Assadi si Millosheviçi

Ministri i jashtëm i Kosovës, Enver Hoxhaj në një në një intervistë për gazetën më të madhe të Arabisë Saudite “Okaz”, ka thënë se Kosova mbështet të gjitha lëvizjet për dinjitet njerëzor dhe shprehë solidaritetin për viktimat dhe për jetërat e shumë njerëzve që vdiqën në këto lëvizje.

“Sjellja e Assadit është e njëjtë sikurse sjellja e Millosheviqit ndaj qytetarëve të Kosovës dhe Bosnjës, vende ku ka ndodhur gjenocid. Për ne Assadi, Gaddafi, Sadam Huseini dhe të tjerë janë diktatorë dhe përgjegjës për shkelje masive të të drejtave të njeriut sikurse Millosheviqi në Ish-Jugosllavi”, ka thënë Hoxhaj.

Sipas tij, që kur ka filluar një proces i tillë edhe në Siri, Kosova ka qenë përkrah popullit të Sirisë. “Assadi me brutalitetin e tij dhe me vrasjet masive të qytetarëve të tij ka humbur çdo legjitimitet të pushtetit të tij dhe sa më shpejt duhet të largohet nga regjimi i tij anti-njerëzor”, ka shtuar ai.

Hoxhaj ka thënë se Kosova që kur filloi Pranvera Arabe dhe deri në ditët e sotme i ka dhënë mbështetje të fuqishme publike lëvizjeve të popujve të ndryshëm për liri, barazi dhe dinjitet njerëzor në të gjitha vendet islame.

“Një gjë të tillë e kanë bërë të gjitha shtetet në Ballkan, Evropë dhe më gjerë që besojnë në vlera të tilla si të drejtat e njeriut dhe demokracia. Kështu unë kam qenë ndër ministrat e parë të Punëve të Jashtme që kam mbështetur aspiratat dhe tranzicionet në demokraci në Tunizi, Libi, Egjipt dhe në shumë shtete të tjera”, ka thënë ai.

Duke folur për procesin e njohjeve në mesin e shteteve arabe, kryediplomati kosovar ka thënë se fakti që nga 22 shtete anëtare të Ligës Arabe vetëm 11 e kanë njohur Republikën e Kosovës, si dhe nga 57 vende anëtare te Organizatës për Bashkëpunim Islamik vetëm 27 e kanë njohur Kosovën janë të dhëna dëshpëruese për qytetarët e Kosovës dhe për shumë vende dhe popuj miq në boten arabe dhe myslimane.

“Nga asnjë shtet ne nuk kem pritur që do ta zgjasin njohjen e Republikës së Kosovës. Presim që qytetarët e Kosovës, të cilët në të kaluarën kanë përjetuar vuajtje dhe tragjedi të mëdha si dhe me një besim të pathyeshëm dhe vendosmëri të madhe e kanë arritur idealin e tyre që të jetojnë në një shtet të lirë, sovran dhe te pavarur, të kenë lajme të mira dhe pozitive për pranimin e sakrificës së tyre dhe respektimit të dinjitetit njerëzor përmes njohjes zyrtare të Republikës së Kosovës”, ka shtuar Hoxhaj, gjatë intervistës për “Okaz”.

Sipas tij, gjatë luftës në Kosovë në vitet 1998-1999 janë shkatërruar pothuajse mbi 450 xhami nga regjimi serb i Sllobodan Millosheviqit, i cili kishte për qellim jo vetëm dëbimin e gjysmës së popullatës, pothuajse mbi 1 milion njerëz jashtë Kosovës, vrasjen e mbi 15000 njerëzve në Kosovë, por synonte edhe shkatërrimin e kujtesës tone historike përmes djegies, granatimit dhe shkatërrimit deri në themel të xhamive tona.

Nju Jorku nikoqir i 15 veprave nga Kosova

Pesëmbëdhjetë vepra arti me “kryefjalë”, poetët njujorkezë, Laurie Anderson dhe Lou Reed, do të stacionohen në njërën nga galeritë e New York-ut.


Artisti Lorik Sylejmani është protagonist i ekspozitës që më 18 të këtij muaji do të hapet në galerinë “Chashama”, e cila ka për qëllim afirmimin e artistëve. Ekspozita e parë personale e Sylejmanit në New York përmban frymën rock të viteve ‘70 dhe ‘80.

Lorik Sylejmani

Një ditë para se të niset për në New York, Sylejmani ka zbërthyer konceptin e ekspozitës me të cilën do të prezantohet para audiencës njujorkeze.

“Janë gjithsej 15 punime formatesh të mëdha dhe të gjitha këto janë nga tema e rock poezive të dy poetëve njujorkezë, të cilët së bashku me Andy Warhol i kanë dhënë Amerikës dhe botës idenë e konceptin mbi artin e popullarizuar, pop-art”, ka shpjeguar Sylejmani.

Sylejmani po ashtu ka përshkruar teknikën me të cilën ka realizuar punimet që do t’i ekspozojë në New York.

“Këto vepra së pari janë punuar si piktura. Më pas i kam skanuar në slajde, i kam ripërpunuar dhe pak a shumë riformatizuar, derisa në fund janë shtypur”, ka shpjeguar ai.

Ekspozita personale në New York për Sylejmanin është jetësim i një ëndrre, nga e cila po ashtu mund të lindin bashkëpunime të reja.

“New York është qendër e artit bashkëkohor. Është vend i mundësive. Natyrisht kjo ekspozitë për mua është e një rëndësie të madhe. Veçse tashmë më kanë kontaktuar nga atje disa njerëz nga bota e artit dhe shpresoj që do të kemi bashkëpunime në të ardhmen”, ka thënë ai.

Lorik Sylejmani më 2006 ka ekspozuar në “HUN Gallery”, ndërsa muaj më parë ka ekspozuar në “Times Square”. Veç në New York, arti i tij është ekspozuar edhe në Angli, Itali, Francë, Argjentinë, Belgjikë, Shqipëri dhe Rusi.

Galeria “Chashama” është themeluar nga Anita Durst në vitin 1995 dhe deri më tani në të kanë ekspozuar mbi 500 artistë ndërkombëtarë.

Dr. Andreas Schockenhoff :“Kushtet për Kosovën i kanë ditur të gjithë”

Politikani gjerman Dr. Andreas Schockenhoff ka deklaruar se partia e tij, CDU, nuk pret që Serbia ta njohë Kosovën para mbarimit të bisedimeve për anëtarësim me BE-në, por të arrijë një marrëveshje me të cilën do të rregullohej bashkëpunimi ndërfqinjësor.

Schockenhoff gjatë një vizite në Beograd në javën e kaluar ka paraqitur kushtet që Serbia duhet të përmbushë për të marrë mbështetjen e partisë gjermane në pushtet për nisjen e bisedimeve për anëtarësim.

Ai i ka thënë agjencisë serbe të lajmeve, Beta, se nuk “ka thënë asgjë, që nuk është ditur më parë nga bashkëbiseduesit në Beograd”.

“Të njëjtën porosi ua kemi dhënë edhe qeverisë së kaluar, sikurse edhe parlamentit të atëhershëm. Ajo që është e rëndësishme dhe e qartë, është që vendimin për nisjen e dialogut për anëtarësim në BE e sjell Këshilli i Ministrave të BE-se dhe këtë njëzëri, ndërsa Gjermania lidhet me vendimin e Bundestagut. Prandaj, nuk është vendimtare çka propozon BE-ja, por, për këtë duhet të pajtohet edhe Bundestagu”, ka thënë parlamentari gjerman Schockenhoff.

Në javën e kaluar Schockenhoff, ka theksuar se partia e tij në Parlamentin e Gjermanisë, do të insistojë, që Gjermania të marrë qëndrim, që Beogradi të nënshkruajë një kontratë obliguese me Prishtinën, për vendosjen e marrëdhënieve të mira fqinjësore.

Ai i ka bërë ftesë Beogradit për “ndikim aktiv” në heqjen e strukturave paralele dhe aparatit të sigurisë në pjesën veriore të Kosovës, dhe po ashtu ta ndalë financimin, duke theksuar se kontributi i Beogradit për veriun e Kosovës, sipas njohurive gjermane, është “më i madh se kontributi, të cilin Serbia e merr nga BE”.

Në mesin e shtatë kushteve, politikani gjerman ka theksuar qartësimin e asaj se çka ka ndodhur në vitin 2008 në Beograd, kur në shenjë proteste është djegur Ambasada e Gjermanisë.

Tjetër kusht do të jetë kërkesa nga Serbia për sinjale të qarta “në drejtim të pajtimit në rajon”.

Po ashtu, do të kërkohet edhe realizimi i plotë i rezultateve të dialogut të deritashëm ndërmjet Prishtinës dhe Beogradit.

Madeleine Albright, do të shpallet qytetare nderi e Mitrovicës

Komuna e Mitrovicës dhe shoqata “Miqtë e Amerikës”, vazhdojnë bashkërendimin e aktiviteteve për të realizuar projektin që ish-sekretarja amerikane e Shtetit, Madeleine Albright, të shpallet qytetare nderi e Mitrovicës.

Për këtë u bisedua në takimin e kryetarit të Komunës së Mitrovicvës, Avni Kastrati, i cili i shoqëruar nga nënkryetari, Riza Haziri, priti në takim kryetarin e Shoqatës “Miqtë e Amerikës”, Agim Rexhepi. Ky propozim është bërë pikërisht nga kryetari i Shoqatës “Miqtë e Amerikës”, Agim Rexhepi, para disa muajsh në Mitrovicë.

Tani janë bërë hapat e parë në këtë drejtim, në mënyrë që të nderohet kjo figurë dhe ky personalitet që ka bërë shumë për çështjen e Kosovës.

Kryetari Kastrati ka shprehur respektin për punën e kësaj shoqate si dhe ka mirëpritur propozimin që ish-sekretarja Albright të shpallet qytetare nderi e Mitrovicës. Ai tha se kjo do të ishte nder për Mitrovicën dhe për Kosovën në përgjithësi.

Ai tha se ky propozim do të shtrohet në të gjitha strukturat komunale, në mënyrë që të procedohet me kohë.

“Ne do të angazhohemi që ky propozim të jetësohet, meqë kontributi për Kosovën i znj. Albright është shumë i madh”, theksoi ai.

Ndërsa, kryetari i Shoqatës “Miqtë e Amerikës”, ka shprehur respektin për mikpritjen dhe mbështetjen e ofruar nga drejtuesit komunalë.

Ai u zotua për angazhim të gjithanshëm që të bëhet realitet ideja që zonja Albright të shpallet qytetare nderi e Mitrovicës.

Në takim ai ka folur edhe për aktivitet tjera të shoqatës që ai drejton, e që ka për qëllim ruajtjen dhe avancimin e miqësisë së Kosovës me SHBA-në.

Sekretarja amerikane e shtetit, Hillary Clinton, do të qëndrojë javën e parë të tetorit në Kosovë.

Më 4 tetor 2012,Sekretarja amerikane e shtetit, Hillary Clinton, do të qëndrojë javën e parë të tetorit në Kosovë,e cila do të takojë krerët e vendit dhe do të marrë pjesë në një konferencë për fuqizimin e rolit të gruas. Vizita e sekretares Clinton përkon me kohën kur planifikohet të caktohen temat e takimit në procesin e rifillimit të bisedimeve me Serbinë.

Ministria e Punëve të Jashtme e Kosovës, raporton Radio Kosova, ka konfirmuar se Sekretarja amerikane e Shtetit, Hillary Clinton, pritet t’i japë mbështetje fillimit të bisedimeve me Serbinë gjatë vizitës që do t’i bëjë Kosovës. Ajo do të qëndrojë më 4 tetor në Kosovë dhe do të t’i takojë krerët e shtetit.

Sekretarja Clinton pritet të flasë gjithashtu edhe në një konferencë për rolin e grave, e cila organizohet nga presidentja Atifete Jahjaga.

Zëdhënësi i Presidentes, Arbër Vllahiu, ka thënë se gra të ndryshme të botës do të jenë pjesëmarrëse, por nuk ka konfirmuar pjesëmarrjen e sekretares amerikane.

Ndërkohë në Qeveri është konfirmuar se së bashku me sekretaren Clinton do të jetë edhe ish-sekretarja e Shtetit, Madline Albrait.

Vizita e Clinton vjen pas pak ditësh kur presidenti Obama do të mbledh në një darkë, javën e ardhshme, diplomatët perëndimorë, në mesin e së cilëve do të jetë edhe presidentët e Kosovës dhe Serbisë.

Shtysa për dialogun e presidentëve të Serbisë dhe Kosovës pritet të marrin edhe në takimet, që do të bëhen gjatë punimeve të Asamblesë së Përgjithshme të OKB-së, e cila do të fillojë po ashtu javën e parë të tetorit.

Ndërkohë që tashmë nga Brukseli gjithnjë e më tepër janë intensifikuar kërkesat për rifillim të dialogut. Këtë herë pritet që dialogu të përfshijë nivele të larta të udhëheqjes në Kosovë dhe Serbi .

“Krimi dhe Përdhunimi serb kundër femrës shqiptare në Kosovë 1997-1999”

Çdo krijues i cili ulet e shkruan një libër për të vërtetat e Kosovës, ai vendos një gur të çmuar për ndriçimin e kujtesës për brezat e tashëm dhe brezat që vijnë për të dëshmuar vetëm të vërtetën, e librit të veprimtares  së njohur shqiptare z.Naxhije Doçi me titull "Krimi dhe përdhunimi serb kundër femrës shqiptare në Kosovë 1997-1999".

Libri “Krimi dhe Përdhunimi serb kundër femrës shqiptare në Kosovë 1997-1999” dëshmon një rrëfim autentik që saktësohet me personazhe konkrete. Lexuesi do të ndjejë një dhembje të pafund për fatin e shumë familjeve, nënave dhe bijave, që janë përballur me përdhunimin.

Në të janë përfshirë rrëfime të nënave, grave dhe vajzave shqiptare që janë përdhunuar gjatë luftës së fundit në Kosovë, fakte të dokumentuara për ngjarjet gjatë asaj periudhe.

Libri “Krimi dhe Përdhunimi serb kundër femrës shqiptare në Kosovë 1997-1999”, është një histori e dokumentuar, që pasqyron gjithë tragjedinë dhe vuajtjet gjatë asaj periudhe.

Autorja e mirënjohur Naxhije Doçi ka filluar të mbledhë shënimet në terren gjatë viteve 1997-98, kur edhe bëheshin ofensiva të tmerrshme serbe në tërë Kosovën. Rrëfimet e femrave në këtë libër flasin për ngjarje të tmerrshme reale, që ato i kanë parë dhe i kanë përjetuar mbi vete dhe mbi krijesat më të dashura të tyre. Personazhet femra në këtë libër janë të moshave të ndryshme, ndërsa rastet që ato tregojnë janë rrëqethëse.

Botimi i këtij libri është mbështetur nga Ministria e Drejtësisë dhe Kuvendi Komunal i Prishtinës.

Ka shkruar tri vepra shkollore dhe një vepër për krimet e luftës në Kosovë me titull “ Shpirti i dërmuar “ - Dhuna serbe ndaj femrës shqiptare në Kosovë -1997-1999, botuar më 2002
- Në muajin tetor të vitit 2009 botoi librin voluminoz "Destan Bajraktari - folklorist, letrar dhe atdhetar".
Libri “Krimi dhe përdhunimi serb kundër femrës shqiptare në Kosovë 1997-1999”. Prishtinë, 2011, është libri i gjashtë.
Qendra Kombëtare e Poetëve, Shkrimtarëve dhe Artistëve "Gjakova",  më dt. 21 shtator 2012, me fillim në ora 12,00, në Amfiteatrin e madh të Bibliotekes Kombëtare dhe Universitare te Kosovës, organizohet promovimi i përmbledhjes me poezi "Kohë flakadanësh të lirisë" të autores Naxhije Doçi.

Zonja Naxhije Doçi shkruan herë pas herash poezi, udhëpërshkrime dhe fejtone për gratë në aktivitete kombëtare, etj.



(Flori Bruqi)


-------------------------

Libri i Naxhije Doçit “Krimi dhe përdhunimi serb kundër femrës shqiptare në Kosovë”

Nga: Mevlyde Mezini Saraçi

Vështrim “Çasja e hulumtimit të krimeve të luftës ndaj gruas shqiptare nga okupatori shtetëror serb dhe dëshmitë me fakte

Me rastin e promovimit të librit me titull “Krimi dhe përdhunimi serb kundër femrës shqiptare në Kosovë” të autores Naxhije Doçi

Edhe një dekadë pas luftës në Kosovë ende po kullojnë plagët, të cilat është shumë vështirë të shërohen pa ndëshkimin e kriminelëve serb, të cilët me bekimin e aparatit shtetëror serb ushtruan krime dhe perdhunime në mënyrë sistematike deri në përfundimin e luftës. Krimet dhe përdhunimet që u përdorën si mjet lufte, për realizimin e synimeve të shtetit okupator serb, janë ç’njerëzore, kanibale, të ulëta, të tmerrshme dhe të dënueshme.

Gruaja si shtyllë e familjes dekada me rradhë u përballë me të gjitha peripetitë e kohës; si nga mungesa e lirisë së lëvizjes, mungesa e kushteve elementare për jetë, shkelja sistematike e të drejtave të njeriut, me theks të vecantë të fëmijëve, dhuna mbi anëtarët e familjes, helmimet e nxënësve, mungesa e hapësirave shkollore, mungesa e kujdesit shëndetësorë, largimi nga puna, rrahjet maltretimet, marrjet në biseda informative, arrestimet, burgosjet dhe dënimet nga më të ndryshmet.

Por krimet e rënda që i bëri shteti serb përmes policisë, ushtrisë, paramilitarëve janë të paimagjinueshme. Vrasja e djemve dhe burrave në mënyrë masive duke i zhdukur edhe pa gjurmë, përdhunimi i vajzave dhe grave në prani të fëmijëve dhe të familjarëve, është më shum se një gjenocid mbi popullatën shqiptare.

Zonja Naxhije Doçi, autorja e këtij libri, një intelektuale, profesoreshë dhe veprimtare e dalluar e çështjes kombëtare, e cila që në fëmijërinë e hershme u përball me dhunën policore dhe burgosjet që i bëheshin atë kohë babait të saj, intelektualit, atdhetarit të shquar, shkrimtarit dhe profesorit, Destan Bajraktari, e më vonë së motrës, veprimtares së shquar Znj.Sanije Alijaj, e më pastaj marrja në pyetje dhe biseda informative e vet autores së këtij libri, ishin arësye të forta që jo vetëm të rradhitet në ballë të aktiviteteve e veprimtarive të shumta politike dhe humanitare, por edhe në mbledhjen e dëshmive faktografike në vendin e ngjarjes, duke vizituar familjet e dëmtuara për të ndarë dhembjen me ta, por edhe për të ndriçuar dhe pasqyruar të vërtetën mbi krimet e bëra nga serbët.

Titulli i librit tregon se në brendi përshkruhen ngjarje të tmerrshme, që përjetoi gruaja shqiptare. Këto përshkruhen me një përkushtim duke ruajtur gjithmonë rrëfimin origjinal, por të pasqyruara qartë, me fjali të ndërtuara mirë, me një gjuhë të pastër dhe të kuptueshme, që herë herë të ngjan se bashkëbiseduesit i ke përballë.
Këto rrëfime janë rrënqethëse, të artikuluara dhe thërrasin ndërgjegjen e drejtësisë që të ndëshkohen sa më parë fajtorët.

Vet ballina flet për rrëfimet që gjenden në brendinë e këtij libri, ndërkaq që në kopertinën e pasme është një dokument i shkruar, një faksimil i Nënës Pashke , nga Korenica, e cila dha dëshmi sa ishte gjallë për marrjen peng të djemve të saj, por edhe për krimet mbi popullatën në regjionin e Rekës së Keqe.

Dëshmia dhe faksimili mbetën si dokument, ndërsa Nëna Pashke u flijua, në shenjë proteste për vonesat e zbardhjes së fatit të djemve dhe burrave të zhdukur, por edhe për vonesat në identifikimin e kriminelëve dhe daljen e tyre para drejtësisë për të marrë dënimin e merituar.

Personazhet e këtij libri dhe jo vetëm të këtij, por edhe të librit të parë të Naxhije Docit, me këtë tematikë, janë personazhe që paraqesin dëshmi të cilat i kanë parë dhe përjetuar vet, e që janë marrë nga vendet e ndryshme të Kosovës.

Këto janë disa nga mijëra raste, por që kanë mesazhin se dhuna

ka qenë e tmerrshme dhe sistematike.

Duke shpresuar se më në fund, drejtësia do ta thotë fjalën e vet mbi bazën e këtyre dëshmive dhe të tjera, është koha që edhe institucionet e vendit të kenë parasysh që raste të tilla të mbrohen me ligj dhe të kenë status të
veçantë, sepse vetë përjetimi i këtyre krimeve të rënda ua ka bërë më të vështirë jetën individëve dhe familjeve të tyre.

Uroj që ky libër të lexohet, të studiohet, të analizohet dhe të dërgohet në vendin e duhur ku këto dëshmi do të shfrytëzohen për dënimin e personave që kanë kryer krime të të gjitha llojeve.

Autoren e përgëzoj për këtë botim, për durimin e madh dhe përkushtimin që ka pasur për të dëgjuar rrëfimet e dhembshme dhe për kohën që u ka ndenjur pranë viktimave të terrorit dhe krimit serb.

http://prishtinapress.info/libri-i-naxhije-docit-krimi-dhe-perdhunimi-serb-kunder-femres-shqiptare-ne-kosove/

Kush është z.Naxhije Doçi

Funksionet në Kuvendin e Kosovës
Grupi Parlamentar i LDK-së
Partia:Lidhja Demokratike e Kosovës (LDK)
Të dhëna personale:E lindur më 10.12.1945
E martuar, tre fëmijë
Arsimimi:
Fakulteti Filozofik- Gjuhë dhe letërsi shqipe
Aktivitete dhe funksione, të tanishme apo paraprake
Anëtare e LDK që nga themelimi
Anëtare e kryesisë së Degës së IV të LDK në Prishtinë, që nga viti 1990 dhe nënkryetare e kësaj Dege prej viti 1992-1997
Anëtare e Kryesisë së Forumit të Gruas të LDK
Sekretare e përgjithshme e Forumit të Gruas të Lidhjes Demokratike të Kosovës, që nga viti 2000
Anëtare e Kryesisë të Degës II - LDK – Prishtinë, që nga viti 2002.
Kryetare e Degës Dytë të FG –LDK-Prishtinë, që nga viti 2004
Anëtare e Këshillit të Përgjithshëm të LDK
Anëtare e Këshillit të Përgjithshëm të Forumit të Gruas të LDK
Shefe për Arsimin Parashkollor dhe për Shkollat Fillore të Komunës së Prishtinës
Anëtare e Grupit të Grave Parlamentare
Ka shkruar tri vepra shkollore dhe një vepër për krimet e luftës në Kosovë me titull “ Shpirti i dërmuar “ - Dhuna serbe ndaj femrës shqiptare në Kosovë -1997-1999, botuar më 2002
E ka në përfundim librin tjetër me të njejtën temë
Shruan herë pas herash poezi, udhëpërshkrime dhe fejtone për gratë në aktivitete kombëtare, etj.
Gjuhë tjetër përveç amtares
Serbisht ( me gojë e me shkrim )
Turqisht ( komunikim )
Anglisht ( niveli dytë )

Pritet furtunë arrestimesh në Komunën e Prishtinës dhe në institucione qendrore

Vazhda e arrestimeve do të vazhdojë edhe me disa zyrtarë të lartë të komunës së Prishtinës, nën dyshimin për shpërdorim të detyrës zyrtare dhe korrupsion. Muaji shtator do të jetë i nxehtë edhe për deputetë të Kuvendit të Kosovës, si dhe zyrtarët qeveritar
Vala e arrestimeve ndaj zyrtarëve të lartë shtetërorë dhe komunalë pritet të vazhdojë edhe më tej gjatë kësaj jave dhe atyre në vazhdim. Institucionet kosovare pas mbikëqyrjes së pavarësisë duhet të ndërmarrin hapa për të treguar angazhimin e tyre në shtytjen e proceseve demokratike, zbatimin e reformave në të gjitha institucionet, e veçanërisht zhdukjen e korrupsionit dhe krimit të organizuar. Gazeta “Kosova Sot” ka mësuar se arrestimi i kryesuesit të Kuvendit Komunal, Sami Hamiti, nuk do ta mbyllë maratonën e arrestimeve të EULEX-it për zyrtarët komunalë të Prishtinës. Sipas burimeve të gazetës, vazhda e arrestimeve do të vazhdojë edhe me..