Koalicioni LDK-AAK-Nisma+VV, është akti më sublim politik në 15 vitet e fundit..!

Shkruan: Rexhep ELEZAJ

Edhe pse hiç më larg se para 15 viteve ishim popull i robëruar, tani më gjendemi në një fazë të re të vetë jetës dhe organizimit tonë shoqëroro-politik, e si rrjedhojë edhe në rrethana krejt tjera të angazhimit tonë politik dhe nacional si shoqëri dhe si shtet. Rrethana për të cilat nuk mund të thuhet se ishin krejt në favor të shtet ndërtimit të Kosovës në masën që e duan shqiptarët, sepse shkaqet për ngecjen tonë kolektive, mbase janë të shumta, por kryesisht fajin për këtë e kanë subjektet dhe liderët e gjertanishëm politik.

LANI

Prandaj, duke ia hedhur një shikim retrospektiv ngjarjeve tragjike të fundshekullit 20-të, çdo patriot dhe atdhetar shqiptar i cili e donë Kosovën, duhet ta përshëndes dhe ta mbështes pa rezervë koalicionin dhe marrëveshjen e arritur midis katër subjekteve politike (LDK-AAK-NISMA-VV) e nënshkruar ditë më parë..!

Ngase, është hera e parë në historinë e re të Kosovës, madje edhe në të vjetrën, që katër parti të mëdha politike të merren vesh si dhe të pajtohen politikisht për ta udhëhequr dhe qeverisur vendin bashkërisht, duke i koordinuar paraprakisht veprimet për mënyrën e qeverisjes, e që në zhargonin politik njihet si koalicion ndërpartiak. Këtë hap shumë pozitiv për Kosovën të cilin e kanë ndërmarrë këto katër subjekte partiake, në thelbin e politikës shqiptare ka një vlerë të madhe (ndoshta edhe historike), sidomos kur është në pyetje çuarja përpara e kauzës sonë ende të pa zgjidhur kombëtare, meqë vetëm të unifikuar në qëndrime dhe të bashkuar në synime mundemi ta realizojmë ëndrrën shekullore për një shtet etnik dhe të bashkuar shqiptar në Ballkan dhe Evropë.

Nisur pra nga parimet dhe rregullat e demokracive të avancuara perëndimore, ne si shoqëri më sistem politik parlamentar dhe shumë partiak, asimetrik më rendet dhe sistemet shoqërore të vendeve euro-perëndimore, unifikimi i pikëpamjeve dhe qëndrimeve politike midis katër subjekteve partiake në fjalë, është pa dyshim, akti më sublim që është bërë në 15 vitet e fundit në skenën politike kosovare, duke marrë parasysh faktin se ende nuk janë realizuar të gjitha objektivat tona politike dhe kombëtare, siç është sovraniteti i plotë në gjithë territorin e Kosovës si dhe çështja e hapur e bashkimit kombëtar.

Andaj, qoftë si koalicion në kuptimin e tij klasik, qoftë si bashkërenditje e forcave politike për ta çuar një popull, deri dje të robëruar, drejt jetësimit të objektivave të tij nacionale, gjithnjë në harmoni më proceset politike dhe demokratike në Evropë, dhe meqenëse procesi i integrimit të popujve në Bashkimin Evropian (BE) nuk i përjashton aspiratat tona të pareshtura për t’u bashkuar si komb në një shtet etnik dhe natyral, duhet të ndjehemi tejet të lumtur kur i shohim faktorët politik shqiptar të bashkuar. Kështu që, i gjithë ngërçi politik tejet i dëmshëm për Kosovën të cilin për qëllime ogurzeza po e mbanë peng PDK-ja më kryetarin e saj z. H. Thaçin në krye më shumë se tre muaj rresht, flet qartë se Kosova ka pasur nevojë imediate për bashkimin e forcave kryesore politike, siç është tani koalicioni LAN+VV, i cili përveç që si synim primarë duhet ta ketë shtet ndërtimin e mirëfilltë të vendit, ai e ka për obligim kombëtar zhveshjen sa më para të H. Thaçit dhe partiakëve të tij nga pushteti dhe keqqeverisja, dhe kjo si një detyrë e shenjtë kombëtare, më qëllim për t’ia ndalur hovin rrënimit të më tejmë të shtetit dhe të shoqërisë sonë, duke e konstituuar qysh nesër Parlamentin dhe më pas edhe formimin e qeverisë së re. Sepse, duke pranuar në vazhdimësi diktatet dhe manipulimet politike dhe kushtetuese të pushtetarëve të deritanishëm, pashmangshëm Kosova do hynë në vorbullën shumë të rrezikshme politike më pasoja të rënda për të ardhmen e shtetit dhe kauzës tonë kombëtare. Kjo detyrë në rënd të parë bie mbi deputet e zgjedhur nga populli më 8 qershor 2014, të cilët në asnjë mënyrë nuk duhet të lejojnë që një katandisje e këtillë të ndodhë në seancën e nesërme konstitutive të Parlamentit të Republikës së Kosovës. Sepse, njëherë e përgjithmonë duhet të lirohemi si shoqëri dhe si shtet për t’i dhënë fund logjikës gllabëruese dhe shkatërruese e cila po i degradon çdo ditë e më shumë vlerat dhe sakrificat kolektive për liri dhe pavarësi të popullit shqiptarë në Kosovë, siç ishte mentaliteti politik i deritanishëm..!?

RAMUSH HARADINAJ-KRYEMINISTËR, NJERIU QË I DUHET KOSOVËS!?…

Shkruan: Naim KELMENDI

1.


Ramush Haradinaj është njeriu që u sfidua në luftën çlirimtare dhe doli ngadhënjyes. Në luftën çlirimtare, ishte vlera e asaj lufte, ishte mbase dhe ikona e saj, i paepur deri në fund të luftës dhe çlirimit definitiv të vendit. Ai bëri luftën e pastër për liri dhe pavarësi të Kosovës. Ai është njeriu që u sfidua edhe në paqe dhe doli i suksesshëm.

Ai është njeriu që u sfidua edhe para gjykatës ndërkombëtare në Hagë dhe doli i pastër dhe mbrojtës i vlerave të luftës çlirimtare. Edhe pas luftës u sfidua në proceset demokratike dhe të shtet ndërtimit dhe doli po ashtu u suksesshëm.

Në të gjitha këto sfida ai ka dalë fitimtar dhe i pastër. Kjo e ka krijuar edhe formatin dhe primatin e tij prej njeriut të sfidave dhe i paepur përballë vështirësive, rrethanave, proceseve politike e demokratike në vend, por si gjithmonë fitimtar në fund.





Është ky Ramush Haradinaj, njeriu që i duhet për kryeministër shtetit të Kosovës.

2.



Sado që përfolja se Blloku pas zgjedhor, në këtë rast LDK-ja, ia ka dhënë pëlqimin AAK-së që Ramush Haradinaj të jetë i nominuar për kryeministër, dhe me aq pak vota nga zgjedhjet në krahasim me subjektet e Bllokut pas zgjedhor LDK, AAK, Nisma + Vetëvendosja, është vështrim nga një prizëm i gabueshëm.





 Kosova në këto rrethana politike, ka nevojë për njerëz në krye të qeverisë që t’i çojnë proceset përpara, sidomos ato drejtë integrimeve evropiane, por për njerëz me kredibilitet dhe integritet siç është z.Ramush Haradinaj.

Një qeveri më në krye premierin Ramush Haradinaj, është më se e sigurt se do të jetë e suksesshme dhe e pranuar edhe nga ndërkombëtarët dhe miqtë e Kosovës, ngase vetë premieri në krye të kësaj qeverie është njeriu i sfiduar në të gjitha proceset dhe rezultativisht gjithmonë i konfirmuar si njeriu ngadhënjyes pas të gjitha sfidave të kohës përgjatë tëra proceseve, dhe krejt këtë e bëri në emër dhe për të mirë të Kosovës.

3.

Edhe në njëqind dieshin e kohës para se të shkonte në Hagë ku iu përgjigj kësaj gjykate ndërkombëtare të drejtësisë, kur ishte në krye të qeverisë së Kosovës, ai u tregua u suksesshëm, dhe sikur të shkonte Kosova që atëherë me dinamikën e sukseseve do të ishte shumë më afër të të gjitha integrimeve evropiane, por ikona djeshme e luftës çlirimtare, duke qenë i bindur në pastërtinë e kësaj luftë, ai do ta ndërpres detyrën e qeverisjes në krye të Qeverisë dhe do të ballafaqohej me drejtësinë ndërkombëtare prej nga del i pastër dhe ngadhënjyes.

Prandaj qeveria me në krye të saj kryeministër Ramush Haradinaj, predispozon një qeveri të suksesshme në qeverisje, predispozon një qeveri stabile, predispozon një qeverisje të mirë dhe të pa korruptuar, predispozon luftimin e krimit të organizuar që ka lëshuar rrënjë në të gjitha poret e jetës, predispozon luftimin e korrupsionit, e që deri më tash ka arritur në të gjitha poret e jetës sonë shtetërore, deri në krye të shtetit.

 Pra, qeveria me në krye Ramush Haradinaj si kryeministër predispozon po ashtu luftën kundër papunësisë, predispozon besueshmërinë dhe pastërtinë e qeverisjes.



Prandaj qeveria me kryeministër Ramush Haradianj predispozon dhe një rezultat në ecjen dhe ngritjen e autoritetit të shtetit në qenësinë e tij si shtet, predispozon hapa më të shpejtë në integrimet e mëtutjeshme të shtetit të Kosovës për në Bashkimin Evropian, predispozon hapa më të shpejtë në liberalizimin e vizave për Koosvën, predispozon zhvillim më të shpejtë ekonomik të Kosovës.




 Dhe krejt kjo nga njeriu me kredibilitet njerëzor, luftarak, liderist, etj.


Pra, mbeti ikona e luftës çlirimtare të Kosovës, mbeti lideri i suksesshëm politik, dhe mbetet po ashtu njeriu i shtetit dhe për shtetin sesa për pushtetin. Këto janë faktet dhe argumentet me të cilat Ramush Haradinaj-kryeministër i duhet shtetit të Kosovës.



I vetmi tash për tash mbetet z.Ramush Haradinaj për kryeministër i qeverisë së Kosovës, shpresë për ta rikthyer shtetin në ecjen dhe binarët e tij të duhur, dhe për t’ia kthyer dinjitetin e humbur nga këto vite të keq-qeverisjes (PDK-së) së korruptuar e të degraduar, e që këtë faturë deri më tash po e paguan qytetari i Kosovës.






*********************

Vladet Cimili krijon vepra arti me fije floku

Disenjatori dhe frizeri Valdet Cimili me flokë të klientëve të tij ka punar 15 vepra dhe ka hap një ekspozitë për rrethin e tij të ngushtë në sallonin e tij në Prishtinë

Entela Sahiti

Fotografitë: Ridvan Slivova

Floku nuk shërben vetëm për tu drejtuar apo dredhur sa për rregullimin e një frizure. Këtë të paktën na e dëshmon kreatori Valdet Cimili i cili përmes flokëve ka krijuar vepra të ndryshme arti. Ai ka arritur t`i punojë 15 vepra me flokë të klientëve të tij të ndërthurura me fije të prera dhe të grimcuara.

Cimili këto punime i ka ekspozuar për një rreth të ngushtë në sallonin e tij në Prishtinë,me qëllim që nxënësit e tij të jenë më të pasionuar pas flokut dhe të njihen me vlerën dhe mundësitë që ofron ai.
“Floku nuk është vetëm ta shkurtuar dhe hedhur në mbeturina, me të mund të bëhet edhe arti vet, për këtë arsye unë kam marr një iniciativë duke u bazuar në iluzionin tim dhe së bashku me nxënës kemi krijuar afër 15 vepra nga fijet e flokut’’- tha për Kultplus Valdet Cimili.

Valdet Cimili, artisti

Këtë ekspozitë ai e ka quajtur ekspozita Delikate, sepse fijet e flokut janë bërë si grimca biberi dhe janë montuar në një formë të atillë ku në fund është shfaqur vepra. Ato flokë të shkurta të përziera edhe me të gjata janë prerë, drejtuar, shkallëzuar e ngjyrosur dhe në fund me dashuri dhe entuziazëm është formuar ajo që është kërkuar.

Ekspozita Delikate ka qenë me dy pjesë, me flokë të grimcuara dhe me flokë të gjata. Pjesa e parë ka përfunduar por pjesa e dytë nuk është arritur të bëhet, për shkak mungesës të fijeve të gjata, rrëfen Cimili.

“Pjesa e dytë ka pas për qëllim që ai fustan të ndërtohet me fije të gjata floku , ku një vajzë e cila ka të veshur atë fustan do ta përdordorte për tri raste, në mëngjes për të kryer pazaret, për darkë dhe në një sekuencë ku ajo hyn në banjo dhe fustanin e gjatë e shndërron në fustan më ekstravagant për një ndej diskoteke”-shtoi më tej Valdet Cimili.

Kjo ekspozitë do të kishte 10 fustane kokteji , por për shkak të vonesave të sponsorëve dhe mungesës të flokëve të gjata është anuluar. Interesantja e punës së këtij artisti është se të gjitha veprat pas ekspozimit janë prishur dhe përsëri janë kthyer vetëm në flok të prera, kjo gjë është bërë për shkak korrektësisë mes raporteve që ka ndaj klientëve.

Disenjatori njëherësh frizeri Cimili ka punuar edhe një çantë për prodhuesin e çantave Xhavit Novolani e cila është realizuar në atelienë e disejnatorit Xhavit bag’s dhe ka pasur një garanci për 30 ditë që të mos tjetërsohej.

“ Çantën për Xhavitin e kam punuar në kuadër të ekspozitës Delikate, dhe është punuar me flokë të shkurtra dhe të grimcuara dhe kam garantuar për 30 ditë funksion pa lëvizë një fije floku, por ajo çantë është edhe sot funksionale’’ – tregoi Cimili. Ai tregoi gjithashtu se kjo çantë e punuar në këtë mënyrë është unikate në Evropë.

Përveç këtij aktiviteti, Valdet Cimili ka bërë edhe një ekspozitë të quajtur 3D, në të cilën ka ekspozuar vepra të punuara nga floku në mënyre tre-dimensionale, që në përshtypjen e parë nuk mund të dallohej se me çfarë materie është punuar. Këto punime kanë qenë të ekspozuara vetëm për ish gazetën ‘’Konak” .
Ky artist flokësh inspirimin e merr nga iluzionet e tij personale dhe përmes llakut dhe ngjyrave flokun e shndërron në atë që nuk mund ta kuptosh që është vet floku.

E ardhmja e Valdet Cimilit do të jetë projekti i radhës që do të bëhet me flokë të manipuluara, frizura të mëdha të cilat integrohen pastaj dhe vendosen mbi kokë e quajtur ‘’Poupée” që nga frëngjishtja i bie kukull. Në këtë projekt femra do të transferohet totalisht, ku frizura do të jetë sa gjysma e trupit dhe pastaj buzët do të vizatohen në një mënyrë më të ngushtë dhe sytë do të zmadhohen , që të duket tamam si kukull”- tregoi ekskluzivisht ai.

Të gjitha këto vepra vijnë në pah prej profesioneve që zotëron ky profesionist i diplomuar për dizajn mode dhe i shkolluar për frizer. Këto të dyja të bashkuara dhe të shkrira në një , tregojnë të veçantën që nuk është punuar ndonjëherë nga dikush në Kosovë.

KultPlus.com

Stambolli mundësi e mirë për promovimin e artit kosovar

“Për çdo artist është shumë me rëndësi që të krijojë kontakte të reja dhe të ekspozojë punën ,sidomos jashtë vendit”, ka deklaruar për media piktorja Hyrie Shaqiri.

Artistja kosovare Hyrie Shaqiri ka marr pjesë në një koloni artistike ndërkombëtare në Stamboll.Piktorja nga Gjilani është prezantuar krahas 40 artistëve të tjerë nga vende të ndryshme të botës, të cilët ishin mbledhur në qytetin turk.

 Shaqiri shpalos rrëfen për përvojën e saj. Ajo thotë se në këtë aktivitet ndërkombëtarë është prezantuar me tri punime në pikturë.

“Tematika ka qenë e hapur për secilin artist. Unë kam punuar peizazhe. Në këtë aktivitet kanë marr pjesë edhe kolegë të tjerë nga Shqipëria dhe Maqedonia si Naim Spahiu, Refki Gollopeni, Admir Pervathi, Eris Bushati”, theksoi Shaqiri.

Shaqiri deklaroi për KultPlus se pjesëmarrja në një aktivitet të tillë ndërkombëtar është mjaftë e rëndësishme për të pasi hap shtigje të reja në karrierë si dhe mundëson vënien e kontakteve me artistë të ndryshëm.

“Ishte një eksperiencë e mirë. Po ashtu na u dha mundësia që ta ekspozojmë artin që e bëjmë ne si dhe krijuam kontakte të shumta me artistë”, tha Shaqiri.


Përveq promovimit të punës së saj, piktorja nga Kosova shpreson se përvoja e saj në Stamboll do të ndikojë që puna e saj të prezantohet edhe në vende të tjera të botës.

Kurator i kolonisë artistike në Stamboll ishte z.Kani Kaja nga i cili Hyrie Shaqiri thotë se e kishte ftesën për pjesëmarrje në këtë eveniment që është mbajtur prej 22 deri 31 gusht. Hyrie Shaqiri ka studiuar në Fakultetin e Arteve në Prishtinë.

Aktori shqiptar Kasem Hoxha prezantohet në rolin e Max-it ,në filmin “Das Program”, me regji të Till Endemann që do të prezantohet në dy pjesë në kanalin televiziv shtetërorë të Gjermanisë ARD.

Kanë filluar xhirimet e filmit “Das Program”, me regji të Till Endemann që do të prezantohet në dy pjesë në kanalin televiziv shtetërorë të Gjermanisë ARD. Artisti shqiptar, Kasem Hoxha që është njëri nga aktorët e përfshirë në këtë film i cili  xhirohet në Hamburg, Munih dhe Tirol të Austrisë dhe pritet të përfundojnë në nëntor

Aktori shqiptar, Kasem Hoxha që po bën karrierë filmike në Gjermani tashmë ka filluar xhirimet për një film artistik i cili do të transmetohet në kanalin televiziv shtetërorë të Gjermanisë ARD, në dy pjesë me nga 90 minuta.

“Filmi do të titullohet: "Das Program", ku unë luaj rolin e Antagonistit! Është një Thriller-Aksion-Drama, ku bëhet fjalë për një dëshmitar, i cili është në programin e mbrojtjes nga policia”, ka thënë  Kasem Hoxha.

“Ky person na dëmton me dëshminë e tij në polici të gjithë neve të grupit antagonist, pra ne jemi në kërkim të vazhdueshëm dhe kjo më është besuar mua, për të gjetur mënyrën për eliminimin e këtij dëshmitari, ku edhe komprometimet deri ne "bërthamë", të policisë nuk do të kursehen”, ka zbërthyer Hoxha rolin e tij në këtë film. Ai më pas ka shtuar se në këtë projekt filmik ka aktorë të shkëlqyeshëm që janë pjesë e “Das Program”, ku antagonistët e këtij filmi merren me larjen e parave në mes Gjermanisë dhe Luxemburgut. .

Ai më pas ka thënë se qershia mbi tortë e këtij projekti është se regjisor i këtij filmi është një ndër regjisorët më të talentuar në Gjermani,Till Endemann dhe se filmi ku Kasem Hoxha prezantohet në rolin e Max do të xhirohet në Hamburg, Munih dhe Tirol të Austrisë. Xhirimet e këtij filmi pritet të përfundojnë në nëntor.

“Adrenalinë” emisioni që sjell kulturën e alpinizmit

Besart Shyqri Galica, autor i emisionit “Adrenalinë” , ka thënë për KultPlus se ky emision vjen në bashkëpunim me Klubin Alpin “Dardania”, nga Prishtina, dhe që për synim kanë promovimin e kulturës sportive të alpinizmit si dhe të vendeve të cilat janë mjaft atraktive për të bërë alpinizëm



Pas suksesit të emisionit “Hiking21” që është transmetuar plotë dy vjet në RTV21, autor i së cilit ka qenë gazetari Besart Galica, së fundmi ai në facebook ka publikuar edhe disa fotografi gjatë xhirimit të emisionit të tij më të ri “Adrenalinë”, emision ky që ngërthen në vete një kulturë sportive të rrallë dhe ekstreme, alpinizmin.

Fundjava që vjen të gjithë opinionit të gjerë do t’i sjell një nga emisionet më të rralla në vend, ka bërë të ditur për KultPlus autori i emisionit “Adrenalinë”,



 Besart Galica i cili tashmë ka nisur xhirimet e këtij emisioni që janë xhiruar njëri në Grabovc tek vendi i quajtur “Guri i Plakës”, dhe tjetri është xhiruar tek Fakulteti Teknik në Prishtinë tek vendi i quajtur Panorama, që më parë është përdorur nga Forca e Sigurisë së Kosovës.


Ky emision sipas Galicës vjen në bashkëpunim me Klubin Alpin “Dardania”, nga Prishtina, dhe që për synim kanë promovimin e kësaj kulture sportive si dhe të vendeve të cilat janë mjaft atraktive për të bërë alpinizëm.

Përvoja nga bjeshkët, pushtimi i të gjitha majave më të larta të territorit të Republikës së Kosovës, si dhe ato të rajoni e deri në Davos të Svicrës, ka nxitur autorin e këtij emisioni, Besart Galicën që të sjell këtë emision në një koncept mjaft modern.

Klubi Alpin “Dardania”, nga Prishtina dhe autori i emisionit “Adrenalinë”, prodhim i RTV21, kanë gjetur gjuhën e përbashkët, dhe sipas tyre janë bërë bashkë me moton, bashkimi bën fuqinë, në mënyrë që të përcjellin tek gjeneratat edhe këtë kulturë shumë atraktive, sfiduese, me shumë adrenalinë dhe mbresëlënëse.

Tetovë: Edicioni XVIII i Festivalit Ndërkombëtar te Poezisë “Ditët e Naimit”

POETI SEBASTIANO GRASSO - LAUREAT I ÇMIMIT “NAIM FRASHËRI”

Fitues i çmimit të madh "Naim Frashëri" të Edicionit XVIII të Festivalit Ndërkombëtar të Poezisë "Ditët e Naimit" është poeti italian Sebastiano Grasso. Ky është vendim i Jurisë së Festivalit i përbërë nga poeti dhe përkthyesi Visar Zhiti (Shqipëri), Ndue Ukaj (Kosovë) dhe Xhelal Zejneli (Maqedoni). Drejtoria e Festivalit, gjithashtu ka shpalle laureatin e sivjetshëm edhe Anëtar Nderi të Festivalit. Festivali Ndërkombëtar i Poezisë “Ditët e Naimit” do të mbahet prej 16 – 19 tetor 2014, në qytetin e Tetovës.

Kjo u bë e njohur në një Konferencë shtypi të mbajtur më 15 shtator në Qendrën kulturore në Tetovë, nga kryetari i Jurisë së Festivalit, Visar Zhiti dhe drejtori i Festivalit Ndërkombëtar të Poezisë "Ditët e Naimit", Shaip Emërllahu. Laureatë të mëhershëm të këtij festivali janë emra e njohur si: Ismail Kadare (Shqipëri), Desmond Egan (Irlandë), Thomas Tidholm (Suedi), Manlio Argueta (Salvador), Ali Podrimja (Kosovë), Fatos Arapi (Shqipëri), Athanase de Thracy (Bullgari), Lionel Ray(Francë), Abdelatif Laabi (Marok), Eva Lipska (Poloni), Tua Forstrom (Finlandë), Craig Czury (SHBA) etj.
Në edicionin e sivjetëm janë ftuar 40 poetë nga vende të ndryshme të botës si: SHBA, Argjentinë, Kolumbi, Danimarkë, Islandë, Gjermani, Francë, Itali, Poloni, Izrael, Greqi, Turqi, Iran, Kroaci, Slloveni, Bullgari, Serbi, Bosnjë dhe Hercegovinë, dhe poete shqiptare nga Mali i Zi, Shqiperia, Kosova dhe Maqedonia.

Në vazhdim kryetari i Jurisë së Festivalit Visar Zhiti paraqiti arsyetimin për dhënien e çimimit letrar "Naim Frashëri" ku thuhet se " poetit italian Sebastiano Grasso-s i jepet çmimi i madh letrar “Naim Frashëri”, për vargjet e tij të dashurisë, në të cilat lexuesi identifikohet, teksa ato flasin për përditshmërinë. “Klasik” dhe modern në të njëjtën kohë, vepra e tij frymon, larg nga shtirjet letrare, e aftë të shprehë jetën e vërtetë."

 Ai më pas lexoi nje biografi të shkurtër të fituesit, ku theksoi se Grasso eshte kryetar i PEN Qendrës italiane, redaktor i revistes "Koriere de la Sera", profesor universiteti, përkthyes dhe gazetar. Librat e tij te perkthyera në disa gjuhë janë shoqëruar me parathenie të nobelistit portugez Saramago, kandidateve te cmimit Nobel Andonis e Jevtushenko, Mario Luzi etj. Visar Zhiti në fund lexoi edhe deklaraten qe laureati dergoj me rastin e marrjes se cmimit "Naim Frashëri", në të cilën thotë se, " Jam i nderuar te marr nje Cmim kaq prestigjioz, kushtuar Naim Frasherit dhe Ju siguroj pranine time ne Tetove, nga data 16 deri me 19 tetor. Ju falenderoj per lajmin".

Edhe programi i këtij edicioni do të jetë i larmishëm për nga përmbajtja. Në kudër të tij, do të mbahet disa orë letrare, do te hapet nje ekspozite pikturash, do te promovohen libra, do te vizitohen lokalitete kulturore dhe historike etj.

Artan Arsllani

Tetovë, 15 shtator 2015