Cikël poetik nga Arif Molliqi nga Lluka e Epërme & Hamburgu

Arif Molliqi, lindi në vitin 1953, është shkrimtar shqiptar nga Kosova, i lindur në Llukë të Epërme afër Deçanit.

Me shkrime ka filluar nga viti i fundit të gjimnazit ( kohë kur filloi të botoi), edhe pse ka shkruar më herët. Në fillim nuk e ngacmonte aq shumë poezia, andaj filloi më humor dhe satirë, n´atë kohë nuk preferohei shumë satira, andaj për ti ikur „keqkuptimeve“ filloj të shkruaj edhe poezi.

Satiren e shkroi krejt padiktueshëm tek gazeta humoristike „ Thumb, duke botuar me pseudonime të ndryshme si; Boksh Baruti, Topuz Bërryli, Prenk Sherri etjera. Gjatë vitit 1977/78 bashkëpunoi në gazeten e studenteve „Bota e re“ ne faqen e kulturës, e sidomos në satirë dhe humor.Këtë bëri edhe më Radio televizionin e Prishtinës, shkroj disa pjesë humoristike që i dha televizioni.

Edhe në „Rilindje“ botoi shumë shkrime saterike gjersa një ditë, të shqetësuar miqët e tij e rekomandojnë; herë për herë ta le satirën sepse ishte gjini letrare e „vështirë“ për kohën. Pas kësaj „këshille“, Molliqi e vazhdoi me intenzivisht me poezi,prozë dhe dramaturgji. Eshtë shpërblye disa herë me vendin e parë dhe të dytë në konkurset letrare për poezi.

Veprat


“Simfoni për darkën e qenve”, poezi, Prishtinë, 1994

“Në udhëkryq pa zhurmë”, (poezi), Toena, Tiranë, 1996

“Loja e Sarkofagut”, (dramë), Eurorilindja, Tiranë, 1998,

“Psherëtima e zareve”, (poezi), Panteoni, Tiranë, 1999

”Përplasje” (skica dhe mbresa), Fakti, Shkup, 2000

"Premiera e një pranvere”, (poezi), Rilindja, Prishtinë, 2000

“Kafka e ujkut”, (roman), Toena, Tiranë, 2001

”Dëshmorët jetojnë pas vdekjes”, (monografi), Prizren,2002

“Shënime nga arkiva e qytetit D.”, (roman), Faik Konica, Prishtinë, 2003

“Pelegrinazh i ftohtë në qytetin D.” (poezi) Faik Konica, Prishtinë, 2004

“ Loja e dytë e Sarkofagut”, (dramë) Rozafa, Prishtinë (Kjo dramë është marrë për botim nga konkursi letrar i shpallur nga Ministria për Kulturë e Kosovës, për vitin 2003/2004, në mesin e shumë dorëshkrimeve në konkurs)

“Portret i pambaruar”, (poezi) Faik Konica, Prishtinë, 2006

“Klubi Shqiptar Verrat e Llukës“ në Hamburg“, (monografi), klubi, 2007.

"Gruaja e vizatuar nudo", roman, Faik Konica, Prishtinë, 2008.

Antologji

Arif Molliqi, është prezentuar edhe në këto libra dhe antologji:

Halil Haxhosaj: “Premtime letrare, shkrime kritike, Prishtinë,2006

Shefqet Dibrani: “Libri dhe mbresa”, kritikë letrare, Zvicer 2005,

Chelaru Marius, Baki Ymer dhe Luan Topçiu “Antologji e poezisë shqipe”, në gjuhen rumune, një antologji më disa poetë nga Shqipëria, Kosova dhe Maqedonia, Valman, Rumani, 2006

Nga Jochan Blanke i janë përkthye në gjuhen gjermani disa cikle me poezi dhe është prezentuar nga një forum gjerman në një mbremje poetike në Hamburg më 2007.

Etj.



ARIF MOLLIQI

Pesha e arkivolit

Ditën e varrimit
Njerëzit bëjnë mahi të vogla
Mbi fytyrë ma hedhin një grusht dhe
me arkivolin e mbyllur qeshin

Besomëni, më keni zënë ngushtë
mbase jam i vetmi njeri që nuk flas
dhe për herë të parë rri vetëm
në një shtëpi pa dritare

Varrmihësit s’kanë tjetër detyrë
Veç ta kërkojnë llogarinë e vet
E nesërmja është vonë

Aq lehtë
E zeza nuk bëhet e bardhë

Provë për një dilemë

A është qeni i biri ujkut
a ujku i biri qenit
Krejt njësoi
të dytë janë mishngrënës

A është njeriu i biri djallit
a djalli i biri njeriut
Krejt njësoi
të dytë e ngatërrojnë botën

A është hajni para ministrit
a ministri para hajnit
Krejt njësoi
të dytë betohen në gjuhën e dhelprës

Ç’rëndësi ka kush këndon

Këndoi aq gjatë
Sa e lodhi bjeshkën dhe detin
Asnjë yll s’mbeti në natë
Nuk u ndal
Derisa mori n’thua në këngën e vet

Ata që e dëgjonin
iu kishte tharë goja
duke bërtitur:
o lëreni bre atë këngë
se u tha një det i tërë

Ç’rëndësi ka kush po këndon
Kur askujt asgjë
S’do t’i lë trashëgim
kjo kënga juaj e padurueshme
gjithsesi

Arti i kolaboracionistit

Kur ra ujku në torishtë
ne i numëruam delet
veç bariu me dhëmbët e rënë
doli tepër

Dikush kurrë s’do të dijë
pse asgjë s’i ndodhi qenit
ai kishte shkuar te Lëndina e Qyqeve
i mbështjell me lëkur dashi

Delet që shpëtuan
i akuzuan për kolaboracioniste
kjo është loja e njeriut
kur qenin e keq e mban afër vetes

ose,
kur qeni dhe ujku çojnë dashuri
në oborrin tonë

Arti i lehjes

Ndalohet rreptësisht
me leh si qeni
se nuk e dallojmë ujkun te dera

Ka kohë që s’po e kuptojmë
kush në kënd po leh
qeni në njeriun
a njeriu në qenin

Derisa të mësohemi me të lehura
njeriu do ta hanë kopenë
e ujku le të ankohet
në “magna carta libertatum”

Në mungesë të ujkut
edhe qeni i hanë delet
ia lëshon bariut mjekrën
gjoja e bëri nga dashuria…

Verë, 2019

Comments

Popular posts from this blog

Libra të rinj - Shkarkim falas

Ese për Vitin e Ri

Poezi të zgjedhura nga GJERGJ FISHTA (23 tetor 1870 - 30 dhjetor 1940)