Ish Prokurori Komunal i Prishtinës ,tash avokat Tahir Rrecaj thotë :EULEX-it nuk duhet as dy ditë t’i vazhdohet mandati në Kosovë

Avokati Tahir Rrecaj ka thënë se mospranimi i një numri dëshmish dhe vendimi lirues i gjykatës për akuzat ndaj Fatmir Limajt tregojnë se krejt rasti ishte montuar nga vendorët dhe ndërkombëtarët.

Në Info Magazine të Klan Kosovës, ai ka deklaruar se duhet kompensuar dëmi që i është bërë Limajt, ndërsa ka kërkuar që misionit të EULEX-it në Kosovë të mos i vazhdohet as edhe dy ditë, lëre më dy vjet siç është kërkuar.


“Është i kuptueshëm reagimi dhe fjalimi emocional i Fatmir Limajt, pasi akuzat ndaj tij kanë qenë të pabaza. Besoj ju kujtohen ngjarjet spektakolare të viti 2010, bastisjet dhe arrestimi i Limajt, si dhe deklarata e ish-kryeprokurorit të EULEX-it për këtë çështje, se kinse kanë dëshmi që ai ka keqpërdorur 80 milionë euro”, tha ai. “Prokuroria nuk ka pasur asnjë provë dhe do të ishte e çuditshme që të ankohen në këtë vendim, pasi edhe vet ngritja e akuzës ka qenë e habitshme, marrë parasysh faktin që nuk ka pasur fakte, kur kjo është bërë. Ky është një rast i montuar nga vendorët dhe ndërkombëtarët”.

Sipas tij, “ky rast dhe rastet tjera kanë dëshmuar që misioni i EULEX-it ka dështuar në Kosovë”.

“Ata kanë pasur mision sundimin e ligjit, por kanë punuar dhe vepruar ashtu siç nuk duhet. Unë kurrë nuk kam marrë shembull nga puna e tyre, pasi kanë dështuar krejtësisht. Mandati nuk duhet t’u vazhdohet as edhe dy minuta, lëre më dy vjet, sic po propozohet”, ka thënë Rrecaj.

Kinezi nga Nanchang ankohej për dhimbje të mëdha në bark, mjekët i nxjerrin ngjalën nga trupi

https://www.youtube.com/watch?v=_l0vYUzYzFs

Ngjala

Një burrë rreth të ’40-ve është pranuar në spitalin kinez Nanchang me disa probleme (bizare) shëndetësore.

Pasi ankohej se kishte dhimbje të mëdha në bark, mjekët vendosën t’i bëjnë një rëntgen ku edhe konstatuan se në trupin e tij gjendej një ngjalë


Ajo ishte futur në bark përmes anusit derisa ai ishte nën ndikim të alkoolit, por ka refuzuar t’ua shpjegoj mjekëve se si kishte përfunduar në anusin e tij ngjala.

Pas një intervenimi të vogël kirurgjik mjekët kanë arritur t’ia heqin ngjalën, por ata dyshojnë se ajo ishte futur brenda qëllimisht, duke mos pranuar të japin detaje.

Kryetari i Kuvendit të Kosovës dhe lideri i Partisë Demokratike: : Njerëz që luftojnë krimin kanë orë të shtrenjta e shumë gra të Kosovës,

Kryetari i Kuvendit të Kosovës dhe lideri i Partisë Demokratike të Kosovës, Kadri Veseli, ka thënë se disa njerëz që luftojnë krimin kanë orë të shtrenjta, makina e shumë gra.

Veseli në emisionin ‘Betimi për Drejtësi’ ka thënë se të njëjtit bëjnë edhe pushime të shtrenjta.


“Disa njerëz që luftojnë krimin kanë orë të shtrenjta, makinat, shumë gra e shumë pushime…. Me rrogë 700 euro nuk mund ta kesh veturën e 80 mijë eurove”, ka thënë Veseli, në emisionin që për temë kishte “Vetingu për policët, prokurorët dhe gjykatësit”.

Ai nuk ka përmendur emra konkret, por gishtin e ka drejtuar kah pjesë të caktuara të Policisë së Kosovës, sidomos, pjesës që merret me hetimin e krimeve ekonomike.

Kryeministri i Kosovës, Ramush Haradinaj:Deklarimet e ish-kryetarit të Gjyqtarëve të EULEX-it, Malcolm Simmons do respektoheshin më shumë, sikur të fliste më herët

Kryeministri i Kosovës, Ramush Haradinaj, është intervistuar nga Politico.eu për deklarimet e ish-kryetarit të Gjyqtarëve të EULEX-it, Malcolm Simmons, i cili, pos tjerash, deklaroi se EULEX-i për motive politike kishte për qëllim eliminimin nga skena politike të Fatmir Limajt

Haradinaj ka thënë se “deklarimet e Simmons do të respektoheshin më shumë nëse do të thuheshin më herët gjatë kohës së ka shërbyer në Kosovë dhe jo në fund të mandatit të tij”.


Kryeministri, që po qëndron në Bruksel, ka pohuar edhe se në stafin e EULEX-it kryesisht ka gjyqtarë të mirë, porse ka shqetësime kohë pas kohe për në kualitetin e këtij misioni.

“Ka (pjesëtarë të EULEX-it) që janë të përkushtuar për rend dhe ligj. Por, ekziston shqetësimi nganjëherë për kualitetin dhe standardet që përdoren”, tha Haradinaj për Politicon

Gjenerali Fatmir Limaj pritet të lirohet pas skandaleve në EULEX, thuhet se SMS-at u montuan

U deshën më shumë se shtatë vite që trupi gjykues të vërtetojë atë që pala mbrojtëse në rastin e Fatmir Limajt, e thoshte në çdo seancë.

Të pretenduara si mesazhe telefonike në mes të Endrit Shalës -këshilltar politik i Fatmir Limajt dhe biznesmenit Florim Zuka, për shpërdorim të detyrës zyrtare dhe krim të organizuar, ato janë hedhur poshtë si provë.


Kjo ngase është vërtetuar se SMS-at janë të falsifikuara.

Kësisoj Gjykata e ka pranuar si provë materiale ekspertizën e “Cyber-Forensik”, përkatësisht të ekspertit Francisco Manuel dos Ramos Nunes, që ka gjetur se mesazhet të cilat janë pretenduar të jenë shkëmbyer mes Shalës dhe Zukës, janë falsifikuar.

Kjo ekspertizë që është bërë me kërkesë nga mbrojtja e Shalës, konstaton se SMS-at ndërmjet Shalës dhe biznesmenit janë të falsifikuar nga një platformë specifike në fushën e komunikimeve, por nuk është gjetur nëse këto falsifikime janë bërë nga Posta dhe Telekomi i Kosovës ose ndonjë platformë tjetër. 

Njëri prej avokatëve të parë të Fatmir Limajt në këtë proces, Tomë Gashi ka thënë se këta SMS pala mbrojtëse i pati kontestuar që në fillim, duke shpjeguar edhe pse.

Ndërsa ka thënë se tashmë të gjitha rrugët shpiejnë në një vendim lirues për Limajn

Në këto mesazhe është pretenduar Shala dhe Zuka flasin për kurdisje të tenderëve të shumtë në Ministrinë e Transportit.

Zuka si pronar i kompanisë “Tali” dhe Shala si këshilltar i Limajt.

Besoheshin se këto biseda janë bërë në janar të vitit 2009, disa muaj para bastisjes së MTPT-së dhe për këto mesazhe ishte pyetur edhe Limaj.

Të enjten, Limaj ka hequr dorë nga dëshmitari që ishte planifikuar të dëshmojë në këtë rast

Kjo, sipas tij, për shkak të deklarimeve të ish gjyqtarit të EULEX-it, Malcom Simons, i cili tha se ky mision është politik dhe se kishte për qëllim shkatërrimin e figurave të UÇK-së përfshirë edhe Limajn.

Ky i fundit kërkoi që të thirret si dëshmitar Simons.

Por, një gjë e tillë u refuzua nga Gjykata.

Vendimi final për rastin Limaj pritet të merret me 24 nëntor.

Isabelle Arnal prokurorja që kërkonte arrestimin e Limajt, me ose pa prova

Në gjykimin e zëvendëskryeministrit Fatmir Limaj dhe të tjerëve në procesin e njohur si Rasti i MTPT ka dëshmuar një rreshtere e Policisë, e specializuar për krim të organizuar, e cila tha se ka dëgjuar thashetheme se ish-udhëheqësja e Prokurorisë Speciale të Kosovës ka kërkuar nga ekipi që të “kapin Limajn, me prova apo pa prova”.

Marina Tojvenen pas një kohe që kishte hyrë në EULEX u bë hetuesja kryesore në rastin e Limajt dhe të tjerëve.


Gjatë asaj kohe udhëheqëse e PSRK-së kishte qenë Isabelle Arnal, për të cilën Tojvenen tha se nuk ka pasur reputacion të mirë dhe se “ka dëgjuar për temperamentin e saj”.

“Kam dëgjuar, ne nuk kemi pasë të drejtë të hyjmë në zyrën e saj sepse nuk kemi pasë vlerë të lartë për të. Ka pasë fjalë të ndryshme mirëpo të gjithë kanë thënë që ajo ishte ‘bitch’”, tha Tojvenen.

Sipas të akuzuarit Limaj, kishte qenë pikërisht Isabelle Arnal ajo e cila ka urdhëruar që ai të “kapej”, me apo pa prova dhe kjo gjë sipas Limajt është dëshmuar nga hetuesi i IT-së në EULEX.

“Ajo ka thënë para një ekipe se me prova ose pa prova Fatmir Limajn e du në burg”, ishin fjalët e cituara të Isabelle Arnald nga Limaj, raporton Kallxo.com.

E pyetur nga Limaj se a ka dëgjuar ndonjëherë për këto fjalë, dëshmitarja tha se i ka dëgjuar si thashetheme të bartura “gojë më gojë”.

“Po unë nuk e kam dëgjuar ta ketë thënë këtë, kam dëgjuar që shumë kolegë të mi nuk ishin të kënaqur me sjelljen e Isabelle Arnald dhe nuk më kujtohet kush ka thënë, por më kujtohet që dikush ka thënë që e ka thënë në prani të tjerëve por saktësisht se kush e ka thënë nuk mund të them”, është përgjigjur dëshmitarja.

Para se Limaj të merrte fjalën, prokurori Charles Hardaway pyeti ish-udhëheqësen e hetuesve edhe për hetuesin Troy Wilkinson, për të cilin Limaj pretendon se ka vërtetuar se Arnald ka kërkKuar kapjen e tij.

“A të kujtohet nëse Troy Wilkinsonit që atij i është thënë dikush nga PSRK- ja që të kapë Fatmir Limajn?”, ishte pyetja e prokurorit drejtuar dëshmitares.

“Nuk e kam dëgju këtë nga Wilkinson, por e kam dëgju këtë në përgjithësi si thashetheme”, theksoi dëshmitarja.

Më pas, Hardaway e pyeti dëshmitaren se nëse i kujtohet që Wilkinson i është bashkangjitur mbrojtjes, dëshmitarja tha se nuk i kujtohet kjo gjë.

KALLXO.com ka raportuar edhe nga pjesa e parë e seancës së sotme gjatë të cilës dëshmoi Marija Tojvenen, e cila pritet të vazhdojë dëshminë edhe nesër, kur do të merret në pyetje nga mbrojtja.

Një ‘copë letre’ që e përballi Limajn tri vite me gjyqin

Rreth 7 orë seancë janë dashur që mbrojtja të jap fjalën përfundimtare dhe rreth 3 vite janë dashur që këtij procesi gjyqësor të njohur si MTPT t’i vijë fundi.

Në gjykimin e sotëm të zvendëskryeministrit Fatmir Limaj, së bashku me Endrit Shalën, Nexhat Krasniqin, Shpëtim Telakun e Florim Zukën, është dhënë fjala përfundimtare nga të gjithë të akuzuarit dhe mbrojtësit e tyre.


I pari që e filloi fjalën e tij përfundimtare, ishte avokati i Limajt, Karim Khan, të cilit iu deshën mbi 3 orë që ta përfundojë atë.

Khan e nisi fjalën përfundimtare duke treguar se dita e sotme është ditë mjaft e rëndësishme për vet Limajn, si dhe për vetë procesin gjyqësor të Republikës së Kosovës pasi që, sipas tij, është mundësia e mbrojtjes që të shpjegojë se të gjitha pretendimet e paraqitura nga zyra e prokurorisë janë “plotësisht të pabaza”.

Khan tha se ky rast, i paraqitur nga Policia Speciale e Republikës së Kosovës, ka qenë një rast “i vrasjes në mënyrë metaforike” kundër familjes Limaj.

“Rasti të cilin e kanë paraqitur PSRK- ja ka qenë thjesht një rasti i vrasjes në mënyrë metaforike kundër familjes Limaj. Kanë qenë të përfshirë dy vëllezërit e tij, e gjithë kjo pakumptimësi është refuzuar nga gjyqtarja Adamska, dhe të gjitha mesazhet e rrejshme, çka mund të themi tjetër”, tha Khan, duke iu referuar aktakuzës së rastit të njohur si MTPT 1, ku para se të konsolidohej, pjesë e aktakuzës ishin edhe dy vëllezërit e Limajt, Florimi e Demiri, për të cilët u hodh poshtë akuza.

E prokurori përmendi edhe Troy Wilkinson, ish- hetuesin e EULEX, për të cilin në ditën e djeshme prokurori tha se ka bashkëpunuar me grupin e Limajt pasi që është larguar nga EULEX. Kjo pasi që Limaj pretendon se Wilkinson ka provuar se ish- shefja e PSRK- së, Isabelle Arnald ka thënë ta kapin atë, “me apo pa prova”.

Avokati i Limajt, Khan, tha se Wilkinson është kritikuar vetëm pse ka thënë se gjërat në EULEX nuk janë ashtu siç duhet të jenë.

Sa i përket artikullit në “Le Monde” ku ish- udhëheqësi i gjyqtarëve të EULEX, Malcolm Simmons, ka thënë se EULEX është mision politik që dëshiron “rrëzimin e një klase të politikanëve kosovarë, sikur Fatmir Limaj”, Khan tha se do të shihet përmes shtypit se çfarë do të ndodhë më tutje.

“Kolegu im ka përmendur Troy Wilkinson, Malcolm Simmons, se individët të cilët kanë qenë shërbyes në këtë mision, të rekrutuar nga EULEX, janë kthyer kundër, të cilët janë kritikuar kur thonë se gjërat nuk janë ashtu siç duhet të jenë. E kemi parë këtë në rastin e Wilkinson, dhe do ta shohim përmes shtypit se çka do të ndodhë me të nderuarin gjyqtarin Simmons”, shtoi ai.

Sa i përket dëshmitarëve të marrë në pyetje deri më sot, Khan tha se asnjëri nga ta nuk e ka përkrahur këtë rast.

Në veçanti, avokati Khan i kushtoi më shumë kohë dëshmitarit tani më të ndjerë, Mehmet Shkodra, sipas tij “shtytësit të këtij rasti”.

Khan përmendi disa SMS-ë të Shkodrës dërguar Fatmir Limajt, Adem Grabovcit e Nexhat Krasniqit, përmes të cilëve Shkodra kishte këmbëngulur vazhdimisht që të takohej me Limajn, e sipas avokatit, duke përmendur në SMS takime fiktive mes Limajt e tij.

Në SMS-në e përmendur, Khan tha se Shkodra disa herë ka shkuar në zyrën e Limajt dhe e ka pritur me orë të tëra duke insistuar që tenderi për mirëmbajtjen verore të rrugëve ti jepet atij, gjë e cila edhe nuk ka ndodhur.

“Fakti se nuk i janë dhënë tenderët tregon se procesi i tenderimit ka funksionuar me rregull”, tha Khan.

“Kompania e tij që ka qenë tërësisht e papërshtatshme për të dhënë tender… Shkallën impresive e ka pasur zero”, shtoi Khan.

E fjalën e tij përfundimtare, avokati i Limajt e përmbylli duke theksuar se Limaj asnjëherë nuk i ka ikur këtij procesi gjyqësor, nuk i është fshehur, nuk i është arratisur, por, është ballafaquar me akuzat.

Khan, kërkoi që Limaj të lirohet nga të gjitha pikat e akuzës.

Pas tij, fjalën e morri Fatmir Limaj, i akuzuari kryesor në këtë proces gjyqësor.

“Ja ku jemi sot, pas 2,764 ditëve që unë ballafaqohem me këto akuza. Që nga 2015 kur kemi filluar procesin, i kemi kaluar të gjitha provat e prokurorisë, i kemi dëgjuar gjithë ata dëshmitarë dhe në fund kemi dëgjuar fjalën përfundimtare të prokurorit. As në shkresa të lëndës dhe asnjë dokument dhe nga asnjë dëshmitar nuk është thënë që edhe një cent është abuzuar nga unë gjatë kohës sa kam qenë ministër”, theksoi Fatmir Limaj.

Sipas Limajt, çdo gjë kishte filluar nga një ankesë, një copë letre, e cila e ka mbajtur atë për kaq shumë vite me radhë në këtë proces gjyqësor, dhe tani që arriti fundi “asgjë tjetër nuk ka përveç asaj ankese”.

“As ndonjë provë apo dëshmi që do të vërtetonte akuzën e prokurorisë”, tha Limaj.

“Jam krenar që pas këtyre 2764 ditëve kjo që kam thënë unë tashmë është provuar sepse para jush nuk është prezantuar asnjë provë që vërteton akuzën e prokurorisë”, shtoi Limaj.

Limaj e përmbylli fjalën e tij përfundimtare me kërkesë nga Gjykata që vendimin ta marrë në bazë të provave të paraqitura dhe në përputhje me ligjin, duke thënë se “është koha është që të flasin faktet dhe provat, jemi lodhë nga thashethemet që kanë ndodhur deri sot”.

Kërkesën për lirimin nga të gjitha pikat e akuzës e patën edhe avokatët tjerë mbrojtës, si Nysret Islami, Florent Latifaj, Blerim Prestreshi e Sevdali Zenjullahu.

Që të gjithë kërkuan nga trupi gjykues që në mungesë të provave të lirohen mbrojtësit e tyre në të gjitha pikat e akuzës.

Avokati i të akuzuarit Endrit Shala, Nysret Islami, theksoi se e gjithë aktakuza ndaj Shalës është e bazuar në pretendimet e prokurorisë në disa SMS që, sipas tij, janë të fabrikuara.

“E gjithë aktakuza ndaj klientit tim Shala, është e bazuar në pretendimet e prokurorisë në disa të ashtuquajtur SMS, në disa letra hardcopy e të cilat kanë qenë një dokument i fabrikuar, dhe po ashtu prokuroria në gjithë aktakuzën ka bërë interpretime tërësisht të gabuara të situatave të caktuara dhe të komunikimeve reale të klientit tim”, tha Islami, duke shtuar se përmbajtja e këtij dokumenti tani më është e shpallur si provë e papranueshme.

Avokati i Florim Zukës, të akuzuarit për dhënie ryshfeti Blerim Prestreshi, tha se gjatë tërë procesit kanë dëgjuar “vetëm thashetheme dhe jo prova”. Ai theksoi se nga dy pikat për të cilat akuzohet Zuka, njëra nga to vetëm se është parashkruar në kohën kur është konsoliduar MTPT 1 dhe MTPT 2, ndërsa për pikën e dytë, sipas tij, prokuroria asnjëherë nuk ka arritur t’i përforcojë këto pretendime përtej dyshimit të bazuar.

Njëjtë u shpreh edhe avokati i Shpëtim Telakut, Sevdali Zenjullahu i cili tha se “kush e analizon këtë aktakuzë e vëren se nuk ka kuptim logjik”.

Sipas Zenjullahut, me asnjë provë të prokurorisë nuk mund të vërtetohet pretendimi se grupi kriminal është i krijuar.

“Me cilat prova është vërtetuar që ndonjëri nga të akuzuarit ka përfituar në çfarë do mënyre”, ishte pyetja e tij, duke aluduar se nuk ka prova për një pretendim të tillë.

Që të gjithë të akuzuarit mbështetën fjalën e mbrojtësve të tyre.

Edhe i akuzuari Endrit Shala, pati disa fjalë më shumë për t’i thënë trupit gjykues.

Ai tha se prokurori në fjalën e tij përfundimtare nuk u mbështet në asnjë provë të vetme apo dëshmi përmes së cilës do të mbështetej apo dëshmuar akuza kundrejt tij.

“Ndihem krenar që kam punuar me korrektësi dhe profesionalizëm, në përputhje të plotë me kompetencat e mia, në shërbim të vendit tim”, tha i akuzuari Shala, duke theksuar më pas se asnjë veprim i tij gjatë atyre 3 viteve punë në MTPT, nuk ka qenë i kundërligjshëm.

Mbrojtjen e tij Shala e përmbylli duke thënë se drejtësia do të ishte e vetmja gjë e cila do të shëronte plagët e tij dhe të familjes, të shkaktuara gjatë këtij procesi gjyqësor.

Në ditën e djeshme, prokurori i çështjes, Charles Hardaway, ka thënë fjalën e tij përfundimtare.

Rreth dy javë më parë, KALLXO.com ka bërë të ditur se shpallja e aktgjykimit të këtij rasti, do të bëhet këtë të premte.

Fatmir Limaj akuzohet për shpërdorim detyre dhe krim të organizuar.

Për të njëjtat vepra ngarkohen edhe Nexhat Krasniqi e Endrit Shala.

Pjesë e gjykimit janë edhe Shpëtim Telaku e Florim Zuka.

Gjykimi lidhet me disa rrugë të asfaltuara në komunën e Gjilanit.

Limaj këtë aktakuzë që nga EULEX-i quhet e konsoliduar pasi në të janë bashkuar rastet MTPT 1 dhe MTPT 2 më 30 tetor të vitit 2015 e cilësoi të ngritur me urdhër politik.