Poezi nga Vladimir Avdulla Muça

Vladimir Avdulla Muça  ,ka lindur me  26.2.1948 në Shijak. Shkollën e mesme e kreu në vendlindje. Ka mbaruar shkollën e lartë të oficerëve Tiranë. Ka marrë pjesë në disa kurse trajnimi (Seminare të letrarëve ushtarak). Ka nisur të botojë që në vitin 1969 në shtypin e kohës poezi, e proza-portrete, reportazhe si në shtypin ushtarak, revistën Nëntori.

Ka botuar:



1-Gjeneza Familjes “Muça” biografi

2-Burimet e Jetës poezi

3-Akuarel poezi

4-Yjet endacakë poezi(tanka)

5-Rrezëllime poezi

6-Trashgimtarët (Novela-Tregime)

7-Kaleidoskop studime ese.

8-Ne gjurmen e endrrave (Roman)

9-Ekuinoks (poezi tanka)

10-I humburi

Etj.


Eshtë fitues i disa çmimeve e vlersimeve në kontributet e letrave. Në vitet 1982-1985 vazhdoi part-time në Universitetin Shtetëror të Tiranës. Është nënkryetar i K.SH.A Durrës e bashkëpunëtor në revistat “Obelisk”. “Java”, “Mehr licht”, “Delfini Durrsak”, “Metafora”, “Arti Jonian”, “Luarasi” ,“Tribuna e Kohës”, “Arumunet Albania”, "Meridian" si dhe ne gazetat "Nacional", "Bulevard", "Republika", "Suplementi Pena Shqiptare" dhe "Milosau".

Banon në Durrës ku kryen detyrën e Nënkryetarit të Klubit të Shkrimtarëve dhe Artistëve, Durrës. Lëvron Poezinë prozën e shkurtër (tregimin) Romanin si dhe studime mbi krijimtarinë pas viteve…1990 në letrat shqipe.

NË SPAÇ

Shkëmbinjtë e përskuqur

këtu janë më të ashpër,

Era në mbrëmje

grykave lëpihet më me vrull.

Mbi shkëmbinj degë të thyera,

dhe një fanellë e grisur mbi mur.

Vdekja kaloi sa e sa here

duke mbjellë vrima nga gozhdët e sajë,

Këto vrima në zemër

po nga ato gozhdë janë.

Dhe sytë më mbeten atje,

Si dy gurë të zezë në shkretëtirë,

Si buka mbi gjurin e të uriturit,

Si zëra të thënë nga gjuha erë,

Si fjalë e shkruar nga një dorë e prerë.

KËNGA E MINATORËVE

Në zemër të Mirditës kish miniera,

Me mijëra punëtor në Munellë dhe Reps.

Miniera të thella,të zeza si nata,

Me njerëz që ndërroheshin në çdo shteg.

Të gjithë zbritnin nën dhe,

Një page secili merrte atje.

Punuan,punuan,shumë muaj e vite

Në zjarr të korrikut e të ftohtin dimëror,

Zbritu,ngjitu,gjunjëzohu zvarritu

Të burgosur të zi të në dheun shkëmbor.

Dhe shumë xehe nxorën nga dheu,

E brenë dheun,por dhe ai i breu.

Nuk kishin tjetër gjë,veç duart e forta.

Duart I shndërronin në misërniken bukë,

Në bukën e përditshëm si lutjet e kota,

Trup e duar për vetëm pak bukë

Punuan,punuan s’panë gëzim në sy

se kishte plot që rronin për njëmijë.

Në Ditën e Pritur u mbyllën minierat

Marteli s’këndoi,zi anembanë.

S’na duhet asgjë nga kjo tokë

E sjellim më lire nga Matanë!.

Bëni ç’të doni o gjendje e nxirë,

Ne I lame duart,ju jeni të lire.

Dhe dolën punëtorët nga toka.

Rrugët u mbushën me njerëz të nxirë,

Gricet me thonj baca, nënëlokja,

Minatorë të lirë ecin në mugëtirë.

Asgjë nuk morën veç dy duar,

me to veç bukën patën fituar.

Në ballë të turmës një vajzë e re,

E bukur ishte,kish krenari në ecje,

Dhe siç mbushet qielli me re.

Sytë e sajë qenë mbushur me urrejtje.

Mbante në duar,lartë një pankartë

“Më gjeni punë për tim Atë”

NË PORTIN E HARRUAR

Në portin e peshkimit:shkretëtirë,

Zhurmat e motorëve kanë pushuar.

S’përshëndesin më velat e anijeve të vjetra,

Direkët rijnë heshtur,të menduar,

Një pëlhurë reje tundet

mbi ujërat e shkreta.

Tej horizontit vetëtin pa prerë,

Duket sikur qielli kollet pa pushim,

Kryqëzorët rëndë rëndë,në shi e erë

Diku çojnë sonte tmerrin,robërin.

Shi bie mbi bankinë,

Unë rri buzë sajë si në një hon,

Vështroj valët me dhimbje,me vaj,

Në qenien time gjithçka gjëmon.

Atje mbi dallgë më lind vdekja

Por dhe frika atje mbaron.

Në rrugën e gjatë dhe të vështirë,

Ti det me ushqen me force dhe stuhi

Si ti të jem përplot I mbushur,

I patrembur të jem si Ti.

BJER SHI!

Bjer shi!

Me gishtat e tua

derdh më shumë thinja

mbi flokët e mi:

Mbi trishtimin tim të thellë

derdha shi!

Bjer shi!

Të shoh vreshtat si qëmoti:

Gërshet stërmadh I blertë,

Të shoh të bulojnë ndanë rrugës

qiparisat me trupat e drejtë.

Të shoh mbi to fenerët e makinave

të shpejtojnë në lumenj që herët

e në një ylber tej horizontit

Mbi të le të vrapojnë shoferët.

Bjer shi!

Përkëdheli në agim të lashtat

Me gishtërinjtë e tua vlagë,

Tregoju njerëzve hambarët e mbushur

mbi kalldrëmin e mërzitshëm dhe të gjatë.

Bjerë mbi gjurmët e makinave,

mbi erën e benzinës bjerë,

Në trotuar ku një fëmijë

ka rënë të flenë

Dhe unë o shi!

Dua të bie nga lart si ti,

mbi çdo truall ku më shkeli këmba,

E shpresa të zgjohet

E unë si ty nga skaji në skaj

të jem shtrirë.

DALLGËZA

Tek perëndon lëmshi I zjarrtë

Dhe deti në treso shkumbon në gjëmim,

Në sytë e tu

Pashë veç dallgëza…

Rrënonin

Në molin e shpirtit tim.

AMANETI

Sa jam gjallë më duaj,

Sa të kem frymë nderomë,

Në iksha mos vuaj

Se s’kam për të dëgjuar

Kur të bëj faj qortomë

jo fshehtas!Pa mllef,si në sini

Sa jam gjallë në gaboj dënomë,

Çdo qelizë të më djersijë.

Siç është kjo botë lanet

e pa ngopur me këngë e valle,

Mos kërko jetë tjetër për vete

por bëj sikur s’ikën fare.

SHPIRT I MASHTRUAR

Me syrin tënd më mashtrove keqas

Më vodhe shpirtin

Si qyqja kur vjedh foletë,

Vështro ngahera në syrin tënd

Pikëloti do jem,

Zjarr i vërtetë.

Mere at’pikëloti,

Ate zjarr e dashur,

Tretur në te do jeshë Ti;

Aty është e vërteta e shpirtit,

Jo syri mashtrues,

Me ligësi.

SHTËPIA BUZË TORRËS

Nga sheshkalaja

Buitën mbjellje ndërtimesh,

Hijezuan Torrën martire.

Kur tundet dheu

Muret e shtëpisë sime,

Në përgjërime

Tulaten në të vjetrat fortifikime.

Shtëpia si xhuxhë

Mes shumë katëshve

Që dridhen,

Si fëmija thith jetë

Në gurët e latuar gjigandë.

Familja ime,

Në te s’u tut,

Dhe në lëkundje tëmeti nëndë ballë.

XHELOZI

Këto ditë vere në Currila

Rendim pas vjzave bardhoshe.

Me ne rend dhe dielli

Me xhelozi t’i bëjë brune.

POROSI

Padyshim,të dashurit e mi,

Edhe në se puna

Peshon sa kokrra e grurit,

Themeli ajo do jetë

Në çdo pjesë të murit.

ÇIFTELIA E NDUES

(Në Kujtim të Ndue Shytit)

Sot në turbofolkun e ri

Çiftelia e Ndues qan;

Majat e pishave

Prej agut dridhen.

Gishtat e Bjeshkëve të Namuna

Në humnera thyhen.

Çiftelia e Ndues qan,

Vetem dielli,hëna,ujvarat,

Njëqind çifteliat

Ja shuajnë vain.

Çiftelia e Ndues si vaitojcat

Qan dhimbëshëm,

E shpirti im

Turrshëm bëzan.

KËNDEZI

Në Stanin e Malit me Gropa

Mëngjezet zgjohen

Nga zëri i një këndezi.

Nëqoftëse s’do ish ai

Sa të trishtuara !…

Do zgjoheshin stani,pylli,

E vetë mëngjesi.

MËRZIA E KRONIKËS ZEZË

Sa herë ndjek lajmet më mbyt mërzia

Me kronikë të zezë,si mos më keq;

Krisht i kryqëzuar më vjen përdita,

Mërzinë e shpirtit dot s’ma heq.

Në qepallë më ngrin lot i jetës

Si motit për një ditë të ndritur,

Mbetem në shtratin e lumit të Letës,

Në fundo mbytem i zhuritur.

Vështrimet nxirosen nër glaukoma,

Tjetërsohen në shtypin përralltar;

Murosur mes,fjalësh fërtoma,

Me shpirt të akullt t’acarit polar.

Çdo ditë me lajmet mërzia më ndjek

Me fytyrë makabre të qoftëlargut,

Në ulërima gjaku damarëve rrjedh,

Plandosur shpirti në syrin e pragut.

Me kronikë të zeze si mos më keq

Mërzin nëndëplagëshe kjo botë s’ma heq.

SONANBUL

Buisin lulet e shpirtit tim

Mes ëndrrave zgjuar në mesnatë;

Mbi trup hazdisur kullojnë ndjenjat

Si zogj të trembur në shtrëngatë.

Kurdis mëndjen në ore frike,

Imazhet mblidhen si grumbuj reshë;

Murëve gjumi në vegime

Më zgjon kujtimet me rrebesh.

Sonanbul me sy dashurie,

Dritë si zemra pulson fari;

Jam admiral humbur në vise

Murgosur në shpirt gjuhë meshtari.

Si t’i lergoj këta zogj yjorë

Që më tresin gjumin nëpër yjësitë?…

Kur mike e zemrës më bëhet kurorë

E natën e gjumtë m’a bën dritë.

F A L A S

Çfar s’të premtoi Ai!…

-Udhëtim falas gjer në kufi.

Në një karton refugjati

Janë shkruar çfar të duash:

-Vendi i fjetjes:një barake në periferi

-Vendi punës:semafor i zi;

-Garderoba jote:vendi ku flenë kafkat

E dalin fantazmat

E shoqeve që zëvendësove Ti.

Në çdo rruge

Do vendosësh kurorë gjembash

Me tantella dhimbjesh,

Me qirinj që ende digjen.

Në flakën e tyre

Do ndizet dhe qiriri yt

Kur jë ditë

Falas do e marrësh,

Po nga Ai.

MOZAIKISTI

(Piktorit Nikolet Vasia)

Ai mblidhte gurë

Ngado ku shkonte,

Relike këngësh Orfeu.

Në trastë me bukën i trazonte

Si kujtesë,brumëardhje mëmëdheu.

I latonte me kujdes prindërorë,

Mbillte në to kujtesën;

Zgjohej miti nga gjumi përrallorë

Si floriri nga argjendari mjeshtër.

Si mund të lidheshin gurët ndër vedi

Në një “tastierë”,si tinguj Orfeu?…

E treti mendimi piktor Nikoletin

Gjer në fundjetë kur e mbuloi dheu.

TEK VAU I KECKËS

Të thara degët e shelgut të vjetër,

Me puthje trëndafili derdhur tok,

Kur një ditë gushti sfiduam trillimin

E në lumë u zhytëm atë mot.

Ishim shpirtdalldisur,moshë adoleshente,

Shelgjishtëve bridhnim me sy fantazie

Me shpirt të dëlirët pa gjurmë hipnoze

Apo shikime e puthje ligësije.

Tash e moshuar më kërkove cigarin,

Flutur paketën ta hodha un’ Ty

Shtratit me fiere i vumë zjarrin,

Pesedhjetë vite ndarë u zhdukën me magji.

NË KODËR VILË

Janë disa kujtime

Me krahë të thyera,

Mbetur në degët e pishave

Si stika.

Janë disa tinguj muzike vallëzimi

Në pistën e vjetër

Që tundin në themele ndërtimet.

Me goditje sizmike.

Ndërsa unë sot

Me vallzimin e vitit 1997

Ripërtyp tingujt e një muzike funebre

Me të rejat e botës

Go west

Në ikje.

Kështu pushoj çdo ditë

Në Kodër Vilë;

Duke varur në pishat e prera kujtimet,

Duke parë lotët e rrëshirta të pishave,

Mes prerjëve cfilitëse.

E ënderrimet e mija,

Me qarjet e një fëmije,

Kan mbetur në lisharsin e ndryshkur;

Në dritësirën e semaforit detarë,

Varur në degët e prera

Si kujtime.

Me goditje sizmike.

E PUTHURA E HIDHUR

S’di pse dhëmbët

Mi le në faqen time

Kur më thoje shpesh se më do.

Në shpirt qaje me ngashërime,

Me lot u lave ngado.

S’di pse të thashë:të dua

Kur një gjarpër fërshëlleu ndër ne;

Kur Ti përtypje kohën

Me nofullat e rënda

Të një kali Troje.

NJOH NJË NJERI

Njoh një njeri që të mbyt me fjalë,

Ëndërrat ja njoh dhe gjakun ja di;

Druaj se një ditë do mbetet zgërdallë,

Në shpirt e zemër vetëm puhi.

Rrënimi i heroit kombëtar Gjergj Kastriotit- Skënderbeut është i pandarë nga rrënimi i vetë Shqipërisë.

Nga Flori Bruqi

Rilindja shqiptare, bashkë me pararendësit dhe pasrendësit e saj, e kapi hijen e vdekjes që po i vërtitej kombit.

Robëria e gjatë po pillte filozofinë e robërisë, ngadhënjimi i së cilës do të ishte shumë herë më fatal se robëria vetë.

Shkrimtarët veriorë, Pjeter  Budi(1566-1622), Frang  Bardhi(1606-1643), Pjetër Bogdani(1625-1689), më pas arbëreshët me Jeronim  De Radën(1814-1903) në krye, e fill pas tyre vargu i vetë rilindësve, të herët a të vonë, si Naim Frashëri(1846-1900), Ndre Mjeda(1866-1937), Andon Zako Çajupi(1866-1930), Gjergj Fishta(1871- 1940), e deri te Theofan Stilian Noli (1882-1965), u ranë gjithë kambanave që duhej të zgjonin shqiptarët, për t‘i ngritur kundër robërisë, por sidomos kundër filozofisë së saj.

Për aksionin e saj, dëshpërimisht solemn, Rilindja shqiptare solli në Shqipëri fantazmën e dëbuar, Gjergj Kastriotin-Skendërbeun , të cilin Europa, për fatin tonë, na e ruajti, jo vetëm në sheshet dhe rrugët e pagëzuara me emrin e tij, por edhe në kujtesën e saj.

Mit’hat  bej Frashëri (1880-1949) i cili ishte njëri nga rilindësit që i jetoi të tria kohët, atë të sundimit osman, të Shqipërisë së pavarur dhe fillimin e komunizmit, asgjësuesin e tij.

Koha e republikës së Theofan Stilian Nolit (Fan Nolit) dhe ajo e mbretërisë së Ahmet Zogut(Ahmet Muhtar Zagollit), e para mjaft e shkurtër, e dyta jo aq e gjatë sa ç‘do të duhej, ndonëse në kundërshtim me njëra-tjetrën në shumë gjëra, u bashkuan në një pikë themelore, njëmendësimin e ideve të Rilindjes shqiptare, dhe testamentin e Gjergj Kastriotit -Skendërbeut, thënë ndryshe, nxjerrjen e tyre nga statusi idealist e romantik dhe vënien në themel të institucioneve, të filozofisë, të politikës e të strategjisë shqiptare.

Për fat të keq, koha e pavarësisë ishte e shkurtër për t‘ia lënë vendin periudhës groteske të varfërisë, terrorit dhe izolimit komunist.

Vallë,përse Shqipëria vazhdon të jetë e pafat, përse të tjerët ecin e ajo ngec, bëheshin tani, me të njëjtin pezm fatalist, ndonëse për një tjetër fatkeqësi.

Ato pyetje do të përsëriteshin më pas, atëherë ku s‘do të duhej, pas rënies së komunizmit.

 Ato vazhdojnë të bëhen sot, jo vetëm nga mendjet elitare, por nga shumica e shqiptarëve, gjithkund ku ata ndodhen. Përgjigjet për to janë të ndryshme dhe kjo është e kuptueshme.

Pas dy robërive, aq pranë njëra-tjetrës, vizioni shqiptar i botës mbetet ende i turbullt e kaotik.

Midis përgjigjeve është njëra që gjithmonë e më shpesh përsëritet, në mënyrë ogurzezë: në Shqipëri punët do të shkojnë gjithmonë e më mbrapsht, përderisa në qendër të Tiranës nuk do të hiqet shtatorja e Skënderbeut për t‘u zëvendësuar me atë të Sulltan Muratit të I (1362-1389) .

Ngjan e pabesueshme, por këto fjalë të një rimohuesi nga Shqipëria, hulumtuesit mund t‘i gjejnë jo më larg se tre muaj më parë. Një tjetër rimohues, këtë herë nga Kosova, shkruan, e zezë mbi të bardhë, se "antishqiptari Gjergj Kastrioti Skënderbeu, është protagonist kryesor i historiografisë komuniste, i futur në tekstet e historisë prej komunistëve.

Emrat e rimohuesve  të huaj janë bukur të shumtë si fjala vjen Ahmediu,

Tursuni, Idris Bitlisi,Kemal Pashazade,Oliver Jens Schmitt etj. por ka edhe bukur shumë shqiptarë që e rimohojnë Skendërbeun  janë Hysamedin  Ferraj,Olsi Jazexhi ,Mustafa Nano e disa të tjerë , dhe sa ç‘është e madhe habia për mashtrime të tilla, po aq, në mos më shumë, është habia tjetër se  këta rimohues paskan  përkrahje në rrethet universitare e gjysmëzyrtare në Shqipëri, Kosovë, Maqedoni etj.

 

Këta , e të tjerë si këta, duke abuzuar me lirinë kaotike, shpesh karikatureske shqiptare, guxojnë të hedhin mendimin se regjimi i egër komunist shqiptar, ishte i tillë ngaqë u projektua në bazë të orientimit të rilindësve shqiptarë!

Për të mos u zgjatur me këtë barbari shembujsh, po e mbyllim me fjalët e një tjetër rimohuesi, prapë nga Kosova, që bën paralajmërimin se të kesh qëndrim mohues ndaj Perandorisë Osmane sot është njëlloj si të sulmosh miqtë tanë amerikanë, që çliruan Kosovën!

Ç‘të thuash për këtë nostalgji të ringjallur befas një shekull pas ikjes së osmanëve? Ta quash groteske, tragjike, komike nuk mjafton.

Të thuash se po t‘i përmbahej programit të Rilindjes, Shqipëria jo që s‘do të bëhej kurrë komuniste, por do të ishte prej kohësh një shtet model në Bashkimin Europian, është prapë pak.

 Të thuash se i ashtuquajturi "mit" i Skënderbeut, u ngjiz shekuj më parë kur komunizmi nuk ekzistonte askund, se u sublimua prej Rilindjes dhe pastaj prej kohës së pavarësisë, prej Nolit dhe Zogut, se komunizmi jo vetëm ishte i huaj për të, por në vitet e flirtit me jugosllavët 1946-1947, emri i heroit pothuajse u zhduk nga shtypi shqiptar.

Të vazhdosh me kronikën e asaj që mund të quhet "lufta e shtatoreve", kur më 1968, qeveria shqiptare bëri çmos që pagëzimi i sheshit "Skënderbe" në Paris, bashkë me shtatoren midis, të mos lejohej prej qeverisë franceze dhe bashkisë së Parisit?

Të vazhdosh me ngritjen e shtatores së shefit të komunistëve shqiptarë, njëzet hapa pranë shtatores së heroit, paralajmërimi i hapur, se Kastrioti do të zhvendosej së shpejti dhe sheshi i parë i Shqipërisë do t‘i përkiste këndej e tutje, patronit të ri komunist? (Brenda tre viteve, historia do të jepte një nga mësimet madhështore të saj, kur princi mesjetar do ta shihte rivalin jetëshkurtër të tij t‘i zvarritej mu përpara syve, krejtësisht në stilin e Mesjetës.)

 Shumëkujt mund t‘i duket se të ngresh çështje të tilla, pra të polemizosh me të çmendurit, është kohë e humbur.

Ndërkaq, të çmendurit (që në këtë rast do t‘i përligjnim po të ishin thjesht të tillë), vazhdojnë veprën shkatërruese mu në sytë tanë.

 Në kohën që po shkruhen këto radhë, metropoli shqiptar vlon nga polemika: ta ruajmë apo ta rrëzojmë Skënderbeun!

Vetë shtrimi i çështjes është njollë e zezë për Shqipërinë. Dihet se kush do ta fitojë këtë polemikë, por vetë fakti që ajo ndodhi, që populli shqiptar, një shekull pas osmanllisë, ende guxoi ta lejojë një pyetje të tillë, është një turp për të.

 Nën këtë ndriçim të keq, do të zbulohet ndoshta më qartë ai cen që e ka shtyrë disa herë nga gabimi në gabim.

 Polemika vulgare dhe imorale për rilindësit dhe Skënderbeun është shenja e një sëmundjeje më të thellë, prej së cilës kombi shqiptar, nëse kërkon një të ardhme në këtë botë, duhet të shërohet.

Intelektualët që nismëtuan baltën kundër Skënderbeut dhe Rilindjes nuk janë katundarë me shallvare që i bien daulles e klithin "Dum Babën!".

E ndërkaq, mund të thuhet se janë jo vetëm më të rrezikshëm, por më vulgarë e më pa moral se ata. Duket fyerje, natyrisht, të merresh me ta. Dhe ashtu është. Por kur ujërat e zeza vërshojnë befas, dikush duhet të merret me to.

 Të mësuar të nderojmë personazhe të shquar, artistë, politikanë e gra të bukura, në çastin kur ujërat e zeza shpërthejnë, ne kujtohemi për ata që përveshin mëngët e zbresin të punojnë mes tubave, veglave e territ, atje ku nuk guxon të zbresë kush.

Duke kujtuar se po ia hedhin publikut, intelektualët gjysmakë, ata që ushqehen kryesisht nga "Google", merren me raportet mit-histori, pa kuptuar asgjë prej tyre. Pa e ditur se nocionet mit, histori, mitizim e çmitizim janë shumë më të ndërlikuara se ç‘i di mendja e tyre e ngushtë.

Me nocione të tilla zakonisht, e sidomos me raportet mit-histori, është e lehtë të bëhen spekulime.

 Përpara se të jenë kundërthënëse, ato janë plotësuese, dy vizione të botës, njëri i dendësuar jashtë mase, e tjetri, po ashtu, jashtë mase i faktuar, që mëtojnë të njëjtën gjë: të rrëfejnë botën dhe njerëzimin.

 Seriozë nuk janë provokatorët e këtij diskutimi, por serioz është, ndërkaq, problemi.

Në kohën kur Shqipërisë së sotme, familja e popujve europianë i kërkon zbardhjen e së vërtetës për regjimin e saj të turpshëm, prej të cilit nuk ka as njëzet vite që ka dalë, një aksion thellësisht çoroditës kërkon ta kthejë energjinë dhe vëmendjen gjashtë shekuj pas, në një hulumtim krejtësisht të kotë.

 A ka alibi për këtë çoroditje? A ka vërtet diçka serioze për të qortuar e ndrequr në atë që është quajtur "moti i madh" i shqiptarëve?

 Ajo epokë, si asnjë tjetër, është zbardhur e dëshmuar në mijëra libra e studime, nga Uashingtoni në Tokio, nga Tirana, Venediku e Roma në Londër, Stokholm e Shën Petërburg.

Nga kjo mizëri botimesh e faktesh del një dëshmi përgjithësisht unanime: një luftë për jetë a vdekje e shqiptarëve dhe gjithë ballkanasve kundër Perandorisë Osmane. Një thyerje me pasoja fatale: shkatërrim fizik, kulturor, moral. Për ironi të fatit, populli shqiptar, ai që besoi se po favorizohej, pësoi goditjen më të rëndë. Ajo ishte në logjikën osmane: popullit që iu vu shenjë për t‘u turqizuar, pikërisht ai, në rast kundërshtimi, do të ndëshkohej më rëndë.

 U shestuan, kështu, dy projekte paralele: shkombëtarizimi, që do të ndodhte në truallin shqiptar, shpërngulja masive, gjenocidi i fshehtë, që do të përfundonte në rrafshinat e Anadollit.

Akti i fundit i kësaj shpërnguljeje do të ndodhte në shekullin XX, si rrjedhojë e pakteve të fshehta turko-jugosllave për të zbrazur një pjesë të Kosovës.

 Ajo që më së shumti vërteton jo favorizimin, por diskriminimin shqiptar, është ndalimi i gjuhës së shkruar shqipe dhe ndalimi i shkollave shqiptare. Asnjë gjuhë tjetër dhe asnjë shkollim në Europë nuk kanë pasur një martirizim të tillë: pesë shekuj dënim.

 Për të mos u zgjatur, mjafton një statistikë tmerruese nxjerrë nga "Historia e shqiptarëve", e francezit Serge Metais, botuar në vitin 2006, Paris.

Tabloja e shkollimit është e pabesueshme. Më 1887, në Shqipëri kishte tre mijë shkolla.

Prej të cilave një mijë e dyqind shkolla publike turke, po aq shkolla private greke, treqind shkolla bullgare, serbe dhe vllahe, shkollë shqipe vetëm një, me drejtor Pandeli Sotirin!

Pra, gati çdo gjuhë lejohej të mësohej në "perandorinë tolerante", përveç njërës: gjuhës shqipe!

 Dhe historia s‘mbaron me kaq. Katër vite më pas, Pandeli Sotiri vritet, shkolla shqipe mbyllet!

Kjo është e vërteta, që ende nuk është shpalosur qartë përpara popullit shqiptar. Por rimohuesit nuk e duan këtë të vërtetë.

Në vend të saj, ata duan të vendosin një tjetër histori. Siç u pa më lart, për ata pushtimi, pra, sundimi osman nuk ka qenë i keq.

E keqe dhe kundërproduktive ka qenë qëndresa e Gjergj Kastriotit. Duke e sulmuar Kastriotin, më shumë se njeriun e shpatës, ata sulmojnë vizionarin e madh, princin, që, ndryshe nga të tjerët, e ktheu vështrimin drejt Europës.

 Në këtë mënyrë, bashkë me doktrinën e lirisë, ai nismëtoi programin më europianist shqiptar, më modernin program të këtij populli.

 Është e qartë tani përse rimohuesit shqiptarë janë kundër testamentit të tij. Teza e tyre se sundimi osman s‘ka qenë i keq, e keqe ka qenë qëndresa, mund të përkthehet fare saktë: e mirë për Shqipërinë nuk është Europa, por Azia.

Andej, pra, të kthehemi! Nga ky këndvështrim, mendimi gjenial i Mithat Frashërit kur e përqasi mizorinë haxhiqamiliste me atë bolshevike, e ruan ende të plotë vlerën e vet.

Rrënimi i Skënderbeut, natyrshëm shfaqet këtu si synim i përbashkët i dy armiqve kryesorë të Europës, otomanizmit dhe bolshevizmit.

 Rrënimi i Skënderbeut është i pandarë nga rrënimi i Shqipërisë. Gjergj Kastrioti është vënë kështu në një rrethim të dyfishtë: nëse përbaltet, siç ëndërrojnë rimohuesit, problemi mbyllet thjesht.

 Nëse mbetet në këmbë, siç ka ndodhur e do të ndodhë përsëri, të mbetet i tillë jo si shqiptar, por me tjetër kombësi.

Kjo do të ishte nga njëra anë zbrazja më e madhe e Shqipërisë, e nga ana tjetër mbyllja e një cikli të zi për Kosovën, kur kjo e fundit, provincë e përjetshme serbe dhe djep i Serbisë, siç ëndërrohet prej sllavëve, do ta kishte të natyrshëm, sipas tyre, një kryezot serb.

Schmitt mendon se një emër nuk të jep çelësin për gjuhën e aq më pak për identitetin.

Pas një varg pyetjesh që ngacmonin prej javësh kureshtjen e shqiptarëve, Schmitt, autori i veprës më të re “Skënderbeu” na shuan shumë dyshime që ngritën krye gjatë ditëve të debatit mbi figurën e heroit tonë kombëtar Skënderbeu...

Ai debat nxorri në pah vetinë tonë për t’u ngutur ngaherë e për t’u ngatërruar me fjalët tona si në një qerthull. Shumë debatues u hodhën në diskutime, pa e lexuar librin, e të tjerë e paragjykuan pa dashur të dinë asnjë detaj rreth tij.

 A ishte i qëllimshëm drejtimi që mori ky debat?

Ndoshta po. “Libri im nuk ka për qëllim të çmitizojë Skënderbeun.

Askund nuk kam thënë se babai i Skënderbeut Ivan Kastrioti ishte serb.

 Ngaqë librin e kam shkruar në radhë të parë për lexuesin gjerman dhe jo atë shqiptar, kam ruajtur atë formë që gjendet në burimet dokumentare të kohës së tij; e këto si latinishte ashtu edhe greqishte japin trajtën Ivan, ndërsa në burimet osmane Jovan...”

 Shmit thotë se temat kryesore të diskutimit nuk kanë të bëjnë aspak me librin dhe se diskutimi në të vërtetë nuk ka një objekt. Por si u përgjigjet Oliver Schmit gjithë akuzave që i drejtohen atij, si i komenton deklarate shkrimtarit Ismail Kadare?

Në këtë rrëfim të gjatë historiani Oliver Schmit zbardh shumë të “vërteta” që lidhen me qëndrimet e tij rreth figurës së Skënderbeut dhe sidomos mbi rrjedhën që mori debati i lindur pas botimit të librit të tij në gjuhën shqipe.

Schmitt dhe shqiptarët... Z.Schmitt, mund të na flisni pak për lidhjen tuaj me Shqipërinë dhe shqiptarët?

Interesimi im për kulturën shqiptare ka filluar herët, gjatë një udhëtimi që bëra në kufirin greko-shqiptar në vitin 1991. Më 1996 kam ardhur në Shqipëri për herë të parë, vizitova sidomos jugun midis Korçës, Gjirokastrës dhe Sarandës.

Qysh shpejt lindi plani për të shkruar një disertacion me temë shqiptare, që do t’i kushtohej “Arbërisë venedike” në fund të shekullit 14 dhe në shekullin 15.

Shqipen e kam mësuar me një mik e koleg shqiptar në Vjenë dhe kam mundur ta përmirësoj vitet e fundit në një numër udhëtimesh në hapësirën shqipfolëse.

Kam patur kontakte të ngushta me kolegë shqiptarë qysh gjatë studimeve në Vjenë – aso kohe studionin këtu shqiptarë që sot japin mësim në Prishtinë dhe Tetovë; më i njohuri është pa dyshim ministri i sotëm i arsimit të Kosovës Enver Hoxhaj. Kam patur gjithmonë kontakte të mira me studentë shqiptarë gjatë mësimdhënies në universitetet e Mynihut dhe të Vjenës, mes tyre edhe me asish që kanë vetë sot punime hulumtuese.

 Gjatë viteve të fundit kam udhëtuar disa herë në Shqipëri, Kosovë dhe Maqedoni, jam takuar këtu me kolegë të shumtë, me disa kam patur edhe diskutime shumë intensive, mes të tjerash në konferencat për Skënderbeun që u organizuan në vjeshtë 2005.

Instituti universitar ku unë punoj mban kontakte me institucione analoge në hapësirën shqipfolëse, e unë i zhvilloj më tej këto kontakte edhe nëpërmjet veprimtarisë sime në Komisionin Ballkanik të Akademisë Austriake. Akademia Austrike në janar 2008 nënshkroi një marrëveshje me Akademinë e Shkencave dhe Arteve të Kosovës.

Në vitet e fundit, me përkrahjen e rektoratit të Universitetit të Vjenës arrita të ngre edhe një program bursash për historianë të rinj shqiptarë (nga Shqipëria dhe Kosova).

Së fundi Instituti im ka marrë në gjirin e vet bibliotekën e Institutit Shqiptar të Mynihut, një nga koleksionet më të rëndësishme albanologjike të Europës perëndimore.

 Cilat janë fushat e studimeve shqiptare që përbëjnë interes për ju? Merrem sidomos me historinë mesjetare, por kiam shkruar edhe një studim për Faik Konicën, së fundi edhe një histori të Kosovës.

Më 2006 dhe 2008 u zhvilluan në Vjenë dy konferenca albanologjike, njëra për kritikën e historiografisë , tjetra për historinë e fesë, në këto morën pjesë kolegë shqiptarë dhe ndërkombëtarë.

Përfundimet do të botohen vitin e ardhshëm. Vizitat tuaja në këtë vend? Midis viteve 1996 dhe 2008 kam ardhur shumë herë në Shqipëri, por më kanë lënë mbresa sidomos udhëtimet e viteve 2006 e 2007 në viset e Skënderbeut (Mat, Dibër) e në Shqipëri të veriut. Kujtoj me dëshirë mikpritjen, sidomos në zonat e thella. Cilat kanë qenë kontaktet e para të njohjes me Skënderbeun, dhe çfarë ju joshi për të hulumtuar rreth tij?

Tek e fundit pse një libër për Skënderbeun?

Që në gjimnaz pata lexuar klasikët e albanolgjisë historike (sidomos Šufflay-n dhe Jireèeku-n). Kështu plani për të kryer vetë hulumtime arkivore për Skënderbeun ka lindur shpejt. Munda ta realizoj këtë plan midis viteve 1999 dhe 2007, ndërsa vepra “Arbëria venedike” dhe një numër shkrimesh e botimesh dokumentare ishin paraprijëse të to. Libri dhe reagimet…

Ndalojmë pak tek libri juaj i ri, “Skënderbeu”. Sa është i pranishëm elementi artistik në veprën tuaj? Biografia është, në kuadrin e historiografisë , një zhanër me rregullat e veta, të cilat lejojnë që të lidhet puna shkencore edhe me mëtimin artistik.

 Vitet e fundit në dije është zhvilluar një diskutim intensiv lidhur me teorinë e biografisë, ndër të tjera edhe mbi mundësinë e lidhjes së modeleve narrative me ato analitike. Jam përpjekur të shkruaj një libër, i cili përdor edhe metodat e shkencës historike, por lexohet mirë.

A e morët me mend që do të kishte një reagim të tillë kur po e shkruanit? Jo. Si mendoni, çfarë e lëndoi sedrën e shqiptarëve në këtë rast?

 Diskutimi mbi librin ndjek mekanizma mediale, të cilat njihen edhe nga raste analoge.

 Këtu libri vetë shërben si sipërfaqe projektimi për stereotipe, ideologji dhe me sa duket, edhe frikëra. Shumica e pjesëmarrësve shprehin sidomos mendime të parapërgatitura. Përmbajtja e vetë librit nuk luan ndonjë rol. Më të shumtët e librave që janë kontestuar ashpër, nuk janë lexuar prej kritikëve të tyre më të rreptë.

Në rastin konkret ata që e kanë lexuar librin janë shprehur në mënyrë të diferencuar ose pozitive (Fatos Lubonja, Beqir Meta, Artan Lame), të tjerë, që nuk e kishin në dorë, nuk kishin nevojë ta lexonin, pasi “e dinin” paraprakisht çfarë përmbante ai. Ndaj debati dhe rrjedha e tij nuk të habit fort.

 Më 2007 në Bullgari ndodhi një debat edhe më i ashpër: një koleg gjerman dhe një kolege bullgare, të cilët kishin punuar mbi ikonografinë e masakrës së Batakut (1876) u akuzuan nga nacionalistë bullgarë se po e mohonin masakrën.

Këtë gjë të dy këta studiues në të vërtetë nuk e kishin bërë, megjithatë opinioni publik bullgar, ndër ta edhe presidenti i shtetit ishin të bindur se të huajt po sulmonin nderin kombëtar të bullgarëve. Sapo që aktivohet ky lloj stereotipi, është gati e pamundur të argumentosh kundër tij në mënyrë racionale.

Këto stereotipe nacionaliste dhe ksenofobe u përdorën nga sistemet komuniste si mjete pushteti, ato në Shqipëri janë edhe më të forta se në Bullgari. E meqë në të dyja këto shtete nuk është zhvilluar, ose veç sapo ka filluar të zhvillohet një diskutim publik mbi pasojat e politikës izolacioniste komuniste, paragjykime të tilla mund të aktivohen fare lehtë.

Në mbyllje dua të nënvizoj se temat kryesore të diskutimit nuk kanë të bëjnë aspak me librin:

1. Në libër nuk thuhet se Ivan Kastrioti paskej qenë serb.

 2. Në libër nuk thuhet se gjakmarrja paskej qenë motivi i kryengritjes; fjala është në të vërtetë për të vetmin motiv personal, të shfaqur qartë në dokumentet, të Skënderbeut, si renegat i vetëm dhe oficer i suksesshëm osman që filloi një kryengritje kundër sulltanit. Vetë kryengritja kishte arsye shumë më komplekse, të cilat analizohen me hollësi në libër.

 3. Libri nuk ka për qëllim “të demitologjizojë” Skënderbeun – kjo gjë thuhet që në parathënie. Krejt debati në të vërtetë nuk ka objekt, siç e shprehu Ardian Klosi. Shumë shqiptarë mendojnë se figura e Skënderbeut është e studiuar mjaftueshëm dhe s’ka vend për ndonjë të re entuziaste që mund të ndryshojë imazhin tonë mbi këtë figurë.

Të tjerë thonë se studimet e shumta shqiptare mbi Skënderbeun nuk lënë ndonjë vend që një studiues i huaj të ngrihet e të mbulojë boshllëqet. Ka nota xhelozie këtu?

 Nga se shkaktohet? Këtë të fundit unë nuk mund ta gjykoj. Në tërësi duhet vërejtur se çdo hulumtim do parë si një proces: materiali i ri dhe shtrimi i ri i pyetjeve të çojnë në rezultate të reja. Ndërsa trajtimi që u bën shoqëria këtyre hulumtimeve është diçka tjetër.

Mes diskursit shkencor dhe atij shoqëror shpesh nuk ka përputhje, sidomos në ato raste kur përfundimet e hulumtimit, për shkaqe të ndryshme, mund të ndjehen si të sekëlldisshme ose negative nga një shoqëri.

Vetëm se kjo nuk është diçka tipike shqiptare, por mund të vërehet edhe në shumë raste të tjera – një shembull këtu është roli i Zvicrës në Luftën e dytë Botërore, i cili në paraqitjet zyrtare del shumë më pozitiv sesa në hulumtimet e historianëve.

 Mirëpo një debat i gjerë i krejt shoqërisë solli në situatën që tani shoqëria e ka kapërcyer këtë mit kombëtar, konkretisht ngaqë nuk diskutoi vetëm në mënyrë emocionale, por edhe racionale, dmth. duke vënë në themel të diskutimit materialin dokumentar, nga arkivat, e jo mendimet e parapërgatitura.

 Natyrisht që jo të gjitha pjesët e popullsisë pranuan në të njëjtën masë, megjithatë është arritur një konsensus i ri mbi këtë pjesë të historisë nëpërmjet një diskutimi të hapur, zakonisht me nivel të mirë. Por nuk ka qenë aspak proces i lehtë.

Ekziston një mendim i përgjithshëm, se librat që në një farë mënyre thyejnë mitet kombëtare janë më interesantë, rrjedhimisht më të shitshëm.

Hyn libri juaj në këtë kategori? Jo. Në të vërtetë mjafton të lexosh hyrjen. Qëllim i librit nuk është “shkatërrimi i një miti”, por rindërtimi historik mbi bazën e gjithë burimeve të shfrytëzueshme e me peshë. Në pjesën përmbyllëse analizohet dhe shpjegohet receptimi i Skënderbeut në Europë dhe në Ballkan, si lindi imazhi i sotëm i Skënderbeut. Debati mbi “demitologjizimin” i shkon tangent qëllimit të librit – ashtu siç nuk kanë të bëjnë me librin edhe elementet e tjera të debatit. Veç kësaj mendoj se për të arritur mirëqenien ka rrugë më të mira nga hartimi i librave shkencorë. Emrat sllavë…

Emërtimet në librin tuaj janë kryesisht në gjuhën sllave.

Nisur prej tyre janë nxjerrë edhe konkluzione të shpejtuara të tipit: Schmitt e cilëson Skënderbeun serb, edhe pse në tekst nuk ka cilësime të tilla të drejtpërdrejta. Pse janë përdorur këto emra në gjuhën sllave?

 P.sh, pse Ivan dhe jo Gjon? Bëhet fjalë për një keqkuptim thelbësor. Një emër nuk është në gjendje të tregojë për përkatësinë gjuhësore ose etnike të një personi. Një shqiptar që quhet Ali bëhet arab prej këtij emri po aq pak sa bëhet vetiu serb një person që quhet Ivan. Në libër nuk thuhet se Ivan Kastrioti paskej qenë serb. Nuk e di se kush e hapi këtë farë debati për herë të parë – porse ai pohim vuri në veprim mekanizmin medial.

Ndaj reagimi emocional negativ nuk ka asnjë bazë. Kushdo që e lexon librin ka për ta vërejtur këtë gjë; kurse ai që nuk e ka lexuar do të vazhdojë të ndjekë mendimin e tij të parapërgatitur. Meqë jemi në këtë temë, çfarë përkatësie do t’i jepnit Skënderbeut? Kjo pyetje niset prej hipotezës se etnia ka vazhdimësi dhe mbetet e pandryshuar, diçka me të cilën dija ndërkombëtare nuk pajtohet. Përkatësia etnike në Mesjetë nuk kishte ndonjë rëndësi të madhe. Njerëzit patjetër që ishin të vetëdijshëm për ndryshimet gjuhësore; mirëpo përkatësia fetare, pozicioni shoqëror, dallimet midis shoqërive të qytetit dhe të fshatit, mënyrat e ndryshme të jetesës në malësi dhe në ultësira kishin peshë më të madhe. Sidomos në rastin e fisnikëve kategoria etnike nuk ndihmon shumë: sa më e rëndësishme të ishte një familje, aq më ndërkombëtare ishte ajo. Kjo vlente edhe për Kastriotët, të cilët ishin të lidhur me familje serbe dhe greko-bizantine dhe ishin krenarë për këtë. Në ndryshim nga identiteti etnik, kishte rëndësi identiteti politik dhe kulturor:

Skënderbeu e shihte veten si „zot të Arbërisë”. Në lëmin kulturor humanizmi, të cilin e kishte prurë në Arbëri kisha katolike, luajti aty nga fundi i jetës së Skënderbeut një rol të rëndësishëm – kështu duhet kuptuar lidhja e tij me epirotët e antikitetit ose imitimi i kurorës mbretërore të Maqedonisë (njëra pjesë e së ashtuquajturë s përkrenare e Skënderbeut në Vjenë). A kanë lidhje këto emërtime me faktin se ju keni dashur t’i qëndroni besnik dokumenteve të cilave u jeni referuar? Po. Emri Gjon u përdor nga intelektualët e Rilindjes shqiptare. Në shumicën e shoqërive europiane emrat e princave përkthehen në gjuhën përkatëse: Henri IV në librat gjermanë shfaqet si Heinrich IV. Në këtë pikëpamje studimet shqiptare ndjekin një praktikë të zakonshme. Por unë, ngaqë librin e kam shkruar në radhë të parë për lexuesin gjerman dhe jo atë shqiptar, kam ruajtur atë formë që gjendet në burimet dokumentare të kohës së tij; e këto si latinishte ashtu edhe greqishte japin trajtën Ivan, ndërsa në burimet osmane Jovan.

Kështu babai i Skënderbeut shfaqet në gjuhë të ndryshme nën këtë emër, kurse forma Gjon nuk dëshmohet. Ndaj duhet menduar që ai kështu e ka quajtur vetveten, prandaj edhe u njoh si në Ballkan ashtu, edhe në Itali nën këtë emër. Një kancelar që shkruante latinisht nuk kishte ndonjë arsye të përdorte një trajtë sllave të emrit, një historiograf bizantin si Halkokondili do mund ta kishte quajtur edhe “Ioanis”: mirëpo ai nuk e bëri këtë gjë, por përdori atë trajtë emri me të cilën njihej përgjithësisht Ivan Kastrioti. E pra këtu ndjek thjesht gjuhët burimore. Kjo zgjidhje sigurisht që ka më pak ngarkesë ideologjike sesa emërkrijimi i ri “Gjon”. Më tej dua të theksoj sërish se një emër nuk të jep çelësin për gjuhën e aq më pak për identitetin. Portretizimi i Skënderbeut…

Figura e Skënderbeut është ezauruar thuajse në të gjithë fushat e artit, në letërsi, muzikë dhe artet pamore, në pikturë e skulpturë. Për aq sa njihni, si e komentoni portretizimin që i është bërë Skënderbeut deri më sot, sidomos në Shqipëri? Veprat më të rëndësishme u krijuan vetëm pas vitit 1945 dhe ato i përgjigjen konceptit të realizmit socialist përkatësisht të stalinizmit kombëtar, siç e modeloi Enver Hoxha. Ndërkaq nuk ekziston ndonjë ikonografi e gjerë parakomuniste, e cila do mund të bëhej një alternativë ndaj mënyrës komuniste të të lexuarit. Monumentet në Prishtinë dhe Çair/Shkup qenë një shans për t’i ftuar artistët që të jepnin forma të reja të paraqitjes; por ky shans u dogj. Diçka e ngjashme vlen edhe për letërsinë artistike: letërsia për Skënderbeun kishte nën diktaturën e Hoxhës një karakter stabilizues për sistemin. Ajo kontribuoi që Skënderbeu të bëhet feja civile e një shteti ateist, siç e ka formuluar në një ese Egin Ceka.

A kanë artistët shqiptarë një koncept të qartë për këtë figurë? Në kuptimin e përgjigjes së mësipërme, po. Saktësime... Ndër tezat e shumta tërheqin ende vëmendjen argumentet që ka dhënë Fan Noli në vitin 1960, pas ripunimit të veprës së tij “Skënderbeu”. Ndër to do të përmendim katër. Noli argumenton se: a) Skënderbeu ka lindur më 1400. Në tekstet tona vijon të shkruhet 1405 si vit i lindjes së tij. b)Ai nuk ishte 9 vjeç kur u dërgua peng te sulltani, por 30 vjeç. c)Nuk ka asnjë dokument që të provojë se ai u konvertua në fenë islame; dhe d), se Skënderbeu, ndryshe nga ç’thotë Barleti, nuk e ka kryer akademinë ushtarake të Kostandinopojë s. Çfarë mund të saktësojmë në këto katër raste? Viti 1405 duhet mbajtur si i vlefshëm. Skënderbeu shkoi në oborrin e sulltanit pas vitit 1423, pra si djalosh i ri. Barleti e përshkruan konvertimin me shumë saktësi, shton edhe një përshkrim të urdhrit të dervishëve, çka lë të kuptosh se Skënderbeu kaloi në Islam në një mjedis dervishësh.

Ky konvertim nuk vërtetohej aso kohe me shkrim, por bëhej para dëshmitarësh (çka e përmend edhe Barleti). Në Konstantinopojë Skënderbeu nuk mund të ndiqte ndonjë “akademi ushtarake”, pasi ky qytet mbeti bizantin deri në vitin 1453, ndërsa kryengritja e Skënderbeut filloi qysh më 1443. Kadare në debat... Në vazhdën e debateve të fundit, më shumë vëmendje tërhoqën deklaratat e shkrimtarit Ismail Kadare. Do të donim të komentit disa prej tyre. P.sh, Kadare thotë: 1) “Çfarë ka bërë ky Skënderbeu të keqe që ne shqiptarët duhet ta vëmë në diskutim? Dhe del një gjerman në mënyrë të papritur, kur ka nja njëmijë e pesëqind libra për të, dhe ne duhet si servilë të ulim kokën të gjithë dhe të shohim ç’thotë ky gjerman, kur kemi qindra e qindra libra dhe vlerësime të padiskutueshme të Skënderbeut…” 2) Në fillim u gjet që babai i Skënderbeut paska pasur një grua sllave. Kjo mund të jetë e vërtetë. Tërë feudalët, tërë princat e Europës merrnin gra të huaja dhe asnjëherë gruaja e huaj nuk kthente identitetin e vendit. Tani i gjetën edhe babanë, na e paska serb...

Ky është kuptimi i shëmtuar i kësaj, d.m.th që nëse kjo figurë do të mbahet, do të mbahet si figurë më zanafillë sllave, që nuk është e vërtetë fare. D.m.th, që Kosova do të kthehet përsëri në statusin e provincës serbe, dhe normalisht kryezotin e saj, heroin e saj do ta ketë serb. Këto deklarata në të vërtetë thonë më shumë për personin që i lëshon, sesa për atë për të cilin bëhet fjalë. Sa për të tjerat ato janë po aq të sakta sa dhe pohimi që unë qenkam gjerman, kur në të vërtetë jam zviceran. Reliket në muzeun e Vjenës... Ende ka dyshime mbi autenticitetin e dy relikeve të Skënderbeut që ruhen në muzeun e Vjenës. A i përkisnin vërtet atij ato relike? A janë përdorur prej Skënderbeut? Specialistët e muzeumit janë të mendimit se me përjashtim të brirëve të dhisë mbi përkrenare, pjesët e tjera nuk janë origjinale.

Nuk ka ndonjë dokument që të flasë për përdorimin eventual të kësaj pjese. Do menduar se brirët, simbol i Mbretërisë antike maqedone, simbolizojnë mëtimin e Skënderbeut për të ripërtërirë këtë mbretëri: si Aleksandri i Madh i ri, si mbret i maqedonëve dhe epirotëve, duke iu përgjigjur kësisoj gjuhës antikizuese të Rilindjes europiane. Këtu vepronte sidomos ndikimi kulturor i kishës katolike (papës Piu II, arqipeshkvit Pal Engjëlli të Durrësit). Dhe në fund… Shumë prej debatuesve, për të mos thënë të gjithë, nuk e kanë lexuar ende deri në fund librin tuaj. E megjithatë, diskutojnë. A ka vend për debate në këto kushte mosnjohjeje? Ecurisë së debatit nuk mund t’i ndryshosh më gjë. Por meqë në vitet e ardhshme kanë për t’u përkthyer herë pas here në shqip libra historianësh të huaj albanologë, do të ishte mirë që në diskutimin e ardhshëm pjesëmarrësit të njohin më së pari librin e të mos e përdorin atë thjesht si sipërfaqe projektimi për diçka tjetër.

Do të ishte gjithashtu e dëshirueshme që të vihet njëherë në pikëpyetje skema mik-armik që përdoret kundrejt studiuesve joshqiptarë. E ç’kuptim kanë këto nocione? Çfarë kushtetsh duhet të plotësojë dikush që dëshiron të bëhet “mik i shqiptarëve”? Kush e përkufizon se çfarë është “shqiptare”? Debatet kulturore të viteve të fundit kanë treguar së paku një gjë: që në këtë pikë në shoqëritë shqiptare të Europës Juglindore dhe të diasporës nuk ka konsensus. Librat zyrtarë të shkollave dhe të historisë vazhdojnë të ndjekin modele të periudhës komuniste – veçse nga debatet kuptohet që ata nuk pranohen më përgjithësisht. Hulumtimi shkencor duhet të ndjekë metodat dhe parashtrimet shkencore të pyetjeve, ai duhet t’u qëndrojë larg klasifikimeve të thjeshta politike pro ose kundra.

Përfundimet shkencore paraqiten në mënyrë të rrokshme, dmth. historianët japin burimet që kanë përdorur, në mënyrë që lexuesi të mund t’i shqyrtojë ato. Së fundi, ajo që më bën të jem disi optimist është fakti që janë të shumtë shqiptarët e rinj që studiojnë jashtë vendit dhe që nuk ndihen më të detyruar ndaj një diturie të administruar dhe të kontrolluar prej një elite të vogël. Revista si “Përpjekja” dhe “Hylli i dritës” janë shembujt më të mirë të potencialit intelektual që ekziston në Shqipëri. Natyrisht që shoqëritë në Shqipëri, Kosovë dhe Maqedoni duhet të jenë edhe të gatshme që ta shfrytëzojnë këtë potencial dhe ta zëvendësojnë në shkencë klientelizmin me cilësinë dhe kompetencën. Atëherë nuk kanë për të ndodhur më debate të tilla: pasi shkenca dhe hulumtimi shkencor janë ndërkombëtarë dhe të hapur ndaj kujtdo që punon sipas metodash shkencore. E këtë janë duke bërë ndërkaq disa intelektualë dhe studiues shqiptarë. Vetëm se zëri i tyre duhet dëgjuar më shumë e atyre u duhet dhënë shansi që të ndjekin një karrierë shkencore.

(Autori është Drejtor i Deparatamentit për mardhënie me publikun pranë Akademisë së Shkencave dhe Artëve  Shqiptaro-Amerikane në New York,Tiranë,Prishtinë dhe Shkup  dhe mbanë titullin  shkencor Akademik  Prof.Dr.Ph.D).

Skenari i Serbisë për gjunjëzimin e Kosovës

NGA ARBEN SYLEJMANI

Kërkesat që liqeni i Gazivodës dhe një pjesë e Trepçës që gjenden në veriun e vendit të menaxhohen nga Asociacioni i komunave me shumicë serbe, qarkullojnë me vite në Beograd.

Por e keqja është se këtë skenar të përgatitur në Serbi, tashmë po e kërkojnë të vihet në praktikë zyrtarët serb që janë caktuar nga institucionet e Republikës së Kosovës për hartimin e statutit të Asociacionit të komunave serbe me arsyetimin se këto dy resurse janë parakusht për mbijetesën e këtij komuniteti në veri të vendit.

Ky plan nëse analizohet në detaje përmban disa qëllime brenda vetes që kanë për synim dobësimin dhe gjunjëzimin e Kosovës.

Sa i përket pjesës së Trepçës, qëllimi i kryesorë është që Kosova zyrtarisht dhe eventualisht me ndonjë garanci ndërkombëtare të heq dorë nga kjo pjesë e resursit më të rëndësishëm të saj.

Ky veprim e dobëson shtetin tonë, sepse paratë e fituara nga kjo pjesë e minierës që dikur ishte njëri ndër motorët e ekonomisë jugosllave nuk shkojnë në buxhetin qendrore të Qeverisë së Kosovës, por në atë të Asociacionit.

Problemi tjetër, nëse ndodh kjo është se një pjesë e Trepçës do të kontrollohet nga Serbia përmes Asociacionit.

Edhe liqeni i Gazivodës është një resurs tjetër strategjik për shtetin e Kosovës që po kërkohet të kontrollohet nga Asociacioni që ka për synim gjunjëzimin e shtetit tonë.

Komuna e Mitrovicës, Vushtrrisë, Skenderajt, Zveçanit dhe Drenasit, burimin e vetëm të ujit e kanë liqenin e Ujmanit. Edhe banorët e disa fshatra të komunës së Prishtinës furnizohen nga ky liqen për ujitjen e tokave të tyre.

Duke parë që një pjesë e Kosovës është aq shumë e varur nga Liqeni i Gazivodës, serbët pikërisht për këtë po kërkojnë që ky resurs të menaxhohet nga AKS-ja në mënyrë që të ata të mund të paraqesin një kërcënim të përhershëm për këto komunat që burimin e vetëm të ujit e kanë ujmanin. Kush mund të na garantojë që në një të ardhme, AKS-ja nuk mund të na ndal ujin për x arsye.

Poashtu, AKS mund të dëmtojë qytetarët dhe shtetin e Kosovës duke rritur çmimet e ujit. Këtë mund ta bëjnë sepse duke që qenë të vetmit në treg, ata kanë mundësinë për të caktuar rregullat e lojës.

Andaj, institucionet tona në asnjë mënyrë nuk duhet të pranojnë që këto dy resurse të kalojnë nën menaxhimin e Asociacionit që do të ishte fatale për ekonominë e Kosovës.