"Sali Berisha do të sillet forcërisht me polici në GJKKO”,Erion Veliaj: Të vijë të përballet në gjyq për shpifjet që ka bërë"

 

  

Kryebashkiaku Erion Veliaj ishte në Gjykatën e Posaçme kundër Korrupsionit në seancën e parë të gjyqit me ish kryeministrin Sali Berisha të cilin e ka akuzuar për shpifje për deklarimet në lidhje me Iranin.

“Sot gjykata vendosi që në datën 19 Maj në orën 10:00, Sali Berisha do të shoqërohet nga policia për paraqitje të detyrueshme në gjykatë. Do të rikthehem prapë në datë 19 Maj dhe policisë do i shkojë njoftimi që të sjellë Sali Berishën, si të gjithë qytetarët e tjerë që duhet të shkojë në gjykatë dhe të provojë akuzat. Që të akuzosh gjithë dynjanë dhe të mos paraqitesh në gjykatë, të thuash shpifjet nga më monstruoze, t’i futesh njerëzve te vrima e çelësit, poshtë fustanit, në krevat, të merresh me gjithë familjet e gjithë dynjasë dhe të mos kesh kurajën civile të vijë në gjykatë. Policia, sipas vendimit të gjyqtarit, duhet të bëjë detyrën dhe të sjellë forcërisht Sali Berishën, që të përballet me akuzat dhe shpifjet që janë të padenja, jo për një plak 80-vjeçar, por për këdo që jeton dhe angazhohet publikisht dhe që e ka përdorur prezencën e vet publike si një qysqi dhe një kokëdash vetëm për të shkatërruar normat dhe vlerat  në këtë shoqëri”, tha Veliaj.

Sali Berisha nuk u paraqit në seancën e parë pas padisë së ngritur nga kryetari i Bashkisë së Tiranës për shpifje edhe pse pak ditë  më pare ai hodhi akuza të forta në adresë  të qytetarit te parë  në lidhje me inceneratorin e Tiranës  si dhe lidhjeve sipas tij  të kryebashkiakut me Iranin përmes një shqiptari të quajtur Miliad Lopa me disa biznesmenë iranianë, për të cilët këmbëngul se janë  anëtarë të forcave speciale të regjimit të Iranian. Veliaj sfidoi Berishën  të   ballafaqohet me  të para drejtësisë dhe jo në studio televizive.

“Sot isha unë nismëtar i një akuze ndaj Sali Berishës, që ka mbi 30 vjet që shan dhe mallkon këdo, por çdo gjë ka një limit. Ekziston një shprehje që thotë: Hapi rrugë budallait dhe të ligut. Por unë nuk e besoj këtë shprehje. Unë besoj se në një vend demokratik, as budallait dhe as të ligut nuk i duhet hapur rrugë. Këto historitë me iranianë, Sali Berisha duhet t’i provojë në gjykatë dhe këto historitë me gardat revolucionuare, me fotografi fiktive, me shpifje dhe akuza të paqena, Sali Berisha duhet t’i provojë në gjykatë. Ka kaq kohë që më fton në debat, sot ishte momenti për të ardhur si burrë. Sali Berisha nuk është burrë! Në këtë e dimë të gjithë. Është frikacaku më i madh i këtij vendi. Është 80 vjeç dhe njerëzit më thonë lërë se ka roitur. Por nuk besoj se ai është njeri i roitur. Sali Berisha është njeri i lig. Sali Berisha ka mbjellë urrejtje dhe përçarje dhe shpifje dhe ka promovuar kulturën që ti hidh baltë, mjafton që ta njollosësh dikë pa pikë përgjegjësie”, tha Veliaj.

Bashkia e Tiranës  pretendon se  Berisha arriti kulmin e akuzave te tij  kur tha se  në foto me Miliad Lopën ishte dhe Qasem Soleimani, ish-drejtuesi i forcave speciale iraniane i vrarë me dron nga amerikanët.  Për të përgënjeshtruar kreun e Rithemelimit, bashkia publikoi një  foto të shkrepur tre vite më parë të  Miliad Lopës së bashku me Ilir Metën duke sfiduar Sali Berishën që të akuzojë dhe aletin e tij të lidhur me iranianët.