Shantazhuesi Rexhep Hoti u ndëshkua me votë, shpërblehet me post të lartë

Emërimi i zëvendësministrave në qeverinë ‘ Isa Mustafa’ po bëhet në mënyrë të mjegullt dhe tejet të heshtur. Përllogaritjet në kthimin e ndereve, në mbylljen e gojës, apo mbajtja nën kontroll e ministrave që kanë nisur punë me reforma të thella, duket se janë shkaqet që e kanë detyruar koalicionin qeverisës që të veprojë në këtë mënyrë. Për më tepër, nga lista zyrtare që është ofruar nga Qeveria vërehet se në mjaft ministri janë emëruar njerëz të pakualifikuar, njerëz që nuk kanë treguar performancë të mirë në të njëjtën punë në të kaluarën, apo njerëz me një të kaluar të dyshimtë. Askush nuk di ta shpjegojë lidhjen e aktorit Lirak Çelaj me Ministrinë e Drejtësisë, ku është emëruar si zëvendës i Hajredin Kuçit. Realisht, drejtësia është kthyer në tragjedi nga vetë aktorët që përbëjnë drejtësinë dhe në këto kushte nuk kishte nevojë për një aktor të mirëfilltë. Ndërsa, në disa ministri janë emëruar të njëjtët zëvendësministra që kanë qenë më herët, pa analizuar më parë performancat e tyre, si Petrit Selimi në MPJ, Hajredin Hyseni në Ministrinë e Administratës, apo edhe Avni Kastrati në MTI. Ndërkaq, emrat të tjerë që janë bërë pjesë e sistemit qeverisës janë Bajram Gecaj në MAPL, Besa Gashi në MZHE, Ramadan Ilazi, në MI, Ferat Shala në MMPH, Rita Hajzeraj-Beqaj në MPMS, Vezir Januzaj në MB, Qaush Balaj në MKK, si dhe Rexhep Hoti në MKRS. Ndërkaq, emri i këtij të fundit është lakuar nga vetë autoritet e PDK-së, të cilat ai i ërfaqëson, si një njeri me një të kaluar jo të mirë. Ajo çfarë e bën më të rëndë situatën është se në postin e zëvendësministrit zgjidhet një person, i cili nuk ka arritur dot të marrë as pëlqimin e qytetarëve të Kosovës në zgjedhjet e fundit parlamentare.

Reforma e Shalës nuk është pritur mirë nga PDK-ja

Në Ministrinë e Kulturës, Rinisë dhe Sporteve ka nisur një reformë e thellë gjithëpërfshirëse, pas emërimit të ministrit Kujtim Shala. Kjo reformë duket se nuk është pritur mirë, madje, sipas burimeve nga Kryesia e PDK-së, pikërisht për këtë shkak dhe jo vetëm ka ndodhur edhe emërimi i Rexhep Hotit si zëvendësministër, me qëllim që të kontrollojë dhe të monitorojë veprimet e ministrit Shala. Pyetja shtrohet përse duhet një angazhim i tillë politik për të ndaluar ministrin Shala që të bëjë reformat në institucionet e kulturës? Në sektorë të ndryshëm të kulturës thuhet se Hoti u shpërblye me postin e zëvendësministrit për t’ia kompensuar argatllëkun, por edhe për t’ia mbyllur gojën që të mos i nxjerrë në shesh të palarat e shefit të partisë. Ndërkaq, nën zë po flitet se ministri Shala po i largon njerëzit e ashtuquajtur të SHIK-ut. Emërimi i Rexhep Hotit, i cili nuk i është përgjigjur thirrjes sonë telefonike, edhe nga pjesa e më e madhe e opinionit po shihet si një pengesë për punën e ministrit Shala.“Ministri Kujtim Shala është ndër të rrallët që është njeri i duhur në vendin e duhur dhe kur një gjë e tillë ndodh në Kosovë, atëherë i nxirren 1 milion pengesa, vetëm e vetëm për të dështuar. Sa u përket zëvendësministrave, ky është një funksion kot, që duhet ndaluar me Kushtetutë, sepse jo vetëm që e ngarkon kot buxhetin e Kosovës, por edhe shkakton telashe politike e organizative. Në rastin më të mirë, nëse zëvendësministri është njeri me prirje pozitive, ai nuk mund të bëjë asgjë pozitive, ngaqë ministri nuk i jep hapësirë, sepse atë gjë pozitive do që ta bëjë vetë. Në rastin më të keq, zëvendësministri është për ta penguar ministrin, duke shërbyer si një lloj komisari politik (kontrolli politiko-ideologjik) i emëruar nga lideri apo partneri i koalicionit”, është shprehur analisti politik, Nexhmedin Spahiu.

Kush është Rexhep Hoti?

Në qeverinë e drejtuar më herët nga Bajram Rexhepi, Hoti e ka kryer punën e këshilltarit politik, mirëpo ministri Rexhepi e pati shkarkuar nga detyra, siç u tha në atë kohë për standardet.
Shkarkimi i Hotit erdhi pas një letre të ish-zëvendësadministratorit të Kosovës, Çarls Brajshou, dërguar kryeministrit Bajram Rexhepi."Me prononcimet e tij të fundit publike, Hoti ka rrezikuar procesin e implementimit të standardeve të caktuara për Kosovën", thuhej në letrën e zëvendësadministratorit Brajshou. Ky nuk rezulton të jetë dështimi i vetëm i Hotit, pasi në zgjedhjet e fundit parlamentare Rexhep Hoti, përveçse u fut në listë nëpërmjet shantazheve, nuk arriti të kalonte as pragun. Burime nga brenda Kryesisë së PDK- së tregojnë se Rexhep Hoti, me mikun e tij, Baton Haxhiun, ka arritur të shantazhojë kreun e PDK-së, Hashim Thaçi, që ta fusë në listën të kandidatëve për deputetë. Fillimisht, sipas të njëjtave burime, ai u rendit i 12-ti në listën e kandidatëve, por referuar listës përfundimtare zyrtare u pa se Hoti kishte përfunduar tek numri 23. Por, pavarësisht kësaj, ai nuk arriti të merrte besimin e qytetarëve dhe përfundoi vetëm me 3,452 vota. Se Hoti ka pasur përplasje me njerëzit brenda llojit të tij dhe dyshimet se ai mund të ketë marrë edhe postin e zëvendësministrit nëpërmjet shantazheve e vërteton dhe një shkrim i vitit 2007, i gazetarit Milaim Zeka. “Kam folur me njerëz të Kryesisë së PDK-së, duke filluar që nga Jakup Krasniqi, Hajredin Kuçi, Fatmir Limaj, Bajram Rexhepi, e shumë të tjerë, dhe që të gjithë më kanë dhënë këtë përgjigje: Mos u merr me atë psikopat, të pabesë, qen e faqezi.“Shiheni pasurinë e Rexhep Hotit, që është bërë që nga ardhja e tij afër kryeministrit (Bajram Rexhepi). Shiheni se çfarë vlere kanë xhipat dhe makinat e tij dhe do të bindeni se sa të drejtë ka ky i panjeri të shajë e të etiketojë çdo njeri që ia di emrin”, shkruan Zeka.

Sulmet e Hotit nëpërmjet mediave të nëntokës

Pas dështimeve në fushën politike, në vitin 2006, Rexhep Hoti hapi gazetën “Infopress”(në fillim pa emër botuesi), të cilën e përdori për shpifje apo edhe shantazhe. Në këtë konstatim arrihet pasi Hoti ka përfunduar në gjykatë, për shkak të fushatës së shpifjeve, etiketimeve dhe akuzave të paargumentuara. Edhe për këtë çështje gazetari Milaim Zeka, në vitin 2007, kishte reaguar publikisht, duke iu drejtuar Hasim Thaçit. “Kam dashur disa herë të shkruaj dhe të reagoj ndaj sharjeve, etiketimeve dhe njollosjeve që po u bën një fletushkë me emrin Infopress, të cilën e drejton qeni turraxhi, me emrin Rexhep Hoti. Dhe, fatkeqësia më e madhe është se ky njeri flet në emrin e opozitës, madje më keq, në emrin tënd, o Hashim Thaçi. Ai më premtoi personalisht se nuk do të botonte shkrimin kundër meje dhe kur e botoi atë, më tha: Hashimi më dha urdhër me fjalët: futja edhe Zekës nga pak’, shkruan Zeka, duke të lënë të kuptosh dhe të dyshosh se vetëm për një gazetë informuese nuk bëhej fjalë, por për qëllime kriminale apo pastrim të parave. Në fakt, sipas hulumtimeve te gazetarëve të gazetës “Kosova Sot”, në vitin 2007, duket qartë se kemi të bëjmë me një akt të paligjshëm, siç është shpëlarja e parave, pasi humbjet e “Infopress-it” ishin shumë herë më të mëdha sesa fitimi. “Është e çuditshme që tani, pothuajse 6 muaj nga botimi i saj, ende nuk figuron emri i botuesit, i themeluesit të kësaj gazete. Kjo gazetë vetëm për shtypjen e saj, paga dhe shpenzimeve të tjera harxhon rreth 80.000 euro në muaj, kurse nga shitja e gazetës dhe marketingu nuk përfiton as rreth 15.000 euro në muaj. Në bazë të kësaj llogarie, del se humbja mujore arrin në shumën prej 65 mijë euro. Vetëm për 6 muajt e parë të nxjerrjes në treg del se Infopress ka një humbje financiare prej afro 400.000 euro, që në nivel vjetor mund të arrijë diku rreth 800.000 euro në vit”, thuhet në hulumtimin e gazetës “Kosova Sot’, të botuar më 01.02.2007.

Emërimet pa asnjë kriter

Analisti Blerim Burjani, duke iu referuar rastit Hoti dhe jo vetëm, kritikon emërimin e zëvendësministrave për çështje nderesh dhe jo kriteresh.“Partnerët e koalicionit janë marrë vesh që në mënyrë graduale të emërojnë njerëz joprofesionalë nëpër dikastere apo ministri, përveç ministrave të dobët joprofesionalë, ky koalicion gjithashtu ka filluar të"njëjtën këngë" me emërime të njerëzve në pozita të zv/ministrave pa kurrfarë kriteresh, madje minimale. Ky është bastardim i nocionit politik, shkencor apo artistik. Emërime për të zgjidhur probleme sociale dhe për të marrë paga nga taksa paguesit është emërtimi real i kësaj gjendje që ka katandisur qeverisjen e shtetit. Ministra përkthyes, ministra lojalë, ministra të dështuar fillimisht në jetën private akademike, kjo edhe më keq bën me dije se nuk ka kurrfarë ndryshimi të diskursit të dëmshëm për qytetarin. Qeveria e Kosovës pritet të ketë brenda këtyre ditëve apo muajve 21 zëvendësministra që do të marrin hiç më pak, e ndoshta përveç pagave gati 25 % të buxhetit të vendit së bashku me deputetët, bordet e shumta partiake. Vetëm paga për zëvendësministra priten të shpenzohen mbi gjysmë milioni euro, pa privilegje të tjera. Cili është kthimi i këtij investimi absurd, çka do të përftojnë qytetarët prej këtyre shpenzimeve të panevojshme?Asgjë, vendnumërim të problemeve të tyre dhe vazhdimin e ikjes prej shtetit. E vërteta është se këta s’po duan të kuptojnë e as që janë të interesuar të marrin vesh për asgjë. Zvarritja është strategji e katundit, ngadalë, për të mos pasur zhurmë në opinionin publik, që këta zëvendësministra që do të emërohen do të shpenzojnë parat e taksapaguesve, hiç më pak se gjysmë milioni euro vetëm paga, pa ia shtuar mëditjet dhe tarahitjet e vazhdueshme në emër të lobizimit për njohje të shtetit. Kjo klasë politike politikën e kupton si zgjidhje për probleme familjare, klanore, partiake, por aspak për zgjidhje të problemeve shoqërore dhe ekonomike”, është shprehur Burjani.

Kosova Sot

Shokohet Serbia, BE i kërkon njohje direkte të Kosovës

Serbia në Bruksel ka marrë një lajm shokues. BE i ka kërkuar asaj njohje të drejtëpërdrejtë të Kosovës.

Gazeta serbe “Novosti” shkruan sot, se teksti i projekt-platformës për Kapitullin 35, i cili të mërkurën në Bruksel i është dorëzuar Marko Gjuriqit, Shef i Zyrës për Kosovën në qeverinë e Serbisë, ka 49 pikë, shumica e të cilave nuk janë neutrale ndaj statusit, por çojnë në njohjen e drejtpërdrejt të pavarësisë së Kosovës.

Në këtë dokument sipas kësaj gazete, propozohen të gjitha kurthet të cilave Beogradi kishte vështirësi t’u shmangej gjatë negociatave të Brukselit mes Kosovës dhe Serbisë.

Veçanërisht e pafavorshme për Serbinë është pjesa që lidhet me sistemin e energjisë elektrike në Kosovë, sepse praktikisht kërkohet që të jetë një sistem unik dhe i vetëm, me qendër në Prishtinë.

Prishtina dhe Beogradi sipas këtij dokumenti do të duhet të nënshkruajnë marrëveshje konkrete, për të cilat një pjesë e BE-së kërkon që ato të jenë marrëveshje në mes të dy shteteve, qëllimi përfundimtar i të cilave është normalizimi i marrëdhënieve, që dërgon në njohjen e Kosovës dhe anëtarësimin e saj në OKB, transmeton lajmi.net.

Këtë projekt-platformë e ka komentuar edhe kryeministri serb Aleksandar Vuçiq, i cili ka thënë se ajo është krejtësisht e papranueshme për Serbinë. “Unë shpresoj se ai dokument i tmerrshëm nuk ka për t’u diskutuar”, ka thënë Vuçiq.

Presidentja e Kosovës Atifete Jahjaga, pritet të aktivizohet në lehtësimin e krizës politike në vend.

Ajo së shpejti do të thërrasë në takim liderët e dy blloqeve të politikës kosovare.

Lajmi u konfirmua nga zyra e presidentes Jahjaga, thekson se pas zhvillimeve të fundit në parlament, Presidentja Jahjaga ka vendosur të luajë rol aktiv për tejkalimin e gjendjes së krijuar ndërmjet pozitës dhe opozitës.

Ajo po konsideron opsionet për te ushtruar rolin e saj kushtetues dhe për të garantuar funksionimin demokratik të institucioneve, thuhet në përgjigjen zyrtare të presidentes Jahjaga.

Klan Kosova mëson se po shqyrtohen edhe mundësitë e takimeve veç e veç ose edhe të përbashkëta në spektrin politik.

Ky qëndrim i Jahjagës vjen vetëm një ditë pasi e para e shtetit takoi ambasadorin amerikan Greg Delaëie, i cili poashtu ftoi spektrin politik që nëpërmjet debatit, të tejkalojë ngërçin e krijuar.

16 vjet më parë: Xhirimet që tronditën Serbinë në ’99

Gjatë luftimeve të vitit 1999, para bombardimeve të NATO-s, botën e përshkoi një video. Në të shfaqet një fshat i braktisur (Mihaliqi i Vushtrrisë) dhunshëm nga banorët shqiptarë, pasi që ishte bombarduar nga forcat militare serbe.

Në xhirim pastaj, nga distanca, kapen forcat serbe duke plaçkitur dhe djegur fshatin.

Në mesin e ushtarëve e policëve serbë, kishte edhe serbë në uniforma civile.

Ndaj kësaj videoje kishte reaguar makineria propaganduese e kasapit të Ballkanit, Sllobodan Milosheviq, sepse në të shiheshin të gjitha fytyrat e këtij regjimit fashist antishqiptar: një regjim që vret, spastron etnikisht, shkatërron, djeg, vjedh…

Për më shumë, shikojeni videon.

Sherr i madh mes Preç Zogaj dhe Andrea Stefanit në emisionin "Opinion" tek Blendi Fevziu

Në emisionin e Blendi Fevziut në emisionin "Opinion" në TV KLAN ishin të ftuar edhe PreçZogaj e Andrea Stefani. Tema ishte për çështjen CEZ dhe KLSH. Por në një moment shpertheu shumë egër Andrea Stefani duke e akuzuar Zogaj se je spiun të ish-sigurimit të shtetit ,i shitur, maskara, qelbësirë dhe që nderron qendrim sipas stines e interesit personal politik, etj . Mënjëherë u kundërpërgjigj Preç Zogaj duke e akuzuar Stefanin si të shitur dhe se do ta sjellë vendimin e gjyqit dhe ta ngulë në ballë mu këtu në studio o i pa ftyrë, etj. Por situata u tensionua shumë keq sa ishin gati të përballeshin edhe fizikisht. Ndërsa moderatori Fevziu, me një dinakeri profesionale, i la të kacafyteshin duke iu thënë "qetesohuni!", por priste me pasion prapë sherrin që të vazhdonte pasi shikueshmeria e emisionit kapi në ato momente përqindje të madhe. Stefani vazhdoi të lëshonte akuza të tjera të rënda ndaj Zogajt.

Emisioni vazhdoi në këtë linjë fyerjesh duke i thënë njeri tjetrit "idiot", "edhe ti je idiot",etj.

Flet eksperti i sigurisë,Hajrullah Tërnava : ulni gjakrat, situata mund të eskaloj shumë lehtë

Eksperti i sigurisë Profesor kolonel Hajrullah Tërnava, thotë se situata e krijuar në Kosovë kërkon dialog të partive, në të kundërtën ajo lehtë mund të eskaloj.

“Mire është sipas përvojës së tanishme që të mendohet në të ardhmen të përfshihen administratorë shtetëror si Prokurorit, Gjyqet, Policia me ligj që të jenë apolitik sepse atëherë nuk do ti furnizojnë simpatizantët e tyre në Parlament me armë si lotsjellësit që sot e konfirmoj opozita. Me armatim pajisen sipas ligjeve pozitive vetëm policia e shtetit dhe sipas ligjeve i përdorin ato autorizime vetëm në rastet e parapara me ligj e sidomos lotsjellësi kryesisht përdoret në hapësira për shpërndarjen e demonstruesve e jo si ne rastin e kuvendit apo banesa”, vlerëson Tërnava .

Sipas tij, rasti i opozitë me veprimet e saj, do të ju shërbej si mësim i keq mjerisht edhe qeverive të ardhshme, sepse opozita si pakicë në parlament duke mos ju përmbajtur kritereve demokratike e në mënyrën sikur i pamë gjithnjë do të jenë të gatshme ta ngufasin demokracinë parlamentare.

“Tani grupet parlamentare duhet ngushtë të bashkëpunojnë dhe ti kontribuojnë daljes nga kjo krizë parlamentare. Nëse nuk gjejnë rrugëdalje atëherë duhen të shkojnë edhe me zgjedhje të parakohshme parlamentare me këtë qeveri apo nëse ndryshe nuk bënë, të shkohet me Qeveri teknike apartiake. Garantues të rendit dhe qetësisë është policia e Kosovës, por nëse kjo situatë eskalon për masa të mëdha kufijtë dhe rendin e qetësinë në Kosovë e ruan KFOR dhe NATO”, potencon ai.

A është Kosova në krizë apo jo?

Cila është e vërteta? A është Kosova në krizë apo jo? Nëse nuk jemi në krizë pse duhet të ketë një dialog jashtë institucioneve, si ka bërë thirrje Presidentja e vendit dhe ambasadori amerikan Greg Delawie.
Të enjten shprehimisht është shprehur kryetari i Kuvendit të Kosovës Kadri Veseli, se vendi po hyn në një krizë të re.
Ndërkohë, që ambasadorja gjermane është shprehur qartë se vendi nuk ka krizë institucionale dhe se partitë në pushtet e kanë një shumicë stabile.
“Unë nuk shoh një krizë, sepse ju keni një Qeveri të zgjedhur, të cilët kanë 82 ulëse në Parlament. Pra, ata kanë një shumicë stabile, e cila nuk mund të rrezikohet nga opozita, prandaj nuk ka krizë institucionale dhe ajo që ata po mundohen të bëjnë, është plotësisht e papranueshme”, ka thënë Ambasadorja Gjermane në Kosovë, Angelika Viets.
Ngjashëm është shprehur kryeministri Mustafa duke theksuar në një deklaratë të bërë të premten që të zhbllokohet Kuvendi, ndërsa gjendjes së krijuar nuk i është referuar si krizë, por si bllokim të institucionit të Kuvendit nga opozita.
“Si kryeministër i Qeverisë së Republikës së Kosovës kërkoj të zhbllokohet sa më shpejt puna e Kuvendit të Republikës së Kosovës, në mënyrë që ne të vazhdojmë me përmbushjen e obligimeve që kemi marrë para qytetarëve të Republikës së Kosovës”, ka deklaruar Mustafa.
Ndoshta për t’iu kundërpërgjigjur kryekuvendarit Veseli për shkak të cilësimit se vendi është në krizë, apo për shkak se tashmë edhe shumë deputetë dhe analistë po vlerësojnë se në këtë krizë ka dorë, ish struktura e SHIK-ut, të cilën e udhëhiqte Veseli, kryeministri ka kërkuar që të zgjidhet situata duke zbatuar aktet ligjore nga Kushtetuta e deri tek Rregullorja e Punës së Kuvendit, që këtë të fundit Veseli nuk po e zbaton sipas pretendimeve të LDK-së. “Kjo duhet të bëhet duke zbatuar rregullat, ligjet dhe Kushtetutën e Republikës së Kosovës”, ka deklaruar Mustafa. Pra, me këtë Kryeministri i bën thirrje të drejtpërdrejt Veselit që ta zhbllokojë Kuvendin dhe duke e fajësuar në një mënyrë për gjendjen!