Shkruan: Prof.Dr.Jakup Krasniqi : ÇKA JANË KËTO HARTA NË QARKULLIM?

-Çfarë mesazhi përcjellin këto?


Disa harta e një draft marrëveshje me disa pika po qarkullon në portale e rrjete sociale. Disa nga pikat kyçe të draft-marrëveshjes së propozuara të “traktatit të miqësisë dhe fqinjësisë së mirë” ndërmjet Serbisë dhe Kosovës.

Për hartën (hartat) më së miri, mendimin e tij e ka shprehur politologu ynë i njohur, Bardhyl Mahmuti, i cili thotë: “Prezantimi i hartës është bërë me mjeshtri që të krijohet iluzioni se në këtë shkëmbim territoresh gjoja Kosova fiton më shumë se sa Serbia! Këtu kemi të bëjmë me një manipulim të fëlliqtë në funksion të krijimit të një klime të favorshme për t’i dhënë territoret e Kosovës Serbisë dhe për të ‘marrë’ territoret që padrejtësisht janë ndarë prej saj”.

Sigurisht, jo vetëm hartat janë mashtrim, mashtrim është edhe teksti që i përcjell hartat dhe ku krijohet përshtypja se Serbia po humb territor dhe Kosova po fiton territor?! Prandaj kush është ai i marrë që i beson kësaj përralle? Jo, 1001 herë jo, kjo marrëveshje nuk është duke u bërë për ta bërë më të madhe Kosovën, por për ta kënaqur Serbinë. Por, mos të flasim as për ketë, por të flasim si i kemi punët në mes veti? Këtu e shoh unë problemin kryesor.

Si po na gjen kjo marrëveshje?

Kushdo që gjatë muajve të fundit e veçmas ditëve të fundit i ka përcjellë me vëmendje zhvillimet politike e sidomos debatet politike në mes partive politike në përgjithësi, por edhe ato në mes të koalicionit qeverisës e partive opozitare në veçanti, nuk ka si mos të jenë të zhgënjyer. Të zhgënjyer jo vetëm për nivelin kulturor të debatit, përmbajtjen dhe kulturën e komunikimit për çdo çështje. Zhgënjimi më i madh është se edhe për çështjen më vitale të interesit kombëtar, nuk kemi ndonjë kulturë e përgjegjësi komunikimi me seriozitet. Nuk kemi përgjegjësi as për marrëveshjen politike me Serbinë e disponuar shumë armiqësisht ndaj vendit tonë e kombit përgjithësisht, por nuk jemi duke menduar për sigurinë në nivelin gjithëkombëtar.




Në situata të tilla, kur priten kthesa të mëdha që mund të përcillen me rreziqe të shumtë, përgjegjësitë e institucioneve të shteteve tona do të duhej të arrinin unitetin e mendimit dhe të veprimit. Po, cila është gjendja reale në këto çështje të mëdha? Gjendja është, ashtu si do ta dëshironin armiqtë tanë! Jemi krejt të çakorduar. A të gjithë e dimë se as çiftelia që i ka vetëm dy tela pa e akorduar, këngëtari nuk mund të këndoj.

Atëherë çka duhet bërë?

Kështu si jemi, është si të shkosh në mal pa sopat, mbase edhe më keq. Ne një situatë të çoroditur politike brenda vendit e kombit (e kam parasysh gjendjen në Kosovë e në Shqipëri), dialogun me Serbinë duhet lenë për kohë më të mira.

Së pari, duhet ta normalizojmë komunikimin brenda për brenda koalicionit parazgjedhor, i cili lenë për të dëshiruar shumë;

Se dyti, duhet ta sjellim në kufirin normal komunikimin në mes partive të koalicionit qeverisës me ato opozitare, i cili është krejt i zymtë, dhe

Se treti, duhet ta formmësojmë dialogun në nivelin gjithëkombëtar sa herë që është në pyetje siguria e gjithë shqiptarëve në Gadishullin Ilirik. Për ketë çështje nuk kujdeset askush?!

Kur ta arrijmë komunikimin normal e të përgjegjshëm brenda kombit, atëherë mund të themi se jemi të gatshëm të zhvillojmë dialogun për marrëveshje finale me Serbinë e cila pa dyshim është kundërshtari ynë dy shekullor, se paku që nga koha e Garashaninit (1844).

Krejt në fund. Dialogun nuk guxojmë t’ia varim në qafë e as t’i besojmë asnjë individi, ma cilido qoftë ai. Sa herë që për çështjet tona madhore, kanë vendosur individët, fati tragjik për kombit ka vazhduar. Mos të lejojmë të na përsëritur e ditura paraprakisht!

Kështu do të duhej të ishte, sa jemi është diçka tjetër!

Mos të mbjellim iluzione ne njisha e me njisha të çakorduar!

Labinot Greiçevci tregon se cilat janë vijat e kuqe në dialog sipas raportit “Zëri i Popullit rreth ‘Finales së Madhe’ Kosovë-Serbi”

Drejtori i Institutit Kërkimor për Çështje Evropiane dhe të Zhvillimit (RIDEA) , Labinot Greiçevci, në një intervistë për Telegrafi.com me gazetarin Muhamet Hajrullahu, ka folur rreth sondazhit të realizuar nga ky institut lidhur me çështjen e dialogut Kosovë-Serbi, të titulluar ” Zëri i Popullit rreth ‘Finales së Madhe’ ndërmjet Kosovës dhe Serbisë”.

Labinot Greiçevci ka treguar se në këtë sondazh numri i të anketuarëve ka qenë 1110 persona në 38 komuna të Kosovës.





Ai më tej ka shtuar se sondazhi ka qenë i ndarë në katër kategori.

“Kemi realizuar sondazhin në katër kategori si vijon: 1. ndërprerja ose mosndërprerja e dialogut ndërmjet Kosovës dhe Serbisë; 2. vijat e kuqe të Kosovës në lidhje me fazën finale të dialogut; 3. në rast të marrëveshjes përfundimtare ndërmjet Kosovës dhe Serbisë, a duhet Kosova të kërkojë të bashkohet me Shqipërinë; dhe 4. perceptimi i qytetarëve të Kosovës lidhur me tre skenarët për një marrëveshje eventuale ndërmjet Kosovës dhe Serbisë”, tha Greiçevci.

Duke folur rreth gjetjeve që ka bërë ky institut gjatë realizimit të këtij sondazhi, e veçanërisht tek vijat e kuqe të Kosovës në lidhje me fazën finale të dialogut ky hynë liqeni i Ujmanit, Trepça, Lugina e Preshevës dhe Veriu i Kosovës, sipas rezultateve shumica e qytetarëve kanë deklaruar që këto duhet të mbesin brenda territorit të Kosovës.








“I kemi pyetur qytetarët se a duhet që liqeni i Ujmanit të mbetet pjesë e Kosovës apo jo, ku 96% të shqiptarëve kanë thënë se duhet të mbetet në Kosovë dhe 5% e respodentëve serbë mendojnë njëjtë. Sa i përket Trepçës, 99% e të anketuarve shqiptarë kanë thënë se Trepça duhet të mbetet pjesë e Kosovës dhe vetëm 9% e qytetarëve serbë ndajnë të njëjtin mendim. Tek çështja e Luginës së Preshevës 62% e të anketurarëve kanë thënë se kjo pjesë duhet ti bashkohet Kosovës, ndërkaq 0% nga serbët kanë qenë pro kësaj ideje. Kurse 91% e shqiptarëve mendojnë që Veriu i Kosovës nuk duhet t’i bashkohet Serbisë dhe vetëm 10% e qytetarëve serbëve janë pro këtij mendimi”, ka deklaruar Greiçevci.

Drejtori i Institutit Kërkimor për Çështje Evropiane dhe të Zhvillimit (RIDEA) , Labinot Greiçevci, gjatë intervistës për Telegrafi.com

Drejtori i Institutit Kërkimor për Çështje Evropiane dhe të Zhvillimit (RIDEA) , Labinot Greiçevci, gjatë intervistës për Telegrafi.com

Greiçevci po ashtu ka deklaruar se shumica e popullsisë së Kosovës është kundër ndërprerjes së dialogut ndërmjet Kosovës dhe Serbisë.

“Në përgjithësi, 62% e të gjithë të anketuarve nuk pajtohen me ndërprerjen e dialogut ndërmjet Kosovës dhe Serbisë. Si shqiptarët dhe serbët në Kosovë pajtohen që dialogu ndërmjet Kosovës dhe Serbisë duhet të vazhdojë”, u shpreh ai

Politologu Ramush Tahiri ka bërë me dije se Kosova nuk duhet të bisedojë me Serbinë për korrigjim të kufirit para se kjo e fundit ta njohë Republikën e Kosovës.

Ai ka deklaruar se diskutimi për këtë çështje në këtë fazë të procesit është i rrezikshëm për Kosovën. Në këtë intervistë dhënë gazetës “Epoka e re”, Tahiri ka thënë se korrigjimi i kufirit në mes të dy vendeve mund të ndodhë vetëm pasi Kosova të bëhet anëtare e OKB-së.

Ramush Tahiri

“Pa u pranuar Kosova në OKB dhe pa u pranuar në mënyrë bilaterale nga shtete e tjera, sikurse janë pranuar Maqedonia dhe Mali i Zi, nuk bën të diskutojë për korrigjim të kufirit. Një herë Kosova duhet të pranojë se e ka një kufi shtetëror me Serbinë dhe si tillë ai duhet të pranohet nga shteti serb, pastaj mund të hyhet në debate të tjera”, ka thënë Tahiri.

Ai ka kundërshtuar idenë e ndarjes dhe të shkëmbimit të territoreve në mes të dy vendeve.

Sipas Tahirit, kjo do të sillte pasoja të rënda për qytetarët e të dy shteteve dhe në këtë mënyrë do të pranohej teoria fashizoide, se shqiptarët dhe serbët nuk mund të jetojnë me njëri-tjetrin. “Mendoj se edhe bashkësia ndërkombëtare nuk është për ndarje ose për këmbim të territoreve. Sepse në këtë mënyrë do të pranohej teoria fashizoide, se ne nuk mund të jetojmë me njëri-tjetrin. Unë konsideroj se shqiptarët dhe serbët mund të jetojnë me njëri-tjetrin dhe si popuj nuk duhet të jemi të armiqësuar”, ka thënë Tahiri.

Më tej, ai ka vlerësuar se Kosova dhe Serbia mund të ecin përpara vetëm duke respektuar parimin e shtetit qytetar. “Kosova dhe Serbia mund të ecin përpara vetëm duke i pranuar kufijtë ekzistues të tyre. Kosova dhe Serbia mund të ecin përpara vetëm duke i respektuar pakicat që i kanë brenda kufirit të tyre, si shqiptarët ashtu edhe serbët. Në këtë mënyrë Kosova dhe Serbia mund të ecin përpara duke qenë shtete qytetare e jo duke qenë shtete etnike”, është shprehur Tahiri.

“Epoka e re”: Z. Tahiri, në forume të ndryshme po debatohet ideja se në fazën finale të dialogut me Serbinë mund të diskutohet ndarja e Kosovës, apo shkëmbimi i territoreve me Serbinë. I shihni të realizueshme këto ide?


Tahiri: Ndarja, apo shkëmbimi i territoreve ndërmjet Kosovës dhe Serbisë, nuk është ide e mirë. Mendoj se duhet të kemi një periudhë të gjatë paqeje dhe mirëkuptimi në mënyrë që t’ua lëmë gjeneratave të ardhshme të vendosin për këto çështje. Sepse ato gjenerata nuk do t’i kenë paragjykimet e kaluara. Konsideroj se në këtë fazë Kosova dhe Serbia duhet ta pranojnë njëra-tjetrën. Kosova duhet të anëtarësohet në OKB, mandej si dy shtete ta relativizojnë kufirin, që ta bëjnë krejt të parëndësishme për qytetarët e dy të vendeve se në cilin shtet jetojnë. Kjo do të ishte ide më e mirë sesa t’i nxjerrim teoritë e së kaluarës, se mirë jetohet vetëm në shtetet etnike dhe se vetëm kufijtë mund të sigurojnë qetësi. Në rastin e Kosovës dhe Serbisë kufiri etnik është shumë e vështirë të përcaktohet. Sepse kemi mjedise që popullata jeton e përzier, sikurse kemi mjedise në Kosovë që nuk kanë lidhje territoriale, siç është Manastiri i Deçanit, Patrikana e Pejës, Graçanica, Novobërda e disa fshatra të tjera me shumicë serbe. Çdo këmbim ndërmjet Kosovës dhe Serbisë do të prodhonte fatkeqësi dhe shpërngulje të popullatës. Pra, në këtë fazë veprimet e tilla do të shkaktonin pakënaqësi dhe armiqësi për dekada me radhë ndërmjet Kosovës dhe Serbisë.

“Epoka e re”: Duke qenë të vetëdijshëm për këto pasoja, besoni se bashkësia ndërkombëtare mund ta lejojë realizimin e këtyre ideve?


Tahiri: Mendoj se edhe bashkësia ndërkombëtare nuk është për ndarje ose për këmbim të territoreve. Sepse në këtë mënyrë do të pranohej teoria fashizoide se ne nuk mund të jetojmë me njëri-tjetrin. Unë konsideroj se shqiptarët dhe serbët mund të jetojnë me njëri-tjetrin dhe si popuj nuk duhet të jemi të armiqësuar. Ndërsa përgjegjësit që kanë bërë krime gjatë luftës duhet të dalin para drejtësisë dhe ta marrin dënimin e merituar. Nëse dikush flet për këmbim territoresh duke e bërë një hartë dhe duke menduar se a fitojnë më shumë serbët apo shqiptarët, mendoj se e ka gabim. Në këtë fazë, teoria se mund të jetojmë me njëri-tjetrin dhe se të drejtat qytetare janë mbi të drejtat nacionale, që nënkupton teorinë e shtetit qytetar, është më e përshtatshme. Pra, teoria e Evropës është se nuk ka ndarje, por pranim të ndërsjellë të shteteve, të cilat duhen të jenë mbi parimin qytetar, kurse kufiri mes tyre duhet të jetë vetëm formal.

“Epoka e re”: Pra, këto ide nuk mund t’u sigurojnë dy shteteve perspektivë të sigurt?

Tahiri: Kosova dhe Serbia mund të ecin përpara vetëm duke i pranuar kufijtë ekzistues të tyre. Kosova dhe Serbia mund të ecin përpara vetëm duke i respektuar pakicat që i kanë brenda kufirit të tyre, si shqiptarët ashtu edhe serbët. Në këtë mënyrë Kosova dhe Serbia mund të ecin përpara duke qenë shtete qytetare e jo duke qenë shtete etnike.

“Epoka e re”: Presidenti i Kosovës, Hashim Thaçi, derisa po e kundërshton ndarjen, po e përmend mundësinë e korrigjimit të kufirit në mes të dy shteteve. Çfarë nënkupton kjo për ju?


Tahiri: Së pari, Kosova duhet të pranohet si shtet nga Serbia pastaj, në mënyrë të vullnetshme dhe të dyanshme, nëse dëshirojnë, mund të bëjnë edhe korrektim të kufirit. Këtë mënyrë të veprimit besoj se e përkrah edhe Evropa. Çështja e terminologjisë, korrektim kufiri, ndryshim kufiri, dhe këmbim kufiri mund të jetë e njëjtë ose e ndryshme, varësisht prej opsionit që është në tavolinë. Për shembull, një korrektim kufiri ka të bëjë nëse një lumë do të jetë këndej ose andej kufirit, apo nëse një kodër do të jetë këndej apo andej. Çështja e korrektimit të kufijve me opsione që Kosova do ta japë Leposaviqin dhe Leshakun e do të marrë Preshevën e Tërnocin, nuk janë të mira për opinion dhe nuk janë çështje për t’i diskutuar në publik. Ato bisedohen në tavolinë ku duhet të shihet edhe interesi i banorëve që jetojnë në ato vise.Kosova më herët e ka bërë një gabim, ku i ka formuar komunat serbe pa i pyetur banorët e fshatrave se a dëshirojnë të bëhen pjesë e kësaj apo asaj komune. Tani gabimi nuk bën të përsëritet, sepse mund të shkaktohen përsëri pakënaqësi te qytetarët. Mirëpo për Kosovën është e rrezikshme të diskutohet për korrigjim të kufirit pa e vërtetuar kufirin. Së pari duhet të përcaktohet kufiri administrativ i ish-Krahinës Socialiste Autonome të Kosovës, i garantuar me Kushtetutën e vitit 1974, dhe i pranuar edhe nga Komisioni i Badinterit, i cili thotë se kufijtë administrativë bëhen kufij shtetërorë. Pra, kjo duhet të pranohet nga Serbia, të nënshkruhet marrëveshja se ky kufi administrativ bëhet kufi shtetëror, pastaj komisionet e përbashkëta mund të vendosin se a do të kalojë një fshat këndej kufirit apo andej. Apo se a do të kthehet gjendja e vitit 1959, ku Kosova i kishte disa fshatra të Preshevës, ndërsa nuk e kishte Leposaviqin dhe Leshakun. Po përsëris edhe një herë, se pa u pranuar Kosova në OKB dhe pa u pranuar në mënyrë bilaterale nga shtetet e tjera, sikurse janë pranuar Maqedonia dhe Mali i Zi, nuk bën të diskutojë për korrigjim të kufirit. Një herë Kosova duhet të pranojë se e ka një kufi shtetëror me Serbinë dhe, si tillë, ai duhet të pranohet nga shteti serb, tek pastaj mund të hyhet në debate të tjera.

“Epoka e re”: Përmendja e Luginës së Preshevës nga presidenti nga shumë opinionistë është parë edhe si lojë e tij?

Tahiri: Presidenti Thaçi e fut në lojë Luginën e Preshevës për faktin se edhe Vuçiqi po i fut në lojë serbët e Kosovës. Pra, është e drejtë e të dy presidentëve që të flasin për pakicat kombëtare që i kanë në shtetet e tyre.

“Epoka e re”: Ka një kohë që shoqëria e Kosovës po debaton rreth fazës finale të dialogut me Serbinë. A po përgatiten si duhet institucionet tona për këtë fazë të procesit?

Tahiri: Fatkeqësisht, Kosova nuk po i përgjigjet mirë kësaj faze të dialogut. Derisa në Serbi ka një farë uniteti për këtë çështje, në Kosovë nuk ka. Ani pse në Serbi ka unitet funksional, sepse partia e Vuçiqit e ka marrë shumicën dërrmuese në Kuvend, te ne koalicioni qeverisës nuk e ka atë shumicë, plus është i varur prej Listës Serbe. Atë që unë si politolog e shoh si mangësi, është se ne nuk e kemi një platformë për këtë fazë të dialogut, e cila do të duhej të miratohej në Kuvend.

“Epoka e re”: Çfarë do të duhej të përmbajë një platformë e tillë?

Tahiri: Ajo platformë mund të jetë shumë e thjeshtë. Pika e parë e kësaj platforme duhet të jetë se Kosova hyn në bisedime me Serbinë si shtet sovran, i pavarur dhe i barabartë. Së dyti, se Kosova në këtë proces do ta respektojë Kushtetutën dhe ligjet e saj në përpikëri. Së treti, Kosova në këtë fazë do ta respektojë vullnetin e popullit të saj dhe synimet afatgjatë për integrime evropiane e euroatlantike. Së katërti, do të duhej të ceket se çdo marrëveshje që do të nënshkruhet në Bruksel do të ratifikohet në Kuvend me dy të tretat e votave. Dhe, së pesti, do të duhej të ceket se bisedimet politike do t’i udhëheqë presidenti i vendit si figurë unifikuese. Meqenëse unë kaq thjesht i përmenda këto pesë pika, edhe presidenti ose Qeveria ka mundur ta prezantojë një platformë të tillë në Kuvend. Sepse pa kaluar në Kuvend një dokument i tillë, nuk mund të krijohet uniteti.

“Epoka e re”: Po reagimin e opozitës për këtë fazë të dialogut, si e keni parë?

Tahiri: Tani për tani opozita nuk ka një dokument bazë për këtë proces. Ne mund ta kritikojmë atë, por meqenëse nuk ka ndonjë dokument bazë të pushtetit për këtë çështje, është normale që ajo të kritikojë. Këtë argument opozitës mund t’ia heqë pushteti, nëse e çon një dokument në Kuvend me këto pikat që i përmenda më lart. Natyrisht se pajtohem që opozita po luan lojë politike, sepse ajo në këtë mënyrë dëshiron të fitojë tek elektorati dhe dëshiron ta zhveshë Qeverinë. Mirëpo në këtë moment Qeveria dhe presidenti po i ndihmojnë opozitës, ngaqë nuk po e bëjnë shumë hesap dhe nuk po i ofrojnë ndonjë platformë për këtë proces.

Muhamet KOCI

MANIPULIM I FËLLIQTË!

Bardhyl Mahmuti

Ditëve të fundit më kanë ardhur mesazhe të cilat gjoja mbështeten në materialet ekskluzive të burimeve të vendimmarrjes ndërkombëtare në bisedimet Kosovë – Serbi.

Për të qenë më bindëse në atë që shpërndahet në emër të “vendimmarrjes ndërkombëtare”, shkrimi shoqërohet edhe me një hartë të territoreve që parashihen “të shkëmbehen me marrëveshje”!

Prezantimi i hartës është bërë me mjeshtri që të krijohet iluzioni se në këtë shkëmbim territoresh Kosova fiton më shumë se sa Serbia! Këtu kemi të bëjmë me një manipulim të fëlliqtë në funksion të krijimit të një klime të favorshme për t’i dhënë territoret e Kosovës Serbisë dhe për të “marrë” territoret që padrejtësisht janë ndarë prej saj.

P.S. Në këtë rast nuk e përdora termin “i kulluar” ose i “pastër”, sepse nuk ka asgjë të pastër e as të kulluar në këtë manipulim të fëlliqtë!

Shqiptarëve ua prisnin kokat dhe bënin llampa me kafkat e tyre!

Në luftën e fundit në Kosovë, policia dhe ushtria serbe ekzekutoi dhe masakroi mbi 15.000 shqiptar. Ata, nuk kursyen asnjë shtresë apo gjini, fëmijë, pleq, gra dhe të rritur, duke ushtruar çdo lloj torture mbi shqiptarët, vrasje, mizori, tortura, dhunime, persekutime, prerje gjymtyrës, vepra më çnjerëzore, vepra të cilat mund t’i bënin vetëm kanibalët ose mund të ndodhnin në mesjetë.

Përveç vrasjeve dhe torturave në Kosovë nga kriminelët serbë janë djegur 116.000 shtëpi, mijëra gra të dhunuara dhe ndjekja e mbi 900.000 mijë banorëve të Kosovës.

Për krimet serbe janë më shumë se 20.000 fotografi të dërguara si fakte te Komisioni për Krime Lufte, të cilat dëshmojnë krimet e kryera të kriminelëve serb, e aty ka pas edhe dëshmi për varrezat masive.

Për krimet serbe në Kosovë kanë folur edhe disa serbë të cilët kanë thënë se krimet e bëra ndaj shqiptarëve në Kosovë nuk po munden me i harrua.

Por, pse atëherë shqiptarët po i harrojnë? Pse kriminelët serb, të cilët kanë kryer krime në Kosovë, kanë ushtruar dhunë, kanë maltretuar qytetarë të pafajshëm, kanë vrarë e kanë prerë fëmijë, gra, pleq nuk po gjykohen?

Rasti i fundit që serbët i kanë përkujtuar krimet e tyre të bëra në Kosovë është i dy ish pjesëtarëve të njësisë Specialë të Policisë së Serbisë, Sllobodan Stojanoviq dhe Jovan Golluboviq. Ata kanë luftuar në Kosovë, ku nga afër i panë krimet e bëra të kolegëve të tyre.

“Gjatë luftës në Kosovë, komandant e kishim Sreten Lukiqin”, ka thënë Stojanoviq.

“Kishte gjithçka, vrasje të fëmijëve shqiptarë. Pash kolegun që ia pret kokën civilëve, mashkullit dhe femrës, e pastaj i zinte. Ai i ka marrë pastaj kafkat dhe i dërgonte në shtëpi për të bërë llamba. Këtë e bëjnë vetëm psikopatët”, thotë Stojanoviq.

Jovan Golluboviq, njëri nga ish-pjesëtarët e njësisë 37 speciale serbe në Kosovë, tregon për një shqiptar të plagosur, duke mos përmendur emër dhe as vend.

Njeriu lutej për mëshirë, por njëri nga pjesëtarët e njësisë speciale i sugjeron “që të fotografohen me të për të pasur fakte”. Golluboviq njofton bazën se ka të plagosur, por komandanti i njësisë Mitroviq thotë “dërgojeni për t’u rrezitur”, që nënkuptonte se duhej vrarë vetëm pse ishte shqiptar.

“S’jetohet me këtë”, shton miku i tij. “Isha dëshmitar i vrasjes së një plaku 80 vjeçar. E di në cilin pus e futën. E di ku janë varrezat masive, sepse unë ata njerëz i varrosa. Me veturë ia mësyu gruas dhe vajzës… e askush nga policia nuk ka reaguar”, thotë ai.

“Ata nuk janë policë, por kriminelë. E di se si kanë pastruar paratë e përgjakura për të blerë qengjin e pjekur. E di se gruaja e tij mban florinj të marrë nga trupat e shqiptareve të vrara”, është rrëfimi i tyre.

Ish-pjesëtarët e forcës speciale serbe thonë se trupat e civilëve të vrarë i linin në vendin e vrasjes dhe ndodhte shpesh që kamionët e forcave serbe të kalonin mbi kufoma.

Ata flasin edhe për raste të veçanta kur një i moshuar shqiptar ishte vrarë në vend, pa asnjë arsye edhe pse ishte i paarmatosur dhe pas vrasjes vendosin ta hedhin në bunar.

Ndër rastet më të tmerrshme të kryera është edhe ai i këputjes së kokës së një shqiptari të vrarë nga policët e çetës së Pirotit. Njëri prej policëve të kësaj çete i kishte marrë kufomës tre dhëmbë të artë, ndërsa kokën e tij e kishte gatuar dhe kur ishte kthyer në shtëpi e kishte bërë llambë të tavolinës.

Shikone videon e plotë me dëshmitar e cila është ne gjuhën serbe dhe e përkthyer ne gjuhën angleze.

Presidenti i Kosovës, Hashim Thaçi, dhe presidenti serb, Aleksander Vuçiq, flitet se kanë hartuar një dokument me dymbëdhjetë (12) pika, për marrëveshjen Kosovë –Serbi e për të cilën dy krerët e shteteve janë marrë vesh vetëm në parim.

Në formulimin e këtij dokumenti ka marrë pjesë edhe Bashkimi Evropian.

Këtë e ka konfirmuar deputetja e Lidhjes Demokratike të Kosovës, Vjosa Osmani.

Ajo thotë se në këtë dokument është përfshirë çështja e korrigjimit të kufijve, Trepça dhe disa çështje të tjera të cilat kanë të bëjnë me trashëgiminë.

“Në qarqe diplomatike flitet për një dokument njëfaqësh, pra marrëveshje të parimeve, e cila do të trajtojë korrigjimin e kufirit, çështjen e kishave, të Trepçës dhe të tjera”, ka thënë Osmani për Express.

Ajo thotë se ky dokumenti në të cilin trajtohen më gjerësisht këto 12 pika nuk do të vijë fare për ratifikim në Kuvendin e Republikës së Kosovës, duke kujtuar se njësoj ishte vepruar edhe me marrëveshjen e vitit 2013 ndërmjet Thaçit dhe Daçiqit.

“Thuhet që dokumenti përcjellës që i trajton në detaje këto tema, nuk vjen për ratifikim në Kuvendin e Kosovës, por vetëm ajo e marrëveshjes së parimeve. Pak a shumë kjo është çfarë ka ngjarë në vitin 2013 kur marrëveshja mes Thaçit dhe Daçiqit përfshinte parimet themelore, por marrëveshjet zbatuese të atyre parimeve asnjëherë nuk kanë ardhur për ratifikim në Kuvend” ka shpjeguar Osmani.

Ajo thotë se nuk bëhet fjalë për një dokument final, por për një draft marrëveshje.

Osmani thotë se në hartimin e këtij drafti ka marrë pjesë edhe Bashkimi Evropian.

Presidenti i Serbisë Aleksandar Vuçiq, si dikur Sllobodan Millosheviqi, ka deklaruar sot në Vërnjaçka Banjë, se shteti nuk do të lejojë që dikush t’i ngucë serbët në Kosovë.

Ai ka shtuar se populli serb në Kosovë po kërcënohet çdo ditë, ndërsa ka përmendur parullën e tij tashmë të njohur e demagogjike se “Serbia është për ruajtje të paqes e të stabilitetit”, ndërsa ka shtuar se këtë nuk duhet marrë si shenjë dobësie dhe se nuk do ta lejojë Kosovën ta sulmojë popullin tonë.

“Në Kosovë kemi njerëz që sillen me papërgjegjësi, nuk e kanë plotësuar atë që shkruan në marrëveshjen e Brukselit. Detyrimin e vetëm të Bashkësisë së Komunave serbe, pastaj kanë vënë taksën 100 për qind për mallrat e Serbisë me dëshirën që ta shkatërrojnë popullin serb në Kosovë, që ta dëbojnë nga vatrat shekullore dhe t’i sjellin dëm Serbisë. Ne këtë dëm mund ta përballojmë, por nuk do të heqim dorë nga ruajtja e interesave tona kombëtare e shtetërore”, citon b92 të ketë thënë Vuçiq, percjell Koha.Sipas ti, “Serbia nuk po shet trimëri aspak, sikur disa që dikur shinin trimëri e pastaj ikën ku këmbët kryet”.

“Çdo ditë po na kërcënojnë me bashkimin e Mitrovicës, porosia jonë është e qartë- do ta ruajmë paqen, por mos mendoni që kjo është shenjë e dobësisë, nuk do t’iu lejojmë as juve dhe as askujt ta sulmoni popullin tonë” .

Millosehviq në vitin 1986 kishte qëndruar për vizitë në Fushë – Kosovë dhe atëherë u kishte thënë serbëve: “Askush nuk guxon t’ju rrahë” duke paralajmëruar kështu sulmet institucionale, policore u ushtarake kundër Kosovës.