Rusia me fushatë agresive ndaj Kosovës

 

---

Posterë me fotografinë e presidentit rus, Vladimir Putin të vendosura në Mitrovicën e Veriut. Fotografi nga arkivi.

Lufta diplomatike ruse kundër Kosovës do të bëhet më e fuqishme pas përfundimit të moratoriumit mbi njohjet e Kosovës, thuhet në një hulumtim të Instituti Kosovar për Kërkime dhe Zhvillime të Politikave (KIPRED).

Përfundimi i këtij moratoriumi, sipas KIPRED-it, mund të shfrytëzohet nga Rusia për të punuar bashkërisht me Serbinë për ta zbatuar një fushatë agresive për çnjohjen e Kosovës edhe gjatë zhvillimit të sesionit të 76-të të Asamblesë së Përgjithshme të Kombeve të Bashkuara.

Marrëveshja e Uashingtonit e nënshkruar më 4 shtator 2020 mes Kosovës dhe Serbisë, parashihte ndalesën e fushatës së Serbisë për largimin e njohjeve të shtetit të Kosovës si dhe ndalesën për aplikimin për anëtarësimin e Kosovës në organizata ndërkombëtare, brenda një viti.

Megjithatë, më 3 shtator Departamenti amerikan i Shtetit e inkurajoi Kosovën dhe Serbinë, që të vazhdojnë me moratoriumin mbi çështjet e njohjes që ndërlikojnë përparimin në fushat teknike. Qeveria e Kosovës ende nuk është prononcuar lidhur me këtë kërkesë.

Hulumtim i KIPRED-it, “Observeri i Kosovës: Lufta Diplomatike Ruse dhe Dezinformimi Medial”, ka analizuar deklaratat, konferencat për shtyp, artikujt dhe dokumente të tjerë të institucioneve të politikës së jashtme ruse nga 1 qershori deri më 15 gusht të vitit 2021.

A ekzistojnë raportet Kosovë - Rusi?

 

Rusia ka formalizuar praninë e saj diplomatike në Kosovë tre vjet para shpalljes së pavarësisë, në vitin 2005. Asokohe, për hapjen e Zyrës Ndërlidhëse Ruse në Prishtinë ka qëndruar ministri i Jashtëm i Rusisë, Lavrov.

Kosova, atëbotë, është administruar nga Administrata e Kombeve të Bashkuara dhe kryeadministrator ka qenë Soren Jessen-Petersen, i cili së bashku me kryeministrin e atëhershëm të Kosovës, Bajram Kosumi, kanë marrë pjesë në ceremoninë e hapjes.

Ministria e Mbrojtjes së Ukrainës, cak i sulmeve kibernetike

 

---

Fotografi ilustruese.

Shpërndaje

Ueb-faqet e forcave të armatosura ukrainase dhe disa ministrive e bankave, ishin cak i sulmeve kibernetike më 15 shkurt, tha Qeveria ukrainase.

Ueb-faqja e Ministrisë së Mbrojtjes “ndoshta ka qenë cak i sulmeve DDoS (ndërprerje dhe pengesë në shërbime) kur u regjistrua një numër i madh i kërkesave në sekondë”, tha ministria në një postim në Twitter, duke shtuar se janë duke u përpjekur që ta rregullojnë problemin dhe ta rikthejnë qasjen.

Llogaritë e ministrisë në Facebook dhe Twitter do të përdoren si kanale zyrtare të komunikimit derisa ueb-faqja të rikthehet në operim. Dy ueb-faqe tjera, ArmyInform dhe Army FM do të përdoren po ashtu për komunikim, tha Ministria ukrainase e Mbrojtjes.

Ministria e Mbrojtjes ishte një prej të paktën dhjetë ueb-faqeve që ndaluan së funksionuari për shkak të sulmeve DDoS, raportoi Associated Press. Kjo agjenci lajmesh raportoi se Ministria e Jashtme dhe ajo e Kulturës janë në mesin e atyre që ishin cak i sulmit.

Qendra për komunikim dhe siguri të informacionit e Ministrisë së Kulturës nuk tha se në kë dyshojnë se qëndron pas sulmit, por në deklaratën e lëshuar u la të kuptohet se kjo ministri dyshon se Rusia qëndron prapa sulmit kibernetik.

“Nuk mund ta përjashtojmë mundësinë që agresori ka përdorur taktika të ndyra sepse planet agresive nuk po funksionojnë në shkallë të gjerë”, tha ministria përmes një deklarate.

Raportet midis shteteve perëndimore dhe Rusisë janë të tensionuara për shkak të grumbullimit të mbi 130,000 trupave ruse pranë kufirit me Ukrainën, që ka rritur frikën se Moska është duke u përgatitur që ta pushojë Ukrainën. Moska mohon se ka plane të tilla.

SHBA-ja dhe Britania fajësojnë Rusinë për sulmet kibernetike në Ukrainë

 

---

Fotografi ilustruese.

Shpërndaje

Shtetet e Bashkuara dhe Britania e kanë akuzuar Rusinë se qëndron prapa sulmeve kibernetike të 15 shkurtit ndaj Ministrisë së Mbrojtjes së Ukrainës dhe sistemit bankar të vendit.

Anne Neuberger, shefe për kibernetikë në Shtëpinë e Bardhë, u tha gazetarëve më 18 shkurt se “ne besojmë se Qeveria ruse është përgjegjëse për sulmet e gjera kibernetike gjatë kësaj jave ndaj bankave ukrainase”.

Neuberger tha se zyrtarët amerikanë vendosën që t’i bënin publike këto informacione për sulmet kibernetike për shkak të urgjencës së situatës, pas grumbullimit të trupave ruse përgjatë kufirit të Ukrainës.

Neuberger tha se ekspertët amerikanë kanë të dhëna që tregojnë se infrastruktura e lidhur me agjencinë ruse të inteligjencës ushtarake GRU “është parë duke transmetuar vëllime të mëdha komunikimesh në adresat dhe domenet me IP në Ukrainë”.

• Çka është Njësia 29155 e GRU-së?

Edhe zyrtarët në Britani thanë se ishin “më se të sigurt për përfshirjen” e GRU-së në sulmet kibernetike, që goditën ueb-faqet e institucioneve ukrainase që kanë shumë të dhëna.

“Sulmi tregoi shpërfilljen e vazhdueshme ndaj sovranitetit ukrainas”, tha përmes një deklarate Zyra e Komonuelthit dhe Zhvillimit të Jashtëm të Britanisë (FCDO).

“Ky aktivitet është një shembull tjetër i veprimeve agresive të Rusisë ndaj Ukrainës”, tha kjo zyre.

Qeveria ukrainase sërish në shënjestër të sulmeve kibernetike

 

---

Disa ueb-faqe të Qeverisë ukrainase dhe ueb-faqe të bankave të këtij shteti, nuk kanë pasur qasje më 23 shkurt. Qeveria në Kiev beson se kjo ndodhi për shkak sulmeve kibernetike.

Ueb-faqet e Parlamentit, Qeverisë dhe Ministrisë për Riintegrim të Territoreve të Okupuara ishin në mesin e ueb-faqeve që duket se ishin në shënjestër të sulmeve kibernetike.

Qeveria tha se sulmet duket se ishin të tipit DDoS, që nënkupton se në këto ueb-faqe ishin dërguar një numër i madh i kërkesave njëherësh, duke i larguar nga funksioni.

“Në orën 16:00 (sipas kohës lokale) nisi një sulm i madh DDoS ndaj shtetit tonë. Ne kemi të dhëna të rëndësishme nga një numër i bankave”, tha ministri i Transformimit Digjital, Mykhailo Fedorov.

Për shkak të sulmit kibernetik, ueb-faqet qeveritare ishin të paqasshme apo mezi funksionin. Autoritetet kishin ndërmarrë masa të sigurisë pas sulmeve paraprake kibernetike, që duket se kanë parandaluar që edhe ueb-faqet e tjera qeveritare të jenë cak i sulmeve.

Javën e kaluar disa ueb-faqe ukrainase ishin cak i sulmeve. Gjatë kësaj jave, autoritetet ukrainase thanë se kanë parë paralajmërime online nga hakerët që thoshin se do të nisnin sulme të mëdha ndaj agjencive qeveritare, bankave dhe sektorit të mbrojtjes.

NATO refuzon krahasimin e ndërhyrjes në Kosovë me situatën në Ukrainë

 

---

Sekretari i Përgjithshëm i NATO-s, Jens Stoltenberg.

Sekretari i Përgjithshëm i NATO-s, Jens Stoltenberg, ka hedhur poshtë krahasimet midis ndërhyrjes së kësaj Aleance në Kosovë më 1999 dhe situatës aktuale në Ukrainë.

“Është ide e gabuar se shpërbërja e ish-Jugosllavisë nisi me ndërhyrjen e NATO-s. NATO atje ndërhyri për të ndalur krimet në Kosovë. Në atë kohë Jugosllavia veçse ishte shpërbërë”, tha Stoltenberg kur u pyet nga gazetarët në Bruksel nëse ndërhyrja e Aleancës më 1999, pa rezolutë të Këshillit të Sigurimit të Kombeve të Bashkuara shkaktoi shpërbërjen e Jugosllavisë.

Sulmet ajrore të NATO-s mbi caqet ushtarake nisën më 24 mars të vitit 1999 dhe zgjatën për 78 ditë. Kjo ndërhyrje i dha fund luftës në Kosovë.

Këto komente Stoltenberg i bëri pas një takimi që shtetet anëtare të NATO-s zhvilluan në Bruksel me zyrtarët rusë, pas tensionimit të situatës në Ukrainë.

Moska ka dërguar rreth 100,000 trupa në kufi me Ukrainën, që nga Perëndimi po shihet si përgatitje për një pushtim të mundshëm të Ukrainës.

Rusia po kërkon garanci që NATO të ndalë zgjerimin nga lindja si dhe të tërheqë trupat nga shtetet lindore, që kufizohen me Rusinë.

Duke folur për këto kërkesa të Rusisë, Stoltenberg tha se “NATO, sipas artikullit 5, parimit se sulmi ndaj një shteti anëtar është sulm ndaj të gjithëve, do të mbrojë secilin shtet anëtar”.

NATO përsëriti qëndrimin se secili shtet sovran ka të drejtën që të zgjedhë vetë nëse dëshiron të anëtarësohet në këtë Aleancë ushtarake, teksa Moska po insiston që Ukraina të mos bëhet pjesë e kësaj Aleance, duke e cilësuar një gjë të tillë si “vijë të kuqe”.

Në pyetjet nëse me dërgimin e armatimit në Ukrainë ndihmon në uljen e tensioneve, Stoltenberg hodhi përgjegjësinë te Rusia për përshkallëzimin e situatës.

“Ukraina është një shtet sovran dhe ka të drejtë të mbrohet. Rusia është ndër fuqitë më të mëdha në Evropë, fuqi bërthamore. Ajo tashmë e ka përdorur forcën ushtarake kundër Ukrainës dhe ka okupuar dhe aneksuar territor të Ukrainës. Të fajësosh Ukrainën është përmbysje e plotë e të vërtetës dhe gjërave. Rusia është ajo e cila edhe sot kërcënon duke grumbulluar forcat në kufi me Ukrainën. Prandaj është e rëndësishme që Rusia të ulë tensionet. Disa shtete të NATO-s duan të ndihmojnë Ukrainën që ajo të realizojë të drejtën e saj për vetëmbrojtje”, tha Stoltenberg.

NATO i ka cilësuar si “serioze dhe të drejtpërdrejta” bisedimet që zhvilloi në Bruksel me zyrtarët rusë.

Presidenti i Serbisë, Aleksandar Vuçiç : Do ta dënoj Rusinë kur Ukraina të dënojë bombardimet e NATO-s ndaj Serbisë

 Presidenti i Serbisë, Aleksandar Vuçiq, deklaroi se do ta dënonte njohjen e pavarësisë së rajoneve separatiste në lindje të Ukrainë nga Rusia, kur presidenti ukrainas, Volodymyr Zelenskiy të “dënojë bombardimet e NATO-s ndaj Serbisë në vitin 1999”.

"Serbia gjithmonë ka mbështetur integritetin e Ukrainës dhe nuk ka pasur ndryshime”, tha Vuçiq për Pink TV gjatë vizitës në Monako.