Platforma e Kosovës për veriun
Kryeministri i Kosovës, Hashim Thaçi, duhet t’i braktisë bisedimet me Serbinë në momentin që në tavolinën e bisedimeve hedhet Platforma serbe për Kosovën, e cila në mes tjerash parasheh autonomi për veriun.
Të paktën këtë e kërkon opozita kosovare, sipas së cilës, nëse pranohet që të bisedohet platforma serbe, atëherë domosdoshmërisht diçka nga platforma do të pranohet nga Prishtina zyrtare, si “rregull” i çdo procesi të negociatave.
Pas një jave, përkatësisht më 17 janar 2012 , kryeministri i Kosovës, Hashim Thaçi, do të takohet me kryeministrin serb, Ivica Daçiq në Bruksel, ku siç është paralajmëruar nga baronesha Catarine Ashton, do të debatohet për veriun e vendit, ndonëse nuk janë dhënë specifika se për çfarë konkretisht do të bisedohet.
Ditëve të fundit mediet kanë raportuar se sikurse Beogradi edhe Prishtina zyrtare ka hartuar platformë për veriun, të cilën do ta prezantojë kryeministri Thaçi në takimin e ardhshëm në Bruksel, por kjo gjë është hedhur poshtë të martën nga zëvendëskryeministri Hajredin Kuçi, sipas të cilit, bisedimet do të zhvillohen në kuadër të Kushtetutës së Kosovës dhe Planit të Ahtisarit.
“Unë nuk kam informata të sakta për atë që ju po e thoni (platforma e Kosovës për veriun), ajo çka e them se çdo gjë që prezantohet nga Qeveria e Kosovës është në kuadër të Kushtetutës së Kosovës dhe pakos së presidentit Ahtisaari se edhe ajo pako ka qenë kompromis të gjithë e dimë ne”, ka thënë Kuçi.
Ofertë ekonomike, në vend të Platformës për Veriun
Kryeministri i Kosovës, Hashim Thaçi, do ta prezantojë në dialogun me homologun e tij serb Ivica Daçiq një ofertë ekonomike për qytetarët e veriut të Kosovës.
Oferta, që përfshin krijimin e fondit për veriun në këmbim të ndaljes së financimit nga Serbia të strukturave të saj në veri, është prezantuar muaj më parë para diplomacive të shteteve perëndimore. Një e tillë i është prezantuar edhe Zyrës së ndërmjetëses Catherine Ashton.
Në bazë të saj, ndërmjetësuesja e dialogut ka arritur t’i përafrojë paraprakisht qëndrimet e të dyja palëve sa i përket aranzhimit të parë për çështjen më problematike në marrëdhëniet mes Kosovës e Serbisë- veriun.
Oferta ekonomike është hartuar në koordinim me Ministrinë e Integrimeve Evropiane, ngase një ofertë e tillë për veriun ka qenë edhe kërkesë e Komisionit Evropian në Raportin e Progresit të vitit 2011.
Arben Gashi:Qeveria edhe ashtu nuk ka mandat për të folur në Bruksel për çështjen e veriut.
Kryetari i Komisionit për legjislacion, Arben Gashi, ka thënë se Qeveria edhe ashtu nuk ka mandat për të folur në Bruksel për çështjen e veriut.
Gjithçka që flitet për komunat veriore në prani të kryeministrit serb, sipas tij, lë të kuptohet se pala vendëse ka pranuar të flasë për rregullimin e brendshëm shtetëror.
Dhe kjo siç ka thënë ai është e ndaluar me Kushtetutë dhe me rezoluta të Kuvendit të Kosovës.
Dialogu dhe rezultatet e tij duhet të jenë në pajtim me sovranitetin e Kosovës, subjektivitetin ndërkombëtar, integritetin territorial dhe rregullimin e brendshëm – rendin unik kushtetues të Kosovës”, thuhet në pikën 3 të rezolutës për normalizimin e marrëdhënieve në mes të Republikës së Kosovës dhe Republikës së Serbisë, e cila është miratuar me 18 tetor 2012.
Nisur nga kjo, deputeti Gashi konsideron se qeveria nuk akt ë drejtë të ofrojë kurrfarë platforme për veriun, në takimin e radhës që pritet të mbahet në Bruksel ndërmjet Thaçit dhe Daçiqit më 17 janar 2013.
“Nëse qeveria ka vendosur të dalë me ndonjë propozim për veriun, e që del jashtë Pakos së Ahtisarit, atëherë fillimisht duhet të kërkohet një konsensus i madh shoqëror për të ndodhur diçka e tillë, sepse është thënë sa e sa herë se Pakoja e Ahtisarit është kompromisi më i madh që është bërë nga Kosova”, ka deklaruar Gashi.
Serbia po rrezikon me konflikt të gjerë
Azem Vllasi, këshilltar i Qeverisë së Kosovës për politikë të jashtme ka tërhequr vërejtjen se me tensionim marrëdhëniesh me shqiptarët në Luginë, kreu shtetëror i Serbisë rrezikon me konflikt të gjerë.
Vllasi pajtohet me vlerësimet se Lugina e Preshevës mund të bëhet sërish vatër e re dhe potenciale e krizës.
"E kur bëhet fjalë për Luginën e Preshevës, mos të llogarisin ata se mund të bëjnë me shqiptarët çfarë të duan, mos të rrezikojnë me konflikt të gjerë. Po u sulen atje ndaj shqiptarëve, janë sulur kundër të gjithë nesh! Le ta dinë këtë”, ka tërhequr vërejtjen Azem Vllasi.
Ai ka përkujtuar se Serbia dëshiron të ashpërsojë marrëdhëniet me shqiptarët në Luginë të Preshevës vetëm pse ata e përdorin flamurin e vet kombëtar dhe vetëm pse e kanë lapidarin me emrat e viktimave që kanë rënë pikërisht nga pushteti serb.
"Për mendjen e shëndoshë, për të gjithë ne kjo është befasi, porse kjo ilustron se sa në Serbi kanë mbetur në të kaluarën dhe se sa nuk mund të dalin nga ajo", ka thënë Vllasi për AA.
Duke e komentuar “platformën”, Azem Vllasi ka vlerësuar se “ ajo është edhe një pafytyrësi dhe nebulozë që kemi pasur rastin ta shohim që nga koha e Sllobodan Milosheviqit” .
Mos e prek përmendoren e UÇPMB-së
Kryeministri Sali Berisha ka shprehur sot shqetësimin e tij, siç shprehet për deklaratat kërcënuese të Beogradit në drejtim të shqiptarëve të Luginës së Preshevës. Deklaratat e kryeministrit serb, Ivica Daçiq për heqjen e monumentit të Dëshmorëve të Lirisë, për kryeministrin janë provokim dhe dëshmi e albanofobisë serbe.
“Prej disa javësh tensionet politike në Luginën e Preshevës po rriten si rezultat i një kërcënimi nga autoritet e Beogradit për heqjen e monumentit të Martirëve të Lirisë që ranë në trojet e tyre etnike në mbrojte të lirisë dhe të drejtave njerëzore të shqiptarëve të Preshevës të mohuara atyre nga regjimi barbar i Sllobodan Millosheviçit. Ky kërcënim i autoriteteve serbe është një dëshmi tjetër e albonofobisë së politikës zyrtare të Beogradit”, thotë ai.
Sipas Berishës, “Ushtria Çlirimtare e Luginës së Preshevës lindi në kohën kur qytetarët shqiptarë të komunave me shumicë shqiptare në jugun e Republikës së Serbisë ishin, sipas raporteve të OKB-së dhe institucioneve të tjera ndërkombëtare, qytetarët më të shtypur të Evropës e madje ndoshta të botës. Me luftën dhe sakrificën e tyre sublime luftëtarët e lirisë i imponuan regjimit të Millosheviqit një marrëveshje me ndërmjetësim ndërkombëtar, zbatimi i të cilës është jetik për liritë dhe të drejtat e qytetarëve shqiptarë dhe i domosdoshëm për paqen e stabilitetin në rajon. Shtojmë këtu se në çdo vend të lirë janë autoritetet vendore dhe jo ato qendrore që vendosin për monumentet historike apo kulturore që duan të ngrenë në territorin e njësisë së tyre vendore”, sqaroi Berisha.
Kryeministri Berisha nënvizon qartë se, marrja këtyre kompetencave nga autoriteteve lokale të Preshevës nga qeveria e Beogradit përbën shkelje flagrante të Konventave Evropiane për liritë dhe të drejtat njerëzore, autonominë e autoriteteve vendore dhe asaj për minoritetet.
“Republika e Serbisë si anëtare e Këshillit të Evropës është e angazhuar dhe e detyruar t`i respektojë ato”, thekson Berisha.
Berisha nënvizon se qëndrimi i fundit i autoriteteve të Beogradit është një provokim ndaj mbarë shqiptarëve, përpjekjeve të tyre serioze për të kontribuar në paqen dhe stabilitetin në rajon nëpërmjet ndërtimit të marrëdhënieve të reja me fqinjët e tyre.
“Qeveria shqiptare i bën thirrje autoriteteve të Beogradit të lënë mënjanë praktikat e vjetra albanofobe, të respektojnë pakicën shqiptare që jeton në trojet e veta etnike në Serbi dhe jep ndihmesën e saj në stabilitetin dhe zhvillimin e vendit. Qeveria shqiptare i bën thirrje shqiptareve të Luginës së Preshevës të mos provokohen në asnjë rrethanë nga ata, të cilët kanë vetëm një qëllim, të spastrojnë etnikisht komunat e tyre, t’i largojnë ata me një mënyrë apo një tjetër nga trojet e tyre etnike mijëravjeçare. Vërtet vandalët mundën me forcën dhe dhunën shtetërore të rrënojnë një përmendore të luftëtarëve, atë të Martirëve të Lirisë së shqiptarëve por ky është vetëm akt frike. Të rënët tanë nuk vdesin kurrë”, thuhet në reagimin e kreut të qeverisë shqiptare.
Kryeministri serb Ivica Daçiç ka deklaruar sot se “Monumenti i ish-pjesëtarëve të Ushtrisë Çlirimtare të Preshevës, Bujanocit dhe Medvegjës në qendër të Preshevës do të prishtet deri më 17 janar me qejf ose me zor”. Sipas tij është e paarsyeshme se si populli shqiptar përpiqet të ketë dy shtete në Ballkan.
Bashkimin Kombëtar duhet ta bëjnë qeveritë shqiptare
Bashkimi Kombëtar mes Kosovës dhe Shqipërisë, është një çështje që ka kohë që është ngritur nga Lëvizja Vetëvendosje.
Por, iniciativën për Bashkim Kombëtar e ka marrë Aleanca Kuq e Zi. Zyrtarë të kësaj Aleance, kanë dorëzuar kërkesën për referendum për Bashkim Kombëtar.
E kjo iniciativë është pritur shumë mirë nga Lëvizja Vetëvendosje. Deputeti i Lëvizjes Vetëvendosje, Rexhep Selimi ka thënë për Indeksonline se ky është një hap i qëlluar i Aleancës Kuq e Zi.
Selimi ka thënë se Vetëvendosje mbështet çdo iniciativë që ka të bëjë më këtë çështje.
“Çdo iniciativë, çdo hap që ka të bëjë më Bashkimin Kombëtar, Lëvizja Vetëvendosje e përkrahë fuqimisht” ka thënë Selimi për Indeksonline.
Mirëpo, sipas deputetit Rexhep Selimi, kjo iniciativë duhet të merret nga të dy qeveritë shqiptare.
“Bashkimi Kombëtar duhet të ndodh dhe një iniciativë e tillë duhet të merret nga të dy qeveritë. Qeveria e Kosovës dhe ajo e Shqipërisë duhet të marrin këtë iniciativë, pasi që Bashkimi Kombëtar do të ndodh mes këtyre dy shteteve” ka thënë Selimi për Indeksonline.
Ndërkohë, përfaqësuesit e Aleancës Kuq e Zi kanë dorëzuar zyrtarisht në Protokollin e Komisionit Qendror të Zgjedhjeve kërkesën e Aleancës Kuq e Zi për mbajtjen e referendumit dhe pajisjen me dokumentacionin zyrtarë për nisjen e mbledhjes së 50 mijë nënshkruesve të cilët do të kërkojnë mbajtjen e ti.
Fillimisht Lugina, e pastaj Bashkimi Kombëtar
Kryetari i Lëvizjes për Bashkim, Avni Klinaku, ka thënë se së pari duhet të zgjidhet çështja e Luginës së Preshevës.
“Për Lëvizjen për Bashkim referendumi është një e drejtë e patjetërsueshme e popullit shqiptar, por aktualisht është i ngutshëm pasi kemi një sërë procesesh t’i realizojmë në mënyrë që referendumin e vërtetë për bashkim kombëtar ta bëjmë të pranuar ndërkombëtarisht. Kjo nuk mund të lidhet me afate kohore, por me procese politike. Çëshjta e Kosovës Lindore dhe çështjet e shqiptarëve në Maqedoni duhet të zgjidhen njëherë, pastaj bëjmë një referendum ndërkombëtar” ka thënë Avni Klinaku për gazetën “Epoka e Re”.
Ai ka thënë se në dialogun Kosovë-Serbi duhet të futet edhe Lugina e Preshevës. Kurse duke folur për koalicionin e mundshëm PDK-AAK, Klinaku ka thënë se vështirë të ndodh ky koalicion, duke e cilësuar postin e kryeministrit si “mollë sherri”.
Ndërkombëtarët, kërkojnë zhvendosjen e Përmendores së UÇPMB-së?
Serbia planifikon që shqiptarët e Luginës së Preshevës të kenë flamurin e tyre dhe jo të mbajnë flamurin kombëtar shqiptar.
Gazeta serbe “Danas” ka shkruar se qarqet diplomatike të huaja që janë në Serbi kanë propozuar që Këshilli Kombëtar i Shqiptarëve në Luginën e Preshevës së shpejti të dalin me një propozim se si do të duket flamuri i shqiptarëve që jetojnë në Jugun e Serbisë, në këtë mënyrë duke e larguar nga përdorimi flamurin kombëtar shqiptar, që siç e quajnë serbët atë si flamur të Shqipërisë.
“Urgjentisht të dilet me propozim se si do të duket flamuri i shqiptarëve që jetojnë në Serbinë e jugut me qëllim që të shmanget përdorimi i flamurit të Shqipërisë”, kanë thënë diplomatët, transmeton Zhurnal.
Gjithashtu diplomatët e huaj kanë kërkuar nga shqiptarët në Luginë të Preshevës që ta heqin Lapidarin e dëshmorëve të rënë të UÇPMB-së nga vendi ku aktualisht ndodhet dhe ta vendosin atë në një vend tjetër me qëllim që mos të shkaktohet ndonjë incident më i madh.
Beogradi ka deklaruar se para nisjes për bisedime me Kosovën për 17 janar 2013 në Bruksel, përmendorja e UÇPMB-së do të largohet me dhunë.
Shqiptarët janë të vendosur që mos të ndryshojnë asgjë, ndërkaq të shtunën është paralajmëruar që ata të mbajnë një seancë të 65 kuvendarëve nga tre komunat shqiptare Bujanoc, Preshevë dhe Medvegjë.
Në këtë mbledhje do të merren vendimet përfundimtare se çfarë do të bëhet në të ardhmen për çështjet politike të shqiptarëve në Luginë.
Mos e prekni lapidarin e UÇPMB-së
Kryeparlamentari i Kosovës, Jakup Krasniqi, i është kundërpërgjigjur kryeministrit të Serbisë, Ivica Daçiq, i cili ka kërcënuar se do ta largojë me dhunë lapidarin e dëshmorëve të UÇPMB-së, të vendosur para Kuvendit Komunal të Preshevës. Ai e ka paralajmëruar Daçiqin që mos ta prek lapidarin e dëshmorëve.
Krasniqi ka thënë se kërcënimet e Daçiqit e dëmtojnë dialogun e nisur për normalizimin e marrëdhënieve në mes të Kosovës dhe Serbisë.
Në mënyrë që të kundërshtohet Beogradi, Krasniqi thotë se duhet reciprocitet në kërkesat e qytetarëve të veriut të Kosovë me ato të shqiptarëve të jugut të Serbisë, territor që ai e quan ndryshe.
“Duhet parë sigurisht me reciprocitet në mënyrë të veçantë me atë që ata po kërkojnë për serbët e pjesës veriore të Kosovës, natyrisht edhe ne duhet ta kemi parasysh shqiptarët e pjesës lindore të Kosovës”, ka thënë Krasniqi.
Ai ka folur edhe për deklaratat e kryeministri të Shqipërisë, Sali Berisha, për ligë unike të futbollit dhe ato të Aleancës Kuq e Zi për Bashkim Kombëtar, deklarata të cilat Krasniqi i quan folklor politik me qëllime elektorale.
“Mendoj se duhet të këtë veprime konkret e pastaj të vijë deklaratat pas veprimeve”, tha Krasniqi, duke shtuar se janë vetë politikanët që e kanë penguar bashkimin e Kosovës me Shqipërinë.
“Faj është i politikës që ka marrë përgjegjësi me krye punë sipas kushtetutave dhe ligjeve që i kemi”, ka thënë Krasniqi, duke shtuar se nuk është kundër bashkimit kombëtar, por kjo gjë duhet të kërkohet në bazë të rrethanave të krijuar politike në Ballkan.
FLORI BRUQI
