Ambasadori amerikan në Shkup, Jess L. Baily i bën thirrje Ivanovit ta rishqyrtojë vendimin

 

Jess L. Baily

Ambasadori amerikan në Shkup, Jess L. Baily, i ka bërë thirrje presidentit Gjorge Ivanov që edhe njëherë ta shqyrtojë vendimin për mosdhënien e mandatit.

Baily u shpreh se deklaratën e jep si përfaqësues i partnerëve strategjikë të RM-së dhe si miq të cilët e respektojnë plotësisht sovranitetin dhe integritetin e Maqedonisë.

Baily njëherësh iu bëri thirrje fqinjëve të Maqedonisë që të tregohen të përmbajtur dhe të jenë konstruktiv, në këtë moment, siç u shpreh, shumë të ndjeshëm politik.

Baily gjithashtu ka theksuar se SHBA-të mbrëmë janë dëshpëruar kur mësuan se Ivanovi nuk i ka dorëzuar mandatin Zaevit, për t’i dhënë kështu mundësinë që të formojë qeveri.

Ambasadori amerikan në Shkup, Baily, ka shprehur shqetësimin e tij për gjendjen aktuale në Maqedoni. Për mes një statusi në “Tweeter” ai thotë se pajtohet me deklaratën e eurokomisarit Johanes Han i cili e kritikoi vendimin e presidentit Ivanov mos ia dhënë mandatin Zoran Zaevit.

“Maqedonia largohet nga parimet demokratike dhe sundimi së drejtës, të cilat janë vlerat themelore të NATOS”.

A po dështon komploti rus në Ballkan?

Halil MATOSHI

Pas vrasjes së diplomatit rus në Ankara, Rusia dhe Turqia janë në një farë gjendjeje “armëpushimi” mes dy betejash kur ushtarët i fshijnë pushkët. Shteti malazias e ka akuzuar hapur shtetin rus – shërbimet e fshehta – për tentim të një grusht shteti në Republikën e vogël ish-jugosllave.

Rusia me “milici sekrete” po e trazon Ballkanin Perëndimor dhe atë Qendror, duke mbjellë frikë, por edhe duke testuar (Doktrina Gerasimov) nëse këto shtete janë të afta që ta mbrojnë veten nga lufta e llojit tjetër (lufta speciale) ose jo, dhe njëherësh përmes implikimeve në Ballkan të testojë mënyrat e sjelljes së vendeve evropiane në fqinjësi, sidomos shtetet baltike dhe ato nordike.

Marrëdhënie krize mes Turqisë dhe Rusisë, sidomos pas vrasjes së diplomatit Andrey G. Karlov në Ankara, kanë shkaktuar alarm global dhe kanë ngritur shumë pyetje në lidhje me pasojat më të mëdha.

Këto marrëdhënie i kanë dhënë formë luftës siriane, atje ku rusët kinse duke ndihmuar forcat e Bashar al Asadit po vrasin secilin dhe po shkretojnë vendin për të krijuar ndonjë përparësi ndaj ShBA-së në zonë.

Të dyja shtetet në Siri kanë këndvështrime kontradiktore dhe shpesh mbajnë anët e ndryshme.

Në mediat sociale shumëkush tërhoqi paralele me vrasjen e argjidukës Franz Ferdinand të Austrisë, në Sarajevë më 1914, që merret si Causa Prima (shkak i parë) për të nisur Luftën e Parë Botërore, një krahasim që megjithatë analistët po e refuzojnë.

Një Republika Sërpska që mbahet si konflikt i ngrirë, mes integrimit në shtetin e rikomponuar boshnjak dhe bashkimit me Serbinë, vazhdon të jetë sfiduese për Perëndimin dhe stresuese për Sarajevën zyrtare.

Në anën tjetër, sipas zyrtarëve shtetërorë në Podgoricë, Mali i Zi për pak i shpëtoi një grusht shteti vitin e kaluar, përmes një operacioni të ideuar në Moskë e që kishte për qëllim vrasjen e liderit Milo Gjukanoviq dhe nxitjes së përplasjeve në përmasat e një lufte të kontrolluar civile.

Prokurori Katniç pohoi se shërbimet e sigurisë kanë penguar grushtin e shtetit pas arrestimit të 20 shtetasve serbë, përfshirë një ish-gjeneral të policisë serbe, Bratislav Dikiq.

Më 18 nëntor, Prokuroria Speciale publikoi emrat e dy rusëve – Eduard Shirokov dhe Vladimir Popov – të akuzuar për organizimin e komplotit.

Sipas tij, kreu i grupit që përgatiti grusht shtetin dhe vrasjen e Gjukanoviqit ishte shtetasi rus Eduard Shirokov, aktualisht i kërkuar nga Interpoli, në bazë të një urdhri të lëshuar nga autoritetet malazeze.

Katniç tha se emri i vërtetë i Shirokovit ishte Eduard Shishmakov.

“Në vitin 2014, Shishmakov ishte zëvendësatashe ushtarak në Ambasadën ruse në Poloni, por u përjashtua pas spiunazhit për Rusinë dhe u shpall persona non grata. Kjo pasaportë (e re) u lëshua për të nga autoritetet ruse dhe ai është një anëtar i shërbimeve ruse të sigurisë”, pretendoi Katniç.

Ai tha se dëshmitari kyç i Prokurorisë, shtetasi serb Sasha Sinxheliq, u ftua në Moskë nga Shishmakov që të qartësohej për misionin.

Shishmakov – me pseudonimin Shirakov – “i kërkoi të punonte për të parandaluar hyrjen e Malit të Zi në NATO. Ky është motivimi i vetëm i këtyre strukturave”, ka thënë Katniç.

Kurse në Kosovën e rrëgjuar e me plot telashe të brendshme Serbia e trimëruar nga rusët dhe duke shfrytëzuar vakuumin e ndërrimit të pushtetit në Washington, por edhe deklaratat kontroverse të presidentit Donald Trump, po ushtronte trysni nëpërmjet provokimit të krizave ndëretnike – pra duke nxitur konflikte të intensitetit më të ulët – siç ishte arrestimi i shefit të policisë kosovare në Serbi, dalja e Listës Sërpska nga Kuvendi dhe nga Qeveria e Kosovës, ngritja e një biçim-muri në pjesën veriore të qytetit të Mitrovicës, paralajmërimi se në Kosovë do të hynte një tren i dizajnuar si kishë e që ishte donacion rus, prandaj në mediat në Prishtinë edhe cilësohej si “treni rus”, dhe së fundmi ndalimi në Kolmar të Francës i liderit të AAK-së dhe ish-kryeministër kosovar, Ramush Haradinaj, sipas një fletarrestimi të lëshuar nga Serbia në Interpol.

Dhe në këtë hallakamë, të folurit me lehtësi të padurueshme për luftën, nga liderë të paduruar si Albin Kurti me shokë, mund ta prekë shoqërinë në imunitet, duke i shkaktuar të çara që ndikojnë në përplasje të brendshme mes spektrit politik, fillimisht mes pushtetit dhe opozitës, që zënkat të zgjerohen në konflikt të brendshëm shoqëror.

Thjesht në përplasje, që ka disa karakteristika të luftës civile për t’u përmbushur kështu kushti i parë madhor për ndërhyrje nga jashtë.

Ndonëse lëvizja e Kurtit duket të sillet e çorientuar në këso lojërash – natyrisht se ajo nuk mund të akuzohet kurrë si proruse – porse në Kosovë këtë e priste Rusia, përkatësisht Serbia, që në vendin ku ishte ngritur një monstrum prej tullash të zhvendoste tanket…

Realisht popullizmi nuk e ka zgjidhur asnjë problem të popujve e shteteve, porse shumë sosh i ka shpjerë në luftë dhe shkatërrim. T’u japësh mbështetje shqetësimeve të njerëzve të zakonshëm, kjo d.m.th. ta shpiesh shtetin në qorrsokak, duke legjitimuar paligjësinë dhe duke e suspenduar Kushtetutën.

Porse, kësaj here, Kosova iu shmang këtij rreziku…

Narrativat me murin dhe trenin janë menaxhuar mirë nga shteti.

Pikërisht muri i porositur nga Qeveria në Beograd ishte menduar si një ngrehinë ku do të shkonin turmat e shqiptarëve të revoltuar dhe do ta përplasnin kokën!

Rusia e Vladimir Putinit u përpoq ta shfrytëzonte vakuumin në administratën amerikane dhe sidomos pasiguritë e Trumpit në deklarimet e tij kontroverse për të krijuar ndonjë avantazh në raport me Evropën dhe NATO-n, mirëpo së shpejti Moska mori përgjigjen nga sekretari amerikan i Mbrojtjes, Jammes Mattis, i cili tha se NATO-ja do të forcohet.

A do të rikthehen gjërat në vendin e vet?

Kosova e pavarur ndonëse simbolikisht e ka Osetinë e vet të Jugut në Veri, është kapitull i mbyllur, përderisa në skenën globale po rikthehen çështje shumë më të rëndësishme.

Shqipëria realisht për Bashkimin Sovjetik ka qenë kapitull i mbyllur edhe gjatë Luftës së Ftohtë (askush s’ka qenë i interesuar për inkursion), kurse Kosova tashmë është kapitull i mbyllur, sepse në anën e saj pos që është “shteti i domosdoshëm” SHBA-ja, aty është edhe forca ushtarake KFOR (trupa të NATO-s). Dhe sulmi eventual mbi Kosovën do të thotë sulm mbi NATO-n, sipas Nenit V të Traktatit Veriatlantik.

Lideri serb, Slobodan Milosheviq, më 1989 në Fushë- Kosovë iu pati drejtuar serbëve të mllefosur se askush nuk do të guxonte t’i rrihte, mirëpo kur turma kishte shpërthyer: “Duam armë, duam armë…” ai nuk ishte hamendur t’ua premtonte dhe ato.

Dhe kjo ishte uverturë në luftërat e përgjakshme ballkanike të viteve ’90.

Mirëpo sintagma “duam armë” sikur u rikthye në Ballkan pas 27 vjetëve, kur në të dyja anët e “murit” dhe mes dy stacioneve të “trenit rus” – të stolisur me ikonografinë kishtare ortodokse serbe, dëgjoheshin klithmat e turmave: “Duam armë, lufta sa s’ka nisur”!?

Mirëpo shumë më rrezik sesa lufta e vërtetë për Kosovën dhe kosovarët është korrupsioni galopant që po e gërryen nga brenda stabilitetin e shtetit. Sipas Umberto Ecos, për fjalën korrupsion lista e sinonimeve të mundshme është mjaft e komplikuar, sepse sipas kontekstit mund të bëhet fjalë për: të keqen, rrënimin, prishjen, rrëgjimin, infektimin, kalbëzimin…

E keqja në gjuhën shqipe dëfton cilësinë e dobët.

Pas ndajfoljes “keq” vijnë fjalët keqadministrim, keqan, keqardhje, keqas, keqbesim, keqbërës, keqdashës deri te fjala keqtrajtoj…

Pa të gjitha këto forma e trajta të fjalës këpujë + mbiemër “keq” nuk mund t’i bëhet letra e njoftimit pushtetit kosovar

Së këndejmi, afera “Pronto” dihej që në vitin 2011, kur EULEX-i kishte nisur një hetim të madh që kishte të bënte me korrupsionin në Ministrinë e Transporteve, porse atëbotë kryeministri Hashim Thaçi (president aktual i Republikës) thoshte se ishte vetëm perceptim i keqdashësve, pra i atyre që shohin vetëm zi, dhe vetëm më 2016 skandali u bë publik nga “Insajderi” duke u dhënë mend klasës politike dhe votuesve në Kosovë se kjo ishte lufta e vërtetë që i kanosej Kosovës: qeverisja ekstraktive (përfituese).

Grabovci dhe logjika e “Klanit Pronto” nuk kanë ide se shoqëria u nënshtrohet ligjësive si ligështimit, sëmundjes dhe shpërbërjes (pikërisht sikur trupi që vdes dhe shpërbëhet duke u kalbëzuar), prandaj ata duan ta shfrytëzojnë pushtetin politik – për fuqi, dominim të shoqërisë dhe pasurim nga zyrat publike – duke e kthyer atë në pushtet personal, sepse në thelb pushtetin politik ata e konsiderojnë krejtësisht personal dhe thjesht të fituar me luftë duke u ngritur mbi llojin tjetër: Të mundurit!

Ata pjesëtarët e shoqërisë që e sundojnë i konsiderojnë të shpushtetizuar, të mundur në luftë, pra lloj më të ulët jo vetëm në hierarkinë shoqërore, por edhe në hierarkinë biologjike, ndonëse vetë janë llumi i kësaj shoqërie.

Në këtë rrafsh Grabovci dhe “Pronto” janë më të rrezikshëm për Kosovën sesa Putini dhe putinizmi!

Ngjarjet që kanë një sfond gjeopolitik janë të ndërlidhura mes vete.

Po të ndodhte (gjë që s’ka mundësi të ndodhë!?) invadimi rus në Gjeorgji para festës së 50-vjetorit të NATO-s, më 1999 nuk do të ndodhte intervenimi në Kosovë.

Dhe po të ndodhte mbrojtja e Gjeorgjisë, nuk do të ndodhte Krimeja!?

Prandaj këtë leksion si duket e mësoi Perëndimi, përkatësisht NATO-ja, duke ia prerë “udhën” ariut rus me hungërimat e tij drejt Ballkanit…

Por në histori nuk ka po qe se, nuk ka nëse!?.

Historia njeh faktet e kryera, jo pandehmat, dilemat dhe teoritë e probabilitetit.

Agresioni i hapur rus në Gjeorgji, pos shkeljes flagrante të së drejtës ndërkombëtare, rikonfirmoi se Rusia i përket “boshtit të së keqes” (presidenti Bush nuk i referohej direkt Rusisë kur justifikonte vendosjen e bazave antiraketore në Poloni, ai zinte n’gojë Iranin, Korenë e Jugut…)

Lufta për t’i dhënë fuqi NATO-s (më shumë financime) nuk i pëlqeu Moskës zyrtare (sepse NATO-ja po i afrohej pak si tepër Kremlinit), prandaj përmes qeverisë kukull të Janukoviqit u përpoq që ta mbante Ukrainën në orbitën e vet.

Dhe si masë ndëshkuese ndaj forcave proevropiane ukrainase që e rrëzuan Janukoviqin, Rusia e aneksoi Krimenë.

Duke ua rritur apetitet turmave rusishtfolëse në lindje të Ukrainës…

Mirëpo, në anën tjetër, pasojat afatgjata për Rusinë do të jenë të ndjeshme.

Perëndimi tashti është gjetur para një akti të kryer dhe duhet ta rimendojë kundërveprimin.

Leksioni i Krimesë dhe i rajoneve të tjera ukrainase të “zaptuara” nga forcat proruse duhet të vlejë si thirrje zgjimi për NATO-n dhe BE-në, sepse neglizhimi i rajoneve të ish-Lindjes komuniste i bën ato pre të lehta për hegjemonizmin rus.

Por derisa veriu kosovar nga një konflikt i ngrirë u kthye në një konflikt demokratik, Krimeja nga një konflikt demokratik u kthye në një konflikt të ngrirë…

Prandaj veriu kosovar është në rrugë të duhur që të marrë zgjidhje demokratike.

Dhe kjo fushatë serbe kundër Kosovës nuk bëhet gjithnjë vetëm për përdorim të brendshëm, ngase Serbia më 2017 e voton presidentin, porse ishte edhe një test i qëndrueshmërisë së aleatëve në mbrojtje të Kosovës, përkatësisht testim i administratës së re të presidentit Trump.

Mirëpo deklarata pa hezitim e sekretarit amerikan të Mbrojtjes, Jamess Mattis, për formimin e ushtrisë së Kosovës parandaloi vazhdimin e fushatës anti-Kosovë.

Sidoqoftë, testi rus për destabilizimin e Ballkanit, pas sprovës në Shkup e Podgoricë, simbolikisht u ndal së bashku me trenin që mësyu Kosovën, e që në media po cilësohej si “treni rus” (donacion i Moskës për Serbinë), i cili u kthye rikverc!!?

Porse Serbia po e shfrytëzon dendur njëfarë heshtjeje të Brukselit që sikur e sqaron frikën e BE-së përballë Rusisë, që është rikthyer fuqishëm në skenën evropiane, duke e instrumentalizuar Serbinë për ta përdorur si shantazhuese të BE-së.

Gjermania nuk ia del dot e vetme t’i bëhet mburojë kësaj BE-je fragjile e kaotike, e presidenti Trump e sheh me xhelozi forcimin ekonomik të saj.
Në anën tjetër, Kosova nuk ka strategji kombëtare për t’u mbrojtur ligjërisht nga Serbia, ndërkohë që vendet e rajonit me pak demokraci dhe me pak bukë e kanë nisur garën e çmendur në armatim!?

Presidenti i vendit, si komandant suprem i Forcës së Sigurisë të Kosovës, në vend se të angazhohej për protagonizëm, si kundërpeshë duhet ta dekretojë FSK-në, për të marrë detyrën e mbrojtjes së kufijve kushtetues të vendit.

Njëjtë siç shteti izraelit themeloi ushtrinë pa emër buçitës, por ngjashëm me emërtimin aktual të trupës mbrojtëse kosovare, IDF, (forca mbrojtëse izraelite) që është themeluar me një dekret të presidentit të parë të izraelit, Ben Gurion.

Nga Flori Bruqi : Qeni-qenin , se han!!!

Përfaqësuesja e Lartë e Bashkimit Evropian, Federica Mogherini,kërkon nga Gjorge  Ivanov që t’ia japë mandatin shumicës

Përfaqësuesja e Lartë e Bashkimit Evropian, Federica Mogherini, ka kërkuar nga presidenti i Maqedonisë, Gjorge Ivanov, që të reflektojë pas vendimit për mos dhënien e mandatit për krijimin e qeverisë, Zoran Zaevit.

Pas takimeve me liderët Mogherini ka konfirmuar edhe njëherë mbështetjen e BE-së për Maqedoninë dhe ka shtuar se pret që të ketë reflektime pas takimeve që ka pasur sot.

“Kam pasur takime me liderët dhe takim shumë të gjatë me presidentin Ivanon dhe për këtë arsye u vonova”, tha në fillim të fjalimit të saj, përfaqësuesja e lartë e BE-së, Frederika Mogerini.

Ajo tha se është e rëndësishme që çdonjëri të respektojë shumicën parlamentare, pasi kjo është në pajtueshmëri me vlerat demokratike dhe të NATO.

“Kërkoj nga presidenti të rishqyrtojë vendimin në interes të qytetarëve dhe në pajtueshmëri me kushtetutën e vendit dhe t’i japë mandatin partisë që ka siguruar shumicën parlamentare”, theksoi Mogerini gjatë fjalimit të saj.

Rusia: Ndërhyrja në Maqedoni dëshmi e Tiranës për projektin e “Shqipërisë së Madhe”

Rusia ka akuzuar Shqipërinë, NATO-n dhe Bashkimin Evropian se po përpiqen të imponojnë qeveri pro-shqiptare në Maqedoni.

Një ditë më herët presidenti maqedonas Gjorge Ivanov refuzoi t’i jepte mandatit LSDM-së dhe koalicionit me partitë shqiptare për të krijuar qeverinë në Maqedoni, “për shkak se kjo platformë përfshin edhe përdorimin më të gjerë të gjuhës shqipe”.

Lëvizja e Ivanovit është kritikuar ashpër nga Bashkimi Evropian, ndërsa Rusia ka dalë në mbrojtje të vendimit të presidentit maqedonas.

“Me bashkëveprim me Bashkimin Evropian dhe zyrtarët e NATO-s, një ‘platformë shqiptare’ e krijuar në Tiranë, në zyrën e kryeministrit shqiptar, po imponohet në Maqedoni”, thuhet në njoftimin e Ministrisë së Jashtme të Rusisë, raporton Reuters, transmeton Koha.net.

Rusia thotë se një lëvizje e tillë është dëshmi për pretendimet e Shqipërisë për zgjerim në rajon si pjesë e projektit të quajtur “Shqipëria e Madhe”.

Në letrën e Moskës akuzohet edhe Kosova për përfshirje në Maqedoni dhe thotë se Perëndimi dëshiron që humbësit të marrin fuqinë e udhëheqjes.

“Është e domosdoshme që të ndalen intervenimet e jashtme në punët e brendshme të Maqedonisë”, thuhet në njoftim.

                        Qeni-qenin ,  se han!

Aq e vështirë ka qenë për t’u pranuar nga Nikola Gruevski, ideja e një qeverie koalicioni mes LSDM-së në opozitë dhe partive shqiptare, sa e ka shtyrë udhëheqësin e VMRO-DPMNE-së t’i shtrijë dorën e bashkëpunimit armikut të vet të madh.

Agjencia maqedonase e lajmeve “MIA” raporton se Gruevski është ofruar ta mbështesë Zoran Zaevin për një qeveri të pakicës, nëse ai heq dorë nga kërkesat e platformës së Tiranës, për të cilat pretendon se do ta transformojnë tërësisht Maqedoninë dhe do të çojnë drejt ndarjes së vendit në linja etnike.

Mesazhi i Gruevskit për Zaevin është se do të marrë 51 votat e VMRO-së për implementimin e programit të tij politik, e madje po të dojë mund edhe ta burgosë, nëse zotohet të mos prekë themelet e shtetit.

“Ne jemi të përgatitur të mbështesim LSDM-në në pushtet, si parti pakice, po rrëzoi ligjin e gjuhës, platformën e Tiranës dhe propozimin për të ripërvijuar e degraduar Maqedoninë. Nëse Zaevi këmbëngul kaq shumë që të jetë shef i ekzekutivit, atëherë do ta lëmë të zbatojë programin e tij, për sa kohë nuk sulmon shtetin dhe interesat kombëtare. Mund të na godasë neve po deshi, por jo shtetin. Do të dal vullnetar, nëse kjo do të jetë dëshira e tij, që të arrestohem, burgosem, sulmohem dhe VMRO-ja sërish do ta mbështesë qeverinë e tij. Le të më sulmojë mua, por jo themelet e shtetit, dhe këtë mund ta konsiderojë si një ofertë të hapur nga ana ime”, deklaroi Gruevski në një intervistë për televizionin “TV Sitel”.

LSDM-ja arriti javën e kaluar një kompromis me BDI-në dhe partitë e tjera shqiptare për ngritjen e shqipes në statusin e gjuhës zyrtare në të gjithë Maqedoninë, diçka që shkon përtej marrëveshjes së Ohrit të vitit 2001.

Në këmbim, Zaev mori prej tyre premtimin e 61 firmave që i nevojiten për të marrë mandatin e krijimit të qeverisë, megjithatë Ali Ahmeti ende po mendohet nëse do të bashkohet në koalicion me LSDM-në, apo thjesht do ta mbështesë si qeveri pakice. VMRO-ja ka 51 vende në Parlament dhe nëse Zaev e pranon propozimin e saj, atëherë do të ketë 100 votat e nevojshme për të formuar ekzekutivin e ri.

                 Zoran Zaev me 67 mandate, 
                 refuzon  Nikola Gruevskin

Prej orës 14, afat kur ishte parashikuar dorëzimi te presidenti George Ivanov i argumenteve për sigurimin e shumicës parlamentare për formimin e qeverisë, udhëheqësi i LSDM-së, Zoran Zaev gjendet në zyrën e kreut të shtetit, i cili gjithsesi pritet ta marrë vendimin në ditët e ardhshme.

Nga burime të MIA-s brenda kabinetit të presidentit Ivanov, mësohet se Zaev ishte nisur t’i parashtronte kreut të shtetit nënshkrimet e 67 deputetëve nga LSDM-ja, BDI-ja, Besa dhe Aleanca e Shqiptarëve, një sinjal ky që nënkupton se udhëheqësi i LSDM-së nuk e ka pranuar “shtrirjen e dorës” nga ana e Gruevskit për të formuar një koalicion të madh, vetëm e vetëm për të kundërshtuar kërkesat e shqiptarëve.

Pas konsultave me krerët e partive politike parlamentare në Maqedoni më 1 shkurt, Ivanov kishte deklaruar se do t’i jepte mandat për formimin e qeverisë, partisë apo koalicionit që do t’i vërtetonte krijimin e shumicës në Kuvend.

Lideri i LSDM-së, Zoran Zaev, pas takimit me shefen e diplomacisë evropiane, Federica Mogherini, theksoi se është i lumtur që pas kësaj vizite BE-ja po mbetet edhe më tej e përkushtuar në ardhmërinë e Maqedonisë deri në anëtarësimin e plotë në NATO dhe Bashkimin Evropian.

Zaev theksoi se 67 mandate janë kusht demokratik normal për të marrë mandatin për formimin qeverisë.

“Prej këtu janë edhe pritjet e BE-së, se qeveria e re në rast se jep rezultate në përmbushjen e reformave, atëherë BE-ja përmes institucioneve të saja do të ketë një arsye shtesë që të angazhohet në përshpejtimin e procesit për fillimin e negociatave të Maqedonisë, për anëtarësim të plotë në strukturat euro-atlantike. Shpresoj se Ivanovi do ta rishqyrtojë vendimin e tij dhe vërtetë do t’i respektojë proceset demokratike. Proceset demokratike, përmes zgjedhjeve definojnë numrin e mandateve. Për momentin 67 mandate, nënkuptojnë 700 mijë vota dhe këtë nuk mund ta anashkaloni”, tha Zaevi,


Gjorge Ivanov nuk i jep mandatin  Zoran Zaevit, shkas platforma shqiptare

Presidenti i Maqedonisë, Gjorge Ivanov ka refuzuar të mandatojë për kryeministër, liderin e Lidhjes Social-Demokrate, Zoran Zaev.

Në një paraqitje të jashtëzakonshme, Presidenti Ivanov tha sa se shkas për këtë vendim është platforma e partive politike e arritur sipas tij në “shtetin fqinj”, me të cilën sipas tij rrënohet karakteri unitar të shtetit të Maqedonisë.

“Deri sa të jem President i Maqedonisë nuk do të mandatoj askënd që pranon platforma të shteteve fqinje që rrënojnë sovranitetin e shtetit”, ka deklaruar Ivanov duke drejtuar akuza të rënda ndaj liderit social-demokrat për shkelje të Kushtetutës dhe tradhti të interesave kombëtare.

Ivanov tha se nuk pret reagim nga bashkësia ndërkombëtare për mos dhënien ashtu siç ndërkombëtarët nuk reaguam për platformës shqiptare, të hartuar sipas tij në një shtet fqinj, duke aluduar në Tiranë.


Reagon Ali Ahmeti: Deklarata e partive shqiptare nuk cenon shtetin e Maqedonisë

Lideri i BDI-së, Ali Ahmeti, ka reaguar pas vendimit të presidentit të Maqedonisë, Gjorge Ivanov, për të mos i dhënë mandatin për krijimin e qeverisë liderit të LSDM-së, Zoran Zaev.

Ahmeti ka thënë se deklarata e përbashkët e partive shqiptare, pas zgjedhjeve të 11 dhjetorit, nuk ishte cenim për shtetin maqedonas e as nuk ishte bërë për ndarje ndëretnike.

Sipas Ahmetit, partitë shqiptare nuk janë fajtore për krizën e shkaktuar në Maqedoni dhe ka kërkuar nga të gjithë shqiptarët që të ruajnë gjakftohtësinë.

Ky është postimi i Ali Ahmetit në Facebook:

Qysh para zgjedhjeve të vitit të kaluar, ftova partitë opozitare shqiptare që të bashkohën në mënyrë që mos të humbasin shqiptarët nga percarja e madhe e votave. Kjo nuk ndodhi dhe shqiptarët humbën 9 mandate deputetësh në Kuvendin e Maqedonisë. Më pas, si fitues i zgjedhjeve dhe drejtues i partisë më të madhe shqiptare, kam ftuar partitë parlamentare shqiptare në takim të përbashkët në Shkup për të bashkërenduar agjendën tonë për rrumbullakësim të Marrëveshjes së Ohrit dhe arritjen e barazisë.

Në këtë takim në Shkup, harmonizuam qëndrimet rreth pritshmëritë e shqiptarëve dhe e këtë e kam thënë në çdo prononcim timin publik që Deklarata e përbashkët e partive parlamentare shqiptare të Maqedonisë është dakorduar dhe shkruar në Shkup dhe për bazë ka programet zgjedhore të të gjithë garuesve shqiptar në zgjedhjet e 11 dhjetorit 2016.

Kjo deklaratë në asnjë mënyrë a po formë nuk cenon shtetin, karakterin unitar e as që bën fjalë për federalizim a po ndarje.

Partitë shqiptare nuk ishin shkas për krizën sistemore në vend dhe duke patur këtë parasysh, ftoj partitë politike shqiptare që të përmbahen nga të shëndëruarit të krizës sistemore dhe brendaetnike në një përplasje ndëretnike midis dy komuniteteve shumicë të këtij vendi.

Gjithashtu, ftoj partitë politike maqedonase që të përmbahen në shprehjen e pakënaqësisë së tyre nga implikimi i elementit ndëretnik për arsye të ndjeshmërisë së shoqërisë sonë.

Juve të nderuar qytetar, ju ftoj që të ruani gjakëftohtësinë dhe mos të lejojmë që asnjëri nga ne të bie pre e skenareve dashakeqe që kanë origjinë adresa të dyshimta për ne.

Ky është një problem politik dhe partitë politike si dhe institucionet e vendit do të gjejnë zgjidhjen më të mirë për qytetarët, por në ndërmjet kohë, ta besojmë bashkarisht të vërtetën e jo trillimin.

Liderët e tri partive të shqiptarëve deklarohen pas takimit me Federica Moghernin

Vizita e Mogerinit tregon se Maqedonia nuk është e vetmuar, në këtë krizë të thellë të cilët na futën partitë politike prej qeverisjes VMRO-BDI, për periudhën 8 vjeçare të mbështetur mbi krimin, korrupsionin, kapjen e institucioneve etj.

Kështu ka shprehur bindjen Bilall Kasami i Lëvizjes Besa.

“Ne vlerësojmë lartë përkrahjen e BE-së dhe besojmë se Maqedonia nuk është e vetme në këtë proces”, tha tutje Kasami.

Zijadin Sela tha se deklarata e përbashkët e partive shqiptare është deklarata e arritjes në këto 25 vjet demokraci në Maqedoni.

“Ne duhet të jemi kujdestarë për të cilët ky shtet i mban peng të drejtat e shqiptarëve në Maqedoni. Të drejtat e deklaratës janë ato të drejta që ne duhet t’i mbrojmë. Ivanovi me veprimin e tij tregoi se nuk është gjë tjetër veçse vegël e Gruevskit. Bashkimi Evropian në esencë është multigjuhësor dhe multikulturor, prandaj nuk mund që askush të na pengojë të drejtën e gjuhës. Vetëm nëpërmjet gjuhës kemi mësuar shumë gjera, nga historia, gjeografia dhe çdo gjë qe na rrethon, prandaj e drejta e gjuhës është një e drejtë universale qe i takon çdo qytetari të lirë. Prandaj çdo qytetare mbrohet vetëm me gjuhen e tij. Prandaj duhet një shtet me të drejta për të gjithë dhe ky shtet po ashtu duhet t’i garantojë te drejta për çdo qytetar dhe kështu për çdo shqiptar në RM”, tha Sela.

Ndërsa kryetari i PDSH-së, Menduh Thaçi, tha se qëndrimi skandaloz i Ivanovit vetëm se i vërtetoi tezat, platformën dhe programin e PDSH-së gjatë zgjedhjeve.

“Ai na përkujtoi se ne shqiptarët duhet të kërkojmë ndryshimin e Kushtetutës së RM-së që t’u mundësohet shqiptarëve të jenë të barabartë me maqedonasit. Gjatë takimit shprehëm shqetësimin e madh se ky konflikt politikë shumë shpejt po dhëndërohet në konflikt etnik. U apeloj shqiptarëve që të mos bien pre e këtyre provokimeve”, tha Thaçi, kryetar i PDSH-së.

Kush qëndron pas arrestimit dhe izolimit të Haradinajt në Francë?

“Policia franceze ka arrestuar kryetarin e Aleancës për Ardhmërinë e Kosovës, Ramush Haradinaj në Bazel të Zvicrës. Ai nuk u arrestua nga policia zvicerane, por nga ajo franceze, në gjysmën e aeroportit që i takon atyre. Ai është arrestuar në bazë të një urdhër arresti lokal të lëshuar nga Serbia..”, ishte ky lajmi më i keq për Kosovën që u plasua në këtë vit. Kjo ndodhi në kohën kur lideri Ramush Haradinaj kishte marrë ftesën për pjesëmarrjen në ceremoniën e inagurimit të presidentit të SHBA-ve Donald Trump.

Mbajtja për afro dy muaj e Ramush Haradinajt në Francë, ishte tallje me standardet e drejtësisë ndërkombëtare dhe shkelje flagrante e të drejtave të një individi.

Duhet theksuar se gjatë këtyre dy muajve të izolimit të Haradinajt në Francë, shqiptarët e zhgënjyer me arrestimin dhe izolimin e tij, organizuan rreth 100 protesta në Kosovë, Shqipëri, Maqedoni dhe perëndim ku u kërkua njëzërit kthimi i tij në Kosovë. Njëkohësisht, gjatë këtyre dy muajve të fundit, pati mbi 200 deklarata të personaliteteve vendore dhe ndërkombëtare për lirmin e tij.

Jo vetëm kaq, për ish-kryeministrin e Kosovës, pati reagime edhe nga institucionet ndërkombëtare në botë, si në Bruksel, Gjenevë, Hagë, Uashington dhe KS të OKB-së New York.

Gjykata ndërkombëtare e Hagës për Haradinajn

Po bëhen pothuajse dy muaj që nga arrestimi i kreut të Aleancës për Ardhmërinë e Kosovës, Ramush Haradinaj, në Francë si pasojë e një fletarresti të bërë nga Serbia. Deri tash pos disa deklaratave “n’hava” me këtë rast nuk është marrë apo protestuar nga askush seriozisht nga shteti, të cilit i takon Haradinaj, përveç partisë së tij, OVL dhe popullatës shqiptare brenda dhe jashtë Kosovës. Themi kështu, sepse autoritetet franceze kanë deklaruar se deri tash nuk kanë marrë ndonjë kërkesë zyrtare nga Prishtina për lirimin e tij.

“Haradinaj më parë në Hagë se në Serbi. Serbia pret prej autoriteteve franceze që Ramush Haradinaj të ekstradohet në Serbi”, thotë për Deutsche Wellen, prokurori i gjykatës serbe për krime lufte, Milan Petrovic.

Protesta në mbështetje të Haradinajt

Mediat e Kosovës dhe ato serbe kanë shkruar se “Haradinaj paska dy zgjidhje: Beogradin ose Hagën”. Sa i përket kësaj të fundit “Presheva Jonë” ka siguruar nga dy gjykatat ndërkombëtare (ICTY dhe Specialja për Kosovën) se Ramush Haradinaj nuk ka lidhje me to dhe se ai vendin nuk e ka në Hagë, por në Kosovë.

“Haradinaj u ndalua në Francë për akuzat që Haga e shpalli të pafajshëm”, ka thënë avokati i liderit të AAK-së, Ramush Haradinaj i cili është shumë i brengosur për ndalimin e Haradinaj në Francë.

Liliana Pitesa, zyrtare në kabinetin e kryeprokurorit të ICTY në Hagë ka deklaruar se “Haga e ka kryer punën me ish-kryeministrin e Kosovës Ramush Haradinaj. Ai është i lirë. Për këtë ai ka dëshmuar dy herë në Hagë. Fundja ashtu-kështu për Haradinaj s’ka vend ne Hagë, sepse kjo gjykatë e ka vetëm emrin dhe hijen”.

Ngjashëm ka deklaruar sot edhe Avis Benes nga Gjykata Speciale për Kosovën.

“Tribunali special nuk ka lidhje me arrestimin e Ramush Haradinajt në Francë, ndryshe ai do të arrestohej në Kosovë dhe jo atje. Prandaj, kjo aferë s’ka asgjë të bëjë me Specialen”, ka pohuar Benes, zëdhënëse e Gjykatës Speciale për Kosovën në Hagë.

Ish-kryeprokurorja e Tribunalit të Hagës e cila u gjend në krye të TPI-së për krime në ish-Jugosllavinë për gati një decenie rresht, pas disa vitesh paraqitet sërish në një intervistë të, ku flet për rolin e ICTY, e cila sivjet mbyll dyert e veta në Hagë. Ajo ka folur edhe për arrestimin dhe izolimin e ish-kryeministrit të Kosovës Ramush Haradinajt në Francë, sipas së cilës, ai një gjë të tillë nuk e meriton.

Kush qëndron pas arrestimit dhe izolimit të Haradinajt në Francë?

Se çfarë mendon për arrestimin dhe izolimin e liderit të AAK-së Ramush Haradinaj në Francë, znj. Carla Del Ponte në këtë bisedë është përgjigjur se “ish-kryeministri Haradinaj mendoj se nuk e meriton të maltretohet në Francë, i cili dy herë ka hyrë dhe ka dalur i pastër nga dyert e Hagës. Më duket e pakuptueshme arrestimi dhe mbajtja e tij në Francë nga autoritetet e atjeshme, sipas një fletearresti nga Serbia. Se çfarë është duke u zier pas kësaj, nuk di çfarë t’ju them, se a është fjala për akuza të mëparshme për të cilat ai është përgjigjur dy herë, apo për ndonjë akuzë te fundit. Sa i përket kësaj të fundit, duket se që kur Haradinaj doli i lirë për të dytën herë nga Haga deri tash në rajon me sa di unë s’ka pasur luftë?!..Veç n ‘paq shku ai n ‘Serbi me pas ba diçka të zezë, që ne nuk e dimë. Nëse dikush shpreh dilema se Haradinaj do të dërgohet në Beograd apo Hagë, për këtë të fundit unë po ju heq, se Haga s ka çfarë të bëjë më me të. Ashtu-kështu, Haga edhe pak muaj e mbyll dyert e veta. Çka po ndodhë vërtetë me Ramush Haradinaj mund të dijë vetëm Beogradi, Parisi apo edhe Prishtina, nëse nuk është far biznesi apo lojë politike”, ka thënë Del Ponte.

Atëherë nëse s’paska të bëjë rasti i Haradinajt me Hagën, pse u arrestua dhe mbahet i izoluar në Francë?

Kësaj pyetje dy zyrtarët e Hagës i janë përgjigjur se “ish-kryeministri i Kosovës s’e ka vendin tek ne. Beogradi-Parisi-Prishtina mund ta dinë pse mbahet Haradinaj në Francë.”

Kronologji për Ramush Haradinajn në Francë

-4 Janar 2017: Arrestohet në Francë Ramush Haradinaj

-5 janar 2017: Ramush Haradinaj del para Gjykatës në Francë

-7 janar 2017: Protesta e parë në Francë për lirimin e Ramush Haradinajt

-12 janar 2017: Francë, lirohet me kusht Ramush Haradinaj

-09 Shkurt 2017: Ramush Haradinaj del para gjykatës në Colmare, Francë

-10 Shkurt 2017: Franca shtyn vendimin për kreun e AAK-së Ramush Haradinaj

-12 Shkur 2017:Ramush  Haradinaj del para Gjykatës në Francë

-14 Janar 2017: Huliganët serbë përdhosin bustin e Skënderbeut në Gjenevë dhe sulmojnë Ramush  Haradinajn

-14 Janar 2017: -Protesta për Ramush Haradinaj në Gjenevë, bashkon shqiptarët e diasporës

Shkruan Flori Bruqi : Vendimi i Gjykatës në Francë për gjeneralin shqiptar Ramush Haradinajn , është abuzim me drejtësinë ndërkombëtare

Sot kryetari i Aleancës për Ardhmërinë e Kosovës dhe ish-kryeministri Ramush Haradinaj do të dalë para gjykatës franceze në Colmar.

Në këtë seancë pritet të merret vendimi për lirimin apo ekstradimin e tij në Serbi.

E për ta përcjellë seancën e sotme, shumë shqiptarë janë mbledhur para dyerve të gjykatës të cilët po presin lajme të mira për liderin Haradinaj.

Sipas fotoreporterit të Indeksonline, Blerim Uka, në Colmar sikurse edhe gjatë dy seancave të kaluara gjyqësore, nuk po mungojnë as personalitete nga Kosova që kanë shkuar enkas për Haradinajn.

Aty janë parë kryetari i Mitrovicës, Agim Bahtiri, dhe karateisti Enver Idrizi.

Lideri i Aleancës për Ardhmërinë e Kosovës (AAK), është ndaluar nga policia franceze më 4 janar, në bazë të një urdhër arresti të lëshuar nga Serbia përmes Interpolit në vitin 2004.

Gjykata franceze, në seancën e mbajtur më 9 shkurt, nuk vendosi përfundimisht për këtë rast, duke e lënë Haradinajn nën masën e lirimit me kusht dhe duke e shtyrë vendimin për datën 2 mars 2017 .

(AP Photo / Jean-Francois Badias)

Ish kryeministri i Kosovës, Ramush Haradinaj, që nga muaji janar i këtij viti, po mbahet në Francë pas një urdhërarresti të Serbisë të proceduar nga Interpoli. Vetë Haradinaj, në vijimësi ka deklaruar, se ai është peng i politikës.

Ndërkaq spektri politik në Kosovë, kryesisht ai opozitarë, ndalimin e  Ramush Haradinajt në Francë për llogari të Serbisë, e ka komentuar si një kërcënim për çështjen e Demarkacionin dhe Asociacionin.

Ndërkaq pozita e ka mohuar një gjë të tillë, ndërkohë që nuk është marrë asnjë masë reciproke ndaj Serbisë, e cila botërisht dihet se ka kryer gjenocid në Kosovë.

Në këto rrethana, Aleanca për Ardhmërinë e Kosovës, pak ditë më parë, mblodhi Këshillin Drejtues në një takim të jashtëzakonshëm, për të diskutuar rreth mbajtjes së liderit të partisë, Ramush Haradinajt në Francë.

Në një konferencë për media pas mbledhjes, nënkryetari i AAK-së, Ardian Gjini, deklaroi se Këshilli Drejtues shpreh shqetësimin e tij për ndaljen apo kidnapimin politik të kryetarit Ramush Haradinaj.

Gjithashtu, ai tha se Këshilli Drejtues i bën thirrje autoriteteve kosovare që të reagojnë lidhur me këtë rast, por jo siç kanë bërë deri më sot.

 Sipas tij, ky proces nuk ka të bëjë me individin por ka të bëjë me Kosovën. “Kryetari i AAK-së zt.Ramush  Haradinaj është ndaluar në Francë pas ndërhyrjes së Serbisë dhe në bashkëpunim me kundërshtarët e Kosovës.

Ish-kryeministri i Kosovës Ramush Haradinaj, 2 mars 2017, Francë"Haradinaj duhet të qëndrojë në Francë nën mbikëqyrje gjyqësore, derisa rasti i tij është duke u studiuar"

Një gjykatë franceze në Colmar ka vonuar vendimin për ekstradimin e mundshëm të ish-kryeministrit të Kosovës Ramush Haradinaj në Serbi, i cili është i ngarkuar për krime lufte.


“Gjykata e Apelit në qytetin verilindor të Colmar , tha të enjten se ka rënë dakord me kërkesën e prokurorit për më shumë informacione. Rasti do të shqyrtohet sërish më 6 prill 2017 ”, shkruan më tej media ndërkombëtare Associated Press.

Sipas një vendimi të mëparshëm, Haradinaj duhet të qëndrojë në Francë nën mbikëqyrje gjyqësore, derisa rasti i tij është duke u studiuar.

AP thotë se qeveria e Serbisë ka kërkuar ekstradimin e Haradinajt, i cili është arrestuar në janar në Francë me urdhër-arrest serb.

“Arrestimi i tij ka shkaktuar zemërim tek ligjvënësit e Kosovës, të cilët e kanë quajtur të skaduar këtë urdhër-arrest dhe kanë kërkuar nga Bashkimi Evropian për të ndërhyrë dhe për të siguruar lirimin e tij. Haradinaj, një luftëtar guerilas në luftën e viteve 1998-1999 e Kosovës për pavarësi nga Serbia, ishte pastruar për krime lufte nga gjykata e Hagës”, përfundon shkrimin Associated Press.

Gjenerali i Ushtrisë Çlirimtare të Kosovës zt. Ramush Haradinaj porosi Aleksandër Vuçiqit dhe Ivica Daçiqit nga Franca: Do t'iu përgjigjemi sikur në vitin 1998

Ish-komandanti i Ushtrisë Çlirimtare të Kosovës, Ramush Haradinaj, pas shtyrjes së vendimit nga Gjykata e Colmar-it iu është drejtuar bashkatdhetarëve atje.

Haradinaj ka thënë se krerët e shtetit serb, Aleksandar Vuçiq, Tomislav Nikoliq dhe Ivica Daçiq, gjithmonë do ta kenë përgjigjen e njëjtë nga shqiptarët, atë të vitit 1998.

“Unë veç i kam bërë dy muaj këtu, e po dua të ju them që edhe pse është një situatë jo e mirë jam ndi shumë i përkrahur, shumë i nderuar prej popullit, prej bashkatdhetarëve. Ne e kemi dhënë një betim si shqiptarë, e Vuçiqit, Nikoliqit e Daçiqit atë përgjigje që ua kemi dhënë në '98-n atë kanë me marrë gjithë prej shqiptarëve. Kanë me u mësua të gjithë me jetua me shqiptarët e me të drejtën e shqiptarëve sepse jemi në të drejtën tonë”, është shprehur Haradinaj.

Ai më tej ka treguar se kur do të mbahet seanca e radhës dhe kur do të merret vendimi.

“Gjykata vendosi që të kërkoj më shumë shpjegime në disa pika prej Serbisë. Ky vendim po tregon se është lojë politike. Ia kemi jep shansin ligjit, por për fat të keq politika i ka futur duart thellë në këtë temë. Unë do të mbetem këtu deri më 6 prill, ashtu po thonë, pasi deri më 31 mars i kanë dhënë kohë Serbisë që t’i dërgoj ato shpjegime. Ndërsa më 6 prill ballafaqohemi edhe një herë me prova e me fakte, e tek pastaj vendimi kah gjysma e prillit”, ka deklaruar Haradinaj.

Aleanca për Ardhmërinë e Kosovës ka reaguar pas vendimit për shtyrjen e seancës përfundimtare për Ramush Haradinaj edhe për një muaj.

Vendimi i Gjykatës në Francë  është abuzim me drejtësinë ndërkombëtare 

“Vendimi është i palogjikshëm, dhe krejtësisht i pakuptueshëm. Është e habitshmë se si autoritetet gjyqësore të Francës, janë vënë në shërbim të ish bashkëpunëtorëve të Millosheviqit, të cilët përmes Haradinajt po e provokojnë rëndë stabilitetin dhe paqen në Kosovë”.

AAK ka shrpehur dyshime se shtyrja e vendimit për lirimin e Haradinajt, është përpjekje e drejtpërdrejtë për menjanimin politik të tij.

“Ne jemi të bindur se Haradinaj do të lirohet, sepse të ashtuquajturat dëshmi të Serbisë kundër tij, janë trillime dhe shpifje ordinere, por autoritetet franceze duhet ta kuptojnë se drejtësia e vonuar është padrejtësi, dhe ato po e vonojnë drejtësinë në rastin Haradinaj”.

Gjykata e Colmarit në Francë ka marrë vendim që seanca ndaj ish-kryeministrit kosovar, Ramush Haradinaj të shtyhet për datën 6 prill.

Haradinaj është ndaluar nga autoritetet franceze më 4 janar, bazuar në një fletë-arrest të lëshuar nga Serbia përmes Interpolit.

Ish-kryeministri i Kosovës dhe komandanti i Zonës së Dukagjinit, akuzohet nga Serbia për krime lufte, që nisur nga këto akuza, Prokuroria Speciale e Serbisë, pati paraqitur dhe kërkesën për ekstradimin e Haradinajt në Serbi.

Lahi Brahimaj

Deputeti i Aleancës për Ardhmërinë e Kosovës, Lahi Brahimaj, ka thënë se shteti shqiptar ka treguar më shumë interes për lirimin e Ramush Haradinajt se institucionet e Kosovës.

Ai ka deklaruar se pret që Haradinaj të lirohet, ndërsa ka theksuar se për bindjen e tij Ramush Haradinaj është pengesë për kthimin e Serbisë në Kosovë në forma të ndryshme, ndaj edhe po përballet me procese të këtilla.

“Besoj që Ramush Haradinaj do të lirohet, sepse është i pafajshëm. Në bazë të informatave që kemi marrë, Serbia nuk ka sjellë ndonjë material shtesë, përpos atyre që tashmë kanë kaluar në Tribunalin e Hagës”.

“Dihen deklaratat e Aleksandar Vuciq për Ramush Haradinajn. Ai është pengesa kryesore për Serbinë. Haradinaj nuk është njeri i rastësishëm, në të kaluarën dhe në të tashmen. Serbia po do të kthehet në Kosovë në forma të ndryshe dhe si dikur, edhe tash, Ramushi po del pengesë kryesore për planet e tij”.

“Reagimi i shtetit të Kosovës në këtë rast ka qenë i ngathtë, i ngadalshëm dhe joinsistues. Ministri i Jashtëm dhe Kryeministri do të duhej të thirrnin mbledhje urgjente, menjëherë pas arrestimit të Ramush Haradinajt”.

“Nuk kemi parë interesim të shtetit për heqjen e emrave të kosovarëve nga lista e Serbisë pranë Interpolit. Ka pasur pastrim selektiv të emrave, pasi janë hequr 137, ndërsa kanë mbetur 20. Janë hequr liderët kryesorë të vendit, ndërsa ka mbetur vetëm Ramush Haradinaj”, ka thënë për Info Magazine ai.

“Zyrtarët e shtetit shqiptar kanë qenë më të angazhuar për rastin e Ramush Haradinajt se ata të Kosovës. Këtu nuk kam parë vullnet nga qeveritarët për t’u marrë me këtë cështje”.

Kryetari i Nismës për Kosovën Fatmir Limaj : Rasti i Ramush Haradinajt të shpallet çështje e interesit të lartë shtetëror!

Nisma për Kosovën me shqetësim të madh pranoi lajmin për shtyrjen e vendimit për lirimin e Ramush Haradninajt deri në muajin prill të këtij viti nga gjykata e Colmarit.

Sidomos shqetëson fakti se kjo shtyrje është bërë siç thuhet për t’i dhënë kohë Serbisë që të sjellë gjoja ende “prova” kundër Ramush Haradinajt.

Gjenerali i luftës-Heroi i paqës: Fatmir Limaj 

Zhvillimet e ditës së sotme në rastin e Ramush Haradinajt dëshmuan se shteti i Serbisë i ka angazhuar të gjitha mekanizmat shtetëror në funksion të arritjes së qëllimit të tyre, që gjykata të besojë në shpifjet e tyre. Prandaj, para shtetit të Kosovës, si detyrë mbi të gjitha detyrat, shtrohet nevoja e angazhimit të të gjitha potencialeve shtetërore për t’i dalë përballë kësaj tendence të Serbisë.

Nisma për Kosovën, kërkon që shteti i Kosovës rastin Haradinaj menjëherë ta shpallë çështje të interesit të lartë shtetëror dhe konform kësaj të ndërmerr veprimet e nevojshme.

Në kuadër të angazhimeve shtetërore, duhet të përfshihen të gjitha institucionet e shtetit, sepse Serbia përmes luftës kundër Ramush Haradinajt ka për synim të godasë Kosovën, prandaj Kosova nuk guxon më ta lërë Ramushin vet në këtë përballje me Serbinë.

Në kuadër të kësaj, Nisma kërkon që Parlamenti i Kosovës të ndërpresë mbajtjen e seancave deri në lirimin e Ramush Haradinajt.

Nëse kjo nuk do të ndodhë, Nisma për Kosovën në shenjë proteste, do t’i bojkotojë punimet e Kuvendit të Kosovës. Përjashtim do të bëjë vetëm seanca për demarkacionin sepse këtë çështje e konsiderojmë po ashtu si një nga çështjet e interesit të lartë shtetëror. Prandaj, deputetët e Nismës e kanë për detyrë të shkojnë në Kuvend për t’i shpalosur të gjitha faktet se ky version i demarkacionit është i gabuar, dhe si i tillë i pa pranueshëm prandaj edhe duhet rrëzuar nga deputetët e Kuvendit të Kosovës.

Gjorge Ivanov po nxit luftë ndëretnike në Maqedoni

Në Maqedoni kriza politike po thellohet gjithnjë e më tepër,dhe në këtë lojë fatkeqësisht janë të përfshirë edhe politikanët shqiptarë. Megjithatë sipas njohësve të çështjeve politike në Maqedoni, fillimisht duhet të eliminohen dyshimet për ndonjë tension konflikt ndëretnik ose ndërqytetarë. Ata vlerësojnë, se kriminelët të ciët do të duhej të dilin para drejtësisë janë duke luajtur me zjarrin, vetëm sa për t’i ikur përgjegjësisë.

Njohësi i çështjeve politike Xhelal Neziri ka deklaruar se, gjuha shqipe që nga viti 2002 është gjuhë zyrtare dhe qytetarët shqiptarë kanë të drejtë ta përdorin në komunikimin e tyre me të gjitha institucionet. Ai ka thënë, se me deklaratën e partive shqiptare, që u quajt Platformë, kemi vetëm një zgjerim të përdorimit zyrtarë dhe sanksionim konkret konform Kushtetutës dhe Marrëveshjes së Ohrit. Andaj, Platforma u shfrytëzua si shkak sepse qëllimi i Ivanovit dhe VMRO-DPMNE-së është të pamundësohet formimi i qeverisë së re dhe njëkohësisht të përshkallëzohet situata.

“Në këtë mënyrë do të pamundësohej edhe puna e Prokurorisë Speciale dhe njëkohësisht do të defokusohej vëmendja nga aferat korruptive dhe kriminale të njerëzve të pushtetit gjatë dhjetë viteve të kaluara. Në këtë lojë presidenti është vetëm një marionetë, ndërkohë lojën e tyre e luajnë edhe disa politikanë shqiptarë të Maqedonisë”, ka thënë Neziri.

Njohësi i çështjeve politike në Maqedoni Zudi Xhelili ka thënë, se në Maqedoni kriza politike po thellohet gjithnjë e më tepër ashtu siç pritej. Sipas tij, Presidenti kukull i shërben vetëm një partie, asaj të ish kryeministrit të kriminalizuar Nikolla Gruevskit, pasi disa herë ka sjellë vendime të ngutshme dhe në kundërshtim me Kushtetutën.