Daçiq: Më së miri për Serbinë është që unë të jem kryeministër

 

Ivica Daçi

Trashëgimtari i kriminelit të luftë Sllobodan Millosheviq në pozitën e kreut të Partisë Socialiste të Serbisë, Ivica Daçiq synon pozitën e kryeministrit të Serbisë pas zgjedhjeve parlamentare dhe presidenciale në Serbi më 3 prill.

I pyetur se ku e sheh veten pas zgjedhjeve, Daçiq thotë se është herët për të folur për këtë, “por se partia e tij ka dashur të jetë e sinqertë”, ndaj e ka emëruar atë si kandidat për kryeministër.

Kreu i socialistëve mendon se kjo “do të ishte më e mira për Serbinë”.

“Vuçiqi është një, por ai është kandidat për president dhe do të zgjidhet president. Mendoj se mund t’i bëj disa gjëra më mirë se disa nga kuadrat e tij. Nga ana tjetër, do të ishte shumë e dobishme dhe mendoj se është më e mira për stabilitetin politik të Serbisë që unë të jem kryeministër dhe ai të jetë president”, pretendon Daçiq.

Shefi i NATO-s, Jens Stoltenberg: NATO-s mund t'i duhet të shtojë forcat në lindje

 

Shefi i NATO-s, Jens Stoltenberg

Shefi i NATO-s, Jens Stoltenberg ka folur në një konferencë për shtyp, ku tha se pushtimi rus i Ukrainës ka krijuar një "realitet të ri sigurie" në Evropë.

Ai thotë se pozicioni ushtarak i NATO-s duhet të jetë gati për këtë realitet të ri.

Nesër udhëheqësit e NATO-s do të fillojnë të diskutojnë masat konkrete për të përforcuar sigurinë për një afat më të gjatë kohor, thotë Stoltenberg.

Në tokë, këto masa mund të përfshijnë "më shumë forca" në pjesën lindore të aleancës, thotë ai, në një gjendje më të lartë gatishmërie.

Ne do të konsiderojmë gjithashtu "rritje të mëdha" në shpërndarjet tona detare dhe ajrore, forcimin e mbrojtjes raketore dhe ajrore, dhe gjithashtu rritjen e mbrojtjes kibernetike, tha ai.

Stoltenberg thekson se përforcimi i mbrojtjes në aleancë do të kërkojë para shtesë dhe ai ka mirëpritur lëvizjet e Gjermanisë dhe aleatëve të tjerë të NATO-s në këtë drejtim.

NATO ngre alarmin: Rusia mund të përdorë armë kimike ose biologjike në Ukrainë

 

Jens Stoltenberg

Më shumë tani nga konferenca për shtyp e Jens Stoltenberg. Shefi i NATO-s thotë se Rusia "po bën pretendime absurde për laboratorët biologjikë dhe armët kimike" në Ukrainë. "Kjo është vetëm një gënjeshtër tjetër," thotë ai, duke vënë në dukje se Rusia fillimisht kishte thënë se nuk kishte në plan të pushtonte Ukrainën.

"Ne jemi të shqetësuar se Moska mund të organizojë një operacion 'flamur të rremë', ndoshta duke përfshirë armë kimike," tha Stoltenberg.

Një flamur i rremë është një veprim politik ose ushtarak i kryer me qëllimin për të fajësuar një kundërshtar për të. Stoltenberg thotë se çdo përdorim i armëve kimike është "absolutisht i papranueshëm". 

SHBA ka ngritur më parë shqetësime të ngjashme, me Shtëpinë e Bardhë duke thënë se kombet duhet të jenë në vëzhgim që Rusia "mund të përdorë armë kimike ose biologjike në Ukrainë, ose të krijojë një operacion të rremë duke i përdorur ato".

Paralajmëron ish-presidenti ukrainas: Jo vetëm Ukrainën, Putin synon t’i marrë edhe këto vende!

 

Ish-presidenti ukrainas Petro Poroshenko ka paralajmëruar se Vladimir Putin nuk do të ndalet së pushtuari Ukrainën nëse Perëndimi nuk ndërhyn.

Duke folur për Sky News, ai tha se Putin po kërkon Krimenë dhe rajonin e Donbasit nga Ukraina sot, por nesër ai do të kërkojë Skocinë nga Britania e Madhe dhe Alaskën nga SHBA, transmeton "Bota sot".

“Ai dëshiron të shkatërrojë jo vetëm Ukrainën, por të gjithë Perëndimin, përfshirë Britaninë e Madhe dhe SHBA-në”, tha ai.

"Mos u përpiqni të bëni një kompromis me Putinin," paralajmëroi ai, duke argumentuar se presidenti rus "do të shkojë gjithmonë më tej".

Poroshenko tha se sulmi ajror në Lviv gjatë fundjavës, vetëm një distancë e shkurtër nga kufiri polak, ishte "simbolik" dhe tregoi se Putini është i gatshëm ta çojë konfliktin një hap më tej.

Bombardimet e forcave ruse i afrohen qendrës së Kievit

 

  

Bombardimet e forcave ruse iu afruan të martën më pranë qendrës së Kievit, ndërsa një sërë predhash goditën zona të banuara të kryeqytetit. Shpërthimet e fuqishme u dëgjuan të martën në agim.

Zyrtarët thonë se ato ishin goditje me artileri. Duket se sulmi i forcave ruse ndaj Kievit po bëhet më sistematik.

Presidenti i Ukrainës Volodymyr Zelensky tha se predhat e artilerisë goditën katër ndërtesa shumë-katëshe në qytet duke shkaktuar dhjetëra të vrarë. Goditjet e së martës në një rajon në perëndim të Kievit, i dhanë fund një qetësie disa ditore në qytet, që kur autokolona e gjatë me mjete të blinduara ruse ishte bllokuar në afërsi të qytetit në ditët e para të luftës.

Bombardimet shkaktuan një zjarr të madh në një ndërtesë 15 katëshe. Kryetari i Bashkisë së Kievit Vitali Klitçko shpalli gjendjen e shtetrrethimit për një periudhë 35 orëshe, që do të zgjasë deri në orën 7 të mëngjesit të enjten.

Organizata Ndërkombëtare e Migrimit tha të martën se numri i banorëve ukrainas që janë larguar nga vendi i kaloi 3 milionë. OKB-ja thotë se kjo është kriza më e madhe e refugjatëve në Evropë, që nga Lufta e Dytë Botërore.

“Po na masakrojnë në Ukrainë”/ Ushtarët rusë me duart në kokë: Na falni, na gënjyen

 

  

“Na falni, na gënjyen, na tradhtuan edhe ne ashtu si ju”: dikush me duart në kokë, një tjetër që nuk mban dot lotët: konferenca për shtyp e një grupi ushtarësh rusë të kapur rob në Ukrainë, është përhapur me shpejtësi në rrjet. 7 oficerët e zbulimit rus u rrëzuan me avionët e tyre javën që shkoi. Më vone, iu dha mundësia të flisnin për gazetarët dhe të kërkonin ndjesë për veprimet e vendit të tyre.

“I kërkoj ndjesë për veten time dhe për skuadrën time çdo shtëpie, çdo rruge e çdo qytetari të Ukrainës, të moshuarve, grave, fëmijëve tokat e të cilëve i kemi pushtuar. Kërkoj falje thellësisht për këtë pushtim të pabesë. Krerëve të njësive tona ushtarake u them një gjë: u sollën si burracakë, e u treguan të pabesë edhe me ne”, tha njëri prej ushtarëve, 34 vjecari Galkin Sergey Alekseevich nga Roschchinsky i Rusisë.

“I bëj thirrje shtoi ai, të gjithë regjimenteve ruse në Ukrainë të ulin armët e të tërhiqen, dhe presidentit Vladimir Vladimirovich Putin i them t`i japë fund luftimeve, t`i japë fund dërgimit të ushtarëve rusë këtu për të vrarë civilë. Apeli i tij i dëshpëruar erdhi në kohën kur disa ushtarë të demoralizuar rusë telefonuan më herët familjet e tyre duke i thënë se “në Ukrainë, po i masakrojnë”, ndërsa një parashutist shpërtheu në lot kur ukrainasit e ndihmuan të telefonte nënën e tij.

Zelensky nuk largohet nga zona e luftës/ Kryeministrat e tre shteteve europiane do të udhëtojnë sot për në Kiev

  

Liderët e tre shteteve europiane do të udhëtojnë për në Kiev për tu takuar me presidentin ukrainas Volodymyr Zelensky dhe kryeministrin ukrainas Denis Shmyhal.

Në një njoftim, zyra e shtypit tha se kryeministri polak Mateusz Morawiecki, zëvendëskryeministri Jarosław Kaczyński, kryeministri çek Petr Fiala dhe kryeministri slloven Janez Janša do të vizitojnë kryeqytetin e Ukrainës si përfaqësues të Këshillit Europian.

“Vizita është organizuar në konsultim me Presidentin e Këshillit Evropian Charles Michel dhe Presidenten e Komisionit Evropian Ursula von der Leyen. Qëllimi i vizitës është të konfirmohet mbështetja e qartë e të gjithë Bashkimit Evropian për sovranitetin dhe pavarësinë e Ukrainës. Qëllimi i kësaj vizite është gjithashtu të paraqesë një paketë të gjerë mbështetjeje për Ukrainën dhe ukrainasit”, thuhet në deklaratë.