Nga Flori Bruqi : Presidenti amerikan Donald Trump e garantoi sot presidentin francez, Emanuel Macron, se nuk ka një thyerje mes SHBA-së dhe Evropës

Paradoksi i NATO-s: Të bashkuar kundër Rusisë, 

të ndarë nga  presidenti amerikan Donald Trumpi

Aleanca e NATO-s ka nisur të mërkurën samitin dy-ditor në kërkim të fuqizimit të ushtrisë më shumë se kurrë më parë prej Luftës së Ftohtë teksa planifikon të zgjerohet për të frenuar fuqinë ruse.

Ndonëse NATO-ja ka arsye për t’u ndjerë triumfaliste teksa nis samitin në selinë e re në Bruksel në vlerë të miliarda dollarëve, disa liderë të samitit, duken të shqetësuar para se të përballen me liderin de fakto të aleancës, presidentin amerikan, Donald Trump, i cili pritet të jetë i ashpër sa i përket shpenzimeve për mbrojtje.

Akuzat se Rusia është duke tentuar të destabilizojë Perëndimin me sulme kibernetike kanë hapur rrugën për zgjerim më të madh të aleancës veri-atlantike transmeton Reuters.

Takimi bashkon më shumë se 40 krerë të qeverive, duke përfshirë 29 aleatë dhe partnerë që nuk janë anëtarë të NATO-s, nga Finlanda deri në Afganistan.

NATO-ja pritet të zgjerohet sërish, pas pritet dërgimi i ftesës për Maqedoninë drejt nisjes së bisedimeve për anëtarësim, duke sfiduar paralajmërimet ruse kundër zgjerimit të bllokut të udhëhequr nga SHBA-ja më thellë në Ballkan.

Mirëpo komentet e Trumpit për disa udhëheqës të qeverive aleate rreth shpenzimeve të tyre në aleancë, në këmbim të strehimit nën strehën e SHBA-së, ka vendosur në pozitë të palakmueshme liderët.

“NATO-ja nuk na ka trajtuar drejtë. Ne paguajmë shumë dhe ata paguajnë shumë pak”, ka thënë Trump derisa është larguar nga Shtëpia e Bardhë të martën në udhëtimin e tij drejt Evropës, që përfshin edhe vizitat në Britani dhe Finlandë.

Në Helsinki, lideri amerikan do të takohet me homologun e tij rus, Vladimir Putin.

Pavarësisht se sesionet janë menduar mirë ashtu sikur edhe darkat e liderëve në muzeun në Bruksel, të njëjtat kanë pak mundësi për të zbutur qëndrimet e Trumpit, kanë thënë diplomatët e NATO-s, të cilët kanë treguar shqetësimet e tyre një vit më parë kur i kanë bërë ftesë liderin të SHBA-së për të marrë pjesë në darkën speciale.

Në atë kohë Trump u pati bërë thirrje aleatëve të NATO-s të bëjnë më shumë për të ndalur terrorizmin.

Mision i ri

Askush nuk e si sigurt se çfarë do të flasë Trump në NATO, mirëpo diplomatët janë të shqetësuar se liderët evropianë mund të reagojnë dhe situata mund të përkeqësohet.

Për dallim nga komentet e tij të fundit, ku ka goditur aleatët, Trump ka folur me tone tjera para se të nisej në udhëtim.

“Do të punojmë që të gjitha shtetet të jenë të lumtura”, është shprehur ai.

Trump mund të synojë të marrë merita për rritje të shpenzimeve evropiane, të cilat tani konsiderohen arritje qeveritare.

NATO-ja është pajtuar më 2014 se secili anëtar duhet të rrisë shpenzimet ushtarake për 2 përqind, varësisht nga bruto prodhimi i brendshëm deri më 2024.

“Aleatët mund të pranojnë kritika të vogla nëse SHBA-ja vazhdon të jetë garantues, mirëpo nëse Trump kërcënon me largim nga NATO, atëherë do të ishte shumë e vështirë”, ka thënë diplomati i NATO-s që ka qenë i përfshirë në organizim të samitit.

E themeluar më 1949 për të luftuar kërcënimin sovjetik, NATO-ja është e bazuar në bashkëpunim të thellë me SHBA-në, e cila krijon siguri për Evropën përmes arsenalit të saj bërthamor.

Mirëpo aleanca ka krijuar mision të ri prej vendimit të Rusisë për të aneksuar Krimenë më 2014, duke dërguar batalione në Baltik dhe Poloni për të luftuar ndonjë sulm të papritur rus.

“Imazhi i Rusisë nuk varet vetëm në organizimin e Kampionatit të Futbollit për Kupën e Botës”, ka thënë presidenti i Këshillit Evropian, Donald Tusk.

“Askush nuk duhet të harrojë thelbin e politikës dhe marrëdhëniet ndërkombëtare me Rusinë”, ka thënë Tusk, i cili ka qenë kryeministër polak.

Ndonjë biznes tjetër?

Presidenti amerikan, njëherësh komandanti i përgjithshëm i fuqisë më të madhe ushtarake në botë, ka dhënë shenja se ka edhe çështje tjera që mund të diskutojë, duke përfshirë biznesin jashtë NATO-s, siç janë marrëdhëniet tregtare me Evropën.

Deri tani ai ka vendosur tarifa në eksportet evropiane të çelikut dhe aluminit dhe është duke kërcënuar se do ta bëjë të njëjtën gjë edhe në vetura.

“Ne humbim 151 miliardë dollarë në tregti me Bashkimin Evropian. Ata na kanë vënë tarifa të mëdha” ka thënë Trump në Twitter, duke përmendur deficitin tregtar të SHBA-së me BE-në, pavarësisht se blloku dhe qeveria amerikane kanë thënë se shifra është më e vogël, duke përfshirë shërbimet tjera siç janë financat, ku Shtetet e Bashkuara kanë tepricë.

Duke kujtuar takimin e shtatë shteteve më të industrializuara në qershor, ku Trump pati refuzuar deklaratën finale të samitit, të dërguarit e NATO-s, nuk i kanë lënë asgjë rastit, duke negociuar deklaratën e samitit të Brukselit me përpikëri disa ditë përpara dhe duke treguar vendosmëri në politikat mbi Rusinë dhe Irakun.

Pozicioni i Trumpit vazhdon të jetë i paqartë. “Ai mund të shfuqizojë gjithçka me një postim në Twitter”, ka thënë një diplomat i NATO-s.

Presidenti amerikan Donald Trump tha se “Gjermania i bën pagesa në nivel të lartë Rusisë për energjinë dhe për këtë arsye ajo është një rob i Rusisë”.

Trump në kuadër të Samitit të NATO-së në një mëngjes pune me Sekretarin e Përgjithshëm të NATO-së, Jens Stoltenberg, ka bërë disa kritika për mos rritjen e shpenzimeve të mbrojtjes nga Gjermania dhe bashkëpunimin e saj me Rusinë për energjinë.

“Flitet se Evropën duhet ta ruajmë nga Rusia. Atëherë përse vendet e NATO-së i paguajë Rusisë miliarda dollarë për energjinë?”, deklaroi Trump, shkruan Reuters, përcjell Telegrafi.

Ai tha se është “shumë e papërshtatshme” që Gjermania të zhvillojë marrëveshje për naftën dhe gazin me Rusinë.

“Gjermania i bën pagesa në nivel të lartë Rusisë për energjinë. Për këtë arsye Gjermania është një rob i Rusisë”, tha ai.

Trump ka rikujtuar se Gjermania ka siguruar edhe një marrëveshje për linjën e një tubacioni gazi me Rusinë dhe thotë se në këtë mënyrë Rusia falë gazit natyror do të kontrollojë 70 për qind të Gjermanisë.

“Vendet aleate të NATO-së jo brenda 10 vitesh por ‘menjëherë’ duhet të rritin shpenzimet e mbrojtjes. Kjo është e papranueshme. Ne e mbrojmë Gjermaninë, Francën i mbrojmë të gjithë. Paguajmë shumë para. Dhe kjo ka vazhduar për shumë vite. Edhe presidentët e tjerë të SHBA-ve e kanë shtruar këtë çështje në rend dite por asnjëri prej tyre nuk ka bërë ndonjë gjë. Ose nuk e kanë kuptuar ose nuk kanë dashur të ndërhyjnë. Por, për vendin tonë kjo është një padrejtësi e madhe”, theksoi ai.

Trump më tej shtoi se kryesisht shpenzimet e Gjermanisë janë në nivel shumë të ulët.

“Gjermania është një vend shumë i pasur. Ajo mund të rrisë shpenzimet në moment, menjëherë nesër dhe nuk shkakton asnjë problem”, potencoi Trump.

Kancelarja gjermane, Angela Merkel, tha se Gjermania bën “politikë të pavarur” dhe merr “vendime të pavarura”.

Merkel i bëri këto komente pak orë pasi presidenti i Shteteve të Bashkuara të Amerikws, Donald Trump, tha se Berlini “kontrollohet tërësisht nga Rusia”.

“Unë vetë e kam përjetuar kohën kur një pjesë e Gjermanisë ka qenë e pushtuar nga Bashkimi Sovjetik”, tha Merkel, e cila është rritur në Gjermaninë Lindore komuniste.

Presidenti amerikan Donald Trump e garantoi sot presidentin francez, Emanuel Macron, se nuk ka një thyerje mes SHBA-së dhe Evropës

Presidenti amerikan Donald Trump e garantoi sot presidentin francez, Emanuel Macron, se nuk ka një thyerje mes SHBA-së dhe Evropës pavarësisht tensioneve që tronditin samitin e NATO-s në Bruksel, njoftoi sot Elizeja.

“Gjatë takimit të tij prej rreth 40 minutash me homologun francez në selinë e NATO-s, presidenti amerikan ritheksoi lidhjen e tij personale me Evropën dhe dha kryesisht mesazhe pozitive dhe konstruktive për Evropën”, theksoi presidenca franceze pas këtij takimi.

“Për presidentin amerikan, nuk ka një thyerje të marrëdhënieve mes SHBA-së dhe Evropës”, shtoi Elizeja. Në fillim të samitit Trump kritikoi anëtarët e Aleancës së Atlantikut në veçanti Gjermaninë, se nuk paguajnë atë që duhet për shpenzimet e tyre ushtarake.

NATO vazhdon samitin, në fokus Afganistani

Udhëheqësit e NATO-s pritet të kthejnë vëmendjen sot kah konflikti në Afganistan.

Ata mblidhen në ditën e dytë të samitit në Bruksel, i cili deri më tash u dominua nga kërkesat e presidentit amerikan, Donald Trump.

Të mërkurën, Trump kërkoi nga aleatët e NATO-s të ndajnë 4% të bruto prodhimit të brendshëm vjetor për shpenzimet në mbrojtje.

Kjo do të thotë dyfishi i cakut aktual.

Trump po ashtu kritikoi fuqishëm Gjermaninë për shpenzimet, siç tha ai, të pamjaftueshme në mbrojtje dhe “varësinë e saj energjetike nga Rusia”.

Udhëheqësit e NATO-s shpresojnë për një ton më të butë sot, por, në disa postime në Twitter, Trump i përsëriti kritikat e tij.

“Mijëra dollarë shtesë po shpenzohen nga vendet e NATO-s që nga vizita ime vitin e kaluar, por kjo nuk është as përafërsisht e mjaftueshme”, tha Trump.

Për presidentin rus Vladimir  Putinin, takimi me presidentin amerikan Donald  Trumpin është fitore

Për presidentin e Shteteve të Bashkuara, Donald Trump, samiti me homologun rus, Vladimir Putin, rrezikon reagime të ashpra politike, por, për Putinin, fakti se samiti po ndodh është tashmë një fitore e madhe gjeopolitike.

Pavarësisht marrëdhënieve të tensionuara të Rusisë me SHBA-në dhe aleatët e saj, Kremlini, për kohë të gjatë, ka bërë përpjekje të aranzhojë takimin, duke vënë bast se Putin dhe Trump do të shkojnë shumë mirë së bashku.

Edhe pse askush nuk pret përparim të madh, samiti në Moskë shihet si njohje e statusit të Rusisë si fuqi e madhe dhe vetëdijesim i SHBA-së se interesat rusë duhet të merren parasysh.

“Fakti se takimi Putin-Trump do të ndodhë, tregon vetëm një gjë: pavarësisht gjithë histerisë, Shtetet e Bashkuara nuk mund të izolojnë ose injorojnë Rusinë”, tha Alexei Pushkov, deputet rus nga partia në pushtet “Rusia e Bashkuar”, transmeton Reuters.

“I është dashur kohë e gjatë Uashingtonit ta kuptojë këtë, por më në fund e kuptoi”, tha ai.

Zemërimi i Perëndimit për aneksimin e gadishullit ukrainas të Krimesë nga Rusia, si dhe për ndërhyrjen e Moskës në luftërat në lindje të Ukrainës dhe në Siri, nuk është zbehur.

Akuzat e tjera, që hidhen poshtë nga Moska, përfshijnë ndërhyrjen e saj në zgjedhjet në SHBA dhe në politikat në Evropë, furnizimin me armë për rrëzimin e një aeroplani të pasagjerëve në vitin 2014 në Ukrainë, si dhe përpjekjet e saj për të vrarë një ish-spiun rus në Britani me agjent nervor.

Kritikët e Kremlinit, si në Rusi, ashtu edhe jashtë saj, e shohin vendimin e Trumpit për t’u takuar me Putinin si dhënie e legjitimitetit ndërkombëtar Putinit, një gjë që, sipas tyre, ai nuk e meriton, pasi politika ruse në arenën ndërkombëtare nuk ka ndryshuar.

Por, në Rusi, ku sistemi politik është i fiksuar me hierarkinë dhe shfaqjen e forcës, Putini “tashmë ka fituar”, tha Andrey Kortunov, analist me seli në Moskë, raporton Reuters.

“Samiti i mundëson Putinit të thotë se Rusia nuk është e izoluar, se Rusia është fuqi e madhe dhe se, në njëfarë mase, mund të ketë status të barabartë me Shtetet e Bashkuara, së paku në fushën e sigurisë”, tha Kortunov.

Pritjet janë të mëdha në Rusi se Putin, me më shumë se 18 vjet përvojë globale, do të jetë në avantazh përballë Trumpit, i cili nuk ka pasur përvojë politike përpara se të zgjidhej president, në vitin 2016. Trump dhe Putin janë takuar më herët në ngjarje të tjera dhe kanë folur në telefon së paku tetë herë.

Vitaly Tretyakov, një autor politik rus, e përshkroi Trumpin si “fillestar në politikën botërore”, të cilit Putini mund t’ia shpjegojë të menduarit rus dhe faktin përse Rusia “ka pasur të drejtë” ta aneksojë Krimenë.

Sergei Mironov, një tjetër ligjvënës nga partia “Rusia e Bashkuar”, tha se Putin padyshim se do të jetë më lart se Trump.

“Vladimir Putin do t’i japë mësime të vërteta politikanit të papërvojë, Donald Trump”, tha Mironov.

Samiti Trump-Putin do të mbahet në Helsinki më 16 korrik.

Trump ka thënë se nuk mund të vlerësojë nëse homologu i tij rus është mik apo armik, porse takimi me të do të jetë pjesa më e lehtë e udhëtimit në Evropë, që përfshin pjesëmarrjen e tij në samitin e NATO-s dhe vizitën në Britani.

Presidenti i SHBA Donald Trump mbajti bisedime me kancelaren gjermane Angela Merkelin ulin tonet pas takimit në samitin e NATO-s

Presidenti i SHBA Donald Trump mbajti bisedime me kancelaren gjermane Angela Merkel në margjinat e një samiti të NATO-s në Bruksel të mërkurën, orë pas kritikave të ashpra të politikës gjermane mbi shpenzimet e mbrojtjes dhe importet e gazit nga Rusia.

Toni i deklaratave të tyre, kur iu drejtuan së bashku gazetarëve, ishte disi më i qetë, pasi Trump tha se mbështetja e Gjermanisë mbi energjinë ruse e lë atë “nën kontrollin” e Moskës dhe Merkel më vonë iu referua rinisë së saj në Gjermaninë Lindore të drejtuar nga Bashkimi Sovjetik, për të insistuar se tani Berlini është plotësisht sovran.

“Ne kemi një marrëdhënie shumë të mirë me kancelaren. Ne kemi një marrëdhënie të jashtëzakonshme me Gjermaninë”, tha Trump, duke treguar se kishte ngritur shqetësimet e tij rreth një tubacioni të ri të gazit të planifikuar nga Rusia në Gjermani.

Merkel tha se kishte diskutuar migrimin dhe tregtinë me Trump dhe po shihnin përpara për shkëmbime të mëtejshme, pasi Shtetet e Bashkuara mbetën një partner i Gjermanisë.

Flori Bruqi : Propozim më vend: AAK me rezolutë për ndërprerjen e dialogut deri në liberalizimin e vizave

Presidenti i Kosovës, Hashim Thaçi ka treguar se sot ka pasur një bisedë telefonike me Komisionerin për Zgjerim të Bashkimit Evropian (BE), Johannes Hahn.

Kosova vazhdon të jetë në pritje të raportit nga Komisioni Evropian (KE), me të cilin do të vlerësohet nëse vendi e ka plotësuar kushtin e fundit për liberalizim të vizave, atë të luftimit të krimit të organizuar dhe të korrupsionit.

Presidenti i Kosovës, Hashim Thaçi ka treguar se ka pasur një bisedë telefonike me Komisionerin për Zgjerim të Bashkimit Evropian (BE), Johannes Hahn.

Ai në profilin e tij në Twitter ka shkruar se gjatë kësaj bisede janë diskutuar sipas tij, hapat e ardhshëm në procesin e vendimmarrjes së BE-së për liberalizimin e vizave për Kosovën.

“Kam pasur një bisedë telefonike shumë të mirë me komisionarin Johannes Hahn për çështje të rëndësishme në marrëdhëniet BE-Kosovë, duke përfshirë hapat e ardhshëm në procesin e vendimmarrjes së BE-së për liberalizimin e vizave për Kosovën. E informova Komisionerin për gatishmërinë dhe shpresat tona për këtë moment të rëndësishëm”, ka theksuar Thaçi.

Ndryshe, pushteti në Kosovë tash e disa vite kanë deklaruar se vendi do ta marrë liberalizimin e vizave, gjë e cila nuk ka ndodhur.

Madje, kryeministri Haradinaj, kur e kishte marrë timonin e Qeverisë, pati deklaruar se brenda 90 ditësh kosovarët do të udhëtojnë pa viza në zonën Shchengen.

Njëra nga kushtet kryesore për ta marrë liberalizimin e vizave ishte thënë nga zyrtarët e BE-së është kalimi i marrëveshjes se demarkacionit të kufirit të Kosovës me Malin e Zi, por që disa muaj pas këtij votimi ende nuk dihet se a do të ketë liberalizim të vizave këtë vit.

Ministrja e Integrimeve Evropian, Dhurata Hoxha, javë më parë pati deklaruar se fundi i qershorit, dhe më së largu 11 korriku sipas saj, janë datat kur pritet që Komisioni Evropian ta japë rekomandimin për heqjen e vizave.

Kryeministri i Kosovës, Ramush Haradinaj ka theksuar se këtë vit do të ketë liberalizim të vizave për kosovarët.

“Liberalizimi nuk është betejë e humbur. Jemi rrugës, sepse pas Komisionit Evropian e kemi Parlamentin Evropiane, pastaj është Këshilli Evropian, ku aty duhet të binden qeveritë veç e veç për ta dhënë përkrahjen e tyre”, ka theksuar Haradinaj.

Sipas tij, lufta po bëhet që lëvizja e lirë e qytetarëve të Kosovës të jetë çështje javësh.

“Javët janë në pyetje. Nëse do të mundnim me kalu prej Komisionit Evropian për në Parlamentin Evropian, do të arrinim me zënë që seancat të mbahën para pushimit të verës”, ka theksuar ai.

Ai ka theksuar se komisionari evropian, Dimitris Avramopoulos ka treguar qëndrim pozitiv për liberalizimin e vizave.

“Komisioneri evropian për Zgjerim, Johanes Hahn është pozitiv. Nëse na shtyhet për vjeshtë dhe atëherë shkon në Parlamentin Evropian, atëherë do të jetë më vështirë që këtë vit të kemi liberalizim. Në pikëpyetje tash është afati, por jo procesi si proces i liberalizimit, si ka qenë më herët”, ka shtuar Haradinaj.

Propozim më vend: AAK me rezolutë për ndërprerjen e dialogut deri në liberalizimin e vizave

Deputetët e AAK-së kanë inicuar një rezolutë për ndërprerjen e dialogut me Serbinë deri në liberalizimin e viazve për Kosovën.

Sipas dokumentit që do të procedohet në Kryesinë e Kuvendit ndonëse liberalizimi i vizave dhe dialogu janë procese të ndara, deputetët nënshkrues të rezolutës kanë vlerësuar se Kosova ka bërë shumë konsesione në këtë dialog e nuk ka marrë asgjë mbrapa.

Sipas tyre liberalizimi i vizave do të paraqiste një shenjë se Kosova është e barabartë me vendet e rajonit dhe ato anëtare të BE-së.

Kjo rezolutë pritet të paraqitet në seancën e radhës në kuvend.

Në arsyetim thuhet: Republika e Kosovës ka mbetur vendi i vetëm në rajon tash e sa kohë, qytetarët e së cilës nuk lejohen të udhëtojnë pa viza në zonën Shengen. Përveçse padrejtësi, ky përjashtim yni shkakton edhe probleme të mëdha praktike për qytetarët e Republikës në përvojat e tyre profesionale e jetërat familjare.

 Këshilli për Mbrojtjen e të Drejtave dhe Lirive të Njeriut (KMDLNj) thekson se qytetarët e Kosovës po mbesin pezull dhe në gërshërë midis bashkësisë ndërkombëtare që  të  vendosë realisht se kur do të liberalizohen vizat për popullësinë kosovare 

Ndërsa Këshilli për Mbrojtjen e të Drejtave dhe Lirive të Njeriut (KMDLNj) përmes një njoftimi për media thekson se mosliberalizimi i vizave është për shkaqe politike, e jo se nuk janë plotësuar kriteret.

KMDLNj thekson se qytetarët e Kosovës po mbesin pezull dhe në gërshërë midis bashkësisë ndërkombëtare që e vendosë realisht se kur do të liberalizohen vizat dhe e cila vazhdimisht vë kërkesa të reja dhe politikanëve kosovarë që fatin e tyre të mbijetesës politike e lidhin me liberalizimin e vizave.

“Qytetarët e Kosovës për një kohë të gjatë po mashtrohen në radhë të parë nga bashkësia ndërkombëtare e pastaj si pasojë edhe nga politikanët kosovarë se procesi i liberalizimit të vizave është perspektivë evropiane, diçka e pashmangshme dhe vetëm sa nuk ka ndodhur. Të gjitha vendit e rajonit kanë përfituar nga procesi i liberalizimit të vizave pasi, kryesisht, vetëm pjesërisht i kanë përmbushur kriteret e parapara dhe se ky liberalizim ka qenë më shumë politik, se sa përmbushje e standardeve të parapara”, thuhet në reagim.

KMDLNj thekson se për dallim nga shtetet tjera, që në planin e përmbushjes së kritereve dhe forcimit të demokracisë përmes shtetit të së drejtës kanë pasur lehtësime dhe kritere më të buta, Kosovës i janë vendosur kritere që nuk i ka pasur asnjë vend apo shtet i rajonit siç ishte demarkacioni, bisedimet me Serbinë, Gjykata Speciale dhe kritere të tjera.

“Liria e lëvizjes si njëra ndër të drejtat elementare të njeriut dhe vlerë e demokracisë i është mohuar dhe po u mohohet vetëm qytetarëve të Kosovës por jo edhe shteteve tjera që kanë dalë nga shpërbërja e dhunshme e ish – Jugosllavisë dhe të cilat nuk qëndrojnë aspak më mirë se Kosova në përmbushjen e standardeve të kërkuara. Politikanët kosovarë ata që kanë qenë në pushtet pa asnjë dallim i kanë pranuar kushtet e BE për liberalizim të vizave edhe në raste kur edhe mund t’i kenë dëmtuar interesat e shtetit dhe të qytetarëve, sikur që ishte demarkacioni i kufirit me Malin e Zi dhe bisedimet me Serbinë”, theksohet në njoftimin e KMDLNj-së.

Sipas Këshillit, vendet e rajonit që kanë përfituar nga liberalizimi i vizave, Serbia, Mali i Zi, Shqipëria, Maqedonia dhe sidomos Bosnja dhe Hercegovina nuk qëndrojnë asgjë më mirë se Kosova në përmbushjen e standardeve.

“Nëse bëjmë krahasime me shtetet tjera që e kanë përfituar lirinë e lëvizjes në zonën Shengen, edhe Kosova i ka plotësuar ato kushte dhe çdo vonesë që i bëhet liberalizimit të vizave nuk është për shkak të mospërmbushjes së standardeve të parashtruara por se ka prapavijë dhe qëllim politik, i cili si mjet shantazhi do të dëmtojë rëndë procesin e normalizimit të marrëdhënieve me Serbinë, do të ndikojë në përkeqësimin e situatës së sigurisë…”, thuhet në reagimin e Këshillit.

****

Skepticizëm brenda BE-së për liberalizim vizash?

Përfaqësuesit e institucioneve të Kosovës presin rekomandim pozitiv nga Komisioni Evropian në lidhje me liberalizimin e vizave, pavarësisht se rekomandimi për këtë proces tashmë është pritur të ndodhë.

Mospublikimi i rekomandimit nga Brukseli, në Prishtinë më shumë po shihet si procedurë që ndërlidhet me Bashkimin Evropian.

Ministrja e Integrimit Evropian, Dhurata Hoxha tha për Radion Evropa e Lirë se rekomandimi pritet të dalë shpejtë, pasi siç thotë ajo, kështu u është thënë nga zyrtarët në Bruksel.

Megjithatë, ajo shton se tanimë kjo është një çështje që mbetet në duart e institucioneve të BE-së, derisa Kosova ka punuar në plotësimin e kritereve.

“Unë pres që puna e madhe që është bërë që nga pranimi i udhërrëfyesit prej 95 kriteresh, të vlerësohet në mënyrë të drejtë dhe pa vonesa dhe që rekomandimi të reflektojë punën e madhe që është bërë. Për ne është me rëndësi që rekomandimi të reflektojë tërë këtë punë, pra plotësimin e 95 kritereve dhe të dalë para pushimeve verore. Ne si institucione jemi të përkushtuar dhe të angazhuar që reformat e agjendës së integrimit evropian të vazhdojnë dhe të përshpejtohen pavarësisht procesit të liberalizimit të vizave”, tha ministrja Hoxha.

Ndërkaq, analistët politikë, njohës të procesit integrues evropian thonë se rekomandimi mund të jetë pozitiv, por ka pak gjasa që Kosova sivjet të përfshihet në kuadër të zonës së lëvizjes së lirë, pa viza.

Taulant Kryeziu, njohës i çështjeve të integrimit evropian duke folur për Radion Evropa e Lirë tha se ka disa zhvillime të cilat mund t’ia vështirësojnë Kosovës marrjen e liberalizimit të vizave gjatë këtij viti.

Sipas tij, Kosova nuk ka shënuar progres në trajtimin e rasteve të krimit të organizuar dhe korrupsionit të nivelit lartë. Ndërkaq edhe brenda BE-së, sipas Kryeziut, ka një mjedisin jashtëzakonisht negativ politik për çështje të migrimit.

“Pres që raporti të jetë pozitiv dhe Komisioni të rekomandojë liberalizimin e vizave për Kosovën. Por, nuk duhet harruar një gjë se raporti është pjesa teknike e procesit i cili kërkon një vendimmarrje politike në Këshill, aty ku unë pres rezistencë të fuqishme politike të disa prej vendeve anëtare, siç janë Franca, Gjermania dhe Holanda”.

“Në fund, dua të nënvizoj që mosliberalizimi eventual i vizave me BE-në, do të jetë edhe një mesazh i qartë dhe i fuqishëm i BE-së për klasën politike në Kosovë, për të reflektuar në drejtim të një qeverisje në të mirë të qytetarit, ku sundimi i së drejtës është kryefjala e procesit”, tha Kryeziu.

Në anën tjetër edhe Blerta Deliu-Kodra, kryetare e Komisionit për Integrime Evropiane në Kuvendin e Kosovës, tha se Kosova ka përmbushur kriteret që qytetarët e saj të lëvizin lirshëm pa viza në shtetet e Bashkimit Evropian. Megjithatë, Komisionit Evropian dhe institucioneve tjera të Bashkimit Evropian iu mbetet të marrin masa dhe të veprojnë konform këtij rekomandimi.

“Ka qenë edhe deklarata e Komisionerit për Zgjerim i BE-së, Johannes Hahn,që mendoj se është një deklaratë inkurajuese që e konfirmon që Kosova shumë shpejtë do të marrë rekomandimin pozitiv për liberalizim të vizave. Mendoj që Kosova do ta marrë këtë rekomandim për shkak të përmbushjes së kritereve që i ka bërë për lëvizjen e lirë të qytetarëve të Kosovës”.

“Natyrisht që tash e gjithë puna mbetet te Komisioni Evropian, meqë ne si shtet dhe institucione i kemi përmbushur obligimet tona. Ne do ta vazhdojmë rrugën tonë dhe përkushtimin tonë institucional që të punojmë në proceset e tjera integruese, por besoj se rekomandimi do te jetë pozitiv dhe mbetet çështje e Komisionit Evropian dhe institucioneve tjera të Bashkimit Evropian, të marrin masa dhe të veprojnë konform këtij rekomandimi’’, tha Deliu-Kodra.

Ndërkohë, kryetari i Kuvendit të Kosovës, Kadri Veseli, ka thënë se në aspektin institucional, Kosova i ka përmbushur të gjitha kriteret, por ai ka potencuar faktin se shihet skepticizëm brenda vet Bashkimit Evropian.

“Kjo ka qenë arsyeja pse kam ndërmarrë hapat për vizita. Skepticizmi brenda vet Bashkimit Evropian vjen për shkak të situatës e cila është në rend të parë tanimë publike: mosmarrëveshjet të cilat janë brenda BE-së mbi formën e zgjerimit të BE-së dhe funksionit të vet Bashkimit Evropian”, ka deklaruar Veseli.

Fillimisht nga Brukseli ishte premtuar që nga fundi i qershorit apo fillimi i korrikut Komisioni Evropian të dalë me rekomandimin për liberalizimin e vizave dhe rreth kritereve të përmbushura. Ndër kriteret kyçe është ai i dëshmive se Kosova po e lufton krimin e organizuar dhe korrupsionin. Nëse organet e BE-së rikonfirmojnë vullnetin e tyre për liberalizim të vizave, më pas u mbetet edhe vendeve anëtare të BE-së që të japin vendimet e tyre.

Pritjet nga institucionet e Kosovës janë që këto procedura në BE të përmbyllen deri në fund të këtij viti.

Presidenti kroate, Kolinda Grabar-Kitarovic shfrytëzoi takimin e NATO-s në Bruksel për t’iu dhuruar liderëve botërorë fanellën e ekipit të vetë kombëtar.

Presidentja kroate ndan fanellat e botërorit të ekipit kombëtar në Bruksel: Trump e pranon me kënaqësi, May me buzëqeshje të thartë

Presidenti kroate, Kolinda Grabar-Kitarovic shfrytëzoi takimin e NATO-s në Bruksel për t’iu dhuruar liderëve botërorë fanellën e ekipit të vetë kombëtar.

Presidenti i SHBA, Donald Trump nuk mund të fshehte kënaqësinë me rastin e marrjes së dhuratës.

Duke gjykuar nga fotot e presidentit amerikan, duket se u nda i lumtur me këtë rast, me ç’rast i dhuroi edhe një buzëqeshje të parës së shtetit kroat.

Por, Kitarovic nuk u ndal me kaq pasi që një të tillë i dhuroi edhe kryeministres britanike, Theresa May, e cila e pranoi me një buzëqeshja të thartë.

Ivana Knoll u bë e popullarizuar për fansat e futbollit që në fillim të Kampionatit të sivjetmë Botëror që po zhvillohet në Rusi.

Bukuroshja kroate mori vëmendjen e fotografëve gjatë ndeshjes ndërmjet Kroacisë dhe Nigerisë në Kalinjingrad, të vlefshme për xhiron e parë të fazës grupore.

Zëvendës-sekretarja e Përgjithshme e NATO-s, Rose Gottemoeller : Ushtria e Kosovës do të formohet sipas Kushtetutës

Zëvendës-sekretarja e Përgjithshme e NATO-s, Rose Gottemoeller ka thënë se procesi i formimit të Forcave të Armatosura të Kosovës, duhet të jetë në përputhje me Kushtetutën e Kosovës.

“Është gjithashtu shumë e rëndësishme që Kosova të vazhdojë me proceset e saj të rëndësishme të reformave, që përfshin Forcën e Sigurisë plotësisht profesionale. NATO gjithmonë ka pasur qëndrimin, se në rastin e Forcave të Armatosura të Kosovës, ky proces duhet të kryhet në mënyrë kushtetuese, sipas procedurave kushtetuese. Ne do të vazhdojmë të punojmë me zyrtarët në Kosovë për këtë çështje.

Nga Samiti do të shihni dokumentet që do të dalin në ditët në vijim, për të vazhduar t’i mbështesim operacionet e KFOR-it në Kosovë. Ne mendojmë se janë shumë të rëndësishme për vazhdimin e forcimit të sigurisë në rajon, por edhe për të ndihmuar në ndërtimin e profesionalizmit në kuadër të Forcave të Sigurisë së Kosovës”, ka thënë Gottemoeller për Tanjug, para fillimit të samitit të NATO-s në Bruksel.

Kroacia është finalisti i dytë i Kampionatit Botëror. Skuadra nga Ballkani është treguar më e fortë se Anglia duke e mposhtur me rezultat 2-1 pas vazhdimeve dhe në këtë mënyrë, ekipi aktual e ka shkruar emrin në librat e historisë.

Rezultati i kësaj sfide u zhbllokua shumë herët. Që në minutat e para u bë një ndërhyrje në afërsi të zonës së kroatëve dhe u akordua gjuajtje e lirë për anglezët.

Përgjegjësinë e mori Kieran Trippier, i cili u tregua fantastik për ta mposhtur Danijel Subasicin (5′).

Kieran Trippier shënoi nga gjuajtja e lirë

Minutat e para të ndeshjes u takuan Tre Luanëve, të cilët ishin shumë të rrezikshëm. Me lojën e tyre të shpejtë dhe dinamike, anglezët arrinin shumë shpejtë në zonën kundërshtare.

Ndërkohë që kroatët e kishin të vështirë ta zhvillonin lojën e tyre në gjysmën e parë të kësaj gjysmëfinaleje.

Tjetër lojë zhvilloi skuadra ballkanike në gjysmën e dytë. Ata luanin me posedim të topit dhe krijim të aksioneve duke rrezikuar vazhdimisht portën kundërshtare.

Dhe pas një aksioni të organizuar mirë, Sime Vrsaljko harkoi në zonë, ndërsa Ivan Perisic shënoi me kokë (68′).

Ivan Perisic e barazoi rezultatin

Menjëherë pas, Kroacia e pati një tjetër rast fantastik për të kaluar në epërsi, mirëpo nuk u shfrytëzua. Ishte pikërisht një lëvizje e mrekullueshme nga Perisic, mirëpo topi e goditi vetëm shtyllën.

Të dyja skuadrat ishin të rrezikshme në minutat në vazhdim të lojës, por më afër golit ishin kroatët. Sidoqoftë, koha e rregullt përfundoi me rezultat të barabartë dhe ndeshja shkoi në vazhdime.

Rastet nuk munguan në pjesën e parë të vazhdimeve nga të dyja palët, sidomos nga kroatët, mirëpo nuk pati ndryshim rezultati.

Mario Mandzukic përmbysi gjithçka

Në gjysmën e dytë të vazhdimeve, Kroacia e përmbysi rezultatin. Ivan Perisic e dërgoi një top me kokë në zonë, ndërsa Mario Mandzukic, edhe pse i lënduar, reagoi për ta mposhtur portierin anglez (109′).

Kroacia në finalen e 15 korrikut do të luajë kundër Francës, ndërsa Anglia do ta zhvillojë ndeshjen për vendin e tretë kundër Belgjikës (më 14 korrik).

******


Kryeministri i Shqipërisë, Edi Rama, e ka publikuar një fotografi të përbashkët me presidenten e Kroacisë, Kolinda Grabar-Kitarovic, me rastin e kualifikimit të Kroacisë në finale të Kampionatit Botëror.

Kombëtarja kroate e mposhti Anglinë dhe për herë të parë është kualifikuar në një finale të turneut më të madh botëror të futbollit.

Për t’i uruar kroatët për këtë sukses të madh, kreu i Qeverisë shqiptare e ka postuar një fotografi të përbashkët me Kolindan.

Dhe shqiptarët duke qenë ndër tifozët më të mëdhenj të Kroacisë, e kanë pëlqyer shumë fotografinë e postuar në profilin e tij në Facebook.

Imazhin e postuar e ka quajtur thjesht: “Fotografia e ditës”.

Për më pak se dhjetë minuta, imazhi i publikuar ka marrë dhjetëra mijëra pëlqime nga ndjekësit e kryeministrit shqiptar.

Në finalen e madhe të 15 korrikut, Kroacia do të luajë kundër Francë.

Liderët mblidhen për ta shikuar momentin final të ndeshjes Kroaci-Angli

Se Kampionati Botëror është shumë i rëndësishëm, ka dëshmuar edhe një video nga momentet finale të ndeshjes ndërmjet Kroacisë dhe Anglisë.

Liderët botërorë në kuadër të Samitit të Londrës për shtetet e Ballkanit Perëndimor, për një moment janë ndaluar për ta shikuar ndeshjen.

Një xhirim, në të cilin shfaqet edhe kryeministri i Shqipërisë, Edi Rama, i ka paraqitur politikanët të grumbulluar duke shikuar se kush do të fitojë.

Natyrisht se më në siklet ishte Theresa May (Foto: Facebook/ How People Reacted)

Në video shihen mes tjerëve, edhe kancelarja gjermane, Angela Merkel, kryeministrja e Britanisë së Madhe, Theresa May dhe presidenti i Turqisë, Recep Tayyip Erdogan.

Reagimet dhe suksesi i filmit shqiptaro-sovjetik “Skënderbeu”

GJERGJ KASTRIOTI - BABAI THEMELUES I KOMBIT SHQIPTAR Gjergj Kastrioti është nderi, krenaria dhe dhe indentiteti ynë, pa Gjergj Kastriotin kurrë nuk do të kishte Shqipëri dhe shqiptarë, mbi shpatullat e këtij gjeniu të shekullit te XVI u ngritën themelet e kombit shqiptar dhe gjithçka tjetër që e përcakton qënien tonë.

https://youtu.be/NtN7LQP0yak?t=106

Shfaqja e përbashkët e filmit “Skënderbeu” nga Ambasada Sovjetike dhe Legata Shqiptare në Romë në 16 qershor 1954 nuk ia doli dot që ta thyente qëndrimin italian për ta lejuar shfaqjen e tij pa bërë të paktën ndryshimet e duhura në tekstin e folësit, po ashtu prekur edhe skenarin.

Por, ndërsa në vendin e italianëve filmi shqiptar-sovjetik mund të thuhet se “dështoi”, përjetoi të kundërtën në Francë: ishte një triumf.

Pas suksesit në Festivalin e Kanës jehona e tij mori formën e një dallge, e cila do të kapërcente edhe oqeanin Atlantik dhe hynte deri në Shtetet e Bashkuara të Amerikës.

Në Francë, menjëherë pas konkurrimit në Kanë, qenë tri shoqëri të shfaqjes së filmave të cilat kërkuan të blinin kopje. Dhe jo pesë a dhjetë të tilla, por 40-50. Këto ia raportonte Tiranës me një radiogram të 10 prillit, Legata Shqiptare në Paris.

Ndërkohë, në 13 prill, në kryeqytetin francez, Shoqata e Miqësisë Francë-BRSS e shfaqi filmin “Skënderbeu” në teatrin e madh të Champs Elise, Në këtë ngjarje mori pjesë edhe Sekretari i Partisë Komuniste Franceze, Zhak Dyklo, si edhe personalitete të shumta të artit dhe kulturës.

Legata Shqiptare e Parisit njoftoi po ashtu filmi kishte pasur jehonë të madhe edhe nëpër shumicën e gazetave vendase, por binte në sy entuziazmi i të përditshmes së Partisë Komuniste “Humanité”. Titulli i saj në 29 mars 1954 qe “Skënderbeu, kryevepër e re e kinematografisë sovjetike”. Autori Rezhis Berzheren shkruante: “Skënderbeu bëri përshtypje të madhe nga bukuria e ngjyrave të filmit, nga cilësia e vënies së tij në skenë, nga ndjenjat që e frymëzojnë, nga fuqia e jashtëzakonshme e subjektit të tij dhe skenave që janë paraqitur”.(Ylli Pollovina)

Këtë triumf të filmit Tirana e shoqëronte edhe me më shumë propagandë. Në 24 prill ajo kreu gjestin më të fortë: Presidiumi i Kuvendit Popullor dekoroi kolektivin që mori pjesë në realizimin e filmit.

Në 29 korrik 1954 (siç e shihni në dokumentin bashkëngjitur këtij shkrimi), Legata Shqiptare në Paris i dërgoi një mesazh të shifruar Ministrisë së Punëve të Jashtme në Tiranë. Në të thoshte: “Morëm telegram nga Dhimitër Trebicka, ku kërkon filmin e Skënderbeut në gjuhën shqip. Filmin, thotë Dhimitri e ka rregulluar që ta tërheqë Art-Kinopiktures Nev Jorg, e cila shoqëri po e shfaq që nga data 3 korrik në folës në rusisht. Bisedova me miqtë sovjetikë dhe më thanë se për koloninë shqiptare mund të dërgoni. Lutemi më njoftoni”.

Në SHBA, vendin ku qe projektuar dhe ishte udhëhequr operacioni i fshehtë ushtarak “Valuable”, me objektiv rrëzimin e regjimit qeverisës në Shqipëri dhe prej andej në të gjithë kampin socialist, opinioni publik nuk e përfilli shumë planin tashmë të dështuar të administratës së tij, në Turqi prirja qe krejt e anasjellë.

Siç i raportonte qendrës Legata Shqiptare në Paris gjatë shfaqjes së filmit për Skënderbeun në Festivalin e Kanës, kishin dalë të zemëruar turqit. Gjestin e protestës e kish bërë Ambasada e tyre në Paris.

Me këtë rast bënte edhe shpjegimin: “Përsa u përket pretendimeve nga pala turke, ishte mëse e natyrshme, pasi shteti turk akoma pretendon dhe dëshiron që Gjergj Kastriotin ta quajë turk dhe bile për atë çka bëri, e konsideron tradhtar të atdheut, pra të Turqisë dhe arshivat e tij janë të mbyllura për figurën e Heroit tonë Kombëtar”.

BRSS që e prodhoi filmin, me kërkesë të Tiranës, vështirë ta sipërmerrte këtë gjë thjesht për solidaritet bolshevik. Jeta e Gjergj Kastriotit nuk qe vetëm e mbushur me gjeste kundër Kishës Katolike të Vatikanit, çfarë përbënte objektiv goditjeje të propagandës së tyre, por edhe mbi të gjitha sepse ishte kundër Turqisë, armikut të tyre tradicional.

Që filmi ishte me patos të theksuar antiturk mund ta dëshmojmë me çfarë në 20 prill 2007 ambasadori rus në Tiranë, Aleksandër Prishepov, një diplomat me karrierë të gjatë, studiuar posaçërisht për marrëdhënie ndërkombëtare e në Ministrinë e Punëve të Jashtme të vendit të vet që nga viti 1971, deklaroi në të përditshmen “Metropol”. Intervistën e tij redaksia e formuloi “Dikur në Moskë luanim ‘Skënderbeu’”.

Mes të tjerash, pasi shpjegonte marrëdhëniet mes dy vendeve, çështjen e pavarësimit të Kosovës, çfarë mendonin rusët edhe shqiptarët për njeri-tjetrin pyetjes së gazetarit “Çfarë kujtoni për Shqipërinë më parë se të mbërrinit këtu?” Aleksandër Prishepov iu përgjigj: “Para se të vija këtu kam lexuar shumë për vendin tuaj. Kam lexuar mjaft libra, kam kërkuar në internet dhe jam informuar për gjithçka mundesha lidhur me Shqipërinë. Por, kam edhe kujtimet e mia gjatë kohës së rinisë. Në atë kohë prodhimi më interesant dhe më popullor kinematografik ishte filmi ruso-shqiptar ‘Ushtari i madh, Skënderbej’. Mund të konstatoj se ky film ka qënë vërtet madhështor. Në xhirimin e këtij filmi morën pjesë aktorët dhe kineastët më të mirë rusë. Regjisori Sergej Jutkjeviq është klasiku i filmit rus. Operatori është një nga më të mirët. Artistët ishin nga më të mirët dhe nga më të shquarit nga të dyja palët, edhe shqiptarë, edhe rusë. Ne fëmijët 5,6,7 vjeç luanim asokohe një lojë që quhej ‘Skënderbej’. Domethënë ndjenjat e ngrohta për shqiptarëtdhe Shqipërinë janë krijuar tek unë që nga fëmijëria”.

Sipas asaj që gjatë shkrimit të skenarit ka përjetuar ndihmësi i autorit kryesor të tekstit, sovjetikut Mikhail Papava, shqiptari Gjovalin Luka, grupi udhëheqës rus i prodhimit të filmit nuk dëshironte të kryente ndonjë pasaktësi historike ndaj episodeve që lidheshin me osmanët. Ndërkohë ata interesoheshin që ngjarjet me dështimet e turqve të qenë fortësisht të argumentuara dhe për rrjedhojë, të pamundura për t’u kritikuar e sulmuar, dhënë shkas për ndonjë protestë shtetërore nga Ankaraja.

Luka thotë: “Një ditë, skenaristi i filmit pyeti: ‘Si ka mundësi që ky heroi juaj, i njohur në të gjithë Evropën, nuk ka asnjë lloj gjurme se ku ka qenë varri i tij dhe gjatë shekullit të XX, shteti i juaj nuk i ka ngritur asnjë lloj mauzoleumi?! E kam pasur një ide dhe do të kisha dëshiruar t’a kisha filluar filmin nga ish vend-varrimi i tij?’”

Gjovalini ia ktheu: “Shoku Papava, për t’iu përgjigjur kësaj pyetje të papritur dhe kaq serioze tuajën, më duhet njëfarë kohe nja katër-pesë ditë”.

Luka: “Po mirë, jam dakord, që të më ktheni një përgjigje, pas disa ditësh”.

Mbasi pati rilexuar librin e Nolit për Gjergj Kastriotin (botim i vitit 1921), këshilluar edhe me tre historianë e arkeologë mjaft të shquar, kur u ritakua me skenaristin sovjetik, i tha “Shoku Papava, historianët tonë thonë se me pushtimin e qytetit të Lezhës, ku ekspeditën e udhëhiqte vetë Sulltan Mehmeti II Fatihu, jeniçerët turq me orientimin dhe dijeninë e tij, ia hapën Skënderbeut varrin në qytetin e Lezhës, aty rreth vitit 1478. Ky akt, që sigurisht në dukjen e parë do të kuptohej si poshtërim, në realitet është interpretuar nga disa historianë, jo si veprim për ta diskredituar e për t’a pastruar si vend shejtani, por për t’i shprehur nderimin dhe admirimin e tyre…”!

Por, sovjetiku nuk jepet: “Aaa… megjithëkëtë, si mund të ishte zhdukur vendvarrimi pa asnjë lloj gjurme, në një qendër me një vazhdimësi banimi dhe kaq të vogël? Askush në popull e nëpër shërbyesit e atyre objekteve fetare aty nuk ka asnjë lloj dijenie?! Është i sigurt ky raportim? Jashtëzakonisht e çuditshme, e pabesueshme! Që t’ia kenë zhdukur turqit për hakmarrje armiqësie, këtë e pranoj dhe e konceptoj, por edhe ‘për ta nderuar si shenjtor’, siç po thoni, edhe pa asnjë gjurmë ish varri, këtë nuk e konceptoj dot!”

Ndërkohë edhe Gjovalin Luka, komunist i vjetër i Grupit të Shkodrës dhe gjatë luftës komandant i batalionit partizan “Perlat Rexhepi”, ishte edhe më i paepur se sovjetiku. Tha: “Shoku Papava, me sa kam lexuar e po lexoj unë, kështu e ka shkruar historiani Fan Noli dhe juve mjaft pjesë të përkthyera të tijat i keni konsultuar. Nuk besoj se duhet të merremi ne edhe me hetimet edhe me eksplorimet arkeologjike, në këtë moment. Ky tregim dhe kjo ngjarje është bazuar te ‘Historia’ që ka shkruar vetë Marin Barleti në fillim të shekullit XVI, i cili aty nuk ka qenë vetë dëshmitar, por ashtu ia kanë treguar të tjerët. M. Barleti, shkruante aty se Skënderbeu u varros në Lezhë, në kishën katolike më të madhe të Shën Kollit. Por, përderisa nuk ka ardhur orientimi nga lart, për hetime dhe gërmime arkeologjike, ç’mund të bëjmë ne, për t’a gjetur se ku ka qenë ish varri?”

Pastaj Luka bëri pyetjen: “Ju dëshironi t’ju sigurojmë edhe një fletë, për këtë temë se si e tregonte konkretisht Barleti?”

Mikhail Papava shqiptoi prerë: “Jo, nuk besoj se ka më nevojë. Mua më duhej një gjurmë, një diçka ku ta filloja filmin, por kur s’ka, nuk ka, kështu ishte fati.”

Biseda do të vijonte edhe më dhe më në fund skenaristi sovjetik nuk e fshehu: “Edhe, ndërkaq pala juaj kërkon t’ju bëjmë një film të përmasave gjigande, ku skenarin tim mund ta bëjnë shoshë më mbrapa?”