Retrospektivë kulturore: Dabishevci e nusëron gegërishten burrërore

“E studiuesja Donika Dabishevci duke i marrë për bazë gjithë këta përbërës të padiferencuar teorik, i është qasur trajtimit të prozës poetike në disa rrafshe, dhe për këtë i ka ndihmuar edhe vetë lënda e autorëve që i kanë kultivuar prozat poetike si Faik Konica, Mithat Frashëri, Errnest Koliqi, Martin Camaj dhe Mihal Ganxharri”, tha ndër të tjera Haxhaj.

Sarandë Selimi

Dy libra të shkruar në të njëjtën kohë, “Proza e poetizuar” dhe “Kam me ardhë si deka”, të autores Donika Dabishevci mesditën e së mërkurës u promovuan mes familjarëve, miqve, studiuesve, shkrimtarëve e shumë artdashësve të librit në Institutin Albanologjik në Prishtinë. 
Ardian Haxhaj fillimisht i tha disa fjalë për librin me poezi “Kam me ardhë si deka”, ku theksoi një preokupim të tij gjatë leximit të librit.

“Gjatë leximit të librit “Kam me ardhë si deka”, erdha në përfundim se sa shumë ka humbur gjuha shqipe, respektivisht standardi i gjuhës shqipe në vitin 1972 me mospërfshirjen e një dialekti siç është gegërishtja, jo vetëm në kuptimin e trajtave gramatikore por edhe në kuptimin e fjalësisë apo në kuptimin semantikor të tyre”, u shpreh fillimisht Haxhaj i cili vazhdoi më tutje të flasë për “Proza e poetizuar”, ku sipas tij studimi i prozave poetike dhe trajtimi i prozave poetike paraqet një sfidë të veçantë studimore për secilin studiues teoriko-letrar dhe kritiko-letrar, ku siç tha ai, vetë sintagma prozë poetike semantikisht ngërthen në vete dy e më shumë përbërës zhanror, dy e më shumë përbërës tipologjik.

“E studiuesja Donika Dabishevci duke i marrë për bazë gjithë këta përbërës të padiferencuar teorik, i është qasur trajtimit të prozës poetike në disa rrafshe, dhe për këtë i ka ndihmuar edhe vetë lënda e autorëve që i kanë kultivuar prozat poetike si Faik Konica, Mithat Frashëri, Errnest Koliqi, Martin Camaj dhe Mihal Ganxharri”, tha ndër të tjera Haxhaj.

Agim Baçi, studiues nga Shqipëria, vazhdoi të fliste më pas për librin “Kam me ardhë si deka”.

“Ajo që ishte befasi për librin është se jemi të mësuar me toskërishten në shumë libra në Tiranë, dhe e kishim vlerësuar gegërishten të ardhur kështu si burrërore, diçka luftarake diçka që flet për gjëra të mëdha. E kësaj radhe Donika e solli gegërishten të nusëruar, kjo gegërishte më kujton vetëm Donikën e jo shkrimtarët tjerë. Donika në këtë libër e ka ruajtur kufirin shumë të ëmbël të të gjitha fjalëve pa zbritur asnjëherë në momente banale, andaj e përdora edhe fjalën e nusëruar”, theksoi Baçi.

E krejt për fund, vetë autorja iu drejtua të pranishmëve, fillimisht duke i falënderuar për pjesëmarrje e më pastaj edhe foli për dy librat e saj.

“Libri “Proza e poetizuar”, ishte projekti im i doktoratës i cili zgjati katër ose pesë vite. Nuk do të kisha mundur ta paramendoja një kurorëzim më të mirë sesa një libër të botuar me logon e Institutit Albanologjik. Gjatë kësaj periudhe kam shkruar edhe librin me poezi “Kam me ardhë si deka”, të cilat filluan dhe mbaruan natyrshëm, do të thotë asnjëra nga poezitë e këtij libri nuk janë shkruar sa për numër, nuk janë shkruar në mënyrë arbitrare por kanë lindur që të gjitha natyrshëm”, u shpreh për fund autorja.