Zëvendësministri i Administrimit të Pushtetit Lokal Bajram Gecaj: Ndjej dhembje nëpër çka po detyrohet të kalojë policia

Zëvendësministri i Administrimit të Pushtetit Lokal Bajram Gecaj përmes një statusi në llogarinë e tij në Facebook ka reaguar ndaj protestave të një dite më parë të opozitës.

Ai ka theksuar se sipas opozitës kriza politike nuk zgjidhet me represion e nëse kjo vërtetë do të qëndronte, dhe nëse pjesa tjetër e spektrit politik do të sillej në të njëjtën mënyrë, atëherë pason konkluzioni logjik se kriza politike do të duhej të zgjidhej me kundërmasa të njëjta, e jo nga organet shtetërore të thirrura (në secilin vend demokratik) për rend, ligj e siguri.

“Pra, deputetët e pozitës do të duhej të imitonin sjelljet “politike” të opozitës, duke u hedhur mbrapa atyre gazin lotsjellës’ ka shrkuar Gecaj,

Ai njëherit e ka lavdëruar punën e policisë së Kosovës.

“Në këtë kohë, unë me gjithë shpirt e zemër përgëzoj dhe ndjej dhembje të thellë për katrahurën nëpër të cilën po detyrohet të kaloi POLICIA e KOSOVËS (vajzat dhe djemtë e këtij populli)” shkruan më tej ai, transmeton Klan Kosova.

Lexoni më poshtë postimin e plotë të tij:

“Kriza politike nuk zgjidhet me represion”, thonë pjesëtarë të opozitës. Nëse kjo vërtetë do të qëndronte, dhe nëse pjesa tjetër e spektrit politik do të sillej në të njëjtën mënyrë, atëherë pason konkluzioni logjik se kriza politike do të duhej të zgjidhej me kundërmasa të njëjta, e jo nga organet shtetërore të thirrura (në secilin vend demokratik) për rend, ligj e siguri. Pra, deputetët e pozitës do të duhej të imitonin sjelljet “politike” të opozitës, duke u hedhur mbrapa atyre gazin lotsjellës, duke i gjuajtur me shishe, duke i spërkatur me sprej helmues, duke u fishkëlluar tek veshët deri në çmendje, duke u hedhur mbrapa koktej molotov, duke u thyer kokat me kubëzat e rrugëve të Prishtinës, duke djegur e shkatërruar pronën publike e private, duke i nxjerrë me forcë pjesëtarët e opozitës nga veturat e tyre private a zyrtare dhe duke ua shkatërruar të njëjtat…………….. E kjo me gjasë do të ushtrohej deri në humbjen e durimit nga njëra apo pala tjetër (apo edhe nga vetë populli), duke shndërruar kështu këtë sjelljeje “politike” në një konflikt të hapur fizik mes deputetëve (me rrezikun e një lufte civile). Pastaj, e gjithë kjo, në bazë të standardeve tashmë të vendosura e të ushtruara nga opozita, do të mund të kualifikohej si sjellje “e matur politike” e një konflikti të një “revolucioni të vonuar demokratik” (Model: Shqipëria e vitit 1997). Në këtë kohë, unë me gjithë shpirt e zemër përgëzoj dhe ndjej dhembje të thellë për katrahurën nëpër të cilën po detyrohet të kalojë POLICIA e KOSOVËS (vajzat dhe djemtë e këtij populli).

Gratë e opozitës në marsh protestues, kërkojnë lirimin e Donika Kadaj – Bujupit

Kryesitë e grave të AAK-së, VV-së dhe të Nisma-s, sot në orën 14 do të mbajnë një marsh protestues, në kërkim të lirimit të deputetes së Kuvendit të Kosovës, Donika Kadaj-Bujupi.

Në një komunikatë ku jepet ky njoftim thuhet se marshi do të jetë i qetë dhe do të jetë manifestim i mospajtimit të grave, me arrestimin e një deputeteje, e cila mospajtimin e ka shprehur në kuvend.

Motoja e këtij marshi do të jetë:”Shteti që arreston deputetët e popullit, është diktatorial”.

Kryeministri z.Isa Mustafa i sugjeron institucionet të mos i përdorin veturat zyrtare

Kryeministri Isa Mustafa, ka këshilluar të gjitha institucionet që të mos përdorin veturat zyrtare.

Këtë informatë e ka konfirmuar zëdhënësi i Qeverisë, Arban Abrashi.

“Kryeministri i ka sugjeruar të gjithë që të mos i përdorin veturat zyrtare, përpos ndonjë rasti të veçantë”, është shprehur Abrashi.

Ky zhvillim erdhi pas incidenteve të ditës së djeshme, ku protestuesit demoluan një numër të veturave zyrtare.

Presidenti i Shqipërisë, Bujar Nishani: Pamjet e fundit keqpërdoren nga kundërshtarët e Kosovës

Presidenti i Shqipërisë, Bujar Nishani, në një intervistë për RTV Dukagjinin ka komentuar situatën e fundit në Kosovë, pas protestave dhe imazheve që janë parë kohëve të fundit në vendin tonë.

Nishani ka pasur porosi të qarta për liderët e të gjitha partive politike në vend, sidomos për liderët e partive opozitare, duke thënë se protestat e dhunshme në rrugë dhe sheshe nuk janë zgjidhja e duhur.

Sipas presidentit shqiptar imazhet e fundit, do të keqpërdoren nga ata që nuk ia duan të mirën Kosovës.

“Nuk besoj se imazhet e fundit e ndihmojnë dhe e nderojnë shtetin e Kosovës, përkundrazi, keqpërdoren keq shfrytëzohen nga ata të cilët nuk e duan fort Kosovën. Mos të harrojmë se Kosova nuk i ka të gjithë miq. Shqiptarët kanë edhe të tjerë që nuk janë shumë miqësorë më shqiptarët. prandaj askush të mos i jep mundësi të padrejta për t’i keqpërdorur në funksion të frenimit të shpejtësisë së lëvizjes së shqiptarëve', ka thene Nishani.

Duke folur për protestat e tri partive opozitare, VV AAK dhe NISMA, Nishani ka thënë se është e drejtë e secilit që të shpreh dyshimet dhe kërkesat për marrëveshjet, por që zgjidhja, sipas tij për të gjitha mosmarrëveshjet është vetëm brenda debatit në institucionet e Kosovës .

“Kosova ashtu si Shqipëria ashtu siç edhe vendet e tjera të Ballkanit, sic vendet e tjera të Evropës, kanë zgjedhur një sistem të caktuar politik dhe kemi pranuar të jetojmë në një shoqëri të organizuar mbi bazën e institucioneve. Ndaj mos marrëveshjet diferencat e pikëpamjeve diskutohen debatohen në institucione dhe natyrisht marrin prioritete dhe marin përparësi në momentin kur sovrani në procesi në votimeve të liria dhe demokratike përcakton se cila është vizioni që shumica mbështet, cili është objektivi që shumica mbështet. Pra duke i diskutuar çështjet ne nuk mundemi që të gjithë duhet të kemi të njëjtën ide të njëjtën pikëpamje sepse në fund të fundit kjo është pikëpamja që ofron demokracia dhe liria e të shprehurit dhe të menduarit”, ka thënë Nishani.

Sipas Ministrit te Punëve të Jashtme të Kosovës, Hashim Thaçit kjo është arsyeja pse opozita nuk protestoj sot

Ministri i Punëve të Jashtme të Kosovës, Hashim Thaqi sot ka reaguar rreth protestave të djeshme. Ai thotë se opozita nuk po proteston sot jo për të ruajtuar institucionet e Kosovës nga shkatërrimi, por për të blerë kohë që të gjej sa më shumë njerëz të dhunshëm.

Postimi i plotë:

Opozita e frustruar dhe e dhunshme bëri publike se sot tërhiqet nga protestat e dhunshme për marrjen e pushtetit me dhunë. Natyrisht, nuk harruan të bëjnë kërcënime publike ndaj zyrtarëve më të lartë shtetërorë duke u thirrur në logjikën e kanuneve provinciale. Opozita sot vendosi të mos vazhdojë shkatërrimin e institucioneve shtetërore, pronës publike dhe private, jo për shkak se e kanë kuptuar se sa të dënueshme janë veprimet e tyre të dhunshme. Ata sot po pushojnë për të blerë kohë që të gjejnë njerëz të tjerë të dhunshëm kudo që munden sepse radhët e tyre po rrallohen. Por, kjo nuk e befason askënd. Të gjithë qytetarët e Kosovës në mënyrë të bashkuar po denojnë dhunën e shfrenuar të opozitës për marrjen e pushtetit. E gjithë bota demokratike, SHBA-ja dhe BE-ja i dënojnë dhunën dhe metodat e dhunshme. Prandaj, nuk është e rëndësishme se çfarë strategjie përdorë ky grup i dhunshëm. Ata mund të tërhiqen sot, por qytetarët dhe institucionet shtetërore nuk do të tërhiqen kurrë sepse me asnjë çmim nuk do të lejojmë shkatërrimin e shtetit nga një grup opozitar i dhunshëm. HTH

Lëvizja Vetëvendosje! : Dhjetëra të arrestuar në dy ditët e fundit

Lëvizja Vetëvendosje! njofton se të martën dhe të mërkurën, Policia e Kosovës ka arrestuar dhjetëra qytetarë të cilët po e shprehnin vullnetin e tyre kundër marrëveshjeve me Serbinë dhe kundër marrëveshjes për demarkacion me Malin e Zi. Në mesin e të arrestuarve janë:

Arianit Manxhuka

Artan Abrashi

Asdren Lekaj

Ilir Pantina

Shkëlqim Morina

Shpyrton Mehmeti

Valon Bekteshi

Zgjim Hyseni

Policia e Kosovës ende nuk po i publikon emrat e të arrestuarve të tjerë, edhe pse vetë e kanë konfirmuar se janë 24 të tillë. Ne kërkojmë lirimin e menjëhershëm të aktivistëve dhe qytetarëve, për shkak se përndjekjet dhe arrestimet e tilla do ta përshkallëzojnë edhe më tutje situatën.

Nënkryetarja e Komisionit për Legjislacion Selvije Halimi: Opozita po bën veprime të pamatura

Nënkryetarja e Komisionit për Legjislacion Selvije Halimi e ka quajtur ndjenjë jo të mirë arrestimin e deputetes së Kuvendit të Kosovës nga Aleanca për Ardhmërinë e Kosovës Donika Kadaj-Bujupi

Mirëpo, sipas saj, nuk është mirë kur arrestohen as njerëz që nuk janë përfaqësues të popullit.

Halimi ka sqaruar edhe një herë se çështja e imunitetit është sqaruar nga Gjykata Kushtetuese dhe se nuk mund t’i shtojnë asgjë atij aktgjykimi.

Halimi: Arrestimi i deputetes ndenj jo e mirë

“Çështja e imuniteteve është e përcaktuar me legjislacionin që funksionon në Kosovë dhe është e determinuar më saktë me aktgjykimin e Gjykatës Kushtetuese. Kështu që nuk kam çka i shtoj kësaj...Nuk është ndjenjë e mirë kur i sheh njerëzit që po arrestohen edhe pa qenë përfaqësues të popullit, edhe pa qenë përfaqësues të institucioneve, por janë organet e rendit, të cilat vendosin se kush kryen vepër që bie ndesh me ligjin, është çështje e tyre që ata vendosin që të zbatojnë ligjin, ata janë në zbatim të ligjit. Nuk është ndjenjë e mirë”, tha Halimi.

Ajo e ka quajtur veprim të pamatur mirë veprimin e opozitës, meqë është kërcënim i rëndë deklarimi i tyre se nuk do të ketë qetësi pa i hequr nënshkrimet nga marrëveshjet.

Halimi: Opozita po bën veprime të pamatura

“Nuk e mendoj që duhet të vijë deri aty që vijë deri të një bllokim total i institucioneve, sepse nuk është në interes as i pozitës e as i opozitës kjo. Unë mendoj që ende ka kohë që të diskutohet dhe të gjendet zgjidhja. Zgjidhjen në një bllokim ta quaj ashtu si ata e deklarojnë, opozita në këtë rast se pa e bërë t’i këtë hap si pozitë unë nuk do të lejoj qetësi në vend, ky është një kërcënim shumë i rënd. Edhe unë mendoj që nuk e kanë menduar mirë hapin apo mënyrën se si janë duke vepruar. Ne nuk jemi duke punuar pa opozitën, por opozita nuk është duke ardhur të punojnë në institucione për çka edhe janë të zgjedhur”, theksoi ajo.

Deputetja Kadaj-Bujupi u arrestua dje nga Policia e Kosovës, pas lëshimit të fletë arrestit nga Gjykata Themelore e Prishtinës.