Kaosi i miliardave

Brikenda  F. Rexhepi

Shumë para janë dhënë për sektorin që do të duhej të mbante nën tension qytetarët. T’i bënte ata aktivë e kërkues. Ta bënte pushtetin frikacak karshi tyre. Sot një protestë kundër korrupsionit nuk t’i mbledhë as 20 veta në një vend. Raportimet e mediave për hajni, dallavere, keqpërdorim, gënjeshtra të njerëzve që na udhëheqin... e irritojnë qytetarin. “Edhe ju mediat veç zi po shkruni”, kjo është fjala që më së shumti e dëgjoj prej tyre, dhe mendoj me vete në çfarë monstrumi jemi shndërruar kështu. Disa madje thonë: “As s’po lexoj gazeta, as s’po dëgjoj lajme... kryt rahat”. Këta janë qytetarët. Kjo është shoqëria e Kosovës së 10 mijë organizatave të shoqërisë civile

Sektori i qytetarëve është po aq, në mos më shumë kaotik se pushteti. Miliardat kanë kaluar nëpër duart e organizatave joqeveritare, të huaja e vendore, që nga paslufta në njëfarë rendi që reflekton kahun nga ka ecur Kosova. Para të mëdha janë dhënë për rehabilitim e rindërtim emergjent në vitet e para, kur organizatat e huaja patën vërshuar vendin. Një periudhë kur humanizmi dhe keqpërdormi i tij kanë ecur dorë për dore. Nuk ka pasur atëherë dhe nuk ka as tash një mekanizëm që do të hetonte gjithë ato muhabete që njerëzit i tregojnë sot më shlirshëm për dallaveret që janë bërë mbi kurrizin e të pastrehëve e të uriturve. Njerëzit, të cilëve asokohe mund t’u ketë kushtuar me jetë po të tentonin t’i drejtonin punët. Ata që kanë punuar për të marrë rroga të mira nga organizatat humanitare që dikur kanë qenë në Kosovë e sot anembanë botës.

Derisa po rehabilitohej e rindërtohej Kosova, nisi edhe themelimi i OJQ-ve vendore. Lista e atyre që janë regjistruar sot e kalon numrin 10 mijë. A funksionojnë të gjitha apo jo, s’ka lidhje. Me rëndësi është se ato kanë ekzistuar në një periudhë, për aq sa kanë gjetur një burim të parave. Dhe kështu nisi faza e dytë, ajo e fondeve për paqe e pajtim. Fushata artificiale, aktivitete për qielli, projekte utopike pa kurrfarë ndikimi në gjendjen reale në terren, ku askush nuk mërzitej as për t’i numëruar viktimat e luftës, as për t’ua shëruar shpirtin grave, vajzave e djemve të dhunuar, për të kërkuar të zhdukurit, për të përllogaritur dëmet. Punohej në pajtim pa as më të voglën përpjekje të institucioneve për t’i kërkuar e çuar para drejtësisë kriminelët që i kishin bërë ato. Me gojën plot pajtim sot e asaj dite udhëheqësit politikë u janë laritur ndërkombëtarëve, OJQ-të kanë marrë pare, e populli ka kërkuar drejtësi – kushti i parë që do t’ua qetësonte zemrat e do t’i bënte të gatshëm për të dëgjuar një gjuhë tjetër pa drojën se atë po e flet një kriminel.

Pa e përmbushur ende asnjë detyrë, në mos jo institucionale, bile morale, karshi atyre që kanë pësuar në luftë, presidenti i Kosovës ka rikthyer sërish pajtimin në agjendë, edhe pse si temë i ka takuar fillimit të 2000-tave. Ndërkohë, gjatë këtyre 15 vjetëve OJQ-të kanë kaluar në fazën e aktiviteteve për demokratizimin, sundimin e ligjit, transparencën, luftimin e korrupsionit... kap njërën mëshoji tjetrës. Sot Kosova vuan për sundim të ligjit e për transparencë. Demokracia ka marrë një formë të çoroditur të cilën as themeluesit e saj nuk do të dinin t’i binin në fije, e për korrupsion Kosova është betonuar në top-listat në mos botërore, evropiane po se po. Nuk bën fare pa u përmendur gratë – të drejtat e tyre, etj. Një fushë shumë e dashur për donatorët dhe rrjedhimisht për OJQ-të. “Kanagjeqe”, kurse për frizere a për qëndisje, shëtitje poshtë e nalt, numërim grash në atë apo këtë institucion, konferenca e seminare, raporte qindrafaqeshe... derisa strehimoret për viktimat e dhunës mbahen sot për nesër në mungesë të një qasjeje dinjitoze institucionale ndaj tyre; derisa gratë poshtërohen në spitalin ku jetët e reja i sjellin në jetë; derisa vetë partitë politike i shpërfillin ato; derisa mentaliteti mbetet po ai që e kemi njohur përherë.

Shumë para janë dhënë për sektorin që do të duhej të mbante nën tension qytetarët. T’i bënte ata aktivë e kërkues. Ta bënte pushtetin frikacak karshi tyre. Sot një protestë kundër korrupsionit nuk t’i mbledhë as 20 veta në një vend. Raportimet e mediave për hajni, dallavere, keqpërdorim, gënjeshtra të njerëzve që na udhëheqin... e irritojnë qytetarin. “Edhe ju mediat veç zi po shkruni”, kjo është fjala që më së shumti e dëgjoj prej tyre, dhe mendoj me vete në çfarë monstrumi jemi shndërruar kështu. Disa madje thonë: “As s’po lexoj gazeta, as s’po dëgjoj lajme... kryt rahat”. Këta janë qytetarët. Kjo është shoqëria e Kosovës së 10 mijë organizatave të shoqërisë civile.

Se sa para të huaja janë derdhur në Kosovë nuk dihet e as që do të dihet ndonjëherë. Donatorët as sot nuk kanë një mekanizëm koordinues mes vete. Disa sektorë marrin më shumë e disa më pak, disa projekte dyfishohen e disa nuk përkrahen, disa OJQ janë mbresëlënëse e disa bëjnë dëm. Ato më të mirat funksionojnë në Prishtinë dhe në ndonjë qytet tjetër. Sa më larg qyteteve, aq më shumë zvarriten. Masa – ata, fjala e të cilëve bën ndryshimin, mbetet e paarritshme. Fjala e tyre është vota e qytetarit.

Derisa paratë e taksapaguesve të shteteve mike për sektorin bien gradualisht, e ato të taksapaguesve kosovarë shtohen, del në pah një kaos i llojit të vet. 28 milionë të buxhetit të shtetit në dy vjetët e fundit u kanë shkuar organizatave joqeveritare pa një sistem, pa kritere e procedura, pa bazë të dhënash. Vetë fakti që Qeveria ka refuzuar me vite të tëra t’u përgjigjet thirrjeve të OJQ-ve që merren me këtë sektor për të evidentuar e publikuar të dhënat për financimin e organizatave, tregon që kaosi ka qenë i qëllimshëm. Kjo deri diku e sqaron edhe 10-mijëshin e OJQ-ve dhe vërteton raportimet për lidhjet mes njerëzve të pushtetit dhe “OJQ”-ve të caktuara. Grantet, shërbimet e subvencionet në të njëjtin thes të Qeverisë, të cilin shkaku i presionit të BE-së u detyrua ta hapë vetëm këtë muaj. Sa milionë ka në thesin e viteve paraprake një zot e di. Publikimin e raportit për financimin e OJQ-ve dhe pranimin e faktit që nuk ka pasur sistem për shpërndarjen e parave, Qeveria sot e prezanton si një hap të sajin drejt transparencës. Një hap që për qejfin e vet kurrë nuk do ta kishte bërë.

Kështu duke kaluar nga faza në fazë, zyrtarët e BE-së që merren me këtë sektor ka kohë që kanë nisur të flasin për një periudhë të re. Atë të transformimit të shoqërisë civile në rrugë drejt BE-së. Meqë Kosova u rehabilitua e u rindërtua dhe derisa po pajtohet e po demokratizohet, donatorëve të huaj po u humb interesimi. Tashti duhet ndërruar mendësia për shoqërinë civile të donacioneve e ndihmave. OJQ-të duhet të nisin të ofrojnë shërbime dhe të garojnë në një konkurrencë të barabartë me shërbimet publike e private. Një model i shtrembëruar i kësaj ideje mund të gjendet në ndonjë rast te raporti i Qeverisë për financimin e OJQ-ve, ku shihet se miliona janë dhënë për shërbime paralele me ato publike pa kritere, pa konkurrencë, paushall.

Ajo që kemi mësuar më së miri deri tash në këtë vend ku po jetojmë është se kur diçka nis mbrapsht, vazhdon edhe më mbrapsht. Mbetet vetëm për t’u shpresuar që OJQ-të do t’ia dalin ta shpëtojnë sektorin e vet në rrugën drejt BE-së; që mendësia e re e shërbimeve të shoqërisë civile të mos vihet në shërbim të kaosit institucional.

Topi i rrumbullakët, Allahu në qiell, xhamia në vend

Nga Enver Robeli 

Mbi keqpërdorimin e futbollit për propagandë fetare

Kushtetuta e Kosovës e garanton lirinë e besimit. Secili njeri mund t’i besojë Krishtit, Muhamedit, makaronave fluturuese (ose shpagetave), Budës, Burdushit. Njerëzit kanë të drejtë edhe të mos besojnë në asgjë, të jenë ateistë. Kjo nuk i bën ata më pak të ndershëm, më pak të mirë se ata që falen pesë herë në ditë ose ata që çdo të diel shkojnë në kishë. Ndërsa disa futbollistë ndiejnë nevojë të bëjnë kryqin në fushën e blertë, duke shpresuar se një fuqi hyjnore do t’u ndihmojë të japin gola, askush nuk ka të drejtë t’i stigmatizojë ata lojtarë që i falen ndonjë idhulli tjetër dhe këtë e demonstrojnë publikisht.

Problemet fillojnë të shfaqen dhe të bëhen publike kur lojtarët e keqpërdorin fenë për propagandë, për të dëshmuar një lloj epërsie ndaj feve të tjera, kur nuk e dallojnë rolin e tyre privat dhe publik, kur e ngatërrojnë besimin me mision. Askush nuk i ka atakuar futbollistët shqiptarë (të Shqipërisë dhe të Kosovës) përse i besojnë këtij apo atij Zoti. Por me disa sjellje absurde, provokuese disa prej lojtarëve kanë braktisur detyrën e tyre dhe më shumë po prodhojnë tituj me gjeste fetare se sa me gola.

Para ndeshjes së fundit kundër Islandës, Milot Rashica, lojtari i ekipit apo kombëtares së Kosovës (quajeni si të doni), e pa të udhës të postojë në mediat sociale një fotografi, ku shihej një grumbull vrapuesish pas topit të ulur mbi qilimin e një xhamie në Shkodër. Është e drejtë e futbollistëve që gjatë kohës së lirë të shkojnë ku të duan (për aq sa i lejon trajneri dhe për aq sa kjo është çështje e tyre private).

Por si përfaqësues të një ekipi shtetëror (dhe Kosova është shtet, nëse këtë nuk e ka të qartë Rashica apo ndonjë shok i tij), futbollistët janë të obliguar të respektojnë disa rregulla: së pari Kosova është republikë laike, neutrale ndaj çdo feje, së dyti simbolet shtetërore, me të cilat stolisen Rashica dhe shokët e tij, nuk janë stema private, rrjedhimisht ato s’mund të (keq)përdoren për ushtrimin e aktiviteteve fetare, së treti nuk janë të gjithë shqiptarët myslimanë, andaj theksimi agresiv i një feje automatikisht u sugjeron bashkëkombësve të tjerë se vendi i tyre është diku në periferi. Para Kampionatit Evropian të Futbollit në Francë futbollisti i ekipit nacional të Shqipërisë, Mërgim Mavraj, refuzoi të vishej me fanellën me një reklamë të një birre të njohur kosovare. Federata Shqiptare e Futbollit lëshoi pe dhe kështu krijoi një rast precedent. Nesër një lojtar katolik apo ortodoks mund të refuzojë një fanellë me ngjyrë jeshile me arsyetimin se simbolizon «ngjyrat e islamit», «Perandorinë Osmane», «pushtuesit barbarë turq», «hordhitë orientale».

E udhës do të ishte që të dyja federatat e futbollit (e Kosovës dhe e Shqipërisë) t’ua bëjnë të qartë lojtarëve se bindjet e tyre fetare respektohen maksimalisht, por nuk do të tolerohet asnjë propagandë fetare siç është pozimi nëpër xhami, ndezja e polemikave mbi birrën, tallja me fe të tjera etj. Të njëjtët futbollistë që në Kosovë dhe në Shqipëri sillen si gjoja myslimanë të devotshëm, në ekipet e tyre në Evropë nuk bëzajnë fare kur bartin fanella me reklama të birrës apo mishit të derrit. Janë të njëjtët që pastaj tallen me fe të tjera, ndërsa mbrojnë ngjyrat e një kombi me tri fe.

Rashica dhe shokët e tij kanë mundur të vizitojnë në Shkodër Muzeun e Marubit, ku gjendet fondi më i rëndësishëm i fotografive të historisë së Shqipërisë dhe Kosovës; kanë mundur të kujtojnë Komitetin e Kosovës, i cili nga Shkodra përpiqej të organizonte rezistencën kundër pushtuesve serbë; pas vizitës në xhami kanë mundur lojtarët e Kosovës të vizitojnë edhe Katedralen e Shkodrës, simbol jo vetëm i besimit në Zot, por edhe qendër e veprimtarisë së shquar atdhetare. Rashica me shokë, ndërkaq, preferojnë të bëjnë një selfie në xhami për t’i sugjeruar publikut mysliman se topi është i rrumbullakët, Allahu në qiell, faltorja në vend.

U mbetet futbollistëve të Kosovës dhe të Shqipërisë vetëm të mësohen të luajnë futboll. Pasi në fushën e blertë po tregohen amatorë, ata kanë gjetur rrugë të tjera për të treguar zellin e tyre: demonstrimin e ndjenjave të tyre fetare si kompensim të shkathtësisë futbollistike. Kjo mund t’u sjellë pak vëmendje jo vetëm në mediat sociale, por njëkohësisht tregon se jo pak lojtarë, sidomos ata që luajnë në Perëndim, nuk arrijnë as të integrohen në shoqëritë mikpritëse, as të krijojnë një bazament vlerash përtej atyre fetare, as të bëhen personalitete shembulldhënëse për shoqërinë. Të besosh në Zot është e drejtë individuale, por kjo s’të bën automatikisht njeri më të vlefshëm për shoqërinë.

Rashica dhe rrogëtarët e tjerë që vrapojnë pas topit do të duhej ta kuptonin se paradat fetare nuk i zëvendësojnë ato sportive; se individët nuk e përbëjnë ekipin; se fuqia e supozuar hyjnore nuk e zëvendëson fuqinë e këmbëve; se ende nuk është zbuluar asnjë hoxhë, prift apo dervish që me shkop magjik mbyll portën vendore dhe hap atë të kundërshtarit. Kështu ka qenë prej se njerëzit kanë filluar të luajnë futboll. Kështu do të jetë edhe në ndeshjen e radhës, kur të luajnë Kosova, Shqipëria, Franca, Anglia, Andorra, San Marino, por edhe Islanda e mallkuar dhe Kroacia e tmerrshme.

48 orë ndalesë për serbin që demoloi xhaminë në Llabjan të Novobërdës

Një serb ka demoluar sot xhaminë në fshatin Llabjan të Novobërdës.

I njëjti dyshohet se ka dëmtuar një shtëpi private dhe një shkollë, ndërsa ende nuk dihen motivet.

I është caktuar masa e ndalimit për 48 orë, serbit i cili demoloi brenda dhe jashtë xhaminë në fshatin Llabjan të Novobërdës.

Lajmin e ka konfirmuar për portalin Koha.net, zëdhënësi në Policinë e Kosovës për rajonin e Gjilanit, Ismet Hashani.

Nuk dihet ende për motivet që e kanë shtyrë qytetarin e Kosovës me kombësi serbe, me inicialet B. F., i lindur më 1992.

Demolimi i xhamisë nga ana e këtij personi kishte ndodhur në orët e pasdites, menjëherë pas së cilës është njoftuar Policia e Kosovës.

“Njësitet patrolluese kanë dalë me urgjencë dhe nga hetimet e para është parë që në xhaminë e fshatit ka disa dëme në brendi të xhamisë, janë thyer disa orendi aty brenda, është thyer jashtë një matës i rrymës”, ka thënë Hashani, teksa ka treguar se shpejt është identifikuar i dyshuari, i cili më pas është ndaluar nga zyrtarët policorë.

“I njëjti besohet se është i involuar në raste të njëjta për dëmtim pronë, në një shkollë në Llabjan, së paku dy-tri shtëpi, të gjitha këto dyshohet se lidhen me këtë person”, ka shtuar ai.

Një serb i moshës 25-vjeçare pasditen e sotme ka demoluar brenda dhe jashtë xhaminë në fshatin Llabjan të Novobërdës më pas ka thyer dyert e shkollës “Asdreni” e po ashtu ka dëmtuar edhe dy-tri shtëpi private.

Policia ka dalë në vendin e ngjarjes dhe më pas ka arrestuar serbin me inicialet B. F.

“Ende nuk dihet motivet që e kanë shtyrë atë të kryejë një akt të tillë, ndërsa me urdhër të prokurorit i është caktuar masa e ndalimit policor për 48 orë ka”, thënë zëdhënësi i Policisë së Kosovës për rajonin e Gjilanit, Ismet Hashani.

Rastin e ka dënuar nënkryetari i komunës së Novobërdës, Bajrsh Ymeri i cili ka thënë se banorët e fshatit Llabjan janë të shqetësuar nga ky akt vandal.

“Ne kemi pasur raporte të mira mes komuniteteve, kemi pas situatë të qetë dhe stabile në komunën tonë, por ky rast e ka zbehë atë...Nuk duamë të paragjykojmë asgjë por kërkojmë nga organet e drejtësisë që sa më parë të zbardhet ky rast dhe akterët të sillen para drejtësisë për të marrë dënimin e merituar”, ka thënë Ymeri.

Aktin e ka dënuar edhe shefi i grupit parlamentar të AAK-së, Pal Lekaj, i cili ka thënë se komunitetet në Kosovë pa dallim feje e nacionaliteti duhet të jenë në mirëkuptim e në harmoni të plotë.

“Kosova nuk e ka në traditë të sulmohen kultet fetarë të askujt edhe në kohët më të vështira kjo është vërtetuar. Prandaj nuk duhet toleruar që këto veprime të bëhen përditshmëri”, ka thënë ai.

Në Graçanicë arrestohen tre serbë që ilegalisht po kërkonin qypin e arit

Në fshatin Gushtericë e Ulët, të Graçanicës, më 14.04.2017 rreth orës 23:10, janë arrestuar tre të dyshuar meshkuj serbë.

Policia e Kosovës njofton se të njëjtit nga njësiti policor janë vërejtur se ishin duke qarkulluar në një arë me automjetin me traga vendore në mes të fshatit Gushtericë dhe Dobratin.

“Gjatë kontrollit në automjetin e tyre është gjetur dhe konfiskuar një Sprej si dhe detektor për kërkimin e metaleve. Gjatë intervistimit të dyshuarit kanë deklaruar se në lokacionin e cekur kanë dal për kërkimin e një qypi të arit sipas tyre të fshehur kohë më parë”, thuhet në raportin 24 orësh.

“Gjatë verifikimit është konstatuar se njëri nga të dyshuarit kërkohet nga Gjykata në Prishtinë andaj i njëjti dërgohet në vuajtje të dënimit, ndërsa dy të dyshuarit tjerë me urdhër të prokurorit lirohen në procedurë të rregullt”.

Shkrimtari më famë botërore: Ismail Kadare: Kërkoj të hapet dosja ime e kohës së komunizmit

Autori Kadare ka thënë se po provon të bëjë letërsi normale në një shtet jonormal, kur shkruante në kohën e komunizmit.

Le Parisien sot shkruan për Kadarenë dhe për deklaratën e tij të fundit.

“Unë kërkoj të hapet dosja ime e kohës së komunizmit”- kësisoj ka thënë autori shqiptar për AFP. Autoritetet shqiptare së fundmi kanë pasur qasje në Dosjet e Sigurimit Shtetëror të kohës së Enver Hoxhës, ndërsa në debat është përfshirë edhe autori i cili gjithmonë është akuzuar se po fshehë diçka në këto dosje.

Autori Kadare ka thënë se po provon të bëjë letërsi normale në një shtet jonormal, kur shkruante në kohën e komunizmit.

“Megjithatë kërkesa ime nuk është aprovuar. Ajo dosje gjithmonë ka shkaktuar tensione, për arsye tanimë të ditura” tregon Kadare, pasi i është drejtuar edhe medieve shqiptare, duke thënë se hapja e dosjeve të Sigurimit do të ishte edhe mënyrë e mirë që Shqipëria të mund të ndryshonte faqen e zhvillimit të tanishëm.

Gjatë kohës 1944-1991, nën sundimin shqiptar kanë vdekur rreth 6 mijë persona dhe rreth 100 mijë ishin internuar nëpër kampe.

“E bukura dhe bisha” shënon rekord, hyn në listën e filmave miliarderë

Filmi i Disney “E bukura dhe bisha” nuk ka zhgënjyer pritshmëritë , duke tejkaluar të ardhurat miliardere dhe duke përfunduar në listën e filmave që kanë mbledhur më shumë të ardhura në historinë e Hollywood.

I dalë në 16 mars, filmi me protagonistë Emma Watson dhe Dan Stevens javë pas jave ka shënuar rekord në të gjithë botën ku 436 milionë dollarë janë fituar në SHBA dhe 557 të tjerë në kinematë botërore.

Disney ka të gjitha arsyet për të festuar “E bukura dhe bisha” është filmi i dytë live action që arrin një miliard dollarë pas “Alice in Wonderland” të 2010.

Ndërkohë në listën e filamve miliarderë, 14 tituj nga 29 janë vepra të Disney. Filmat më të afërt janë “Rogue One: A Star Wars Story”, “Capitain America: Civil War”, “Alla ricerca di Doris” e “Zootropolis”.

Filmi me regji të Bill Condon u mbështet në një promocion të madh dhe një kast yjesh. Përveç Dan Stevens dhe Emma Watson në rolet e Bishës dhe të Bukurës, gjejmë edhe Luke Evans në atë të Gaston, Emma Thompson në atë të Mrs. Bric, Kevin Kline ka rolin e babait të Të bukurës, Josh Gad atë të Lefou, Ian McKellen është ora Tockins, ndërsa Ewan McGregor ka rolin e Lumière.

Filmat miliarderë:

1)”Avatar” 2.78 miliardë

2) “Titanic” 2.18 miliardë

3) “Star Wars – Il risveglio della Forza” 2, 06 miliardë

4)”Jurassic World” 1.67 miliardë

5) “The Avengers” 1.52 miliardë

6) “Fast & Furious 7″ 1.52 miliardë

7)”Avengers: Age of Ultron” 1.40 miliardë

8) “Harry Potter e i Doni della Morte – Parte 2” 1.34 miliardë

9) “Frozen” 1.28 miliardë

10) “Iron Man 3” 1.21 miliardë

11) “Minions” 1.16 miliardë

12) “Captain America: Civil War” 1.15 miliardë

13) “Transformers 3” 1.12 miliardë

14) “Il signore degli anelli – Il ritorno del re” 1.12 miliardë

15) “Skyfall” 1.10 miliardë

16) “Transformers 4 – L’era dell’estinzione” 1.10 miliardë

17) “Il cavaliere oscuro – Il ritorno” 1.08 miliardë

18) “Toy Story 3” 1.07 miliardë

19) “Pirati dei Caraibi – La maledizione del forziere fantasma” 1.07 miliardë

20) “Rogue One: A Star ëars Story” 1.05 miliardë

21) “Pirati dei Caraibi – Oltre i confini del mare” 1.04 miliardë

22) “Jurassic Park” 1.03 miliardë

23) “Alla ricerca di Dory” 1.03 miliardë

24) “Star Wars: Episodio I – La minaccia fantasma” 1.03 miliardë

25) “Alice in Wonderland” 1.02 miliardë

26) “Zootropolis” 1.02 miliardë

27) “Lo Hobbit – Un viaggio inaspettato” 1.02 miliardë

28) “The Dark Knight” 1 miliard

29) “La Bella e la Bestia” 1 miliard

Në Klinikën e Syve, për tre muaj u kontrolluan 11895 pacientë - 792 prej tyre kryen operacione

Klinika e Oftalmologjisë (Syve), në tremujorin e parë të këtij viti ka pasur trend të rritjes së vëllimit të punës.

Nga raporti tremujor i punës, rezulton se janë kryer 792 operacione, përfshirë edhe ato ambulantore, ka pasur 11895 vizita ambulatore dhe 1481 vizita sub-specialistike.

“Gjatë kësaj kohe janë hospitalizuar 720 raste me 3336 ditë shërbimi, në gjithsej 49 shtretër. Janë shënuar rezultate në ngritjen e kapaciteteve në kirurgjinë e syrit e sidomos në kirurgjinë e kataraktës me fakoemulzifikim, ku për tre muaj është arritur të kalohet shifra mbi 500, kurse në vitin 2015, kishte vetëm 150 intervenime të tilla intervenime, pra statistika e këtij tremujori flet për shtim të vëllimit të punës”, thuhet në një njoftim të QKUK-së.

Nga kjo klinikë ka pasur 658 aplikime të avastinës, po ashtu janë bërë përgatitjet e duhura për fillimin e procedurës së re kirurgjike të kirurgjisë vitreoretinale.

Klinika e Oftalmologjisë ka tre salla operative, ambulancat specialistike (5), diagnostika - kabinetet për glaukomë, strabologji dhe retinë.