Gjuha e shqiptarëve nuk është bijë e ilirishtes

Gjuhëtari austriak Joachim Matzinger në një ligjëratë në Fakultetin e Historisë e Filologjisë pohon tezën e cila njeh si paraardhëse të shqipes jo ilirishten, por para-shqipen e lashtë, gjuhë 3000 vjeçare.
Një analizë nga këndvështrimi i gjuhësisë historike

Elsa Demo
“Shqiptarët nuk duhet të shqetësohen që shqipja nuk e ka origjinën te ilirishtja”, thotë në përfundim të ligjëratës që gjuhëtari austriak Joachim Matzinger mbajti në një nga sallat kryesore të Fakultetit të Historisë e Filologjisë në Tiranë, më 9 tetor. Këtu ku është pohuar në më shumë se gjysmë shekulli “teza ilire”.
Ndërsa Matzinger analizoi para studentëve dhe profesorëve të historisë (mungonin gjuhëtarët) që shqipja e sotme është pasardhëse e një gjuhe të vjetër ballkanike, vetjake, që ai e quan proto-shqipe ose parashqipja e lashtë, “një gjuhë që ekzistonte pranë ilirishtes edhe pranë trakishtes, por nuk ka një lidhje me to”. Sepse raportet me këto dy gjuhë janë në bazë të dy hipotezave mbizotëruese për origjinën e shqipes së sotme.
Përfaqësuesit e gjuhësisë shqiptare, dhe Matzinger sjell ndër mend vetëm veprat e Çabejt dhe kontributin e tij “Ilirishtja dhe shqipja”, i botuar në vëllimin “Ilirët dhe gjeneza e shqiptarëve”, por edhe kolegë të huaj, kanë pranuar hipotezën e prejardhjes ilire të shqipes, e lidhur ngushte me autoktoninë e shqiptarëve. Ndërsa në fillim të shek.XX, u zhvillua hipoteza e imigrimit të shqiptarëve në vendin e tyre, hipotezë e lidhur me idenë e romanistit gjerman Gustav Weigand sipas së cilës, shqiptarët janë pasardhësit e trakëve. Matzinger përmend edhe të tjerë si Norbet Jokl që propozuan se “gjuha shqipe përfaqësonte një përzierje ilire dhe trake”.
Nuk ekzistojnë dëshmi të shkruara të gjuhës ilire, disiplina si arkeologjia janë burime memece për këtë çështje, por është gjuhësia historike ajo që mund të ofrojë argumente për raportet e shqipes me gjuhët e përmendura. Joachim Matzinger kujton se në fushën e onomastikës janë dokumentuar mjaft emra ilirë njerëzish dhe vendesh të cilët ndihmojnë për të njohur më mirë historinë e pashkruar të gjuhës shqipe dhe nëse shqiptarët janë ose jo pasaardhës të ilirëve. Gjuhëtari mendon se në zonën e territorit antik ilir që kufizohet sot nga Shqipërinë Qendrore, Shqipëria Veriore dhe Mali i Zi, gjendet një sistem tipik onomastik dhe i pavarur nga onomastika e vendeve fqinje. “Zhvillimi fonetik i emrave antikë në Shqipëri ndodhi sipas ligjeve fonetike shqipe”, argumenton Matzinger. Ai merr për shembuj analize emra qytetesh dhe lumenjsh si Durrës, Shkumbin. Me shembullin e emrit të Shkodrës provon se ky toponim “nuk ka qenë i njohur në mënyrë të pandërprerë, gjatë gjithë kohës ndër shqiptarët dhe as është trashëguar prej kohësh të vjetra. Gjithashtu ky emër vendi nuk të lejon asnjë lloj lidhjeje me ndonjë emër të përgjithshëm të gjuhës shqipe”.
Përfundimi i gjuhëtarit është: mund të supozohet që Evropa Juglindore në parahistori dhe në antikitet ishte një territor ku fliteshin shumë gjuhë të rëndësishme, jo vetëm greqishtja, ilirishtja dhe trakishtja por edhe një gjuhë paraprake nga e cila zhvillohet hap pas hapi gjuha shqipe e që si gjuhë paraprake, mund ta përkufizojmë si protoshqipja. “Si një gjuhë indo-evropiane natyrisht protoshqipja ishte e afërt me gjuhët e tjera të Ballkanit me ilirishten dhe me trakishten, por shqipja nuk është bija as e ilirishtes as e trakishtes.”
Kështu Matzinger kundërshton tezën e Çabejt: “Natyrisht që Çabej kishte tjetër mendim, por sipas hulumtimeve të mia, argumentimi im themelor është se sistemi fonologjik i proto-shqipes dhe i sistemi i ilirishtes janë dy sisteme të ndryshme që nuk pajtohen njëri me tjetrin. Kemi një ndryshim, një diferencë, janë periudha gjuhësore, të cilat duhen interpretuar si dy gjuhë të ndryshme. Kjo është baza ime themelore.”
Sa është e lashtë është kjo parashqipe?
“Mendoj se historia e gjuhës shqipe, e protoshqipes është e vështirë ta themi saktësisht, është mëse 3 mijë vjeçare. Mund të konstatojmë se ka ekzistuar si një gjuhë vetjake e vendit pranë greqishtes. Nga kontakti me romakët kjo gjuhë nuk u romanizua dhe nga kontakti me sllavët nuk u sllavizua. Pavarësisht nga ndikimi i tyre i fortë, gjuha shqipe ka ruajtur pavarësinë e saj gjuhësore dhe tiparet e saj karakteristike. Nga ana e gjuhësisë s’kemi nevojë për ilirët. Gjuha shqipe ka historinë e vet mijëvjeçare dhe shumë interesante dhe vetëm kjo ka rëndësi.”
Idenë e prejardhjes së shqiptarëve nga ilirët, Matzinger e përmendi që në krye të ligjëratës si një çështje të politizuar në kohë. Fillimisht në shek. shek.19 ndër arbëreshë. “Vendi i sotëm i shqiptarëve ishte një territor ilir një vend i banuar prej shumë fiseve ilire, por historia ilire, të paktën historia politike ilire përfundoi në vitin 167 p.e.s kur romakët mundën mbretin e fundit ilir Gentius. Ideja e një prejardhjeje ilire, së fundi e një autoktonie të pandërprerë të popullit shqiptar nga antikiteti deri në ditët tona, u pranua shpejt nga shqiptarët sepse dukej si një shpjegim i natyrshëm. Ishte një argument i rëndësishëm në kohë të stuhishme në shek.19 dhe të 20 kur u formua kombi shqiptar me të drejta të barabarta.”
Çështja e politizimit të shkencave historike e studimeve në gjuhësi, etnografi, letërsi ishte një kryefjalë e takimit të së martës. Subjektivizmi dhe folklorizmi si tipare që e shmangin nga fokusi i kërkimit shkencor objektin e studimit, kanë krijuar një traditë e farkuar nën sistemin e kaluar. Këtë pohuan autorët e pranishëm, Nathalie Clayer, Stephanie Schwandner-Sievers, Oliver Jens Schmitt dhe moderatori i takimit publicisti Fatos Lubonja. Shkas u bë prezantimi në Fakultetin e Historisë e Filologjisë i librit “Historia e Shqiptarëve. Gjendja dhe perspektiva e studimit” (Botimet Përpjekja, 2012). Në këtë botim janë përfshirë ligjërata e Joachim Matzinger “Shqiptarët si pasardhës të ilirëve nga këndvështrimi i gjuhësisë historike” dhe një tjetër nga kolegu i tij i Universitetit të Vjenës, Stefan Schumacher, me titull “Marrëdhëniet e huazimeve mes protoshqipes dhe latinishtes apo rumanishtes ballkanike”.
Të gjithë autorët në këtë libër janë të huaj, albanologë, historianë, gjuhëtarë e studiues të letërsisë dhe kjo është bërë qëllimisht për të prezantuar një qëndrim kritik në debatin shkencor. Siç tha në takim Oliver Jens Schmitt, përgatitës i librit, ideja e këtij botimi ishte për të zhvilluar “një dialog të strukturuar midis albanologëve, pa i ndarë në shqiptarë dhe të huaj”.
Ndërsa Valentina Duka, zv/dekane e Fakultetit të Historisë dhe Filologjisë u shpreh se ky zë i rëndësishëm i albanologëve të huaj që përfaqësohet në botimin “Historia e Shqiptarëve” ka për të qenë “pjesë e kurrikulës zyrtare”, së paku për Departamentin e Historisë.
Joachim Matzinger
Joachim Matzinger ndoqi studimet indo-evropiane pranë Universitetit të Vjenës. Prej vitit 1997 kryen kërkime gjuhësore pranë Institutit të Studimeve Indo-evropiane në Universitetin “Friedrich Schiller” të Jenës. Bashkë me kolegun, Dr. Stefan Schumacher (Departamenti i Gjuhësisë, Universiteti i Vjenës), Matzinger është marrë me studimin e teksteve të vjetra shqipe, shek.16-18, nga Buzuku, Bogdani dhe po përgatisin një leksikon të sistemit foljor të shqipes së vjetër. Matzinger ka kryer një studim filologjik të “Mbsuame e krështerë (Dottrina cristiana)” e Lekë Matrëngës 1592.

Berisha: "Himnit të Flamurit t'i rikthehet strofa e Zotit"

Berisha: "Apeli i shqiptarëve tek Zoti është apeli më i drejtë, se Zoti dhe kombi janë një dhe të pandarë. Dashuria për kombin buron nga fryma e Zotit".
"Për 100-Vjetorin e Pavarësisë ngritjen e një monumenti kushtuar dëshmorëve të Kombit, që ranë në Kosovë në Luftën Çlirimtare të Kosovës, pa të cilën, Berisha tha se, Pavarësinë do ta festonim si një trup gjysmë i paralizuar."

Kryeministri Berisha në mbledhjen e sotme të Komitetit për 100-Vjetorin e Pavarësisë ka kërkuar kthimin e Himnit Kombëtar në formën e tij të plotë. E të rikthehet pikërisht strofa ku shqiptarët apelojnë Zotin, pasi në vlerësimin e Berishës Zoti dhe Kombi janë një dhe të pandarë.

“Apeli i shqiptarëve tek Zoti është apeli më i drejtë, se Zoti dhe kombi janë një dhe të pandarë. Dashuria për kombin buron nga fryma e Zotit, ndaj duhet të shihen modalitetet se si të kthehet kjo strofë. Himni duhet të kthehet në variantin e tij të plotë, siç e shkruajti Aleksandër Drenova”, deklaroi Kryeministri Berisha.

Duke vënë theksin se të rënët e kombit duhet të nderohen kudo në trojet shqiptare, kryeministri i vendit, Sali Berisha ka kërkuar në mbledhjen e sotme të Komitetit për 100-Vjetorin e Pavarësisë ngritjen e një monumenti kushtuar dëshmorëve të Kombit, që ranë në Kosovë në Luftën Çlirimtare të Kosovës, pa të cilën, Berisha tha se, Pavarësinë do ta festonim si një trup gjysmë i paralizuar.

“Kjo luftë ishte një luftë, e cila e bashkoi kombin në traditën më të mirë të tij në përpjekjen për çlirim, për të përballuar spastrimin etnik dhe dëbimet masive të shqiptarëve nga Kosova dhe kjo duhet të bëhet element monumental në nderimin e vet. Është shumë e rëndësishme që të rënët e kombit duhet të nderohen kudo. Pavarësisht se kanë rënë në territorin e Shqipërisë apo të Kosovës apo trojeve tjera shqiptare. Ky 100-Vjetor të na shërbejë si një thirrje për një vështrim tërësor të të gjithë sakrificës së shqiptarëve për dinjitet. Është e domosdoshme të rikonceptohet në interesin më të mirë të unitetit kombëtar sakrifica kombëtare, që ka qenë e jashtëzakonshme dhe s`mund të mbyllet në banesën e harresës apo të mbetet lokale. Liria kombëtare është një dhe e pandarë”, tha Kryeministri.

Në këtë kontekst, kreu i qeverisë nënvizoi dhe mbajtjen e dy aktiviteteve shumë të rëndësishme në Kosovë gjatë ditës së nesërme, konkretisht vendosja e shtatores së Ali Ibrës në Gjakovë dhe të Isa Boletinit në Deçan, gjatë të cilave Berisha do të jetë i pranishëm edhe vetë.

Izraeli fiton betejën për dorëshkrimet e pabotuara të Kafkës

Një koleksion ende i paparë i shkrimeve të Franc Kafkës, të fshehura për katër dekada në një apartament në Tel Aviv do të bëhen publike dhe do të transferohen në Bibliotekën Kombëtare të Izraelit, në bazë të një vendimi gjyqësor, njofton agjencia e lajmeve Reuters. 

Dokumentet qenë mbajtur nga Eva Hoffe dhe Ruth Wiesler, dy motrat të cilat luftuan në një rast të gjatë katër vjeçar, në të cilin pretendonin se ato ishin trashëgimtare legale të dokumenteve, të cilat i morën nga nëna e tyre, Esther Hoffe, sekretarja dhe  mikja e ngushtë Kafkës si dhe nga Max Brodi.

Por, gjykata vendosi se Brodi, kishte urdhëruar me vullnetin e tij se shumica e dokumenteve që ai ia kishte dhënë sekretares, duhet të shkonin në një arkiv publik.

Kritikët besojnë se dokumentet mund të përfshijnë dorëshkrimet e Brodit, që do të mund të hidhnin dritë mbi jetën e Kafkës dhe kohën e kaluar në Pragë.

“Procesi”, “Kështjella” dhe “Amerika” janë veprat e Kafkës të botuara pas vdekjes së tij, pasi që Brodi, që është edhe biografi i tij, ka injoruar testamentin e shkrimtarit hebre të lindur në Pragë, që të gjitha dorëshkrimet e papublikuara të digjeshin.

Në vitin 1939 Brod iku nga nazistët, duke marrë trenin e fundit nga Praga me një valixhe të letrave të Kafkës nën krahun e tij.

Pas vdekjes së Brodit në Izrael në vitin 1968, arkivi iu kalua Esther Hoffes.

Suksesi i studiueses së informatikës

Ajo është pedagoge e informatikës në Universitetin Politeknik në Darmshtat të Gjermanisë ku ajo drejton laboratorin shkencor për inxhinierinë e programeve dhe për gjuhët e programimit

Me planifikimin për të ardhur në Gjermani në vitin 1989 për mbrojtjen e temës së doktoraturës, nis edhe rruga e karrierës së Mira Mezinit, në atë kohë pedagoge në Universitetin e Tiranës, dega Informatikë. Trazirat që nisën në ato vite bënë që ëndrrat e saj të shuheshin shpejt pas anulimit të të gjitha bursave për studime jashtë shtetit për shkak të situatës politike.|Por Mira me iniciativën e saj kontakton drejtuesin e qendrës informatike të Universitetit të Siegen-it që e kishte njohur gjatë një vizite të tij në Universitetin e Tiranës e më pas edhe me profesorin që do ta drejtonte në dhënien e doktoraturës. Kështu në fund të shtatorit 1989 ajo u gjend në Gjermani, në Qendrën e Informatikës në Siegen, dhe këtu e ka zanafillën e ardhmja e saj ambicioze. Fillimisht katër muaj, pastaj një vit e kështu me radhë projekte dhe titulli Doktore e Shkencave inxhinierike. Pas kësaj vijon një periudhë si Profesore në Universitetin Northeasten në Boston të SHBA-së dhe që prej vitit 2002 ajo është Profesore dhe drejtuese katedre në fakultetin e informatikës në Universitetin Politeknik të Darmshtatit, në atë kohë Profesorja e parë femër dhe më e reja në moshë në këtë fakultet.
Pak fat në fillim dhe vullnet në vijim ajo realizon ëndrrat
Vajza nga Tirana që kishte studiuar për informatikë në kryeqytetin e Shqipërisë diktatoriale nuk e fsheh faktin se jo pak, atë e kishte ndihmuar edhe fati: “Njohja menjëherë e diplomës shqiptare nga autoritetet gjermane ishte vërtet fat, pasi më pas procedurat ndryshuan. Por fat ishte edhe profesori i doktoraturës, i cili më ftoi në shtëpinë e tij dhe më trajtonte si vajzën e tij. Kjo më ndihmoi shumë në atë fillim të vështirë dhe pa përvojë”. E mirëpritur në punën, që nisi në Qendrën Informatike të Siegenit, Mira filloi të përballonte më lehtë sfidat që kishte përpara. Për punën e saj shkencore dhe hulumtimet e bëra në fushën e informatikës në Universitetin Teknik të Darmshtatit, ajo ka fituar dy herë çmimin “IBM Eclipse Innovation Award”, duke u renditur ndër pesë fituesit gjermanë të këtij çmimi. Përmes këtij çmimi, koncerni kompjuterik IBM promovon shkencëtarët që pasurojnë me ide të reja teoritë, metodat dhe mjetet për rritjen e prodhimtarisë në programimin e softwarit.
Puna e saj shkencore vlerësohet nga koncerni IBM
 Inxhinierja Mezini është autore dhe bashkautore e disa librave shkencorë për informatikën në gjuhën gjermane dhe angleze e respektuar në komunitetin internacional shkencor në fushën e saj, ka drejtuar disa konferenca dhe shoqata ndërkombëtare shkencore. Ajo është zëvendësdekane dhe dekane e ardhshme e Fakultetit të Informatikës dhe në bordin drejtues të dy institucioneve shkencore. Rruga e saj e suksesshme do të përballonte edhe një sfidë tjetër të saj, atë të të qenit nënë e një vajze. Ishte pikërisht vullneti dhe dëshira e Mirës që të bënte realitet edhe këtë ëndërr: “Kam pasur mendimin se nuk do t'i përballoja dot, prandaj u bëra mama pak më vonë, se sa duhej të isha bërë. Megjithatë tani që jam bërë mama them që gjërat me një vullnet gjithmonë arrihen.”
 Emri: Mira Mezini 
Vendbanimi: Darmshtat, Gjermani
Shkollimi: Universiteti i Tiranës
 Profesioni: Pedagoge e informatikës pranë Universitetit Teknik, Darmshtat
Jeta: Inxhinierja Mezini është autore dhe bashkëautore e disa librave shkencorë për informatikë në gjuhën gjermane dhe angleze. Sot Mirën, që e quan fat që ka ardhur në Gjermani dhe jeton mes gjermanëve, nuk e pengon fakti që është shqiptare, sepse “vetë arritjet, puna ime më bëjnë të jem krenare, edhe pse në Gjermani ka ende njerëz që kanë imazh jo të mirë për vendin tonë”, thotë ajo. Kanë kaluar më shumë se dy dekada në Gjermani, dhe Mira përsëri e kthen kokën pas duke ndjekur nga afër auditorin e Tiranës, kolegët e saj në këtë degë. „Më vjen keq që atje mungojnë punët kërkimore shkencore dhe që mungojnë kushtet e mirëfillta për pedagogët dhe studentët e kësaj dege dhe mbi të gjitha respekti i shoqërisë së sotme shqiptare për edukimin dhe punën shkencore. Mungon kreativiteti i studentëve dhe dëshira për të bërë një mësim më aktiv". Mësimdhënia në gjuhë të huaj është një sfidë për Mirën. Por ajo e adhuron profesionin e saj, faktin që punon mes të rinjve, studentëve dhe bashkëpunëtorëve shkencorë të etur për dije dhe për të "ndryshuar botën", konfrontimi i vazhdueshëm me ide të reja, me projekte kërkimore shkencore që kërkojnë ta mbash trurin gjithmonë në aktivitet, thotë ajo. Për projektet e saj në të ardhmen, ekspertja për informatikë, Mira Mezini nuk e përjashton edhe rrugën e komercializimit. 

Nga spiker i lajmeve në Shqipëri, mjek në karrierë në Gjermani

Mjeku i ri Kreshnik Hajdari tregon eksperiencën e tij në Gjermani, përparësitë që gjen atje dhe çfarë i mungon nga Shqipëria. Ëndrra në sirtarë? Spiker lajmesh    

Eliana Xhani

Sëmundjet janë të njëjta në të gjithë botën. Ajo që ndryshon sot në mjekësi është mënyra e trajtimit të pacientit, kushtet e spitaleve dhe teknologjia që përdoret. Kjo gjë bën që mjekët ta kenë relativisht të lehtë të gjejnë një vend pune thuajse në çdo vend të botës, mjafton të njohin shumë mirë profesionin e tyre. Këtë gjë mendoi edhe 31-vjeçari Kreshink Hajdari, para se të mbërrinte në Gjermani për të bërë specializimin e tij. Ai ka mbaruar Fakultetin e Mjekësisë në Tiranë në vitin 2005. Pas një stazhi pune për mjekësi familjeje në Spitalin e Lushnjës, qyteti i tij i lindjes, vendos për të bërë një hap më të sigurt drejt të ardhmes profesionale duke kryer një specializim në mjekësi të brendshme në spitalin “Sankt Elisabeth Krankenhaus” në qytetin e vogël të Gerolstein. “Ishte një sfidë e madhe për mua. I kam thënë vetes një gjë: Nëse njerëzit në Gjermani e bëjnë këtë, mund ta bëj edhe unë. Duke qenë se këtu punohet më shumë se në Shqipëri mund të arrish shumë në një kohë shumë të shkurtër. Dëshiroja të praktikoja më shumë dhe të isha më i aftë profesionalisht”, tregon mjeku asistent Kreshnik Hajdari. Në planet e tij të mëparshme nuk kishte qenë asnjëherë Gjermania, por këshilla e një miku dhe informacioni se ishte një vend i lirë në spitalin “Sankt Elisabeth Krankenhaus” në Gerolstein, bëri që për 5 muaj të mësonte gjuhën gjermane me anë të një kursi intensiv dhe të aplikonte në internet. “Spitali u përgjigj menjëherë. Erdha për të bërë intervistën e punës dhe më pranuan. Pasi u ktheva në Shqipëri për të bërë procedurat e nevojshme për vizën e punës u ktheva sërish në Gerolstein, ku nxora lejen e profesionit dhe atë të qëndrimit. Fatmirësisht nuk ishte aq vështirë për shkak se këtu ka nevojë për mjekë”. Gjatë vizitës që i bëmë në ambientet e spitalit, mjeku shqiptar përshëndetej nga të gjithë kolegët e tij ose pacientët dhe komunikimi ishte i rrjedhshëm, por nuk ishte kështu fillimi. Mjeku i ri na tregoi se në ditët e para e kishte shumë të vështirë të komunikonte, sepse i mungonte praktika e gjuhës gjermane. Situatat e vështira tashmë kanë kaluar falë ndihmës së kolegëve, por natyrisht edhe mos ngurrimit të tij për të pyetur dhe për të mësuar gjëra të reja. “Në fillim kisha frikë se sa shpejt do të kapja ritmin e punës dhe se sa shpejt do mësoja si funksiononin gjërat, por falë ndihmës së stafit kjo frikë nuk ekziston më. Nuk ka bërryla nga kolegët. Ka një etikë pune që është shumë e mirë. Nuk ka nervozitet, nuk shkarkon asnjeri nervat mbi ty, madje as familjarët e pacientëve, ndryshe nga ç’ndodh në Shqipëri sepse kjo përbën stres për mjekun. Këtu është një ambient shumë i rehatshëm për të komunikuar dhe mbi të gjitha për të menduar më shumë për pacientin”. Jo vetëm sistemi i sigurimeve, por edhe infrastruktura e spitaleve dhe përgatitja akademike e stafit është shumë më e mirë se sa ajo që Kreshinku ka lënë në Shqipëri. Ai na tregon se në çdo spital të Gjermanisë gjen një profesor sepse shefat e pavionëve duhet të kenë titull akademik, ndërkohë në Shqipëri mjekët e mirë janë të përqendruar vetëm në Tiranë, ndërsa në rrethe ka mungesë të theksuar specialistësh. Por sipas tij, që edhe në Shqipëri të ketë një sistem shëndetësor tërësisht në shërbim të pacientit duhet të ndryshojnë dy gjëra: Mentaliteti i çdo mjeku, që duhet t’i shërbejë sa më mirë pacientit dhe jo ta shikojë si një profesion ku mund të bëjë para dhe duhet të ndryshojë totalisht skema e sigurimeve shëndetësore. “Kam ardhur në Gjermani me mendimin për t'u kthyer në Tiranë, pavarësisht se atje mund të ketë më shumë probleme. Më pëlqen të jetoj në Shqipëri, për të ndryshuar diçka atje dhe për t’u shërbyer pacientëve shqiptarë”.
Kreshniku është
 duke jetuar në Gerolstein me bashkëshorten e tij Donikën, por nëse krahason Tiranën me qytezën e vogël në Gjermani, ai na tregon se i mungon gjallëria e kryeqytetit shqiptar. Jo vetëm gjallëria, por edhe diçka tjetër shumë e rëndësishme për të: puna në media. Publiku në Shqipëri e ka parë si spiker lajmesh në televizione të ndryshme dhe shumë pak e dinë që ai është edhe një doktor. “Media është ëndrra në sirtar. Është një eksperiencë shumë e bukur dhe do të dëshiroja ta vazhdoja. Tani jam i përqendruar tek mjekësia, por ndoshta në të ardhmen mund të bëj edhe një edicion lajmesh në televizionet gjermane.”

Edi Rama, i lidhur me Skënder Tufën

Partia Demokratike ka dalë sot me një deklaratë për shtyp, ku tema kryesore dhe e vetme ishte ajo e ish-të përndjekurve politikë dhe greva e tyre e urisë. Edhe pse ish-të persekutuarit protestojnë e prononcohen në media me vite për problemet e tyre, akuza kryesore si organizatore e kësaj greve ra pa prova e fakte mbi kreun e PS-së, Edi Rama dhe u bë fakt i kryer lidhja e tij me koordinatorin e grevës së urisë, Skënder Tufa, ndërkohë që këtij të fundit i faktuan “i dënuar për shfrytëzim prostitucioni”.


Të dy këto emra, Edi Rama dhe Skënder Tufa janë përdorur në çdo rresht të deklaratës si më poshtë:

Edi Rama, i lidhur me Skënder Tufën

“Në kuadrin e Rilindjes së Bllokut, Edi Rama nën moton: ‘Fundërrina të të gjithë Shqipërisë bashkohuni për të përmbysur Sali Berishën!’, shpalli këto ditë publikisht aleancën e tij të fundit me trafikantin Skënder Tufa, arrestuar në vitin 2004 me akuzën ‘shfrytëzim prostitucioni’ dhe dënuar me vendim të formës së prerë 7 vite burg për veprimtarinë e tij kriminale. Kryetari i Partisë Socialiste, Edi Rama, jo pa qëllim zgjodhi për aleancë të re të Rilindjes së tij dhe menaxhimin e grevës së urisë të një grupi të vogël të keqpërdorur pamëshirshëm prej tij, trafikantin Skënder Tufa, të dalë nga burgu pak kohë më parë, pasi vuajti dënimin. Zoti Rama zgjodhi trafikantin Tufa për menaxhimin e grevës së tij private së pari për t’ju dërguar një mesazh të qartë të gjithë trafikantëve në Shqipëri, se ai me moton: “Fundërrina të të gjithë Shqipërisë të bashkohemi kundër qeverisë së kryeministrit Sali Berisha”, e ka një moto kryesore në rrugën e tij të Rilindjes së premtuar. Zoti Rama zgjodhi trafikantin Tufa për menaxhimin e grevës si një akt hakmarrës, si një përpjekje për të diskretituar qëndresën heroike të të përndjekurve politikë kundër regjimit të etërve të tij.

Duke menaxhuar një grup të vogël të tyre me trafikantin Skënder Tufa, ai do që të paraqesë para qytetarëve dhe të rinjve shqiptarë, martirët e kalvarit hoxhist si njerëz të personifikuar nga kriminelë ordinerë, trafikantë të qenieve njerëzore. Partia Demokratike iu bën thirrje edhe një herë familjarëve të grevistëve: Mos lejoni që njerëzit tuaj të poshtërohen, duke u menaxhuar nga Edi Rama nëpërmjet aleatit të tij të ngushtë, Skënder Tufa.”

Më poshtë PD ka bërë përgjegjës Ramën për trajtimin e ish-të persekutuarve kur PS ka qenë në pushtte, edhe pse Edi Rama ishte thjesht kryetari i Bashkisë së Tiranës. “Partia Demokratike fton familjarët e viktimave të Edi Ramës dhe Skënder Tufës t’i shtrojnë pyetjen Edi Ramës: Pse 8 vjet në pushtet nxore nga burgu dhe shpërbleve me qindra milionë lekë xhelatët e të përndjekurve politikë të etërve tuaj, të dënuar për genocid dhe krime kundër njerëzimit dhe nuk dhe asnjë qindarkë për dhjetëra mijëra martirë të gjallë të kalvarit të bllokmenëve hoxhistë që shpërbleve?”

PD: “Të persekutuarit, 103 mln dollarë nga PD”

Partia Demokratike sqaroi edhe një herë shqiptarët, se ajo ‘me vetëdije të plotë dhe në vlerësim maksimal të vuajtjeve dhe sakrificave mbinjerëzore të martirëve të gjallë të kalvarit komunist, ka përcaktuar si normë dëmshpërblimi për ta normën ditore më të lartë se çdo vend tjetër ish- komunist’. Ajo i ka dhënë për këtë qëllim kësaj shtrese sa vijon: 103 milionë dollarë; 2 mijë e 200 apartamente banimi; 2 mijë e 751 fabrika e ndërmarrje, linja prodhimi dhe objekte të tjera, si dhe mbi 22 mijë të drejta studimi, bursa shkollimi ose pagesë e tarifave për hyrjen në universitet.

Dëmshpërblimi do t’u jepet në kohë

Partia Demokratike garantoi në deklaratë familjarët e viktimave të dyfishta të etërve dhe bijëve hoxhistë, se ajo është e vendosur, që në afatet e përcakuara ligjore të disburësojë plotësisht paratë e dëmshpërblimit të të përndjekurve politikë, ndaj dhe të mos lejojnë, që neobllokmenët e rinj me në krye Edi Ramën, që dje shpërblyen me qindra milionë lekë xhelatët e tyre, t’i menaxhojnë sot njerëzit tyre me trafikantë si Skënder Tufa.

PD: Edi Rama, aleancë me trafikantin, Skënder Tufa. Koordinatori, thirrje qytetarëve: Dilni në protestë

Vajza e Gjergj Ndreces ne proteste

Partia Demokratike ka lëshuar sot akuza të forta në drejtim të kreut të Partisë Socialiste, Edi Rama dhe koordinatorit të grevës së ish të përndjekurve, Skënder Tufa.

Zëdhënësja e PD-së, Silvi Bardhi nga selia blu akuzoi Edi Ramën si ideator të grevës, duke shtuar se ai ka zgjedhur për të menaxhuar grevën, trafikantin, kriminelin Skënder Tufa, i cili sipas PD-së, është dënuar me vendim të formës së prerë me 7 vite burg, për shfrytëzim prostitucioni.

“Në kuadrin e Rilindjes së bllokut Edi Rama nën moton: “Fundërrina të të gjithë Shqipërisë bashkohuni për të përmbysur Sali Berishen”, shpalli këto ditë publikisht Aleancën e tij të fundit me trafikantin Skënder Tufa, arrestuar në vitin 2004 me akuzën “Shfrytëzim prostitucioni” dhe dënuar me vendim të formës së prerë 7 vite burg për veprimtarinë e tij kriminale.”- thuhet ne deklaraten e PD-se.

Sipas PD-së, Rama ka zgjedhur për menaxhimin e grevës Tufën, si një akt hakmarrës, si një përpjekje për të diskretituar qëndresën heroike të të përndjekurve potitikë kundër regjimit të etërve të tij.

PD u ka bërë thirrje edhe njëherë familjarëve të grevistëve, që të mos lejojnë njerëzit e tyre që të poshtërohen duke u menaxhuar nga Edi Rama, duke shtuar se PD ka përcaktuar si normë dëmshperblimi për ta, normën ditore më të lartë se çdo vend tjetër ish- komunist.

Në përputhje me këtë përcaktim plotësisht të merituar ajo i ka dhënë për këtë qëllim kesaj shtrese sa vijon:

103 milionë Dollarë

2 mijë e 200 apartamente banimi,

2 mijë e 751 fabrika e ndërmarrje, linja prodhimi dhe objekte të   tjera si dhe mbi 22 mijë të drejta studimi, bursa shkollimi ose pagesë e tarifave për hyrjen në Universitet.

Ndërkaq, vajza e ish të përndjekurit politik, Gjergj Ndreca ka protestuar me mbështetjen e disa të rinjve, të cilët i kanë bërë thirrje qytetarëve që të reagojnë.

“Ngrije kokën o popull. Ku është patriotizmi juaj, nuk është patriotizëm të brohorasësh nëpër stadiume për Shqipërinë, por të mbrosh familjen. Po ju vdesin bijtë tuaj, ngrije kokën o popull”-ishte thirrja e saj.

Koordinatori i grevës së urisë, Skënder Tufa gjithashtu u bëri thirrje qytetarëve që të vijnë në vendin ku po mbahet greva, sepse sipas tij, kjo grevë po shkon drejt vdekjes së sigurtë. Ai bëri edhe njëherë apel për zgjidhje të çështjes me dialog dhe bisedime.

“Ne shprehim keqardhjen që përgjigja e shtetit ishte jo e drejtë. Ne kërkojmë sa më parë dialog, zgjidhje të problemit. Nëse do të vazhdohet kështu, nesër do të ketë zhvillimet të tjera.”- tha Tufa.