Ish-zëdhënësi i NATO-s gjatë kohës së luftës në Kosovë, Jamie Shea ishte këtë të shtunë i ftuar në një intervistë për Euronews Albania për të folur për situatën e krijuar në veri të Kosovës.
Në afërsi të manastirit të Banjskës, një grup terrorist i udhëhequr nga krimineli çetnik serb Milan Radoiçiç sulmoi të dielën e 24 shtatorit 2023, policinë e Kosovës e për pasojë mbeti i vrarë Heroji i Kosovës ,i ndjeri Afrim Bunjaku nga Samadrexha e Vushtrisë.
Jamie Shea shprehu keqardhjen për policinë e vrarë ndërsa i pyetur se si e komenton zinë e Serbisë për terroristët serbë të vrarë në Kosovë, ai tha se kjo nuk ka qenë një sjellje e arsyeshme.
Ai tha se ata nuk kishin shkuar në veri të Kosovës për ndonjë kauzë të drejtë për t’u quajtur heronj, sipas tij ata shkuan aty për të vrarë e për të shkaktuar trazira
“Si fillim duhet të bëjmë të qartë se kjo nuk është një sjellje e arsyeshme këta njerëz nuk janë martirë, ata nuk janë duke luftuar për ndonjë kauzë e cila mund të justifikohet. Jo. Ata ishin aty për të vrarë njerëz, ishin aty për të shkaktuar trazira. Ideja e të quajturit ata martir apo hero është e gabuar.
Kjo lloj retorike është gjëja e fundit që ne kemi nevojë. Ajo që unë vura re ama është se kur sekretari i Shteteve të Bashkuara, Blinken takoi presidentin Vuçiç ky i fundit premtoi se do të qetësohej situate. Le të shikojmë nëse do qetësohet kjo situatë dhe nëse kjo retorikë qesharake dhe e panevojshem ka për t’u shuar apo jo”,-tha Jamie Shea.
