Intervistë ekskluzive me Roland Bartezko: Qe pse e nisa peticionin

FOTOT: Leart KelmendiGAZETAEXPRESSE shtune, 20 Shkurt 2016 18:10

Gjermani Roland Bartezko, apo siç njihet në kohën e luftës si Shabani, ka folur ekskluzivisht për Gazetën Express. Ka thënë se peticionin kundër Ambasadorit Amerikan, Greg Delawie e ka bërë pasi konsideron se ai dëmtoi raportet me liderët e disa partive kur tha se ishte i irrituar nga veprimet e tyre. Shabani ka thënë se gjysma e kosovarëve janë të hidhëruar nga deklarata jodiplomatike e Delawie. Prandaj, ai thotë se zyrtari amerikan duhet të ndërrohet me një diplomat tjetër. Mirëpo, ka thënë se kërkesa përmes peticionit për largimin e Delawies nuk është kundër Amerikës. Ka thënë se nuk është terrorist. Ka sqaruar edhe pse mbajti 14 vite e gjysmë burgim.

 Express: Po e sqarojmë prej të parës. Pse iniciuat peticionin kundër Ambasadorit Amerikan, Greg Delawie? Roland Bartezko: Pikë së pari, unë jetoj në Kosovë. Nuk jam me asnjë parti politike. Edhe pse është gati e pamundshme pa pasur ndonjë lidhje me partitë politike. Veç, çka ka bërë Delawie ndikon drejtpërdrejtë në jetën time. Se ne kemi një gjendje të rëndë ekonomike, edhe si pasojë e mosmarrëveshjeve mes partive politike. Në rast se një Ambasador do me përfshi në këtë proces, atëherë, le të bëjnë një zgjidhje të mirë. Me të thanë të drejtën, unë jam shtetas gjerman, i lindur e rritur atje. Kam kryer shkollën në Gjermani. Mirëpo, në Gjermani një njeri të tillë si Delawie nuk e kish duru asnjë njeri.

Express: Por, Kosova nuk është Gjermani? Roland Bartezko: Pse Gjermania është dicka tjetër. As Gjermania s’ka naftë e as resurse natyrore. Nuk kemi naftë. Nuk kemi diamante. Gjermania është ku është për shkak të njerëzve çfarë qasje kanë.

Express: Shqiptarët e Kosovës ia atribuojnë meritat më të mëdha Amerikës për çlirimin e Kosovës? 
Roland Bartezko: Absolutisht. Edhe mos e keqkuptoni atë Peticion si diçka kundër Amerikës. Peticioni është adresuare Ministrisë së Punëve të Jashtme dhe Jon Kerryt. Është një lutje për të zëvendësuar z. Delawie me një njeri tjetër që ndoshta ka tjetër qasje në punë. Nuk është kundër Amerikës.

Express: Megjithëkëtë, Ambasadori përfaqëson vijën zyrtare të Amerikës dhe flet në emër të SHBA’së? Roland Bartezko: Jam dakord. Mirëpo, Amerika në botë ka në mbi 200 vende ambasada. Është në pyetje sa merret Amerika me Kosovën?

Express: Para disa kohësh në Kosovë ishte Jon Kerry? 
Roland Bartezko: Ishte në Shqipëri.

Express: Ishte edhe në Kosovë...Roland Bartezko: Normal, që kur ke përfaqësi në 200 shteti, cfarë probleme ka Amerika në Siri e Kore, ne duhet me heq prej mendje kosovarët se nuk është tema numër një Kosova. Se Amerikanët nuk kanë tjetër punë përveç Kosovës.

Express: A e keni pasur parasysh kur e keni nisur peticionin se mund t’i lëndoni raportet e Kosovës me SHBA? Roland Bartezko: Jo, absolutisht. Se nuk ka lidhje me Amerikën. Peticioni ka lidhje me një person. Këtë peticion e kanë nënshkruar, deri më tash, 1 mijë veta. Amerika ka një pozitë shumë të rëndësishme. Unë kam qenë ushtar i UÇK’së. I kam përjetuar bombardimet e NATO’s. Ndoshta, pa bombardimet e NATO’s s’kisha qenë gjallë. Edhe unë jam mirënjohës ndaj Amerikës. I njoh amerikanët. Kam shokë amerikanë. Ai Ambasador e ka një pozitë kaq të rëndësishme në Kosovë se praktikisht të gjitha punët politike kryhen përmes ambasadës amerikane. Tash, duhet me pas një njeri që duhet ta thotë troç të vërtetën e jo vetëm të lëshojë deklarata.

Express: Ai po e dënon dhunën në Kuvendin e Kosovës? Roland Bartezko: Edhe unë e dënoj dhunën.

Express: E pse me u largu Ambasadori Delawie nga Kosova? 
Roland Bartezko: Për atë deklaratën që ka thënë se politikanët e opozitës janë të neveritshëm. Kjo nuk është gjuhë diplomatike, pikë së pari. Situatën vetëm sa e ka acaruar. Ti mundesh me thanë se ‘ai është i neveritshëm”. Edhe unë mund të them  se ‘ai është i neveritshëm’. Por, s’ka ndonjë problem për mua e për ty. Problemi është te Ambasadori e ka thënë një fjalë të tillë. Tash, Ambasadori ka me punu me politikanët e neveritshëm. Fajet për gjendjen në Kosovë i kanë të dyja palët. Faji nuk është vetëm i Opozitës. Është edhe faji i Qeverisë. Tash, pse me acaru situatën me një deklaratë të tillë. Situata është më e keqe se ka qenë para një muaji. Ambasadori është diplomat. Në diplomaci nuk është diplomatike me dhanë vlerësime të tilla. Mundet të mendojë ashtu, por, ai i ka hidhëruar  gjysmën e kosovarëve me atë deklaratë.

Kërkoj ndërrimin e Delawies për atë deklaratën që ka thënë se politikanët e opozitës janë të neveritshëm. Kjo nuk është gjuhë diplomatike, pikë së pari.

Express: Ramush Haradinaj, posa, reagoi. Tha se peticioni juaj është krejtësisht i pavlerë dhe i drejtuar kundër Kosovës? Roland Bartezko: Nuk është i drejtuar kundër Kosovës. Nuk e di a e ka lexu Haradinaj Peticionin tim. Ky Peticion ka një vlerë. Mbajeni mend, me këtë peticion, SHBA nuk do ta zëvendësojë Delawien. Kjo është e qartë. Është budallaki me besu se me një peticion SHBA do të zëvendësojë një Ambasador. Veç, ky është një shprehje pakënaqësisë. Jam i sigurt se Delawie do ta kryej mandatin pavarësisht peticionit tim. Pas tij do të vjen dikush tjetër. Pastaj, është interesant se kush tjetër do të vijë në Kosovë.  Amerika ka ambasadorë në 200 shtete.... Amerika njeriun më të mirë e dërgon në Londër, pastaj në Moskë, të tretin më të mirë në Tel Aviv deri në vendin e 200’të. I pari më i mirë shkon në Angli e i fundit shkon në Kosovë. Ne jemi të fundit. Ne jemi 1.7 milionë banorë. Nuk mund të pritsh se diplomati më i mirë amerikan do të vijë në Kosovë.

Express: Megjithëkëtë, shqiptarët e Kosovës janë falënderuar SHBA’së dhe përfaqësuesve të tyre në Kosovë, duke filluar prej Goldbergut, Kaidanow’it, Dellit, Jacobsonit e edhe Delawies. Në fakt, veprimet e juaja janë vlerësuar se janë të një vije me Vetëvendosjen? Roland Bartezko: Nuk kam asnjë lidhje me Vetëvendosjen. Unë jam me CDU’në e Angela Merkelit. Jam gjerman. Vetëm jetoj këtu. Peticioni është vetëm një reagim i një shprehje të mllefit se vërtetë gjërat s’po ecin përpara. Për mua z. Delawie është një faktor. Desha të them edhe dicka për peticionin. Peticioni e ka një përmbajtje. Kushdo që e nënshkruan peticionin e lexon dhe nëse je dakord e nënshkruan a jo. Ky peticion s’ka lidhje me parti. S’ka kurrfarë lidhje me parti.

Express: Një pjesë e nënshkruesve të peticionit kundër Ambasadorit Delawie janë aktivistë të Vetëvendosjes... Roland Bartezko: Nuk e di. Nuk kam komunikuar me asnjë prej tyre. Mirëpo, në uebfaqen change.org ka qindra peticione për Kosovën. Asnjë peticion tjetër për Kosovën s’ka pasur kaq bujë të madhe. Në fakt, është bërë e madhe edhe peticioni për UNESCO’n. Unë e kam nënshkruar atë peticion për me hy Kosova në UNESCO. Që fatkeqësisht nuk pati sukses.

 Për Serbinë janë terrorist sepse kam luftuar në Kosovë.

Roland Bartezko: Për Serbinë janë terrorist sepse kam luftuar në Kosovë. Jam invalid i luftës. Për Serbinë jam terrorist. Për Dacicin jam terrorist. Për Shqiptarët nuk besoj.

Express: Ju jeni dënuar me 23 vite burgim për atë eksplodim që kishte ndodhur pas luftës?  Roland Bartezko: Pyeteni Berat Buzhalën. Ai ka qenë gjithë kohën në gjykim. Ai e di shumë mirë cila është e vërteta dhe çka është e montuar.

Jam dënuar me 20 vjet burgim për vrasjen e një koloneli të MUP’it serb.

Express: Cili ishte vendimi përfundimtar i Gjykatës? Roland Bartezko: 20 vjet burgim për vrasjen e një koloneli të MUP’it serb. Për Shefin e Zyrës Jugosllave në Prishtinë. Ai që ka vdekur ka qenë Shef i MUP’it serb.

Express: Sa vite keni mbajtur burg? Roland Bartezko: 14 vite e gjysmë. E kam kryer. Jam i çuditur me cilësimet që i kanë bërë ndaj meje. Unë kam të gjitha të drejtat. Jam qytetar i lirë. Kam të drejtë të bëj një peticion pavarësisht se a është i dënuar me të drejtë apo pa të drejtë. Ky mendim duhet të ndryshojë në Kosovë. Keni ish-terroristët deputet në Parlamentin e Gjermanisë. Jeta po ecë. Nuk është më viti 1999. Në vitin 1999 e kisha kuptu atë emërim. Tash jemi në vitin 2016.

Express: Gazetari Enver Robelli ju quajti terrorist?Roland Bartezko: Kam marrë disa artikuj prej vitit 2001. Mirëpo, sigurt për Qeverinë e Serbisë jam terrorist.

Express: Cila është e vërteta, tash, pasi keni kryer dënimin për eksplodimin e pasluftës? Roland Bartezko: Ka qenë montim. S’ka pas asgjë të vërtetë.

Express: Ju s’e keni kryer atë sulm pavarësisht se Gjykata ka vendosur ndryshe?Roland Bartezko: Absolutisht, jo. Me kanë terrorist s’e kisha bërë një peticion kundër Delawies. Peticioni nuk është veprim i një terroristi përmes interneti. Kështu nuk vepron terroristi.

Express: E keni ditur se do të zgjoni reagime pas këtij peticioni apo e keni ditur dhe keni pasur dëshirë të bëheni i famshëm? Roland Bartezko: Jo, pse i famshëm. Nuk e kam pritur një reagim të tillë. Mirëpo, askush s’merret me përmbajtjen e peticionit. Krejt ata që thonë se peticioni është kundër Amerikës s’e kanë lexuar peticionin. Se nuk është kundër Amerikës.

Express: Por, është kundër përfaqësuesit të Amerikës në Kosovë?Roland Bartezko: Është kundër një personi, që momentalisht, është përfaqësues në Kosovë që unë i kisha lutur me zëvendësu me një përfaqësues tjetër, se ndoshta, është më mirë. Edhe duhet diçka të bëhet për të hequr ngërçin këtu. Ky është peticioni im. Lexojeni peticionin. Njerëzit që vërtetë e kanë lexuar e kanë e dinë se nuk është kundër Amerikës. Në botë ka qindra mijëra peticione. Askush s’merret kush e ka inicu këtë peticionin sepse s’ka rendësi. Rëndësi ka përmbajtja e peticionit. Në rast se e lexon peticionin, nuk je dakord, nuk e nënshkruan. Në rast se je dakord e nënshkruan.  Nëse je plotësisht kundër atëherë e bën një kundër peticion. Ky është mjet demokratik. Ne kemi luftuar për liri, për juve, me shkru artikull. S’jam hiq i mllefosur që keni shkruar. Pak i befasuar po. Por, është e drejta ime për të bërë peticione sepse besoj se mund të ndryshojë diçka. Peticioni nuk është i dëmshëm për Kosovën. Është peticion i një shtetasi gjerman që ka dëshirë të zëvendësohen një politikan. Delawie vet e ka futur vetën në këtë situatë.

 Është peticion i një shtetasi gjerman që ka dëshirë të zëvendësohen një politikan. Delawie vet e ka futur vetën në këtë situatë

Express: Qysh po e sheh zgjidhjen përveç largimit të Ambasadorit?Roland Bartezko: Me zëvendësu me një tjetër. E kësmet ai tjetër e ka një tjetër qasje në punë. Shikojeni atë ambasadorin e Anglisë. Ai është njeri i mrekullueshëm.

Express: Mirëpo, Ambasadorët e Amerikës kanë, pothuajse, të njëjtën qasje që e ka edhe z. Delawie?Roland Bartezko: I vetmi profesion në botë, përvec aktrimit, ku nuk ka rëndësi veç përmbajtja, por edhe forma është diplomacia. Është diçka tjetër një deklaratë e një personi jodiplomatik me një deklaratë të një diplomati. Kjo është forma. Unë nuk merrem me shumë me Greg Delawie. Ky është një peticion. Nuk do ta ketë efektin e dëshiruar. Unë jam një qytetar prej 1.7 milionë banorëve. Nuk kam më i madhi. Jam shtetas gjerman. Zgjedhje s’ka momentalisht. Unë jam për një Kosovë të zhvilluar, për një ambient të pastër etj. Kam kërkesa të thjeshta. Unë kam mjete vetëm për të bërë një peticion në internet. S’kam diçka tjetër.  

Express: Praktika tregon se në Kosovë, Ambasadorët e Amerikës ndërhyjnë pothuajse në çdo situatë krize?Roland Bartezko: Edhe sa doni me vazhdu ju kosovarët me këtë praktikë. Ju doni me hy në BE. Ne duhet të nisemi prej vetës.

Express: S’duhet ta dëgjojmë Amerikën?Roland Bartezko: Po, po duhet ta dëgjoni si këshillë, absolutisht. Si këshillë. Mirëpo, kjo është Kosova dhe vend i kosovarëve. Nuk është Amerikë. Ky nuk është Shteti i 52 i Amerikës. Ne jemi shtet i pavarur.

Express: Mirëpo, Kosova nuk do të çlirohej pa Amerikën?Roland Bartezko: Kosova, pikë së pari, nuk do të çlirohej pa 2500 dëshmorët e UÇK’së.

Express: Dhe ndihmën e Amerikës, Gjermanisë, Italisë, Britanisë, Francës...?Roland Bartezko: Po.  Shumë shtete.

Express: Por, shqiptarët meritën më të madhe ia atribuojnë Amerikës?Roland Bartezko: Amerikës bashkë me Anglinë, Gjermaninë. Normal, prej 1200 fluturimeve, 1000 kanë qenë amerikanë. Mirëpo, ju duhet të vendosni mendoni për veti. Unë kisha pas dëshirë që politikanët e Kosovës t’i zgjidhnin problemet vetë. S’janë në gjendje. As në Kosovë. As në Shqipëri. Për këtë arsye na duhet një Ambasador më i mirë që na ndihmon me rregullu këtë punë. Qe sa kemi problemin e gazit, kemi pasur problemin e ngërcit para gazit...

Express: Si zgjidhet ky problem tash?Roland Bartezko: Duhet të pajtohen opozita me Qeverinë.

Express: Qysh pajtohen?Roland Bartezko: Me pas një njeri ndërmjetëses me u ulë në një tavolinë dhe me fol. Çdo parti ka njerëz kryefortë dhe pak më të butë. Duhet të merren një apo dy njerëz më të butë të partive si për shembull Ilir Deda që është shumë më liberal.

Express: Mirëpo, Ilir Deda është i vetmuar? Roland Bartezko: Po, fatkeqësisht. Unë jam kundër gazit lotsjellës. Është vepër penale përdorimi i gazit lotsjellës. Unë jam jurist dhe e di këtë gjë. Por, të kthehemi te zgjidhja. Secili prej udhëheqësve duhet të lëvizë pak prej pozitës së vet. Prej secilës parti duhet të merren nga dy tre njerëz dhe duhet të shkojnë në Rugovë apo Brezovicë për një javë. Ju thuaj pa arrit marrëveshje s’ka me dalë. Kjo është vetëm një ide e imja.

Express: Çka bëni ju aktualisht në Kosovë? 
Roland Bartezko: Jam i papunë. Jam duke kryer masterin në Fakultetin Juridik në UP në drejtimin “Juridik civil”. Pastaj planifikoj të punoj si jurist në Kosovë.

Express: Me çfarë të ardhurash jetoni në Kosovë? Roland Bartezko: Jam invalid i luftës. Kam një pension të vogël për shkak se jam kanë i plagosur dy herë gjatë luftës. Me ato para mbijetoj e jo jetoj.

Express: A të ndihmojnë kolegët e luftës? 
Roland Bartezko: Po, shokët e luftës, po. Krejt kemi mendu se 17 pas luftës do të ishte një Kosovë me e zhvilluar. Duhet ta themi të vërtetën se Kosova ka ngecur. Në vitin 1999 kemi mendu më ndryshe se Kosova do të jetë më e zhvilluar.

Express: Faleminderit që fole për Express.Roland Bartezko: Faleminderit. Besoj se i kam qartësuar disa gjëra.

Zëvendësministri i Administrimit të Pushtetit Lokal, Bajram Gecaj :Ilir Deda po tenton të imitoj rolin e presidentit të Kosovës

Zëvendësministri i Administrimit të Pushtetit Lokal, Bajram Gecaj ka reaguar ndaj deputetit të Lëvizjes Vetëvendosje, Ilir Deda, për të cilin ka thënë se po tentoj të imitoj rolin e presidentit të Kosovës.

Gecaj në një postim në Facebook ka shkruar se Deda do të ishte mirë që të punonte më shumë në “shtëpinë e tij” të tanishme dhe se Lëvizja Anarkiste e Vetëvendosjes t’i kthehet metodave demokratike e civilizuese.

Lexoni postimin e plotë të Gecajt në Facebook:
Ilir Deda ta civilizoj e demokratizoj LAV
Ilir Deda kohët e fundit po tenton të imitoje rolin e Presidentit të Republikës së Kosovës, e kjo ndoshta vjen për shkak të faktit se njëri nga funksionet e tij të shumta të deritanishme ishte edhe ai i këshilltarit të Presidentes Jahjaga. Deda mundohet të na predikoj dhe të na udhëzoj çka është e çka nuk është mirë për Lidhjen Demokratike të Kosovës.
Me gjithë respektin që kam për pozicionimet e tij parimore ndaj veprimeve të dhunshme dhe krejtësisht joracionale e joligjore të subjektit të cilit i takon, Deda do të bënte mirë sikur të punonte më shumë në “shtëpinë e tij” të tanishme, e që Lëvizja Anarkiste e Vetëvendosjes (LAV) t’i kthehet metodave civilizuese e demokratike dhe të hekë dorë nga veprimet përmes metodave të Brigadave të Kuqe; veprime këto të cilat vetëm po ja nxjerrin faqen e zezë vendit tonë, por të cilat nuk po prodhojnë dhe nuk do të prodhojnë asnjë efekt pozitive për LAV-in vetë.

Deputeti i Lidhjes Demokratike të Kosovës, Bardhyl Meta : Opozita inicioi peticion kundër ambasadorit Delawie përmes aktivistit special

Deputeti i Lidhjes Demokratike të Kosovës, Bardhyl Meta ka reaguar ndaj peticionit të nisur kundër ambasadorit amerikan në Kosovë, Craig Delawi, pas deklaratës së tij të djeshme për liderët e opozitës.

Meta në një postim në Facebook ka shkruar se opozita e bashkuar, indirekt përmes një aktivisti special e ka iniciuar këtë peticion.

Lexoni postimin e plotë të Metës në Facebook:

VV - AAK - Nisma, respektivisht "opozita e bashkuar":

Indirekt, përmes një "aktivisti special", inicojnë Peticion kundër Ambasadorit amerikan Craig Delaëie...!?
S'po e kuptojë, pse s'po e bëjnë këtë ndërmarrje edhe më efikase?!

Ta zamë, meqë i kanë hy kësaj pune: atëherë, me të njëjtën procedurë e me të njejtin nënshkrim (interneti), nënshkruesit e peticionit të kërkojnë njëkohësisht shkarkimin e Ambasadorit Craig Delaëie, të Sekretarit Amerikan të Shtetit, John Kerry, e besa edhe të Presidentit, Barack Obama!

- Ngase kjo është, ajo vija e hierarkisë "urdhërdhënëse", që ka bërë ato "gabimet dhe mëkatet e SHBA-ve karshi vendit tonë" - dhe është ajo vija e hierarkisë, që "s'po i len Kosovarët me vetëvendos, dhe po ia cenon Sovranitetin vendit", natyrisht, gjithherë sipas VV, respektivisht, opozitës së bashkuar, VV - AAK - Nisma!

Do të ishte me siguri, Top lajm, edhe për agjencinë ruse, “Russia Today”, e cila tashmë po raporton me xhirime Live – drejtpërsëdrejti - të gjitha protestat dhe aksionet e “Opozitës së Bashkuar”, në Parlament, sikur edhe në sheshe...

Këshilltari i Hashim Thaçit ,z.Abelard Tahiri ,sulmon ashpër Albin Kurtin dhe Visar Ymerin

Këshilltari politik i zëvendëskryeministrit Thaçi, Abelard Tahiri, i ka sulmuar shumë ashpër Kurtin dhe Ymerin.

Tahiri ka thënë se këta anti-imperialistë, së shpejti do të kërkojnë edhe largimin e plotë të prezencës amerikane nga Kosova, kurse Lëvizjen Vetëvendosje e ka quajtur si streh të mbetjeve të fundit të Jugosllavisë në Kosovë dhe të mbeturinave enveriste.

“Duke u nisur prej deklaratave të majta anti-imperialiste të ish liderit të Vetëvendosjes dhe të këtij trockistit, që tash e drejton formalisht, në lidhje me qasjen e politikës amerikane ndaj Kosovës dhe angazhimin e tyre për të bërë një peticion për largimin e ambasadorit amerikan, besoj se nuk do të jetë e largët dita që këta njerëz të kërkojnë largimin e plotë të prezencës amerikane nga Kosova dhe izolimin e vendit tonë prej aleancës perëndimore.
Çdo ditë e më shumë po shohim në këtë lëvizje sesi po mblidhen mbetjet e fundit jugosllave në Kosovë, që duke u bashkuar me mbeturinat enveriste kanë nisur fushatë kundër orientimit tonë perëndimor.

Është mjerane kur sheh njerëz të mbështetur, financuar dhe arsimuar nga SHBA-të, si Shpend Ahmeti, Ilir Deda e të tjerë brenda Vetëvendosjes, që nuk kanë kurajon apo vullnetin që të dalin kundër kësaj sjellje radikale të majtë.
Ballafaqimi ynë me këtë fenomen të trashëguar nga regjimi i kaluar nuk do të jetë as i lehtë dhe as afatshkurtër, mirëpo një gjë është e sigurt, që bashkëjetesa në këtë vend e politikës pro-perëndimore të lirisë, demokracisë dhe asaj të obskurantizmit lindor nuk është e mundur.

Ballafaqimi sa më i hershëm me këta anti-perëndimorë, është i nevojshëm dhe i shëndetshëm për shoqërinë tonë, pa marrë parasysh koston që do të ketë ky ballafaqim”, ka shkruar këshilltari i Thaçit, Abelard Tahiri.

Avokati Dastid Pallaska : Armiqësia me SHBA-në e dërgon vendin në vetizolim

Avokati Dastid Pallaska ka komentuar thënë se armiqësia me SHBA’në e çon Kosovën në vetizolim të modelit të diktatorit Enver Hoxha.

Ai ka thënë se politika e SHBA’së është e qartë: “qofshin ata të korruptuarit e pozitës apo të dhunshmit e opozitës - nuk e kanë vendin në institucione por në burg!”.

“Të gjithë ata që në rrjetet sociale me lehtësinë e një adoleshenti të llastuar po mbjellin armiqësi kundër aleatëve tanë që janë kundër dhunës në Kuvend le ta mbajnë në mend se sot – 8 vite pas pavarësisë – janë pikërisht këta aleatë që garantojnë, ruajnë dhe mbrojnë kufijtë e këtij vendi. Gjuha që po përdoret e dërgon vendin në vetizolim të modelit të Enver Hoxhës”, ka shkruar Pallaska.

Ky reagim i Pallaskës vjen pas inicimit të një peticioni nga shoqëria civile në Kosovë për largimin e Ambasadorit Amerikan në Kosovë, Greg Delawie, i cili ka dënuar dhunën në Kuvendin e Kosovës.

Lexojeni të plotë reagimin:

Përpjekja e elitës politike për përvetësim të meritave për çlirimin dhe pavarësimin e vendit i ka bërë ata dhe disa mendjelehtë si ata që të besojnë në gënjeshtrën e tyre dhe të harrojnë se ky vend u krijua dhe ekziston për shkak të aleancës tonë me demokracitë kryesore perëndimore, në krye me Shtetet e Bashkuara.

Të gjithë ata që në rrjetet sociale me lehtësinë e një adoleshenti të llastuar po mbjellin armiqësi kundër aleatëve tanë që janë kundër dhunës në Kuvend le ta mbajnë në mend se sot – 8 vite pas pavarësisë – janë pikërisht këta aleatë që garantojnë, ruajnë dhe mbrojnë kufijtë e këtij vendi. Gjuha që po përdoret e dërgon vendin në vetizolim të modelit të Enver Hoxhës.

Kjo ndjenjë e armiqësisë ndaj aleatëve tanë është rezultat i drejtpërdrejtë i mungesës së guximit të elitës politike në vend për me u marrë vetë me vendimet e vështira këto 8 vite. Në secilin sfidë, sado e vogël që ka qenë, këta “trima” e “patriotë” vendimet e vështira dhe jopopullore ia kanë faturuar aleatëve tanë. Kjo sjellje e papërgjegjshme duhet të dënohet po aq sa edhe përpjekjet e politikës aktuale që aleancat tona strategjike t’i sakrifikojnë në garën e tyre për mbrojtje të pushtetit apo ardhje në pushtet.

E për ata që ende kanë dilema, politika amerikane në Kosovë është shumë e thjeshtë: të gjithë ata që shkelin ligjin - qofshin ata të korruptuarit e pozitës apo të dhunshmit e opozitës - nuk e kanë vendin në institucione por në burg!

Lideri i AKR-së Behxhet Pacolli: Nuk duhet hequr as shtuar asnjë presje nga ajo qka tha ambasadori amerikan

Lideri i AKR-së Behxhet Pacolli thotë se asnjë njeri i arsyeshëm nuk mund të heq as të shtojë asnjë presje nga ajo që ka thënë dje ambasadori amerikan, Greg Delawie.

Postimi i plotë:

Unë nuk dua dhe nuk mundem ta besoj se ka njeri në Kosovë që arsyeshëm mundet të heqë apo të shtojë asnjë presje për atë çka Ambasadori Amerikan Delaëie dje deklaroi.

Ambasadori i SHBA-ve në Kosovë, Delaëie, tha ekzakt atë që çdo njeri i arsyeshëm do ta thoshte.

Ambasadori nuk kurseu askënd pa marrë parasysh partitë politike dhe ngriti zërin për ata që e dëmtojnë Kosovën, dhe zhvillimin e jetës demokratike në Kosovë, ashtu siç do të duhej të ishte qëndrimi i secilit që e do Kosovën. Çdokush që i kundërshtohet kësaj deklarate, në një apo tjetër menyrë, nuk e do Kosovën.

Qeveria e Republikës së Kosovës: Mirënjohje të përjetshme për SHBA-të

Qeveria e Republikës së Kosovës shpreh indinjatë të thellë dhe dënon ashpër përpjekjet e ulëta për linçim publik, iniciativat denigruese me adresa të dyshimta dhe ofendimet ndaj personalitetit të Ambasadorit të Shteteve të Bashkuara të Amerikës, mikut të popullit të Kosovës, Greg Delawie.

Me një komunikatë për media, Qeveria e Kosovës, në emër të qytetarëve të Republikës së Kosovës, shpreh mirënjohje të përjetshme për përkrahjen e pazëvendësueshme të Shteteve të Bashkuara të Amerikës për popullin dhe shtetin e Kosovës, në të gjitha etapat historike.

“Qeveria e Kosovës thekson përkushtimin e plotë të Qeverisë dhe të qytetarëve të Kosovës për thellimin e gjithanshëm të miqësisë, të bashkëpunimit bilateral dhe të partneritetit strategjik me Shtetet e Bashkuara të Amerikës, mikut më të madh të Republikës së Kosovës në botë”.

Më tej ekzekutivi i vendit shpreh vlerësimet dhe falënderimet më të sinqerta për Ambasadorin Greg Delawie, për kontributin e tij të jashtëzakonshëm në avancimin e marrëdhënieve ndërmjet Kosovës dhe SHBA-ve, në fuqizimin e zhvillimit ekonomik, forcimin e shtetit ligjor dhe për avancimin e perspektivës euroatlantike e të demokracisë në Kosovë.

“Qeveria e Republikës së Kosovës thekson se përpjekjet e ulëta denigruese të një numri tejet të kufizuar individësh dhe qarqesh parapolitike, të mbështetura edhe nga persona me të kaluar të errët, ndaj personalitetit të Ambasadorit Delaëie dhe personaliteteve tjera në Kosovë, janë në kundërshtim të plotë me qëndrimin unanim dhe respektin e palëkundshëm të qytetarëve dhe të skenës politike shtetformuese të Kosovës ndaj personaliteteve të shquara që po e ndihmojnë Kosovën në ecjen e saj drejt vlerave demokratike perëndimore, të përfaqësuara nga SHBA-të”.

Me këtë rast, Qeveria e Kosovës shpreh mirënjohje të thellë edhe për të gjithë ambasadorët e kaluar, diplomatët dhe stafin që kanë punuar dhe vazhdojnë të punojnë në Ambasadën e SHBA-ve në Prishtinë, punëtorët e USAID-it dhe shumë organizatave tjera amerikane në Kosovë.

“ Republika e Kosovës do t’i jetë përjetë mirënjohëse Shteteve të Bashkuara të Amerikës dhe popullit të saj”, përfundon komunikata.

Shkenctari Prof.dr. Qëndrim Gashi: Lëvizja anti-ShBA në Kosovë, është neveritëse

“Është neveritëse lëvizja anti-ShBA e cila zhvillohet në Kosovë qe një kohë”. Kështu e fillon reagimin e tij, matematikani, Qëndrim Gashi.

Profesori i njohur në departamentin e matematikës në Universitetin e Prishtinës, deklaron se nuk janë të rastësishme thirrjet kundër ambasadorit amerikan e as kundër paraardhësve të tij.

Ai rikujton se para pak javësh kishte thirrje edhe kundër një përfaqësuesi të një shteti të rëndësishëm evropian.

“Me këtë mendësi lista e shteteve armike mund të zgjerohet, në përputhje me leksionet e xhaxhit Enver”, shkruan gashi në llogarinë e tij në facebook.

Por tash, sipas profesor Gashit, kjo qasje pjesërisht bazohet tek një ideologji ekstreme e majtë për të cilët ShBA ishin gjithmonë kapitalistë të papërmirësueshëm.

Vetë Gashi dikur ishte pjesë e partisë ‘Fryma e Re’, e cila kishte një koncept liberal, dhe ishte bashkëpartiak i Shpend Ahmetit,Ilir Dedës, Fisnik Ismailit, e Dardan Sejdiut.

Megjithatë ai thekson se në këtë përzierje, ka edhe OJQ-istë të frustruar, anëtarë të një “elitëze”, kryesisht prishtinase që meqë nuk shtyhen dot me kontributin në luftë çlirimtare, tentojnë ta rekuperojnë mungesën e dukjes së patriotizmit me pozicione absurde anti-perëndimore.

Postimi në facebook i profesor Qëndrim Gashit
“Disa përkrahës apo individë që kanë simpati për ekstremistët religjiozë, disa “puritanë” që mendojnë se sovraniteti duhet “ushtruar” kundër ambasadorit mik, por nuk janë kundër që KFOR-i të qëndrojë në Kosovë edhe pse është mision i një organizate që ende nuk na njeh formalisht si shtet”, shkruan Gashi.

“Kuptohet, nuk ka miks pa pasur prani edhe të disa budallenjve”.

Gashi e pranon se pa dyshim se ka probleme themelore në vendin tonë. Por, shkruan se ato probleme që po na e bëjnë jetën më të vështirë, bukur shumë i kemi shkaktuar vet.

“Shikojeni arsimin dhe shëndetësinë si dy fusha ku ne kemi qenë pothuajse ekskluzivisht në pronësi të udhëheqjes që nga paslufta për ta parë se ku qëndron problemi”.

Matematikani deklaron se problemeve reale po u shtohet artificialisht loja me simbolet e shtetit të Kosovës, të cilat simbole më së shumti u pengojnë kundërshtarëve të pavarësisë së Kosovës. “Problemeve akute u shtohet loja me Festën e Pavarësisë së Kosovës — një vit nuk ka të holla, një tjetër s’ka çka të festohet ose s’ka informata se 17 shkurti ndodh më 17 shkurt”.

“Le të mendojmë pak se sipas kësaj logjike 28 Nëntori nuk duhet festuar kurrë sepse nuk u realizua aspirata fillestare e një shteti shqiptar që përfshinte të gjitha territoret e banuara me shqiptarë. Çudi që ende nuk kanë shpallur zi për atë festë kujdestarët e patriotizmit!”, ironizon profesor Gashi.

Ai thekson se ndryshimet dhe progresi mund të bëhen në Kosovë, ato duhet të ndodhin dhe do të ndodhin, por vetëm në mënyrë paqësore e demokratike.

“Rendi dhe ligji, ekonomia, arsimi dhe shëndetësia kanë nevojë për zhvillim të hovshëm. Në atë rrugë do të vazhdojë të na nevojitet përkrahja dhe bashkëpunimi me ShBA-të e jo konfrontimi me ta”.

Aman mosni

Shkruar nga Arton Musliu

Sipas autorit Raju G. C. Thomas sot në botë jetojnë afërsisht gjashtëqind gjuhë të ndryshme dhe rreth pesë mijë grupe të ndryshme etnike, si dhe rreth 200 shtete, meqenëse procesi i krijimit të shteteve të reja, ndonëse i ngadalshëm dhe shumë i vështirë, është një proces i pandalshëm.

Popuj të ndryshëm përgjatë historisë kan formuar shtetet e tyre rrespektive duke u bazuar në konfiguracionin politik të Fuqive të Mëdha të cilat kan ekzistuar nëpër çdo etapë të historisë së re. Duke filluar nga Vestfalia e deri në ditët e sotme.

Në peridhën e Koncertit të Vienës ishin fituesit e luftërave napoleoniane ato të cilat vendosën për krijimin e formacioneve të reja politike.

Rusia, Prusia, Austria dhe Britania e Madhe ishin Fuqitë e Mëdha të asaj kohe të cilat vendosnin për fatin e popujve të tjerë. Sa për ilsustrim.

Në vitin 1792 Belgjika u pushtua nga Franca, derisa në vitin 1815 ajo e gjeti vetën nën juridiskionin e Mbretërisë së Portokallt Holandeze. Jo pse Belgjika nuk plotësonte kriteret për shtetësi por që kështu vendosën Fuqitë e Mëdha.

Pesëmbëdhjetë vite më vonë, kur pozicioni strategjik i këtyre Fuqive ndryshoi, ndryshoi edhe kursi ndaj krijimit të shtetit Belg.

Fuqitë e Mëdha jo vetëm që ndihmuan krijimin e shtetit të ri Belg, por edhe intervenuan ushtarakisht, Britania dhe Franca më saktësisht, për të larguar ushtrinë holandeze nga Belgjika.

Ky intervenim ka ndodhur pas shpalljës së shtetit Belg. E njejta gjë mund të thuhet edhe për Revolucion Grek i cili prodhoi shtetin Grek. Edhe këtu u dasht intervenimi i Fuqive të Mëdha për të siguruar tërheqjen e trupave turke nga aty.

Sidoqoftë, për të mos ju lodhur shumë me histori, dua të them se sot ka jashtëzakonisht shumë popuj dhe territore që nuk po mundën të krijojnë shtetet e tyre rrespektive.

Disa po munden por nuk po njihen, e disa spo munden. Shembull të rastit të parë janë Krimea, Abkhazia dhe Osetia Jugore, shembull në rastin e dytë është populli Kurd.

Shprehur ndryshe, ka shumë popuj të clët janë më të mëdhenjë së sa shqiptarët e Kosovës e më të fuqishëm gjithsesi, e të cilët nuk po mundën të krijojnë shtetet e tyre rrespektive për shkak të mungesës së përkrahjes ndërkombëtare.

Shembuj të tillë janë Kurdët në Turqi dhe në Irak të cilët kan pesëmbëdhjetë herë më shumë popullsi se sa që kemi ne, Abkhazia dhe Osetia Jugore në Gjeorgji, Katanga në Kongo, Biafra në Nigeri, Punjabi, Asami, Nagalandi dhe Mizorami në Indi, Morot në Filipine, Çeçenia, Ingushetia dhe Tatarstani në Rusi, Krimea në Ukrainë, Transdniestri dhe Kaukazi në Moldavi, Baskët dhe Katalunasit në Spanjë e shumë popuj të tjerë të cilët nuk kan mundur e nuk po munden të krijojnë shtetet e tyre.

Kjo për një fakt shumë të thjeshtë. Përveç përpjekjeve për liri të secilit popull, përkrahja që vjen nga Fuqitë e Mëdha është vendimtare. Nuk kemi mbetur ne shqiptarët të ndarë në disa shtete për shkak se e kemi dasht një gjë të tillë.

Por që koha në të cilën janë formuar shtetet kombe neve na ka gjetur të papërgaditur përbrenda dhe pa përkrahje nga Fuqitë e Mëdha në fund të shekullit të nëntëmbëdhjetë dhe në fillim të shekullit të njëzetë.

Jo vetëm shqiptarët janë të ndarë në disa shtete. Populli somalez në Afrikë jeton në katër shtete të ndryshme, në Somali, Etiopi, Keni dhe Gjibuti.

Një gjë e tillë ka ndodhur për shkak se pas periudhës së krijimit të shteteve kombe, krijimi i shteteve është bërë gjithnji në baza territoriale e jo në baza etnike.

Vetëvendosja teritoriale, parimi Uti Possidetis dhe stabilitei ndërkombëtar janë tri elementët të cilat kan kushtëzuar një gjë të tillë.

Edhe pse kërkesat dhe motivet në të shumtën e rasteve kan qenë etnike, zgjidhjet pothuajse çdo herë kan qenë territoriale.

Për të mos e zgjatur shumë, sepse është temë mjaft e gjërë, Kosova është shtet së pari në saje të luftës heroike të UÇK-së, e cila luftë po të mos ishte mbështetur nga miqt tanë, me Shtetet e Bashkuara të Amerikës në krye, për mendimin tim nuk do përfundonte më çlirim nga Serbia gjenocidale.

Para se të jemi emocional, e subjektiv duhet të sillemi si realist e objektiv. Prandaj, zhvillimet e fundit shtetin tonë përkitazi me marrëdhëniet e Republikës me shtetet tjera, sidomos me Shtetet e Bashkuara të Amerikës duhet të jenë të shkëlqyera.

Thirrja për largimin e Ambasadorit të akredituar të Shteteve të Bashkuara të Amerikës nga Kosova është gjëja më e shëmtuar dhe veprimi më diletant i cili mund të këtë pasoja të pariparueshme.

Ndërsa në aspektin juridik duhet të jetë e qartë se vetëm institucionet shtetërore mund të shpallin një Ambasador apo dikë nga personali diplomatik i huaj si të padëshiruar. Kjo në bazë të nenit 9 të Konventës së Vienës mbi Marrëdhëniet Diplomatike.

Në fund të fundit këto thirrje mund të ndikojnë edhe në agjendën tonë evropiane si dhe në marrëdhëniet ndërkombëtare të Kosovës, sidomos me mekanizmat jo shtetërorë ndërkombëtar.

Acarimi eventual, apo hatërimi potencial, i Shteteve të Bashkuara të Amerikës mund të na kushtoj me izolim të paparë dhe me relativizim të paparashikueshëm të subjektivitetit ndërkombëtar të Republikës.

Besoj që askush nga ne nuk dëshiron që Kosova të hyj në një kategori të shteteve si Kuba e Vietnami. Mosni ju lutem!

BE: Të gjitha palët të përmbahen nga përdorimi i retorikës nxitëse

Bruksel, 20 shkurt -


Bashkimi Evropian thotë se dje përsëri është parë “obstruksion në punën e Kuvendit, i dëmshëm për jetën institucionale dhe për shtetasit e Kosovës”.

Mëtutje në kumtesën e mbrëmshme të BE-së, “bëhet thirrje për heqje dorë nga dhuna në çfarëdo forme dhe nga çdokush dhe për kthim të dialogut, i bazuar në parimet e qeverisë demokratike dhe opozitës demokartike, që funksionojnë brenda institucionit demokratik”.

Bashkimi Evropian konsideron se “të gjitha palët duhet të përmbahen nga përdorimi i retorikës nxitëse, që vetëm e thellon ndarjen dhe dialogun e bënë më të vështirë.

Deklarata e BE-së përfundon me konstatimin se “qëllimet politike duhet të arrihen nëpërmjet procesit demokratik, në interes të popullit të Kosovës”.

Avonet: Iniciativa për peticion kundër Delawie është qesharake

Prishtinë, 20 shkurt -


Rrjeti i OJQ-ve AVONET shpreh shqetësimin për një iniciativë të peticionit kundër deklarimeve të djeshme të ambasadorit amerikan Delawie për situatën politike në Kosovë.

AVONET, mbështet deklaratën e ambasadorit amerikan Delawie, i cili ka shfaqur shqetësimin për rrethant me të cilat po kalon Kosova.

Ai poashtu ka kërkuar nga partitë opozitare që të ulen dhe të dialogojnë, e jo të krijojnë dhunë dhe të pengojnë proceset si në punën e Kuvendit të Kosovës, ashtu edhe në realizimin e agjendës institucionale.

AVONET vlerëson se ambasadori Amerikan Delawie është duke luajtur rol të rëndësishëm për shoqërinë kosovare dhe në rrafshin institucional.

Kontributi i tij dhe i stafit të ambasadëss amerikane çdo herë ka qenë i madh dhe i duhur për qytetarët e Republikës së Kosovës. Përmendim këtu angazhimet në realizimin e qëllimit për një shoqëri demokratike, multietnike e për tolerancë ndërfetare.

Deklarimet e ambasadorit Delawie, janë deklarata zyrtare të Shtëpisë së Bardhë. Përveç mirënjohjes që kemi ndaj SHBA-së, duhet edhe t\'iu besojmë e të punojmë ngase janë miqtë kryesorë që na ndihmuan në çlirim e ndërtim të shtetit.

Dënojmë ashpër iniciativën për peticion sepse është qesharake dhe qëllimkeqe.

Të gjithë qytetarëve të Republikës së Kosovës u bëjmë thirrje që ta injorojnë peticionin, ndërsa mekanizmat e sigurisë i ftojmë që ta hetojnë se kush fshihet prapa këtij peticioni.

Dr. Enes Kariq : PROF. DR. ADNAN SILAJDŽIĆ ME TITULL “MUSLIMANËT NË KËRKIM TË NJË IDENTITETI”

Kohët moderne janë përcaktuar në mënyra të ndryshme në literaturë, ndonjëherë si epoka e makinës, ndonjëherë si epoka e teknologjisë, dhe shpeshherë si epoka në të cilën njerëzit e zakonshëm shfaqen në skenën historike, një epokë e revolucionit shoqëror dhe industrial, e udhëtimeve hapësinore, e globalizimit, e shteteve të mëdha, e luftrave botërore etj.

Pavarësisht nga emërtimet që i ngjiten epokës moderne, është pa dyshim e rëndësishme për njeriun modern që kjo epokë ka nxitur pasqyrime të reja mbi çështjen e identitetit. Edhe para kësaj, ne ishim qenie tokësore, por për t’u lidhur me planetin Tokë në mënyrë shpirtërore ne kryesisht komunikonim përmes një universi fetar. Toka dhe Qielli ishin të bashkuara me njohurinë se ato ishin krijesa hyjnore, secila prej tyre shumë njerëzore, natyra, Toka, dhe Qielli. Madje vetë historia është parë si asgjë tjetër veçse si vepër e Zotit, e dallueshme vetëm në atë se ajo u shpalos para syve tanë dhe me pjesëmarrjen tonë. Ajo ka qenë në këtë mënyrë për disa mijëra vite.

Megjithatë, fuqia teknologjike zbuloi dhe zhvilloi që para 3 shekujsh se ajo gjithnjë e më shumë po lë shenjën e saj mbi ne. Ajo është një fuqi që vetë ne e kemi menduar dhe e kemi vendosur në vetë duart tona. Ideja e fuqisë, fuqisë njerëzore, është tani një çështje e filozofisë, teologjisë, dhe shkencave të tjera shoqërore dhe natyrore.

Tani, në epokën e teknologjisë, ne jemi bërë sundimtarë, ndërmjetës dhe udhëheqës të shumë gjërave, duke përfshirë dhe çështjet e të tjerëve. Nëse feja ka pohuar se ne do të jemi zot të Tokës në emër të Zotit, tani, në moshën e teknologjisë, ne jemi duke u bërë gjithnjë e më shumë zot të Tokës - shpesh pa Zotin, dhe pa asnjë kufi të shenjtë.

Megjithatë, qëllimi ynë nuk është që të nisim një debat mbi zotësinë moderne të njerëzimit për të sunduar Tokën, por për të bërë disa vërejtje mbi problematizimin e identitetit në kohën tonë, në përputhje me librin e Prof. Dr. Adnan Silajdžić.

Në mesin e kësaj fuqie të pamasë teknologjike, shpirti njerëzor e pyet sërish veten se kush jemi ne dhe çfarë është shpirti, kush dhe çfarë është njeriu vetë. Besimi është ende me ne, diku, me ngathtësinë e tij dhe shpesh me pyetjet dhe përgjigjet shqetësuese. Nuk ka asnjë teknologji të aftë që t’i mohojë këto pyetje dhe përgjigje, që t’i zhvlerësojë ato, sepse vetë teknologjia është e vdekshme, meqenëse ajo është vepër e qenieve të vdekshme. Qeniet njerëzore të riprodhuara (klonet), gjithashtu, qofshin të shëndetshme dhe të forta, bile edhe të pashëm, do të përballen me vdekjen dhe, në çastin e vdekjes, ata do të pyeten se kush dhe çfarë janë.

Kështu që edhe në epokën e teknologjisë, ne jemi në kërkim të identitetit, jo vetëm siç ndodhte shekuj më parë. Identiteti ka nevojë për një atdhe, por gjithashtu na e ofron neve një të tillë, në të vërtetë shpesh duke zëvendësuar atdheun fizik.

Në këto ese të shkëlqyera, Prof. Dr. Adnan Silajdžić ofron shumë përgjigje në këtë kontekst ose në një të ngjashëm. Si pjesë e studimeve që ai jep mësim, i cili merret hollësisht me besimet më të mëdha botërore në epokën e modernizmit dhe të aftësisë teknologjike, esetë e Prof. Silajdžić janë një sfidë dhe një përgjigje ndaj shumë pyetjeve.

Një tipar veçanërisht i çmuar i këtij libri është se Prof. Silajdžić i drejtohet dilemave që u dalin përpara besimtarëve në përgjithësi, dhe muslimanëve në veçanti.

Në përmbledhjen e eseve në anglisht të cilën Prof. Dr. Adnan Silajdžić e ka titulluar Muslimanët në kërkim të një identiteti, ai e përqendron vëmendjen tonë në çështjet kryesore në ditët e sotme, që është gjithashtu edhe ajo e muslimanëve. Tradita, modernizmi, autoriteti, burimet e fesë, interpretimi i burimeve, pandryshueshmëria (taklid), risitë, interpretimet e reja të teksteve të shenjta (ixhtihad), globalizimi, patriotizmi, universaliteti - të gjitha këto janë tema të ndara në shumë fragmente të këtij libri të rëndësishëm, të cilat janë sjellë së bashku në një tërësi të kuptueshme. Dr. Adnan Silajdžić, një profesor i plotë në Fakultetin e Studimeve Islame, i cili mëson lëndën e akaid-it, nuk përshkruan vetëm çështjet dhe problemet e traditës (modernizmin, autoritetin, globalizmin, reformën etj.) vetëm nga perspektiva e tij, por, gjithashtu, duke u bazuar në teoricienët e modernizmit islam, Shah Vali Allah, Muhamed Abduhu, Shaukani, Fazlur Rahman, Sejjid Husein Nasr dhe të tjerë, ai shfaq pikëpamjet e tij dhe shtrirjen e tyre në kohët e sotme.

Me stilin e tij të veçantë, të drejtuar në mënyrë të jashtëzakonshme me metafora të poezisë ose me filozofi të brendshme, Dr. Adnan Silajdžić është përfshirë thellë siç e përzien në një përshkrim të ndeshjeve dhe përplasjeve bashkëkohore mes traditës islame në njërën anë dhe interpretimeve islame dhe muslimane të traditës në anën tjetër, në kontekstin e llogaritjeve historike të urdhëruara nga perëndimi dhe temave të globalizmit, laicizmit, modernizmit, pluralizmit etj.

Muslimanët janë në kërkim të identitetit të tyre - jo identitetit të tyre fetar, por të identitetit që ata mund ta fitojnë përmes përpjekjeve të tyre intelektuale dhe të marrin zotërimin e arritjeve të tyre shpjeguese përballë globalizmit, laicizmit dhe modernizmit. Këto janë pyetje për të cilat mendja moderne muslimane kërkon përgjigje; dhe janë këto pyetje, dhe përgjigjet ndaj tyre, të cilat do të përkufizojnë nëse muslimanët do të gjejnë forcën për të përcaktuar trajektoret e tyre të modernizmit.

Këto ese të shkruara nga Dr. Adnan Silajdžić mund të lexohen gjithashtu si komentimi i tij mbi temat dhe debatet kryesore teologjike të ditëve tona. Kjo është një tjetër vlerë e veçantë e faqeve të këtij libri.

Dr. Enes Karić

Fakulteti i Studimeve Islame - Universiteti i Sarajevës

Boton:

“QENDRA SHQIPTARE PËR STUDIME ORIENTALE”

Tirana-Albania

Kritika -Unioni i Bashkimit të Krijuesve Shqiptar në Botë(ACPE)"Fjala e lirë" :Enciklopedia e mendimit shqiptar

Shkruan:Prof.dr.sci.Eshref Ymeri

Në universin e kulturës shqiptare është i rrallë fakti që një krijues të dalë para lexuesve me autoritetin e admirueshëm të një shkrimtari, poeti, përkthyesi, publicisti, historiani, gjeografi, analisti dhe kritiku të talentuar.

Albert Kamy (Camus - 1913-1960) thotë:“Asgjë tjetër nuk mund ta frymëzojë kaq shumë njeriun, sesa vetëdijësimi për gjendjen e tij të pashpresë”.

Libri  me titull "Triumfi shqiptar", i tridhjeti në serinë e botimeve të zotit Flori Bruqi, nxjerr në spikamë natyrën shumëdimensionale të krijimtarisë së këtij personaliteti të shquar të kulturës shqiptare. Në universin e kulturës shqiptare është i rrallë fakti që një krijues të dalë para lexuesve me autoritetin e admirueshëm të një shkrimtari, poeti, përkthyesi, publicisti, historiani, gjeografi, analisti dhe kritiku të talentuar.

Flori Bruqi TRIUMFI SHQIPTAR Shkarko falas

Tek lexon këtë vepër kaq interesante, që të rrëmben me tematikën e vet bukur të larmishme, nuk mund të mos ndiesh njëherazi kënaqësi dhe krenari për faktin që krijimtarinë e zotit Flori e përshkon tejendanë një frymë mahnitëse objektiviteti, humanizmi dhe optimizmi të pakundshoq. Mes rreshtave të kësaj vepre nuk është vështirë të kapësh tiparin më themelor të formimit intelektual të zotit Flori - dashurinë e tij të pastër për tokën amtare, respektin e lakmueshëm për këdo që është atdhetar dhe që e do me shpirt punën, si burim mirëqenieje dhe begatie për të gjithë.

Albert Kamy

Albert Kamy (Camus - 1913-1960) thotë:“Asgjë tjetër nuk mund ta frymëzojë kaq shumë njeriun, sesa vetëdijësimi për gjendjen e tij të pashpresë”.

Duke pasur parasysh këto fjalë të qëlluara të Kamysë, mendoj se të gjithë ata shqiptarë që popullojnë mbarë trojet tona etnike në Evropën Juglindore dhe që janë të kapluar nga pak nga ndjenja meskiniteti, cmire, xhelozie, inferioriteti dhe zvetënimi të shpirtit njerëzor, pra, nga “vetëdijësimi për gjendjen e tyre të pashpresë”, është mirë ta lexojnë, me durim, veprën e zotit Flori, se nuk do të mbeten të zhgënjyer, nëse do të jenë në gjendje të zbulojnë brenda qenies së tyre një çikëz frymë objektiviteti. 

Kam bindjen se do të dalin të fituar, se vepra e zotit Flori shërben si melhem për qetësimin e shpirtrave që janë të infektuar nga mikrobi djallëzor i përçarjes njerëzore. Ne, shqiptarët, kemi dhënë dhe vazhdojmë të japim prova boll të dhimbshme të përçarjes kombëtare, çka e kemi paguar shtrenjtë - me copëtimin e trojeve tona etnike. Evropa na e ka njohur mirë dhe na e ka “yshtur” po aq mirë këtë mikrob të mallkuar, prandaj edhe trojet etnike na i bëri çarçaf. 

Vepra e zotit Flori duhet të lexohet me shumë vëmendje sidomos në Kosovë, në mënyrë që njerëzit e infektuar nga mikrobi i përçarjes t’i thërrasin mendjes dhe të heqin dorë një herë e mirë nga sulmet që ndërmarrin kundër njëri-tjetrit nëpër faqet e internetit, ca sulme publike këto, me një fjalor të padenjë për stilin e komunikimit njerëzor, por edhe më shumë të padenjë për një komunikim intelektual. 

Më gëzon shpirti dhe ndiej një kënaqësi të jashtëzakonshme kur lexoj këtë vepër të zotit Flori, që të mëson dhe të frymëzon që ta duash dhe ta respektosh njeriun, pra, ta duash dhe ta respektosh shqiptarin. 

Sepse në analizat e veta shkencore zoti Flori, tërthorazi, zbulon anët më humane të shpirtit njerëzor, ndikimin e tyre në plazmimin vlerave e krijuese dhe rolin që ato duhet të luajnë në shëndoshjen e shpirtit shqiptar me dashurinë e njeriut për njeriun. Në gjykimin tim, mbarë krijimtaria e zotit Flori, për tematikën e gjërë që trajton dhe për objektivitetin e analizave shkencore që shpalosen në të, mund të vlerësohet pa drojë si modeli i enciklopedisë së mendimit shqiptar.

Santa Barbara, Kaliforni

19 qershor 2010

http://www.fjalaelire.com/index.php/kritika/6010.html

Ksenofon M. Dilo: 

 22/06/2010 13:57:01

Ju falnderoj Z. Prof. Dr.Eshref Ymeri qè na kini sjellè para syve me kete shkrim aq tè goditur njè burrè si Zoti FLORI BRUQI qè nè udhetimin e tij èshtè "udheheqès i inteligjencès njerèzore shqiptare" , qe paraprin ,me simbolet e shqipeve, udhèrrèfyesit e rrugètimeve tè progresit dhe shkreptimave te endrrave tè ndezura patriotike . 

Me veprat e tij Z.BRUQI ,sjell freski nè Letèrsinè shqipe. Ato janè pjesè e historise dhe e lavdise sè Kombit tonè dhe,i japin ketij njè emèr mjaft tè nderuar. Duke falnderuar Z. BRUQI pèr kètè vlerè qè shton nè thesarin e kultures shqiptare,e pèr kènaqèsinè qè na solli Z. YMERI me kètè studim,i urojmè librit "TRUMFIT SHQIPTAR" " udhè tè mbarè" nè bibliotekat e ç'do shtepie nacionalisti dhe zèmrat e shqiptareve dhe miqve tè tyre kudo qè janè.I urojmè suksese te metejshme nè hapèsira te reja. Me kètè rast falnderoj Z. Ajet Nuro pèr mundèsine qè na jep tè lexojme punime te tilla aq me vlera.

20.06.2010.

Prof Dr Eshref Ymeri: 

22/06/2010 14:01:15

I nderuar zoti Ksenofon, Ju falënderoj nga zemra që ju, si intelektual i mirënjohur, e vlerësoni kaq lart veprën e zotit Flori, i cili sot qëndron në vijën e parë të përpjekjeve të mundimshme për "humanizimin" e shoqërisë shqiptare, që, për fat të keq, tani është e parcelizuar nga partitë politike. 

Prandaj njerëzit e sferës së kulturës, si ju dhe shumë të tjerë, e kanë për detyrë atdhetare që t'u japin vendin që meritojnë figurave të shquara të kombit shqiptar. 

Më vjen shumë keq dhe më lëndon thellë në zemër fakti që vdekja e një artisti të madh të ekranit, siç mbetet Bekim Fehmiu, u kalua në heshtje në qarqet politike të Prishtinës dhe të Tiranës. 

Bekim Fehmiu, pavarësisht se ku punoi dhe jetoi, pavarësisht se ku e dha kontributin e vet në artin e përkryer të kinematografisë, ai ishte dhe mbeti shqiptar deri në fundin e jetës së tij, çka e vulosi me testamentin që u përcolli breznive shqiptare. Për atë artist të madh, 

Tirana zyrtare, si kryeqendra e etnisë shqiptare në Evropën Juglindore, duhej të ishte kujtuar me kohë, për ta nderonte me titullin e lartë "Nderi i Kombit". Edhe një herë ju falënderoj, i nderuar zoti Ksenofon.

 Falënderoj nga zemra edhe zotin Ajet Nuro për organin e tij të shkëlqyer "Tribuna Shqiptare", si vatër e mendimit të lirë për mbarë botën shqiptare.

Prof.dr. Eshref Ymeri 

Santa Barbara, Kaliforni