Për herë të parë të infektuarit dhe vdekjet nga COVID-19 në botë kanë tejkaluar ato të Kinës

Teksa Kina e fitoi të paktën për momentin betejën me koronavirusin, radhën për të luftuar e ka pjesa tjetër e globit. Për të parën herë, shifrat e koronavirusit janë më të larta jashtë Kinës sesa brenda këtij vendi.

3241 të vdekur numërohen këtë të hënë jashtë Kinës, teksa brenda Kinës 3208. Të infektuarit në vende të ndryshme të globit janë mbi 89 mijë, ndërsa përbrenda territorit kinez pak më shumë se 80 mijë.

Infektimet, Kinës tani po i vijnë nga jashtë. Autoritetet në Pekin thanë se 6 shtetas të huaj, 4 spanjollë dhe 2 britanikë rezultuan të infektuar, teksa brenda këtij vendi, infektimet janë minimale dhe pjesa më e madhe e rajoneve nuk kanë shënuar asnjë të infektuar të ri.

Kontinenti europian është më problematiku në gjithë botën për sa i përket përhapjes së koronavirusit dhe numëron mbi 2 mijë të vdekur. Pas Italisë që të dielën shënoi rritjen më të lartë ditore, me 368 viktima duke e çuar numrin total të tyre në mbi 1800, Spanja e pas Franca po shënojnë përhapje me ritme të shpejta. Dy vendet kanë shpallur gjendjen e jashtëzakonshme. Numri i viktimave në Spanjë arriti në 292, dyfishim brenda 24 orëve. Ndërsa në Francën që renditet e treta në kontinent, viktimat janë 127. Autoritetet e këtij vendi thanë se përhapja po është për momentin jashtë kontrollit.

Gjermania mbylli kufijtë me Spanjën, Austrinë e Zvicrën. Ky vend numëron 13 viktima por ka mbi 5 800 të infektuar dhe është vendi i tretë në Europë për nga përhapja.

Mes rrugëve të boshatisura, si shenjë e mposhtjes së frikës, Papa Françesku shkoi më këmbë në një kishë në Romë, jashtë territorit të Selisë së Shenjtë, për t’u lutur që pandemia e koronavirusit në gjithë botën të marrë fund sa më shpejt.

Në gjithë globin numërohen rreth 6500 viktima e afro 169 mijë të infektuar prej fillimit të përhapjes.

Testohet për herë të parë vaksina kundër korona virus Covid-19

Ndërkohë që numri i të infektuarve me COVID 19 në botë po rritet, shkencëtarët nuk saktësojnë se kur do të arrijnë deri tek vaksina apo ilaçi për këtë sëmundje globale. Ish kreu i Shoqatës Mjekësore Kineze, Zhong Nashan së fundmi parashikoi se pandemia mund të vazhdojë të paktën deri në qershor, duke pritur që COVID 19 të zbehet me rritjen e temperaturave. Studimet tregojnë se shumica e të infektuarve me Koronavirus nuk përjetojnë asgjë më shumë se simptomat e zakonshme të ftohjes apo gripit, por shkalla e vdekshmërisë duket më serioze. The Guardian citon ekspertin nga Organizata Botërore e Shëndetësisë, Bruce Aylëard i cili e udhëheq misionin ndërkombëtar në Kinë për studimin e pandemisë, sipas të cilit COVID 19 mund të shkaktojë 10 herë më shumë vdekje sesa gripi sezonal, respektivisht rreth 300 000 deri në 600 000 vdekje në vit. Fëmijët dhe të rinjtë të cilët nuk kanë probleme shëndetësore, nuk mund të sëmuren rëndë nga Koronavirusi, por të zbatuarit e rregullave të karantinës kanë rol të madh edhe në mbrojtjen e personave më të ndjeshëm. Ekspertët akoma nuk kanë arritur në një përfundim për transmetimin asimptomatik, respektivisht nëse shpërndarja më e madhe e COVID 19 bëhet përpara shfaqjes së simptomave tek personat e infektuar, ose shfaqjes së simptomave të lehta. Ndonëse ende nuk mund të parashikohet epilogu i pandemisë më të re COVID 19 me të cilën po përballet e gjithë bota, njerëzimi në vazhdimësi është përballur me sëmundje të ndryshme vdekjeprurëse. COVID 19 dallon shumë nga pandemitë më të këqija që ka evidentuar historia, si: HIV/AIDS, Pandemia e gripit dhe Vdekja e Zezë. HIV/AIDS e ka dëshmuar veten si një pandemi globale duke vrarë mbi 36 milion njerëz që nga viti 1981. Në periudhën 1918-1920 një grip vdekjeprurës që u shpërnda në gjithë globin, infektoi mbi 1/3 e popullsisë botërore e iu mori jetën rreth 50 milion njerëzve. Epidemia e gripit e vitit 1918 e njohur si “Gripi spanjoll” iu merrte jetën pacientëve që paraprakisht kishin qenë plotësisht të shëndetshëm. Që nga viti 1346 deri në vitin 1353 sëmundja e njohur si “Vdekja e Zezë” ishte përhapur në Evropë, Afrikë dhe Azi, duke shkaktuar vdekjen e rreth 200 milion njerëzve.

Virologu gjerman, Charité: Ngrohja e motit mund të ndikojë shumë pak tek virusi

Të gjithë moshat dhe gjinitë mund të infektohen nga virusin korona, por pasojat janë shumë të ndryshme.Faktorë vendimtarë janë mosha, gjinia dhe sëmundjet e mundshme të mëparshme. Mediat në Gjermani thonë se Covid 19 mund të përhapet me shpejtësi në javët dhe muajt e ardhshëm, e dy të tretat e popullsisë do të infektohen. Sipas Christian Drosten, virologu kryesor në spitalin e Berlinit Charité, nuk ka gjasa që situata të ndryshojë shumë kur të ngrohet përsëri moti dhe të marrë fund sezoni klasik i ftohjes ose gripit. Një shumicë e popullsisë do të ketë formuar në vjeshtë antitrupa kundër SARS-CoV-2, kur të vijë vala tjetër e ftohjes, thotë ai.

Njerëzit e moshuar janë veçanërisht të rrezikuar, pasi shkalla e vdekshmërisë rritet në mënyrë eksponenciale nga mosha rreth 65 vjeç. Por eksperienca me raste në Itali, tregon se është prekur shumë edhe grupmosha 40-44 vjeç. Sipas të dhënave të OBSH-së, burrat vdesin në mënyrë të konsiderueshme më shpesh se gratë nga SARS-CoV-2.

Shkalla e vdekjes në Kinë në mes të shkurtit ishte 2.8% për burrat dhe 1.7% për gratë. Ekspertët thonë se sistemi imunitar femëror është më rezistent se ai i burrave. Kjo është kryesisht për shkak të estrogjenit, i cili stimulon sistemin e imunitetit dhe lufton patogjenët më shpejt dhe në mënyrë më agresive.

Nuk është kuptuar ende ndërkohë arsyeja përse fëmijët nuk sëmurën shumë ose e kalojnë me simptoma më të buta, por mjekët supozojnë se “sistemi jo specifik” tashmë i lindur është efektiv tek fëmijët e vegjël.

A mund të infektohemi me koronavirusin kinez COVID 19 , përmes ushqimeve?

Lajm i mirë: koronavirusi nuk është ushqimor. Kjo do të thotë që ju nuk mund ta merrni atë duke gëlltitur ushqim. Ju mund ta merrni atë nga njerëzit, natyrisht, nga ata që teshtijnë, kolliten ose që kanë rezultuar pozitiv ndaj këtij virusi. Kjo është arsyeja pse na është thënë që të mos prekim të tjerët, as të qëndrojmë shumë afër të tjerëve dhe t’i lajmë duart shpesh.

Por teksa rrimë në shtëpi, a duhet të shqetësohemi për mënyrën si e konsumojmë ushqimin? Po sikur dikush të teshtijë në mollën tuaj? Mund të hani akoma biftekun tuaj të preferuar? Po për Sushi – a është e sigurt për tu ngrënë?

Dy shkencëtarë të ushqimit në Universitetin Rutgers, drejtori i programit Donald Schaffner dhe profesori Thomas Montville japin përgjigjet e tyre:

Pyetje: Ekspertët thonë se koronavirusi nuk është ushqimor. Megjithatë, ata dyshojnë fuqimisht tek kafshët në Kinë në një treg ushqimi, jo më pak, ato ishin burim i mundshëm i infeksionit fillestar. Pra, a nuk do të thotë kjo që është ushqim?

Donald Schaffner: Mendohet se virusi është transmetuar nga kafshët jo duke i ngrënë ato, por duke pasur afërsi me to. Viruset mund të kërcejnë midis specieve dhe kjo është ajo që ka të ngjarë të ketë ndodhur. Me shumë mundësi ishte një transmetim i frymëmarrjes.

Pyetje: A kam nevojë për të larë frutat dhe perimet për një kohë më të gjatë për shkak të koronavirusit? A duhet t’i pastrojmë ato me sapun?

Thomas Montville: Lani frutat dhe perimet tuaja si zakonisht, ose edhe me pak ujë të ngrohtë me sodë. Ne gjithmonë duhet t’i lajmë frutat dhe perimet tona. Kjo është thjesht praktikë e mirë e sigurisë.

Pyetje: Po në lidhje me mishin? Ndërsa virusi nuk është i infektuar, çfarë ndodh nëse kasapi ka koronavirus dhe prek mishin? A mund ta marr virusin tani?

Schaffner: Shkencëtarët kurrë nuk do të thonë që asgjë nuk është në rrezik, por unë nuk shqetësohem aspak për marrjen e koronavirusit nga ushqimi. Hipotetikisht, po, mbase një copë mishi mund të ketë virusin në të. Por acidet e stomakut do ta vrasin atë. Plus koronavirusi nuk është i pajisur për të kaluar nëpër muret e zorrëve tuaja, që është mënyra se si sëmundjet e ushqimit ju bëjnë të sëmurë.

Pyetje: Po në lidhje me ushqimet e papërpunuara, si Sushi apo tartari?

Montville: Ju kurrë nuk do të gjeni një shkencëtar të ushqimit që ha tartar. Mund të ndotet me baktere patogjene – E. coli, salmonelë, listeria. Sa i përket Sushi, thjesht nuk e ha atë.

Çfarë duhet të dini patjetër në këtë periudhë nëse blini bukë në furra

Në këto ditë koronavirusi ku shumica e njerëzve janë izoluar, pjesa më e madhe dalin nga shtëpitë vetëm për të blerë bukë në furra.

Nisur nga shqetësimet e vazhdueshme Shoqata e Bukës, Pastiçerisë dhe Brumërave është e nevojshme të ritrajtojë edhe njëherë problemin e prerjes bukës.

“Është tepër e nevojshme ndalimi në mënyrë absolute i prerjes bukës, pasi rrezikon në maksimum shëndetin e klientëve. Një buke e prerë do të thotë prishja e guaskës mbrojtëse të bukës që është pjekur me temperaturë 230-240° dhe prishja e kësaj guaske krijon pasoja shumë të mëdha për intoksikimin”, thuhet në deklaratë.

Më tej shtohet se në kushtet e tanishme të Covid-19 është tepër e nevojshme të ndalohet prerja e bukës në mënyrë absolute dhe se kjo duhet t’ju bëhet e qartë të gjithë klientëve dhe kërkohet që makina prerëse të largohet nga pjesa e prerjes që kemi zakonisht. Në të njëjtën kohë është e nevojshme për furrat e bukës që kanë shërbimin e kafesë të ndalohet kafeja ambulatore sepse kjo krijon premisa për grumbullimin e njerëzve dhe për daljen e tyre nga shtëpia si një shërbim ekstra që e kemi vetëm ne.

“Për të dyja këto kemi vërejtje edhe nga institucionet dhe kërkesa nga klientët , prandaj është e nevojshme që ti zbatojmë për të qenë në rregull me respektimin e ligjeve te shtetit për këtë periudhë”.

Shkencëtarët tregojnë sa kohë qëndron koronavirusi në trupin tonë dhe a mund të infektohemi sërish

Ndërsa numri i rasteve rritet ndjeshëm në Evropë dhe Amerikën e Veriut, koronavirusi ka arritur kulmin në disa vende aziatike, dhe hulumtimi i parë për efektet afatgjata të virusit ka dalë.

Sa kohë jeton në trupin tuaj?

Një studim nga revista mjekësore Lancet jep një përgjigje të kthjellët. Raporton që pacientët me koronavirus mund ta mbajnë patogjenin në traktin e tyre të frymëmarrjes për 37 ditë, që do të thotë se ata mund të mbeten infektues për shumë javë.

Duke pasur parasysh që periudha aktuale e karantinës rekomandohet si 14 ditë, pacientët mund të mbeten ngjitës shumë kohë edhe pasi simptomat e tyre zhduken.

Mund ta marrësh përsëri?

Ekzistojnë disa raportime se njerëzve të kuruar me koronafirus u riinfektuan. Të dhënat nga zyrtarët shëndetësorë në provincën Guangdong të Kinës raportuan se 14 përqind e njerëzve që u shëruan më pas u testuan përsëri dhe dolën pozitivë me koronavirus.

Në fund të shkurtit, Reuters raportoi për një grua në Osaka, Japoni që gjithashtu testoi pozitive pasi ishte shëruar nga një infeksion i mëparshëm. Një rast i ngjashëm u raportua në Korenë e Jugut.

Ekziston mundësia që ajo të mbetet e fjetur pas një periudhe fillestare të sëmundjes me simptoma minimale, përpara se të sulmojë mushkëritë. Ose gjithmonë ekziston një gabim njerëzor siç është testimi i pasaktë ose pacientët që dalin nga spitali para kohë.

Në mënyrë tipike, kur një infeksion viral mposhtet nga sistemi imunitar i trupit, ai e di se si ta mposhtë përsëri sepse janë imunë.

Anthony Fauci, drejtori i Institutit Kombëtar të Alergjisë dhe Sëmundjeve Infektive, u shpreh në një seancë dëgjimore para Komisionit të Mbikëqyrjes së Shtëpisë dhe Reformës të enjten: “Ne nuk e kemi vërtetuar zyrtarisht atë, por ka shumë të ngjarë që të ndodhë kështu. Sepse nëse ky vepron si çdo virus tjetër, pasi të shëroheni, nuk do të riinfektoheni. ”

Pse SARS dhe COVID-19 janë në familjen e “koronavirus” -eve vdekjeprurësë dhe dalin nga Kina?

Që nga fillimi i marsit 2020, një koronavirus i ri, i quajtur COVID-19, është përhapur në më shumë se 70 vende dhe ka vrarë më shumë se 4 mijë njerëz, shumica dërrmuese në Kinë. Këtu virusi u shfaq në dhjetor 2019.

Ky nuk është një fenomen i ri për Kinën; në 2003, virusi SARS gjithashtu u shfaq atje, dhe në rrethana të ngjashme, para se të përhapej në të gjithë botën dhe të vrasë afro 800 persona. Ky virusi është përhapur deri më tani në 83 shtete.

.

Të dy, SARS dhe COVID-19 janë në familjen “koronavirus”, dhe të dy duket se kanë dalë nga kafshët në tregjet famëkeqe të kafshëve të egra të Kinës. Ekspertët kishin parashikuar prej kohësh që këto tregje, të njohura si burime të mundshme të sëmundjes, do të mundësonin një shpërthim tjetër.

Tregjet dhe tregtia e kafshëve të egra që i mbështesin ato, janë problemi themelor i këtyre pandemive; derisa Kina ta zgjidhë atë problem, ka shumë të ngjarë të shfaqen sërish.

Virusi aktual është përhapur shumë sesa Ebola në 2014, dhe Organizata Botërore e Shëndetit e ka caktuar një pandemi.
Në vitin 2003, një virus shumë i ngjashëm me SARS-CoV-2 doli nga një treg në Foshan, Kinë. Ajo shkaktoi sëmundjen SARS, e cila u përhap në dhjetëra vende.

Ngjashmëritë midis dy viruseve shtron pyetjen: Pse sëmundjet e reja vazhdojnë të shfaqen nga Kina?

Ky episod i Vox Atlas shqyrton çështjen më të thellë të tregtisë së kafshëve të egra të Kinës dhe se si ajo po vë në rrezik shëndetin global, shkruan panorama.

Siç tregon eksperti Peter Li në video, “Shumica e njerëzve në Kinë nuk hanë kafshë të egra. Ata njerëz që konsumojnë këto kafshë janë të pasur dhe të fuqishëm – një pakicë e vogël” Kjo video shpjegon se si njerëzit e Kinës janë vetë viktima të kushteve që çuan në koronavirus.