Lidhja e Shkrimtarëve të Kosovës, sot dhe nesër do të mbajë festivalin ndërkombëtar të poezisë "Drini poetik" në Prishtinë-Prizren-Kukës.
Kryetarët e komunave dhe bashkive shqiptare nga Kosova, Shqipëria, Maqedonia e Veriut, Mali i Zi dhe Lugina e Preshevës janë mbledhur në Prizren për ta shënuar 144-vjetorin e Lidhjes Shqiptare të Prizrenit.
Ata janë pritur i pari i komunës së Prizrenit, Shaqir Totaj, të cilët së bashku ecën nëpër qytetin e Prizrenit për t’u ndalur në oborrin e Lidhjes Shqiptare të Prizrenit ku u mbajt edhe manifestimi qendror.
Në fjalimet e rastit ata vlerësuan se nevojitet krijimi i më shumë urave te bashkëpunimit në mes të vendeve dhe se ky takim duhet të shërbejë për lidhje të reja në mes të shqiptarëve.
Qytetarët e pranishëm ishin tepër entuziastë për këtë organizim. Kryetari i Komunës së Prizrenit, Shaqir Totaj tha se ky takim duhet të shërbejë për intensifikim të marrëdhënieve në mes te komunave shqiptare me qëllim të përmirësimit të mirëqenies se qytetarëve.
Ndërsa Kryetari i Bashkisë së Tiranës, Erion Veliaj, tha se synohet rritja e bashkëpunimit në mes të shqiptarëve dhe mes komunave që përfaqësojnë.
Historianët sollën fakte rreth kësaj ngjarjeje që shënoi edhe kthesën e madhe të shqiptarëve për bashkim.
Ndërsa kryetari i Komunës së Prishtinës, Përparim Rama pati disa kërkesa për Shqipërinë, që të ndihmojë Kosovën në rrugën e saj euroatlantike. Nga ana e tij kryetari i Preshevës, Shqipërim Arifi kërkoi interesim më të madh nga Qeveria e Shqipërisë dhe ajo e Kosovës për shqiptarët e Luginës.
Kancelari gjerman, Olaf Sholz, nis sot vizitën e tij të parë në Ballkanin Perëndimor. Shteti i parë që do të vizitojë është Kosova, ku do të takohet me kryeministrin Albin Kurti. Kancelari pritet të takojë edhe kontingjentin gjerman të trupave të KFOR-it.
Në fokus të vizitës, do të jetë perspektiva e anëtarësimit të Ballkanit Perëndimor në BE, si dhe kontributi i Gjermanisë në përmirësimin e bashkëpunimit rajonal.
Më 4 maj, kryeministri Kurti ishte në Gjermani për një vizitë zyrtare me ftesë të kancelarit gjerman, Olaf Scholz. Në një konferencë të përbashkët pas takimit të zhvilluar me dyer të mbyllura, Scholz theksoi se çështjet e hapura mes Kosovës dhe Serbisë duhet të zgjidhen hap pas hapi, për të mundësuar paqe dhe stabilitet rajonal.
Mes të tjerash, Scholz pati theksuar rëndësinë e bashkëpunimit dhe krijimit të një tregu të përbashkët rajonal brenda Procesit të Berlinit.
Po të premten, kancelari gjerman do të vizitojë edhe Beogradin, ndërsa të shtunën do të ndalojë në Maqedoninë e Veriut dhe Bullgari, në kuadër të turneut të tij në Ballkanin Perëndimor.
Pas Prishtinës, ndalesa e radhës e kancelarit gjerman ishte Beogradi. Olaf Scholz u prit nga presidenti serb, Aleksandër Vuçiç, me të cilin pati një shkëmbim qëndrimesh mjaft të hapur dhe drejtpërdrejtë.
Vuçiç u shpreh i habitur nga deklaratat e Scholz në Prishtinë dhe tha se Bashkimi Europian nuk i ka kërkuar kurrë Serbisë njohje reciproke me Kosovën në procesin e dialogut.
“Askush nuk ka folur ndonjëherë për njohje reciproke, përveç amerikanëve që e miratuan atë doktrinë saktësisht tre vjet më parë”, tha presidenti serb.
Kancelari tha se qëndrimi i Gjermanisë për çështjen e Kosovës është i qartë dhe i njohur prej vitesh, teksa bëri thirrje që në dialog të ketë përparim.
“Hap pas hapi, të dyja palët duhet të kontribuojnë në të dhe janë përgjegjëse për të mos bllokuar asgjë”, u shpreh Scholz në Beograd.
Ai gjithashtu nxiti Serbinë që t’i bashkohet sanksioneve kundër Rusisë për të dënuar luftën e saj në Ukrainë. Përgjigja e Vuçiç ishte e prerë: Serbia ka qëndrim tjetër për sanksionet ndaj Rusisë dhe nuk do të ndryshojë”.
Larvat e mizave, karkalecat, milingonat, krimbat e miellit dhe dy mijë lloje të tjera insektesh, në vend të mishit dhe sojës. Një ekip profesorësh nga Universiteti i Cardiff dhe Uwe i Bristolit po përfundon një studim mbi burimet e mundshme të proteinave, për të plotësuar ose zëvendësuar ato shtazore me bimore, në mensat e shkollave fillore në Mbretërinë e Bashkuar.
Qëllimi i tyre është për një dietë të re që është më shumë e qëndrueshme dhe ekologjike. Ndër propozimet, ushqimet e bazuara në insekte, si krimbat e mëndafshit dhe larvat e skuqura, dhe Vexo, një lloj salce që kombinon insektet dhe proteinat bimore. Këto gatime do të mund të hyjnë në shkollat angleze në një të ardhme jo shumë të largët.
“Ne duam që fëmijët të mendojnë për proteinat alternative si gjëra reale – thotë dr. Christopher Bear i Universitetit të Cardiff-it – insektet e ngrënshme tani janë pjesë e dietës së rreth dy miliardë njerëzve në mbarë botën dhe i përkasin traditave të kuzhinës prej shumë kohësh.”
Në qoftë se ujërat e liqenit pranë shtëpisë tuaj nuk ju duken të volitshme, duhet të njiheni me liqenin më të ndotur në botë, madje ndoshta në përgjithësi me pikën më të ndotur të planetit.
Jemi në Rusinë qendrore, mijëra kilometra larg nga kryeqyteti Moska, po relativisht afër nga Yekaterinburg, një nga qytetet më të rëndësishme dhe të përparuara të Rusisë.
Por pak më në jug se metropoli me gati 1 milion e gjysmë banorë, ndodhet një zonë që deri në vitet 90 ka qenë totalisht e mistershme, dhe ku vetëm pak të autorizuar mund të aksesonin.
Është qyteti i Ozersk, aty ku Moska vendosi në vitet 40 të prodhojë lëndën që i duhej për prodhimin e arsenaleve bërthamore, veçanërisht plutoni që prodhohej pikërisht në centralin bërthamor të Mayak.
Në afërsi të centralit ndodhej një liqen mesatar me emër Karachay, një vend ku punëtorët aty e përdornin për relaksim. Por në 1957, një aksident i tmerrshëm, për disa edhe më i madh se ai i Çernobilit 30 vjet më vonë mbushi liqenin me tonelata pluton dhe mbetje radiokative.
Gjatë viteve, uji radioaktiv u shpërnda në ujërat përreth, ndërkohë qe ndotja dhe thatësira zvogëluan ndjeshëm dimensionet, aq sa sot liqeni praktikisht është zhdukur.
Niveli i radioaktivitetit aty cilësohet si 200 mijë herë më i madh se ai normal, aq sa do të mjaftonte më pak se një orë aty për të gjetur vdekjen.
Banorët që për punë ose pamundësi ekonomike jetojnë ende përreth asaj zone, kanë 21% më shumë të marrin një tumor sesa mesatarja ruse, 25% me shumë mundësi për deformime të të porsalindurit dhe raste të dyfishuara leucemie.
Kosova refuzon ftesën për nismën “Ballkani i Hapur”. “Është Serbia që duhet të hapet ndaj Kosovës”, tha kryeministri Albin Kurti gjatë një eventi në Prishtinë.
Kreu i qeverisë shprehu edhe njëherë qëndrimin kundër, duke zbuluar si e lexoi ai mesazhin e Shteteve të Bashkuara të Amerikës në samitin e Ohrit.
“Shtetet e Bashkuara të Amerikës e kanë thënë shumë qartë se pa qenë gjashtë shtetet aty, nuk ka themelim të ashtuquajturit ‘Ballkan të Hapur’. Ballkani është i hapur ndaj Bashkimit Europian, duhet të jetë plotësisht i hapur edhe ndaj NATO-s, pasi nuk është i hapur ndaj NATO-s për shkak të qëndrimit të fqinjit tonë verior dhe Republikës serbe në Bosnje, të cilët po e mbështesin Kremlinin në agresionin ushtarak ndaj Ukrainës”, tha Kurti.
Nisma e vetme që mbështet Kurti është ajo e Procesit të Berlinit, teksa për ta rigjallëruar atë po angazhohet vetë kancelari gjerman, Olaf Scholz, i cili gjatë të premtes do vizitojë Kosovën.
“Një fillim të ri dhe energjik të Procesit të Berlinit, ku jemi të gjithë të barabartë dhe ku përshpejtohet anëtarësimi i të gjitha vendeve, duke u bazuar në respektimin e sundimit të ligjit, demokratizmit, luftimit të korrupsionit dhe ballafaqimit me të kaluarën”, shtoi kryeministri.
Përgjigje pati edhe për ofertën e presidentit të Serbisë, Aleksandër Vuçiç, për këmbimin e qymyrit me energji elektrike.
“Kjo është një përpjekje e presidentit autoritar të Serbisë që të kalojë nga projekti i dështuar i shkëmbimit të territoreve, në këtë të shkëmbimit të qymyrit. Pra në vend të territorit të Kosovës, po kërkon qymyr nga Kosova, por ai duhet që të njoh pavarësinë e Kosovës, t’i pranojë krimet e kryera gjatë luftës nga regjimi i Millosheviçit në Kosovë dhe duhet të distancohet nga presidenti despotik, Putin, përveçse nga Millosheviçi, ministër i të cilit ka qenë atëherë”, përfundoi kreu i qeverisë së Kosovë.
Kurti adresoi dhe akuzat e opozitës se nuk është veteran i vërtetë lufte, duke saktësuar se ka punuar në zyrën e përfaqësuesit të përgjithshëm të Ushtrisë Çlirimtare të Kosovës, Adem Demaçi.
Kryeministri i Kosovës, Albin Kurti, tha se NATO duhet të qëndrojë në Kosovë, për të ruajtur sigurinë e shtetit, sidomos me klimën e krijuar pas pushtimit të Ukrainës nga Rusia.
“Duke pasur parasysh lidhjet e Serbisë me Rusinë, konsiderojmë që prania e NATO-s në Kosovë është e domosdoshme. Kemi nevojë për NATO-n në Kosovë, deri atëherë kur Kosova të futet në NATO. Nuk mund të krijohet vakum paqeje dhe sigurie”, tha Kurti në një konferencë të përbashkët për mediat me Kancelarin gjerman Olaf Scholz, i cili vizitoi këtë të premte Prishtinën.
Kurti i kërkoi Kancelarit gjerman, që të udhëheqë vendet e Ballkanit Perëndimor në vijimin e Procesit të Berlinit. Kurti, i cili është shprehur disa herë kundër Ballkanit të Hapur, theksoi edhe një herë se qeveria e tij është e përqendruar vetëm Procesi i Berlinit. “Kancelarin e njoftova për rëndësinë që Kosova i kushton Procesit të Berlinit, si mundësia më e mirë e integrimit të rajonit në BE. Nxisim çdo vend që të angazhohet për tregun e përbashkët europian. Kosova u bën thirrje vendeve të Ballkanit Perëndimor që të nënshkruajnë marrëveshjet nga të cilat do të përfitojnë qytetarët. Presim që Procesi i Berlinit të vijojë nën udhëheqjen tuaj. Në këtë kohë të pasigurisë, mbështetja gjermane do të na ndihmonte edhe më shumë në prezantimin e mundësive për investitorët e huaj”, tha Kurti.
Kurti sulmoi edhe një herë Serbinë, duke e akuzuar se po pengon vijimin e dialogut. “Serbia fatkeqësisht po vazhdon të bllokojë zgjidhjet që ne i ofrojmë, edhe në marrëveshjet në kuadër të Procesit të Berlinit”, tha Kurti.
Kancelari gjerman Olaf Scholz ndodhet në Prishtinë për një vizitë zyrtare, etapa e parë e turit të tij në Ballkanin Perëndimor.
Kancelari evidentoi temat e nxehta mbi të cilat ka diskutuar me homologun e tij kosovar, Albin Kurtin, ku spikasin perspektiva e aderimit të Prishtinës në Bashkimin Europian, çështja e liberalizimit të vizave, por edhe qasja e Kosovës ndaj agresionit rus në Ukrainë, ku Scholtz nënvizoi se Prishtina rreshtohet krahas aleatëve perëndimorë.
Një çështje e diskutuar është ajo e procesit të Berlinit, ku kancelari gjerman deklaroi se ai ka në mendje ta rijetësojë shumë shpejt. “Këtë vit, gjatë vjeshtës po mendoj për një konferencë në Berlin”, ishin fjalët e tij.
Kancelari gjerman, Olaf Scholz, tha se Gjermania i jep prioritet tregut të përbashkët rajonal, një nismë e cila bën bashkë vendet e Ballkanit Perëndimor në kuadër të Procesit të Berlinit.
I pyetur nëse Gjermania mbështet Ballkanin e Hapur, nismë ku Kosova refuzon të të marrë pjesë, Scholz tha: “Dua ta them të qartë që për ne prioritet të madh i japim tregut të përbashkët rajonal, i cili mendoj se duhet të përparojë. Çështjet që janë pjesë e tij duhet të çohen përpara. Të gjithë duan të shkojnë në BE, edhe atje ekzistojnë dhe janë në fuqi rregullat e lëvizjes së lirë”.
Dialogu mes Prishtinës dhe Beogradit duhet të shkojë përpara, edhe në optikën e një periudhe të vështirë nga ana gjeopolitike.
“Marrëveshja duhet të jetë përfshirëse dhe e qëndrueshme, përmes dialogut politik. Dialogu i hap Prishtinës rrugën europiane, është një kusht i rëndësishëm, si zgjidhja edhe e njohjes së Kosovës, është e paimagjinueshme që dy vende që nuk njohin njëra tjetrën të jenë pjesë e BE-së”.
Ish-presidenti Donald Trump orkestroi trazirat e viti të kaluar në Kapitol, në një përpjekje për grusht shteti. Kështu u tha në seancën e parë publike të komisionit që po heton sulmin ndaj Kongresit Amerikan nga ana e mbështetësve të Donald Trump, pas pretendimeve të ish-presidentit për manipulim të zgjedhjeve.
Liz Cheney, zëvendëskryetare e komisionit tha se Trump kishte qenë nxitës i trazirave. Komisioni zbuloi detaje rrëqethëse, që sugjeronin se atëherë kreu i Shtëpisë së Bardhë, ishte pajtuar me thirrjet se zëvendësi i tij, Mike Pence duhej të varej.
“Presidenti besonte se mbështetësit e tij në Kapitol, po bënin atë që duhej të bënin. Kështu i tha stafit që i lutej të qetësonte turmën dhe ta udhëzonte të largohej. Presidenti tha “ndoshta mbështësit tanë kanë të drejtë. Mike Pence e meriton këtë”, tha Liz Cheney
“6 janari i vitit 2021 ishte kulmimi i një grushti të dështuar shteti, një përpjekje e pacipë për të përmbysur qeverinë. Dhuna nuk ishte aksident. Ajo përfaqësoi mundësinë e fundit të dëshpëruar të Trump për të penguar transferimin e pushtetit”, deklaroi Bennie Thompson.
Pas një viti hetime, komisioni i drejtuar nga demokratët e dhomës së përfaqësuesve, nisi seancën në mbrëmjen e së enjtes, duke shfaqur klipe të intervistave që kishte kryer me pjestarë të rrethit të ngushtë të Trump.
Ish-prokurori i përgjithshëm, Bill Barr, dëshmoi se vazhdimisht i kishte thënë ish-presidentit se pretendimet për vjedhje të votave ishin të gabuara.
“Ia bëra të qartë se nuk jam dakord me idenë se zgjedhjet janë vjedhur dhe se këto pretendime ishin thjesht të pavërteta”, tha Barr.
Seanca përfshiu gjithashtu një intervistë të Ivanka Trump, vajza e manjatit të pasurive të patundshme, e cila tha se e kishte pranuar refuzimin e Barr lidhur me teorinë konspirative të të atit. “Unë e respektoj prokurorin e përgjithshëm, kështu e pranova atë që ai tha”.
Para nisjes së seancës publike, e para nga 6 të tilla që pritet këtë muaj, Trump e sulmoi atë duke e quajtur mashtrim politik.
Ish-presidenti ka sugjeruar në daljet publike se po mendon të rikandidojë për Shtëpinë e Bardhë në zgjedhjet e 2024-s.
Rusia reagoi me kritika ndaj mesazheve të kancelarit gjerman, Olaf Scholz, në vizitën e tij në Prishtinë.
“Beogradi nuk i ka borxh asgjë Brukselit”, u shpreh zëdhënësja e ministrisë së Jashtme ruse, Maria Zakharova, duke komentuar deklaratën e Scholz për nevojën që Serbia të njohë pavarësinë e Kosovës, në mënyrë që të anëtarësohet në Bashkimin Europian.
“A janë këta ‘miq’ të Serbisë?”, pyet Zakharova duke shtuar se perëndimi është borxhli ndaj serbëve. “Popullit serb tashmë po i thuhet vazhdimisht se çfarë dhe si të bëjë. Çfarë do të ndodhë më pas?”, shkruan në telegram zyrtarja e Ministrisë së Jashtme ruse. Duke raportuar këtë reagim, mediat në Moskë risjellin në vëmendje thirrjen e ministrit të Brendshëm serb, Aleksandër Vulin, që vendi i tij të rishikojë planet për integrim në BE.
Gjithashtu, edhe deklaratën e vetë presidentit serb, Aleksandër Vuçiç, se Unioni Europian është një faktor i rëndësishëm në botë, por rëndësia e tij po bie bashkë me fuqinë e tij ekonomike.
NASA i është bashkuar kërkimit dhe studimit të të ashtuquajturave fenomene ajrore të paidentifikuara, ato që dikur quheshin UFO. Agjencia Amerikane e Hapësirës ka njoftuar se në vjeshtë do të nisë një hetim 9-mujor të financuar me 100 mijë dollarë. Konkluzionet do të përfundojnë në një raport publik. Vendimi u mor për t’i dhënë një qasje shkencore ekzaminimit të fenomenit, për të cilin u shfaq interes edhe nga inteligjenca dhe parlamenti amerikan.
Hetimi do të kryhet nga ekspertë të autorizuar shkencorë dhe ekspertë të aeronautikës.
“Një nga rezultatet e këtij studimi, do të jetë që të gjithë të kuptojnë se procesi shkencor është i vlefshëm për trajtimin e të gjitha problemeve, përfshirë këto”, shpjegoi në një konferencë shtypi Thomas Zurbuchen, administrator i asociuar i NASA-s dhe autor i vendimit. Objektivat janë të mblidhen sa më shumë të dhëna (nga qeveritë, kompanitë private, shoqatat, individët), të përcaktohen ato që mungojnë dhe të vendoset se me cilat mjete do të kryhet analiza në të ardhmen.
Në qershor 2021, inteligjenca amerikane arriti në një raport se nuk kishte prova për ekzistencën e formave të jetës jashtëtokësore, por pranoi se dhjetëra fenomene të zbuluara nga pilotët ushtarakë, nuk mund të kishin një shpjegim. Sipas Pentagonit, një numër në rritje i objekteve të paidentifikuara, janë raportuar në qiell gjatë 20 viteve të fundit.
Covid-19 nuk doli nga laboratori. Është ky qëndrimi zyrtar që mbështetet nga 22 ekspertë të rëndësishëm të botës për koronavirusët dhe virusët gjenetikë. Ata paraqitën prova në një raport të publikuar online.
Konkluzioni I shkenctarëve është që janë thuajse të sigurtë që Covid-19 doli nga një kafshë. Dilemat e mëdha për origjinën janë të shumta, saqë kanë mbërritur dhe në Shtëpinë e Bardhë Amerikane.
Shkenctarët thonë se është një rastësi që Covid-19 nisi në qytetin kinez me laborator virologjie.
Gjithashtu shtojnë se Wuhani u shndërrua në epiqendër pasi ka disa tregje për kafshët dhe është një vend tranziti për udhëtarët.
Ndërkohë, pista që koronavirusi I ri të ketë dalë nga laboratori është rrëzuar edhe nga ekspertët e Organizatës Botërore të Shëndetësisë, të cilët disa javë më parë publikuan rezultatet e një hetimi në Wuhan.
Një grup ekspertësh i krijuar nga Organizata Botërore e Shëndetësisë (OBSH), për të ndihmuar në hetimin e origjinës së pandemisë së koronavirusit, tha se nevojiten kërkime të mëtejshme për të përcaktuar se si filloi COVID-19, duke përfshirë një analizë më të detajuar të mundësisë së një aksidenti laboratorik.Ky qëndrim shënon një përmbysje të mprehtë të vlerësimit fillestar të Agjencisë së Shëndetit të OKB-së për origjinën e pandemisë. OBSH-ja, vitin e kaluar, arriti në përfundimin se ishte “jashtëzakonisht pak e mundshme” që COVID-19 është përhapur te njerëzit nga laboratori.
Shumë shkencëtarë dyshojnë se koronavirusi është transmetuar te njerëzit nga lakuriqët e natës, përmes kafshëve të tjera. Në raportin e publikuar të enjten, grupi i ekspertëve të OBSH-së tha se ende mungojnë “të dhënat kryesore” , të cilat do ta sqaronin se si filloi pandemia .
Shkencëtarët thanë se grupi “do të mbetet i hapur për të gjitha provat shkencore që do të jenë të qasshme në të ardhmen, në mënyrë që të mundësojë testimin gjithëpërfshirës të të gjitha hipotezave të arsyeshme”.dentifikimi i burimit të sëmundjes tek kafshët zakonisht zgjatë me vite. U deshën rreth 15 vjet që shkencëtarët të gjenin llojet e lakuriqëve të natës që ishin rezervuar natyror për SARS-in, kushëri i COVID-19.
Grupi i ekspertëve të OBSH-së gjithashtu vuri në dukje se, duke qenë se aksidentet laboratorike kanë shkaktuar disa epidemi në të kaluarën, kjo teori, shumë e politizuar, nuk mund të hidhet poshtë.
Ish-presidenti i SHBA-së, Donald Trump, ka spekuluar disa herë – pa prova – se COVID-19 u nis në një laborator kinez. Ai akuzoi gjithashtu OBSH-në për “bashkëpunim të fshehtë” me Kinën për të mbuluar epideminë fillestare, duke iu referuar faktit se OBSH-ja në vazhdimësi e ka lavdëruar publikisht këtë vend.
Grupi i ekspertëve të OBSH-së tha se drejtori i përgjithshëm i agjencisë së shëndetit të OKB-së, Tedros Adhanom Gebrejesus u dërgoi, në muajin shkurt, dy letra zyrtarëve të lartë të qeverisë kineze, duke kërkuar informacione, përfshirë detajet për rastet më të hershme njerëzore të COVID-19 në qytetin e Vuhan. Është e paqartë nëse kinezët u përgjigjën.
Ekspertët thanë se OBSH-së nuk i është dorëzuar asnjë studim, i cili do të vlerësonte mundësinë e përhapjes së COVID-19, si rezultat i një rrjedhjeje nga laboratori.Ata thanë se të kuptuarit e tyre, lidhur me atë se si u shfaq koronavirusi, ishte i kufizuar në disa faktorë, duke përfshirë faktin se jo të gjitha kërkimet e paraqitura nga shkencëtarët kinezë ishin publikuar.
Jamie Metzl, i cili është anëtar i grupit të pavarur këshillues të OBSH-së, sugjeroi që Grupi i shtatë kombeve të industrializuara të vendosë hetimin e vet për origjinën e COVID-19, duke thënë se OBSH-së i mungonte autoriteti politik, ekspertiza shkencore dhe pavarësia për të kryer një vlerësim të tillë kritik.Metzl përshëndeti thirrjen e OBSH-së për hetime të mëtejshme mbi mundësinë e një rrjedhjeje nga laboratori, por tha se kjo nuk ishte e mjaftueshme.
“Tragjikisht, qeveria kineze vazhdon të refuzojë të ndajë të dhënat bazë të papërpunuara dhe nuk do të lejojë auditimin e nevojshëm dhe të plotë të laboratorit në Vuhan”, theksoi ai dhe shtoi:“Marrja e qasjes në këtë informacion është thelbësore për të kuptuar se si filloi kjo pandemi dhe për të parandaluar pandemitë e ardhshme”.
Ekspertët shkencorë të OBSH-së thanë se nevojiten një sërë rrugësh kërkimore, duke përfshirë studime që vlerësojnë rolin e kafshëve të egra, të cilat konsiderohen se janë rezervuari natyror i COVID-19, si dhe studime mjedisore në vendet ku virusi mund të jetë përhapur për herë të parë, siç është tregu i ushqimeve të detit në Huanan, në Vuhan.
Në mars të vitit 2021, OBSH-ja publikoi një raport mbi origjinën e COVID-19, pas një vizite shumë formale të shkencëtarëve ndërkombëtarë në Kinë. Raporti arriti në përfundimin se sëmundja ka shumë të ngjarë të jetë përhapur te njerëzit nga lakuriqët e natës dhe se nuk kishte prova që të tregonin një lidhje me laboratorin.
Megjithatë, pas kritikave të rëndësishme, përfshirë nga disa shkencëtarë nga ekipi i OBSH-së, kreu i OBSH-së, Tedros Gebrejesus, pranoi se ishte “e parakohshme” të përjashtohej rrjedhja nga laboratori dhe tha se i është lutur Kinës që të ishte më transparente në shkëmbimin e informacioneve.Në raportin e saj të ri, OBSH-ja tha se ekspertët kanë fituar qasje në të dhënat që përfshijnë mostra të papublikuara gjaku nga më shumë se 40,000 njerëz në Vuhan, në vitin 2019. Mostrat u testuan për antitrupa ndaj COVID-19. Asnjë nuk u gjet, duke sugjeruar se virusi nuk u përhap përpara se të identifikohej për herë të parë në fund të dhjetorit të atij viti.
Ekspertët e OBSH-së kanë bërë thirrje për një numër studimesh, duke përfshirë testimin e kafshëve të egra, për të zbuluar se cilat specie mund të jenë nikoqire të COVID-19.
Për të hulumtuar nëse pandemia COVID-19 mund të ketë qenë rezultat i një aksidenti laboratorik, ekspertët e OBSH-së thanë se kërkimi duhet të kryhet “me stafin laboratorik të ngarkuar për menaxhimin dhe zbatimin e sigurisë biologjike”, duke thënë se kjo do të sigurojë më shumë informacione për atë se si janë menaxhuar viruset e ndërlidhura me COVID-19.
Më herët, Kina e vlerësoi si “të pabazuar” sugjerimin se COVID-19 e kishte origjinën në laborator dhe deklaroi se virusi mund të kishte origjinën në objektet amerikane, për të cilat dihej gjithashtu se po hetojnë koronavirusët te kafshët.
Qeveria kineze tha se e mbështet kërkimin për origjinën e pandemisë, por se vendet e tjera duhet të jenë në fokus.
Shkencëtarët e lidhur me OBSH-në paralajmëruan në gusht të vitit 2021 se kërkimi për origjinën e pandemisë kishte ngecur dhe se dritarja e mundësive po “mbyllet shpejt”. Ata paralajmëruan se mbledhja e të dhënave, të cilat tani janë të vjetra të paktën dy vjet, është gjithnjë e më e vështirë.
Web faqja “Zemra shqiptare.net” është një blog antishqiptar që editohet nga njëfarë ekstremisti dhe terroristi antishqiptar nga Shkodra, m...
