Kryeministri Edi Rama ka hedhur poshtë në daljet e tij publike informacionet se në administratën publike emërimet dhe punësimet vijojnë të bëhen mbi preferenca partiake. Për ta mohuar këtë ai preferon të flasë shpesh për pamundësinë që t’u plotësojë kërkesat militantëve të PS që e presin para Selise Rozë dhe u kërkojnë punë për djemtë e vajzat e tyre në administratën publike.
Por kjo është vetëm një mënyrë propagandistike për të treguar se qeveria Rama nuk punëson militant, është e gjetur. Shkresat që dalin nga zyrat e Partisë Socialiste dhe deputetët e saj tregojnë një realitet tjetër.
Një dokument i korrikut të vitit të shkuar hedh dritë si janë bërë punimet në administratën publike, në qarkun e Vlorës (dokumenti i mëposhtëm). Shkresa e dalë nga zyra e deputetit Koço Kokëdhima, që mban firmën e asistentes së tij, u kërkon drejtorëve të administratës të hartojnë dy raporte për zbatimin e marrëveshjes PS – LSI për punësimet në institucionet në nivel qëndror.
Në dokument thuhet se kërkesa mbështetet në udhëzimet e dhëna në një mbledhje të datës 4.8.2015 të drejtuar nga Kryeministri dhe kryetari i PS Edi Rama, me praninë e deputetëve të qarkut të Vlorës, kryetarëve të Bashkive të këtij qarku, prefektit të Vlorës, nënprefektit të Delvinës dhe kryetarit të Këhsillit të Qarkut.
Në mbledhjen e drejtuar nga Edi Rama është rënë dakord që të prodhohen dy raporte: I pari, një databazë e Burimeve Njerëzore të Administratës Publike, qarku Vlorë; dhe i dyti, zbatimi i Marrëveshjes PS – LSI/ Raporti i punësimeve në institucionet në nivel qëndror.
Kërkesa shoqërohet me një formular që duhet të plotësojnë të gjithë punonjësit e drejtorive të qarkut, përfshirë edhe ata që drejtorët e PS – Lsi kanë gjetur në institucion. Pjesë e formularit është edhe deklarimi i partitshmërisë së secilit prej të punësuarve të administratës, PS apo LSI, siç vërtetohet në dokumentin e mëposhtëm.
Kjo kërkesë e dalë nga zyra e deputetit Kokëdhima u kërkon drejtorëve të administratës ta konsiderojnë atë me prioritet dhe të angazhojnë një person të posaçëm në institucion, i cili të punojë vetëm për këtë qëllim.
Shkresat e mësipërme vërtetojnë edhe një herë se përtë gjetur një vend pune në administratën publike duhet të jesh anëtar i Partisë Socialiste apo Lëvizjes Socialiste për Integrim. Nga ana tjetër, ashtu si edhe dokumentet e tjerë të publikuar nga Lapsi.al për punësimet partiake me udhër e kërkesa deputetësh në tatime, dogana apo arsim, ato tregojnë se tentativat e kryeministrit Rama për t’u ngulitur njerëzve idenë se ai e ka të pamundur të punësojë militantë, janë demagogji dhe gënjeshtra. Ndryshe nga sa ai flet, dokumentat që prodhohen bazuar në urdhërat e dala nga mbledhjet e kryesuara prej tij, tregojnë të kundërtën: në administratë punësohesh vetëm nëse je i PS ose i LSI. Këtë ia tha hapur në Vlorë edhe një i anëtarësuar rishtash në PS, kur në krah të Ramës pranoi se kishte gjetur punë si mësues vetëm pasi ishte bërë anëtar i Partisë. /Lapsi.al
No comments:
Post a Comment