Flori Bruqi : Botës po i prin Gjermania

Tejkalon 3.3 milionë numri i të infektuarve me COVID-19 në mbarë botën


Pas shfaqjes për herë të parë në Kinë dhjetorin e kaluar, COVID-19 është përhapur në të gjithë botën, ku aktualisht më të goditura janë Evropa dhe SHBA.

Tejkalon 3.3 milionë numri të infektuarve në mbarë botën nga koronavirusi i ri (COVID-19), i cili u shfaq për herë të parë në qytetin Wuhan të rajonit Hubei në Kinë.

Sipas faqes së internetit "Worldometer", e cila përpilon të dhënat në lidhje me pandeminë, ka arritur në gjithsej 3.000.301 numri i njerëzve të infektuar deri më tani në mbarë botën.

Vendi me numrin më të madh të rasteve është renditur SHBA-ja me 1.093.198 raste, ndërsa pas saj radhiten Spanja me 239.639, Italia me 205.463, Britania me 171.253, Franca me 167.178, Gjermania me 163.009, Turqia me 120,204, Rusia me 106.498 dhe Irani me 94.640.

Ndërkohë në territorin kryesor të Kinës ku është shfaqur virusi janë regjistruar 82.862 raste.

Vendet e tjera me mbi 10 mijë raste janë renditur si më poshtë:

"Brazili me 85.380 raste, Kanadaja me 53.021, Belgjika me 48.519, Holanda 39.316, Peruja 36.976, India 34.862, Zvicra 29.586, Portugalia 25.045, Ekuadori 24.934, Arabia Saudite 22.753, Suedia 21.092, Irlanda 20.612, Meksika 17.799, Pakistani 16.473, Singapori 16.169, Kili 16.023, Izraeli 15.946, Austria 15.452, Bjellorusia 14.027, Japonia 14.677, Katari 13.409, Polonia 12.877, Emiratet e Bashkuara Arabe 12.481, Rumania 12.240, Koreja e Jugut 10.765, Ukraina 10.406 dhe Indonezia 10.118".

Virusi i cili për herë të parë u shfaq në qytetin Wuhan të Kinës, u përhap në mbarë botën duke u shndërruar në pandemi. Në të gjithë botën, nga COVID-19 kanë humbur jetën 233.718 njerëz, ndërkohë janë shëruar 1.037.936 persona të infektuar si dhe vazhdon ende trajtimi për 2.029.612 raste aktive të infektuar.

Gjermania ka filluar  zbutjen e kufizimeve për parandalimin e përhapjes së koronavirusit të ri (COVID-19) në vend.

Shumica e dyqaneve më të vegjël se 800 metra katrorë lejohen të hapen përsëri. Qendrat dhe dyqanet e rihapura rishtazi duhet të respektojnë rregulla të rrepta higjeno-sanitare.

Në fillim të ditës, pak njerëz u panë në qendrat dhe dyqanet e rihapura. Njerëzit janë ende duke ndjekur distancën në shoqëri, kurse disa prej tyre mbajnë maska për të mbrojtur veten nga virusi.

Kafenetë dhe restorantet do të qëndrojnë të mbyllura për momentin.

Më shumë se 4.600 njerëz kanë vdekur nga koronavirusi në Gjermani dhe mbi 145.700 raste janë raportuar, ndërsa më shumë se 88.000 njerëz janë shëruar.

Urgjenca shëndetësore e koronavirusit në Gjermani vihet nën kontroll për herë të parë, deklaroi ministri i Shëndetësisë, Jens Spahn.

Duke folur në një konferencë shtypi në Berlin, Spahn nënvizoi se numri i pacientëve me koronavirus ka rënë nën ata që janë shëruar nga virusi, kurse spitalet kanë afër 10.000 shtretër të lira të kujdesit intensiv për momentin.

Njerëzve u pëlqen ta urrejnë Gjermaninë – por ky shtet po bën larg më shumë për t’i ndihmuar fqinjët e vet evropianë në luftën kundër koronavirusit
Në fillim të prillit 2020, spitali universitar në qytetin qendror të Gjermanisë, Jena, i nisi dy mjekë, dy teknikë dhe material mjekësor drejt Napolit në Itali. Disa ditë më parë, Bundeswehri, ushtria e Gjermanisë, mori me aeroplanë pacientë francezë dhe italianë dhe i dërgoi në spitalet gjermane. Kjo është vetëm një hise e vogël e ndihmës së Gjermanisë aleatëve kundër koronavirusit.

Reagimi fillestar i Gjermanisë ndaj përhapjes së virusit nuk ishte shoqëruar me lavdi. Në fillim të vitit, Italia, shteti i parë evropian që do të goditej rëndë nga koronavirusi, bëri një lutje për ndihmë me materiale mjekësore prej qeverive të vendeve të tjera të Bashkimit Evropian. Por Qeveria gjermane reagoi qysh reagoi edhe Qeveria e BE-së: nuk i dërgoi asgjë. Pastaj në fillimmars, Qeveria gjermane imponoi ndalesa ndaj eksportimit të materialeve mjekësore jetike, përfshirë maskave të fytyrës, dorëzave mjekësore dhe materialeve të tjera mbrojtëse. Më 14 mars 2020, Italia ende nuk kishte marrë asnjë ndihmë të vetme mjekësore nga ndonjëri prej aleatëve brenda BE-së.

Reagimi i vonuar

Dy ditë më vonë, Ministria gjermane e Ekonomisë dhe Energjisë bëri të ditur se kishte dërguar katërqind mijë maska në Itali me aprovim të Qeverisë qendrore. Me këtë, Gjermania ndryshoi qasjen e reagimit evropian ndaj Italisë: Shumë shpejt, materialet mjekësore po arrinin edhe prej vendeve të tjera të kontinentit. Kur ka krizë, ka një reagim instinktiv që së pari mendja për ndihmë shkon te gjermanët. Kësaj here, ua kemi borxh një falënderim – dhe një kërkesë për më shumë lidership botëror.

Edhe atëherë kur Gjermania mori nismën për ta ndihmuar Italinë, Pekini kishte dërguar materiale mjekësore dhe disa mjekë atje, sikurse do të bënte edhe në shtetet e tjera, si Serbia. Megjithëse shumica e materialeve i ishte shitur Italisë, Pekini – ndihmuar nga ministri i Jashtëm italian, Luigi Di Maio – bëri një marrëveshje të rëndësishme për mbështetjen kineze. Shumë shpejt, Rusia dërgoi 100 mjekë ushtarakë dhe materiale mjekësore në Itali.

Përgjegjësia e parë e çfarëdo qeverie është të kujdeset për imazhin e saj. Qeveria gjermane imponoi ndalesë ndaj eksporteve mjekësore në kohën, kur Italia po përballet me luftën kundër kuronavirusit në fillimmars, derisa vendet e tjera mbyllën kufijtë me Italinë. Por dëmi shkaktuar BE-së – dhe përfitimit në status nga ana e Kinës dhe Rusisë – ishte i menjëhershëm.

Interpretimi i Kushtetutës rreth formimit të Qeverisë

Dymbëdhjetë vjet që prej miratimit, Kushtetuta e Republikës së Kosovës vazhdon të nxisë debate të reja rreth interpretimit të disa prej neneve të saja më të rëndësishme lidhur me formimin, funksionimin, detyrat dhe kompetencat e institucioneve kyç. Rëndom, pasi që Gjykata Kushtetuese e jep vendimin përfundimtar për çështje të rëndësishme politike që i referohen, të gjithë akterët politikë dhe pjesëmarrësit relevantë të jetës politike i nënshtrohen asaj që Gjykata konstaton. Sidoqoftë, Gjykata fatkeqësisht ka manifestuar prirje për t’i ndryshuar interpretimin dhe arsyetimin për t’iu përshtatur kujtdo që aktualisht ushtron ndikim dhe pushtet më të madh politik për çështjen e nxjerrë para saj. Kjo gjë ka gërryer besueshmërinë dhe respektin që qytetarët e Republikës kanë për Gjykatën Kushtetuese.

Në vitin e parë të ekzistencës së saj, Gjykata Kushtetuese e Republikës së Kosovës ishte përballur me njërën prej rasteve më të vështira, me të cilat mund të përballet një gjykatë e këtij lloji.

Çështja në fjalë – nëse presidenti po e shkelte Kushtetutën, duke e mbajtur njëkohësisht edhe pozitën e kreut të partisë politike – u shpalos, për shokimin dhe befasinë e çdokujt, rreth faktit se askush nuk e dinte se ku mund të gjendeshin punimet përgatitore të Gjykatës Kushtetuese. Këto dokumente, të cilat çdo shtet i ruan me kujdes të veçantë (ngase ofrojnë interpretim autentik të asaj çfarë hartuesit e Kushtetutës nënkuptuan dhe menduan për normat konkrete të saj), nuk u gjetën kurrë. Për këtë arsye, debati rreth synimit të njëmendtë të hartuesve të Kushtetutës është bazuar më shumë në dëshminë e anëtarëve të Komisionit apo të atyre që kanë qenë të lidhur drejtpërsëdrejti me procesin.

Pasi që Gjykata Kushtetuese vendosi se presidenti e kishte shkelur Kushtetutën më 2010, dhe më 2011 se një tjetër president ishte zgjedhur nga Kuvendi me procedurë jokushtetuese, viti 2014 e gjeti Gjykatën dhe opinionin publik në Kosovë duke e adresuar çështjen se kush ka të drejtë që ta formojë Qeverinë.

Gjykata kundërthënshëm vendosi se presidenti është i obliguar ta kërkojë një kandidat për kryeministër nga partia apo koalicioni që e fitoi shumicën e votave në zgjedhjet më të fundit (gjë kjo që e favorizoi PDK-në në atë kohë), në vend të një personi të përzgjedhur nga partia apo koalicioni që e gëzonte shumicën absolute të votave në Kuvendin e Kosovës, që nevojitet ashtu që një Qeveri të funksionojë efektshëm.

Në demokracitë parlamentare, termi “shumicë” nuk është referencë për partinë apo koalicionin që fiton më së shumti vota në zgjedhje, por për atë që ka shumicën absolute të votave të anëtarëve të zgjedhur në Parlament. Gjykata Kushtetuese e Republikës së Kosovës pati mendim ndryshe. Si pjesëmarrës dhe dëshmitar i procesit të përpilimit të Kushtetutës në Kosovë, u shokova me konstatimet e Gjykatës, siç u shokuan edhe shumica e ekspertëve të së drejtës kushtetuese me njohuri rreth Kosovës dhe zhvillimit të saj kushtetues.

Megjithëkëtë, vendimi i Gjykatës i përcaktoi rregullat e lojës dhe tani duhet respektuar. Kushtetuta e Kosovës, e cila është pasuese e Propozimit Gjithëpërfshirës të Zgjidhjes së Statusit të Kosovës, parasheh se i vetmi trup me sovranitetin dhe legjitimitetin e dalë nga dhe që e reflekton vullnetin e popullit është Kuvendi i Kosovës, i përbërë prej përfaqësuesve të zgjedhur në zgjedhjet e përgjithshme të Kosovës. Ky është një trup që, me anë të ushtrimit të kompetencave zgjedhore, i zgjedh presidentin dhe Qeverinë.

Harta, kufij dhe plan për Kosovën: çfarë mund të ndodhë në muajt në vijim?

Një sintezë e informacioneve që burojnë nga qarqet diplomatike ndërkombëtare

1.

Sapo të imponohet një qeveri e re në Prishtinë, ka gjasa të fillojë “dialogu mes Kosovës dhe Serbisë”. SHBA-të do të thonë se është vendim i palëve (Kosovës dhe Serbisë) nëse duan prishjen e kufijve të Kosovës, domethënë që një pjesë e konsiderueshme e veriut të Kosovës të bëhet pjesë e Republikës së Serbisë.

Pra, Kosova pritet të mos i ketë kufijtë e 17 shkurtit 2008. Kjo është kërkesa e Serbisë dhe sinjale në këtë drejtim kanë dhënë edhe politikanë të Kosovës të “krahut të luftës”. “Menjëherë do e mbështesja një zgjidhje të tillë” (një zyrtar i lartë i PDK-së në një bisedë konfidenciale me autorin e këtij teksti).

SHBA-të nuk duan të marrin përgjegjësi për prishjen e kufijve të një shteti në Ballkan. Përkundër raporteve të tensionuara me BE-në, megjithatë SHBA-të nuk duan t’u mbetet faji për ndonjë eskalim në Ballkan dhe – rrjedhimisht – destabilizim të Europës.

Andaj do të thonë: “Nuk është punë e jona kjo, por nëse palët duan...”. Këtë e ka thënë që në gusht të vitit 2018 edhe John Boltoni, këshilltari i atëhershëm për siguri nacionale i presidentit Donald Trump. Bolton është larguar për shkak se deshi ta fusë Amerikën në luftë kundër Iranit, por ideja e tij për prishjen e kufijve të Kosovës nuk është fundosur. Vazhdon të jetë aktuale.

2.

Nga prapaskena diplomatët e SHBA-ve nuk do të pengojnë ndarjen apo prishjen e kufijve të Kosovës. Përkundrazi: do t’u ndihmojnë palëve (presidentit të Serbisë dhe kolegut të tij kosovar, të cilët kanë raport mirëbesimi nga takimet e shumta) që rruga për kalimin e “marrëveshjes” të jetë sa më e lehtë.

Pra, do të ketë përkrahje që formulimi i marrëveshjes të jetë “i pranueshëm për të dy palët”. Njëra ndër metodat e ndyra do të jetë etiketimi i kundërshtarëve të marrëveshjes si “antiamerikanë”.

Këtë punë do ta kryejnë kryesisht mediat e afërta me forcat politike që përkrahin marrëveshjen.

3.

Tashmë është bërë e qartë se kushdo që e kundërshton këtë “marrëveshje”, do ta ketë të vështirë të mbijetojë në qeveri në Kosovë.

Brenda pak muajve ky presion i paprecedent nga Washingtoni ka ndikuar të bien dy qeveri të Kosovës. Ky është fakt. Dhe sinjal i keq se sa janë të (pa)vlefshme zgjedhjet demokratike në Kosovë.

Kuptohet, formalisht qeverinë e kanë rrëzuar me mocion deputetët, por presioni duket se ka qenë tepër i madh nga Washingtoni (konkretisht ambasadori Richard Grenell). Këto janë fjalët e një zyrtari të LDK-së: “Jemi mbështetur për muri”.

4.

Derisa në të kaluarën ka pasur ish-komandantë të UÇK-së që janë rebeluar, tani të gjithë janë në një anije. Të gjithë janë të interesuar të shpëtojnë veten nga Gjykata Speciale. Ajo u rri mbi kokë si një re e zezë.

Të gjithë prej vitesh kanë krijuar pasuri marramendëse dhe interesi i tyre primar është të ruajnë këtë pasuri edhe në të ardhmen.

Andaj ata do të shtrijnë dorën edhe për një marrëveshje të keqe. Kundërshtimet që i kanë bërë ndaj kërkesave të SHBA-ve në të kaluarën kanë qenë edhe investim në rritjen e pazarit për interesa personale. Tashmë ka rënë edhe niveli i kritikave ndaj kryeministrit të Shqipërisë, i cili ishte quajtur shitës i territorit të Kosovës.

5.

Qeveria aktuale e Tiranës do të përkrahë çdo marrëveshje që arrin klasa sunduese në Prishtinë, e ka përkrahur edhe më herët. Sepse të tre sundimtarët (në Beograd, Prishtinë, Tiranë) kanë interes të qëndrojnë në pushtet dhe të ruajnë privilegjet që kanë krijuar. Po ra njëri, rrezikohet tjetri.

Andaj edhe alarmi ka qenë aq i madh në shumë pjesë të Ballkanit kur më 6 tetor 2019 Kosova dha sinjal se do heq qafe sistemin e patronazhit, klientelizmit dhe korrupsionit. Me rrëzimin e qeverisë në Prishtinë, tani për tani rreziku i lëvizjeve tektonike politike në vende të tjera të Ballkanit ka kaluar.

6.

Për të shtuar presionin që “marrëveshja me Serbinë” të kalojë sa më shpejt, SHBA-të kanë ulur intensitetin e lobimit për njohjen e Kosovës nga shtetet e tjera. Edhe kërcënimi se do të tërhiqen trupat ushtarake amerikane është përdorur si “instrument torture”. Dhe ekziston rreziku se do të përdoret edhe në të ardhmen.

Ka gjasa që tërheqja e trupave të ndodhë pas kalimit të marrëveshjes, ndonëse në këtë çështje nuk janë të një mendimi Pentagoni (kundër) dhe Shtëpia e Bardhë (për).

7.

Qeverisja e keqe sidomos nga shpallja e pavarësisë ka ndikuar që në botën perëndimore të bie dukshëm entuziazmi për të përkrahur Kosovën dhe shtetësinë e saj.

Nuk kontestohet shtetësia, por Kosova gjithnjë e më shumë shihet si territor i pavarur (jo si shtet), që nuk është e aftë të qeverisë veten, aq më pak të ushtrojë sovranitet në gjithë vendin.

8.

Çështja është se cili do të jetë roli i Bashkimit Europian në këtë proces. Zyra e presidentit të Kosovës ka bërë me dije se nuk do të bashkëpunojë me emisarin e ri të BE-së për Kosovën dhe Serbinë, sllovakun Mirosllav Lajçak, i cili ka një përvojë të gjatë pune në Ballkan (ambasador në Beograd, përfaqësues i lartë i bashkësisë ndërkombëtare në Sarajevë), rrjedhimisht Lajçak e di se ndryshimi i kufijve në Ballkan mund të ketë pasoja.

Andaj ai përkrahet me shumë zell nga Gjermania, por ka shtete të tjera europiane të cilat nuk janë aq të zëshme kundër ndryshimit të kufijve. Pa një rol të BE-së në proces marrëveshja vështirë se do të jetë e qëndrueshme.

9.

Iluzione nuk duhet të ketë askush. Gjërat kanë ecur larg edhe për shkak të indiferencës së shoqërisë kosovare. Kur më 2018 është paralajmëruar se mund të ketë edhe amnisti të krimeve serbe, nuk ka pasur aq rezistencë në opinionin publik të Kosovës.

Lansimi i kësaj ideje këto ditë është testim i opinionit. Gjithsesi, marrëveshje të mirë nuk sjellin politikanët e këqij dhe të shantazhueshëm.

10.

Nëse marrëveshja nuk kalon në Këshillin e Sigurimit të OKB-së dhe nëse marrëveshja nuk parasheh njohjen e Kosovës nga Serbia, ajo do të jetë vetëm një provizorium, një “zgjidhje e përkohshme” dhe e pazbatueshme.

Megjithatë, ish-komandantët dhe një grup i politikanëve joparimorë në LDK do të përpiqen ta prezantojnë marrëveshjen si sukses (“kaq ishte e mundshme”) dhe të mbajnë pushtetin, me çdo kusht. Përpjekja e radhës për të betonuar pushtetin pa zgjedhje do të jetë në fillim të vitit të ardhshëm kur duhet të zgjidhet një president i ri.

Ky që është tani ka thënë se nuk dëshiron të jenë më kandidat. Por më parë ka thënë se do të jetë. Ai është konsekuent në jokonsistencën e tij.

Procesi mund të ngadalësohet nëse presidenti serb nuk tregon gatishmëri për biseda para se të mbahen zgjedhjet në Serbi. E kur mbahen zgjedhjet në Serbi, varet nga pandemia. Por presioni amerikan do të rritet për të fiksuar një diçka si marrëveshje para zgjedhjeve në SHBA në fillim të nëntorit. Qoftë edhe në formë të një letre ku shprehet vullneti i mirë – shoqëruar me fotografinë e dy presidentëve nga Ballkani. Humbja në zgjedhje e presidentit të tanishëm amerikan mund të stopojë procesin.(Enver Robeli)

30 vjet nga falja e gjaqeve te Verrat e Llukës Tri dekada

Sot janë bërë tri dekada nga ngjarja e madhe për faljen e gjaqeve në Verrat e Llukës në Komunën e Deçanit.

Në këtë tubim u falën më shumë se 100 gjaqe dhe ngatërresa ndër-shqiptare.




Aksioni për pajtimin e familjeve shqiptare në hasmëri kishte nisur nga disa studentë të rajonit të Dukagjinit, ish-të bu
rgosur politikë, më 2 shkurt 1990 në Lumëbardhë të Deçanit.

Ky aksion u shndërrua në një lëvizje për pajtimin e gjaqeve dhe falë punës së madhe kjo lëvizje gjithëpopullore arriti të pajtojë mbi një mijë gjaqe e ngatërresa ndër-shqiptare.




Aksioni dhe Lëvizja për Pajtimin e Gjaqeve, përmes bashkimit e pajtimit të popullit shqiptar ia doli që ta shkëpusë shoqërinë tonë nga epoka e gjakmarrjes për ta unifikuar në lëvizjen për liri e pavarësi. Tridhjetë vjet më parë filluan ndryshimet e mëdha drejt realizimit të aspiratave tona si popull. 




Te Verrat e Llukës u bashkuan rreth gjysmë milioni pjesëmarrës, në tubimin më madhështor shqiptar të të gjitha kohërave, ku kulmoi iniciativa më fisnike e rinisë sonë, e faljes dhe shtrirjes së dorës së pajtimit. 



Mirënjohje të përjetshme për të gjitha ata që morën këtë nismë patriotike, drejtuesit e saj Anton Çetta e Zekeria Cana, Adem Grabovci,Ramiz Kelmendi,Din Mehmeti,Adem Jashari,Nimon Alimusaj, Lush Gjergji,etj  pajtimtarëve dhe heronjve të këtij aksioni kombëtar, atyre që falën në emër të atdheut e të popullit shqiptar!” ka shkruar ai.

Pajtimi i Gjaqeve në Kosovë konsiderohet si një prej periudhave më të bardha të historisë shqiptare.



Hasmëritë disavjeçare morën fund me një procedurë të tillë ku u desh të përzihej dashuria, dhembshuria, solidariteti dhe mbijetesa.
Dikush fali gjakun e babait, dikush të të birit e dikush të vëllait. Shumë nga ata që falën, thonë se vepruan mirë që e ndërprenë hasmërinë.



Tubimi në Verrat e Llukës do të mbetet si momenti bashkimit më të madh të shqiptarëve të Kosovës.


Më 2 shkurt 1990 me nismën e Anton Çetës nisi në Kosovë aksioni atdhetar e humanitar i faljes së gjaqeve që mori përmasa të gjera, duke u përhapur anembanë vendit.


Ky konsiderohet edhe si viti më i organizuar dhe më frytdhënës i kombit shqiptar që hyri në histori si vit i bashkimit e i pajtimit të popullit shqiptar kudo që jetonte, brenda trojeve etnike dhe mërgatë.


Nuk kishte kaluar shumë kohë nga formimi i Lëvizjes gjithëkombëtare si përgjigje Millosheviqit për vetë emërimin si kral i të gjithë serbëve në Fushë Kosovë, mbylljes së shkollave, helmimit, mbylljen e universitetit, gazetave e mjeteve tjera të informimit, zgjimi i vetëdijes kombëtare ishte i pa evitueshëm.

Kjo lëvizje u emërua si Lidhja Demokratike e Kosovës dhe kryetar u zgjodh Ibrahim Rugova. Rugova kishte pranë vetes edhe njerëz të njohur si atdhetar. Askush nuk luftonte për bajraktarizëm por për atdheun.

Kjo rini e shëndoshë pa hezitim timonin e pajtimit ia ofroi Anton Çetës dhe profesorëve tjerë nga Instituti Albanologjik, intelektualëve kudo që gjendeshin, akademikëve, punëtorëve e fshatarëve, aktivistëve nga mbar trojet tona etnike.



Njerëzit në atë kohë në krye me Prof. Anton Çetën, marshonin para qindra ekipe profesorësh, studentësh, aktivistësh, këngëtarësh e poetësh…pajtonin popullin, pajtonin ata që deri dje ishin armiq, për tu bërë miq e vëllezër. Heronjtë e këtij aksioni kombëtar, padyshim ishin ata që falnin, falshin për hatrin e atdheut.


Në këto tubime madhështore që organizoheshin anë e mbanë Kosovës e trojeve tjera etnike, si në Kaçanik e Lug të Drinit, Rrafsh të Dukagjinit e n´Verra të Llukës, në Shalë e në Karadak, në Llap, Drenicë e Gollak, në Has, Rekë, Podrime, Lapushë, Podgur e Rugovë, Rrafsh i Kosovës dhe kudo, e kudo në viset tjera, tregonte se për popullin tonë e atdheun kishte kris ora më e madhe e historisë sonë.

Isniq, 1 maj 2020                                  Flori Bruqi

Begjet Pacolli : U frikësova për akt terrorist nga shteti i Kosovës

19:36

Pacolli dërgohet në shtëpinë e tij: U frikësova për akt terrorist nga shteti i Kosovës

Kreu i AKR-së, Behgjet Pacolli, është dërguar në shtëpinë e tij në Hajvali, pas arritjes nga Tirana.

Pas arritjes në Prishtinë, deputeti Pacolli deklaroi se është frikësuar për akt terrorist në aeroplanin e tij nga autoritetet e Kosovës.

19:20

Pacolli pas mbërritjes në Prishtinë: 

Nuk e di kah do të më çojnë

Kreu i Aleancës Kosova e Re, Behgjet Pacolli, ka arritur të enjten në Prishtinë. Nga Aeroporti Ndërkombëtar i Prishtinës, Pacolli ka thënë se asnjëherë nuk ka kërkuar që për të të mos merren masat sikurse për qytetarët tjerë. Ka shtuar se nuk e di se kah do ta dërgojnë autoritetet e vendit.

“Asnjë moment nuk jam shprehur e as s’ka qenë në kokën time që të veproj jashtë normave. S’kam kërkuar asnjëherë të bëhet dallim për mua. Derisa e dua vendin tim, i nënshtrohem edhe të gjitha masave të ndërmarra. Unë nuk rezistoj. Unë i respektoj normat që janë marrë për të gjithë, ashtu edhe për mua. S’do ta toleroja asnjëherë që ndaj meje të ketë përparësi apo mangësi. Nëse ka rregull që është aplikuar për të gjithë qytetarët, unë do ta zbatoja”, ka thënë ai me të arritur.

Ai është ankuar në deklaratat e ministrit në detyrë të Punëve të Brendshme, Xhelal Sveçla dhe të kryeministrit në detyrë, Albin Kurti.

“Unë s’jam kriminel. E dua këtë vend. Gjithë punën e bëj me vullnet”, ka thënë ai.

Ai ka thënë se është frikësuar nga “institucionet e Kosovës se mund të kryhet akt terrorist në aeroplanin tim”.

“Kam qenë dy muaj i vetizoluar me përgjegjësi me familjen time. Ditën kur kam dashur të vi në Kosovë e kam kryer testin. Testi ka rezultuar negativ. Jam nisur për në Kosovë. Leja fillimisht është anuluar. E dyta është kushtëzuar me implikime të tjera, se me dhënien e lejes duhet të involvohen disa ministri. Unë fluturoj me një fluturake ku nuk ka asnjë forcë. Jam frikësuar për herë të parë nga institucionet e shtetit tim se mund të kryhet akt terrorist në aeroplanin tim dhe kam aterruar në Tiranë. Është hera e parë që frikohem nga një shtet. Sot jam kontrolluar, kam kryer procedurat dhe vazhdoj jam në dispozicion. Nuk e di kah do të më çojnë. Jam frikësuar nga të gjitha presionet që kam marrë deri kur jam nis për në Kosovë”, ka thënë ai.

Ardhja e tij në Prishtinë bëhet në kohën kur pritet votimi për Qeverisë e re, pjesë e së cilës pritet të jetë edhe AKR-ja e Pacollit. Ai qe dy ditë ka pasur përplasje me Qeverinë në detyrë, e cila kërkonte që Pacolli të mos veçohej nga të tjerët dhe t’i nënshtrohet rregullit për izolim dyjavor në Qendrën e Studentëve.

18:48

Aterron në Prishtinë aeroplani i Pacollit

Ka aterruar në Aeroportin Ndërkombëtar të Prishtinës aeroplani privat i deputetit Behgjet Pacolli.

Në aeroport kanë dalë edhe këshilltarët e kreut të AKR-së për ta pritur deputetin që nxiti shumë debat në Kosovë së fundmi me ardhjen nga Zvicra.

Teksa ai kërkonte të mos i nënshtrohej rregullave për karantinim si të tjerët, MSH-ja insistonte se rregullat vlejnë për të gjithë.

18:21

Pacolli niset për Kosovë, ia dërgon MSH-së dokumentet me të cilat kërkon të vetizolohet në shtëpi

Deputeti Behgjet Pacolli është nisur nga Tirana drejt Prishtinës. 

Ai mësohet se i ka dërguar Qendrës Operative të Ministrisë së Shëndetësisë dokumentacionin shëndetësor me të cilin kërkon që t’i mundësohet vetizolimi në shtëpinë e tij në Hajvali.

 MSH-ja këtë dokumentacion ia ka përcjellë ekipit mjekësor në Aeroport që do të vendosë më pas për hapat e mëtutjemë.

Ai ishte paraparë fillimisht që në Prishtinë të vinte rreth orës 17:30, ndërsa tash pritet të aterrojë rreth orës 19.

Në një postim në Facebook, këshilltari i Pacollit, Naim Murseli, ka thënë se me të arritur në Prishtinë, kreu i AKR-së do t’i nënshtrohet kontrollit rutinor mjekësor “për të vazhduar pastaj në rezidencën e tij në Hajvali”.


Policia në pritje të Pacollit në hyrje të Aeroportit

Policia e Kosovës është duke e pritur deputetin Behgjet Pacolli në hyrje të Aeroportit të Prishtinës.

Ai pritet të aterrojë rreth orës 17:30 nga Tirana.

Deri më tash, për shkak të pandemisë, çdo person që ka aterruar në Prishtinë, nën përcjellje të Policisë së Kosovës, është dërguar për në Qendrën e Studentëve për karantinë 14 ditore.

Pacolli kishte kërkuar që ky rregull të mos vlejë edhe për të, por Ministria e Shëndetësisë sot ka thënë se rregullat janë të njëjta për të gjithë.

Zyrtari i AKR-së, Rrahim Pacolli, që gjendet në aeroport, ka thënë se ai është aty për ta marrë kreun e partisë që ta dërgojë në shtëpi. Policia nuk është deklaruar për këtë.


****

Zëdhënësi në detyrë i Qeverisë së Kosovës, Përparim Kryeziu, ka thënë që kryetari i AKR-së, Behgjet Pacolli duhet të kërkojë falje për deklaratat e tij, se është frikësuar që shteti do të kryej “akt terroristik”.

Përms një postimi në Facebook, ai ka thënë se Pacollit i është komunikuar zyrtarisht se duhet të respektojë masat, ashtu siç bën çdo qytetar, përfshirë edhe zyrtarët ndërkombëtarë që vijnë në Kosovë.

“Fatkeqësisht, me ose pa vetëdije për peshën e rëndë të fjalëve të veta, thirrjet për respektimin e udhëzimit zyrtar që edhe ai të zbatojë masat në fuqi i intepretoi si frikë të tij për një ‘akt terroristik nga ana e shtetit’ në të. Pra, masat që janë marrë për mbrojtjen e jetës së qytetarëve nga virusi, deputeti Pacolli, njëherësh ish Ministri i Punëve të Jashtme dhe ish Presidenti i Republikës së Kosovës, i interpretoi si mundësi për ‘akt terroristik nga shteti”, ka shkruar ai.

Kryeziu thotë se kjo deklaratë e tij po përdoret kundër shtetit.

Ai thotë se edhe opozitarizmi e ka një kufi dhe është e papërgjegjshme të quhet shteti terrorist.

“Deputeti Pacolli, ndërkohë që vazhdon të zbatojë masat e izolimit në shtëpi, njësoj si çdo qytetar i ardhur nga jashtë, do të duhet të fliste publikisht dhe të kërkonte falje, duke tërhequr ato që tha. Edhe opozitarizmi e ka një kufi, është e papërgjegjshme, e pamatur, e dëmshme dhe e dënueshme ta quash shtetin tënd ‘terrorist’, kur ai përpiqet të ruajë shëndetin tuaj dhe të qytetarëve”, ka shkruar ai.

Nuk do të ketë qeveri të re, aventurë e rrezikshme për ata që e kanë ndërmarrë

Lidhja Demokratike e Kosovës dhe Aleanca për Ardhmërinë e Kosovës arritën sot marrëveshje për koalicion qeverisës.

Politikani dhe publicisti i njohur nga Kosova, Veton Surroi, duke analizuar zhvillimet e fundit politike atje thotë se kjo është një tentativë antiligjore dhe antikushtetues që sipas tij do të dështojë me sukses.

Për RTV Ora, ai thotë se nëse krijohet një qeveri e re pa u shprehur më parë Kushtetuesja do të kemi një realitet të ri me dy qeveri.

Orkestrues të gjithë kësaj situate sheh presidentin Hashim Thaçi.

“Për faktin që letërkëmbimi mbetet sekret do të thotë se ka nevojë për tu fshehur, në demokraci nuk ka nevojë për tu fshehur. Një qeveri e re që synon të ndërtohet mbi fshehtësi, do të thotë se synon të ndërtohet mbi fshehjen e të vërtetës. Synimi është antikushtetues”, ka thënë Surroi.

Më poshtë intervista e plotë dhënë për gazetaren Beti Njuma në RTV Ora.

A mund të krijohet qeveria pa u shprehur Kushtetuesja?

Përpjekja është të krijohet një realitet i ri pa prononcimin e Gjykatës Kushtetuese. Nëse është e vërtetë do të përballemi me dy qeveri, njëra që është ndërtuar në bazë të një procedurë kushtetuese dhe tjetra e cila synon të marrë shumicën e votave në parlament dhe ndoshta mund ti sigurojë, por është ndërtuar jashtë procesit kushtetues. Kjo gjendje që tani po krijon një fërkim të panevojshëm politik, imagjino si do të reflektohet nëse me të vërtetë realizohet.

A mund të qeveriset pa shkuar në zgjedhje të reja?

Jemi në një gjendje ku ngërçi politik i tanishëm kërkon zgjidhje procedurale dhe zgjidhja procedurale kërkon të prononcohet fituesi i zgjedhjeve. Përderisa fituesi i zgjedhjeve të mos prononcohet lidhur me mandatarin e ri gjendja mbetet në situatën ku jemi, në një qeveri në detyrë. Meqë po i afrohemi fundit të fazës së parë të pandemisë do të ishte mirë që sipas procedurës palët politike të uleshin dhe të arrinin një marrëveshje për të dalë nga ky ngërç në mënyrë kushtetuese. Por tabi kemi një përpjekje të bashkërenduar mes Thaçit dhe udhëheqjes së ngushtë të LDK që të formohet një qeveri që do ti shkonte më për shtat zotit Thaçi dhe kjo është një gjendje që po e acaron klimën politike në vend në një situatë ku jemi dhe në pandemi.

E keni quajtur qeveri e re e kontrabanduar e përbërë nga tre lista.

Qeveria e kaluar u formua pa nevojë që të veprojë Lista Serbe. Ishte brenda sipas detyrimit kushtetues por jo pjesë e koalicionit. Insistimi që të formohet një qeveri e re që detyrimisht duhet të ketë nevojë për Listën Serbe do të thotë se Vuçiq ka një veto në formimin e qeverisë së Kosovës. Do të thotë se qeveria e Kosovës mund të formohet vetëm me pëlqimin e Vuçiq. Kjo është një gjendje që e ngarkon qeverinë e re. E dyta është Lista Ruse e drejtuar nga Pacolli, ka qenë i dërguari rus në Kosovë. Ai përfaqëson një mentalitet të shkrirjes së interesit publik me interesin e biznesit privat që është model rus në politikë. Pa votat e tij është e pamundur të formohet ky koalicion. Dhe lista e të hyrave që është një lloj status quo, këta deputetë të zgjedhur kanë frikë se nuk mund të zgjidhen mandatin e ardhshëm, ka ministra që kanë frikë se nuk mund të jenë në mandatin e ardhshëm dhe pastaj ka një sërë aktivitetesh brenda ndërmarrjeve publike që ndihen të rrezikuara nga reformat e qeverisë Kurti.

A sjell ndonjë rrezik largimi i qeverisë, mund të ketë përplasje civile?

Nuk i duhet fryrë zjarrit, ka zjarr të mjaftueshëm. Duhet maturi dhe një marrëveshje që do të çonte drejt zgjedhjeve të parakohshme kurdo që mund të ndodhin.

A mund të jetë qeverisje e qëndrueshme LDK-AAK?

Mendoj se nuk do të formohet fare. Do të ketë përpjekje, por ky kontrabandim është antikushtetues dhe nuk ka legalitet dhe nuk do të ketë as legjitimitet popullor. Është një aventurë shumë e keqe, e rrezikshme dhe e panevojshme kryesisht për ata aktorë që i janë futur kësaj.

A ka pasur rol SHBA në rrëzimin e Kurtit?

Ka qenë një orkestrim i Thaçit që prej kohësh e ka personalizuar politikën dhe interesat e veta në ndërmarrje të ndryshme ekonomike-kriminale, qoftë në kuptimin e kërkesës së një lloj amnistimi për ndjekjen eventuale penale. Ky veprim i tij ka pasur sukses për fat të keq me LDK, kjo është aventura e tij e radhës.

Tirana zyrtare po hesht, dje Kurti deklaroi se Rama nuk i ka kthyer përgjigje letrës së tij.

Nuk di si ta shpjegoj. Di që Shqipëria si çdo vend tjetër është krejtësisht normale që të jetë zhytur thellë në angazhimin rreth Covid-19. Kështu duhet të ishte dhe Kosova, e cila për fat të keq po merret me një krizë politike që e ka krijuar vetë.

Pse është sjellë në tryezën e konsumit mediatik aminstia e krimeve serbe në Kosovë nga Baton Haxhiu që dihet se është njeri i afërt edhe me Presidentin Thaçi, edhe me kryeministrin Rama? Ai ka folur edhe për zhbërje të Gjykatës Speciale dhe për një definim të Veriut.

Është pjesë e përpjekjeve të Thaçit në negociatat me Vuçiç dhe kjo nuk është gjë e re. Ka dy vjet që Thaçi po përpiqet të krijojë rrethana të amnistimit të përgjithshëm dhe të zhbërjes së Gjykatës Speciale. Në vjeshtë të vitit të kaluar Thaçi i dërgoi letër sekretarit të jashtëm amerikan Pompeo ku kërkonte që të zhbëhej Gjykata Speciale dhe mori përgjigje negative. Përmendja e këtyre tre gjërave nuk është e rastësishme, sinqerisht është shprehur diçka që është negociuar dhe është në negociim e sipër. Nuk ka mundësi për amnisti, krimet e luftës janë të paamnistueshme. As nuk ka mundësi për heqje të Gjykatës Speciale sepse është e integruar në Kushtetutë. Duhet amenduar Kushtetuta dhe ky është proces i ndërlikuar, për të hequr Gjykatën Speciale. Janë përpjekje të orës së fundit për të krijuar trazira politike në mënyrë që të zhvendoset vëmendja në një çështje të tillë.

Rrezikon Kosova të shndërrohet në një Republikë të harresës?

Janë të rrezikshme dhe përpjekje të Thaçit dhe Serbisë që çështja e përgjegjësisë për luftën e Kosovës të hiqet nga rendi i ditës. Një nga pengesat themelore për pajtimin ka qenë fakti se Serbia nuk do të pranojë se ka një përgjegjësi shtetërore për dëmet, për krimet, për vrasjet që janë bërë në Kosovë. Prej 13 mijë të vrarëve në luftën e Kosovës, mbi 10 mijë janë civilë. Mbi 8600 prej tyre janë shqiptarë. Përgjegjësi për këtë nuk mban një ushtar, as oficer, as një vrasës që nuk ka dëgjuar rregullat por përgjegjësi mban shteti i Serbisë.

A është një akt i kryer që po mbahet i fshehtë?

Nuk është akt i kryer, është një draft që ka kohë që po shqyrtohet nga Thaçi dhe Vuçiç. Për shumë gjëra janë pajtuar. Por Thaçi është i vetëdijshëm se nuk mund të ketë një nënshkrim pa përkrahje të qeverisë të Kosovës dhe pa përkrahje të spektrit politik të gjerë. Ky është një ankth që ekziston.

A ka gjasa të mbyllet një marrëveshje për kufijtë me qeverinë e re Hoti?

Nuk mendoj. Çdo hap që shkon në këtë drejtim vetëm sa do ta destabilizojë Kosovën. Marrëveshjet mes shteteve për paqe bëhen me palë të stabilizuara dhe jo të destabilizuara. Ideja se Kosova duhet të destabilizohet në mënyrë që të bëhet një marrëveshje shpejt e shpejt sa për sy e faqe nuk mendoj se do të ketë sukses.

Cili do të jetë roli i BE në këtë proces? Zyra e Thaçi ka njoftuar se nuk do të bashkëpunojë me Lajçak.

Kjo mund të jetë përzgjedhja personale e Thaçit, nëse nuk do të takohet, le të mos takohet. BE, KE, dhe i dërguari i veçantë kanë nevojë të bëhen shumë ambiciozë në procesin negociator, kanë qenë të dobët në të kaluarën. Kanë krijuar një proces i cili ka shpenzuar kohë, energji por jo rezultate shumë të mëdha. Në disa aspekte ka degjeneruar pozitën e Kosovës. Një proces serioz negociator do të kërkojë që palët paraprakisht të krijojnë një kornizë më serioze negociatore. Kosova nuk e ka luksin të ulet me Serbinë dhe të bisedojnë deri në pafundësi për gjëra të kota, duhet të ulen për çështje thelbësore. Ajo është si do të vendosen marrëdhëniet mes dy shteteve.

Është folur sot për një vizitë të fshehtë të Thaçit në Shqipëri.

Kur kemi imazhe të një trilleri, një filmi ku presidenti hyn fshehtas në një shtet tjetër në të cilin një oligark aziatik fluturon në Tiranë që të shndërrohet në deputet të Kosovës për të votuar qeverinë e re. Duket si triller që do të kënaqte shikuesit.

Prishtina nuk e lejoi të ulej Pacollin pa zbatuar karantimin, Tirana u tregua më bujare.

Në demokraci nuk ka pse të fshehet. Në Britani kryeministri jo vetëm hyri në karantinë por ka shkuar në spital se ka qenë i sëmurë. Nuk e di pse në demokraci duhet të fshehet se çfarë ka kërkuar presidenti në Shqipëri, ku gjendet sot Behgjet Pacolli. Kemi të bëjmë me manifestime të fshehtësisë, dhe kjo është produkt i nevojës për të mos qenë trasnparent. Kjo rrjedh nga nevoja e procesit jo ligjor. Prandaj bëhen të gjitha këto akrobacira.

Një koment për krizën ekonomike nga koronavirusi.

Është një krizë shumë më serioze se ajo e 2008. Jo vetëm që kemi të bëjmë me impaktin e krizës ekonomike deri sot por edhe kur të dalim nga karantinimi në verën e këtij viti do të ballafaqohemi me mundësinë që të kemi një valë tjetër. Kjo nënkupton se e gjithë bota duhet të përgatitet për një normalitet të ri, formë të re të jetës ekonomike dhe shoqërore dhe për koston ekonomike.

Impakti i krizës ekonomike do të ndihet gjithandej, vendet e vogla mund ta ndjejnë më pak por sidoqoftë Shqipëria dhe Kosova do ta ndjejnë te numri i të papunëve dhe pamundësia e hapjes së vendeve të reja të punës. Kjo do të ndihet shumë te turizmi në Shqipëri. Duhet të përgatitemi për një valë të re edhe të sëmundjes, edhe të impaktit ekonomik në vjeshtë.

Kushtetuesja pret sot (1.5.2020) komentet deri në orën 12:00 për caktim të masës së përkohshme për dekret të Hashim Thaçit

Gjykata Kushtetuese ka bërë të ditur se deri në orën 12:00 të 1 majit 2020 do të presë komentet për caktimin e masës së përkohshme për dekretin që presidenti Hashim Thaçi ia bëri Prof.Dr.Avdullah Hotit të LDK-së si kandidat për kryeministër.

Dje 30 deputetë të Grupit Parlamentar të Lëvizjes Vetëvendosje dërguan në Kushtetuese dekretimin që  Hashim Thaçi ia bëri Avdullah  Hotit për kryeministër. 

Ndër tjera, VV-ja kërkoi që të vendoset masa e përkohshme për pezullim të zbatimit.

“Gjykata Kushtetuese e Republikës së Kosovës ka pranuar të enjten, më 30 prill 2020, rreth orës 17:00, një kërkesë të parashtruar nga 30 deputetë të Grupit Parlamentar të Lëvizjes VETËVENDOSJE!, përmes së cilës kërkohet vlerësimi i kushtetutshmërisë së Dekretit nr. 24/2020, të datës 30 prill 2020, të Presidentit të Republikës së Kosovës. 

Përveç kësaj, në kërkesën e parashtruar, deputetët parashtrues kanë kërkuar nga Gjykata edhe vendosjen e masës së përkohshme për pezullim të zbatimit të Dekretit në fjalë”, thuhet në një njoftim të Kushtetueses.

Me qëllim të shqyrtimit urgjent, Gjykata ka bërë të ditur se dje u ka dërguar shkresat njoftuese përmes së cilave ka kërkuar nga palët e përfshira që:

a) Komentet përkitazi me kërkesën për caktim të masës së përkohshme t’i dorëzojnë në emailin zyrtar të Gjykatës Kushtetuese sot, më 1 maj 2020, në orën 12:00;

b) Komentet përkitazi me meritat e kërkesës, t’i dorëzojnë në Gjykatë deri më 8 maj 2020, në orën 16:00.

“Njoftimi për regjistrimin e kërkesës së parashtruar nga deputetët dhe për dorëzimin e komenteve tashmë u është dërguar: 

Presidentit të Kosovës; Kryeministrit të Kosovës; Kryetares së Kuvendit të Kosovës, me kërkesën specifike që kopja e kërkesës t’u dërgohet të gjithë deputetëve të Kuvendit; dhe Avokatit të Popullit. Gjykata Kushtetuese është e përkushtuar që në përputhje me përgjegjësitë dhe me funksionin e saj kushtetues, këtë lëndë ta trajtojë me urgjencë dhe prioritet”, thuhet në njoftim.