Nga Instituti për shëndet publik theksuan se në Mal të Zi momentalisht janë të regjistruar 161 raste aktive me koronavirusin e ri (COVID-19), prej të cilëve 20 janë hospitalizuar

Në Mal të Zi gjatë 24 orëve të fundit nuk ka pasur rast të ri nga koronavirusi, ndërsa deri tani në këtë vend janë regjistruar 321 të infektuar.
Nga Instituti për shëndet publik theksuan se në Mal të Zi momentalisht janë të regjistruar 161 raste aktive me koronavirusin e ri (COVID-19), prej të cilëve 20 janë hospitalizuar. Sipas të dhënave të Institutit, nga koronavirusi deri më tani janë shëruar 153 persona, ndërsa shtatë kanë vdekur.

Nga Instituti më herët paralajmëruan se nga 4 maji do të jetë e obligueshme mbajtja e maskave mbrojtëse në hapësirë të mbyllur, si dhe u rekomandojnë qytetarëve që në këtë mënyrë të mbrohen nga infektimi edhe në të hapur.

Si masa parandaluese për parandalimin e përhapjes së koronavirusit të Malit të Zi deri më tani vetëm ka shkurtuar daljen nga shtëpia, që tani vlen nga ora 23 deri në ora pesë të mëngjesit.

Organi Kombëtar i Koordinimit të Sëmundjeve Infektive ka njoftuar se do të lejohet të operojë dyqanet, parukeritë dhe sallonet e bukurisë, qendrat e fitnesit, shërbimet taksi, zyrat dentare dhe shërbimet artizanale nga data 4 maj. Ata theksuan se, nëse nuk ka rritje të numrit të të infektuarve, restorantet, hotelet, kafenetë dhe baret e plazhit do të lejohen të operojnë nga 18 maji, ndërsa komunikacioni ndërurban do të lejohet nga 1 qershori.

Shqipëri, rritet në 773 numri i rasteve me COVID-19

Në Shqipëri rritet në 773 numri i rasteve me koronavirusin e ri (COVID-19) me konfirmimin edhe të 7 rasteve të reja, sipas të dhënave zyrtare nga Ministria e Shëndetësisë dhe Mbrojtjes Sociale.

Ministria ka njoftuar se gjatë 24 orëve të fundit janë testuar 225 persona të dyshuar me COVID-19, ndërsa janë konfirmuar 7 raste pozitive.

"Deri në këto momente janë testuar 8.253 raste të dyshuara dhe prej tyre janë të konfirmuar pozitivë me COVID-19, 773 raste. Aktualisht janë 272 pacientët aktivë me COVID-19 dhe numri i të shëruarve vazhdon të jetë më i lartë prej më shumë se dy javësh. Deri tani 31 qytetarë e kanë humbur betejën me këtë sëmundje", thuhet në njoftim.

Ndërkohë, gjatë 24 orëve të fundit, 15 pacientë të tjerë i janë shtuar listës së të shëruarve, duke e çuar numrin e përgjithshëm të personave të shëruarve nga COVID-19 në 470.

Në Shqipëri për shkak të COVID-19 është shpallur gjendja e fatkeqësisë natyrore, ndërsa vazhdojnë masat si mbyllja e institucioneve arsimore, ndalimi i hyrjeve me vendet fqinje për udhëtarët, pezullimi i fluturimeve, pezullimi i transportit urban dhe kufizimi i lëvizjes së qytetarëve.

Institucionet kanë filluar lehtësimin për disa nga masat kufizuese këtë javë, ndërsa disa kategori të bizneseve kanë filluar që të ushtrojnë aktivitetet e tyre.

Ndërkohë, ministrja e Shëndetësisë dhe Mbrojtjes Sociale, Ogerta Manastirliu, gjatë fjalës në seancën e sotme plenare të Kuvendit të Shqipërisë tha se hapja e një seri biznesesh në fillimin e kësaj jave është pjesë e strategjisë së rihapjes, për të vlerësuar sipas saj situatën për javët e ardhshme.

Në Bosnjë e Hercegovinë (BeH), rritet në 69 numri i të vdekurve nga COVID-19

Në Bosnjë e Hercegovinë (BeH) në pajtim me 30 prillin nga koronavirusi i ri (COVID-19) janë infektuar 1.757 persona ndërsa numri i të vdekurve arrin në 69.



Të dhënat e Ministrisë së Çështjeve Civile të BeH-së tregojnë se lidhur me COVID-19 janë testuar 30.793 persona ndërsa nën mbikëqyrje janë 8.669. Ndërkohë janë shëruar 727 pacientë.

Në Republikën Sërpska janë infektuar 820 persona ndërsa janë testuar 13.026 persona. Nën mbikëqyrje janë 3.348 persona. Janë konfirmuar 34 raste të vdekjes ndërsa janë shëruar 381 pacientë.

Ministri i Shëndetësisë së Kroacisë, Vili Berosh tha se në 24 orët e fundit janë regjistruar 14 raste të reja me COVID-19, duke e çuar në 2.076 numrin e përgjithshëm të të prekurve

Qendra e Mbrojtjes Civile e Kroacisë deklaroi se në 24 orët e kaluara, dy persona kanë vdekur nga koronavirusi dhe 14 të tjerë rezultuan me COVID-19, ndërsa deri tani 1.348 janë shëruar.



Ministri i Shëndetësisë së Kroacisë, Vili Berosh tha se në 24 orët e fundit janë regjistruar 14 raste të reja me COVID-19, duke e çuar në 2.076 numrin e përgjithshëm të të prekurve.

Deri më tani, në Kroaci janë kryer 36.221 teste, nga të cilat 1.745 janë testuar në 24 orët e fundit, gjë që tregon se nga numri i përgjithshëm i testeve, 5.73 për qind janë pozitive.

Edhe dy persona kanë vdekur që nga dita e djeshme në Osijek. Me këtë numri i të vdekurve është rritur në 69.

Sot në Kroaci 20 pacientë janë në respiratorë, 261 pacientë janë shtruar në spital, që është 8 më pak se dje. Ndërsa 559 persona janë shëruar dhe liruar nga spitali, 8 më shumë se dje.

Maqedoni e Veriut, viti shkollor vazhdon nga distanca deri në fund, maturantët lirohen nga provimi

Nxënësit e shkollave ​​fillore dhe të mesme në Republikën e Maqedonisë së Veriut do të vazhdojnë mësimin në distancë deri më 10 qershor, gjegjësisht ata nuk do të kthehen në shkollë, ndërsa maturantët këtë vit do të lirohen nga provimi përfundimtar.

Këto janë vetëm disa nga masat që Qeveria e Maqedonisë së Veriut i miratoi në seancën e sotme me propozimin e Ministrisë së Arsimit dhe Shkencës.

Ministri i Arsimit, Arbër Ademi, në një konferencë për media deklaroi se bëhet fjalë për një pako prej nëntë masash, të cilat sigurojnë funksionimin e rregullt të sistemit arsimor në këto rrethana dhe kushte të jashtëzakonshme të shkaktuara nga shfaqja dhe përhapja e koronavirusit të ri (COVID-19).

"Viti aktual shkollor do të vazhdojë të zhvillohet deri në fund përmes organizimit të mësimit në distancë, respektivisht përmes organizimit të mësimit nga shtëpia, kështu që nxënësit nuk do të kthehen në bankat shkollore deri më 10 qershor", theksoi Ademi.

Ai vuri në dukje se të gjithë mësimdhënësve që deri në ditën e shpalljes së gjendjes së jashtëzakonshme ishin të angazhuar me kontratë me kohë të caktuar, marrëdhënia e punës u vazhdohet deri në fund të vitit shkollor, dhe në të njëjtën kohë do të sigurohet edhe zëvendësim për çdo vend pune të lirë për mësimdhënës.

Masa tjetër ka të bëjë me regjistrimin e fëmijëve në klasë të parë, i cili normalisht dhe në përputhje me rregulloret ligjore fillon në maj, por që sipas kushteve do të fillojë në qershor.

Dy masat e tjera, tha ministri Ademi, garantojnë që asnjë shkollë gjatë gjendjes së jashtëzakonshme nuk do të mbetet pa strukturat e menaxhimit dhe organet administrative që kanë detyrimin të organizojnë punën pa pengesa dhe kryesisht në interes të nxënësve dhe mësimdhënësve, përkatësisht vazhdohen mandatet e kryesive dhe administrimit të shkollave, si dhe vlefshmëria e licencave për drejtorët.

Ndërkaq, sa u përket nxënësve në vitin e fundit në shkollat​​e mesme, ata janë të liruar nga provimi i maturës shtetërore, maturës shkollore dhe provimi përfundimtar në vitin shkollor 2019/2020, dhe do të jenë në gjendje që me diplomat dhëna për mbarimin e arsimit të mesëm të regjistrohen në një nga institucionet e arsimit të lartë në vend.

Kujtojmë se ministri i Shëndetësisë i Maqedonisë së Veriut, Venko Filipçe, më 10 mars njoftoi se qeveria ka vendosur të pezullojë procesin arsimor në të gjitha kopshtet, shkollat ​​fillore dhe të mesme, si dhe aktivitete mësimore në institucionet e arsimit të lartë në gjithë vendin për 14 ditë, por ky vendim më pas vazhdoi dhe është ende në fuqi.

Beograd: Ndalesë e levizjes prej sot deri të shtunën në mëngjes

Ndalimi i lëvizjes në Serbi fillon prej sot në ora 18:00 pasdite dhe do të zgjasë deri të shtunën, më 2 maj në ora 5:00 të mëngjesit.

Gjithashtu ndalimi i lëvizjes të shtunën dhe të dielën do të fillojë në ora 18:00 dhe po ashtu do të zgjasë deri në ora 5:00 të mëngjesit, bëri të ditur Qeveria e Serbisë

Qytetarët mbi moshën 65 vjeç do të lejohen të shkojnë në shëtitje dy herë të premten, më 1 maj 2020, në kohëzgjatje prej një orë, në çdo kohë të ditës jo më shumë se gjashtëqind metra larg vendbanimit të tyre.

Të shtunën dhe të dielën, ndalimi i trafikut fillon në ora 16:00 dhe zgjat deri në orën 5:00 të mëngjesit.

Kosovë, rritet në 806 numri i të infektuarve me COVID-19

Autoritetet shëndetësore në Kosovë kanë bërë të ditur se 7 persona janë diagnostikuar pozitivë me koronavirusin e ri (COVID-19), duke e çuar në 806 numrin e përgjithshëm të 
rasteve në vend

Bazuar në të dhënat e fundit të Institutit Kombëtar të Shëndetësisë Publike në Kosovë (IKSHPK), nuk është raportuar ndonjë rast i ri që ka përfunduar me vdekje nga koronavirusi, ndërsa 22 pacientë janë shëruar, duke çuar në 271 numrin e përgjithshëm të të shëruarve.

Rastet e reja të diagnostikuar me koronavirus janë nga komuna të ndryshme të Kosovës, nga të cilat me numër më të madh prinë Komuna e Prizrenit.

Sot në Laboratorin e Mikrobiologjisë Molekulare janë testuar gjithsej 243 mostra të dyshuara me COVID-19, ndërsa nga data 8 shkurt e këtij viti në këtë laborator janë testuar gjithsej 7.423 mostra.

Sot gjatë ditës, ministri në detyrë i Shëndetësisë, Arben Vitia, zhvilloi një konferencë për media, ku bëri të ditur se parashihet që nga data 4 maj të dalin me masa të reja që do të jenë lehtësuese për qytetarët dhe gjithashtu edhe me synim “çlirimin ekonomik të vendit”.

COVID-19, ministri kosovar i Shëndetësisë prezanton masat e reja lehtësuese



Ministri në detyrë i Shëndetësisë i Kosovës, dr.Arben Vitia, ka bërë të ditur nëpërmjet një konference për media masat e reja lehtësuese me të cilat “synohet të çlirohet ekonomia” e goditur nga pandemia e koronavirusit të ri (COVID-19).

dr.Arben Vitia tha se viti 2020 nuk do të jetë vit normal, duke shtuar se tubimet për ceremoni, festive apo mortore, nuk do të lejohen; dhe se “sa më herët që qytetarët e kuptojnë këtë gjë, do të jetë më e lehtë për ta”.

Ai tha se 4 maji i vitit 2020 , dita kur pritet që të skadojë afati i rregullave të vjetra të vendosura në prill për parandalimin e koronavirusit, nuk do të jetë dita kur qytetarët do t’i kthehen normalitetit, por dita kur fillojnë lehtësimet graduale.

“Për herë të parë për tri ditë radhazi numri i të shëruarve kalon atë të infektuarve. Sot jemi në gjendje t’i lehtësojmë disa masa”, theksoi ministri.

Sipas masave të reja të prezantuara nga ministri, hapja e kufizimit të lëvizjes do të jetë në tri faza.

Në fazën e parë, hapja do të fillojë nga 4 maji 2020 dhe do të zgjasë deri më 18 maj, ndërsa do të zgjerohet orari i lëvizjes së qytetarëve deri në tri orë, në dy orare (paradite dhe pasdite).

Pjesët që do të hapen gjatë kësaj periudhe janë: ndërtimtaria dhe patundshmëria, tregtia e automjeteve dhe atyre me pakicë, pjesërisht; riparimi i artikujve personale dhe i orendive, si dhe zyrat e konsulencës.

Faza e dytë, e cila do të varet nga numri i rasteve të reja me koronavirus, fillon nga 18 maji 2020 deri më 1 qershor 2020 , ndërsa parasheh të hapë tregtinë me pakicë, dentistët dhe fizioterapeutët, floktarët dhe sallonet e ondulimit, tregjet e gjelbra, gastronominë, transportin hekurudhor, transportin urban dhe ndërurban, si dhe qendrat e thirrjeve.

Ndërkaq, faza e fundit nga këto masa lehtësuese që parashihet të aplikohen, do të fillojë më 2 qershor 2020  deri në një vendim të radhës dhe do të përfshijë hapjen e transportit urban dhe ndërurban, taksitë, gastroniminë, provimet ne arsimin e lartë, testin e maturës dhe arritshmërisë, hapjen e kinemave, hapjen e teatrove, si dhe hapjen selektive të aktiviteteve sportive.

Në konferencë Vitia në fund tha se “kalimi nga faza e parë në të dytën dhe nga e dyta në të tretën varet nga ne”, ndërsa theksoi se “nëse nuk kemi rritje të rasteve dhe respektojmë udhëzimet shëndetësore, atëherë ecim përpara”.