Motra dhe vëllëzër, emër për emër, familje për familje, në Kosovë,Shqipëri ,Maqedoni, Malin e Zi, Luginën e Preshevës, Europën Juglindore, diasporën në Europë, SHBA, Kanada, Australi, Zelandën e Re e kudo ku jetoni me familjet tuaja të nderuara e të respektuara Gëzuar Viti i Ri 2012 !
Qoftë ky vit i mbarë, shëndetplotë dhe fat të bardhë; qoftë ky vit i begatë, sjelltë prosperitet në familjet tona fryt i punës të ndershme dhe të palodhur; na bëftë ky vit më të mirë midis nesh, që ta duam më shumë njeri-tjetrin, që ta ndihmojmë më shumë njeri-tjetrin, që t’i japim më shumë dorën njëri-tjetrit kur jemi në nevojë sepse fati shpesh është tekanjoz; qoftë ky vit shpirtmadh me ne dhe familjet tona por na bëftë edhe ne tolerantë e shpirtmëdhenj, sepse shpirti nuk është një nocion abstrakt, por burim i pashtershëm mirësie.
Le të na sjellë ky vit i ri lehtësinë për t’u përballur me sfidat, të na bëjë sfidues ndaj tyre dhe triumfues përmes dashurisë njerëzore; le të mos harrojmë se seicili prej nesh është pjesë e familjes të madhe, që është kombi jonë i vogël nga pikëpamja demografike, por gjigand sa i përket mbijetesës dhe humanizmit; dhe kombi jonë është pjesë e familjes tonë të madhe europiane, dhe familja jonë e madhe europiane është pjesë e Njerëzimit i cili rreth dy muaj më parë kur një bebe e vogël që posa erdhi në këtë jetë nga Filipinet i mbushi 7 miliardë frymë !
