Shteti “gjunjëzohet” para njerëzve të pushtetshëm

Nuk ki as pse me i thane. Nuk paguajne, jo. Rrjet jane. Tash eshte problem me i ndale. Po bash per kete pune po rri une ketu per me iu ba rezistence qe bile njeren pjese te ndermarrjes me ruajt prej uzurpimit”, ka deklaruar Selimi.

Per vellezerit e Shaip Mujes thote se i ka shoke por qiranë nuk ua lyp sepse, sipas tij, nuk e paguajne kurre.

Ai thote per Bedri Selmanin se e ka mbeshtetjen e njerezve te fuqishem per te bere biznes.

“Mbrapa Bedri Selmanit qendron Hashim Thaqi, Kadri Veseli, Azem Syla, Rrustem Mustafa. Perndryshe kush do te guxonte te uzurpoje një hektar e gjysme ne vendin me te mire te Prishtines pa paguar asnje cent per qira”, ka deklaruar Selimi.

Me gjersisht:

http://koha.net/?page=1,13,84138

Publikuar: 15.01.2012 - 22:24

Prishtinë 15 janar - Biznesmenët Bedri Selmani e Shaip Muja, ish-këshilltarë të Hashim Thaçit, kanë ndërtuar biznese private në pronën e ish-ndërmarrjes shoqërore “Auto Prishtina” shkruan gazeta "Jeta në Kosovë". Të dy biznesmenët, Muja deputet aktual e Selmani ish-deputet, nuk paguajnë qira për shfrytëzimin e kësaj prone. Agjencia Kosovare e Privatizimit asnjëherë nuk ka bërë raport për këtë ndërmarrje shoqërore pasi që dy kompani private, sipas zëdhënësit të saj, e uzurpuan “Auto Prishtinën” para gati 13 vjetësh.

Kryeministri Hashim Thaçi në objektet e “Hotel Victory” mban mbledhjet e Këshillit Drejtues e ato të Kryesisë së PDK-së. Edhe mesazhin për zero tolerancë ndaj korrupsionit Thaçi e ka dërguar kur është gjendur në ambientet e këtij hoteli, gjatë vitit 2011. Ndërkaq, objekti ku mblidhet për tu mobilizuar partia e Thaçit është ndërtuar kundërligjshëm.

Pronari i “Hotel Victory”, Bedri Selmani, sipas AKP-së, ka uzurpuar pronën shoqërore për të ngritur këtë biznes privat. AKP, e më herët Agjencia Kosovare e Mirëbesimit (AKM) për 11 vjet rresht nuk ka mundur të “zbarkojë” në këtë objekt, ku i mban mbledhjet partia që drejton qeverinë sot.

Bedri Selmani në Qeverinë e Përkohshme të Kosovës mbante pozitën e këshilltarit për çështje ekonomike të kryeministrit Hashim Thaçi.

Afër këtij hoteli operon restoranti “Te Rrethi”. Në katin e dytë të objektit, ku është i vendosur ky restorant, ka zyrat kompania Ci-Kos, që merret me tregtinë e metaleve e që është pronë e Fatmir Mujës, vëlla i deputetit të PDK-së Shaip Muja, që ishte këshilltar i kryeministrit Thaçi prej vitit 2008 deri më 2010.

Ish-këshilltari i Thaçit, sipas ish-drejtorit të Auto Prishtina, Aziz Sefedini, menjëherë pas luftës ndërtoi restorantin “Te Rrethi” në pronë shoqërore. Për veprimet e ish-këshilltarëve të kryeministrit është e njoftuar edhe AKP-ja.

“NSH Auto Prishtina që nga viti 1999 është e uzurpuar nga dy kompani private”, ka thënë zëdhënësi i AKP-së, Ylli Kaloshi. Hapësira e kësaj ndërmarrje sipas AKP-së është 1 hektar e 61 ari.

Një raport monitorimi e një vlerësim i aseteve të kësaj ndërmarrje nuk është bërë asnjëherë. “AKP nuk ka bërë Raport Monitorimi lidhur me NSH ‘Auto Prishtina’ ngase ndërmarrja shoqërore ‘Auto Prishtina’ është e uzurpuar dhe nuk është e komercializuar”, ka deklaruar Kaloshi për gazetën Jeta në Kosovë.

Nuk dihet as koha kur kjo ndërmarrje shoqërore do t’i nënshtrohet privatizimit. AKP-ja e pret lejen e Dhomës së Posaçme të Gjykatës Supreme për ta shitur këtë ndërmarrje shoqërore pasi kishte ngritur padi ndaj uzurpatorëve. Ende nuk ka marrë një përgjigje se kur mund të privatizojë ndërmarrjen “Auto Prishtina”.

Kjo ndërmarrje shoqërore deri në vitin 1991, kur u ndërpre puna pas largimit me dhunë të punonjësve të saj, ishte e vetmja shtëpi e autorizuar në vend për shitjen, mirëmbajtjen dhe riparimin e veturave, si dhe kontrollimin teknik të automjeteve të tipit "Magirus". Po ashtu, Auto Prishtina ishte auto servisi i autorizuar për shitjen dhe mirëmbajtjen e veturave “Zastava”, “Iveco” dhe “Opel”.

Objektet e kësaj ndërmarrje shoqërore në korrikun e 99-s do të përdoreshin për nevoja të Ministrisë së Mbrojtjes së Qeverisë së Përkohshme. Kështu kishte vendosur Azem Syla. Ai mbante pozitën e Ministrit të Mbrojtjes dhe nënshkroi vendimin më 22 korrik të atij viti. Vendimi i tij atë kohë do të hynte në fuqi 5 ditë para nënshkrimit të tij. (Shih dokumentin).

“Lokali i Servis Prishtina pranë restorant ‘Breta’ duke filluar nga data 17 korrik 1999 kalon nën administrimin e Ministrisë së Mbrojtjes së Qeverisë së Përkohshme të Kosovës. Ish-punëtorët e këtij servisi që dëshirojnë të vazhdojnë të punojnë në këtë lokal mund t’i drejtohen me shkrim Komisionit Drejtues të këtij servili, i cili drejtohet nga z. Sabit Zogaj”, thuhet në këtë vendim që e ka siguruar Gazeta JNK.

Azem Syla nuk i është përgjigjur pyetjeve të gazetës rreth këtij vendimi.

Aziz Sefedini, drejtor i kësaj ndërmarrje kishte mbetur i pakënaqur me vendimin e ministrit të Mbrojtjes. Tre vjet më vonë, në një shkresë dërguar shefit të policisë së UNMIK-ut Stephan Feller, do t’i kallëzonte atij për shkeljet ligjore që kanë ndodhur në këtë ndërmarrje. Sefedini tregon për largimin e tij nga pozita e drejtorit të kësaj ndërmarrje dhe për uzurpimet e bëra. (Shih dokumentin).

Bedri Selmani, sipas tij, një pjesë të objektit të NSH Auto Prishtina e regjistroi si pronë private që e emëroi hoteli “Viktoria”.

Shaip Muja, sipas tij, ndërtoi objektin “Te Rrethi”, prej 500 metra katrorë në pronë të NSH Auto Prishtina.

Sefedini shkruan se Bedri Selmani i kishte bërë presione që të largohet nga puna.

“Bedri Selmani, këshilltar i z. Hashim Thaçi për politikë ekonomike, kërkonte të marrë këtë NSH dhe bënte presion që unë të largohem nga puna...”, shkruante Sefedini më 30 shtator të vitit 2002.

Sefedini thotë për Gazetën JnK se një letër për papajtueshmërinë e tij me vendimet e Qeverisë së Përkohshme të Kosovës ia ka dërguar edhe Azem Sylës.

“Në nëntor (1999) do t’i shkruaja Azem Sylës. Aty i them se largimi im nga puna pa një aktvendim paraqet shkelje të ligjit”, ka thënë Sefedini, duke shtuar se nuk kishte marrë një përgjigje nga Syla për shkresën e tij zyrtare.

Një letër tjetër atë kohë ai do t’ia dërgonte Parlamentit të Kosovës, Presidentit e Kryeadministratorit, ku propozonte që objekti i kësaj ndërmarrje të shfrytëzohej nga Policia e Kosovës meqë ka pozitën më strategjike në Prishtinë për të vëzhguar qytetin.

“Nuk kam marrë përgjigje për këtë përveç një premtimi të Michael Steinerit (shefit të UNMIK-ut), i cili më vonë do të zmbrapsej”, ka thënë Sefedini.

Një problem tjetër atë kohë Sefedini ka thënë t’i ketë dalë me njërin prej zyrtarëve të lartë të PDK-së, Rrustem Mustafa - Remi.

“Ne ishim kthyer pas luftës dhe kishim filluar të operojmë. Pas një kohe, është fjala për qershorin e 1999, do të vijnë disa njerëz. Ata më marrin dhe më çojnë në Kolovicë. Aty një person do të më bënte pyetje të tipit “A e njeh Rrustem Mustafën e Zahir Pajazitin e kush na ka çliruar neve? Më thanë a mund ta nënshkruash një deklaratë ku do ta pranoj se është NATO ajo që na ka çliruar e jo UÇK-ja”, ka thënë Sefedini. “Nënshkrimi i kësaj deklarate nuk ishte i preferueshëm në 99-n”.

“Më vonë do të mësoja se ishte Rrustem Mustafa ai që më kishte marrë në pyetje. Edhe diçka tjetër do të mësoja më vonë. Në 99-n ishte bërë luftë mes Llapit e Drenicës se kush do ta uzurponte ‘Auto Prishtinën’ ”, ka deklaruar Sefedini.

Rrustem Mustafa –Remi, tash nënkryetar i PDK-së, thotë se Sefedini mund ta ketë ngatërruar me dikë tjetër “Jo, unë nuk kam lidhje me atë njeri. Nuk e njoh. Kushedi si më ka ngatërruar. Lidhje nuk kam me të”, ka thënë Mustafa.

Për vendin ku është i ndërtuar hotel ‘Victory’, Mustafa ka thënë se nuk është në dijeni që ka qenë ndonjëherë ndërmarrje shoqërore.

“Nuk e di që ky objekt është i uzurpuar. Mund të jetë. Mund të jetë dhe financues i PDK-së. Unë nuk e di. Unë për vete rri më shumë këtu se në çdo vend tjetër. Kjo ndodh sepse e kam shumë të lehtë që prej këtu të lëviz me makinë”, ka deklaruar Mustafa, deri sa flet pikërisht nga hotel "Victory".

Bedri Selmanin thotë se e njeh e pi kafe me të, por nuk e zgjatë më shumë me të.

Uzurpatorë të pronave shoqërore sipas Mustafës nuk do të dalin njerëzit që kanë qenë ushtarë të UÇK-së.

“Asnjë ushtar i UÇK-së nuk do të dalë mbrapa asnjë uzurpimi. E kam fjalën për ata që kanë luftuar krejt kohën. Mbrapa uzurpimeve do të dalin ata që kanë ndejtë jashtë e janë kthyer prej diasporës dhe kanë uzurpuar objekte”, ka deklaruar Mustafa.

Shaip Mujën, pjesë e batalionit të mjekëve të UÇK-së, që ka ndërtuar një objekt në pronën e kësaj ndërmarrje Mustafa nuk e llogarit për ushtarë të UÇK-së.

“Pse a ka luftu ai, a?”, shprehet Mustafa për Mujën.

Dy ish-këshilltarët e Thaçit, Selmani e Muja nuk kanë dashur të komentojnë rreth çështjes së uzurpimit të “Auto Prishtina”.

Muja nuk ka dhënë një përgjigje me arsyetimin se nuk mund të bëhet kujdestar i gazetarëve për të dhënë përgjigje sa herë ata e kërkojnë një gjë të tillë. E, Selmani, ish-deputet i PDK-së, është arsyetuar se ndodhet jashtë vendit dhe nuk mund të komentojë për këtë çështje.

Veprimet e Mujës e Selmanit nuk i ka komentuar shefi i tyre, Hashim Thaçi. Këshilltarët aktualë të tij, Lirim Grajqevci e Abelard Tahiri nuk kanë kthyer një përgjigje për pyetjet që i janë adresuar kryeministrit të vendit.

Drejtori aktual i ndërmarrjes “Auto Prishtina”, Islam Selimi ka thënë se e di që dy biznesmenët në bazë të rregullave duhet të paguajnë qira për shfrytëzimin e pronës, por ai këtë nuk e ka kërkuar kurrë nga ta.

“Nuk ki as pse me i thanë. Nuk paguajnë, jo. Rrjet janë. Tash është problem me i ndalë. Po bash për këtë punë po rri unë këtu për me iu ba rezistencë që bile njërën pjesë të ndërmarrjes me ruajt prej uzurpimit”, ka deklaruar Selimi.

Për vëllezërit e Shaip Mujës thotë se i ka shokë por qiranë nuk ua lyp sepse, sipas tij, nuk e paguajnë kurrë.

Ai thotë për Bedri Selmanin se e ka mbështetjen e njerëzve të fuqishëm për të bërë biznes.

“Mbrapa Bedri Selmanit qëndron Hashim Thaçi, Kadri Veseli, Azem Syla, Rrustem Mustafa. Përndryshe kush do të guxonte të uzurpojë një hektar e gjysmë në vendin më të mirë të Prishtinës pa paguar asnjë cent për qira”, ka deklaruar Selimi.

Vetëm Mustafa ka mohuar këtë lidhje kur është pyetur për këtë. Të tjerët nuk i janë përgjigjur pyetjeve së Gazetës JnK.

Drejtori i kësaj ndërmarrje shoqërore ka thënë se me Selmanin ka pasur probleme edhe më herët.

“Selmani që është vet uzurpues më pat ngritur padi mua se e paskam uzurpuar unë ndërmarrjen. Po unë e kom përzënë hetuesin se është nipi i Selmanit”, ka thënë Selimi.

Kur të nisë procesi i privatizimit për këtë ndërmarrje shoqërore, thotë Selimi, askush nuk do të guxojë të ofertojë për blerjen e saj.

“Kush i shti paret në këtë pronë? Ai (Selmanaj) ka me i largu krejt investitorët e interesuar, duke i bindë që ka investuar aty dhe tash i takon”, ka deklaruar Selimi.

Aktualisht në “Auto Prishtina” marrin paga 30 deri në 40 punëtorë, varësisht prej të ardhurave të qirasë nga pjesa e pa uzurpuar e kësaj ndërmarrje shoqërore.

Më herët, ndërmarrja kishte mbi 70 punëtorë, në kohën kur aty riparoheshin automjetet. Pagat e punëtorëve ishte planifikuar të siguroheshin në vitin 2000 përmes një marrëveshje të lidhur me Bedri Selmanin.

Më 5.04.2000 është nënshkruar kontrata në mes të Auto Kosovës, pronë e Bedri Selmanit si investitor, si dhe Auto Prishtinës si ndërmarrje shoqërore.

Në bazë të marrëveshjes, Selmani obligohej të paguante 19 mijë euro në muaj për të gjithë punëtorët. Të gjithë punëtorët mbeteshin në marrëdhënie pune e ktheheshin të gjithë ata që janë larguar me dhunë gjatë viteve të 90-ta.

Çështja e pronësisë do të mbetej e pandryshueshme me status NSH-je deri në aprovimin e ligjit mbi privatizim. Marrëveshja do të shkëputej zyrtarisht në 2003-tën pasi Selmani nuk e kishte respektuar atë që e kishte nënshkruar në prill të vitit 2000. 

Kujtesë klasës politike të Tiranës

  Prof.Dr.Eshref Ymeri

 

 

(Pas një njoftimi të zotit Ministër Aldo Bumçi)

 

       Para ca muajsh zoti Kryeministër deklaroi se me rastin e 100-vjetorit të pavarësisë, në Tiranë do të ndërtohej godina e re e  parlamentit dhe një stadium i ri. Asokohe ndodhesha në SHBA dhe përmes faqes së internetit reagova ndaj deklaratës së zotit Kryeministër, duke nënvizuar se është ende herët për ndërtimin e këtyre dy objekteve me rëndësi kombëtare, sidomos pas krizës ekonomike që ka pllakosur mbarë botën.

       Por tani së fundi u njoha me njoftimin e zotit Ministër Aldo Bumçi, i cili bënte me dije se ndërtimi i stadiumit të ri qenka e pamundur të realizohet, meqenëse 300 milionë lekët e caktuara nga buxheti i shtetit qenkan të pamjaftueshme për përballimin e ngritjes së një objekti të tillë.

       Në këto kushte, klasa politike e Tiranës duhet të rri e të vrasë mendjen që valët e fuqishme të krizës ekonomike mbarëbotërore, të mos e goditin me aq furi edhe vendin tonë, siç kanë goditur shumë vende të tjera. E them këtë se pasojat e kësaj krize, në një mënyrë ose në një tjetër, domosdo që ndihen dhe do të ndihen edhe në vendin tonë. Por megjithatë asnjë qytetar shqiptar nuk dëshiron që vendi ynë të katandiset si fqinji ynë jugor, i cili paratë e taksapaguesve perëndimorë i bëri rrush e kumbulla jo vetm brenda vendit të vet, por edhe në Shqipëri, me pensione skandaloze për njerëz që s’kanë punuar në Greqi as edhe një ditë të vetme, apo me ndërtime kishash greke, si puna e kështjellës janullatiste që ngrihet si karakoll në mes të Tiranës, varrezash, memorialesh dhe manastiresh në nderim të ushtarëve agresorë grekë.

       Gjendja e financave shqiptare, të cilat nuk kanë mundësi të caktojnë fonde të mjaftueshme për ndërtimin e një stadiumi të ri, se për ngritjen e godinës së re të parlamentit as që bëhet më fjalë, duhet t’i futë në sëkëlldi përfaqësuesit më të lartë të klasës politike të Tiranës, në mënyrë që të sigurojnë burime për shëndoshjen e situatës financiare.

       Nga regjistrimi i fundit i popullsisë rezultoi se brenda territorit të Shqipërisë Londineze banuakan 2, 8 milionë e ca banorë. Tani lind një pyetje e thjeshtë: me këtë numër popullsie, a është e udhës që ne të kemi në parlamentin shqiptar 140 deputetë? A nuk është koha, zotërinj të klasës politike shqiptare, të bëni ndryshimin përkatës në Kushtetutën e Republikës së Shqipërisë dhe numri i deputetëve të parlamentit të shkurtohet në atë masë që t’i përgjigjet numrit të popullsisë? Pse të mos marrim shëmbull nga vende të tjera, të cilat në parlament kanë një numër të arsyeshëm deputetësh, në përputhje me numrin e popullsisë?

       Le të shikojmë Knesetin (parlamentin izraelit). Nga faqja e internetit “Historia e Knesetit”,rezulton se sipas të dhënave të Drejtorisë Qëndrore të Statistikave të Izraelit, të botuara më 28 dhjetor 2010, rezulton se popullsia e Izraelit përbëhet prej 7 825 000 banorësh që jetojnë brenda territorit të vendit. Kurse parlamenti izraelit, pas zgjedhjeve të fundit që u zhvilluan më 10 shkurt 2009, përbëhet prej 120 deputetësh. Pra, vendi ynë që ka brenda territorit një popullsi prej gati tre herë më të vogël, ka në parlament 140 deputetë.

       A nuk është e udhës, zotërinj të nderuar të klasës politike të Tiranës, që këtë shifrën 140 ta zbresim, së paku, në 80, duke u kursyer financave shqiptare 60 deputetë, të cilët u kushtojnë taksapaguesve shqiptarë minimumi mbi100 milionë lekë të vjetra në muaj? Po gjatë një viti, po gjatë një mandati katërvjeçar sa para do të kursehen në buxhetin e shtetit?

       Po me financimin e partive politike, sidomos të partive politike fatntazma, e a dini se sa shuma kolosale gllabërohen nga buxheti i shtetit? Kodi eletoral që u aprovua para zgjedhjeve parlamentare të vitit 2009, zbuloi fare qartazi se shumë ish-deputetë të këtyre partive fantazma kishin qenë parazitë në parlamentin shqiptar se nuk kishin elektorat, çka në zgjedhjet e vitit 2009 u vërtetua katërcipërisht. Sa herë taksapaguesit shqiptarë kanë dëgjuar nga goja e shtetarëve më të lartë se fondet që kanë pas marrë partitë fantazma për fushatat e zgjedhjeve parlamentare, nuk i janë kthyer buxhetit të shtetit dhe madje janë falur? A e kuptoni, ore zotërinj, se këto para, të marra nga xhepat e taksapaguesve shqiptarë, kanë shkuar për dhjamë qeni?

Prandaj është e udhës që shteti të heqë dorë një herë e mirë nga financimi i partive politike, duke ndjekur shembullin e partive politike amerikane, të cilat nuk marrin asnjë dollar nga buxheti i shtetit për zhvillimin e fushatave elektorale. Partitë politike shqiptare le t’i zhvillojnë fushatat elektorale me ndihmën e sponsorëve dhe të simpatizantëve të tyre.

 

Tiranë, 19 janar 2010

Barboni i fshatit tim

 

 

                                                       Tregim

 

 

 

Nga   Përparim   Hysi

 

 

 

Mjekët thoshin se e ëma,gjatë lindjes,kish bërë lindje të vështirë dhe fëmija (qe  djalë)   ,pësoi një si goditje dhe mbeti pak si i metë. Xha Myrtja,një plak hokatar, thoshte kështu:-Dëgjo,xha Myrten ti,kur vë bukën në furrë për të pjekur,ndodh që një bukë digjet.Kështu ka  ndodhur dhe me këtë,Laton tonë (se Lato qe emri i djalit që vinte i "avashtë"nga mëndja),që thuaj ti,por ke parë ti,-vazhdonte xha Myrtja,- i avashëm ,i avashëm,por ta thotë kështu bëlldum,ç'dëgjon apo ç'sheh për rreth.Është më mirë të ruhesh nga Latoja se sa nga policia.Në të pa lakuriq, të nxjerrë bojën e të shkojë nami tek "Molla e kuqe".

 

                        *    *   * 

Kur qe i vogël,rreth 10-vjeç, më vinte pas dhe tek më shihte me një kolegen time që niseshim për në shkollë,Latoja më qepej pas dhe thoshte:

-O presor( e kishte për profesor,de!) , më jep një orë!

-O mësuese,më gjej një nuse!

Na vihej pas dhe nuk na ndahej deri sa t'i jepnim diçka.Patjetër,ndonjë lek seç tjetër?

Sado i"avashtë" nga mëndja,por i ngrinte bejtet aty për aty.Dhe Xha Myrtja,thoshte:-Ore Perëndia nuk është se t'i merr të tëra.Pak eksiq nga mëndja,ky,Latoja,por është birinxhi nga goja.

Fshati ynë aso kohe qe i vogël dhe,megjithatë,u bë sektor ferme.Kuadrot na erdhën  nga fshat tjetër.Po laj-thaj një përgjegjës sektori dhe një brigadier(që të dy komunistë) dhe pritej dhe një i tretë në llogari që të ngrihej ajo e shkretë organizatë qoftë dhe celulë si në kohë të luftës.Nga fshati s'ksihim atëherë asnjë komunist për be.Po nuk ishte aty puna,por qëlloi që përgjegjegjësi të  na qe pak vëngarash (gojë më gojë quhej symënjanë apo qorr),dhe,për çudi,komunisti tjetër,brigadieri na qe dorac.Çu-çu bënin gra e burra për këtë"qorrin" e doracin,por Latoja që i priste drutë shkurt,doli një ditë nëpër sektor dhe ia thirri:

-Fshati ynë i vogël na qëlloi me fat

Sado është i vogël,na u bë sektor

Brigadierin seç e ka dorac

Dhe përgjegjësin na e pasak qorr!!!

Jepnin e merrnin të rriturit që ta pushonin,pse mbyllej goja e Latos.Po kishte dhe më keq se sa kaq. Kishin zënë një burrë që puthej me gruan e botës.Epo kanë ndodhur dhe në fshat këto gjëra.I zunë dhe i sikterisën,por bojën ua nxorri Latoja.Ky ashtu si ujku që kërkon mjegull që të sulmojë mbi kopenë,ruante kur mblidhej njerëzia dhe fillonte.Siç dhe filloi  për këta"lumzestë":

"Tek shega e Muratit

E gjetën Alinë

Nuk po hante shegë

Po puthte Selvinë!...

Mileti binte përmbys nga këto të thëna të Latos dhe vërtet që u bë hall mbi hall.Po dilte fjala e xha Myrtes:-Ruhuni nga Latoja,se ua nxorri çipllak me të lara e të palara.Latoja qe rritur tashmë,po kishte mbetur nën mesataren e shokëve.Shtatin të shkurtër,gjuhën të gjatë.Të gjatë e të hidhur.

Ndonjëherë,me që fshati është buzë xhadesë,dilte atje dhe,sa shihte ndonjë me biçikletë,e ndalte( e zinte shul e shul xhadenë,tek hapte krahët) dhe bërtiste:-Ndal,"patentën!".Në ishte i fuqishëm ai që vinte mbi biçikletë,Latoja nuk  e bënte atë kërkesën për"patentë",por qejfi i tij qe kur kalonte ndonjë femër (përgjithësisht,kështu vinin mësueset) dhe u vilte "vergjinë".Veç qe pa dëm.Kurrë nuk kërcënonte.Edhe po mos t'i jepnin gjë,nuk ngulte këmbë.Pak po të dëgjonte qoft dhe nën zë ndonjë gjë,ai zinte dhe vinte tellallin,sikur këtë ta kish punë.Po të shihte me femra,të kurdiste ndonjë bejte aty për aty.

Ja po vinte drejtori i shkollës,futur në mes dy mësueseve dhe,me që e dinte që Latua nuk të linte pa shpoti,drejtori i foli i pari dhe si me politesë.Siç mendonte,duke i folur,do ta torolliste Laton dhe t'i shpëtonte ndonjë rromuzi.Dhe ndaj dhe i foli:

-Lato,ç'kemi?

-Mish patate dhe koqe demi!!!

Mësueset dhe drejtori u skuqën si të vëna mbi prush,por gjindja për rreth u shkërrmoqën së qeshuri.

                                   

                                  *    *    *  

Po dhe Laton një ditë prej ditësh,sado që rronte ku rafsha mos u vrafsha,e gjeti kusuri.Qe koha kur  në rrethin tonë erdhi për vizitë,Çu En Lai,kryemistri kinez.Erdhi dhe njerëzit seç thoshin nëpër gojë:Jo Çuni i Lalës,jo Maçok Duni e Çini-Maçini.Ata nën gojë,po Latoja,me ta ta parë "mbretin lakuriq",do bërtiste:-Mbreti është lakuriq! Kështu dhe me Çu En Lain.

Bëritste nëpër sektor:

-Erdhi Çuni i Lalës

Nga Çini-maçini

I tha Enver Hoxhës

Nuk bën më Stalini!!!

 

Tani s'ka më Stalin

Po ka Maçokdun   *

Kështu tha Çuni i lalës

Kështu them dhe unë.

 

I dhanë dhe i morën Latos që mos e këndoj këtë këngë.Po pse dëgjonte ai?Pastaj,ndonjëri që donte ta ndihmonte,i thoshte:-Jo Maçokdun,po Mao Ce  Dun! Dhe Latoja:-Pse mua do ma hedhësh ti?Pse nuk e njoh unë Maon,atë eliktirxhinë?Se vërtet në fshat kishim një Mao ne,po ku  ta dinte Latoziu se ky,Maoja,e kish emrin Muhamet,po shkurtmisht i kish mbetur kështu.

Dolëm dhe në xhade si fshat për ta nderuar Çu En Lain,po ndahej Latoja.Këngës si në shtatë puset,kur i thonë.Mirëpo një ta përfshirë ata të degës dhe e "sakatuan".Kur erdhi nga dega,ata,djemuria e pyesnin:

-Ç'të bën atje,në degë?

-S'ishte degë,po ishte"vegë"

Se më rrahën si me dybek

Një me shqelmë nga këmbët

Një me grusht nga dhëmbët.

-Po pse,pyesnin sikur s'e dinin?

Që të thosha Maoja është nga Çini-maçini.Unë u thosha është nga fshati dhe ai i Kinës është Maçokduni.Dhe,sado me dhëmbë të thyer, ashtu e quante.Kishte dhe një të mirë Latoja:-Edhe t'i prisje kokën,nuk tregonte në i besoje gjëkafshë.

-Më ka thënë pepja(babai),kurrë mos trego në të beson tjetri diçka.

                           *   *   *  

Pepja(babai) i kish dhënë 250 lekë dhe e dërgoi për bukë.Shtisja qe shumë korrekte:i dha bukën dhe i ktheu dy qindshe.Latua u gëzua shumë që dha një para dhe mori,veç bukës,"dy para".Dhe i tha këngës:

 

-Moj Hava,moj Hava

Unë të dhashë një para

Ti më dhe një bukë

Dhe "dy para"..

 

Të nesërmen erdhi prapë Latoja për të blerë bukë,por tani kish vetëm 50 lekë.Havaja(shtisja) i dha bukën.Latoja nuk luante:-Dua dhe dy para! Jepte e merrte Havaja,pse luante Latoja.Pa ç'pa,e shkreta Hava,i dha dhe dy dhjetëshe.Po më Laton nuk e dërguan nëpër dyqane.

 

                                    *    *   *

Prindërit vendosën ta martojnë.I gjetën dhe nuse.Por Latoja (që të nesërmen u mor vesh) tek do bënte atë"punën" që bën çdo dhëndërr me nusen,na e kish futur"jangllësh" atë"meremtin".

-Lato,- kish bërë zë nusja,- e ke futur në "bythë".Po as që dinte Latoja për ato"dallime".Dhe nusja që të nesërmen,iku.

-Pse të iku nusja,Lato?-pyesnin djemuria,sado që e kishin dëgjuar me dhejtra herë ç'u kish thënë Latoja.

-Iku se qe budallaçkë,- thoshte ai,fare pa teklif.Më tha:-E ke në"bythë",po në bythë e kishte ajo.Dhe shkërrmoqej duke qeshur.

Ha-ha,- oshtinte të qeshurit e djemurisë.

-Uh,lanet,- bënin pleqtë.

-Pu-pu,- shkulnin faqet graria.

Po kur them unë,- ndërhynte xha Myrtja,- trazoheni,trazoheni se të tjera  rrurrëza do nxjerë.

Por Latoja vetëm qeshte dhe bënte tutje-t'hu kur ç'tregonte qe fare normale dhe ç'kishte për të qeshur,xhanëm?...

Duke e mbyllur,u kërkoj ndjesë lexuesëve për atë pjesën"vulgare" dhe mos më nxjerrin gjuhën se një njeri që e kam përlyer tregimin tim.E kam bërë vetëm e vetëm për të dhënë portretin e një barboni që,në fund të fundit,është model i pastërtisë dhe i padjallëzisë.Një njeri që kurrë nuk vë maskë dhe është transparent si xham.

 

                              19 janar 2011

James Berisha: I lumtur që kthehem gjallë në Kosovë

Zëvendëskryeministri i Kosovës, Behgjet Pacolli ka arritur ta lirojë nga burgu pilotin shqiptaro-amerikan, James Berisha.

Lirimi i tij është konfirmuar edhe zyrtarisht. "Aktualisht zëvendëskryeministri Pacolli bashkë me pilotin Berisha gjenden në udhëtim e sipër nga kryeqyteti i Eritresë, Asmara, për në Stamboll, ku edhe do të kalojnë natën, ndërsa nesër (e enjte) ata do të arrijnë në Prishtinë", thuhet në komunikatën e zyrës së zëvendëskryeministrit Pacolli. 
 
Ndërsa Berisha ka shprehur gëzimin e tij që po kthehet në atdhe.

“Jam i lumtur që më në fund po kthehem në atdhe i gjallë. Ditët në burgun e shtetit afrikan janë dukur si vite të tëra. Do të doja të shihja të gjithë njerëzit e vullnetit të mirë në aeroport, dhe ju ftoj të vini”, ka thënë Berisha pas lirimit, transmeton Indeksonline, i cili sjell edhe foton e bërë sot gjatë ditës bashkë me Pacollin. 

Flaka e Janarit sivjet si “Tri dekada lirie”

Me akademinë përkujtimore për dëshmorët e rënë gjatë janarëve të historisë, koncertin e muzikës serioze dhe “Penelin e Flakës”, në Gjilan  kanë vazhduar aktivitetet në kuadër të manifestimit kulturor tradicional, “Flaka e Janarit 2012”, i 21-ti me radhë.
 
Në Akademinë përkujtimore të “Flakës së Janarit”, që këtë here është titulluar “Tri dekada lirie ”, e cila u mbajt të martën në mbrëmje, kryetari i komunës së Gjilanit, Qemajl Mustafa , tha se “Flaka e Janarit” u themelua së paku për dy arsye të mëdha, për ta kujtuar dhe nderuar përherë veprën e Kadri Zekës, Jusuf e Bardhosh Gërvallës, Rexhep Malës e Nuhi Berishës, dhe për ta mbajtur ndezur e përcjellë tutje idenë dhe përcaktimin e saktë dhe këmbëngulës të popullit të Kosovës për çlirim.

” Flaka e Janarit” i kreu që të dy këto dy misione të saja me plot sukses deri tani”  , tha Mustafa, duke shtuar se dëshmorët e kombit na e krijuan rastin që të punojmë e krijojmë në liri, që të themelojmë komuna demokratike dhe shtet demokratik.

Ndërsa, zëvendëskryeministri i Qeverisë së Kosovës, Hajredin Kuçi, duke përkujtuar tridhjetë vjetorin e rënies së Jusuf e Bardhosh Gërvallës e Kadri Zekës, tha se Qeveria e Republikës së Kosovë shpreh gjithë admirimin për punën, veprën dhe rënien heroike të këtyre heronjve. Ai tha se Jusufi, Bardhoshi e Kadriu, ishin ata që e dhanë idenë dhe e mbrojtjen me guxim. “Ata janë heronj jo vetëm për mënyrën tinëzare se si u vranë, por edhe për idenë dhe qëllimin që e zhvilluan në jetë”, tha Kuçi.

Zëvendëskryeministri Kuçi tha se qëllimi i të gjithë atyre, për breza me radhë, që nga Adem Demaçi dhe nga shokët e Jusufit e mbajtën gjallë Flakën e Janarit, që u ndezë tutje edhe me Rexhep Malën e Nuhi Berishën, me Afrim Zhitinë e Fahri Fazliun, por u ndez shumë hapur me Adem Jasharin .

Ai tha se Flaka e Janarit u mbajt gjallë edhe me luftë e UÇK-së anekënd Kosovës dhe sot është gjallë, mbahet nga qytetarët e Kosovës, në shtetin e Kosovës dhe në kombin shqiptar. Kuçi edhe sot pas 30 vite Jusufi, Kadriu e Bardhoshi dhe tjerët mendojnë për ne dhe ne mendojmë më shumë për ta, jo si flakadanë të Flakës së Janarit, por si ngrohës të mendjes së ideve për ta pasur një shtet modernë, demokratik dhe të zhvilluar.

Hydajet Hyseni tha se bëhen 30 vite që na bashkon kjo datë e Janarit të acartë dhe tash e mbi 20 vjet kjo datë me të drejtë quhet ‘Flaka e Janarit”. Ai tha se kjo ditë bashkon në vetvete dhembje, mall e krenari, që është kthyer edhe në një ditë nderimi e reflektimi për ata që u bënë theror në themelet e kësaj lirie që po gëzojmë sot. Kurse Hysen Matoshi, foli për veprën e Kadri Zekës, duke e vlerësuar si një atdhetar i pakompromis në rrugën e lirisë. 

Ngritet shtatore për Jusufin, Bardhoshin e Kadriun, para ndërtesës së qeverisë te ish-Rilindja.

Nën patronazhin e Kryeministrit Hashim Thaçi u mbajt Akademi përkujtimore, me rastin e 30 vjetorit të rënies së Jusuf e Bardhosh Gërvallës dhe Kadri Zekës. Qeveria e Kosovës ka marrë vendim që më 28 nëntor, në 100 vjetorin e pavarësisë së Shqipërisë, të ngritet shtatore për Jusufin, Bardhoshin e Kadriun, para ndërtesës së qeverisë te ish-Rilindja.

Në Akademinë përkujtimore me rastin e 30-vjetorit të rënies së atdhetarëve Jusuf e Bardhosh Gërvalla dhe Kadri Zeka, Zëvendëskryeministri Hajredin Kuçi, bëri të ditur se Qeveria e Kosovës ka marrë vendim për ngritjen e shtatoreve të këtyre veprimtarëve, para ndërtesës së Qeverisë, objekti ish-Rilindja.

Kuçi tha se veprimtaria e tyre për lëvizje kombëtare është bërë frymëzim për të vazhduar luftën për lirinë dhe pavarësinë e Kosovës.

Bashkëveprimtari i Jusuf e Bardhosh Gërvallës dhe Kadri Zekës, Hydajet Hyseni, tha se 30 vjetori i rënies së tyre e gjen Kosovën shumë më lart dhe shumë afër të realizimit të idealeve të tyre.

Vajza e Jusuf Gërvallës, Donika, njoftoi në këtë Akademi përkujtimore, se në Gjermani ka filluar një iniciativë, që kërkon nga Qeveria gjermane kthimin e dekoratave të dhëna Josip Broz Titos në kohën kur ai ishte kryetar i Jugosllavisë.

Në Akademinë përkujtimore, u tha se 30 vjet më parë, më 17 janar të vitit 1982, lëvizja politike kombëtare mori një goditje të rëndë.

Jusuf Gervalla, Kadri Zeka e Bardhosh Gërvalla, ishin në krye të një projekti të rëndësishëm, që kishte për qëllim avancimin e interesave kombëtare.

Amaneti dhe vepra e tyre vazhdoi rrugën drejt lirisë dhe pavarësisë së vendit.

Kukës: Rritet interesi për zhvillimin e turizmit dimëror

Në një lartësi prej rreth 1400 metrash Kroji i Bardhë është vetëm 30 kilometra larg qytetit. Po ashtu edhe Shishtaveci, apo Novoseji, që janë vetëm 37 kilometra larg qytetit të Kukësit. Janë zona që i kanë të gjitha mundësitë për zhvillimin e turizmit malor.

R.Hoxha

- Një ditë e ftohtë, por pa lagështi. Vetëm syri të sheh bardhësinë në shtigjet e largëta të Gjalicës, pak dëborë, edhe pse është fillim janari.

Një dimër i çuditshëm e rrallë i ndeshur kësisoj, pa reshje e me temperaturë mbi zero. "Është një kohë e përshtatshme për udhëtime drejt vendeve që të ngjallin ndjesinë turistike, udhëtime që të kujtojnë rininë, udhëtime që tani janë harruar nga të rinjtë", thotë Ardiani, mësuesi që ka marrë rrugën drejt Krojit të Bardhë në malin e Gjalicës, një pikë turistike që po bëhet gjithnjë e më e njohur jo vetëm nga vendasit, por edhe nga turistë e gjuetarë nga zona të tjera të vendit. 

Ajo gjithnjë e më shumë pret mysafirë e turistë, që duan të njohin dimrin e ashpër të maleve tona. Ky dimër ka bërë që udhëtimet përmes rrugës së Grykës së Vanave, që ndan Gjalicën e Koretnikun, që është edhe rruga e vetme që të çon drejt Shishtavecit, staneve të Novosejit, të jenë të përditshme. Jo vetëm për banorët e qytetit të Kukësit, por edhe nga zona të tjera të vendit, duke sjellë popullimin e këtyre zonave turistike. 

Të tillë vizitorë kanë bërë që te vendasit të forcohet bindja se zhvillimi i turizmit malor është mjaft fitimprurës. Aq më tepër tani që edhe infrastruktura rrugore i ka afruar këto zona me zonën fushore. 

Në një lartësi prej rreth 1400 metrash Kroji i Bardhë është vetëm 30 kilometra larg qytetit. Po ashtu edhe Shishtaveci, apo Novoseji, që janë vetëm 37 kilometra larg qytetit të Kukësit. Janë zona që i kanë të gjitha mundësitë për zhvillimin e turizmit malor. 

Turizmi malor është ende në fillimet e tij 

Ndryshimet janë vetëm në fillimin e rrugës. Pasi ende, pika turistike ku funksionojnë edhe lokale tregtare, frekuentohen pak. E tillë është pika turistike pranë Gurit të Mëngjesit në Shishtavec. "Gjatë dimrit lokali nuk funksionon sepse nuk ka klientë. Lokali nis punën në fund të muajit prill deri në tetor", tregon pronari i tij, Behudin Murati. 

Ai tregon se gjatë verës klientët janë të shumtë dhe vijnë këtu nga i gjithë rrethi, apo nga zona të tjera, madje edhe nga Kosova. Vijnë nga qyteti, por edhe nga fshatrat e Kosovës. Vijnë për ajrin e pastër. Por, këtu nuk mungojnë edhe pistat natyrale të skive që presin të shfrytëzohen. 

Edhe ndonjë grup që i afrohet Gurit të Mëngjesit, kryesisht për sportin e skive, vendqëndrimin e ka në fshatin Shishtavec, banorët e të cilit janë të njohur për mikpritje e gatimin karakteristik. Madje dy muaj më parë në këtë fshat u organizua edhe panairi i gastronomisë vendase. 

Kukës: Rritet interesi për zhvillimin e turizmit dimëror

"Jemi të njohur jo vetëm në shkallë vendi, por edhe më tej, të rinjtë tanë që i janë drejtuar emigracionit, kryesisht kryejnë punë në kuzhina. Ky është profesioni që e trashëgojmë nga brezi në brez", thotë 72 vjeçari Hyrmet Demiri, që ka punuar mbi 40 vjet si kuzhinier. 

Një tjetër pikë turistike po bëhet edhe Pylli i Mështeknave, ku thuajse çdo ditë janë të pranishëm vizitorë të ardhur nga zona të ndryshme, madje edhe të huaj, kryesisht nga Kosova. 

Kështu ndodh edhe te stanet e Novosejit. Prakticiteti për të ndërtuar jetën edhe në mal është virtyt i njerëzve të punës. Një prej tyre është Mahmut Noka te stanet e Novosejit. Pas vitit '90 vëllezërit e tij u larguan në drejtim të Tiranës. Tani banesat e tyre, Mahmuti i përdor për turistë e vizitorë, që kalojnë një natë aty mes malesh. 

"Tani nuk kam shumë vizitorë, ndërsa në muajt e verës vizitorët janë të përditshëm, bile qëndrojnë deri në një javë. Ndërsa tani kalojnë një natë e largohen. Gjithsesi më parë gjatë dimrit nuk shihnim njeri pranë banesave tona, ndërsa tani kemi vizitorë edhe në dimër", thotë i kënaqur Mahmuti. 

Nuk janë vetëm këto pika turistike, është edhe "Sasati", "Kroji i Kuq", 'Kroi i Bardhë", që kanë nisur të vizitohen jo vetëm gjatë verës, por edhe në dimër. 

Pikat e tjera turistike kanë nisur të vihen në punë 

Njëra anë e Gjalicës, që shihet edhe nga qyteti i Kukësit, ka nisur të vizitohet. Në këtë anë ndodhen disa prej bjeshkëve të mira të Gjalicës, që gjatë verës mbushen plot. Kështu ka nisur të ndodhë dalëngadalë edhe gjatë dimrit. Një prej tyre është Kroi i Kuq, një nga bjeshkët më të mira të Gjalicës. 

Kroi i kuq ka nisur të pëlqehet jo vetëm nga banorët e fshatrave përreth, por edhe nga shumë vizitorë nga zona të tjera të vendit. Kjo edhe për faktin se deri afër tij ka edhe rrugë makine, një rrugë e ngushtë ku makina lëviz me vështirësi, por gjithsesi të heq mundimin e të ecurit më këmbë nëpër shpatinat e rrëpirta të malit. 

"Rruga e makinës na bën t'i drejtohemi për ushtrimin e sportit të skive. Aty ka edhe një lokal për të na shërbyer ushqimin, por edhe ndonjë pije", tregon Islam Cengu, mësues në fshatin Shtiqën. 

Islami tregon se tashmë numri i vizitorëve është në rritje, kur vetëm pak vite më parë gjatë gjithë dimrit nuk kujtohej kush të ngjitej deri te Kroi i Kuq që ndodhet thuajse afër majës së malit Gjalica. 

Vizitorët kanë mësuar edhe për pikat e tjera turistike që ndodhen jo shumë larg. Të tilla janë Kroji i Ramës, Kroji i Kishës dhe Kroji Tatzot, që vizitohen vetëm nga pasionuarit pas alpinizmit dimëror.

Vendet e përshtatshme turistike janë edhe të tjera si Sasati në lartësinë e mbi 1700 metrave mbi nivelin e detit. Sasati është i njohur, pasi në stinën e verës ai mbushet plot me vizitorë që qëndrojnë deri sa vjen dimri. 

Kukës: Rritet interesi për zhvillimin e turizmit dimëror

"Tani ka nisur të vizitohet edhe në dimër. Nuk mungojnë banesat e vogla të barinjve që mbushen gjatë verës. Kjo gjë po ndodh edhe në dimër", tregon Flamur Cengu nga fshati i Shtiqnit.

Kanë qënë edhe investimet që kryejnë vetë banorët që po i nxisin vizitorët të njohin më mirë verilindjen, deri tani të harruar. Vetë biznesmenët vendas po ndërtojnë një hotel në pyllin e Mështeknave, një tjetër te ura e Lapajve, pranë fshatit Bushtricë. 

"Është vetëm fillimi i një pune që sa vjen e rritet në shërbim të zhvillimit të turizmit, ndërsa investimet në këtë drejtim sa vijnë e rriten", thotë përgjegjësi i zyrës së zhvillimit në Këshillin e Qarkut, Shahin Hereni. 
Drejt shtrirjes më të gjerë të turizmit dimëror 

Zhvillimi i turizmit malor ka bërë hapa të rëndësishme përpara në këtë rajon malor të vendit. Kjo ka çuar në shtimin e numrit të banesave turistike në zonat rurale. Po ashtu edhe ndërtimi i autostradës, i aeroportit të Kukësit kanë krijuar mundësi efikase për zhvillimin cilësor të turizmit malor, për të cilin kërkesat janë gjithnjë në rritje. 

Kjo ka bërë që nga specialistët vendas puna të përqendrohet në përgatitjen e projekteve zhvillimore të shtrirjes së zhvillimit të turizmit në bashkëpunim edhe me komunën e Prizrenit. 

"Në shërbim të zhvillimit të turizmit janë përgatitur 10-12 projekte, ndërsa fondi i akorduar për to arrin në rreth 200 mijë dollarë, fond i qeverisë shqiptare dhe i PNUD-it. Përmes këtij fondi është parashikuar edhe ndërtimi i një tregu në fshatin Shishtavec dhe caktimi i një dite tregu në bashkëpunim me komunën e Dragashit, gjë që do të shënojë tregun e parë të përbashkët mes dy vendeve etj", thotë Hereni.