Sali Berisha në 18-vjetorin e vajzës që u dhunua nga vandalët

Kryeministri i uron 18-vjetorin e vajzës që u godit nga demonstruesit. "Ata që përpiqen të djegin të ardhmen, janë të pashpresë"

Kryeministri Sali Berisha premton se të gjithë dhunuesit e 21 janarit do të marrin ndëshkimin e duhur. Pohimi i tij u bë në 18-vjetorin e ditëlindjes së Bekime Rexhës, vajzës që u godit nga demonstruesit në datën 21 janar. Kreu i qeverisë së bashku me bashkëshorten Liri Berisha me rastin e 18-vjetorit i dhuruan Bekime Rexhës një tufë me lule dhe një kompjuter. Gjatë fjalës së tij, Berisha u shpreh se për atë që i ndodhi Bekimes, ka marrë me qindra mesazhe nga maturantë e gjimnazistë nga Gjirokastra, nga Mallakastra, nga Vlora, nga Hasi, nga Kukësi, nga mbarë Shqipëria, të cilët kanë shprehur një ndjenjë revolte të thellë shpirtërore për atë akt të shëmtuar.

 

Premtimi i Kryeministrit

Kryeministri Sali Berisha kishte rezervuar një dhuratë dhe vizitë surprizë në shtëpinë e Bekime Rexhës, imazhi i së cilës u shfaq nga shumë kamera televizive tek qëllohej brutalisht nga një grup demonstruesish në 21 janar në mes të rrugës. "Erdha këtu të ndaj me ju gëzimin e datëlindjes së Bekimes dhe për t'i uruar asaj në emër të familjen time shumë gëzime, mbarësi, shëndetet, suksese dhe jetë të gjatë. Erdha, gjithashtu, jo vetëm në emër të familjes sime, por para së gjithash në emër të të gjithë shkollarëve shqiptarë, të të gjithë bashkëmoshatarëve të Bekimes, të cilët aktin barbar, dhunën ndaj bashkëshollares dhe bashkëmoshatares së tyre e kanë përjetuar si një dhunë ndaj tyre", - u shpreh Kryeministri Berisha gjatë vizitës në familjen Rexha. Berisha u shpreh se për atë që i ndodhi Bekimes, ka marrë me qindra mesazhe nga maturantë e gjimnazistë të cilët e kanë dënuar atë akt të shëmtuar. Sali Berisha: "Ne të urojmë ty të bëhesh 120 vjeç, e lumtur, me atë jetë që meriton. Ndërsa ata që qëllojnë dhe godasin mbi fëmijët tanë të bekuar do të marrin ndëshkimin e merituar ligjor. Ne shohim drejt të ardhmes, drejt ndërtimit të vlerave dhe ajo që mund të bëjmë ne është të ndërtojmë ëndrrën tuaj, të ndërtojmë atë Shqipëri që ju keni në mendje, në zemër, në shpirt dhe që e meritoni plotësisht", - u shpreh kreu i qeverisë, duke iu drejtuar Bekimes me rastin e përvjetorit të saj. Familja kryeministrore kishte përgatitur edhe një dhuratë për gjimnazisten me rastin e ditëlindjes. Ndërsa u shpreh se shkolla dhe shkollimi i fëmijëve janë përparësia më absolute e kësaj qeverie, Kryeministri Berisha theksoi se ata që përpiqen të djegin me zjarr të ardhmen e tyre, janë të pashpresë. "Ne shohim drejt të ardhmes, drejt ndërtimit të vlerave dhe ajo që mund të bëjmë ne është të ndërtojmë ëndrrën tuaj, të ndërtojmë atë Shqipëri që ju keni në mendje, në zemër, në shpirt dhe që e meritoni plotësisht", - u shpreh Kryeministri. Nga ana e tij, babai i Bekimes u shpreh se ndihet krenar për vajzën e tij, e cila ka shprehur hapur bindjen e saj atë ditë, "pasi - theksoi ai, - jetojmë në një shtet demokratik që po shkon drejt Evropës dhe jo drejt komunizmit e kooperativave bujqësore".

Veprimet e dhunshme, Halimi: Prokuroria nuk ka hapur çështje penale

Kryetari i Komisionit Parlamentar Hetimor për ngjarjet e 21 janarit, deputeti Eduard Halimi, deklaroi dje se objekti i hetimit penal të prokurorisë është krejt tjetër nga objekti i komisionit. "Prokuroria nuk ka pranuar të hapë çështjen penale për veprime masive të dhunshme. Nuk ka pranuar të hapë çështjen penale për marrjen e pushtetit me dhunë", - deklaroi ai. "Ndërkohë, - tha ai, - Komisioni Hetimor në ushtrim të instrumenteve Kushtetutës të hetimit parlamentar, po heton veprimet e institucioneve gjatë veprimit të organizuar kriminal për dhunimin e rendit kushtetues, marrjen e pushtetit me dhunë dhe ekzistencën e puçit të shtetit. "Nuk ka mbivendosje për këto hetime. Komisioni Hetimor është fuqiplotë në gjithë procesin e marrjes të çdo lloj dokumenti hetimor", - vuri në dukje më tej Halimi. Ligjvënësit demokrat sqaroi më tej kërkesat e Komisionit Hetimor lidhur me tabulatet telefonike të drejtuesve të lartë të shtetit. Pas reagimit të kreut të opozitës, Edi Rama, i cili i ka konsideruar si të paligjshme këto kërkesa, Halimi tha se Komisioni Hetimor ka kërkuar vetëm tabulatet telefonike dhe jo përmbajtjen e bisedave të kryera në këtë ditë nga krerët e institucioneve të larta të shtetit, Presidentit, Kryeministrit, kryeprokurores, shefit të SHISH-it apo dhe shefit të opozitës dhe disa deputetëve të saj. "Komisioni Hetimor Parlamentar ka kërkuar thjesht tabulatet, jo përmbajtjen e bisedave të kryera. Komisioni ka kërkuar vetëm skedarët, për të bërë transparencën e zhvillimeve të atyre ditëve", - deklaroi kreu i Komisionit Hetimor. Deputeti Halimi siguroi se do të zbardhet gjithë e vërteta për 21 janarin. "Ata që kanë frikë nga transparenca për bashkëbiseduesit që kanë pasur, duhet të dinë se ngjarja e 21 janarit do të përshkohet nga rrezja e të vërtetës në çdo qelizë të saj", - përfundoi ai.

Komisioni Hetimor: Në polici mungojnë urdhrat për hetime

Anëtarët e Komisionit Hetimor për demonstratën e 21 janarit kanë zbritur përsëri në terren për të mbledhur fakte. Për rreth 60 minuta deputetët Genti Strazimiri, Dashnor Sula dhe Fatos Hoxha ishin në godinën e Drejtorisë së Përgjithshme të Policisë së Shtetit. Strazimiri sqaroi se vizita e tyre në Policinë e Shtetit ishte në përmbushje të planit të veprimit të Komisionit Hetimor për një mision faktmbledhës. "Vërejtëm që Policia e Shtetit ka të gjitha kapacitetet, ka të gjithë aftësinë, ashtu siç e pati përpara protestës së 21 janarit, gjatë saj dhe, natyrisht, pas saj për të kryer të gjitha veprimet procedurale për mbrojtjen e rendit publik dhe të rendit kushtetues", - deklaroi Strazimiri. "Por, - shtoi ai, - deri tani prokuroria nuk i ka dhënë asnjë urdhër kësaj strukture të hetojë 21 janarin". Strazimiri shprehet se janë disa veprat penale mbi të cilat policia nuk mund të procedojë, pa urdhrin e organit të akuzës. "Është fakti që ende sot në këto momente që po flasim Policia e Shtetit nuk ka marrë urdhër për të kryer veprime hetimore për asnjë prej veprave penale si: thirrje publike për dhunë kundër rendit kushtetues, pushtim të ndërtesave me qëllim rrëzimin e rendit kushtetues, thirrje dhe organizim për të detyruar organet shtetërore të kryejnë ose të mos kryejnë një akt të caktuar apo krijimin e turmave të armatosura dhe të gjitha këto natyrisht edhe në mbështetje të neni 21 të Kodit Penal që parashikon edhe bashkëpunimin për to. Së fundmi, nuk kanë marrë ende asnjë urdhër për të kryer veprimet hetimore në lidhje me veprën penale të poshtërimit të simboleve të republikës, respektivisht të flamurit kombëtar", - deklaroi dje ligjvënësi demokrat.

Një ditë më parë, deputetet e Komisionit Hetimor iu drejtuan Gardës së Republikës, e cila, sipas tyre, zbatoi me përpikmëri ligjin.

Opozita kërcënon sërish: Nuk ndalim protestat masive

Kryesocialisti  dhe krimineli Edvin Kristaq Rama kundër hetimit të tabulateve telefonike. Kreu i PS-së kërkon ndihmën e ndërkombëtarëve

Kryetari i Partisë Socialiste, Edi Rama, kundërshton hetimin e demonstratës së 21 janarit. Ai akuzoi mazhorancën dhe Kryeministrin Sali Berisha se po tenton të kryejë grusht shteti brenda shtetit, me qëllim rivendosjen e diktaturës në vend. Sipas Ramës propozimi i mazhorancës për t’i kërkuar kompanive celulare, vënien në dispozicion të tabulateve telefonike të krerëve të shtetit, është antiligjore. Këtë deklaratë, kreu i selisë rozë e bëri pas tryezës me aleatët e “Opozitës së Bashkuar”. Rama përsëriti gjithashtu se opozita do të vijojë protestat në rrugë, ndërsa u bëri thirrje ndërkombëtarëve për të ndërhyrë në zgjidhjen e situatës së rënduar politike.

http://www.youtube.com/watch?v=fbuHC96E9mw
http://www.youtube.com/watch?v=m9qlWwsbL9c&feature=related
http://www.youtube.com/watch?v=MHsWmABaRY0&feature=related
Deklarata

“Kërkesa për të disponuar tabulatet e telefonave të Presidentit të Republikës, të kryeprokurores, të drejtorit të Shërbimit dhe të një numri të konsiderueshëm deputetësh është jo vetëm e paligjshme, po edhe e mjaftueshme për të kuptuar se as vrasjet e demonstruesve, as skenari, më pas i dështuar falë dëshmive të medias, që inkriminonte opozitën si organizatore të vrasjeve, as mosdorëzimi i gjashtë komandantëve të Gardës Republikane, as mos dorëheqja e ministrit të Brendshëm, as nxjerrja e Policisë së Shtetit mbi ligjin, as mosgarantimi i demonstratës homazh nga policia, nuk janë pa lidhje me njëra-tjetrën, po janë pjesë e një plani makabër për të imponuar në Shqipëri sistemin e dhunës e të frikës, në kushtet kur populli kërkon fundin e regjimit të kusarisë e të matrapazllëkut”, - deklaroi dje Rama. Kreu i opozitës u bëri thirrje Shteteve të Bashkuara të Amerikës dhe Bashkimit Evropian që të ndërhyjnë për të mos lejuar që të vijojë dhuna ndaj institucioneve. “Miq të dashur e partnerë të respektuar ndërkombëtarë të Shqipërisë mos lejoni që në Shqipëri të vijojnë të ndodhin këto që po ndodhin dita-ditës në kurriz të idesë së shtetit ligjor dhe të popullit shqiptar, që kurrë nuk do ta pranojë rikthimin në kohën e errët të partisë-shtet, e të shtetit-parti”, - u shpreh Rama. Ai shtoi se opozita është e gatshme për dialog e kompromis por nuk mund të pranojë regjimin e kusarisë. Gjatë konferencës për shtyp ai ripërsëriti qëndrimin se zgjidhja e ngërçit politik në vend vjen vetëm përmes largimit të qeverisë, andaj ai ftoi popullin opozitar që t’i bashkohet betejës për rezistencë paqësore, ndonëse nuk zbardhi asnjë detaj se kur do të jetë protesta e radhës. “Do ta çojmë përpara betejën tonë, rezistencë paqësore që nuk duhet të provokohet nga dhuna qeveritare. Në këtë betejë do të jemi të gjithë bashkë për Shqipërinë demokratike”, - tha ai. I pyetur nga mediat lidhur me kërcënimet e bëra në adresë të tij Rama tha: “Jeta ime nuk është më e çmuar se jeta e atyre të 3 të pafajshmëve të cilët dolën në rrugën e protestës për një Shqipëri më të mirë. Unë jam me ta e me të gjithë ata që janë në këtë rrugë, me të gjithë popullin shqiptar”.


Ngjela: Protesta derisa të çlirojmë institucionet. “Populli evropian nuk resht së protestuari”

Opozita edhe një herë tjetër, në kundërshti të hapur me thirrjet e ndërkombëtarëve për stabilizimin e situatës në vend dhe domosdoshmërinë e dialogut politik, rikonfirmoi se protestat e saj jo vetëm që nuk do të ndalen, por ato do të bëhen edhe më masive. Kështu deklaroi dje në një dalje publike kryetari i PLD-së, Spartak Ngjela, ku sipas të cilit numri masiv në pjesëmarrje në këto protesta do të ketë rëndësi për vetë ndryshimin e gjendjes. “Protestat do të vazhdojnë deri sa të çlirohen institucionet nga uzurpimi dhe të fitohet liria e popullit. Protestat kanë një sens, janë masive. Numri është ajo që vendos gjendjen, do jenë masive”, - tha Ngjela. Përfaqësuesi i Opozitës së Bashkuar, duke iu referuar demonstratës homazh të 28 janarit, theksoi se qytetarët shqiptar treguan se janë të civilizuar si e gjithë bota dhe këtë sipas tij e vërtetuan ditën e manifestimit-homazh. “Opozita e bashkuar e konsideron ditën e djeshme (dy ditë më parë) si një hap normal të shqiptarëve drejt lirisë por ama një hap gjigant të Shqipërisë drejt Perëndimit. Gjithë bota pa 200 mijë shqiptarë, që në fakt ishin 200 mijë burra dhe gra shteti. Por pamë dhe një karrocier, por ishte një karrocier me karrocë pa kalë, ky që është kryeministër, që s’ka lidhje fare me ta”, - u shpreh Ngjela. Më tej, ai nuk kurseu akuzat ndaj kreut të ekzekutivit, Sali Berisha duke thënë: “Ata që nuk e kanë ditur më lejoni t’ju them se shqiptarët janë si të gjithë ata që demonstruan pardje, në shesh, me përjashtim të një njeriu që nuk është si ta, ky që kemi kryeministër. Të gjithë të tjerët janë ashtu siç patë ju dje, prandaj thashë që Shqipëria ka bërë një hap gjigant drejt perëndimit, se ka izoluar primitivizmin përfundimisht”. Sipas Ngjelës, demonstrata homazh e 28 janarit tregoi se Shqipëria është një vend perëndimor. “Ne jemi vend perëndimor, ju garantojmë për këtë dhe të premten ja garantuam gjithë qytetërimit perëndimor”, - theksoi ai. Më herët, në një deklaratë për shtyp nga selia rozë deputetja e Partisë Socialiste, Eglantina Gjermeni, tha se demonstrata e homazhit ishte një mesazh i qartë që i dërgohej nga qindra mijëra shqiptarë një regjimi të ngujuar e rrethuar me ushtarë e police, duke theksuar gjithashtu se protestat ndaj kësaj qeverie do të vazhdojnë. “Sali Berisha me çdo ditë që kalon po tregon se nuk ndan asgjë nga kultura dhe vlerat evropiane, ai ka përballë një popull evropian, i cili nuk do të rresht së protestuari në emër të atyre vlerave e parimeve që shkelen përditë me këmbë nga ky pushtet”, - tha Gjermeni. Deputetja socialiste nënvizoi se qytetarët në demonstratën homazh kërkuan drejtësi për vrasjen e 3 demonstruesve. “Homazhi nuk ishte thjesht një shfaqje respekti ndaj të rënëve dhe një sfidë qytetare e paqësore që i bëhej regjimit. Ajo ishte po ashtu një thirrje që drejtësia në Shqipëri të bëjë punën e saj e sigurt se ka mbështetjen dhe solidaritetin e çdo qytetari, e çdo gruaje e çdo nëne, në kushtet kur sulmohet paburrërisht”, - përfundoi Gjermeni. Dy ditë më parë opozita zhvilloi demonstratën homazh në nderim tre viktimave të vrarë në demonstratën e parë të 21 janarit. Në këtë tubim ndryshe nga demonstrata e parë, nuk pati dhunë dhe konfrontime të ashpra midis protestuesve dhe forcave të rendit, të cilët kërkonin vetëm të mbronin institucionet kushtetuese të vendit. Ndërsa Anëtarja e Asamblesë së PS-së, Megi Ajtyresa, duke iu përgjigjur akuzave të Sekretarit të Përgjithshëm të LSI-së, Luan Rama tha dje se protestat e opozitës nuk do të kenë të ndalur. “Dje qau e protestoi Shqipëria që vidhet përditë nga Saliu e nga zëvendësi i tij. Zëdhënësit të zëvendësit i themi se protesta s’ka për t’u ndalur sa kohë zyrat e qeverisë janë të pushtuara nga kusarë që arrijnë aty deri sa e vrasin këtë popull për të mos dorëzuar bllokun e kusarisë”, - tha Ajtyresa. Sipas saj demonstrata homazh ishte shenja më e qartë e mos-pajtimit të qytetarëve me korrupsionin dhe qeverisjen e sotme që ka vrarë shqiptarët në një demonstratë paqësore. Anëtarja e Asamblesë u shpreh se zemërimi i popullit nuk do të ndalet deri në largimin e qeverisë. “S’ka mbetur shqiptar që s’e ka marrë vesh se videokusaria e zëvendësit të Saliut e ka përmbysur kupën e durimit dhe zemërimi i popullit nuk mbaron pa mbaruar ky koalicion i turpit”, - theksoi Ajtyresa.

Sali Berisha: Fund fatal për dhunuesit e institucioneve

“21 janari”, Kryeministri: Të implikuar Topi, Ina Rama dhe SHISH. “Ina Rama lëshoi fletë-arreste pa hetuar dhunuesit e institucioneve”



Kryeministri Sali Berisha garantoi dje shqiptarët se situata është nën kontroll dhe se kush tenton për herë të dytë të dhunojë institucionet e shtetit, do të marrë ndëshkim maksimal ligjor. Por ai akuzoi sërish prokuroren e Përgjithshme, e cila sipas tij, lëshoi pa asnjë hetim urdhër-arrestet për të gjithë komandën drejtuese të Gardës së Republikës. Ai hodhi akuza te tjera mbi Presidentin Bamir Topi, kryeprokuroren Ina Rama dhe Kreun e SHISH si te implikuar me 21 janarin. Berisha priti dje në një takim mikun e vjetër, përfaqësuesin e komunitetit të Sant'Egidios, Imzot Vincenzio Paglion, ku i bëri një paraqitje të situatës së krijuar si pasojë e protestave të dhunshme dhe përpjekjeve për përmbysjen e institucioneve të zgjedhura në mënyrë demokratike. Kryeministri u shpreh se në 21 janar, kreu i opozitës organizoi një protestë të dhunshme, duke i vendosur ultimatum kryetarit të qeverisë se nëse nuk do të pranonte ultimatumin e tij, do të kalonte mbi kufoma. Kryeministri theksoi se për pesë orë me radhë, jo më shumë se 200 deri në 300 banditë, trafikantë e kriminelë rrethuan institucionin e Këshillit të Ministrave, më qëllim përmbysjen me dhunë të qeverisë legjitime. Kryeministri u shpreh se në këtë përpjekje, zhvillimet e mëvonshme treguan qartë se janë të përfshirë dhe drejtuesit e 2 - 3 institucioneve të tjera të vendit. Kryeministri e njohu imzot Paglion se prokurorja e Përgjithshme lëshoi pa asnjë hetim urdhër arrestet për të gjithë komandën drejtuese të Gardës së Republikës përfshirë komandantët më të lartë të saj ndërkohë që nuk ka nisur ende hetimet për dhunim të rendit kushtetues duke mashtruar shqiptarët se nuk ka marrë padi për dhunim të rendit kushtetues në një kohë kur Policia e Shtetit e kishte dërguar këtë padi dy ditë më pare. Prokurorja e Përgjithshme vazhdoi misionin e saj të paralizës së sistemit të akuzës për hetimin e puçistëve, duke shkelur marrëveshjen e bërë me faktorë shumë të rëndësishëm ndërkombëtarë duke dëshmuar në këtë mënyrë se puçistët shpresojnë akoma në projektin e marrjes së pushtetit më dhunë, u shpreh Kryeministri. Kryeministri theksoi gjithashtu se Presidenti i Republikës, siç fakton deklarata e tij e datës 21 janar, nuk arriti të shihte pesë orë dhunë dhe sulm për të përmbysur qeverinë legjitime të vendit. Duke shprehur vlerësimin se SHBA kanë sjellë ekspertë shumë të mirë që do të ndihmojnë prokurorinë në hetimin e çështjes shprehu besimin se kjo ekspertizë do të garantojë hetim profesional e të paanshëm. Kryeministri Berisha e njohu Imzot Paglion se një komision hetimor parlamentar është ngritur dhe do të bëjë transparencën për shqiptarët mbi çdo gjë që ka ndodhur. Duke e garantuar se situata është krejtësisht nën kontroll, kryeministri theksoi se ai që do të tentojë të dhunojë për herë të dytë institucionet e vendit, do të marrë ndëshkimin maksimal ligjor që meriton. Kryeministri garantoi se askush nuk do të mund të pengojë bërjen e drejtësisë mbi këtë çështje. Imzot Paglio shprehu keqardhjen për këto zhvillime të dhunshme, duke i cilësuar ato të papranueshme si dhe vlerësoi kryeministrin për të qëndrimet e tij. Duke shprehur mbështetjen e tij, ai theksoi se ka besim të plotë se rendi kushtetues i vendit është i fortë dhe nuk do të mund të dhunohet më.

Kryesia e PD-së Shkodër dënon aktet e dhunës të 21 janarit

Kryesia e Partisë Demokratike në Shkodër zhvilloi dje një mbledhje me dyer të mbyllura, ku sipas burimeve zyrtare, në rend të ditës ishte diskutimi dhe arritja e një vendimi të përbashkët mbi qëndrimin që mban kjo forcë politike në Shkodër mbi zhvillimet dhe situatën aktuale politike në vend. Gjithashtu, sipas të njëjtave burime edhe dënimin e aktit të dhunës së shfaqur nga disa persona të inkriminuar pranë Partisë Socialiste të Shqipërisë dhe opozitës së bashkuar në demonstratën e 21 janarit. Këtë qëndrim e kanë bërë prezent pas mbledhjes kryetari i PD-së Shkodër Astrit Bushati si dhe deputetja Arenca Troshani. Gjithashtu sipas kreut të PD-së Shkodër, Astrit Bushati, një tjetër çështje e diskutuar në mbledhjen e kryesisë së kësaj force politike në kryeqendrën e veriut ishte dhe ndërtimi i një plani masash organizative për zgjedhjet vendore. Bushati nuk ka përjashtuar rritjen e konkurrencës së brendshme në Partinë Demokratike për sa i përket kandidateve të mundshëm për kryetarë të njësive vendore, ndërkohë që gjithçka do të filtrohet në kryesinë qendrore ku dhe do vendoset përfundimisht mbi emrat e atyre që do të hyjnë në garën elektorale për zgjedhjet e 8 majit.

Ilir Meta: Mbështesim kontrollin e tabulateve

“LSI kishte paralajmëruar puçin e shtetit”. Reagon PS: Asgjë nuk e ndal popullin

Kryetari i Lëvizjes Socialiste për Integrim, Ilir Meta, mbështet Komisionin Hetimor për kontrollin e të gjitha tabulateve telefonike të krerëve të shtetit, por edhe të disa deputetëve, me qëllim zbardhjen e ngjarjeve të 21 janarit. Meta tha se për të ndihmuar transparencën LSI është e gatshme të pranojë çdo hetim, edhe për deputetët e saj. Ai komentoi më tej demonstratën e parë të opozitës, duke pohuar se 21 janari ka qenë një sulm i mirorganizuar, i armatosur, i drejtuar nga Edi Rama kundër Këshillit të Ministrave për marrjen e pushtetit me dhunë. Ai shtoi se Rama, më 28 janar, organizoi një tjetër demonstratë, por këtë herë paqësore, me qëllimin e vetëm qe të mbulonte atë çka ndodhi një javë para saj.



Paralajmërimi

Meta deklaroi dje se e priste demonstratën e dhunshme të 21 janarit. “Ne e kemi paralajmëruar prej kohësh se kryetari i Partisë Socialiste synonte të nxiste destabilitet në vend, jo vetëm kaq, por kemi paralajmëruar 2 ditë para 21 janarit këtu, me përgjegjësi maksimale, se më 21 janar ishin mobilizuar banda, kriminelë, elementë me precedent penal, të cilët do të sulmonin forcat e Policisë së Shtetit dhe institucionet. Dhe më 20 janar, një ditë përpara puçit, sekretari i Përgjithshëm i LSI-së të gjitha këto informacione, të ardhura nga strukturat dhe dashamirës të LSI-së nga rrethet, ia ka çuar me shkrim drejtorit të Përgjithshëm të Policisë së Shtetit, në mënyrë krejtësisht zyrtare”, - deklaroi ai. Meta shtoi se demonstrata e dytë e 28 janarit ishte e qetë, sepse synonte të mbulonte 21 janarin. “28 janari ishte një manifestim hipokrizie dhe jo qytetarie”, - tha ai. Meta përshëndeti angazhimin e SHBA-ve për të ndihmuar hetimin e kësaj çështjeje, pasi, shtoi ai, zhvillimet e pas-21 janarit kanë ngritur pikëpyetjet e tyre për objektivitetin dhe seriozitetin e procesit të hetimit, i cili patjetër që duhet të hetojë pasojat, por në radhë të parë të hetojë shkaqet, nxitësit, frymëzuesit e dhunës. Meta i konsideroi si të pabaza dhe qëndrimet kundër hetimit të tablateve telefonike të krerëve të shtetit. “Nuk e kuptoj se si ata të cilët për një vit e gjysmë janë çjerrë për gjoja transparencën, pse kanë frikë se me kë kanë biseduar gjatë 5 orëve të sulmit kundër rendit kushtetues.

Në rast se gjithsecili ka bërë detyrën dhe është sjellë si qytetar i denjë i këtij vendi duhet të shkojë të bashkëpunojë vetë me Komisionin Hetimor Parlamentar. Ne jemi Republikë Parlamentare dhe Parlamenti është mbi gjithçka”, - tha Meta. Ai ftoi opozitën të marrë vendet e saj në Komisionin Hetimor Parlamentar, që edhe ajo të kontribuojë në mënyrë pozitive dhe konstruktive në këtë proces transparence të 21 janarit. Pas deklaratës së kreut të LSI-së reagoi deputetja socialiste, Olta Xhaçka, sipas së cilës “aktori i videohajnisë” duhet t’u japë fund deklaratave në mbrojte të një pushteti të vjedhur. “Kusaria e Sali Berishës e matrapazllëku i Ilir Metës sot kërkojnë shpagimin kushtetues e ligjor e jo deklarata për shtyp pa bereqet. Ata janë partia në pushtet, ne jemi populli që kërkon shtet. Liria, barazia, vëllazërimi na bashkojnë sot me çdo shqiptar, të majtë e të djathtë, kundër kusarisë që vret për pushtet, ndaj përgjigjja që kemi për zotin Meta është se asgjë nuk e ndal popullin e asgjë nuk i shpëton kusarët”, - tha ajo.





Kreu i LSI-së: Historia e kutive, pretekst për të bojkotuar zgjedhjet



Një bojkot i mundshëm nga opozita i zgjedhjeve të 8 majit nuk do të habiste askënd. Kështu deklaroi dje kreu i Lëvizjes Socialiste për Integrim, Ilir Meta, gjatë mbledhjes së kryesisë. Sipas tij, ky ka qenë qëllimi i vetëm i Edi Ramës dhe aspak transparenca e zgjedhjeve të kaluara. “Ua kemi thënë ndërkombëtarëve që në fillim të historisë së kutive se qëllimi kryesor është si të mos hyhet në zgjedhjet vendore, si të përsëritet loja e vitit 2007, por në përmasa të tjera, vetëm për një arsye, sepse kryetari i Bashkisë së Tiranës nuk ndahet dot nga kjo bashki, për më tepër se nuk ka as mandat deputeti. Dhe e gjithë kjo lojë është në funksion të karrierës së një individi, i cili për një vit e gjysmë ka sulmuar rëndë proceset integruese të vendit, ka bërë një fushatë të shfrenuar për të penguar liberalizimin e vizave, ka përgjegjësinë kryesore për mosmarrjen e statusit kandidat dhe që tani ka nxjerrë fytyrën e vërtetë të tij, e cila është fytyra e dhunës së atyre elementëve kriminalë që i pa gjithë Shqipëria më 21 janar, duke sulmuar institucione”, - tha ai. Më tej, Meta kërkoi të përshpejtoheshin përgatitjet për zgjedhjet e ardhshme vendore të 8 majit.

“Ky duhet të jetë dhe ky do të jetë objektivit ynë kryesor. Vendi ka një datë të shpallur për zgjedhjet, që është 8 maji, dhe është detyrë e çdo force politike që të marrë pjesë në zgjedhje, por natyrisht asnjë forcë politike nuk mund të marrë pjesë kundër vullnetit të saj. Por axhenda e vendit nuk mund të shmanget nga askush që ka frikë nga procesi zgjedhor dhe që është mësuar që zgjedhjet t’i fitojë në tavolinën e kulisave dhe si dhuratë nga të tjerët”, - tha ai. Në kuadër të përgatitjet së këtij procesi Meta propozoi që i ardhuri rishtas në parti, Ylli Majani, të ishte sekretar për Çështjet Zgjedhore i LSI-së. “Objektivi im kryesor për zgjedhjet e 8 majit është dyfishimi i rezultateve të LSI-së në zgjedhjet e fundit vendore të shkurtit të vitit 2007, si parti, pra në përqindje, pra për këshilltarë dhe njëkohësisht për bashki dhe për komuna, domethënë për njësitë vendore. Ky është një rezultat plotësisht i arritshëm, i cili natyrisht kërkon një motivim të gjithanshëm të gjithë strukturave tona”, - tha më tej ai. Kreu i LSI-së deklaroi se brenda 15 shkurtit duhet të jenë gati propozimet nga njësitë vendore të LSI-së për kryetarë të njësive vendore, pra bashkitë apo komunat në gjithë vendin. “Dhe brenda 15 shkurtit do të bëjmë edhe takimin paraelektoral në Pallatin e Kongreseve me përfaqësuesit e Lëvizjes Socialiste për Integrim për të përcaktuar të gjitha linjat dhe prioritetet tona për zgjedhjet e ardhshme vendore dhe për rezultatet që pritën më 8 maj”, - përfundoi ai.

Fatbardh Kadilli: Edvin Kristaq Rama tenton ta marrë pushtetin me dhunë

Demonstrata e 21 janarit ishte një puç i qartë ndaj shteti ligjor. Kështu ka pohuar deputeti demokrat, Fatbardh Kadilli. Sipas tij, populli ishte i heshtur në 28 janar. Kadilli tha se mazhoranca respektoi thirrjen e Bashkimit Evropian, ndaj dhe anuloi manifestimin antidhunë. Duke iu referuar demonstratës, Kadilli tha se kemi militantë kundër popullit, të cilët kanë qenë organizuar nga Rama. Ai kërkoi që palët të qetësohen dhe të bashkëpunojnë për të mirën e vendit. Por, nënvizoi se për mazhorancën janë bërë puçe. Duke iu referuar Komisionit Hetimor për 21 janarin, Kadilli tha se kërkesa për tabulatet e politikanëve të lartë dhe krerëve të shtetit nuk mund të konsiderohet përgjim. “Prokuroria nuk po heton organizatorët. Dhuna është e iniciuar nga opozita dhe prokuroria nuk heton mbi vrasjet. Nuk janë hetuar individë të veçantë”, - tha Kadilli, ndërsa shtoi se po hetohen ata që mbrojtën institucionet. Duke iu referuar Presidentit, Kadilli tha se Topi nuk doli si garant në 21 janar. “Topi nuk doli si garant i popullit. Veprimet e tij nuk ishin në kohë reale”, - tha Kadilli. Për SHISH-in Kadilli tha se nuk ka bashkëpunuar me qeverinë. Sipas tij, të gjitha këto ngjarje të iniciuara nga Rama bëhen, sepse ai nuk pranon përballjen me zgjedhjet dhe tenton ta marrë pushtetin me dhunë.

21 janari, plani “Rama” për të vrarë Sali Berishën?!

Nga Basir Çollaku

Nuk ka dëshmi më të qartë sesa kryengritja e 21 janarit 2011, ku së paku 200 vetë të armatosur sulmuan dhunshëm policinë dhe Gardën e Republikës, me synimin e qartë që të hynin në godinën e Kryeministrisë dhe aty të bënin reale marrjen e zyrës së kryetarit të qeverisë, të Kryeministrit të Shqipërisë, që gjendej në orarin e tij të punës në zyrë. A është tregues ky a është e dhënë që nxirrte flakë, tym, plumba, dëshmia më transparente e një plani të qartë për të vrarë Kryeministrin e vendit??? As shumë mend nuk do për të thënë ‘po’, sepse flasin pamjet dhe dhuna e kapërcyer me adresë të qartë: Zyrën e Kryeministrit Sali Berisha, ashtu si sulmuan njëlloj në ‘97-n po Berishën, me të njëjtën mendje, sepse përfliten të njëjtët autorë politikë.

Pra, nuk ka dyshim se persona të stimuluar me narkotikë, shenjat mund të flasin mbase për ekstazi, që kishin bomba “Molotov”, pistoleta, e prisnin kallashët sapo të hapej dera, të kishin ndërmend të silleshin me duartrokitje e me paqe apo me lule me kreun e ekzekutivit, kur mijëra të tjerë prisnin “çlirimin e madh”. Për një student të zakonshëm drejtësie, ky plan ngjan si plan vrasjeje, shumë herë me tepër se mesazhet që paskkan mbërritur më vonë nga një qytetar nga Burreli për vrasjen e kreut të opozitës, për djegien e një makine në bulevard apo pranë tij, ditën e mësymjes së armatosur e shkatërruese. Kjo nuk shkon si alibi as nëpër çerdhe të tregohet, por le të presim fundin e hetimit. Tani në celular njerëzit mezi të pyesin si je me shëndet, nga sikleti i përgjimeve pa fund, e jo më të flasin trimërisht se do të vrasim kreun e opozitës për hakmarrje se na kanë djegur makinën ca të panjohur që mbase dhe vetë kryebashkiaku s’ka dijeni se kush janë. Kjo, për mendimin tim, është njëlloj si të bësh japrak me makarona apo kafe me kripë. Madje, prokuroria ka qenë nxitshmërisht e gatshme të zbardhë këtë plan dhe ka bërë mrekullisht mirë, që të parandalojë këtë vepër penale të rëndë si tentativë ndaj zotit Rama, ndonëse duket e trukuar fort bukur për të viktimizuar kreun e opozitës për atë që ai nuk mundi të bënte me 21 janar.

Besoj se në këtë prurje të re informacioni kemi një lajm të mirë, nëse marrim të vërtetë atë që është përcjellë mediatikisht edhe nga seanca në gjykatë ku prokurori ka thënë se janë informacione e përgjime nga SHISH. Lajmi i mirë e i keq njëherësh është fakti (duke e marrë si të vërtetë së paku) që SHISH ka ofruar të dhëna, përgjime, për t’u përdorur si prova për arrestimin e masën e sigurisë në gjykatë. Lajm i mirë duhet konsideruar fakti që punuaka ky shërbim i fshehtë për kreun e opozitës dhe lajm i keq që nuk punon aspak për Kryeministrin. Nuk dua ta marr si aksiomë këtë, por kjo përforcon idenë e përdorjes së Shërbimit kundër kreut të qeverisë, mosvënien në dijeni të tij për atë tmerr të përgatitur për të premten e 21 janarit.

Përgjimet na garantojnë se “atentatorët” janë armatosur me një stilolaps pistoletë, gjë që kundërshtohet si fakt, se kjo armë ka qenë pjesë edhe në armatosjen e 21 janarit kundër Kryeministrisë e Kryeministrit. Kur prokuroria e kërkon një armë kundër Berishës nuk e gjen, ndërsa për 10 minuta e gjen kundër kreut të opozitës, Edi Rama. Kjo katrahurë institucionesh të përdorura njëanshmërisht nuk është se sjell transparencë. Komisioni hetimor parlamentar është instrumenti më bindës që kërkon të dhëna dhe fshehja apo refuzimi që po bëjnë kryeprokurorja, kreu i SHISH, e të tjerë drejtues institucionesh për të vënë në dispozicion fakte që provojnë kryengritjen e armatosur ndaj Këshillit të Ministrave, ndaj Kryeministrit Sali Berisha. Komisioni Hetimor Parlamentar kërkon me të drejtë dhe nuk duhet asnjë kompani të rezistojë e të bëjë naze për të dhënë tabulatet, që të shihet qartë se si kanë komunikuar kryengritësit që tentuan vrasjen e Kryeministrit me 21 janar, por mbetën në tentativë. Bëhet fjalë për sigurinë kombëtare dhe rendin kushtetues dhe operatorët duhet të kenë dërguar pa asnjë lloj rezistence të dhënat për këdo qoftë sepse përballen me një kërkesë ligjore. Këtu nuk ka vend për shkelje ligji nuk ka përse trembet askush sepse në listë janë të gjithë, Presidenti, Kryeministri, Kryetarja e Kuvendit, e gjithë krerët e institucioneve, lë të mësohet komunikimi i fshehtë me 21 janar që të zbardhet plani i vrasjes së pamundësuar të asaj ditë të zezë. Kryeministri dhe Kryetarja e Kuvendit nuk e kanë refuzuar aspak kërkesën që të jenë ata pjesë e dëshmisë, qoftë edhe për bisedat telefonike, atëherë përse kjo frikë e madhe e të tjerëve që janë në këtë listë??? Përgjigjja të shkon vetëm në një shteg, sepse ata nuk duan të rrëfejnë mëkatet në Komisionin Hetimor, pasi aty mund të ndeshemi me shumë vepra kriminale apo urdhra të përcjellë në udhë zjarri të së premtes së datës 21. Kjo hedh gjithnjë e më shumë bindje se kryengritja që dhunoi Tiranën, ishte plan i mirëfilltë, atentat ndaj Kryeministrit të vendit, sepse në bulevard, ashtu si thotë Prokuroria e Përgjithshme, nuk u sulmua as Presidenca, ku gjendet me zyrë kreu i shtetit, Bamir Topi, as Prokuroria e Përgjithshme, 100 metra më tutje bulevardit, ku gjendet me zyrë Ina Rama, as Bashkia e Tiranës, që ndodhet po në bulevard ku ka një nga zyrat Edi Rama, por Këshilli i Ministrave, ku gjendej në zyrë Kryeministri i vendit, Sali Berisha. Ndaj, ky ishte plan për vrasje. Ata që nuk duan hetimin, kanë frikë mos gjenden ashtu si janë denoncuar publikisht pjesëtarë e hartues të planit, sepse të gjithë jemi njohur që të dhëna të frikshme të publikuara nga Kryeministri, janë informacione të ofruara nga shërbimet e huaja. Asnjë nga këto agjenci serioze nuk janë në partitë tona politike, nuk mbajnë me hatër grupimet, por punojnë që siguria e rendi kushtetues i një vendi mik të mos rrënohet, kur ata kanë mundësi të japin ndihmë. E kjo ndihmë prishi planin e tyre për vrasje që do të zbardhej plotësisht në përgjimet e bisedave.