PLANI I SHËRBIMIT SEKRET MAQEDONAS

Zbulohen prapaskenat e infiltrimit të shërbimit sekret maqedonas dhe atij serb në grupin e armatosur që u bë shkak për sulmin çnjerëzor të Kumanovës më 9 maj

Një burim ndërkombëtar i portalit "tesheshi", i kyçur në organet e sigurisë rajonale, bëri të ditur se strumbullarët e lëvizjeve që solli skenarin makabër kanë qenë tre agjentë shqipfolës të shërbimit sekret të Maqedonisë, apo DSK që drejtohej deri para pak ditësh nga Sasho Mijakllov.

Njerëzit e infiltruar të DSK-së kanë joshur ish luftëtarë të UÇK-së, duke i "mashtruar" ata për gjendjen e vështirë të shqiptarëve për një sulm të policisë Maqedoni mbi shqiptarët ndërsa që pak vetave iu premtuan edhe para. Grupin e shqiptarëve agjentët maqedonas e dërguan në "Lagjen e Trimave" në Kumanovë, drejt vdekjes, masakrimit dhe arrestimi të tyre.
I tërë skenari famëkeq i vrasjeve dhe arrestimeve të shqiptarëve në Kumanovë është përgatitur me kujdes nga kryeministri i ish Republikës Jugosllave të Maqedonisë Nikolla Gruevski, Ministrja e Punëve të Brendshme, Gordana Jankullovska dhe shefi i shërbimit sekret maqedonas, Sasho Mijallkov", thonë për "tesheshi" burime nga institucionet ndërkombëtare që janë të vendosura në Kosovë.
Në tërë këtë operacion famëkeq kanë qenë të përzier direkt edhe disa shërbime sekrete të shteteve fqinjë që janë armiqësore ndaj shqiptarëve, ka thënë burimi duke mos dashur të preçizojë se për cilat shtete bëhet fjalë.
Në pyetjen se mos këtu bëhet fjalë për shërbime sekrete të Serbisë, Rusisë e Greqisë, burimi as nuk ka pohuar as nuk ka mohuar.
Tre agjentë shqiptarë të shërbimit sekret maqedonas kanë rekrutuar shqiptarë të Kosovës në këtë operacion me qëllim të inskenimit të një sulmi ndaj Institucioneve të Maqedonisë.
Ndërsa në opinionin ndërkombëtar të shkojë lajmi se shqiptarët e Kosovës dhe të Shqipëris, sulmuan Maqedoninë me qëllim destabilizimin e vendit, ndërsa në anën tjetër qeveria e Gruevskit të forconte pozitat e veta pas skandaleve të publikuara nga Zoran Zaev.
Gruevski, Jankullovska dhe Mijallkov iu kanë dhënë sasi të parave të pa kufizuara me qëllim të rekrutimit të shqiptarëve dhe formimin e Ushtrisë Çlirimtare Kombëtare të re.
Operacioni "sekret" ka filluar në fund të muajit shtator dhe fillim të muajit tetor të vitit 2014, teksa një agjent shqiptar i shërbimit sekret të Maqedonisë ka kontaktuar shqiptarë të Kosovës, kryesisht ish luftëtarë të UÇK-së, pjesa më e madhe nga rajoni i Dukagjinit.
Djemve të UÇK-së, agjenti fillimisht iu është ankuar për gjendjen shumë të rendë në të cilën po kalojnë shqiptarët e Maqedonisë, me mundësinë e një sulmi të policisë dhe Ushtrisë së këtij vendi mbi popullatën civile shqiptare.
Agjentet iu kanë kërkuar ish-pjesëtarëve të UÇK-së, që t’i ndihmojnë shqiptarët, gjë që edhe u pranua nga këta të fundit ka thënë burimi ndërkombëtar i portalit "tesheshi".
"Financiarisht nuk do të kemi asnjë problem pasi kemi edhe përkrahjen e Qeverive të Shqipërisë dhe Kosovës si dhe të partive politike shqiptare të Maqedonisë", iu ka thënë agjenti ish ushtarëve të UÇK-së.
Në fillim janë kontaktuar krerët e këtij grupi diku rreth 3-4 veta, e që burimi nuk ka dashur t’i identifikojë se cilët janë ata, më pastaj janë rekrutuar edhe anëtarë të tjerë duke mos ditur se po shkojnë drejtë vdekjes dhe se janë të tradhtuar që në fillim. Për çdo bisedë që është kryer, agjenti maqedonas ka njoftuar Sasha Mijallkovin duke i dhënë të gjitha detajet rreth personit të rekrutuar.
Personave të rekrutuar agjenti i shërbimit Maqedon iu ka thënë se do t’iu japë nga 100 mijë euro, në mënyrë që ata të bëjnë biznes si dhe të garantojnë familjet e tyre në Kosovë në aspektin ekonomik. Se të arrestuarve në "Lagjen e Trimave" në Kumanove iu janë premtuar nga 100 mijë euro, e konfirmojnë edhe familjaret e tyre.
Burimi ndërkombëtar më tutje i ka thënë tesheshi se e tërë ngjarja ka filluar në fshatin Gushnicë. Sipas tij, Gushnica është fshat malor që ka diku rreth 10 shtëpi të banuar me shqiptarë dhe një post policore ku për çdo ndërrim kanë punuar nga 4 policë të shtetit të Maqedonisë.
Në këtë post policore në Gushnicë, sipas burimit kanë qenë të deponuara 4 armë automatike AK 47 si dhe 4 revole, 10 ditë para ndërhyrjes së grupit të Shqiptarëve në këtë postë policore janë dërguar nga Shërbimi Sekret i Maqedonisë 64 armë automatike AK 47 si dhe 64 revole, të cilat më pas janë marr nga grupi i shqiptarëve të rekrutuar nga maqedonët.
Në operacion e sulmit ndaj postës policore në Gushnicë ka marrë pjesë personalisht edhe pjesëtari i Shërbimit sekret maqedon, emri i të cilit është i njohur për redaksinë. Kryeministri i ish-Republikës Jugosllave të Maqedonisë Nikolla Gruevski, Ministrja e Punëve të Brendshme, Gordana Jankullovska dhe shefi i shërbimit sekret maqedon, Sasho Mijallkov, gjatë tërë kohës kanë qenë të njoftuar për gjoja sulmin në posten e Gushnicës si dhe për çdo lëvizje që ka bërë grupi në territorin Maqedonisë.
Agjenti shqiptar i Shërbimit Sekret Maqedonas, tri ditë më parë iu ka thënë grupit të Shqiptarëve se Policia dhe ushtria maqedonase do të sulmojë shqiptarët në Kumanove më 12 maj, ndërsa që ne kishte qenë mirë që të shkojmë në Kumanove, në mënyrë që djemtë të njihen me terrenin aty.
"Në ‘lagjen e Trimave’ në Kumanovë nga i tërë grupi kanë qenë të armatosur vetëm 14 veta me AK 47 si dhe me një sasi shumë të vogël të municionit, të tjerët kanë pasur ndonjë revole ose thikë. Mos marrja e armatimit nga të gjithë pjesëtarët e grupit është bërë me qëllim të gjoja të lëvizjes më të lehtë dhe pa rënë shumë në sy tek autoritete dhe popullata. Për këtë arsye ka ardhur deri tek dorëzimi i grupit, pasi që ata kanë ngelur pa municion, ndërsa që shumica e të arrestuarve as që kanë shkrepur ndonjë plumb, por ka edhe të atillë që fillimi i luftimeve i ka zënë në gjumë", ka thënë burimi i "tesheshi".
Grupi i shqiptarëve pas të shtënave të para ka kuptuar se janë të tradhtuar dhe kjo ka bërë që një pjesë e tyre e madhe të dorëzohen tek policia maqedonase. Krerët e Maqedonisë të informuar nga agjenti i tyre me hollësi për personat që gjendeshin në "Lagjen e Trimave", vendin ku ata janë strehuar dhe armatimin e pakët që e kanë me vete kanë filluar operacionin në kapjen dhe asgjësimin e grupit "terrorist" si e quanin ata.
Operacioni i forcave policore maqedonase që në fillim të tij, doli nga kontrolli pasi që hasën në një rezistencë nga grupi i shqiptarëve. Është shumë e paqartë se si janë vrarë policët maqedonas, shqiptarë e serbë bashkë, pasi që policia kishte të gjitha informacionet për grupin dhe nga sa plumba e municione i ka çdo njëri. Burimi ndërkombëtar ka theksuar se "ka dyshime të bazuara se policët maqedonas janë vrarë ndër vete sipas skenarit të policisë sekrete të Mijallkovit me qëllim që tek popullata të paraqesë se terroristet nuk kursejnë askënd".
Operacioni sekret i Gruevskit, Jankullovskës dhe Mijallkovit, që në ditë e para është dekonspiruar nga Shërbime të inteligjencës të NATO-së, KFOR-it, AKI-së, SHiSH-i i Shqipërisë etj, por mbetet mister mos parandalimi i këtij skenari.
Për të gjithakanë qenë të njoftuar si Prishtina ashtu edhe Tirana zyrtare ka thënë burimi ndërkombëtar për portalin "tesheshi". 

ARTAN GRUBI : GJORGJE IVANOVI NUK E PËRFAQËSON MAQEDONINË

Këshilltari i  Ali Ahmetit, Artan Grubi, ka shkruar se Presidenti i Maqedonisë Gjorge Ivanov, nuk e përfaqëson këtë shtet, pasi nuk ka legjitimitet.

Pas njoftimeve se Presidenti i Maqedonisë Gjorge Ivanov, u ka nisur një letër të presidentëve të shteteve anëtare të OKB-së, me anë të cilës dëshiron që fajin kryesor për konfliktin e 9 majit në Kumanovë, t’ia vë Kosovës dhe disa politikanëve shqiptarë, kanë ardhur edhe reagime nga Kabineti i Ali Ahmetit.
Këshilltari i Ahmetit, Artan Grubi, ka shkruar se Presidenti i Maqedonisë Gjorge Ivanov, nuk e përfaqëson këtë shtet, pasi nuk ka legjitimitet.
“Ivanovi bën mirë të vazhdon të hesht sikur që ka heshtur gjatë gjithë kohës sepse çdo fjalë ose tentativë e tij për të vepruar bën vetëm dëm dhe asnjëherë mirë.
Për ne, qëndrimet e tij nuk janë përcaktime të shtetit sepse ai nuk ka legjitimitet për ta përfaqësuar vendin dhe nuk flet as në emër të shqiptarëve, por as edhe në emër të qytetarëve” ka shkruar ai. 

OVL-UÇK KËRKON SQARIME NGA SHTETI I KOSOVËS PËR KUMANOVËN

Organizatat e Veteranëve të Luftës së Ushtrisë Çlirimtare të Kosovës, ka kërkuar nga institucionet kosovare të dinë të vërtetën e asaj që ka ndodhur në Kumanovë vikendin e kaluar.

OVL përmes një komunikate ka treguar se i ka përcjellë me shqetësim ngjarjet në Kumanovë, përkatësisht në lagjen e trimave, ku sipas tyre forcat barbare sllavomaqedone kanë sulmuar popullatën civile shqiptare të pambrojtur, të cilës i dolën në mbrojtje luftëtarët e lirisë, përkatësisht një numër i bashkëluftëtarëve tonë, të cilët edhe kanë rënë në luftime.

“Me shqetësim të madh e kemi vërejtur pasimin e dezinformatave të ndryshme, të cilat janë pjesë e luftës speciale të pushtuesit, me qëllim të fshehjes së gjurmëve të krimit, dezinformomë këto, që janë mundësuar për shkak të mos përgjigjes adekuate të qeverisë së Kosovës”, thuhet në komunikatë.

Ata kanë kërkuar nga Qeveria e Kosovës, përkatësisht Ministria e Punëve të Brendshme, të publikoj të gjitha informatat relevante me të cilat disponon, në saje të deklarimeve publike të Ministrit se kjo ministri ka qenë e njoftuar me të gjitha rrjedhat.

Kërkesë tjetër e OVL-së, është që Qeveria e Kosovës, e në veçanti Ministria e Punëve të Jashtme, të bëjë trysni mbi qeverinë kriminale të Maqedonisë, për trajtimin e të zënëve rob në përputhje me konventat ndërkombëtare dhe të monitorohet ky trajtim nga institucionet ndërkombëtare si p.sh. Kryqi i Kuq, si dhe t’iu mundësohet mbrojtja juridike.

Po ashtu, ata kërkojnë sqarime ministria e udhëhequr nga Hashim Thaçi, arsyet për mbështetje të qeverisë kriminale të Maqedonisë… Po ashtu OVL ka kërkuar nga Qeveria e Kosovës të inicioj mbledhje urgjente, dhe publike të Parlamentit të Kosovës rreth ngjarjeve të fundit në Maqedoni, po ashtu ata duanë të ju bëhet obduksioni i kufomave edhe në Kosovë sepse nuk dihet se a janë vrarë të gjithë në luftime apo dikë nga torturat e kanë mbytur në burg. 

AVOKATI AZEM VLLASI: GJORGJE IVANOVI T’I KËQYR PUNËT E VETA

Letrës së presidentit të Maqedonisë, GjorgJe Ivanov, dërguar liderëve botërorë, përmes së cilës fajëson Kosovën për mos reagim ndaj përleshjes së armatosur në Kumanovë, ka bërë të reagojnë lider politikë dhe analistë të ndryshëm.

Me anë të letrës së dërguar, Ivanov, dëshiron që fajin kryesor për konfliktin e 9 majit në Kumanovë, t’ia vë Kosovës dhe disa politikanëve shqiptarë këtu.

Ish politikani dhe analisti i zhvillimeve politike, Azem Vllasi, ka thënë se liderët kryesorë të Maqedonisë po mundohen që kundërshtimet e tyre ti vejnë në Kosovë dhe tek shqiptarët në përgjithësi.

Sipas tij Ivanovi dhe qeveria e tij është më mirë të shikojnë punët e tyre se sa të merren me Kosovën dhe shqiptarët.

Vllasi thotë se shqiptarët në Maqedoni janë duke u mashtruar në vazhdimësi të cilët janë duke kërkuar të drejtat e tyre në çfarëdo forme.

” Presidenti i Maqedonisë Gjorge Ivanov, dhe Kryeministyri Gruevski, po lëshojnë kundërshtimet e veta duke fajësuar Kosovën dhe shqiptarët kudo. Nuk mund ti akuzojnë vendet tjera, nuk kanë drejt të akuzojnë të tjerët, ti shikojnë punët e veta.
Ata nuk duanë të shohin se nuk është problemi në Kosovë dhe te njerëzit e Kosovës që kanë mbet më ideale kombëtare. Problemi është tek politikat e tyre jo të mira. Shqiptarët në Maqedoni janë duke u mashtruar në vazhdimësi, ata janë duke luftuar për të drejtat e tyre shumë”, ka thënë Vllasi.

Sipas Vllasit, shpresa e vetme e shqiptarëve është marrëveshja e Ohrit, të cilat do të duhej të respektoheshin. Ai thotë se Kosova dhe Shqipëria gjithmonë kanë jap përkrahje kësaj marrëveshje, andaj edhe duhet respektuar.

Ndër të tjera Vllasi thotë se partitë politike shqiptare në Maqedoni, janë për të përfituar një pjesë të mirë të “kulaçit” në koalicion. Vllasi gjithashtu ka thënë se opozita po organizon protesta kundër kësaj qeverie dhe se mund të ketë trazira.

” Formacionet politike shqiptare në Maqedoni janë vetëm për të ecë në koalicion, për të përfituar pjesën e mirë të kulaçit, por jo për interesat e shqiptarëve atje. Mund të ketë trazira, po organizohen protesta. Për deri sa të mos gjejnë një formulë të përbashkët gjithmonë do të ketë probleme”, ka thënë Vllasi.

Rikujtojmë se ngjarjet e fundit në Maqedoni kanë sjellë një mori zhvillimesh, duke pasur edhe të vrarë e të plagosur në këtë zonë. Deri më tani është raportuar për 22 të vdekur.

PËR RASTIN “MONSTRA” SË SHPEJTI DËSHMITË

Me fillimin e protestave para Qeverisë, kreu i LSDM-së, opozitare, Zoran Zaev, paralajmëroi se përkohësisht do të ndërpriten “bombat”.

Ai ka thënë se përkohësisht do të të ndërpriten “bombat”, gjegjësisht bisedat e përgjuara midis funksionarëve në pushtet.

Për Monstrën, gjithsesi do të paraqiten dëshmitë, por për shkak të ndjeshmërisë nuk i paraqitëm para protestës së madhe, por do ta mbajmë fjalën. Tash fillon vetëm ‘pauza’ e “bombave”

Regjimi i Nikolla Gruevskit është represiv.

Zëvendëskryeministri dhe ministri i Punëve të Jashtme të Kosovës, Hashim Thaçi, ka kërkuar që autoritetet maqedonase ta ndalin dhunën ndaj të arrestuarve në ngjarjet e Kumanovës.

Ai ka thënë se regjimi i Nikolla Gruevskit është represiv.

“Të arrestuarit duhet të trajtohen sipas standardeve ndërkombëtare dhe të ndalet dhuna fizike ndaj tyre nga regjimi represiv i Gruevskit. Problemi nuk është në Kumanovë, problemi është në Shkup. Problemi është politik e jo ndëretnik. Maqedonia ka nevojë për më tepër demokraci, për media të lira, shoqëri civile, zhvillimin e bizneseve dhe të tregut të lirë dhe për më tepër frymë euro-atlantike”, ka thënë Thaçi për RTV BESA.

FRIKË PËR PËRSHKALLËZIMIN E TRAZIRAVE NË MAQEDONI

Përgatitja e opozitës për goditjen përfundimtare ndaj qeverisë në demonstratën e së dielës (17.05.2015 ) rrit shqetësim për demokracinë e brishtë në Maqedoni. Gruevski po mobilizon mbështetësit e tij për kundër-demonstrata.

Tensionet politike në Maqedoni po rriten në valën e përgatitjes së demonstratës së madhe të opozitës kundër qeverisë së kryeministrit Nikola Gruevski. Demonstrata e masive e planifikuar për më 17 maj synon largimin e Gruevskit dhe partisë së tij konservatore VMRO-DPMNE nga pushteti, që ai e mban qysh nga viti 2006. Zoran Zaev, lideri i opozitës socialdemokrate të Maqedonisë, ka shpallur protesta "që do të vazhdojnë derisa qeveria të japë dorëheqjen.

" Që nga fillimi i muajit mars të këtij viti, Zaev është duke bërë publike bisedat e regjistruara nga përgjime masive, në të cilat bëhet fjalë për korrupsion dhe kontrollin ndaj drejtësisë e mdias prej gruevskit dhe qeverisë së tij. Gruevski mohon çdo akuzë për shkelje dhe pretendon se Zaev është peng në një komplot ndërkombëtar të mbështetur nga shërbimet e huaja të inteligjencës kundër qeverisë së tij.

Në një përpjekje për t'i zbutur tensionet, Gruevski kërkoi dorëheqjen e tre nga bashkëpunëtorët e tij më të besuar:

Ministres së Brendshme Gordana Jankullovska, ministrit të Transportit Mile Janakieski dhe kryetarit të Shërbimit Sekret Sasho Mijalkov. Që të tre këta kanë qenë figurat kryesore të pushtetit të Gruevskit qysh nga viti 2006. Mijalkov, i cili është edhe kushëriri i Gruevskit, konsiderohet si një nga njerëzit më të fuqishëm në vend, ndonëse paraqitjet e tij në publik janë shumë të rralla.

 "Këto dorëheqje e kanë dëmtuar imazhin e Gruevskit si një lider i fortë që epet ndaj presionit, nuk pranon apelet për dorëheqje", thotë për DW analisti politik dhe ish-diplomati Arsim Zekoli.

"Gruevski duhet të shkojë"

Për opozitën, e cila e ka bojkotuar parlamentin që nga zgjedhjet e fundit në vitin 2014 duke pretenduar se zgjedhjet janë manipuluar, dorëheqjet "nuk janë të mjaftueshme". Ajo kërkon krijimin e një qeverie të përkohshme, që të organizojë zgjedhje të reja, pasi Gruevski të japë dorëheqjen.

Ky skenar po gjen gjithnjë e më shumë mbështetjen e bashkësisë ndërkombëtare. Kryeministri bullgar Bojko Borisov i bëri thirrje Gruevskit të japë dorëheqjen qysh të dielën më 10 maj. Thirrja e Borisov u mbështet më pas (13.05) edhe nga Alexander Graf Lambsdorff, zëvendës-president i Parlamentit Europian.

 "Gruevski duhet të japë dorëheqjen, sepse ai është një pengesë për kapërcimin e tensioneve ndëretnike, që janë trazuar përsëri si dhe për t'i hapur rrugën zgjedhjeve të reja, të cilat duhet të mbahen në kushte të rregullta demokratike", tha Lambsdorff në një deklaratë.

Por lëvizjet e fundit të Gruevskit flasin për diçka tjetër. Një ditë pasi ministrat dhanë dorëheqjen, më 12 maj, burime që duan të mbeten anonim, nga radhët e VMRO-DPMNE i thanë DW-së, se Gruevski po planifikon pë rmë 18.05 "demonstrata të mëdha kundër" manifestimit të opozitës. Mediat në Maqedoni raportojnë se "100.000 njerëz janë mobilizuar për të mbrojtur interesat kombëtare dhe shtetërore".

Ndërkohë, mediat pro-qeveritare kanë nisur një fushatë të re propagande përmes një videoje të publikuar në YouTube, ku Zaev akuzohet se ka marrë një ryshfet prej 200.000 €. Zaev e ka mohuar këtë akuzë, duke thënë se burimi i videos në YouTube është ose policia, ose prokuroria.

Edhe pse publikimi i materit të regjistrimeve i hapi një drejtim të ri karrierës politike të Zaevit, ky i fundit nuk është imun për t'u vetëmbrojtur ndaj akuzave të tilla. Në vitin 2008 ai u arrestua nën akuzën për korrupsion që arrinte një shumë prej 5 milionë eurosh. Megjithatë çështja u mbyll, pasi presidenti i atëhershëm Branko Cërvenkovski ish- udhëheqësi i Partisë Socialdemokrate e fali atë.
Skena politike e përçarë

Skena politike e Maqedonisë është e përçarë thellësisht. Dy partitë kryesore rivale janë ajo nacionaliste-konservatore VMRO-DPMNE dhe Partia Socialdemokrate, pasuese e ish-Partisë Komuniste, pas fitores së pavarësisë së Maqedonisë si rrjedhojë e shpërbërjes së Federatës Jugosllave në vitin 1991.

Por informacioni i përhapur nga afera e përgjimeve ka nxitur një lëvizje krejtësisht të re, të pavarur nga të dy blloqet politike. Mijëra njerëz të rinj, të organizuar nëpërmjet rrjeteve sociale, dolën në rrugë më 5 maj për të protestuar kundër qeverisë lidhur me rastin e vdekjes së një 22-vjeçari në vitin 2011. Gjatë përleshjeve të dhunshme me policinë, të paktën 30 oficerë u plagosën dhe mbi 40 vetë u arrestuan. Por qysh atëherë protestat nuk kanë të ndalur.

"Çdo ditë në orën 18:00" - është motoja e demonstruesve " dhe "derisa qeveria jepë dorëheqjen"- janë parrullat kryesore të protestuesve. Lëvizja e protestës ka bashkuar grupet etnike dhe shoqërinë e përçarë të Maqedonisë, siç i thekson në intervistë për DW Aleksandar Donev, një nga udhëheqësit e kësaj lëvizjeje, misioni i tyre do të vazhdojë edhe pasi një qeveri e re vijë në pushtet.

"Detyra jonë qytetare do të vazhdojë derisa të jenë plotësuar kërkesat tona", thotë Donev. "Ne kurrë nuk duhet të harrojmë të keqen e tanishme dhe ne nuk mund të lejojmë kjo të përsëritet. Ne kemi një përgjegjësi për të pasur një qeveri në vend, e cila të ketë frikë nga populli dhe jo anasjelltas".

DW