Kryeçetniku serb Aleksandër Vuçiq: Delegacioni i Kosovës nuk pranoi të takohemi Presidenti i Serbisë, Aleksandar Vuçiq, tha se delegacioni i Kosovës nuk ka dashur të takohet me delegacionin serb në samitin e Komunitetit Politik Evropian në kryeqytetin moldav, Kishinau

Kryekrimineli serb Aleksandër Vuçiq

 Vuçiq: Delegacioni i Kosovës nuk pranoi të takohemi Presidenti i Serbisë, Aleksandar Vuçiq, tha se delegacioni i Kosovës nuk ka dashur të takohet me delegacionin serb në samitin e Komunitetit Politik Evropian në kryeqytetin moldav, Kishinau – ku Kosovën po e përfaqëson presidentja Vjosa Osmani. 

 “Nuk u miratua nga liderët e tjerë. Situata në Kosovë, së bashku me Ukrainën, u bë temë kryesore e takimit të Komitetit Politik Evropian. Serbia gjithmonë dëshiron bisedime dhe mua më duket se tani është më e qartë se kush është përgjegjës për dhunën në Kosovë”, u tha Vuçiq gazetarëve. Pala kosovare nuk e ka konfirmuar se ka refuzuar takimin. 

 I pyetur se kur e pret një takim dypalësh me kryeministrin e Kosovës, Albin Kurti, ai tha se nuk e di. Ai tha se ulja e tensioneve në veri të Kosovës dhe vendosja e garancive për shmangien e veprimeve unilaterale ishin temat kryesore gjatë takimeve të tij me presidentin e Francës, Emmanuel Macron, dhe kancelarin e Gjermanisë, Olaf Scholz. 

 Me dy liderët e Gjermanisë dhe Francës, në Moldavi u takua edhe Osmani, e cila tha se me ta diskutoi për situatën në veri dhe “përpjekjet tona të përbashkëta për paqe, siguri dhe stabilitet”. Takimet u zhvilluan në margjinat e samitit të Komunitetit Politik Evropian në kryeqytetin moldav, Kishinau, ku po merr pjesë edhe përfaqësuesi i Lartë i Bashkimit Evropian, Josep Borrell. 

 Borrell u takua një ditë më parë me Kurtin në Bratisllavë ku po mbahej Konferenca për Siguri Globale. Më 1 qershor 2023 ai udhëtoi në Kishnau, ku u takua edhe me  kriminelin serb Aleksander Vuçiqin.

 “Theksova se është me rëndësi prioritare që institucionet në Prishtinë ta ndalojnë dhunën dhe t'i kthehen dialogut”, tha Vuçiqi, pas takimit me Borrellin. 

 Gjatë pjesëmarrjes së tij në samitin në Moldavi, Vuçiqi e ka theksuar edhe rëndësinë që ka themelimi i Asociacionit të komunave me shumicë serbe në Kosovë për të. 

 “Pas kësaj duhet të fokusohemi në themelimin e Asociacionit të komunave me shumicë serbe në Kosovë, që u nënshkrua dhjetë vjet e gjysmë më parë me Marrëveshjen e Brukselit. Besoj se njerëzit tani e kanë një pasqyrë më të qartë të asaj që po ndodh, pavarësisht se a e njohin vendet e tyre Kosovën apo jo”, tha Vuçiq. Ai shtoi se nevojitet një zgjidhje e qëndrueshme kompromisi. 

 “Ne duhet të bindim njerëzit në Ballkan se kompromisi nuk është një gjë e keqe. Nuk është e lehtë, të gjithë janë të radikalizuar dhe askush nuk dëshiron të dëgjojë ide normale”, tha Vuçiq. Duke iu drejtuar gazetarëve në Kishinau në margjinat e samitit të Komitetit Politik Evropian, Vuçiq përmendi se ka pasur një takim të shkurtër jozyrtar edhe me presidentin e Ukrainës, Volodymyr Zelensky. “U takova me një njeri që nuk e njeh pavarësinë e Kosovës”, tha Vuçiq, teksa shtoi se me Zelenskyn kanë diskutuar për integritetin territorial të Serbisë dhe Ukrainës. 

 “Ai më tha, siç i thashë, se ne e mbështesim integritetin territorial të vendeve tona. Ishte një takim shumë i shkurtër, nuk mund t'ju them më shumë se kaq”, tha Vuçiq. Samiti po mbahet në një kohë tensionesh në veri të Kosovës. Situata në këtë pjesë u tensionua qysh më 26 maj, kur Policia e Kosovës ndihmoi kryetarët shqiptarë të komunave me shumicë serbe të hyjnë në zyrat komunale, përkundër rezistencës së banorëve lokalë. 

 Më 29 maj 2023 , nga përleshjet midis protestuesve serbë që kundërshtojnë kryetarët dhe ushtarëve të KFOR-it në Zveçan - 30 ushtarë mbetën të plagosur, ashtu si edhe dhjetëra protestues. NATO-ja ka thënë se është e gatshme të dërgojë edhe më shumë trupa në Kosovë, për të qetësuar dhunën në veriun e vendit, të banuar me shumicë serbe, tha të enjten shefi i aleancës, Jens Stoltenberg.

 Ai shtoi se 700 trupat e para përforcuese janë tashmë në rrugë për në Kosovë. Kryetarët e rinj shqiptarë të komunave Mitrovicë e Veriut, Zveçan, Zubin Potok dhe Leposaviq kanë dalë nga zgjedhjet e jashtëzakonshme të 23 prillit 2023 , të cilat janë bojkotuar nga komuniteti serb.

Prokurorët e Kosovës Besim Kelmendi e BLerim Isufaj pjesë e Konferencës Finale për Luftimin e Krimeve të Rënda në Ballkanin Perëndimor

 

PRISHTINË | 30 MAJ 2023 | 

Ushtruesi i Detyrës së Kryeprokurorit të Shtetit, z. Besim Kelmendi, së bashku me Kryeprokurorin e Prokurorisë Speciale të Republikës së Kosovës, z. Blerim Isufaj, prokurorë nga Prokuroria Speciale e Republikës së Kosovës dhe Prokuroria Themelore në Prishtinë, si dhe zyrtarë të lartë të Policisë së Kosovës, po marrin pjesë në Konferencën Ndërkombëtare Finale për Luftimin e Krimeve të Rënda në Ballkanin Perëndimor, e cila po mbahet në Romë të Italisë dhe mbështetet nga Bashkimi Evropian (BE).

Në këtë Konferencë po diskutohet për bashkëpunimin e vendeve të Ballkanit Perëndimor, me qëllim të luftimit të krimeve të rënda, shkëmbimin e përvojave të këtyre vendeve dhe mënyrat e avancimit të këtij bashkëpunimi në funksion të luftimit të krimeve të rënda dhe forcimit të sundimit të ligjit.

Ish-komandanti i FSK-së, gjeneral major Kadri Kastrati : ShBA gaboi që përjashtoi FSK-në nga ‘Defender Europe’

PRISHTINË | 30 MAJ 2023 | 

Ambasadori amerikan në Kosovë, Jeffrey Hovenier, ka thënë në një takim me disa gazetarë në Prishtinë, se stërvitje në kuadër të ushtrimit ndërkombëtar “Defender Europe ’23”, nuk do të ketë për Kosovën.

Krejt kjo pasi Qeveria nuk përfilli kërkesat e amerikanëve sa i përket situatës në veri, e që kishin të bënin me tërheqjen e njësiteve policore nga tri ndërtesat komunale në veri dhe të kryetarëve të komunave nga ato objekte.

“Sot nuk ka pasur aktivitet për Defender Europe ’23, dhe nuk do të ketë. Për Kosovën, ato stërvitje kanë përfunduar”, tha ambasadori.

Ish-komandanti i FSK-së, Kadri Kastrati, thotë për teve1.info se përjashtimi nga kjo stërvitje është hendikep i madh për FSK-në por që nuk i rrezikon aspiratat e Kosovës për anëtarësim në NATO.

“Ky përjashtim nuk i rrezikon aspiratat e Kosovës për anëtarësim në NATO, mirëpo është shumë një hendikep i madh për Ushtrinë e Kosovës sepse ka qenë një mundësi e madhe sepse që një vit e gjysmë që ushtria e Kosovës ka marrë pjesë në planifikimin, përgatitjen e ushtarëve, oficerëve e nënoficerëve për me e zbatu këtë ushtrim, me marrë një eksperiencë shumë të madhe në planifikim dhe ekzekutim të ushtrimeve, me ndërtu ura në mes oficerëve, nënoficerëve e ushtarëve të NATO-s me ushtrinë e Kosovës, me marrë përvoja në përdorimin e pajisjeve dhe armatimeve moderne që i ka NATO-ja, faktikisht e ka hup një mundësi të madhe që ushtria e Kosovës dhe oficerët e saj me marrë këtë përvojë shumë të madhe, mirëpo jemi ku jemi, ne jemi të vegjël për me vendos diçka ndryshe nga amerikanët”, tha Kastrati.

Sipas tij amerikanët bën gabim me përjashtimin e Kosovës nga ky ushtrim, pasi sipas tij, nëse do të duhej të kishte sanksionim, kjo do të duhej të bëhej për politikanët.

“Mua po më vjen keq shumë që amerikanët e kanë ndërmarrë një hap të tillë sepse ushtria nesër do t’i nevojitet edhe NATO-s, edhe amerikanëve, nëse diku duhet që ushtria e Kosovës të merr pjesë në misione paqeruajtëse, humanitare apo të tjera. Mendoj që nuk kish dashtë që kjo të ndodhë të ushtria e Kosovës. Nëse ish dashtë që të ndërmirret ndonjë aksion, është dashtë te politikanët e jo te ushtria që jo vetëm neve por edhe aleatët i ka bë krenarë kudo që ka marrë pjesë në ushtrime, trajnime apo aksione humanitare. Mendoj që është një gabim i aleatit tonë, ShBA-së, që ka marrë këtë veprim ndaj ushtrisë së Kosovës”, përfundoi Kastrati.

E ambasadori amerikan Hovenier, ka thënë që po mendohet edhe të mirren masa të tjera ndaj Kosovës, pas mosbindjes ndaj kërkesave amerikane.

“Ne i kemi kërkuar [kryeministrit të Kosovës, Albin] Kurti për të ndërmarrë hapa të menjëhershëm për të shtensionuar situatën në veri. Ai nuk u është përgjigjur këtyre kërkesave. Prandaj, ne po shqyrtojmë se çfarë do të jenë veprimet tona të tjera”, tha ai.

Ministri i Mbrojtjes, Armend Kadri Mehaj thotë se sulmet ndaj KFOR-it janë të papranueshme

 

PRISHTINË | 30 MAJ 2023 | 

Ministri i Mbrojtjes, Armend Mehaj, është shprehur i shqetësuar për pjesëtarët e lënduar të KFOR-it në veri të vendit.

Përmes një postimi në Twitter, Mehaj ka shkruar se veprime të tilla nga grupet kriminale, janë të papranueshme.

“Thellësisht i shqetësuar për pjesëtarët e lënduar të KFOR-it në veri të 🇽🇰. Veprime të tilla nga grupe kriminale janë të papranueshme dhe minojnë përpjekjet për paqe. KFOR-i dhe Policia janë të përkushtuara për të garantuar siguri për të gjithë qytetarët! Ne qëndrojmë të bashkuar kundër dhunës”, thuhet në postimin e Mehaj.

Kujtojmë se NATO ka vendosur që të dislokojë forca shtesë, pasi 30 ushtarë të misionit të saj paqeruajtës në Kosovë, KFOR, u lënduan gjatë përleshjeve me protestuesit serbë në Zveçan.

Sekretari i Përgjithshëm i NATO-s, Jens Stoltenberg thotë se NATO brenda ditëve sjell në Kosovë 700 trupa shtesë

 

PRISHTINË | 30 MAJ 2023 | 

Sekretari i Përgjithshëm i NATO-s, Jens Stoltenberg, ka deklaruar sot se brenda disa ditësh, do të dërgojmë 700 trupa të tjera në Kosovë.

Veç kësaj, ai sot deklaroi se do vendosin edhe forca shtesë në gatishmëri më të lartë, transmeton klankosova.tv.

”Këta janë hapa të kujdesshëm, duke siguruar që NATO_KFOR të ketë forcat dhe aftësitë që i nevojiten për të përmbushur mandatin e saj të OKB-së”.

Prof.dr.Ferat Shala: Miqësia me ShBA është produkt i UÇK-së, kushdo që e cenon shkel mbi gjakun e dëshmorëve

 

PRISHTINË | 30 MAJ 2023 | 

Deputeti i Partisë Demokratike të Kosovës, Prof.dr.Ferat Shala, ka reaguar në lidhje me deklaratat e fundit të Ambasadorit të SHBA-së, Jeffrey Hovenier, duke thënë se miqësia me Shtetet e Bashkuara të Amerikës është produkt i mundit e sakrificës të shumë brezave.

Sipas deputetit të PDK-së, kushdo që e cënon këtë miqësi të shenjtë, sipas tij shkel mbi këtë mund e gjak, dhe “tradhëton amanetin e të gjithë dëshmorëve të rënë për lirinë e Kosovës”.

“Miqësia me SHBA është produkt i djersës, mundit e sakrificës të shumë brezave, i gjakut të UÇK-së. Kushdo që e cënon këtë miqësi të shenjtë, shkel mbi këtë mund e gjak, dhe tradhëton amanetin e të gjithë dëshmorëve të rënë për lirinë e Kosovës”, ka shkruar Shala.

Kryeministri i Koosvës zt.Albin Kurti po rrezikon raportet me USA-të, të ndryshojë urgjentisht qasjen dhe pozicionin e tij

 

PRISHTINË | 30 MAJ 2023 | 19:41 | Nga Ekonomia Online

Partia Demokratike e Kosovës është e shqetësuar me zhvillimet e fundit që e kanë sjellë Kosovën në përballje të rrezikshme me aleatët tanë, veçanërisht me Shtetet e Bashkuara të Amerikës, dhe kërkon nga Qeveria e Republikës së Kosovës që të rimendojë dhe të ndryshojë urgjentisht qasjen e saj.

Kryetari i Partisë Demokratike të Kosovës, Memli Krasniqi, në mbledhjen e sotme të Kryesisë së PDK-së, u shpreh i shqetësuar me zhvillimet e fundit në vend dhe me drejtimin e përgjithshëm që ka marrë Kosova nën drejtimin e Kryeministrit Albin Kurti.

Kryesia e Partisë Demokratike të Kosovës shpreh zhgënjimin e thellë për veprimet e pakoordinuara të Qeverisë së Kosovës me aleatët strategjikë të vendit tonë, që tashmë kanë filluar të rezultojnë me ndëshkime të drejtpërdrejta, pasi Kosova u përjashtua nga stërvitja më e madhe ndërkombëtare e NATO-s në rajonin e Ballkanit, “Defender Europe 2023”. Ky përjashtim është shenjë konkrete e përkeqësimit të raporteve të Kosovës me SHBA-në dhe NATO-s dhe është paralajmërim për pasoja të tjera, nëse Qeveria e Republikës së Kosovës nuk fillon të sillet në mënyrë të përgjegjshme.

Po ashtu, Kryesia e Partisë Demokratike të Kosovës e dënon fuqishëm dhunën e grupeve kriminale të drejtuar kundër pjesëtarëve të KFOR-it, por edhe Policisë së Kosovës, dhe veçanërisht kundër përfaqësuesve të mediave, të cilët janë penguar dhe sulmuar në kryerjen e detyrës së tyre në shërbim të informimit të qytetarëve.

Anëtarët e Kryesisë shprehën mbështetje të plotë për kryetarët e komunave të Zubin Potokut dhe Zveçanit, që vijnë nga radhët e PDK-së, të cilët me përgjegjshmëri kanë treguar gatishmëri për t’ju shërbyer të gjithë qytetarëve, pa dallim, por edhe bëjnë thirrje për rikthimin e normalitetit për të mundësuar zbatimin e mandateve të tyre.

Edhe një herë, duke pasur parasysh peshën dhe kompleksitetin e situatës si dhe tensionet e ngritura në pjesën veriore të vendit, Kryesia e Partisë Demokratike të Kosovës i bën thirrje Presidentes dhe Kryeministrit që të mbledhin urgjentisht Këshillin e Sigurisë së Kosovës.

Kryesia e Partisë Demokratike të Kosovës vlerëson se situata e krijuar kërkon qasje të përgjegjshme të institucioneve të Kosovës e jo veprime populiste të momentit që mund të sjellin pasoja afatgjata për të ardhmen e vendit.

Partia Demokratike e Kosovës fton të gjithë qytetarët e Kosovës që të ruajnë qetësinë dhe të mos bëhen pjesë e çfarëdo manipulimi apo sjelljeje të dhunshme e cila cenon rendin, ligjin dhe demokracinë në vendin tonë dhe që rrezikon të ketë pasoja afatgjata për shtetin tonë.