Krimet e tmerrshme të Rusisë do të ndalen - Izraeli me rol kyç/ Shqiptarët e kanë shansin historik të faktorizohen në regjion

 

NGA: IDRIZ MORINA 

Prof. Dr. Rifat Haxhiaj, sociolog dhe profesor i politikave sociale në Universitetin e Fribourgut, Zvicër

Intervistë ekskluzive me prof. Dr. Rifat Haxhiaj, sociolog dhe profesor i politikave sociale në Universitetin e Fribourgut, Zvicër"Në Ukrainë ka dhe do të ketë përdorim të armëve kimike dhe biologjike, por sinqerisht shpresoj se përdorimet e tilla të jenë të përmasave të vogla".

Njëri nga bashkëpunëtorët më të afërt të ministrit të vrarë të Mbrojtjes Ahmet Krasniqit, prof.Dr.Rifat Haxhiaj, flet për herë të parë për ndikimet e luftës në Ukrainë, dhe rrezikut nga përhapja e saj eventuale.

Ish drejtori i Drejtorisë Informative të Ministrisë së Mbrojtjes të Republikës së Kosovës, gjatë luftës, është i bindur se Kosova de fakto është në NATO, dhe se kjo i jep vendit një siguri të madhe ushtarake. “Sa i përket ndonjë inkursioni serb, për momentin dhe në këtë fazë, nuk mendoj se një gjë e tillë mund të ndodhë”, thotë ai.

Sipas Haxhiajt si pasojë e luftës në Ukrainë, në një fazë tjetër, mund të kyçen në konflikt përpos Gjeorgjisë dhe Moldavisë, edhe shtete të tjera të ish BRSS-së. “Si pasojë e këtij konflikti mund edhe të ketë përshkallëzim të situatës në Siri, në Palestinë, por edhe në Irak e Afganistan”.

Po ashtu duke qenë një profesor i sociologjisë, me të diskutuam nëse kjo luftë, brenda vetes fsheh përplasjet mes civilizimeve, atij Perëndimor dhe Rusisë, lindore. Kulturës trenare perëndimore, dhe asaj binare ruse.

“Bota sot”: Pas shumë kërcënimesh, dhe fshehje të qëllimit Rusia dhe presidenti i saj Putini, vendosën në zbatim planin sekret, që siç rezulton tani nga burimet amerikane ai ishte përgatitur prej vitesh, për pushtimin e Ukrainës. Cilat mendoni se ishin shkaqet e vërteta të këtij pushtimi?

Rifat Haxhiaj: Situata aktuale po dëshmon se “Lufta e ftohtë” nuk ka përfunduar asnjëherë, por ajo vetëm ka marrë forma të ndryshme, varësisht prej zhvillimit të raporteve të fuqive të mëdha. Në realitet, gjatë viteve të ‘90-ta, ish-BRSS-ja ishte në gjendje të vështirë ekonomike dhe atë kohë me shpërbërjen e saj, plotësisht e humbi garën në raport me fuqitë e mëdha, në veçanti atë përballë SHBA-ve. Për këtë, gjatë dy dekadave të fundit, kryetari i Rusisë, përpos në ringritjen e fuqisë ekonomike, ka punuar edhe në forcimin ushtarak të shtetit tij. Ai në të njëjtën kohë, ka punuar paralelisht edhe në ngritjen edhe përforcimin e aleancave të reja. Si rezultat i gjithë kësaj, kryetari i Rusisë ka menduar se është koha e duhur që Rusia të rikthehet si faktor kyç ushtarak dhe ekonomik në botë; këtë duke e demonstruar me fuqinë e shtetit rus dhe duke rikthyer apo marrë nën kontroll disa territore të interesit të tyre strategjik.

“Bota sot”: A është për ju thjesht një pushtim, siç Klauzeviçi -teoricieni i luftës, arrinte në përfundimin, se ajo ndodhë kur shterohen mjetet politike, që nënkupton se ato zëvendësohen me mjete të luftës, apo jemi përtej kësaj teorie dhe përcaktimi?

Rifat Haxhiaj: Këtë që Rusia po e bën tash e gati 3 javë nuk është asgjë tjetër veçse një pushtim klasik i një shteti me sovranitet të njohur ndërkombëtar. Mendoj se Rusia në të vërtetë nuk e kishte për qëllim ta rregulloj situatën me mjete diplomatike, sepse kushtet të cilat ia vuri Ukrainës, preknin direkt sovranitetin e saj dhe si të tilla, ishin të papranueshme. Pra, Rusia përcaktonte kushte duke dëshiruar që ato të refuzohen, për të pasur kështu pretekst të mjaftueshëm për ta sulmuar dhe pushtuar Ukrainën.

“Bota sot”: Në vlerësimin tonë, në disa raste kam shkruar, se kjo është një përballje Lindje-Perëndim, kultura binare ruse (sipas estonezit Lotman 1922-1993) përballë kulturës Perëndimore trenare, si e vlerësoni ju, a është një përballje e tillë qytetërimesh nëse mund të themi?

Rifat Haxhiaj: Sot jetojmë në një realitet ku individualizmi ka marrë përmasa të mëdha. Kultura (normat dhe vlerat) të cilat kryesisht determinohen nga institucionet përkatëse të shteteve, janë gjithashtu të ndikuara edhe nga aspekti i globalizmit dhe i mobilitetit. Këtu një rol të veçantë e ka edhe teknologjia e avancuar, në veçanti ajo e komunikimit. Gjithashtu, në aspektin botëror, është e qartë se ka përballje të theksuar, jo vetëm të kulturave, por edhe të koncepteve të ndryshme rreth vizioneve, perceptimeve sociale, ekonomike, politike, por edhe të atyre ushtarake. Në rastin konkret mund të jetë një tentativë për të rikthyer imazhin e një Rusie të fuqishme, e një shteti, i cili dëshiron ta demonstrojë fuqinë dhe aftësinë për të ridefinuar sferat e interesit në nivelin global.

“Bota sot”: A ishte dhe a është i pashmangshëm një ballafaqim armësh, në një kohë të përparimit të madh, ku kulturat e pamjaftueshme, në përpjekje për t’mos u dorëzuar shkojnë drejt një përplasje të pashmangshme, siç po ndodhë tani, ndonëse mund të jemi para një përshpejtimi të saj nga Putini, që ka shfaqur jostabilitet dhe pasiguri?

Rifat Haxhiaj: Të gjithë jemi të vetëdijshëm se Rusia është një shtet i fuqishëm. Kryetari i saj ka punuar një kohë të gjatë në stabilizimin, përforcimin dhe faktorizimin e shtetit të tij. Sigurisht, i këshilluar edhe nga personat që i ka përreth, ai ka menduar se janë krijuar kushtet për rikthimin e tij të madh, pra, edhe për rikthimin e madh të Rusisë. Mendoj se analizat e tij dhe të stafit të tij nuk kanë qenë objektive. Kryetari Putin nuk ka menduar se populli i Ukrainës që të rezistoj në këtë formë, si dhe nuk ka llogaritur se do të ketë një reagim shumë të shpejtë dhe të qartë nga bashkësia ndërkombëtare, nga bota demokratike.

“Bota sot”: A po dëshmon Rusia dhe Putini, se nuk e kanë problem jo vetëm përplasjen me luftë, por që të provojnë nëpërmjet ‘revolucionit’ ta shkatërrojnë në themelet e saj demokracinë perëndimore, dhe me këtë vetë civilizimin e arritur, siç po bën në Ukrainë?

Rifat Haxhiaj: Këtë çka Rusia po bën në Ukrainë nuk ka asnjë lidhje me revolucionin. Në pyetje është një pushtim klasik i territorit të një shteti sovran dhe të njohur ndërkombëtarisht. Është logjike se ky pushtim do të ndryshojë shumëçka jo vetëm në Rusi, por edhe në rrafshin e marrëdhënieve ndërkombëtare. Gjithashtu, ky agresion siç po shihni po rezulton dhe do të rezultojë secilën herë e më shumë, në mënyrë edhe më të theksuar në kualitetin e jetës edhe të atyre shteteve, të cilat në mënyrë direkte nuk janë të përfshira në konflikt.

“Bota sot”: Putini dhe me mbështetje jo të hapur krejt nga Kina, a po tenton të imponojë një rend të ri, një rindarje të botës, ushtarake, politike e kulturore?

Rifat Haxhiaj: Përkrahja më e madhe e pritshme për Rusinë nga ana e Kinës, është heshtja e saj. Deri tani Kina nuk ka qenë aktive në kuadër të diplomacisë ndërkombëtare, dhe ky është një indikator i mjaftueshëm, i cili tregon se edhe Kina mund t’i bëjë llogaritë e saja, në përpjekje për të nxjerrë profit sa më të mirë nga situata e krijuar. Kjo do të thotë se lufta në Ukrainë, e cila e armiqësoi Rusinë me shumicën e shteteve si dhe bllokadat e vazhdueshme që ju bën asaj, mund t’i sjellë përfitime Kinës. Pra, Rusia e bllokuar dhe e izoluar si kurrë më parë, ka gjasa të mëdha të orientohet drejt Kinës, duke tentuar zhvillim dhe zgjerim të bashkëpunimit ekonomik. Një zhvillim i tillë do të jetë në dobi të dy shteteve, por në aspektin global ekonomik, domosdoshmërisht mund të ketë pasoja negative në ekonominë e të gjitha shteteve që aktualisht janë të radhitura kundër Rusisë. Kjo do të thotë, izolimi ekonomik nga ana e botës demokratike nuk do të jetë i dëmshëm vetëm për Rusinë, por ai do ta dëmtoj dukshëm edhe gjendjen ekonomike të të gjitha shteteve, me përjashtim të Kinës dhe të disa shteteve të tjera, të rreshtuara si aleate të Rusisë. Por, të mos keqkuptohem, edhe këto shtete aleate të Rusisë, ndoshta me përjashtim të Kinës, shkaku i izolimeve dhe bllokadave që do t’ju bëhen nga bota demokratike, do të ndeshen me probleme të mëdha ekonomike. Pra, do të gjendemi në një realitet të ndarë në tri grupacione; botën demokratike në njërën anë, Rusinë me disa aleat të sajë në anën tjetër, si dhe Kinën, e cila është në pozitën më të mirë strategjike. Ajo duke mos qenë e prekur direkt nga konflikti, mund të diktoj kushtet e bashkëpunimit me të dyja palët ndaras, por gjithmonë në harmoni të plotë me interesat strategjike kineze. Kuptohet, kriza të niveleve të ndryshme do të ketë për të gjithë, gjatë tërë kohës së konfliktit.

“Bota sot”: Cili është roli i Kinës në këtë mes, ajo është vlerësuar si armiku më i madh strategjik i SHBA-ve, vlerësime këto të publikuara para luftës në Ukrainë? A ka rrezik që ajo ta ndryshojë rrjedhën e gjërave në rast të rritjes së përplasjes apo të përhapjes së luftës jashtë Ukrainës?

Rifat Haxhiaj: Siç e theksova, Kina është në pozitën më të mirë në këtë konflikt. Mendoj se ajo mund të shihet si fituesi i vetëm potencial i kësaj situate të zymtë nëpër të cilën po kalon bota. Fakti që Kina kishte një rivalitet të theksuar me SHBA-të, por edhe një rivalitet paksa të heshtur me Rusinë, është në situatë të volitshme për tu përafruar me Rusinë, duke përfituar më së shumti nga ky përafrim. Kuptohet se Rusia është në gjendje të vështirë, sepse lufta është shumë e kushtueshme, por edhe fakti se izolimi do ta dobësoj atë. Në këto rrethana, Kina mund të propozoj rritje të këmbimeve ekonomike, por me kushtet e veta, gjithnjë në dobi të saj. Pra, duke qenë në një situatë më stabile ekonomike dhe komode, Kina është në pozitë të përfitoj më shumë nga këmbimet e ardhshme me Rusinë.

“Bota sot”: T’i kthehemi edhe njëherë agresionit të ashpër rus. Ka vlerësime se Rusia mund të përdorë edhe armë kimike, ndoshta edhe biologjike, sa mund të jenë këto vendimtare për luftën në Ukrainë apo mund të ndodhë skenari më negativ, nëse përfshihet NATO-ja dhe Rusia të përdor bombat taktike-bërthamore?

Rifat Haxhiaj: Ne secilën luftë mund të ketë shumë skenarë dhe shumë koncepte e strategji. Në secilën luftë ka një lloj përdorimi të armëve, të cilat nuk janë të lejuara me konventat ndërkombëtare. Për fat të keq, mendoj se aktualisht në Ukrainë ka dhe do të ketë përdorim të armëve kimike dhe biologjike, por sinqerisht shpresoj se përdorimet e tilla të jenë të përmasave të vogla. Gjithashtu, shpresoj të mos arrij konflikti në situatën kritike, atë të përdorimit të armëve bërthamore. Dua thellësisht të shpresoj se përmasat e çmendurisë së liderëve kyç botëror nuk do të arrijnë në atë nivel, për të prodhuar një konflikt me përmasa shkatërruese të planetit tonë. Në situatën konkrete barra më e madhe e evitimit të çmendurisë i bie palës ruse, këshilltarëve të kryetarit Putin si dhe gjeneralëve kryesor të ushtrisë ruse. Ata në një formë, edhe pse duket paradoksale, duhet të përkujdesen që konflikti aktual të mos arrij nivelin e “çmendurisë institucionale” dhe të evitohet katastrofa planetare.

“Bota sot”: Çfarë prisni nga bisedimet e filluara në Turqi, që po bëhen edhe në nivel të shefave të diplomacive respektive, si do të rrjedhin?

Rifat Haxhiaj: Secili konflikt fillon si dështim i bisedimeve, por edhe përfundon me bisedime. Një element i rëndësishëm i bisedimeve është vendi ku ato ndodhin, kushtet në të cilat ndodhin si dhe cila është pala, e cila ndërmjetëson. Mendoj se Ukraina dhe Rusia kanë dëshirë ta përcaktojnë një vend, i cili mund të kishte ndikim psikologjik në rrjedhën e bisedimeve. Gjithashtu, situata ushtarake në terren do ta definojë dinamikën e bisedimeve. Varësisht se cila do të jetë fuqia reale e palëve të konfrontuara në front, edhe dëshira për bisedime mund të jetë më e theksuar apo më e zbehtë. Përfundimisht, roli i ndërmjetësit të paanshëm do të jetë shumë i rëndësishëm. Në situatën aktuale, roli i Izraelit në bisedimet e ardhshme po qartësohet dhe profilizohet secilën herë e më shumë. Por, është e vështirë për palën e tretë me qenë objektive, ndërkohë që janë dëshmitarë të krimeve të tmerrshme që rezultojnë si pasojë e sulmeve të ushtrisë ruse.

“Bota sot”: Nga autoritete të NATO-s dhe BE-së pohohet se nga përhapja e luftës në Ukrainë janë të rrezikuara Gjeorgjia, Moldavia dhe Ballkani Perëndimor? Çfarë premisash dhe gjasash ka që të ndikojë në Kosovë dhe ta nxisë ndonjë inkursion serb në veri dhe në ndonjë pjesë tjetër kufitare, në ndonjë moment të zhvillimit të ngjarjeve më dramatike, nëse ndodhin nga përhapja e luftës jashtë Ukrainës?

Rifat Haxhiaj: Konflikti ka gjasa të përhapet përreth Ukrainës, në veçanti në ato shtete ku Rusia tash e sa vite prodhon destabilitet. Pra, në konflikt, në një fazë tjetër, mund të kyçen përpos Gjeorgjisë dhe Moldavisë, edhe shtete të tjera të ish BRSS-së. Si pasojë e këtij konflikti mund edhe të ketë përshkallëzim të situatës në Siri, në Palestinë, por edhe në Irak e Afganistan. Sa i përket ndonjë inkursioni serb, për momentin dhe në këtë fazë, nuk mendoj se një gjë e tillë mund të ndodhë. Ne si shtet kemi zhvilluar kapacitete të mjaftueshme mbrojtëse, por edhe kemi fat të madh ta kemi KFOR-in, i cili gjithashtu përkujdeset për sigurinë dhe sovranitetin tonë. Gjithashtu, kryesisht fal një politike largpamëse të presidentit historik Rugova gjatë viteve të ‘90-ta të shekullit të kaluar, jemi shumë me fat të gjendemi në anën e aleatëve shumë të fuqishëm; pikësëpari të SHBA-ve, pastaj të Gjermanisë, Francës dhe Anglisë. Aleancat me këto shtete duhet t’i ruajmë dhe t’i kultivojmë më shumë se çdo gjë tjetër. SHBA-të dhe aleatet tanë strategjik janë garanca më e mirë e ekzistencës tonë.

“Bota sot”: Serbia ka intensifikuar luftën speciale në Kosovë, ajo po e mobilizon mbrojtjen territoriale, duke përfshirë edhe serbët e Kosovës, megjithëse incidente të rënda haptazi nuk ka për momentin, çfarë skenarësh apo veprimesh nga lufta speciale do të mund të ndërmerrte Serbia, e shtyrë edhe nga Rusia?

Rifat Haxhiaj: Është krejt e logjikshme se Serbia nuk do të rrijë duarkryq. Ajo mund të tentoj të përfitoj nga këto rrethana të reja, sa më shumë që është e mundur. Për këtë, edhe organet e shtetit të Kosovës duhet të jenë në një situatë të vigjilencës së vazhdueshme, në çdo provokim të mundshëm të veprojnë me mençuri dhe me maturi. Në raste të tilla, mendoj se bartësit kyç të institucioneve të Kosovës, duhet të koordinohen dhe këshillohen në mënyrë të vazhdueshme me aleatët tanë, në veçanti me SHBA-të.

“Bota sot”: I dërguari i Putinit për Serbinë, këshilltar për inteligjencë, Patrushev ka deklaruar se e kuptojnë situatën momentale të Serbisë, por njëkohësisht ka folur për marrëveshje (të fshehta) Putin-Vuçiq. A nuk nënkupton kjo një rrezik për bashkëveprim serbo-rus ndaj Kosovës duke pasur parasysh edhe nevojën strategjike të Rusisë për ta shpërqendruar Perëndimin dhe forcat e saja?

Rifat Haxhiaj: Është shumë e qartë se interesi i Rusisë është përhapja e konflikteve sa më gjerë të jetë e mundur. Në atë situatë, edhe bota demokratike do të shpërqendrohej nga ajo që ndodhë në Ukrainë. Pra, në një situatë të krizave të ndryshme dhe në vende të ndryshme, qofshin ato edhe të përmasave më të vogla, do të krijonin efekt pozitiv dhe të favorshëm për Rusinë.

“Bota sot”: Sa mund të jetë e kërcënuar edhe Shqipëria, edhe pse anëtare e NATO-s, pasi Rusia e pat dërguar një qarkore, përfshirë Shqipërisë, që të mos shkelte disa marrëveshje ndërkombëtare, dhe e kërcënonte se bashkëveprimi i Shqipërisë me NATO-n mund të ketë pasoja, duke nënkuptuar me gjasë një përfshirë në një luftë Rusi-NATO. Të hënën (7 mars) Rusia e ka futur edhe në vendet ‘jomiqësore’ për shkak të sanksioneve të vendosura, çka nënkuptojnë edhe këto?

Rifat Haxhiaj: Fakti se Shqipëria është anëtare e NATO-s, nuk do të duhej të ndihej e rrezikuar. Reagimi i Rusisë karshi shteteve, të cilat ishin në nismë të bllokadës ekonomike ndaj tyre, ose edhe të shteteve që janë të zëshme kundër agresionit në Ukrainë, janë të pritshme. Tani duhet të jetë e qartë se në situata lufte apo në situata konfliktesh të mëdha siç është rasti në Ukrainë, lufta klasike me armë mund të merr përmasa edhe të luftës ekonomike, psikologjike etj.

“Bota sot”: A mund të kemi ndonjë befasi, që hapat e Kosovës për anëtarësim në NATO dhe BE të përshpejtohen. Për anëtarësim në BE, sigurisht se procesi do të jetë shumë i vështirë, por për në NATO ka edhe deklarime nga SHBA-të sidomos, DASH-i, nga kongresmenë etj., që të përshpejtohet integrimi i Kosovës në NATO. A mund të ndodhë kjo sidomos në rast të përhapjes së luftës jashtë Ukrainës?

Rifat Haxhiaj: Do të dëshiroja që një gjë e tillë të ndodhë shumë shpejt. Mirëpo, duhet ta kemi të qartë se procedurat administrative për bashkim në aleanca të tilla janë paksa të gjata, pa marrë parasysh situatën në të cilën ndodhemi. Gjithashtu, për të qenë zyrtarisht pjesë e NATO-s edhe FSK-ja do të duhej të përmbushte edhe shumë kritere shtesë, dhe për këtë duhet edhe pak kohë. Një gjë duket e qartë, duke u nisë nga prezenca ushtarake e SHBA-ve dhe aleatëve, Kosova de facto është pjesë e NATO-s. Se kur do të ndodhë edhe ajo që e quajmë de jure, mbetet të shihet.

“Bota sot”: Nga rrethanat që po krijohen, me trend pozitiv për shqiptarët, vëmendja e shtuar e Perëndimit për Kosovën, pozicionimi i Serbisë pro Rusisë (refuzoi të vendosë sanksione në kundërshtim me partneritetin me BE-në) është një moment, në të cilin shqiptarët kanë shansin që me një strategji të duhur, ta ndryshojnë pozicionin e tyre, dhe të përfitojnë nga zhvillimet në pritshmëri?

Rifat Haxhiaj: Mendoj se shqiptaret kudo që janë, në veçanti Kosova dhe Shqipëria, duhet të gjejnë forma sa më të mira të koordinimit të ndërsjellë, duke ndikuar në rritjen ekonomike të dy shteteve, por duke përfshirë këtu edhe Maqedoninë dhe Malin e Zi, për të ndikuar direkt në faktorizimin e këtyre shteteve, por edhe të shqiptarëve si komb. Dhe kur je faktor në regjion, atëherë edhe mundësia e imponimit dhe e ndikimit është më e madhe. Në veçanti, në mes të Kosovës dhe Shqipërisë ka shumë hapësirë të pashfrytëzuar, por dhe mundësi të bashkëpunimit dhe komunikimit të ndërsjellë. Thellimi i këtij bashkëpunimi, në rrafshin e shkollimit dhe edukimit, në rrafshin ekonomik dhe turistik, në atë administrativ, ose edhe ushtarak, do të ndikojë në mënyrë direkte, në atë si të tjerët na perceptojnë. Një situatë e tillë, patjetër se do të kishte ndikim direkt dhe shumë pozitiv edhe në rritjen e mirëqenies së qytetarëve të dy shteteve.

Fundja, në botë konfliktet janë të shpeshta dhe të përmasave të ndryshme. Ne si popull i vogël duhet përqendrohemi esencialisht në ruajtjen e aleatëve tanë si dhe në zhvillimin tonë ekonomik. Aleatët do të na shërbejnë si garancion i vazhdimësisë dhe të jetëgjatësisë së shtetit tonë, por edhe të Shqipërisë, të cilën ne e kemi inspirim dhe synim. Zhvillimi ekonomik, i menduar dhe afatgjatë do të ndikojë drejtpërsëdrejti në ngritjen e mirëqenies së qytetarëve tanë, si dhe do ta zbehë dëshirën e tyre për t’u larguar nga vendi. E potencoj këtë sepse duke u përqendruar në luftëra që janë larg prej nesh, ne si shoqëri, kemi tendencë ta harrojmë “luftën” që e kemi afër, dhe e cila po reflekton negativisht në të gjitha projeksionet e të ardhmes tonë. Nuk duhet të harrojmë se “lufta” me varfërinë, kryesisht shkaktoi migracion viteve të fundit; gjë e cila po ndikon negativisht dhe po rrit në mënyrë drastike moshën mesatare të popullsisë në Kosovë dhe Shqipëri. Shteti i fortë nuk mund të bëhet pa idenë e qartë për të ardhmen e tij. Shteti i fortë nuk mund të bëhet pa popullin, e në veçanti nuk mund të bëhet pa rininë e arsimuar, të ditur dhe të fortë, të përcaktuar për punë të mëdha dhe përplot energji pozitive.

Kryeministri i Kosovës ZT.Albin Kurti për Agjencinë Franceze të Lajmeve: Presidenti despotik Vlladimir Putin është në kërkim të një konference të re të Jaltës

 

Kryeministri Kurti

Kryeministri i vendit, Albin Kurti ka realizuar një intervistë me Agjencinë Franceze të Lajme.

Kurti ka prekur temën e luftës në Ukrainë dhe situatën që ka sjellur kjo krizë në gjith botën.

Pyetja: Z. Kryeministër, po fillojmë me krizën në Ukrainë. Agresioni mbi Ukrainën nga Rusia, ta krijon përshtypjen që e ka tronditur, e ka rrezikuar thellësisht rendin ekzistues të sigurisë në Evropë, i cili është krijuar me përmbysjen e Murit të Berlinit. Shumë analistë thonë që bëhet fjalë për një goditje tektonike dhe pyetja jonë e parë është, a mendoni, a ka gjasa, a ka shpresë, që ky sistem të rikthehet, të rikuperohet?

Kryeministri Kurti: Agresioni ushtarak dhe invazioni rus ishin shokues, por jo edhe të befasishëm. Nuk ishin të befasishëm, meqenëse e kemi parë duke u përgatitur dhe duke ndërtuar edhe në aspektin e ligjërimit politik nga Kremlini, por edhe të grumbullimit të forcave të mëdha ushtarake me artileri të rëndë në kufijtë lindor të Ukrainës. Pamjet janë shokuese, është vështirë ta besosh çfarë po sheh, mirëpo askush nuk mund të shtiret se ka qenë i befasuar. Kjo është një luftë e paralajmëruar më herët, për shkak se hegjemonia ruse, imperializmi rus dëshironte me çdo kusht territore të reja, dëshironte zgjerim dhe përballje me Bashkimin Evropian dhe me NATO-n. Presidenti despotik rus, Putin, është në kërkim të një konference të re të Jaltës, por konferenca e re e Jaltës nuk është e mundshme pa luftë. Andaj, edhe kishim këtë agresion ushtarak dhe invazion rus.

Padyshim që arkitektura e sigurisë së kontinentit evropian duhet të rimendohet, sepse nuk i kemi më kushtet e paqes pas rënies së Murit të Berlinit. Luftërat, të cilat u zhvilluan gjatë këtyre tri dekadave nëpër kontinentet e tjera, tash kanë ardhur në Evropë dhe atë në përballje me Rusinë, e cila udhëhiqet nga një person, që është njëkohësisht edhe shumë i hidhëruar edhe shumë nostalgjik. I kishim edhe luftërat në kuadër të shpërbërjes së dhunshme të ish-Jugosllavisë, mirëpo, ajo çfarë shohim sot, është marshimi i ushtrisë ruse, njëra ndër ushtritë më të fuqishme të botës e të kohës dhe padyshim që NATO-ja do të duhej që tash ta rris mobilizimin e vet, por gjithashtu edhe të mendojë se si t’i përgjigjet Rusisë, në kushtet kur qartazi lufta hibride doli se nuk na paska qenë zëvendësim për luftën, por fazë përgatitore për të.

Pyetja: Është sulmuar shteti më i madh, vendi më i madh në Evropë. Madje në mesin e observuesve perëndimorë mund të dëgjohet që e konsiderojnë këtë sulm, këtë agresion edhe si sulm mbi civilizimin perëndimor. A mendoni që ky agresioni dhe i gjithë impakti që e ka krijuar ky agresion, i ka bërë të pakuptimta ndarjet në Evropë, në vende të NATO-s, vende jo të NATO-s, vende të Bashkimit Evropian, vende jo të Bashkimit Evropian, domethënë të gjithë i shtrohen rrezikut të njëjtë?

Kryeministri Kurti: Pajtohem. Dallimet, të cilat ekzistojnë brenda Bashkimit Evropian dhe brenda Evropës si kontinent në përgjithësi, janë bërë çështje të dorës së dytë për të mos thënë çështje të dorës së tretë, karshi invazionit rus dhe agresionit ushtarak në Ukrainë. Andaj, nëse Bashkimi Evropian dhe NATO-ja nuk e shfrytëzojnë këtë moment për të qenë të bashkuar, ashtu siç e imponon koha, por unë besoj edhe vullneti i popujve, të drejtat qytetare dhe mirëqenia në kontinentin evropian, atëherë do ta paguajmë shumë shtrenjtë me të ardhmen tonë dhe të fëmijëve tanë.

Prandaj, është e domosdoshme që të ketë një unitet të shtuar edhe institucional, ashtu siç është popullor. Unë jam i bindur që tash popujt e Evropës kurrë nuk kanë qenë më të bashkuar, veçse ky lloj bashkimi duhet ta gjejë shprehjen e vet edhe në politikë edhe në institucionet përfaqësuese.

Bashkimi Evropian duhet të jetë i bashkuar, sepse është sulmuar Ukraina, e cila paraqet me territor shtetin më të madh në kontinentin evropian. Pra, nuk ka një shtet tjetër, i cili me gjithë territorin e vet, është në kontinentin evropian, e ka më shumë se 600 mijë kilometra katrorë, siç është rasti me Ukrainën. Pra, shteti më lindor në kontinentin evropian, është njëkohësisht edhe më i madhi me territor dhe tash ndodhet në një sulm shkatërrues, që e dëshiron territorin e Ukrainës për Rusinë, por pa ukrainasit.

Pyetja: Keni thënë që agresioni e imponon bashkimin e Evropës si përgjigje të parë ndaj këtij sulmi mbi një vend sovran dhe të pavarur evropian. A mendoni që kanë filluar të krijohen konditat dhe të imponohen konditat nga agresioni rus, për ngritjen e rendit të ri të sigurisë kolektive, ku do të bashkohen nën të njëjtën ombrellë të gjenden të gjitha vendet evropiane, pa marrë parasysh a i takojnë apo nuk i takojnë mekanizmave të Bashkimit Evropian dhe NATO-s?

Kryeministri Kurti: Evropa dhe perëndimi demokratik në përgjithësi ka nevojë për një koalicion, i cili është i mbrojtjes dhe i sigurisë, por jo vetëm, kundrejt Federatës Ruse. Dhe, ajo çfarë po ngjanë në Federatën Ruse, Evropa mund ta gjej edhe në historinë e vet.

Përshtypja ime e fuqishme është se periudha nga Gorbachevi te Yeltsini paraqiste veçse versionin rus të Republikës së Vajmarit. Kishim një dekadë të Republikës së Vajmarit në Federatën Ruse dhe tash kemi një lider despotik, i cili makinerinë e vet të luftës e ka ndërsyer kundër një populli, i cili as nuk e provokoi dhe as nuk dëshiron luftë. Në këtë kontekst politik e të sigurisë, duhet të përgjigjemi me një koalicion, me ç’rast nuk do të duhej të kufizohemi tek formulat ekzistuese të organizatave ndërkombëtare, por do të duhej që të avancohen ato, e mbase edhe të krijohen të reja, sepse situata është e jashtëzakonshme.

Pyetja: A ka Kosova arsye që të ndjehet e rrezikuar pas agresionit rus, sidomos kur kihet parasysh ekzistimi i marrëdhënieve dhe tensioneve shumë të larta me Serbinë e cila konsiderohet si aleati kryesor i Rusisë në këtë rajon?

Kryeministri Kurti: Presidenti despotik rus po e kërkon një konferencë të re të Jaltës. Për këtë është e nevojshme lufta dhe këtë e bëri, por për këtë është e nevojshme edhe zgjerimi i konfliktit edhe jashtë Ukrainës, e këtë nuk e ka bërë ende. Përshtypja ime është që Putini dëshiron që të ulet në tryezë të negociatave me presidentin amerikan Biden e jo me presidentin ukrainas Zelensky. Synimi i tij është një konferencë e re e Jaltës, Jalta 2, me ç’rast do të ndaheshin sferat e interesit dhe në këtë mënyrë Federata ruse do të synonte të kompensohej për shpërbërjen e Bashkimit Sovjetik. Prandaj, meqë ata do të synojnë edhe konflikte të reja, Ballkani Perëndimor në përgjithësi, e posaçërisht Kosova janë të rrezikuar. Në të kaluarën presidenti rus na përmendte një herë në muaj, tash na përmend nga disa herë në javë dhe duket qartazi se Republika e Kosovës është një halë të cilën ai e konsideron që e pengon në projektin e vet. Dy muaj pas çlirimit të Kosovës, presidenti rus u pat bërë kryeministër i Federatës ruse, në gusht të vitit 1999, ndërkaq me rastin e dy vjetorit të ardhjes së trupave ruse në Aeroportin e Prishtinës nga Bosnja dhe Hercegovina në qershorin e vitit 1999, pra në qershorin e vitit 2001 ai pat vizituar Kosovën, për t’i vizituar trupat ruse pikërisht në Aeroportin e Prishtinës. Le të mos harrojmë që është ky president ai i cili edhe i aneksoi Osetinë Jugore dhe Abkhazinë në Gjeorgji, pikërisht në vitin kur Kosova e shpalli pavarësinë, ndërkaq një javë pas shpalljes së pavarësisë së Kosovës u nënshkrua marrëveshja ndërmjet Serbisë edhe Federatës Ruse për dhënien e shumicës së aksioneve të industrisë së naftës në Serbi te Gazprom-i dhe po ashtu të bazenit të gazit në Banatski Dvor në Vojvodinë, sërish tek Gazprom-i. Nga 250 deputetë sa i ka Kuvendi i Serbisë, 151, pra më shumë se 60 për qind, janë në grupin e miqësisë Serbi - Federatë Ruse. Në Kuvendin e Kosovës janë një dyzinë deputetësh në grupe të miqësisë me shtete të ndryshme. Pra, atje mbi 60 për qind të parlamentit janë në grupin e miqësisë me Federatën Ruse. Kur kësaj ia shtojmë edhe faktin që ka ma shumë se një dekadë që Rusia është shumë aktive në Serbi, sidomos me “Qendrën Humanitare Ruse” siç e quajnë ata në Nish dhe me Sputnikun që e ka në rajon qendrën në Beograd, natyrisht që ne duhet të jemi shumë vigjilent, të kujdesshëm, por nuk do të frikësohemi asnjëherë prej tyre.

Pyetja: Nuk ka pas asnjë prononcim të vetëm të liderëve të lartë të Kosovës prej shpërthimit të krizës në Ukrainë, të paktën unë nuk kam parë, ku nuk apelohet për pranimin e Kosovës në NATO. A mendoni që Ballkani si zonë tradicionale e interesit të Rusisë mund të jetë targeti i radhës i Rusisë pasi të përfundojë ky në Ukrainë?

Kryeministri Kurti: Në rastin më të mirë mund të themi që presidenti rus është i paparashikueshëm. Realisht ai është i parashikueshëm. Ai është lider i luftës, nuk është i paqes. Ai është i interesuar që ta marrë gjithë Ukrainën, nëse s’mund ta marrë gjithë atëherë ta ndajë sikurse Bosnjën, ta shndërroj Kievin në një Grozni apo Sarajevë të dytë dhe gjithashtu ta shpërndajë edhe gjetiu konfliktin, ku do t’i përdorë faktorët e aktorët të cilët i kontrollon edhe në Ballkanin Perëndimor. Në këtë situatë të jashtëzakonshme ne nuk mund të sillemi në mënyrë të zakonshme. Andaj, edhe anëtarësimi në Bashkimin Evropian edhe anëtarësimi në NATO nuk mund të jenë sipas mënyrave të vjetra.

Është tejet e domosdoshme që Brukseli si kryeqytet i dyfishtë, edhe i NATO-s edhe i Bashkimit Evropian ta rimendojë një mënyrë të re për integrimin e brendshëm dhe për zgjerimin në Ballkanin Perëndimor. Ballkani Perëndimor dhe Kosova në zemër të këtij Ballkani Perëndimor është pjesë e kontinentit evropian. Me rastin e integrimit në BE dhe në NATO, kufiri i jashtëm i këtyre dy organizmave më të rëndësishëm të paqes që nga përfundimi i Luftës së Dytë Botërore, kufiri i jashtëm zvogëlohet për rreth 3 mijë kilometra, që do të thotë edhe për sigurinë është shumë mirë.

Gjashtë vendet e Ballkanit Perëndimor ende të paintegruara në Bashkimin Evropian për nga popullsia janë përafërsisht sa Holanda, e për nga bruto produkti vendor i kombinuar janë përafërsisht sa Sllovakia. Rrjedhimisht nuk është barrë e madhe për Bashkimin Evropian integrimi i përshpejtuar i rajonit tonë.

Pyetja: Do të thotë mendoni që emergjenca e situatës e imponon edhe emergjencën në procedurë të pranimit, zgjerimit të NATO-s dhe Bashkimit Evropian?

Kryeministri Kurti: Metodat e vjetra të zgjerimit të NATO-s dhe të Bashkimit Evropian mund të kenë kosto shumë të lartë pas agresionit ushtarak dhe invazionit rus në Ukrainë, i cili unë besoj që synon të mos ngelet vetëm në Ukrainë.

Pyetja: Dhe në fund Kosova dhe Ukraina nuk kanë marrëdhënie diplomatike. Ukraina nuk e njeh pavarësinë e Kosovës, por përkrahja e deritanishme e Kosovës për Ukrainën, politike, morale, financiare me këto kushtet modeste të Kosovës, e ka bërë Kosovën, të krijohet përshtypja, lidere në rajon në përkrahjen e Ukrainës. Nga buron ky solidarizim me një vend që s’e ka njohur Kosovën?

Kryeministri Kurti: Tek lufta mbrojtëse dhe çlirimtare e popullit të Ukrainës, ne gjejmë shumë ngjashmëri me situatën tonë para një çerek shekulli, kur një fqinj shumë më i madh verior dëshiron të të okupojë, të të shtypë, të të shfrytëzojë, të të diskriminojë, të krijojë aparteid dhe gjithashtu provon edhe gjenocidin, i cili në Kosovë u nis, por u ndalua nga intervenimi i NATO-s, që të mos kishim shfarosje të shqiptarëve në vendin tonë. Pra, ne kishim në njërën anë Ushtrinë Çlirimtare të Kosovës, e cila e nisi rezistencën dhe luftën për çlirim e për liri dhe kjo e ndërgjegjësoi opinionin publik ndërkombëtar, diplomacinë botërore për të na mbështetur. Askush sikurse populli i Kosovës nuk e sheh ngjashmërinë e asaj çfarë na ka ndodhur në jetën tonë, jo në librat e historisë, në jetën tonë, me kontekstin aktual në Ukrainë, ku lufta mbrojtëse dhe çlirimtare te popullit të Ukrainës, po gjen një solidaritet dhe admirim të jashtëzakonshëm në botën perëndimore demokratike, sikurse tek ne në vitet 1998 dhe 1999.

Amerika dhe Evropa janë aleatët tanë, por ato nuk sakrifikohen për ne!

NGA Prof. Dr. Enver Bytyçi

Mediet shkruajnë se "Një gjeneral amerikan ia shuan shpresat Serbisë për një sulm ushtarak kundër Kosovës"! Dhe me këtë deklaratë shumica prej nesh besojmë se "jemi nën mbrojtjen amerikane"! Është e mbrojtur Kosova se aty është NATO dhe është e mbrojtur Shqipëria e Maqedonia e Veriut, se ato janë në NATO! Sapo ministrja e Jashtme e Gjermanisë zhvilloi vizitën e saj në Kosovë shumë kush thoshte se "Jemi nën mbrojtjen e Gjermanisë"! Dikush tjetër beson se shqiptarët janë nën mbrojtjen e Britanisë së Madhe, të NATO-s e të strukturave të tjera ushtarake e politike të Perëndimit!

Gjithkush ka të drejtë të ëndërrojë e të jetojë nën mbrojtjen e zanave e të Mujit e Halilit! Ne shqiptarët, por edhe ballkanasit e kemi të lehtë ta bëjnë këtë. Baladat me heronj, me luftëra e përleshje kundër kuçedrave, Gjergj Elez Alisë a me kë tjetër, kanë ndikuar që të dukemi aq euforikë, sa të besojmë se dikush tjetër do të vijë në territorin tonë e do të vdesë për lirinë tonë. Kur na mbrojnë zanat, pse të mos na mbrojë Amerika?! Kur kishim në mes vendit Mujin e Halilin, pse të mos mbështetemi te Muji ev ropian dhe Halili amerikan?! Ëndërr e bukur kjo, apo jo?!

Ok! Këto përralla nga e kaluara mund të ndikojnë te mendjet e injorancës. Por mua më duket se ato janë bërë pronë edhe e politikës dhe sidomos e lidershipit shqiptar në qeverisje. Madje ato marrin një dimension më të gjerë kur politikanët shqiptarë marrin pushtetin. Në opozitë politikanët tanë janë gjithnjë "sovranistë" e me këmbë në tokë. Kur vijnë në qeveri bëhen vasalë, presin prej dikujt tjetër. Vasalë të imagjinatës sonë! Shtetarët tanë në Shqipëri, në Kosovë e gjetkë kur vijnë në qeveri e dorëzojnë gjithçka te NATO, BE dhe aleatët. Sepse nuk kanë dëshirë të merren me punët e kombit e të shtetit! Janë të zënë me hallet e xhepit!

Ndërkohë e keqja lidhet me faktin se mbillet indiferentizmi. Vetë politika është e shkrehur dhe gjithçka e ka lëshuar në duart e NATO-s, BE-së dhe SHBA-ve! Kryeministri i Shqipërisë ditë-natë përmend Aleancën Atlantike në rastin e sulmit rus kundër Ukrainës, duke u thënë shqiptarëve se "Ne jemi të mbrojtur nga NATO"! Edhe pse asokohe kur vendi u pranua në këtë aleancë, kryeministri i sotëm, atëherë në opozitë, thoshte se "Nuk na jep NATO mirëqenie e nuk na i zgjidh NATO problemet tona", tani nuk bën asgjë për sigurinë, mbrojtjen, zhvillimin e mirëqenien e qytetarëve të tij.

Por a mund të vijnë ushtarët e NATO-s të luftojnë në Shqipëri, në Kosovë, pra në territoret tona dhe ne të rrimë në shtëpi, sikur s'ka ndodhur asgjë?! Si i kanë bërë llogaritë këta liderët tanë, të mos bëjnë asgjë për mbrojtjen dhe sigurinë, nën justifikimin se ne na mbrojnë të tjerët?! Cili prej shqiptarëve do të shkonte të luftonte e të vdiste për lirinë e integritetin territorial të një vendi tjetër, nëse populli e qeveria e atij vendi flenë dhe zgjohen nga gjumi sikur nuk ka ndodhur asgjë?! Kosova ka shtuar fondet për mbrojtjen dhe sigurinë e saj në atë masë sa shpenzon Shqipëria si vend anëtar i Aleancës Atlantike. Kosova ka hapur dhe një iniciativë për grumbullimin e fondeve të saj vullnetare për mbrojtje. Po Shqipëria?! "Na mbron NATO", thotë Edi Rama dhe vetë ia fut një fluturim turistik deri në Dubai me paratë e taksapaguesve shqiptarë e me çarter në dispozicion! Asnjë fjalë nuk dëgjojmë nga ai, nëse duhet ose jo të rritet buxheti i mbrojtjes së vendit. Nëse ka nevojë ose jo të mobilizohen rezervistët! Nëse është e domosdoshme ose jo të blihen armë të reja moderne?! Jooooo! Qeveria shqiptare është aty thjesht për të menaxhuar ndihmat e kreditë marramendëse që merr prej të huajve. Ndërsa paratë e shqiptarëve t'i japë me PPP! Edhe Kosova ankohet gjithandej për sigurinë e saj dhe diversionin serb kundër saj. Dhe është mirë kjo. Por nuk e di pse nuk mendon për mobilizimin dhe stërvitjen e rezervistëve për t'u përgatit për luftë! Le të shpresojmë se kurrë nuk do na vijë lufta në derë të shtëpisë! Por ama nuk na lejohet të jemi në gjumë!

Nëse i pyet drejtuesit e qeverisë shqiptare, të thonë: "Nuk ka para"! Nuk ka para për mbrojtjen, nuk ka para për ndihmën sociale, nuk ka para për arsimin, nuk ka para për shëndetësinë, nuk ka para për subvencionimin e bujqësisë dhe lehtësimin e rritjes së çmimeve! Por ka para për luksin qeveritar. Ka para për oligarkët që marrin me 22 milion euro ndërtimin e një kilometri rrugë. Ka para për të paguar 30 këshilltarë për një kryetar bashkie. Ka para për paga 15 mijë eurosh në muaj për këshilltarët e kryeministrit! Ka para për 60 mijë të punësuar në fushatë elektorale në administratën e shtetit! Ka para për Bechehtin dhe sa e sa bechehtë të tjerë që fitojnë gjyqet për shkak të arrogancës së kryeministrit dhe kryetarit të bashkisë së Tiranës! Ka para për Arben Ahmetajn e për firmat pranë qeverisë!

Nuk ka para vetëm për zhvillim e për mirëqenie! Shkurt, Shqipëria, e në një farë mase edhe Kosova, nuk kanë mundësi financiare për të kryer dy funksionet kryesore të shtetit, atë të sigurisë e mbrojtjes dhe atë të mirëqenies dhe zhvillimit!

Rusia po kryen krime të pamëshirshme ndaj Ukrainës/ Ja kur mund të lëshohet urdhër arrest për Putinin!

 

Vladimir Putin

Një numër në rritje i viktimave civile në Ukrainë, ka nxitur akuza se Moska ka kryer krime lufte me bombardimet e pamëshirshme të objekteve joushtarake në qytete, si dhe përdorimin e supozuar të armëve që rrisin rrezikun e vdekjes dhe lëndimit të qytetarëve civil, shkruan Euronews, përcjell “Bota sot”.

Në ndjekje të provave, qeveria e Ukrainës ka hapur një front të ri në konflikt, duke dërguar ekipe vizuale në vendet e bombarduara për të ngritur një çështje kundër Rusisë në Gjykatën Penale Ndërkombëtare në Hagë.

Muajin e kaluar, prokurori i GJNP-së njoftoi hapjen e një hetimi mbi krimet e mundshme të luftës që po shpalosen në Ukrainë – një veprim i mirëpritur nga krerët e shteteve dhe qeverive të BE-së, gjatë takimit të tyre të nivelit të lartë në Versajë të premten.

Përkufizimi i krimeve të luftës dhe vërtetimi i tyre

Krimet e luftës, sipas ligjit ndërkombëtar, përfshijnë shënjestrimin e civilëve, si dhe sulmet që shkaktojnë viktima civile. Këtu përfshihen sulmet ndaj spitaleve, klinikave, shkollave, monumenteve historike dhe vendeve të tjera kryesore civile, si dhe sulmeve ose bombardimeve të qyteteve, fshatrave ose banesave që janë të pambrojtura dhe që nuk janë objektiva ushtarake.

Megjithatë, shumë akte të tmerrshme dhune që rezultojnë në vdekjen e qytetarëve të thjeshtë nuk përmbushnin kriteret. Pasi në shumicën e rasteve, të provosh se vrasjet e civilëve përbëjnë një krim lufte është shumë e vështirë.

"Një standard për dënimin në një gjykatë penale ndërkombëtare është jashtëzakonisht i lartë," tha për Euronews Marti Flacks, drejtor i Iniciativës për të Drejtat e Njeriut në Qendrën për Studime Strategjike dhe Ndërkombëtare në Uashington, transmeton “Bota sot”.

“Pritja për ndjekjen penale të dikujt për krime lufte dhe krime kundër njerëzimit është që të jetë në gjendje të demonstrojë përgjegjësi individuale dhe të jetë në gjendje të demonstrojë se ata janë duke drejtuar ose përgjegjës për një politikë të kryerjes së këtyre krimeve. Dhe kjo mund të jetë shumë e vështirë, veçanërisht kur nuk keni bashkëpunimin e shtetit nga i cili buron ai person, gjë që padyshim nuk do ta kishim në rastin e Rusisë”.

Për të paditur dikë, prokurori i ICC-së duhet të provojë se krimet e supozuara janë krime mizori: gjenocid, krime kundër njerëzimit ose krime lufte. Prokurori përcakton gravitetin duke parë shkallën, natyrën, mënyrën dhe ndikimin e krimeve të supozuara.

ICC gjykon individë dhe jo shtetet. Për shembull, në konfliktin aktual, Rusia nuk do të ishte e pandehur, por Vladimir Putin mund të ishte i pandehur.

Urdhër arrest për Putinin?

Pasi të gjenden prova të mjaftueshme për të krijuar baza të arsyeshme se janë kryer krime mizore, prokurori mund të kërkojë që një dhomë e GJNP-së të lëshojë një urdhër arrest për Putinin – por ngritja e një çështjeje në rrethanat aktuale mund të jetë e ndërlikuar.

“Natyrisht, çdo ndjekje penale kërkon një sërë hapash, duke përfshirë mbledhjen e provave fizike, intervistimin dhe mbledhjen e dëshmive të dëshmitarëve, mbledhjen e informacionit kontekstual dhe dokumentacionit që shpjegojnë rrethanat ku janë kryer krimet. Dhe përpjekja për ta bërë këtë në kontekstin e një lufte aktive në vazhdim e bën të vështirë ta bësh këtë”, tha Flacks.

Nëse GJPN-ja do të lëshonte një urdhër arresti kundër Putinit, aftësia e tij për të udhëtuar do të kufizohej ashpër. “Nëse Putini ose dikush në udhëheqjen e tij do të kërkohej nga GJPN-ja, të 123 anëtarët e Statutit të Romës të Gjykatës Ndërkombëtare Penale do të ishin të detyruar t'ia dorëzonin GJPN-së”, shpjegoi Flacks.

Praktikisht, në mënyrë që Putini dhe lidershipi tjetër i lartë të përballen me çdo lloj akuze, do të duhej të kishte ndryshim regjimi në Rusi – ideja që Putini do të arrestohej nga qeveria e tij thjesht nuk është e imagjinueshme.

Koha që duhet për të ndjekur penalisht një kryetar shteti

Nëse do të kishte akuza, dhe nëse Putini mbetet kreu i shtetit, kjo bëhet shumë e ndërlikuar, siç ishte rasti me krerët e tjerë të shtetit që janë paditur dhe më pas nuk janë sjellë para GJNP-së për vite me radhë, sepse ata marrin masa për të shmangur praninë fizike para gjykatës. Kjo është e rëndësishme, pasi ICC nuk i gjykon individët në mungesë.Pavarësisht nëse Putini dhe zyrtarë të tjerë të lartë ushtarakë dhe politikë do të akuzohen ndonjëherë, ka të ngjarë që do të duhen vite për të marrë një vendim.

“Ndjekjet penale të GJNP-së mund të zgjasin shumë. Çështja që GJNP filloi të hetojë për pushtimin rus të Ukrainës në vitin 2014 është ende në proces”, theksoi Flacks, përcjell "Bota sot". “Dhe ne e dimë se ndjekjet penale që filluan në ditët e para të GJNP-së në fillim të viteve 2000, në disa raste vazhdojnë ende sot.”

Ukraina po ndjek gjithashtu një rrugë tjetër për ta mbajtur Rusinë përgjegjëse për krimin e agresionit përmes Gjykatës Ndërkombëtare të Drejtësisë, e cila ka caktuar seanca dëgjimore publike. Kjo gjykatë e OKB-së merret me mosmarrëveshjet midis vendeve, dhe kështu nuk do të rezultonte në asnjë akuzë penale kundër individit Putin.

Gjeneralmajori ukrainas: Forcat ruse e kanë të pamundur ta pushtojnë Kievin! / Çdo ditë për armikun është ferr

 

NGA: I. MORINA 

Gjeneralmajori ukrainas Mykola Zhirnov.

A do të munden rusët ta rrethojnë Kievin? Intervistë me shefin e administratës ushtarake të kryeqytetit Mykola Zhirnov.Gjeneralmajor Mykola Zhirnov tregon në NV për luftën kundër armikut në të gjitha drejtimet përreth kryeqytetit dhe shpjegon se në cilat kushte ushtria ruse do të mund të arrinte ta pushtonte Kievin.

Forcat e Rusisë kanë dëhstuar plotësisht, jo vetëm ta pushtojnë Kievin, kryeqytetin e Ukrainës, por, ato as nuk ia kanë dalur ta mbajnë në rrethim. Çdo përpjekje e tyre për ta rrethuar Kievin ka dështuar. Ka dështuar sepse është mundur nga ushtria e rregullt ukrainase dhe forcat e mbrojtjes territoriale, shpjegon gjeneralmajori ukrainas Mykola Zhirnov.

Një javë pas fillimit të luftimeve, me 1 mars, presidenti ukrainas Volodimir Zelenski e emëroi gjeneralin Mykola Zhyrnov, shef të administratës ushtarake të kryeqytetit. Ai më parë kishte shërbyer si komandant i forcave mbështetëse, ndërsa në vitin 2014 e 2015 organizoi mbështetjen ushtarake të inxhinierisë të armëve të Forcave Ushtarake të Ukrainës.

Menjëherë pas emërimit, gjeneralmajori Zhirnov e kishte quajtur kryeqytetin objektin kryesor të mbrojtjes.

Pse Rusia nuk do të mund ta pushtonte Kievin edhe nëse e përqëndron të gjithë ushtrinë e saj në drejtim të Kievit, dhe si po përsëritet historia, kur, ‘Bashkimi Sovjetik” për 15 vjet luftë, nuk ia kishte arritur t’i mundte luftëtarët rebel të Ukrainës, për këto dhe [ështje të tjera, gjenerali ukrainas ka folur në intervistën e dhënë për Shërbimin Kombëtar të Unitetit të Ukrainës.

I pyetur se a është apo jo i rrethuar kryeqyteti Kievi, pasi sipas Mikhail Podolyak këshilltarit të shefit të zyrës së Presidentit Zelnski, “Kijevi është nën rrethim dhe është gati të luftojë”, ndërsa “Kievi nuk është i rrethuar”, sipas këshilltarit të Ministrisë së Punëve të Brendshme, Vadim Denisenko, dhe që të dy e thanë këtë dje, gjeneralmajor Mykola e thotë qartë, se Kievi nuk është nën rrethim.

“Si shef i administratës ushtarake të Kievit dhe si ushtarak mund t’ju siguroj me siguri se Kievi nuk është nën rrethim. Rrethimet e qytetit janë zhdukur

Gjeneralmajori ukrainas Mykola Zhirnov: Kombi ynë është i gatshëm të vdesë për zgjedhjen e tij europiane

Më së shumti ku ka avancuar kundërshtari ishte në drejtimin Zhytomyr-Jasnogorodka. Por, pastaj ai u ndalua. Pavarësisht avantazhit në forcën e drejtpërdrejtë dhe armëve, kundërshtari nuk mund të dilte dhe të merrte kontrollin e autostradës Odessa.

Një situatë e ngjashme në drejtimet e Obukhívsókomu dhe Boryspil. Kontrolluam daljen e kolonave, goditëm forcat e armatosura ruse”.

Sipas tij, kundërshtari pësoi humbje, kaloi në mbrojtje dhe rigrupim dhe se ukrainasit kontrollojnë pjesët lindore dhe jugore të rajonit. “Çdo qytet i rajonit të Kievit, fqinjët tanë janë shtylla ku ushtria jonë dhe të gjithë banorët bëhen mbrojtës të shtëpive, rrugëve dhe lagjeve të tyre”, thotë gjeneralmajor Mykola.

I pyetur për kolonën 65 km të forcave ruse, ai shpjegon se ato nuk kanë ngecur thjeshtë në baltë, por sepse Forcat e Armatosura të Ukrainës, forcat e TRO-së vazhdimisht i sulmojnë.

“Qëndrojnë në bllokime trafiku jo për shkak të baltës, por për shkak se Forcat e Armatosura të Ukrainës, forcat e TRO-së vazhdimisht ndikojnë tek ata. Ata nuk ndihen të sigurt, duke u përpjekur të manovrojnë, duke dalë nga pista e rrahur. Në këtë pikë ata nuk mund të avancojnë sepse po marrin humbje çdo ditë. Është e vështirë për ta të organizojnë furnizime materiale dhe teknike, shpërndarje karburanti, municione”, thotë ai.

I pyetur se [farë mund të bëjnë rusët për ta pushtuar Kievin, dhe nëse mund ta bëjë këtë me mobilizim forcash të reja nga Rusia, gjeneralmajor Mykola thotë se bazuar në të gjithë kanonet ushtarake për të kapur Kievin, kundërshtari duhet të krijojë një unazë të brendshme dhe të jashtme të hapësirës. “Forcat e atyre që përpiqen ta marrin Kievin duhet të jetë 5 deri 7 herë më e madhe se forca e atyre që mbrohen. Trupat që hyjnë në unazën e brendshme duhet të sulmojnë Kievin, dhe ata që hyjnë në unazën e jashtme duhet të sigurojnë siguri nga trupat zhbllokuese. Kievi është një qytet i madh me infrastrukturë të madhe, në të cilin kanë jetuar më shumë se 4 milionë qytetarë para luftës. Aktualisht, qyteti ka një grupim jashtëzakonisht të madh trupash, kështu që tani për të krijuar një grupim armiku duhet të mbledhë të gjitha burimet njerëzore në dispozicion dhe t’i sjellë ato në Kiev. Forcave komanduese gjatë Luftës së Dytë Botërore iu deshën 2 milionë njerëz dhe 42 mijë për të kryer një stuhi në Berlin, me fuqi të artilerisë. Prandaj, të krijosh një grup të tillë që do të krijonte stuhi në Kiev është tejet e vështirë, edhe për një shtet si Rusia”, thotë ai.

Sipas tij, Forcat e Armatosura të Ukrainës dhe populli ukrainas kanë treguar një rezistencë të tillë, që në historinë moderne nuk e ka treguar askush në Evropë. “Kombi ynë është i gatshëm të vdesë për zgjedhjen e tij europiane, por të mbrojë vlerat e tij. E gjithë historia e llojit tonë tregon dashurinë tonë për lirinë. “Sovjetikët” e luftuan ushtrinë rebele ukrainase për më shumë se 15 vjet dhe nuk e mposhtën dot. Ne ukrainasit jemi popull paqedashës, por shumë shpejt mund të marrim armët dhe të mbrojmë virtytet tona”, thotë gjenerali.