!) e, në mënyrë të veçantë dëgjojmë cicërimën e zërit të atyre fëmijëve që më parë se sa të klithin për dorën e ngrohtë të prindërve të tyre, klithën fortë prej copëzave të granatave.

E tash mos më thoni ju lutem se në biografin e tyre, mungon historia e Mic Sokolave, Oso Kukave e të gjithë atyre dëshmorëve që pavarësisht nga mosha i falën jetën dhe trupin atdheut tonë.

Dhe, meqenëse këtë unë nuk di ta them bukur dhe madhërishëm, po ua lë shkrimtarëve ta thonë për të gjithë ne.

 

Prizren, më 11 qershor 2011

 

ÇIFTI QIELLOR

Vullnet Mato
 
ÇIFTI QIELLOR

Shpesh e shoh Tokën si grua qiellore
dhe Diellin bashkëshortin e saj kozmik.
Jo thjesht nga dukuria e gjinisë emërore,
por edhe nga veprimet e ndërsjella në çift.

Toka bëhet nuse me vellon e pranverës,
grua shtatzënë përgjatë verës me vapë,
nënë në vjeshtë me gjirin ushqyes të jetës,
gjyshe në dimër për tu ricikluar prapë.

Dielli luan përmbi të rolin burrëror,
me afrimet trupore për çiftimin intim.
E ngroh, e përkëdhel, e ujit, e pllenon,
ndryshe nga planetet farefis në rrotullim.

Ashtu si në zbulimet sipas shëmbëlltyrës,
për shpikjen e mjeteve praktike shkencore,
ku njeriu imiton format dhe ligjet e natyrës,
ka vend dhe imitimi për rregullat njerëzore.

Ndoshta si shembull duhet marrë ky çift,
për besnikërinë aq të përsosur familjare,
siç Toka dhe Dielli të pandarë në shpirt,
jetojnë me vajzën e vetme, Hënën beqare.

Abuzim hipokrit i organizuar dhe skandaloz në Autostradën e Kosovës Morinë-Merdare

Foto-reportazh-koment  nga Asllan Dibrani  -2011

Shkruan Asllan dibrani

 

Kosova  e vuajtjeve ,Kosova e përçarjeve, Kosova  e  gjakosur  mbas shumë shekujve, Këto tmerre Kosova dhe ai popull i përjetoj  në palcë,  pasojat e sajë po i ndien   akoma. Ky popull po i ndien dhe plagët e shekujve,   deri me ditët e sotme  nga pushtuesit e racave te  huaja,në fushën ekonomike,sociale, kulturore,  integruese etj. Ne shqiptaret  ju gëzuam "Pavarësisë se Kosovës"  me këtë nocion menduam se do ti hiqen barrierat dhe ndërskamsat  këtij populli  të shumë vuajtur. Të  keqen ta bënë vetëm i huaj të vret, të përdhunon, te nënçmon  por edhe të zhduk ,se edhe për atë ka ardhur që të pushtoj ,të masakrojë  të degjenerojë dhe të shfrytëzojë. Një gjë e tillë sikur po na ndodhë edhe me pushtetarët tanë shqiptar  ,flasin shqip, bisedojnë shqip,polemizojnë shqip dhe  udhëheqin politikë shqip,komunikojnë edhe me popullin shqip , e jo siç ishin  gjuhët e pushtuesve deri me tash  romake,turke,italishte bullgare,hungarishte ,gjermanishte  dhe serbishte por me një politikë te mbrapsht . Po si sinonim i  kësaj teme është (skandali   i pa presidencë në zhvillimin e ndërtimit të   autostradës

 

 

 

Morinë-Merdare )që  do të na lidhë me Evropën.

 

 

Pamje e një abuzimi  skandaloze në "Autostradën Morinë -Merdare" cepi i  djatht  zhavorr dhe rërë,  parapërgatitje   përfundimtare e  shtresës së fundi  nga 5-6  cm" kësaj nuk i thuhet burrëri" !po korrupsion ,vjedhje e djersës se popullit.

Nga kureshtja  ,gëzimi,malli  që ta shohë autostradën e Kombit qe mund te quhet kryevepër, u shndërrua në mllef,revoltë dhe zhgënjim?

Ishte një ditë e  bukur dhe me vapë,  vendosa që nga kureshtja ta vizitoj këtë gjigante   "autostrade"për Kosovën akoma të  varfër   dhe me një ekonomi, shumë të pa perspektivë, por megjithatë u nise një rrugë  e domosdoshme që i nevojitet  kombit shqiptar ma shumë se çdo gjë. Zhurma  e here pas hershme  polemizuese  për këtë rrugë, përplasjet dhe debatet  në institucionet e Kosovës,  nuk lenin përshtypje të populli as pak dhe shpesh është irrituar masa. Shpesh janë dhënë shifra  marramendëse për këtë projekt, milionëshe e milionëshe,janë  etiketuar edhe figura te mëdha politike,janë shkruar me qindra artikuj , me dhjetëra emisione  televizive  duke i shpalosur  se kush ma shumë meritat e veta,por edhe   kritikat kundër njeri tjetrit, mbi  korrupsionin,  hajninë dhe keq menaxhimin  ekzistues  në teren! Arritja në  vendin e ngjarjes, sikur nuk ju pëlqej disa nëpunësve  qe  të hyj  në territorin ku zhvillohen punimet nga firma  Bechtel&Enka amerikano-turke, fituesja e tenderit  për këtë autostradë. Ata theksuan që  të  marre ndonjë konfirmim apo leje nga të" mëdhenjtë e famshëm" të tyre për ta vizituar apo fotografuar këtë projekt që po i zhvillon punimet.

 

Pamje e punëtorëve  shqiptarë në kohën e drekës,  të firmës Bechtel&Enka duke punuar në kushte të jashtëzakonshme , me  një orar të stërzgjatur,  nga 320 deri në 350 orë!

Pamje nga punëtorët shqiptar në kohën e drekës,  të firmës Bechtel&Enka duke punuar në kushte të jashtëzakonshme , me  një orar të stërzgjatur,  nga 320 deri në 350 orë, ndërsa sipas rregullores i kemi  160 orë në muaj theksojnë këta punëtorë të lodhur dhe të molisur nga  puna   e kësaj dite. Ma tutje shprehet një  burrë i shtyrë në moshë  me të ardhura  mujore deri ne 200 euro në muaj, gjysma po me shkon për udhëtim nga  fshati Zhuri  i Prizrenit , pa sigurime dhe pa të drejtë reagimi apo ankese,   siç ndodhi para disa  muajsh, akoma pa u organizua një protestë  u shua  me  presione ,shpërndarje dhe largime nga  puna , kush i ka bërë këto marifetlleqe  nuk guxuan të prononcohen me emër, por  thanë se i din qeveria e Thaqit në muajin mars, se kenë e kanë larguar  dhe pse i kane larguar nga puna !?...Këta punëtorë deklaruan shumë  te dhëna  rrëqethëse  por u lutën që mos ti publikojmë emrat e tyre  se na hakmerren dhe na largojnë nga puna!

Vet me vete thash se deri sa këta  janë  kritik ndaj medieve qe mos të lejohen njerëzit e tjerë ta vizitojnë këtë   vepër kapitale për  Kosovën, përfitova bindjen se diçka është duke  u "fshehur ose zier " dhe pa pritë mas  vazhdova ti afrohem  vend punimeve  të rrugës. Ishte  vërtet një kënaqësi   sikur te ishte  puna në rregull  e  këtij sejmeni rrugor  shumë e rëndësishme për  zhvillimin e  Kosovës dhe rajonit ,por me kalimin e një pjese te rrugës shihej se vërtet ka  hile , pikërisht   diku në kilometrin e 7-të në drejtim të Prizrenit nga Morina hasa në  rrugë të përfunduar edhe me shtresën e dytë  , sipas asaj qe shihet  ne praktikë aty kryhen dy shtresa të asfaltit  dhe e treta është finalja me nga 5-6  centimetra  trashësi . Ishte  thjesht rërë e trash zhavorr i shtrirë ne cepin e djatht të rrugës i ngjeshur  ,i përgatitur për shtresën e fundit  ku njeriu  i ndërgjegjësohem  vërtet tmerrohet  nga një  veprim skandaloz, ishte një trishtim rrëqethës për popullin shqiptar në këto kushte të mjerueshme, që  janë duke e nda edhe  kafshatën e bukës nga goja për me investua këtë projekti   në ndërtim. Populli i ka sytë nga ky projekt  i mirëpritur po i kushtueshëm,  deri  në palcë, në këtë kohë me një ekonomi shumë të dobët në Kosovë!  Ky projekt si pore kryesore për rajonin e Kosovës, Shqipërisë dhe të Evropës që do të lidhet kombi  ynë, është mëkat qe pas gjashte muajsh të gropohet siç po ndodh me rrugët e tjera në Kosovë.

Sido qe ta analizosh, paragjykosh ,vlerësosh  këtu ka te bëjë me një abuzim skandaloz.   Ky projekt  të sakatohet  nga njerëz, të pa përgjegjshëm ,nga njerëz të korruptuar nga  njerëz të pa vizion ,   në politikë ,ekonomi dhe fusha tjera   në interesin e popullit është vërtet një vepër skandaloze  edhe me përmasa ma te gjera  jashtë kufijve të Kosovës. Ky  është një skandal i pa parë   ne valën e  një  teme aktuale nga te gjitha institucionet e Kosovës që  mos të ketë  korrupsion lidhur me këtë rrugë ,kjo prapë po ndodhë s'mundet njeriu të thotë qe nuk po ndodhë kur paraja po derdhet për këtë projekt  ndërsa  ne anën tjetër të mbushet  rruga me  dhe  gur  e zhavorr s'ka koment? Me tu kthyer nga ajo rrugë isha  shumë i zhgënjyer  vendosa ta shkruaj  këtë pamje shume  tragjike për kombin ,për investimin dhe paratë e derdhura   për një rrugë që te jetë  rrugë  e ardhmërisë edhe për brezin e ardhshëm   e jo  për një kohë te shkurt te jetë rrugë   e gropave  dhe kalldrëmeve . Duke e pare këtë rruge ne praktike  aty përfiton  njeriu përshtypjen se dikush ka gisht në duke abuzuar në menaxhimin e sajë me sa vijon: 

 

Cepi i djathtë i rrugës duke e pritur  zhavorrin ne vazhdim si fazë  e parafundit! Pamje e pastër nga e djathta  pa asfalt  ,ndoshta  e lënë  qeveritarët  edhe  për veti nëse nuk  ju shkon te gjithëve  rreth arave  dhe katundeve  të tyre?

1."Firma kontraktuese",

2."Njerëzit mbikëqyrës" te objektit në fjalë ,

3."Qeveritarët në pushtet",

4. Apo  koalicioni  i te gjithave  "punën shkel e shko" qe ta ngjyrosi   rërën me ngjyrë sa për ta bërë përurimin, prerjen e shiritit dhe përfitimet e poenave politike  por edhe   duke i mbushur  gjepat me paranë dhe djersen  e popullit!

 

Pamje e dhimbshme e punëtorëve  ne këtë firmë  duke e keqtrajtua punëtorin kosovar  me  punë të rënda pa kushte ,me pagesa te vogla, të pa perspektivë duke  i spekuluar ne trajtimin e tyre gjeja se  kemi punësuar kaq e kaq !

 

Autostrada e Kosovës Morinë- Merdare projekt i gabuar në destinacion !

Ky projekt është përcaktuar nga "qeveritarët e famshëm kosovar " që të përfundoj në Mendare drejtimi i Prokuples në Serbi  qe interesat e kombit tonë janë shumë ma te vogla kur  ka mundësi të  ndërrohet destinacioni  i sajë nga Merdare në drejtim të Kosovës lindore  Preshevë ,Bujanovc e Medvegjë,  qe së paku të kenë dobi vëllezërit tanë që na kanë mbetur nën  pushtimin serb.

Pamje e pa koment e këtij kamioni,  punëtor i firmës  së lartpërmendur,  pa kurrfarë mbrojtje  dhe sigurie  nga punimet që bëhen në urë sipas fotos " jeta në rrezik" .

Ti ndihmojmë vëllezërit tanë atje,  e jo serbët e Shumadisë  për Prokuple e Krushevc. Ta shfrytëzojmë rastin  mor të mjerë "pushtetar  shqiptarë"  përmes këtij projekti  pozitën   gjeografike,  qe ta përforcojmë interesin e kombit ne strategji, ekonomi, me një politikë afatgjate dhe të qëndrueshme  për popullin shqiptar, në këtë rast për shqiptarët e Kosovës lindore, e qe gjeografikisht ma shpejt dalim  ne autostradën e Beogradit që të vazhdohet për  në shtetet e Evropës. Ky projekt në bazë të veprimeve praktike, po që vazhdon edhe ma tutje  mund të quhet  projekt i gabuar në destinacion me një kosto të pa llogaritshme për popullin e Kosovës në këtë kohë  me një ekonomi të dobët.

 

Punimet  në Autostradën  Morinë- Merdare  qe e lidh serbet e Shumadisë duke i anashkaluar vëllezërit e "Kosovës lindore" Ky projekt është përcaktuar nga "qeveritarët e famshëm kosovar " që të përfundoj në Mendare drejtimi i Prokuples në Serbi  qe interesat e kombit tonë janë shumë ma te vogla kur  ka mundësi të  ndërrohet destinacioni  i saj nga Merdare në drejtim të Kosovës lindore  Preshevë ,Bujanovc e Medvegjë,  qe së paku të kenë dobi vëllezërit tanë që na kanë mbetur nën  pushtimin serb.

 

Këtu po shihet se për një arsye apo një tjetër,qeveritarët aktual  janë duke  e gabuar destinimin e kësaj (Autostrade) duke i anashkaluar  vëllezërit  tanë  në "Kosovën lindore"   që të lidhen  me këtë rrugë dhe trungun e Kombit!...

Nga gjendja aktuale  thërras të gjitha institucionet, organet kompetente ,  tekniket e mbikëqyrjes dhe pjesëtarët e ndërgjegjësohem, të qeverisë   që të reagojnë  rreth  këtij  projekti të shkojnë në vendin e ngjarjes dhe ta vërtetojnë  me qëllim që të shpëtojnë  djersen  e popullit shqiptar ,që mos të varroset  në gropa dhe kalldrëme nga njerëz abuzues dhe të  korruptuar. Kombi ju thërret, o sot o kurrë, që tu themi "stop"  qyqarëve,abuzuesve, të korruptuarve,shpirtshiturve,hipokritëve, zuzarëve, injoranteve ,tradhtarëve,intrigantëve ,demagogëve,mafiozëve dhe antikombëtarëve. Ta shpëtojmë kombin, token e shenjte të Kosovës pa u copëtua dhe cenua, territori ynë, nga armiqtë shekullor. Shpresojmë se të gjithë  intelektualët janë të vetëdijshëm si në Kosovë  ashtu edhe në  Diasporë që ta kuptojnë situatën dramatike  në te gjitha segmentet dhe i ftoj që të jenë ma afër  ngjarjeve dhe   ta japin kontributin e vet    për çështjen e atdheut !?...