Letër ngushëllimi mikut të shtrenjtë, Flori Bruqi


I dashur Flori,

Megjithëse jam shumë larg Jush, më lejoni që me trup dhe me zemër, të ndodhem pranë familjes Suaj të nderuar në këto momente të rënda që ajo po përjeton me rastin e vdekjes së Babait Tuaj të Dashur, figurës së shquar të arsimit dhe të kulturës shqiptare, Prof. Maxhun Bruqi. Figura dhe personaliteti i Prof. Maxhun Bruqit ka lënë gjurmë të pashlyeshme në faqet e historisë shumëshekullore të kombit tonë, me kontributin e Tij të jashtëzakonshëm që ka dhënë në lëmin e arsimit shqip. Kjo për faktin se arsimi ka qenë fushëbeteja më e rëndësishme që kombit shqiptar i është dashur të përballojë për shekuj me radhë për ruajtjen dhe për lartësimin e identitetit të vet kombëtar, të kulturës së vet kombëtare. Prandaj Ju, familja juaj dhe krejt njerëzit e gjakut Tuaj, krenoheni me të drejtë për Babain Tuaj Të Madh, i cili, jo vetëm në historinë e Kosovës, por edhe të krejt kombit shqiptar, ka rrezatuar dritën e arsimit shqip me një shkëlqim me të vërtetë meteorik.
Mua më gëzon zemra që Prof. Mazhun Bruqi ka lënë pas pasardhës të virtytshëm për të vazhduar me dinjitet veprën e Tij atdhetare në shërbim të shqiptarisë. Prandaj me të drejtë Ju, personalisht, përfaqësoni sot ajkën e inteligjencies shqiptare që e ka vënë veten në shërbim të kombit shqiptar. Portali Juaj “Agjencioni Floripress” është një tribunë e fuqishme, sa e dashur, aq edhe e mirënjohur, përmes së cilës Ju dhe bashkëpunëtorët Tuaj u flisni shqiptarëve vetëm me gjuhën e së vërtetës.
Prof. Maxhun Bruqi u largua për në botën e përtejme me një emër të nderuar që la pas vetes. Qëllimi i jetës së Tij ishte shërbimi në të mirë të njerëzve përmes dritës së arsimit. Veprimtaria e Tij shumëvjeçare, si një mësimdhënës model, shembullor, më sjell ndër mend një thënie të shkëlqyer të Aristotelit:
“Cili është kuptimi i jetës? T’u shërbesh të tjerëve dhe të bësh të mira”.
Në këto çaste trishtimi të rëndë për Ju dhe për familjen Tuaj, jam i bindur që dhimbjen do të dini ta përballoni burrërisht. Vdekja e njerëzve të dashur na bën të kujtojmë fjalët e Horacit:
“Jetoje jetën, o njeri, duke mos harruar se sa e shkurtër është ajo”.
Më lejoni, i dashur Flori, t’Ju përcjell ngushëllimet e mia të thella, të bashkëshortes sime, Havasë, dhe të të dy fëmijëve të mi, Plarentit, dhe Kesianës.
Për të mira dhe për gëzime paskëtaj në familjen tuaj.

Prof.Dr. Eshref Ymeri

Sinsinati, Ohajo ,07 prill 2016

Comments

Popular posts from this blog

Libra të rinj - Shkarkim falas

Ese për Vitin e Ri

Poezi të zgjedhura nga GJERGJ FISHTA (23 tetor 1870 - 30 dhjetor 1940)