Fotografitë e publikuara nga takimi i sotëm mes kryeministrave Hashim Thaçit e Ivica Daçiqit në Bruksel tregojnë për një dallim të madh në tavolinë

Fotografitë e publikuara nga takimi i sotëm mes kryeministrave Hashim Thaçit e Ivica Daçiqit në Bruksel tregojnë për një dallim të madh në tavolinë. 

Fotografitë janë shpërndarë në rrjetet sociale dhe të gjithë vërejtur të njëjtën gjë, mungesën e dokumenteve ose fletoreve të shënimeve në tavolinë të ekipit të Kosovës.

Për dallim prej Thaçit dhe Shalës, kryeministri serb duket se është i përgatitur mirë për kërkesa. Përpara në tavolinën e tij shihen dokumente si dhe laps. Po ashtu tek baronesha Ashton.

Disa prej komentuesve e kanë përshkruar foton duke riaktualizuar thënien e famshme: “Budallai mban mend, i mençuri shkruan”.
Ka përfunduar raundi i gjashtë i bisedimeve ndërmjet kryeministrit të Kosovës, Hashim Thaçi dhe atij të Serbisë, Ivica Daçiq me ndërmjetësimin e Bashkimit Evropian, bisedime këto që për qëllim kanë normalizimin e marrëdhënieve midis dy vendeve.

RTV21 raportin se as në këtë takim nuk është arritur ndonjë marrveshje konkrete, ndërsa Kryeministri Thaçi ka deklaruar se është arritur marrëveshje verable për shpërbërjen e strukturave të sigurisë në veri të Kosovës.

Ai tha se është biseduar edhe për asosacionin e komunave me serbë, por që sipas Thaçit, ato nuk do të kenë kompetenca legjislative apo ekzekutive. Takimi i ardhshëm mbahet më 20 mars.

Kocijançiq: Bisedimet janë në një fazë vendimtare

Dialogu në mes të kryministrave të Kosovës dhe Serbisë, është në fazën më vendimtare dhe se të dyja palët duhet të jenë më konstruktiv që të arrihen marrëveshje.

Kështu ka thënë për Radion Evropa e Lirë, Maja Kocijançiq, zëdhënësja e shefes për politikë të jashtme të BE-së, Catherine Ashton.

“Është e qartë se cilët do të jenë hapat e mëtutjeshëm. Nuk kemi edhe shumë kohë , për këtë janë në dijeni edhe kryeministrat. Është duke u punuar që të arrihet deri të një progres”, ka thënë Kocijançiq, duke shtuar se edhe përkundër kësaj, është e vështirë të dihet se kur ky dialog do të mund të përfundojë.

Ajo ka shtuar se të gjitha marrëveshjet e arritura dhe ato që do të arrihen, janë në pajtim me qëndrimin e të dyja palëve.

Për 63 për qind të qytetarëve të Serbisë, Kosova është e pavarur

63 për qind të qytetarëve të Serbisë mendojnë se Kosova faktikisht është e pavarur dhe se Beogradi mund të “luftojë” vetëm për pozitë më të mirë të serbëve, tregon hulumtimi më i ri në Serbi.

B92 publikon rezultatet e hulumtimit ekskluziv rreth mendimit të qytetarëve të Serbisë për rrjedhën e deritashme të bisedimeve të dy kryeministrave (Daçiq-Thaçi).



B92 dhe Ipsos strategjik marketing kanë pyetur 1.003 qytetarë të Serbisë se çka mendojnë ata –si kemi biseduar deri më tash për Kosovën, a do të mund ndokush tjetër më mirë të udhëhiqte bisedimet dhe çfarë është roli i BE-së në bisedimet e Brukselit.Së pari është bërë pyetja se si e vlerësoni rezultatin e dialoguesit kryesor Ivica Daçiq.

61 për qind të qytetarëve të Serbisë mendojnë se kryeministri po dialogun mirë, së këtë po e bënë keq janë përgjigjur 21 për qind, ndërsa pa përgjigja kanë qenë 18 për qind të të anketuarve.

Në pyetjen se a ka Serbia dialogues më të mirë se Daçiq, 54 për qind e qytetarëve janë përgjigjur se nuk ka dialogues më të mirë se Daçiq. Çdo i katërti është i mendimit se ka të tillë që do të dialogonte më mirë se Daçiq, kurse rreth 20 për qind janë përgjigjur se nuk e dinë.

MUP e BIA, aktive në veri

Mund të jenë edhe 1,000. Por, në fakt, autoritetet kosovare nuk e dinë saktësisht numrin e forcave që Serbia ka sistemuar brenda strukturave të veta të sigurisë në veri të Kosovës, që Prishtina i quan si struktura ilegale. Por çka dinë saktë institucionet në Prishtinë, është se shërbimet e inteligjencës policore dhe ushtarake serbe, ka argatët e vetë matanë Ibrit. Ka policë dhe ish-policë të MUP-it.

Ministri i Punëve të Brendshme Bajram Rexhepi tha për Radion Evropa e Lirë, se shtrirja e institucioneve serbe të sigurisë në veri, është e evidentuar.

“Në numër është shumë vështirë të dihet numri. Por në shumicën e rasteve, është llogaritur se janë diku rreth 200 deri në 400. Ky numër ka variruar varësisht nga situata. Këto janë struktura të MUP-it. Kurse për strukturat e BIA-së nuk kemi ndonjë informacion".

"Ndërsa të Mbrojtjes Civile, llogaritet diku që mund të jenë rreth 500-600, se aty përfshihen edhe zjarrfikësit, edhe përpara mbrojtja territoriale-siç e kanë quajtur-kanë funksionuar të gjithën nën petkun e Mbrojtjes Civile,” numëroi ministri.

Ai sqaroi se Serbia ka struktura të shtrira në veri që vijnë nga aradhet e policisë, dhe ish-pjesëtarët e MUP-it.

Detaj tjetër, sipas ministrit Rexhepi, është se disa prej këtyre policëve të Serbisë janë qytetarë të Kosovës, por ka edhe nga Serbia.

Beogradi zyrtar, në veri ka funksionale edhe Agjencinë e Sigurisë dhe Inteligjencës-BIA, por jo vetëm kaq siç shpjegon ministri.

“Kanë edhe një formacion të inteligjencës ushtarake. Dhe si struktura ilegale të cilat kamuflohen nën petkun e veprimeve emergjente, ose të mbrojtjes civile, janë ish-strukturat qoftë ushtarake të formacionit, që nën petkun e zjarrfikësve ose reagimeve emergjente, kanë pretendime edhe ata që në situata të caktuara të jenë të armatosur dhe të veprojnë,” shpjegoi Rexhepi.

Kryeministrat Hashim Thaçi e Ivica Daçiq janë duke tentuar që të gjejnë një zgjidhje në Bruksel për zhbërjen e strukturave që Serbia ka në veri të Kosovës. Ose të paktën përfshirjen e këtyre nëpunësve në strukturat kosovare të sigurisë.

Në një deklaratë për Radion Evropa e Lirë, kryetari i Mitrovicës, Avni Kastrati tha se negociatat për këtë problem, po bënë që këto formacione në terren të shtojnë veprimet kriminale.

“Ato janë struktura kriminale, të cilat thjesht po e vlerësojnë se ju ka ardhur fundi. Edhe janë të interesuara të bëjnë çrregullime maksimale, për të mundur edhe më tutje eventualisht të mbijetojmë. Janë struktura të cilave nuk ju konvenon qetësia, nuk ju konvenon paqja. Prandaj, ata bëjnë krejt çka është e mundur që të krijojnë probleme, e të krijojnë destabilizim. Por sigurisht se nuk do t’ia dalin”, tha ai.

Edhe kryetari i komunës së Mitrovicës, thotë se nga Policia e Kosovës, EULEX-i dhe KFOR-i ka informacione që e konfirmojnë praninë e të paktën tri formacioneve të sigurisë që Serbia ka në veri të lumit Ibër.

Por sqaron se nuk është kompetent për t’i numëruar ato.

Në ndërkohë, Prishtina zyrtare ka bërë gati një plan për periudhën transitore, që pritet të pasojë me fillimin e zbatimit të marrëveshjes për zhbërjen e institucioneve që Serbia ka në veri.

---------------------------

Një ekip me ushtarë amerikanë po përgatitet të vijë në Kosovë. Ekipi planifikon të arrijë në këtë pranverë dhe do të përbëhet prej qindra ushtarëve.

Ata me selitë e Brigadës 525 dhe Skuadronin e Parë të Regjimentit të 38-të të Kalorësisë, do të vijnë këtu.

Kur ushtarët e Brigadës 525 të Monitorimit të Fushës së Luftës do të dërgohen këtë vit jashtë vendit, do të jenë në një mision krejtësisht të ndryshëm prej atij që presin.

Qindra ushtarë me selitë e Brigadës 525 dhe Skuadronin e Parë të Regjimentit të 38-të të Kalorësisë, do të dërgohen këtë pranverë në Kosovë, kanë bërë të ditur zyrtarët.

Misioni në Kosovë është harruar nga publiku amerikan për shkak të mbetjes në hije të luftërave në Afganistan dhe Irak, ku ishin dërguar ushtarë të Gardës Kombëtare dhe rezervistë të ushtrisë.

Kur Brigada 525 do të dërgohet në Kosovë për të marrë komandën e Grupit Multi-nacional të Lindjes, ky besohet se do të jetë njësiti i parë aktiv ushtarak që do të marrë komandën pas pothuajse një dekade.

“Ishte menaxhuar kryesisht nga forcat e Gardës dhe të Rezervistëve, që kishin bërë një punë të mahnitshme”, ka thënë koloneli Xavier Brunson, komandant i Brigadës 525.

Brunson, një vendës i Fayetteville, nuk do të dërgohet në mision me brigadën e tij. Ai do t’ia dorëzojë komandën kolonelit Dave Woods në një ceremoni në mars.

Por ai kishte mbikëqyrur ushtrimet e misionit dhe ka thënë se Kosova do të përbëjë sfida për brigadën, që në fillim ishte përgatitur për mision në Afganistan, ku po shërbejnë dy prej batalioneve të brigadës – batalionet 319 dhe 519.

“Do të jetë një gjendje e re mendore”, ka theksuar ai.

Ndryshe prej Afganistanit, në Kosovë nuk do të përballen me luftime të ashpra, ka thënë Brunson. Në vend të kësaj, ushtarët e tij do të punojnë me zyrtarët lokalë për të ndihmuar në sigurimin e lirisë së lëvizjes ndërmjet enklavave etnike.

“Si mund t’i ndihmojmë ata?” ka pyetur Brunson. “Ne mund të mos jemi prijës. Ne mund të jemi informues. Ne duam të sigurojmë se është e sigurt dhe pa asnjë rrezik që njerëzit të shkojnë kudo që duan”.

Kosova është një shtet relativisht i ri në Gadishullin Ballkanik në lindje të Evropës, në veri të Greqisë. Kosova e ka deklaruar Pavarësinë më 17 shkurt të vitit 2008.

Prania amerikane në këtë vend daton qysh në vitet nëntëdhjetë, kur forcat e NATO-s dhe shtete e tjera partnere dërguan një forcë paqeruajtëse për t’i shuar tensionet ndërmjet Kosovës dhe Republikës Federale të Jugosllavisë.

Në një moment, forcat e huaja në Kosovë kishin kaluar shifrën prej 50 mijë trupash, kanë bërë të ditur zyrtarët. Tani ndodhen vetëm 5.600 ushtarë.

Brunson, i cili ka qenë në mision në Kosovë në fund të viteve nëntëdhjetë, ka thënë se shumëçka ka ndryshuar pas një dekade.

Këtë e kishte parë me sytë e tij, kur kishte vizituar në fillim të këtij viti Kosovën për të përgatitur dërgimin e ushtarëve në mision.

Brunson ka thënë se ishte duke u përgatitur për të dalë prej bazës së NATO me zyrtarë të tjerë, kur kishte vënë helmetën dhe jelekun antiplumb. Zyrtarët i kishin thënë se nuk ishte e nevojshme ta bënte një gjë të tillë.

“Gjendja ka ndryshuar shumë”, ka theksuar Brunson, duke treguar se afër selisë së NATO-s në Prishtinë po zhvillohej biznes i suksesshëm. “Mbaj mend se dikur nëse kthehesha pa rënë terri, do të mund të hasje në telashe”.

Situatë krejtësisht e ndryshme

Por tani, “konflikti nuk është i dukshëm”, ka theksuar Brunson. “Njerëzit po merren me jetën e tyre”.

Një ndryshim tjetër është bashkëpunimi ndërmjet shteteve, ka treguar Brunson.

Kur Brigada 525 të arrijë në Kosovë, do të punojë bashkë me ushtarë armenë, gjermanë, marokenë, polakë, turq dhe ukrainas.

Në vitin 1999, kur Brunson kishte shërbyer në Kosovë, shumë prej shteteve kishin ushtarë në mision, por nuk kishte bashkëpunim të madh.

“Secila forcë ishte një ishull”, ka thënë Brunson. “Tani gjithçka është globalizuar”.

Botohet libri “Antika e mohuar”, i Fahri Xharrës

Ditë më parë, shtëpia e botimeve elektronike “Filozofia Urbane” e ka botuar librin elektronik “Antika e mohuar”, të publicistit Fahri Xharra. Shkrimet në këtë libër janë vetëm një pjesë e krijimtarisë së gjerë publicistike të Fahri Xharrës. Koleksioni i shkrimeve në këtë botim e pasqyron një pedanteri krijuese në funksion të zbërthimit të së vërtetës historike që vazhdimisht është mohuar. Kështu shkruan në ueb-faqen zyrtare të “Filozofisë Urbane”, ku edhe lajmërohet për botimin e këtij libri. “Filozofia Urbane” është shtëpi botuese, e specializuar në fushën e botimeve elektronike. Artikujt në këtë libër trajtojnë tema interesante dhe mjaft aktuale për kohën, si dhe japin informacione mbi synimet serbe për ta tjetërsuar trashëgimin shqiptare, dhe faktet kundër këtyre synimeve. Shtëpia e Botimeve Elektronike “Filozofia Urbane” është e specializuar në fushën e botimeve elektronike. Është e para këtij lloji në gjithë botën shqiptare.

Isa Vatovci

Arkeologët, në gjurmë të jetës parahistorike në Kosovë

Arkeologët kosovarë janë vënë në 'gjah' për të gjetur gjurmë jete në kohën paleolite në Kosovë. E, kërkimi i gjetjeve të gjurmëve nga kjo periudhë e lashtë parahistorike do t'i dërgojë ata në një mision specifik, hulumtimi nëpër shpellat e vendit. Territori i Kosovës është mjaft i pasur me shpella nga më të ndryshmet. Disa nga to radhiten ndër bukuritë e rralla botërore. Një numër mjaft i madh i këtyre shpellave dhe kushtet e mira natyrore, kanë krijuar kushte ideale për jetë në të gjitha periudhat historike. Deri më sot, shumë nga to tashmë janë dokumentuar. Por, periudha paleolite në Kosovë ka mbetur e errët. Kjo e ka shtyrë Institutin Arkeologjik të Kosovës për ta nisur projektin për këtë periudhë. E, vendet më ideale për të arritur deri te gjurmët që dëshmojnë këtë, janë shpellat.
Studimi i periudhës paleolite
Në një prononcim për "Kosova Sot", arkeologu Luan Gashi, që është edhe bartësi i këtij projekti, në një prononcim për "Kosova Sot", është shprehur se projekti i sivjetmë i Institutit Arkeologjik është studimi dhe gjetja e gjurmëve të jetës në kohën paleolitit në Kosovë. Studimi i periudhës paleolite, e cila përfshin një periudhe të gjatë kohore me miliona vite para epokës sonë, kërkon përgatitje dhe kohë të gjatë. E, vendi më adekuat për t'i gjetur këto gjurmë, sipas arkeologut Gashi, janë shpellat. Historikisht dihet se njeriu i kohës së lashtë apo ai i kohës së gurit është strehuar nëpër shpella dhe aty ai i ka lënë edhe gjurmët e tij. Sipas tij, në Kosovë ka mbi 1.200 shpella, të cilat mund të dëshmojnë se në Kosovës ka pasur jetë edhe në kohën paleolite. "Shpellat janë vendet më të sigurta, të cilat dërgojnë deri te gjurmët e jetës paleolite", ka thënë ai. Gashi ka thënë se është optimist për të gjetur gjurmë jete të kohës paleolite në Kosovë. Sipas tij, ka mjaft indikacione që e dëshmojnë këtë. Aktualisht arkeologët e IA-s janë duke i hulumtuar të gjitha shpellat që janë të evidentuara, por edhe zbulimet më të rejave. "Në fazën e dytë, gjatë këtij viti, do të nisë eksplorimi në gjitha shpellat për të parë se cila nga to ka ofruar kushte për jetë", ka thënë ai.
Shpellat e Radavcit
Arkeologu Gashi ka thënë se në bazë të pozitës dhe kushteve klimatike, Kosova ka qenë një vend ideal për jetë edhe në kohën e paleolitit, andaj ai është i sigurt se kërkimet do t'i japin rezultatet e pritura. "Në gjithë Ballkanin kjo është dëshmuar, por në Kosovë, për arsye që dihen, nuk janë bërë hulumtimet. Kjo dëshmon se këtu ka pasur jetë në këtë periudhe, bile ekziston mundësia të gjenden gjurmë edhe të periudhës së neandertalit", ka pohuar ai, duke shtuar se një nga shpellat që është hulumtuar deri diku dhe që mund të shpjerë deri te këto gjurmë, është ajo e Radavcit të Pejës. "Gjatë hulumtimit në shpellën e Radavcit, kemi hasur në të gjitha periudhat, por jo në paleolit. Mirëpo, hulumtimet i kemi ndërprerë për shkak të buxhetit, presim t'i vazhdojmë dhe besoj do të arrijmë në rezultate të pritura", ka thënë ai, duke shtuar se dëshmitë për jetë paleolite vijnë nga vitet e mëhershme, ato të '60-ta të shekullit të kaluar, ku arkeologët serbë kanë gjetur diçka. "Në literaturë shkruhet se është gjetur një nofull, që i ngjason asaj të njeriut, por nuk është, ndërkaq edhe ajo dëshmi, si shumë artefakte, janë bartur në Serbi", ka pohuar ai. Po ashtu, ai ka thënë se para luftës së Kosovës, arkeologët serbë kanë bërë çka kanë dashur me pasuritë arkeologjike të Kosovës.
Shpellat, atraksione turistike
Përveç rëndësisë për dëshmimin e jetës në periudha historike, shpellat e Kosovës do të ishin edhe atraksione të rëndësishme turistike, duke mundësuar edhe thithje të të hyrave, jo vetëm për banorët lokalë. Por, ato ende nuk janë duke u parë si burim i të hyrave. Shpella e Gadimes, një nga bukuritë e rralla që natyra ia ka falur Kosovës, aktualisht është në gjendje të mjerueshme. Fare pak, për të mos thënë asgjë, gjatë këtyre viteve është bërë për këtë shpellë. E njëjta situatë është edhe me shpellat e tjera të Kosovës, ku përveç se mungojnë investimet, nuk është bërë asnjë reklamim për rëndësinë apo bukuritë e tyre. Arkeologu Gashi ka thënë se në kuadër të projektit për eksplorimin e shpellave do të ndahen edhe fonde për të botuar fletushka apo katalogë informues. Sipas tij, Shpella e Gadimes është në gjendje të vështirë dhe për ta përgatitur për turizëm, duhen investime të mëdha. "Aty mungon çdo gjë. Ka raste edhe kur është ndalur rryma elektrike dhe brenda kishte vizitorë. Kjo është e tmerrshme", ka thënë ai, duke shtuar se në kuadër të projektit do të punohen ca katalogë informues për pasuritë e kësaj shpelle, e cila ende nuk është eksploruar sa duhet.
I. Vatovci

prof. dr. Kadri BICAJ -“Metodologjia dhe shkrimi ligjor”, libër me vlera dhe i dobishëm

Struktura tematike e librit

Ditë më parë, nga prof. dr. Kadri BICAJ është botuar teksti universitar “Metodologjia dhe shkrimi ligjor”. Libri konsiston në dy pjesë, të cilat janë të ndara në kapituj. Pjesa e parë e librit në fjalë trajton kuptimin dhe lëndën e shkrimit akademik dhe të metodologjisë, koncepcionin për metodologjinë, shkrimin ligjor, aktet ligjore gjatë historisë, kodifikimin, procedurat legjislative, parimet themelore të procesit legjislativ, hartimin dhe zbatimin e legjislacionit. Kurse pjesa e dytë e librit shtjellon teknikat dhe parimet legjislative, strukturat e akteve ligjore, hartimin e akteve ligjore, gjuhën normative, shenjat e gabimeve shkrimore, shenjat e korrekturës, burimet e së drejtës dhe rolin e tyre, hartimin dhe interpretimin e normës juridike, shqyrtimin e projekt - ligjeve në legjislativ, dispozitat lidhur me procedurat administrative, referencat, procesin e të shkruarit akademik dhe fjalorin juridik të shkurtër të termave kyçe në po këtë libër.

Vështrim i përgjithshëm i librit

Nga strukturimi tematik i librit, prima facie, nga pamja e parë mund të krijohej përshtypja e shtjellimit të tij në një inkoherencë të caktuar; ndërkaq pas vështrimit të tërësishëm të librit rezulton se të dy pjesët e tij me kapitujt respektivë shtrihen në korrelacion organik dhe tok e japin një trajtim serioz e metodologjikisht të konceptuar mirë të problematikës referuar metodologjisë së shkrimit ligjor, shkrimit ligjor, hartimit të akteve juridike të përgjithshme, shqyrtimit legjislativ dhe miratimit të akteve juridike të përgjithshme, interpretimit të akteve juridike të përgjithshme, kodifikimit të akteve juridike të përgjithshme, burimeve akte - formale e burimeve fakte - materiale të së drejtës, teknikave dhe parimeve themelore legjislative, shenjave e simboleve legjislative si dhe, përgjithësisht, kërkesave esenciale të metodologjisë së aktiviteteve legjislative, metodave dhe teknikave legjislative, interpretimit juridik dhe implementimit të akteve juridike të përgjithshme.

Mendimi juridik

Autori dr. Kadri Bicaj, librin në fjalë e fillon me thënien - të shkruash mirë do të thotë të mendosh mirë!
Aforizmi i tillë, pos tjerash, kërkon që paraprakisht cilido autor, shkrimtar juridik apo, në përgjithësi, cilido jurist në judikaturë ose në jurisprudencë do të duhej të mendonte sikundër duhet për rastin, përkatësisht çështjen e caktuar; ndërkaq edhe pse nuk theksohet eksplicite, vetvetiu - implicite stimulohet nevoja immediate se për të menduar mirë, Condicio Sine Qua Non, kërkohet dija solide juridike tok me vlera intelektuale, së paku në nivele të standardeve të përgjithshme. Pikërisht kjo çështje paraprake, si deficiencë dhe insuficiencë elementare dallohet tek jo pak autorë apo shkrimtarë juridikë. Në këtë drejtim është orientuar edhe tehu i mesazhit të këtij tekstit; më pastaj edhe të menduarit (juridik) të mirë nuk nevojitet që i njëjti të shkruhej mire, ngase ndër të tjera kërkohet edhe kultura gjuhësore e mbi të gjitha ajo terminologjike juridike dhe në përgjithësi sfondi i thellë i njohurive nga shkenca dhe praktika juridike.
Mendimi juridik adekuat mund të krijohej vetëm pas studimeve të thella e serioze të shkencave juridike, si dhe të ndërlidhjes koherente të tyre me praktikat juridike të mira.
Pikërisht në atë drejtim, autori Bicaj e ka orientuar vështrimin analitik të metodave dhe teknikave juridike në funksion të mendimit juridik e, rrjedhimisht, të shkrimit juridik të përshtatshëm, të drejtë, të qartë, të kuptueshëm dhe të komentueshëm lehtë e rrjedhshëm krejtësisht, në favor të sendërtimit të plotë të synimit të ligjvënësit.
Autori Bicaj me të drejtë është përcaktuar për analizimin kritik, fillimisht të të menduarit juridik adapt e rrjedhimisht të të shkruarit juridik kompetent, në radhë të parë të akteve juridike të përgjithshme e individuale, përkatësisht të ligjeve, akteve nënligjore, statuteve, rregulloreve, rregullave, vendimeve, aktvendimeve, aktgjykimeve, aktakuzave dhe aktpadive.

Nomoteknika juridike

Në këtë libër i është kushtuar një kaptinë e veçantë nomoteknikës juridike, e cila në vendin tonë pothuajse krejt pak përfillet për ç’shkak një numër i konsiderueshëm i akteve juridike të përgjithshme dhe individuale janë të mangëta, defektoze dhe si të tilla, për kah aspekti juridik - formal, të abroguara apo juridikisht invalidore.
Edhe sipas autorit Bicaj, për një rend juridik, çështje relevante është hartimi i akteve juridike sipas standardeve unike afirmative të legjislacionit bashkëkohor. Lexuesi i kujdesshëm i librit të autorit Bicaj, pashmangshëm do të përfitonte njohuri të çmuara referuar teknikave dhe metodave legjislative të standardizuara dhe të afirmuara në praktikat bashkëkohore.
Me të drejtë autori Bicaj e ka apostrofuar nevojën dhe të njëjtën e ka argumentuar se cilido akt juridik i përgjithshëm do të duhej të konceptohej politikisht referuar idesë së synimit elementar e rrjedhimisht do të duhej të dominohej nga aktiviteti profesional i ekspertëve juridikë të pajisur me njohuri doktrinare tok me eksperiencat më të mira nga praktikat juridike respektive.
Segmenti i librit në fjalë që i përpunon sa dhe si do të duhej çështjet strukturale ligjore nis nga pjesa hyrëse - preambula, titulli apo emërtimi, dispozitat e përgjithshme, dispozitat themelore dhe dispozitat përfundimtare e kalimtare, pa dyshim reflekton vlera teorike dhe për aq edhe praktike në shërbim sa të studentit, aq edhe të hartuesit, përkatësisht të aplikuesit të aktit juridik të përgjithshëm të caktuar.