Rusia bën gati armët bërthamore kundër NATO-s

Vendosja e dhjetëra raketave ndërkontinentale në një territor rus ekuivalent me disa vende evropiane, tregon se Kremlini po e sheh si rrezik zgjerimin e NATO-s drejt kufijve të saj, shkruajnë mediet e huaja, transmeton Republika.info.

Ishte i qartë paralajmërimi i presidentit rus, Vladimir Putinit, i cili më 6 qershor të këtij viti kishte deklaruar se para çfarëdo kërcënimi të sigurisë nacionale, Moska nuk do të ketë zgjidhje tjetër përpos t’i kundërvihet forcave nga të cilat vjen rreziku.

Paralajmërimi i mandatarit rus po del të bëhet realitet pas rrëzimit të avionit rus, Su-24, nga forcat turke. Pak kohë pasi u tensionuan marrëdhëniet ndërmjet Moskës dhe Ankarasë, blloku verior-atlantik u zhvendos në Detin e Zi, i prirë nga aeroplanmbajtësja ‘shkatërrimtare’ amerikane, Ross, të cilës iu bashkuan edhe Francis Almejida nga Portugalia, el Blas Lezo nga Spanja dhe Winnipeg nga Kanadaja.

Në një komunikatë të Flotës së Gjashtë të ushtrisë amerikane thuhet se zhvendosja e aeroplanmbajtëses së saj në ujërat afër Rusisë, ka për qëllim që të “sigurojë paqen dhe stabilitetin në rajon”, si dhe të “shtojë bashkëpunimin dhe ndërveprimin e partnerëve dhe aleatëve tanë”.

Në këto rrethana, autoritetet ruse informuan rreth manovrave dhe patrullave të forcave raketore strategjike përmes raketave ndërkontinentale. Dhjetëra raketa që mund të shkojnë deri në dhjetëmijë kilometra, janë pjesë e këtyre operacioneve ruse që do të zgjasin ndërmjet dy javëve deri në një muaj.

Përse shërbimet mendojnë se Shqipëria kërcënohet nga ISIS?

Blendi Fevziu

E kanë konsideruar herë një skup e herë një shaka, por problemi mbetet aty! Shërbimet sekrete perëndimore besojnë se Shqipëria kërcënohet realisht nga ISIS dhe për këtë me gjasë duhet të kenë informacion edhe partnerët shqiptarë. Në fakt lajmi që ka krijuar realisht shqetësim është sa pjesë e një analize aq edhe e informacioneve konkrete. Analiza lidhet me rrezikun e atentateve ndërsa faktet me mundësinë e përdorimit të Shqipërisë si bazë për transferimin e terroristëve në perëndim.

Analiza mbështetet mbi një llogjikë të prekshme nga të gjithë. ISIS ka paralajmëruar disa atentate. Goditja e perëndimit përmes aksioneve teroriste me gjasë po kthehet në mënyrë funksionimi të ISIS dhe është PR kryesor i tij. Në këtë rast, argumenti që ISIS godet shënjestra më të famshme dhe më mediatike, jo gjithnjë ka vlerë. Ata mund të godasin si në hallkën më të fortë, pra vendet me siguri të lartë dhe vëmendje mediatike, po ashtu edhe në hallkën më të dobët, në vendet ku siguria është problem dhe penetrimi më i lehtë. Kjo ide u vërtetua dje me goditjen në Mali, atje ku nuk mendonte askush. Në këtë llogjikë, Shqipëria është një shënjestër e thjeshtë dhe një vend Europian. Për këtë arsye, vende si Shqipëria, Kosova, Maqedonia etj, mund të jetë shënjstra potenciale.

E dyta lidhet me informacionet që shërbimet partnere kanë. Opinion.al disponon një material mjaft interesant, ku shërbimet sekrete të vendeve të NATO –s tëheqin vëmendjen për një lidhje të mundshme midis grupeve kriminale shqiptare dhe terroristëve. Në të nuk bëhet fjalë për atentate, por për një lloj biznesi që parashikon shndrimin e Shqipërisë në një bazë për transportimin e terroristëve drejt Europës. Më konkretisht materiali informon se elementë kriminalë shqiptarë të skeduar që në vitet 1997 – 2000 dhe të shndruar prej vitesh në biznesmenë të fuqishëm kanë hyrë në kontakte me kompani të fuqishme për blerjen e një sasie të madhe mjetesh lundruese super të shpejta. Dokumenti jep mjaft detaje dhe sqaron se i njëjti grup ka kontaktuar disa kompani në Europë. Sipas tyre këto mjete mund të përdoren për transportin e emigratëve, por edhe terroristëve drejt Italisë në momentin që rruga serbe po mbyllet pas atentateve të Parisit. Opinion.al po heton më tej për këtë çështje.

Në të gjitha analizat e rëndësishme nënvizohet fakti që terroristët për të arritur qëllimin e tyre mund të bashkëpunojnë me grupet kriminale. ISIS ka para dhe qëllimin për terror. Grupet kriminale kanë infrastrukturën për t’ja lehtësuar këtë gjë kundrejt pagesave të majme. Ky është shqetësimi bazë.  Ndaj emri i Shqipërisë, përmendet jo pa siklet në një pjesë të rëndësishme të raporteve. 

Hero(inë) është Donika, jo Albini

Adriatik Kelmendi

Për dallim nga deputetja Kadaj-Bujupi, e cila bëri veprën për të cilën beson dhe nuk u fsheh, Kurti, një egoist i tejpreokupuar me vendin e tij në histori - në këtë tipar lehtësisht i krahasueshëm me një tjetër egoist të tejpreokupuar me pozitën personale në histori, rivalin kryesor Thaçin – vendosi që të krahasohej me më të mëdhenjtë e popullit: Skënderbeun, Ismail Qemalin, Adem Jasharin dhe UÇK-në. Zgjodhi 28 nëntorin për ta heroizuar vetveten dhe për të poshtëruar dhe rrezikuar të gjithë të tjerët. E kur them gjithë të tjerët, i mendoj në radhë të parë kolegët e tij të partisë, ata të opozitës, por edhe popullin e Kosovës.

NE MUND TË VAZHDOJMË të heshtim, ose të flasim e të shkruajmë vetëm sipas ndonjë doracaku që na shkruan ndonjë politikan, por nëse flasim troç i bie se heroina e vetme e ngjarjeve të fundit është deputetja Donika Kadaj – Bujupi dhe absolutisht jo Albin Kurti.

Deputetja e AAK-së e shumë mandateve të Kuvendit, Kadaj-Bujupi, është ngritur për të mbrojtur një qëllim të sajin politik, me mënyrat dhe metodat që i ka vlerësuar si të nevojshme, duke u bazuar në të mirën e vendit dhe të popullit. Ajo ka kërkuar tërheqjen e nënshkrimeve nga dy marrëveshjet e Qeverisë, atë për Asociacionin/Bashkësinë... dhe atë për demarkacionin me Malin e Zi. Për t’i arritur këto, me vetëdije të plotë dhe me përgjegjësi ka hedhur edhe gaz lotsjellës në seancën e Kuvendit, në shenjë të bllokimit të punës së Legjislativit si protestë deri në anulimin e marrëveshjeve.

Kryeministri Mustafa dhe zëvendësi i tij, Thaçi, në një rast të paprecedentë, i kanë dënuar këto veprime, duke i quajtur kriminale, dhe kanë ftuar organet e rendit që të marrin masa.

Është lëshuar fletarrestim për deputeten Kadaj-Bujupi dhe ajo ka pritur policinë në shtëpinë e saj. Nuk i ka rezistuar fare arrestimit, edhe pse e ka vlerësuar atë si një arrestim politik.

Në gjykatë ka vazhduar të jetë e vendosur: “Nuk pendohem. Nëse do të më jepet rasti edhe në të ardhmen do të hedh gaz lotsjellës, nëse me këtë do të ndikojë që të anulohen dy marrëveshje të dëmshme për vendin tim”, ka thënë kjo nënë, grua, vajzë, motër, bashkëshorte dhe deputete.

I është vazhduar masa e paraburgimit.

Deputetja Kadaj-Bujupi e ka bërë të veten.

Ne të tjerëve si shoqëri na mbetet të vazhdojmë të ngulim këmbë që të na dëshmohet se ku është baza ligjore për lëshimin e urdhërarresteve për veprimet e deputetëve brenda Kuvendit, për ç'gjë kanë imunitet, sipas Nenit 75 të Kushtetutës së Republikës së Kosovës.

Në të kundërtën bëhet fjalë për arrestime politike.

MIRËPO, NËSE NUK VAZHDOJMË të heshtim dhe nëse flasim troç i bie se një veprim heroik si Donika Kadaj – Bujupi nuk e ka bërë edhe kolegu i saj deputet, Albin Kurti.

Pavarësisht se kanë post të njëjtë me Kadaj-Bujupin dhe po angazhohen si të bashkuar për kauzën e njëjtë, duket se deputeti Kurti veten e mban për një mbinjeri, gjithsesi mbi deputetët e tjerë të opozitës e edhe të pushtetit, pa dyshim mbi kryetarët e partive opozitare, Ymeri, Haradinaj e Limaj, absolutisht mbi liderët e institucioneve politike, Jahjaga, Mustafa e Veseli, pashmangshëm mbi udhëheqësit e gjyqësisë e të policisë, por, fatkeqësisht, edhe mbi gjithë popullin e Kosovës.

Ai, duke pasur një fletarrestim në fuqi (edhe pse mund ta klasifikojmë si të orientuar politikisht), është fshehur për ta pamundësuar kapjen nga policia. Mirëpo, i vetëdijshëm se nuk mund t’i shmanget policisë përgjithmonë e duke mos dashur të largohej nga Kosova, ai kishte programuar edhe ditën se kur do t’i nevojitej atij më së shumti të arrestohej.

Kurti, një egoist i tejpreokupuar me vendin e tij në histori - në këtë tipar lehtësisht i krahasueshëm me një tjetër egoist të tejpreokupuar me pozitën personale në histori, rivalin kryesor Thaçin – ai vendosi që të krahasohej me më të mëdhenjtë e popullit: Skënderbeun, Ismail Qemalin, Adem Jasharin dhe UÇK-në.

Mirëpo, zgjodhi 28 nëntorin për ta heroizuar vetveten dhe për të poshtëruar dhe rrezikuar të gjithë të tjerët. E kur them gjithë të tjerët, i mendoj në radhë të parë kolegët e tij të partisë, ata të opozitës, por edhe popullin e Kosovës.

Manifestimi i opozitës më 28 nëntor, bashkë me mbledhjen e mbi 200 mijë nënshkrimeve, për mbrojtjen e Kosovës dhe kundër Dy Marrëveshjeve, janë hapat më të dinjitetshëm dhe më madhështorë të kundërshtimit nga Opozita e Bashkuar dhe porosia më e qartë se nuk mund të mbyllen sytë nga askush. Dhe kështu do të ishte sikur mbinjeriu Kurti të mos kishte plane të tjera.

Ai, pavarësisht se e dinte se ka urdhërarrest dhe se do të kapej nga policia në rastin e parë të ballafaqimit me ta, nuk mundi t’i rezistonte idesë dehëse të krahasimit me Skënderbeun, Qemalin, Jasharin e UÇK-në. Sikur të mos ishte i dehur nga egoja dhe madhështia halucinative, do të logjikonte se Manifestimi opozitar i 28 Nëntorit do të mund të ishte mjaftueshëm madhështor dhe i dinjitetshëm vetëm me pjesëmarrjen e mijëra e mijëra qytetarëve dhe vetëm me fjalimet e kryetarëve të opozitës Ymeri, Haradinaj e Limaj. Dhe s’kishte fare nevojë që për kapricot e veta ta tradhtonte marrëveshjen me AAK-në e NISMA-n për mosprovokim dhe mospjesëmarrje, si dhe të poshtëronte me fjalim tri herë më të gjatë tre kryetarët opozitarë.

Për më tepër, a s’ishte ky i njëjti Kurt që dha dorëheqje nga posti i kryetarit, për të mbetur vetëm një anëtar i thjeshtë i LVV-së?

A s’është ky një ish-kryetar partie që i ka humbur tri palë zgjedhje, duke ia siguruar subjektit të vet mbetjen në opozitë?

A s’është ky i njëjti opozitar, i cili për 6 muaj rresht e bllokoi jetën institucionale, duke na bërë be e rrfe se është pikërisht ky Isa Mustafa ai që i duhet Kosovës si kryetar Kuvendi (“ose kryetar qeverie, vetëm le të merren vesh me AAK-në”, na fliste publikisht) dhe se LDK-ja duhej t’i kishte më shumë se gjysmën e qeverisë?

Përse përnjëherë nevoja që të dalë mbi gjithë të tjerët, e edhe mbi kryetarin de jure të partisë, Ymerin?

Nëse është njëri nga tre deputetët e LVV-së me fletarrestim (politik!), përse u desh pikërisht ai të mbante fjalim e jo Albulena Haxhiu ose Faton Topalli?

NËSE NUK VAZHDOJMË të heshtim dhe nëse flasim troç i bie se Albin Kurti me aventurën e tij të 28 nëntorit, për shkak të tejpreokupimit me vendin e tij në histori, nuk iu ka bërë fare vonë se ndërmori shumë rreziqe (ka mundur fare lehtë edhe të vetëdorëzohej pas fjalimit dhe ta provonte në gjyq qëllimin politik të akuzës), disa prej të cilave edhe ndodhën në realitet:

Rrezikoi shkaktimin e luftës ndërmjet shqiptarëve. Çka nëse policia do t’i përgjigjej provokimit me provokim? Çka nëse me t’u paraqitur Kurti në skenë, policia, duke iu referuar urdhërarrestit në fuqi, do ta arrestonte atë? Ku do të na çonte një përleshje e shqiptarëve të veshur policë në njërën anë dhe shqiptarëve protestues në anën tjetër?

Rrezikoi kompaktësinë e Opozitës së Bashkuar dhe relativizimin e kundërshtimit të Dy Marrëveshjeve të dëmshme, për shkak të shfaqjes dhe fjalimit të padakorduar në manifestim.

Rrezikoi poshtërimin e gjithë organeve të rendit të Republikës, duke u vendosur si individ i paprekshëm.

Bëri që selia e gjithë partisë të rrethohej me forca të hekurta policie, duke nxitur përleshjet dhe arrestimin e mbi 90 bashkëpartiakëve, mbështetësve të sinqertë të LVV-së ose protestuesve të çiltër kundër Dy Marrëveshjeve, të cilët donin që ta mbronin.

Po insiston që popullata të ndahet në dysh, tashmë jo për ose kundër marrëveshjeve të dëmshme, por për ose kundër institucioneve të shtetit.

NË FUND, duhet ritheksuar se nuk besoj se ka ndonjë shqiptar me mend në krye në Kosovë, i cili do të mund të pajtohej me vullnet që shtetit t’i hiqet një pjesë e territorit, ose që t’i jepen të drejta aq të mëdha një komuniteti, i cili nuk e njeh si shtet të vetin Kosovën, dhe me këto të drejta pastaj t’i mundësohet ta bllokojë zhvillimin e vetë këtij vendi, ose që në një të ardhme edhe ta copëtojë atë.

Ajo që i dallon shqiptarët në këtë rast është udha që duhet ndjekur në mënyrë që të pamundësohen që këto dëme t’i shkaktohen Kosovës.

E në këtë udhë duket se shumica po e bën për Kosovën. Edhe heroina Donika Kadaj – Bujupi.

Kam pandehur se edhe Albin Kurti.

Por, më 28 nëntor ai fatkeqësisht na kumtoi diçka tjetër. 

Ty deputeti/ja im/e, që dje të votova e sot me përfaqëson në Kuvendin e Kosovës

Ismet Kryeziu

Kolegët tu nga opozita po arrestohen dhe për këtë nuk po rezistojnë fare. Ata po ju binden institucioneve shtetërore, prokurorisë dhe policisë, pavarësisht që disa nga ta tani gjenden në paraburgim apo në mbajtje.

Ti deputeti im, nuk po e çel gojën fare. Ti heshtur po pajtohesh me partitë në pushtet të cilat ka muaj që kanë filluar të ushqejnë frikë tek qytetarët, të krijojnë pasiguri dhe të tensionojnë situatën. Këtë po e bëjnë përmes disa telallve që s’janë deputetë. Po e bëjnë përmes deklaratave të tyre publike për gjoja veprimet e kolegëve tu nga opozita.

Por deputeti im, kolegët e tu nga opozita po bëjnë të kundërtën e asaj çka kanë proklamuar deri më tani subjektet e koalicionit tënd në pushtet. Tani, unë dhe Ti deputeti im edhe nëse kemi dyshuar tani po e dimë se deputetët e opozitës, kolegët e tu po pranojnë dhe do të pranojnë dhe më tutje që të burgosen për idealet e tyre në të cilat besojnë. Qëllimet tani e sa kohë i kanë bërë publike për opinionin vendor dhe ndërkombëtar, gjithashtu dhe për ty.

Tani ti deputeti im, a din të më tregosh - pasi po i dimë qëndrimet e opozitës – se cilat janë qëndrimet e tua dhe cilat janë qëndrimet e pozitës?! A e din çka po dëshironi?! A po dëshiron që të kesh një parlament pa kolegët e tu opozitarë?! A po dëshiron që të kesh një veprim dhe mendim parlamentar të siguruar nga policia me maska?!

A po dëshiron që të kesh sistem një partiak?! Deputeti im, unë votën të kamë dhënë që besoi të mjafton për të qenë përfaqësuesi im. A po dëshiron që ti burgosin të gjithë kolegët e tu që mendojnë ndryshe?! A po dëshiron ti përfaqësosh të gjithë edhe ata që nuk të kanë votuar ty?!

Deputeti im, nuk është as funksionim i jetës parlamentare, e as i institucioneve kjo gjendje e kjo formë e mbajtjes së seancave plenare. Besojë se e din se asnjë masë apo gjendje e përkohshme nuk i zgjedh problemet dhe nuk garanton funksionalitet dhe jetë institucionale pa veprime dhe zgjidhje politike.

Deputeti im, nuk bëhet dialogu politik vetëm në kolltukët e Kuvendit, sepse ti e din kur më ke kërkuar votën ke bërë dialog në oda dhe kafe, në shkolla e sheshe.

Për ditë e për natë ke takuar qytetarë si unë. Prandaj, si deputeti im, ke ndërgjegje për besimin që të kamë dhënë, dhe para se të merr pjesë në një seancë të rrethuar me forca speciale, policore e ushtarake dhe para se të heshtësh e të bëhesh aparat i votimit, fol e mos hesht.

Hajde takomë, pyetëm, merre mendimin tim, ngrite kokën dhe përfaqësomë.

Paralelisht me këtë, Ti deputeti im, aty nuk je vetëm për të regjistruar pjesëmarrjen në seancë plenare; nuk je aty vetëm për të garantuar mëditjen tënde; nuk je aty për të heshtur; nuk je aty vetëm për të ngritur dorën për të votuar një apo disa ligje. Ti deputeti im, je aty për të më përfaqësuar mua.

E mua nuk më përfaqëson duke i arrestuar të tjerët, duke mos ditur çka po voton, duke mos pasur as mendim e as idenë për ato pika të rendit të ditës, duke mos dialogu as me mua as me askënd tjetër që të kanë votuar.

Ti je aty për të garantuar jetën demokratike; ti je aty për të garantuar pluralizmin partiak; ti je aty për të garantuar konsensusin shoqëror.

Kosova dhe shoqëria e jonë, deputeti im, ka pasur nevojë për lirinë si instrument që garanton pluralizmin partiak, garanton mendimin ndryshe dhe garanton të drejtën qytetare për tu përfaqësuar përmes deputetëve të zgjedhur nga qytetarët.

Ti deputeti im, ngrite kokën dhe përfaqësomë, sepse për atë të kam dhënë besimin tim për të vendosur jo vetëm për mua por dhe për të ardhmen e fëmijëve të mi.  

Letër e hapur për Albin Kurtin: Pse te votova?

Shenaj Shala

Albin , ti po vendos per ne të gjithë se çka duhet të jemi. Por unë nuk pranoj të jem ajo çfar ti vendos të jem. Ti flisje për ‘faljen’ e pjesëve të Kosovës nga ata në pushtet, por poashtu (po i bjen qe) nëse ti vjen në pushtet do ta falësh tërë Kosovën. Nuk pres qe ju të kuptoni sikletin tim që e kam mbajt me vete sa herë që më është bërë kjo pyetje në fëmijëri, por e di qe vajza juaj shumë mirë do t’më kuptojë një ditë.

Votën që ta dhash ishte falë aderimeve të reja në lëvizjen tënde, dhe për shkak të disa njerëzve, vizioneve të të cilëve u besoja shumë.

E ndjeja që këta do t’i jepnin një frymë të re lëvizjes sate dhe do të na kthehet shpresa edhe neve përmes juve.

Kur bëre thirrje për manifestimin në mbrojtje të Republikës, kundër Bashkësisë së komunave me shumicë serbe dhe demarkacionit, mendova qe Republikën për të cilen flisje ishte ajo e Kosovës.

Dhe si secili qytetar qe ia do të mirën këtij vendi, e asnjëherë ndarjen, vendosa të dal në perkrahje të saj.

Si gjysmë shqiptare që jam – siç e tregon mbiemri, dhe gjysme turke – siç e tregon emri, jam rritë duke m’u imponuar gjithnjë nga shoqëria që të zgjedh njerën anë dhe të deklaroj se çka jam.

Sa më kënaqësi dëgjoja ish-kolegët e UNMIK’ut kur thonin: “Jam gjysmë italian, gjysmë francez”, “jam gjysmë spanjolle, qerek portugeze (se gjyshja ka qenë angleze nga ana e babit) e qerek angleze”.

Sa u merrja lakmi që aq lehtë shprehnin atë se çka janë, pa pas nevojë me zgjedhë njerën apo tjetrën anë, dhe çka është më e rëndësishmja, sa lehtë i shihnim si një terësi/person/karakter pa marr parasysh se cilit nacionaliteti u përkisnin prindërit apo gjyshërit e tyre.

Arsyeja pse po të tregoj për këtë, është se më në fund jam në gjendje që t’ju ‘ik’ të gjitha pyetjeve provokative që insistojnë që unë të zgjedhi njerën apo tjetrën anë (për ata që nuk pranojnë që përgjigja të jetë gjysë-gjysë)- duke iu dhënë përfundimisht përgjigjen “jam Kosovare - ashtu më thotë në passaportë! Ashtu me njeh shteti im!”.

Nuk pres qe ju të kuptoni sikletin tim që e kam mbajt me vete sa herë që më është bërë kjo pyetje në fëmijëri, por e di qe vajza juaj shumë mirë do t’më kuptojë një ditë.

Babi im i ndjerë ka qenë një ndër ballistat më të ‘flaktë’ që kam njohur ndonjëherë. Nuk e di se çka është me këta burra shqiptarë që martohen me gra të ‘huaja’ por të gjithë ata që i njoh po qëllojne të jenë shumë më nacionalista se tjerët!?.

Kur në videon promovuese që kishit përgatitur për manifestimin, treguat hartën e Kosovës të coptuar, dhe se si do të dukej pas ‘Bashkësisë’ e demarkacionit, m’u coptu zemra!

Kjo nuk është ajo që e dëshiron asnjë kosovar qe ka lind në Kosovë, dhe ka dashni të sinqertë për të (pa marr parasysh nacionalitetin).

Mbylla sytë që ta zhduk atë hartë të çrregullt nga mendja - vet pamja e së cilës më bëri të rrënqethem.

Në atë moment ti flisje… flisje kundër ‘Bashkësisë’ serbe.

Kundër një bashkimi të komunave serbe. Mirëpo flisje edhe për një bashkim tjetër…

I rendite të këqijat e ‘Bashkësisë’, duke treguar se çka do të mbetet nga Kosova përmes asaj harte të tmerrshme.

Por çka do të mbetet nga Kosova, Albin, pas bashkimit kombëtar – siç ti e ofron?

U mundova me e parafytyru harten e Kosovës atëherë - por nuk shihja asgjë!

Ti flisje për ‘faljen’ e pjesëve të Kosovës nga ata në pushtet, por poashtu (po i bjen qe) nëse ti vjen në pushtet do ta falësh tërë Kosovën.

E di qe kjo letër do të keqkuptohet nga shumë njerëz dhe do t’më shohin si njeri që nuk e dua bashkimin e shqiptareve (madje ndoshta si dikush qe eshte pro-zajednices).

Këta janë ata të njëjtit që më kanë shtyrë me vite të zgjedh vetëm njerën anë,  te ’ju tregoj se çka jam.

Unë jam kategorikisht kundër ‘Bashkësisë’, të kuptohemi!

Unë dua bashkimin e shqiptarëve, por jo vetëm.

Dua bashkim të shqiptarëve, serbëve, turqëve, romëve, kroatëve, egjiptianëve, të gjithë tjerëve të cilët jetojnë në këtë vend. Dua që udheheqesit e mi të mos bëjnë ndarje, dhe të mos përfaqësojnë vetëm interesat e njerës palë.

Dua që të keni një vizion për të ardhme të përbashket, për të gjithë, pa marrë parasysh çka jemi.

Përfaqësim për një jetë të mirë e të shëndoshë, në harmoni!

Si prisni ju qe të keni përkrahjen e minoriteteve tjera nëse ne njerën anë jeni kundër ‘Bashkësisë së komunave me shumicë serbe, por nga ana tjetër synoni një bashkim tjetër?

E kujt është kjo Kosovë?

Dhe pse duhet ta falim, apo ta coptojmë?

Apo ndoshta paragjykoni e supozoni se ajo çka të gjithë deshirojnë në Kosovë, dhe çka është më e mira për të gjithë, është bashkimi kombëtar pa marr parasysh cilit komunitet i përkasin qytetarët e Kosovës?

 Apo ndoshta minoritetet tjera të Kosovës nuk janë edhe fort të rëndësishme, e nuk ka dert se çka dojnë?

Me 28 nëntor, e zhgenjyer me faktin qe manifestimi për të cilin dola kundër coptimit të Kosovës u shndërrua në diçka krejt tjetër nga ajo që ishte thirrur, vazhdova të ec përgjatë sheshit Nënë Tereza, kokëulur e me lot në sy, me ndjenjen që isha mashtrruar.

Dikush më thirri emrin. Ishte tezja X, komshikja ime gorane, e cila kishte dalë të shesë produktet e saja punëdore, në panairin që ishte vendosur një ditë më parë.

“Blej shqip. Blej prodhime shqiptare” - thoshte posteri gjigant, i cili ishte vendosur në shesh nga ana e komunës qe drejtohet nga Lëvizja juaj.

Ne moment kuptova se, të gjithë ata si unë, qe iu është imponu të zgjedhim se çka jemi (vetëm njerën anë) në të kaluaren, ndoshta nuk do t’mund ta kenë as këtë mundësi të zgjedhjes në të ardhmen, nëse ju vini në pushtet, pasi që ju vetëm se keni vendos se çka duhet të jemi të gjithë. 

Steven Seagal ‘dëshpron’ shqiptarët: Serbia, atdheu im i ri!

Kryeministri serb, Aleksandar Vuçiq ka thënë sot, gjatë takimit me aktorin hollivudian, Steven Seagal, se qeveria do të bëjë gjithçka që mundet që ta zhvilloj industrinë filmike në Serbi. 

Aktori amerikan po qëndron për vizitë në Beograd në kuadër të turneut të tij si këngëtar. Ai tashmë i ka të publikuar dy albume, transmeton Republika.info. 

Ai ka thënë se do të angazhohet shumë në promovimin e Serbisë dhe se “ekonomia në Serbi po rritet në krahasim me vendet tjera evropiane”! 

Sipas tij, Serbia për të tash është atdhe i dytë. 

Me aktorin amerikan është takuar edhe presidenti i Serbisë, Tomisllav Nikoliq.

E Seagal njihet si aktor shumë i dashur për shqiptarët. Ndoshta ai këtë nuk e dinë, përndryshe do të kursej pak nga lëvdatat për Serbinë. 

Ja çfarë thotë Kodi Penal i Kosovës për veprimet e opozitës dhe sa mund të dënohen ata

Opozita është shumë kritike ndaj arrestimit të deputetëve dhe simpatizantëve të tyre dhe sistemin e drejtësisë po e quan të kapur prej pushtetit, megjithatë nëse analizohet se çfarë thotë Kodi Penal për veprimet që ata i kanë bërë, atëherë lirisht mund të konstatohet se vendimet e gjykatësve janë minore për veprimet e tyre, sepse baza ligjore në Kodin Penal parasheh burg deri në 10 vite për këto veprime.

Duke pasur parasysh ndjeshmërinë, Republika.info më poshtë ka radhitur të gjithë bazën ligjore në përputhje me Kodin Penal për veprat penale të deputetëve të opozitës dhe militantëve të tyre.

I. Thirrjet për Republikë të tretë

Përpjekja e ish-liderit të Vetëvendosjes, Albin Kurti dhe e deputetëve të këtij subjekti politik, e shpalosur publikisht si thirrje për një “Republikë të tretë” dhe e materializuar përmes organizimit të manifestimeve të dhunës në Kuvend dhe në publik, mund të cilësohet si vepër penale “Sulmi kundër rendit kushtetues të Republikës së Kosovës”, sipas nenit 121 të Kodit Penal, transmeton Republika.info.

Neni 121

Sulmi kundër rendit kushtetues të Republikës së Kosovës

1. Kushdo që me përdorim të dhunës apo me kanosje të dhunës tenton që ta ndryshojë rendin kushtetues të Republikës së Kosovës apo të përmbysë institucionet më të larta të Republikës së Kosovës, dënohet me jo më pak se pesë (5) vjet burgim.

2. Kushdo që me përdorim të dhunës apo me kanosje të dhunës tenton që të pengojë vendosjen e rendit kushtetues të Republikës së Kosovës apo me përdorim të dhunës ose kanosjes së dhunës implementon rendin e huaj juridik në ndonjë pjesë të Republikës së Kosovës, dënohet me jo më pak se pesë (5) vjet burgim.

3. Kushdo që me përdorim të dhunës ose me kanosje të dhunës tenton të rrezikojë pavarësinë e Kosovës, sovranitetin dhe integritetin e saj territorial, tërësinë territoriale dhe karakterin demokratik të shtetit, dënohet jo më pak se dhjetë (10) vjet burgim.

II. Sulmet e deputetëve kundër Veselit dhe Mustafës

Sulmet e deputetëve të Vetëvendosjes, AAK-së dhe Nismës kundër kryetarit të Kuvendit dhe kryeministrit të Kosovës mund të cilësohen si vepër penale “Dhuna ndaj përfaqësuesve të lartë të Republikës së Kosovës”, sipas nenit 128 të Kodit Penal, transmeton Republika.info.

Neni 128

Dhuna ndaj përfaqësuesve të lartë të Republikës së Kosovës

Kushdo që me qëllim të rrezikimit të rendit kushtetues apo sigurisë së Republikës së Kosovës, me përdorim të dhunës apo me kanosje të dhunës, pengon një apo më shumë nga personat e saktësuar në nenin 126 të këtij Kodi në ushtrimin e detyrave zyrtare apo i detyron të kryejnë apo të mos kryejnë ndonjë veprim nga fushëveprimi i detyrave të tyre, dënohet me burgim prej tre (3) deri në dhjetë (10) vjet.

Personat e saktësuar në nenin 126 janë:

• Kryetari i Republikës së Kosovës;

• Kryetari i Kuvendit të Republikës së Kosovës;

• Kryeministri i Republikës së Kosovës;

• Kryetari i Gjykatës Kushtetuese të Republikës së Kosovës;

• Kryetari i Gjykatës Supreme të Republikës së Kosovës ose

• Kryeprokurori i Shtetit të Republikës së Kosovës.

III. Veprimet e dhunshme të deputetëve

Nëse kryerja e veprës penale nga nenet 121 dhe 128 ndërlidhet me: 

• rezulton në vdekjen e një apo më shumë personave;

• rrezikon jetën e një apo më shumë personave;

• vepra përcillet me dhunë të rëndë ose shkatërrim në shkallë të madhe; ose

• vepra ka rrezikuar sigurinë ekonomike dhe ushtarake të Republikës së Kosovës, atëherë kryesi i veprës dënohet me jo më pak se dhjetë (10) vjet burgim ose me burgim të përjetshëm.

Veprimet e deputetëve të opozitës, në rastin tonë, janë përcjellë me dhunë të rëndë.

IV. Të bashkuar kundër rendit kushtetues

Veprimtaria e Vetëvendosjes për një “Republikë të tretë” mund të cilësohet edhe si “Bashkim për veprimtari kundër kushtetuese”, sipas nenit 134 të Kodit Penal, transmeton Republika.info. 

Neni 134 

Bashkimi për veprimtari kundër kushtetuese

1. Kushdo që formon një grup apo ndonjë bashkim tjetër të personave për kryerjen e veprave penale nga nenet 121-134 të këtij Kodi, dënohet me dënimin e paraparë për atë vepër penale.

2. Kushdo që merr pjesë apo bëhet anëtar i grupit apo bashkimit nga paragrafi 1. i këtij neni, dënohet me burgim prej një (1) deri në pesë (5) vjet. 

3. Anëtari i grupit apo bashkimit, që e lajmëron grupin para kryerjes së veprës penale nga paragrafi 1. i këtij neni, dënohet me burgim deri në tre (3) vjet ose mund të lirohet nga dënimi.

V. Përpjekjet për të detyruar Kuvendin dhe Qeverinë të ndërmarrin veprime me motive politike

Veprimet e deputetëve të Vetëvendosjes, AAK-së dhe Nismës mund të cilësohen edhe si terrorizëm. Qëllimi i veprimeve të tyre është që të detyrojnë një organ publik, Kuvendin e Kosovës, përkatësisht Qeverinë e Kosovës, që të ndërmarrin veprime të caktuara të motivuara politikisht dhe përmes këtyre veprimeve janë duke destabilizuar strukturat themelore politike dhe kushtetuese të Republikës së Kosovës.

Sipas nenit 135 të Kodit Penal, terrorizëm, veprim terrorist apo vepër e terrorizmit është kryerja e një ose më shumë veprave penale të mëposhtme me qëllim të frikësimit serioz të popullsisë, të detyrimit të padrejtë të një organi publik, qeverisë apo organizatës ndërkombëtare për të kryer ose për të mos kryer ndonjë veprim, apo që seriozisht të destabilizojë ose të shkatërrojë strukturat themelore politike, kushtetuese, ekonomike apo shoqërore të Republikës së Kosovës, të një shteti tjetër apo të një organizate ndërkombëtare.

Më poshtë argumentohen veprat penale në ndërlidhshmëri me pikat e këtij neni:

Pika 1.3. sulmi, sulmi me lëndim të lehtë trupor dhe sulmi me lëndim të rëndë trupor në shkelje të neneve 187-189 të këtij Kodi (Baza ligjore për sulmin me gaz lotsjellës dhe hedhjen e mjeteve tjera në drejtim të deputetëve dhe personelit të sigurimit gjatë seancave dhe gjatë protestave jashtë Kuvendit).

Pika 1.7. shkaktimi i rrezikut të përgjithshëm; zjarr vënia apo djegia ose shpërthimi nga pakujdesia në shkelje të neneve 334 ose 365 të këtij Kodi (Baza ligjore për demonstratat e dhunshme dhe trazirat jashtë Kuvendit).

Pika 1.8. shkatërrimi, dëmtimi ose heqja e instalimeve publike apo rrezikimi i trafikut publik në shkelje të neneve 129, 366, 378 ose 380 të këtij Kodi (Baza ligjore për gjykimin e demonstruesve të dhunshëm dhe për trazirat e tyre jashtë Kuvendit).

Pika 1.9. furnizimi, transportimi, prodhimi, këmbimi ose shitja e paautorizuar e armëve, eksplozivit ose armëve nukleare, biologjike ose kimike në shkelje të neneve 176, 369 ose 372-377 të këtij Kodi; 

Gazi lotsjellës cilësohet si armë dhe baza ligjore për gjykimin e deputetëve që e kanë hedhur dhe bartur mund të mbështetet në pikën 1.10.

Pika 1.10. përvetësimi i paautorizuar, mbajtja në pronësi, kontroll, posedim ose përdorimi i armëve, eksplozivit ose armëve nukleare, biologjike ose kimike, ose hulumtimet për ose ndërtimi i armëve biologjike ose kimike në shkelje të neneve 176, 369 ose 372-377 të këtij Kodi;

Këtu duhet sqaruar se sipas Kodit Penal të Kosovës, neni 120, pika 38, armë nënkupton çdo send ose vegël të punuar me qëllim që nën presionin e gazrave, të cilat lirohen gjatë djegies së materieve shpërthyese, elektrike, gazrave nën presion ose energjisë tjetër potenciale, hedhë predha në formë të një plumbi të vetëm, grumbulli prej saçmash, gazi, lëngu, shigjete ose përbërësish të tjerë, që krijohet dhe përdoret për të shkaktuar lëndime trupore ose dëm fizik, qoftë edhe psikologjik, si dhe secili send tjetër, qëllimi kryesor i të cilit është kryerja e sulmit fizik ndaj integritetit fizik të njerëzve ose ndaj pasurisë. Armë po ashtu përfshinë municionin, pjesët dhe përbërësit e armëve, si dhe armët nukleare, biologjike dhe kimike. Armë në këtë kuptim janë edhe armët që përdoren për shpërndarjen e gazit irritues. Përdorimi i mjeteve shpërthyese që lirojnë gaz lotsjellës plotësojnë kushtet e cekura si më sipër dhe cilësohen si armë, sepse lirojnë gaz i cili përdoret për të shkaktuar lëndime trupore dhe psikologjike, transmeton Republika.info.

Gjithashtu, edhe pse është shumë e rëndë për ta pranuar, veprat e deputetëve të dhunshëm dhe të protestuesve të dhunshëm mund të cilësohen edhe si vepra terroriste.

Çka është grupi terrorist?

Shprehja “grup terrorist” nënkupton grupin e strukturuar prej më shumë se dy personave, që ekziston për një periudhe kohore dhe i cili vepron në bashkëpunim për kryerjen e terrorizmit. Grup i strukturuar nënkupton një grup i cili nuk është formuar rastësisht për kryerjen e menjëhershme të një vepre dhe i cili nuk ka nevojë të ketë role formalisht të përcaktuara për anëtarët e tij, vazhdimësinë e anëtarësisë ose strukturë të ndërtuar. Në këtë kuptim, të tri partitë opozitare mund të cilësohen si grupe terroriste, sepse janë tri grupe që veç e veç, por edhe së bashku, kanë krijuar struktura organizative me qëllim të kryerjes së veprave penale të terrorizmit sipas Kodit Penal.

Neni 136 

Kryerja e veprës terroriste 

1. Kushdo që kryen një vepër terroriste dënohet me jo më pak se pesë (5) vjet burgim. 

2. Kur vepra nga paragrafi 1. i këtij neni rezulton me lëndime të rënda trupore të një apo më shumë personave, kryesi dënohet me jo më pak se dhjetë (10) vjet burgim.

3. Kur vepra nga paragrafi 1. i këtij neni rezulton me vdekje të një apo më shumë personave, kryesi dënohet me burgim së paku pesëmbëdhjetë (15) vjet ose me burgim të përjetshëm.

Neni 137 

Ndihma në kryerjen e terrorizmit 

1. Kur vepra nga neni 385 ose 386 i këtij Kodi kryhet në lidhje me terrorizmin, kryesi dënohet me burgim prej gjashtë (6) muaj deri në pesë (5) vjet. 

2. Kur vepra nga neni 388 i këtij Kodi kryhet në lidhje me terrorizmin, kryesi dënohet me burgim prej tre (3) deri në dhjetë (10) vjet. 

3. Kushdo që e ndihmon kryesin apo bashkëpjesëmarrësin pas kryerjes së një vepre terroriste, duke i siguruar fonde ose burime të tjera materiale personave të tillë, dënohet me burgim prej tre (3) deri në dhjetë (10) vjet. 

Neni 138 

Lehtësimi në kryerjen e terrorizmit 

1. Kushdo që në çfarëdo mënyre të drejtpërdrejtë ose të tërthortë ofron, kërkon, mbledh ose fsheh fonde apo mjete të tjera materiale me dashje, dijeni apo bazë të arsyeshme për të besuar se do të përdorën tërësisht ose pjesërisht për apo nga grupi terrorist, apo për kryerjen e veprës terroriste, dënohet me burgim prej pesë (5) deri në pesëmbëdhjetë (15) vjet. 

2. Kushdo që e ndihmon kryesin apo bashkëpjesëmarrësin pas kryerjes së një vepre terroriste, duke i siguruar fonde ose burime të tjera materiale personit apo personave të tillë, dënohet me burgim prej tre (3) deri në dhjet (10) vjet. 

Neni 139 

Rekrutimi për terrorizëm

Kushdo që i bën thirrje personit tjetër për të kryer ose për të marrë pjesë në kryerjen e veprës terroriste, të marrë pjesë në aktivitetet e grupit terrorist apo të sigurojë fonde ose burime materiale, dënohet me burgim prej pesë (5) deri në pesëmbëdhjetë (15) vjet. 

Neni 141 

Shtytja për kryerjen e veprave terroriste 

Kushdo që shpërndan, ose në ndonjë mënyrë tjetër mundëson mesazhin për publikun, me qëllim që të shtytë kryerjen e aktit terrorist, kur sjellja e tillë pavarësisht nëse avokon drejtpërdrejtë ose jo aktet terroriste, shkakton rrezikun që një ose më shumë vepra të tilla të kryhen, dënohet me burgim prej një (1) deri në pesë (5) vjet.

Neni 143 

Organizimi dhe pjesëmarrja në grup terrorist 

1. Kushdo që organizon ose drejton një grup terrorist dënohet me gjobë deri në pesëqind mijë (500.000) euro dhe me burgim prej dhjetë (10) deri në njëzet (20) vjet. 

2. Kushdo që merr pjesë në veprimtaritë e grupit terrorist dënohet me burgim prej pesë (5) deri në dhjetë (10) vjet.