Vendlindja e kujton Podrimjen në Francë!




Një vit më parë, në qytetin Lodeve të Francës, ku kishte shkuar për të marrë pjesë në një manifestim të madh të fjalës poetike, ka ndërruar jetë Ali Podrimja, njëri ndër poetët më të mëdhenj shqiptarë. Vdekja e tij në këtë qytet bëri që më vonë, qyteti i lindjes së poetit, Gjakova dhe ai i vdekjes, Lodeve, të binjakëzohen, në ç’mënyrë ka filluar një periudhë e bashkëpunimit të mirë të këtyre dy qyteteve që janë ngushtë të lidhura me emrin e Ali Podrimjes.
description
Pllaka përkujtimore në vendin ku Podrimja e dha frymën e fundit
 
Në njëvjetorin e vdekjes së Podrimjes, institucionet kosovare, por as qyteti i tij i lindjes, Gjakova, nuk denjuan që të organizojnë ndonjë manifestim përkujtues. Ndryshe nga qytetet kosovare, zyrtarët e qytetit francez Lodeve nuk e harruan mysafirin e tyre të nderuar në njëvjetorin e vdekjes, duke organizuar një sërë manifestimesh përkujtimore. Në këto manifestime mori pjesë edhe një delegacion i Gjakovës, i prirë nga kryetari i komunës Pal Lekaj, në ç’mënyrë ua rikthyen vizitën francezëve, të cilët muaj më parë, në kuadër të edicionit të 49-të të Mitingut të Poezisë, i cili në tërësi iu kushtua Podrimjes, qëndruan në Gjakovë ku e nënshkruan kartën e binjakëzimit. “Ne ishim të ftuar si mysafirë në kuadër të edicionit të 16-të të Festivalit të poezisë “Zërat e Mesdheut”, ku u shënua edhe përvjetori i parë i vdekjes së poetit të madh”, ka bërë të ditur Lekaj, me t’u kthyer nga Franca.
Siç pohojnë anëtarët e delegacionit gjakovar, në vendin ku Ali Podrimja kishte lexuar poezinë e fundit, në një rrugë të qytetit Lodeve, afër një lumi ishte zbuluar pllaka përkujtimore në shenjë nderimi të poetit. Në këtë mënyrë, poeti i madh shqiptar do të vazhdojë “të jetojë” dhe të përkujtohet gjithnjë nga kolegët e tij nga shumë vende të botës, sa herë që ata mblidhen në këtë festival ndërkombëtar të poezisë. Me këtë rast, poeti francez Zhulian Blan, kishte lexuar një poezi kushtuar Ali Podrimjes dhe atë në gjuhën frëngjishte dhe në gjuhën shqipe, e përkthyer dhe e botuar në një libër të veçantë, në të cilën ishte futur edhe poezia e fundit e Podrimjes që e kishte shkruar në vendin, ku edhe e dha frymën e fundit.

Pse nuk e përkujtoi Kosova?!
“Duke iu falënderuar respektit të madh që kishin për të ndjerin, na është bërë një pritje dinjitoze. Ndërsa skalitja e emrit të Aliut në pllakën përkujtimore, do t’ia mundësojë të ndjerit që gjithnjë të kujtohet me respekt. Ndërkaq neve na është bë një pritje siç priten mysafirët nga një shtet mik. Lirisht mund të them se gjakovarët, tash e tutje e kanë edhe një “shtëpi” atje në Francë, në qytetin Lodeve”, ka thënë Lekaj. Nga ana tjetër, poeti Engjëll I. Berisha që ishte pjesë e delegacionit gjakovar, ka potencuar faktin se Ali Podrimja, sipas pohimeve të mirëpritësve të tyre, kishte vdekur me lule në duar, ndërsa në afërsi kishte lënë një poezi në dorëshkrim që u dedikohej luleve. “Të gjitha këto, francezët i çmonin shumë dhe falë këtij respekti që kishin për Podrimjen, ata bënë çmos që ne të ndihemi si qytetarë të një vendi të kulturës dhe kjo në bënte të krenohemi me bashkëvendësin tonë, me poetin e madh të përmasave botërore, Ali Podrimjen”, ka thënë Berisha.
Edhe pse nuk dëshirojmë ta mohojmë faktin se anëtarët e delegacionit të Gjakovës, me shkuarjen në Francë në njëvjetorin e vdekjes së Ali Podrimjes, e kanë nderuar figurën e shquar të poetit, megjithatë nuk mund t’i shmangemi bindjes së Podrimja e ka merituar të përkujtohet edhe në qytetin e tij të lindjes, në Gjakovë, por gjithsesi edhe në qytetet e tjera të Kosovës, të cilat çuditërisht heshtën. B.Vula

Comments

Popular posts from this blog

Libra të rinj - Shkarkim falas

Ese për Vitin e Ri

Poezi të zgjedhura nga GJERGJ FISHTA (23 tetor 1870 - 30 dhjetor 1940)