OKB e shqetësuar me situatën Kosovë – Serbi, kërkohet rifillimi i dialogut

Sekretari i Përgjithshëm i OKB-së, Antonio Guterres, është shprehur i shqetësuar në lidhje me tensionet mes Kosovës e Serbisë.

Guterres ka bërë apel tek të dyja shtetet që të përmbahen nga deklaratat nxitëse që mund të provokojnë telashe dhe ka kërkuar që pa vonesa t’i largojnë barrierat për vazhdimin e dialogut.

“Tensionet midis Prishtinës dhe Beogradit janë serioze edhe më tej dhe vazhdojnë të paraqesin barriera për vazhdimin e dialogut produktiv dhe nxisin shqetësimin mes zyrtarëve lokalë e ndërkombëtarë për shkak të rrezikimit të mundshëm të stabilitetit”, thuhet sipas mediave serbe në raportin e Guterres për gjendjen në Kosovë, që do të diskutohet më 10 qershor në seancën e Këshillit të Sigurimit.

Duke kërkuar që të hiqen barrierat për vazhdim të dialogut, Guterres ka shprehur shqetësimin duke thënë se taksat ndaj mallrave nga Serbia janë ende në fuqi, sikurse edhe paralajmërimet e presidentit të Serbisë, Aleksandar Vuçiq, për kundër-masa ndaj Prishtinës nëse nuk hiqet taksa.

Guterres ka theksuar se nga raportimi i tij i fundit, nuk është zhvilluar asnjë takim mes përfaqësuesve të Kosovës e Serbisë nën udhëheqjen e BE-së, ndonëse në fund të prillit dy palët u takuan në samitin e Berlinit të organizuar nga Gjermania dhe Franca.

Shefi i OKB-së thotë se nga raporti i tij i fundit, rrjedhimisht në gjashtë muajt e fundit, “në Kosovë janë kthyer 43 persona, nga të cilët 34 janë serbë”. Theksohet po ashtu se në gjashtë muajt e fundit kanë ndodhur disa incidente në vendbanimet me etni të përziera.

Vlen të theksohet fakti se SHBA-të dhe Britania kanë kërkuar që për Kosovën në Këshillin e Sigurimit të raportohet vetëm 2 herë në vit dhe jo 4 sa ka qenë deri më tani sipas Rezolutës 1244 të KS të OKB-së.

Për Goran Rakiqin, Hashim Thaçi, Ramush Haradinaj dhe Kadri Veseli janë kriminelë ndërsa Vuçiqi, Shesheli, Daçiqi dhe Vulini jo

Kryetari i Mitrovicës Veriore ( pjesë e ndarë dhunshëm ) , Goran Rakiq , nuk lë rast pa e theksuar se veriu i Kosovës dhe të gjitha vendet ku jeton edhe një serb i vetëm janë Serbi dhe se kryetar i tij është Aleksandar Vuçiqi dhe jo Hashim Thaçi ndërsa që shteti që e përfaqëson qenka Serbia dhe jo Kosova në ndërkohë që nga Buxheti i Kosovës merr pagë të majme dhe po nga Kosova i shfrytëzon të gjitha beneficionet e mundshme , që nga keq- përdorimi i veturave zyrtare e deri te asetet tjera . Për çdo veprim politik a parapolitik , ai shkon në Serbi e jo në Kosovë për këshilla apo marrje të lejes për veprim politik apo paramilitar . Që nga fillimi e deri te përfundimi i funksionalizimit të urës mbi lumin Ibër , ka qenë kundër hapjes së kësaj ure dhe kundër lëvizjes së lirë për të gjithë qytetarët , pavarësisht përkatësisë etnike , fetare , gjinore apo statusit në shoqëri ! Pasi kryeministri Haradinaj vendosi taksën 100% për mallrat nga Serbia dhe Bosnja , Goran Rakiq , me kryetarët e tjerë serbë të pjesës veriore dhanë dorëheqje nga posti por jo edhe nga pagat dhe beneficionet tjera duke e bllokuar jetën institucionale në veri. Pasi presidenti Thaçi , në kuadër të mandatit kushtetues shpalli zgjedhje lokale në veri , po i njëjti Goran Rakiq , me kryetarët tjerë nga Lista Serbe i fituan zgjedhjet lokale duke ushtruar dhunë dhe terror mbi subjektet tjera serbe që , për shkak të pasigurisë nuk morën fare pjesë në këto zgjedhje lokale. Pas certifikimit të këtyre rezultateve , kryetarët e vjetër dhe sabotues ndaj shtetit të Kosovës deklaruan se përsëri mund të japin dorëheqje dhe këtë vendim do ta marrin pas konsultimeve me krerët e Serbisë . Në ndërkohë , Goran Rakiq i quajti kriminelë udhëheqësit më të lartë shtetërorë të Kosovës sikur që i quajti terroristë edhe policët e Kosovës që intervenuan në veri të Kosovës , krejtësisht mbështetur në ligjet e vendit e që kryenin detyrën duke arrestuar shkelës të ligjit , shumica policë të Kosovës të të gjitha përkatësive etnike ( serbë , shqiptarë , boshnjak etj. ) . Intervenimi i Policisë së Kosovës në veri të Kosovës dhe në disa lokacione brenda Kosovës sikur edhe trajtimi i të arrestuarve ishte në përputhje të plotë me ligjin dhe të drejtat e njeriut.

Nuk është hera e parë që Goran Rakiq fyen në mënyrë aq të paskrupullt udhëheqësit më të lartë shtetërorë të Kosovës sikur që e mohon shtetin e Kosovës duke e konsideruar si pjesë të Serbisë dhe këtë e bënë falë Buxhetit të Kosovës e që në asnjë vend në botë nuk do të lejohej. Për këtë arsye , KMDLNj kërkon që ndaj Goran Rakiqit dhe të tjerëve të fillojnë hetimet ex – offitio nga autoritetet përkatëse dhe se për këtë aktivitetet armiqësorë ndaj shtetit të Kosovës të jep llogari para ligjit. Vet kërcënimi se do të japin dorëheqje pas takimit të Parisit dhe në pajtueshmëri të plotë me shtetin e Serbisë paraqet argument të mjaftueshëm të hetohet dhe gjykohet për shpërdorim të Buxhetit të Kosovës për faktin se për organizim të zgjedhjeve lokale janë shpenzuar afërsisht 800.000 euro nga Buxheti i Kosovës . Nëse Goran Rakiq deklarohet se është shtetas i Serbisë dhe se vetëm Vuçiqin e konsideron president të vetin si dhe Serbinë shtet që i bindet dhe i shërben atëherë ai duhet të trajtohet nga autoritetet kosovare në përputhje me këtë deklarim dhe sjellje !

KMDLNj konsideron se të gjithë ata që i fyejnë institucionet e Kosovës , pavarësisht përkatësisë etnike dhe të tjera duhet të sanksionohen me ligj dhe se të gjithë ata që punojnë kundër interesave shtetërore duke i shërbyer publikisht një shteti armiqësorë ndaj Kosovës duhet gjithashtu të sanksionohen me ligj sikur që nuk duhet të paguhen për këtë shpërfillje dhe dëmtim që i bëjnë shtetit të Kosovës. Institucionet e Kosovës duhet ta eliminojnë shprehjen e diskriminimit pozitiv , qoftë si term e lëre më si veprim për faktin se është një formulim politik dhe kundër të drejtave të njeriut . Kosova duhet të krijojë kushte për trajtim të barabartë dhe jo-diskriminues për të gjithë qytetarët e saj pavarësisht përkatësisë etnike , gjinore , moshore , racore , bindjeve politike apo statusit në shoqëri që e obligon Kushtetuta e Kosovës dhe dokumentet ndërkombëtare për të drejtat e njeriut sikur që e bëjnë të gjitha vendet e botës e jo të krijojë rrethana diskriminuese ( për komunitetet tjera jo-serbe në Kosovë e që janë bashkëpunuese si dhe serbët e Kosovës e që gjithashtu janë bashkëpunues ) dhe rrethana favorizuese për serbët që përfaqësohen përmes Lista Srpska e që në asnjë mënyrë nuk duhet të përkrahen nga shteti i Kosovës !

Sipas KMDLNj tërësia territoriale e Kosovës është e pacenueshme dhe askush nuk ka të drejtë ta negociojë ( në çfarëdo forme qoftë ) tërësinë territoriale . Për këtë arsye , Goran Rakiq është kundër interesave të Kosovës , kundër interesave të serbëve të Kosovës dhe se aktiviteti i tij destruktiv dhe kriminal kundër Kosovës duhet të ndërpritet me masa ligjore. Në të kundërtën , për mosveprim , vet shteti i Kosovës do të marrë përgjegjësi për përshkallëzim të mundshëm të situatës në Veri të Kosovës e që duket të jetë i paevitueshëm!

Kush ishin?

Historitë e 10 tradhëtarëve më të mëdhenj të njerëzimit!


Disa e bëjnë për ideale, disa për para e të tjerë për politikë. Tradhtia gjithnjë dëmton njërën palë, por në disa raste pasojat janë të pallogaritshme. Personat në këtë listë kanë shitur vendet e tyre, miqtë e tyre, e disa dhe familjet, duke ndryshuar rrjedhën e historisë përgjithmonë.

Juda Iskarioti

Sipas Biblës, Juda Iskarioti e tradhëtoi Jezu Krishtin për 30 monedha argjendi, dhe qysh atëherë, emri i tij ka qenë sinonim i tradhëtisë prej babëzisë. Juda ishte një nga 12 apostujt e Jezusit dhe historia e Judës si akt tradhtie është regjistruar në ungjijtë kanonikë të Biblës. Tek Mateu 26: 14-16 shkruhet: “Atëherë një nga të dymbëdhjetët, me emrin Judë Iskarioti, shkoi te krerët e priftërinjve dhe u tha atyre: “Çfarë do të më jepni, që ta dorëzoj atë tek ju? Dhe ata i numëruan tridhjetë monedha argjendi”.



Jezusi ishte në shënjestrën e krerëve të priftërinjve, dhe Juda e tradhëtoi me një puthje.

Kjo “puthje e Judës” çoi në gjykimin dhe vdekjen në kryq të Jezusit duke e bërë Judën, tradhtarin më të madh në histori.

Puthja nuk ishte një shenjë e dashurisë; ajo ishte në të vërtetë një sinjal për të udhëhequr ushtarët, që menjëherë arrestuan Jezusin dhe e çuan atë te priftërinjtë e lartë. Jezusi u akuzua për blasfemi, u shpall fajtor, i lidhur u dorëzua në duart e Ponc Pilatit, guvernatorit, i cili e dënoi me vdekje. Ushtarët e zhveshën Jezusin, vendosën një kurorë me gjemba mbi kokën e tij dhe e kryqëzuan duke e gozhduar në kryq. Juda u mbush me keqardhje dhe u përpoq të kthente argjendin, por priftërinjtë nuk do ta pranonin më. Në fund, Juda vari veten. Pak gjëra të tjera dihen për jetën e Judës. Disa historianë besojnë se mbiemri Juda, Iskarioti, është i lidhur ngushtë me fjalën latine për vrasje – sicarius – dhe mund të mos të jetë fare në të vërtetë emri i tij i familjes. Në çdo rast, “Juda” mbetet një sinonim për “tradhtar” edhe sot e kësaj dite.

Bruti

Më 15 mars të vitit 44 pes Jul Cezari, “diktator për jetë” i Republikës Romake, vritet nga senatorët gjatë një takimi në sallën e Teatrit Pompei, Romë. Në komplot morën pjesë rreth 60 fisnikë, përfshi edhe personin për të cilin Cezari ishte kujdesur aq shumë, Marcus Brutus.



Cassiusi, një gjeneral romak i cili shkëlqente në punën e tij nuk ishte një tifoz i madh i Jul Cezarit. Ndërsa Cezari erdhi në pushtet nga një “valë” popullore dhe e shpalli veten lider të përjetshëm të Romës, Casiusi filloi të nervozohej prej sundimin të Cezarit. Përfundimisht, ai e bindi mikun dhe shokun e tij romak, gjeneralin e përgjithshëm, Brutin që “duhej të ndihej” në të njëjtën mënyrë. Edhe pse Bruti ishte mik i Cezarit, ai është udhëhequr nga një “ndjenjë e detyrës”, që e bëri të prekshëm ndaj manipulimeve emocionale prej Casiusit.

Pasi Casiusi i dërgoi Brutit letra të rreme duke theksuar mbështetjen e popullit për vdekjen e Cezarit, Bruti vendosi të veprojë sipas, i udhëhequr prej një sensi të gabuar të nderit. Në 15 mars mars, 44 pes, Bruti udhëhoqi një grup senatorësh që të godasin Cezarin për vdekje, me 23 thika në dyshemenë e senatit, gjë që i bëri Casius-in dhe Brutin një prej çifteve të parë të tradhëtarëve në histori – si dhe më famëkeqët.

Edhe ti, Brut?

Diçka është e sigurtë. Jul Cezari nuk e tha frazën e famshme: “Edhe ti, Brut? Dijetarët thonë se fraza latine “Et tu, Brute?” arriti në kohët tona ndoshta falë Uilliam Shekspirit i cili e përdori atë në tragjedinë Jul Cezari (1599). Ndërsa, Plutarku thotë se Cezari nuk foli fare por kur pa Brutin mes komplotistëve, mbuloi kokën me pelerinën e vet dhe e la ta godiste.

Vidkun Kuisling



I konsideruar si një i majtë lunatik në Norvegji, Vidkun Quisling (Kuisling) nuk ra shumë në sy deri sa formoi partinë e tij të Unitetit Kombëtar, në vitin 1993. Ai e adhuronte Hitlerin dhe besonte në doktrinën e fashizmit. Quisling, gjeneral ushtarak, arriti të takohej me Hitlerin dhe e siguroi atë se kishte gjithë informacionin e duhur për strategjinë ushtarake norvegjeze.

Pas takimit me Adolf Hitlerin, të cilin e inkurajoi për të pushtuar Norvegjinë, ai priti për pushtimin gjerman të bëhej i plotë – dhe pastaj caktoi veten si udhëheqës të Norvegjisë. Mbretërimi i tij zgjati vetëm një javë para se ai u largua nga forcat gjermane, në “minister president.” Kjo për fat të keq, nuk e ndaloi atë të dënonte pothuajse 1,000 hebrenjve në kampet e përqendrimit.

Në fund të Luftës së Dytë Botërore në vitin 1945, Quisling u shpall fajtor për tradhëti dhe u ekzekutua. Emri i tij do të jetojë përgjithmonë në turp, pasi “Kuisling” u bë sinonim për tradhtar apo bashkëpunëtor të armikut.

Pesëshja e Cambridge



Janë pesë spiunët më të famshëm të Luftës së Ftohtë. Ishin të së njëjtës shkolle, asaj të Kembrixhit, por që ndryshonin jo pak njëri nga tjetri. Të përbashkët nuk kishin vetëm shkollën, por dhe saktësinë dhe rendimentin e tyre informativ. Dhe sot, kur arkivat e KGB-së sulmohen nga ushtria e madhe e gazetarëve dhe historianëve, çuditen kur në to gjejnë pak, fare pak për arsyen e thjeshtë se gjithçka qe origjinale, nga frika e dekonspirimit, zhdukej dhe zhdukja më e madhe u bë më ’53 kur vdiq Stalini. Ruajtja e tyre do t’u jepte historianëve çelësin për të hyrë në hullitë e holla të grupeve agjenturore që vepronin në BS, Gjermani, Francë, Spanjë, Afrikë e gjetkë. Nga ku do të mundnin të nxirrnin historinë e plotë të pesëshes së Kembrixhit.

Kush ishin

Një feminist i cili u martua katër herë. Një homoseksual pompoz, me një dobësi për pijen. Një historian i njohur arti të cilit iu dha titulli kalorës nga Mbretëresha Elisabeta II. Ky mund të tingëllojë si formacion për një ministerial të ri të HBO-së, por këta njerëz ishin spiunë të vërtetë gjatë Luftës së Dytë Botërore dhe më gjerë. Së bashku me dy shokët e diplomuar të Universitetit të Cambridge, ata penetruan agjencitë britanike të inteligjencës dhe i dhanë sekretet sovjetikëve.

Cambridge Five – Harold “Kim” Philby, Donald Maclean, Guy Burgess, Anthony Blunt dhe John Cairncross – ishin anëtarë të elitës britanike dhe gjetën strehë në besimet e tyre komuniste. Madje ata refuzuan pagesën për punën e tyre si spiunë.

Të gjithë ishin të punësuar për të punuar në pozicione kyçe të inteligjencës britanike dhe vazhdimisht sinjalizonin Moskën për planet britanike dhe amerikane, përfshirë përpjekjet për të ndërtuar një bombë atomike në vitin 1941 dhe strategjinë Koreane të Luftës, duke shkaktuar vdekjen e shumë njerëzve. Gjërat filluan të zbuloheshin kur amerikanët deshifruan një mesazh të koduar sovjetik që implikonte Macleanin. Philby e paralajmëroi atë, dhe në 1951 Maclean dhe Burgess menjëherë dezertuan në Rusi – një lëvizje që i la spiunët e mbetur nën një re të ulët dyshimi.

Kim Philby bëri shaka me gazetarët në shtëpinë e nënës së tij gjatë një konference për shtyp në 1955, dhe pasi “u pastrua”, informoi për Guy Burgess dhe Donald Maclean se inteligjenca britanike u ishte vënë pas. Philby më pas dha dorëheqjen nga MI6, por agjentët e morën në pyetje në lidhje me këtë përsëri në vitin 1963, dhe kur po i afroheshin, ai u arratis në Rusi. Për arsye të Kim Philby-t dështuan edhe misionet amerikane në Shqipëri.

Philby dhe Cairncross u hetuan nga MI6, shërbimi inteligjent britanik i jashtëm, por nuk u akuzuan. Megjithatë, të dy u detyruan të japin dorëheqjen. Cairncross u zhvendos në Francë ndërsa Philby u arratis në Rusi në 1963. Blunt u rrëfye dhe iu garantua imunitet të mbetet në Angli. Atij iu hoq titulli i kalorësit kur kryeministrja Margaret Thatcher zbuloi publikisht spiunazhin e tij në vitin 1979. Maclean, Philby (i cili kishte një marrëdhënie me gruan e MacLean-it) dhe Burgess të gjithë jetuan në Moskë deri sa vdiqën, me nostalgji për Anglinë.

Kim Philby, i rrethuar nga miqtë e tij të shumtë, më 10 maj të vitit 1988, heroi më emblematik i spiunazhit, gjenerali më i famshëm i kundërzbulimit, intelektuali i rangut të lartë, aspiruesi më i devotshëm i idealeve komuniste, vdiq. Varrimi i Kim Philby-t ishte madhështor, siç ishte edhe vepra e emri i tij.

Asnjëri nga të pestë nuk u akuzua kurrë, për asnjë krim.

Robert Hanssen



Hanssen u rrit në një familje të shkatërruar dhe rrihej nga i ati. Ai filloi punën si oficer policie në Çikago, por më pas e la për t’u punësuar si agjent special i FBI-së, në vitin 1976. Në vitin 1979 ai përfshi në kundër-spiunazhin e FBI-së dhe kjo hapi rrugën që ai të kryente një prej akteve më tradhtare në historinë e Amerikës. Në vitin 1983, Hanssen transferoi një njësi spiunazhi sovjetike brenda FBI-së, duke u dhënë atyre informacion pa fund.

Hanssen punoi si ndërlidhës ndërmjet FBI-së dhe zyrës përgjegjëse për ndjekjen identiteteve të spiunëve që punuan në SHBA. Nga fillimi i viteve 2000, hetuesit besonin se ai kishte 20 vjet që ndante sekrete shtetërore. Ata dyshuan se ai kishte zbuluar identitetin e dhjetëra agjentëve sovjetikë që punonin për SHBA-në dhe çoi në vrasjen e disave prej tyre.

Dhe Hansseni nuk u ndal me aq. Ai furnizoi qeverinë sovjetike me planet amerikane, duke përfshirë procedurat për trajtimin dhe kundërpergjigjen në rast të një sulmi bërthamor sovjetik. Megjithëse ai ishte paguar $ 1.400.000 dhe disa diamante për përpjekjet e tij, kolegët thanë se duket se ka qenë më i motivuar prej dëshirës për të luajtur lojën e spiunit, se sa prej lakmisë.

Hanssen u kap kur FBI pagoi një ish-agjent të KGB-së të bëjë të ditur identitetin e urithit që vepronte në FBI. Në vitin 2002, Hansseni u shpall fajtor me 15 akuza për spiunazh dhe komplot. Ai u dënua me burgim të përjetshëm.

Aldrich Ames



Ames hyri në ambasadën sovjetike në Uashington në vitin 1985 dhe ofroi të shiste sekrete amerikane për një arsye të vetme, para. Ai ishte një alkoolist me një bashkëshorte shumë të shtrenjtë. Falë Aldritch, i cili fitoi rreth 4.6 milionë dollarë për përpjekjet e tij, 10 amerikanë u ekzekutuan sepse u zbulua identiteti i tyre prej agjentësh sekretë.

Tradhtari i Spartës



Ngushtica e Termopileve u mbajt për 3 ditë nga vetëm 300 spartanë kundër një ushtrie të madhe persiane. 299 prej tyre u zhdukën.

Për 48 orë, mbrojtësit e Termopileve qëndruan në luftë, madje dhe mposhtën jo vetëm forcat ushtarake të dobëta, por edhe elitën ushtarake perse. Fatkeqësisht për grekët, Termopilet kishin një rrugë sekrete kalimi nga e cila mund të anashkaloheshin forcat mbrojtëse. Në ditën e gjashtë (dita e dytë e luftimit), persët ndoqën me anë të një tradhtari këtë rrugë dhe u përgatitën për ti zënë grekët në befasi.

Tradhtari ishte Ephialtes u bë famëkeq në Greqi, pasi ai tradhtoi vendin e tij tek persët në vitin 480 para Krishtit. Gjatë betejës së Termopileve, ai udhëhoqi ushtrinë persiane në një rrugë që i dha akses për të kapur në befasi spartanët, duke shpresuar për një shpërblim nga lideri persian, Kserksi. Megjithatë, ai nuk korri një shpërblim. Ai u vra më vonë dhe emri i tij u bë sinonim i tradhtisë, ndërsa 300 spartanët që mbrojtën Termopilet hynë në histori si legjendarë.

Çifti Rosenberg



T’u shesësh rusëve sekrete gjatë Luftës së Ftohtë ishte shkalla më e lartë e tradhëtisë. Çifti amerikan Rosenberg ishte gati të bënte çdo gjë për bindjet e tyre komuniste. Julius dhe Ethel Rosenberg ishin anëtarë të partisë Komuniste që prej vitit 1943, kur papritur u tërhoqën nga aktiviteti politik. Ky ishte viti kur bashkuan forcat me super-spiunin rus, Feliksov. Ata u arrestuan në vitin 1950 dhe të dy u ekzekutuan më 19 qershor 1953.

Në vitin 1995, qeveria amerikane lëshoi një seri kabllogramesh sovjetike me emrin e koduar “Venona”, që konfirmojnë se Julius kishte vepruar si agjent ndërlidhës dhe rekrutues për sovjetikët, por lënë të paqartë përfshirjen e gruas së tij, Ethel në këtë veprimtari. Në kujtimet e botuara pas vdekjes, Nikita Hrushovi, udhëheqës i Bashkimit Sovjetik 1953-1964, shkruan “nuk mund të them në mënyrë specifike se çfarë ndihme na dha çifti Rosenberg, por kisha dëgjuar nga Stalini dhe Molotovi se Rosenbergët kishin dhënë ndihmë shumë të rëndësishëm në përshpejtimin e prodhimit të bombës atomike sovjetike”.

Wang Jingwei



I konsideruar një prej tradhtarëve më të mëdhenj në historinë kineze, Wang Jingwei lindi në vitin 1883. Në moshën 21-vjeçare ai shkonte në shkollë në Japoni, ku u takua me revolucionarin e famshëm japonez, Sun-Yat Sen. Nën influencën e Sen ai filloi të merrte pjesë në komplote kundër qeverisë, duke përshirë dhe atentatin e dështuar për vrasjen e Manchu Regent në Pekin. Në vitin 1937 Wang nis marrëveshjet e tij të tradhtisë me japonezët, duke fituar një vend të rëndësishëm në historinë e tradhtisë.

Guy Fawkes



Guy Fawkes ishte pjesë e një grupi revolucionar të quajtur “Roman Katolikët”, të cilit kishin në plan të hidhnin në erë pjesën më të madhe të aristokracisë britanike, në vitin 1605. Atentati u zbulua nga autoritetet, të cilët e kapën Faëkes, para se ai të vinte në plan qëllimet e tij vrastare.

Guy Fawkes besonte në idealet e tij dhe nuk u thye as nën torturë të jepte emrat e bashkëpunëtorëve të tij.

Historia e tij është subjekt i filmit “V for Vendetta”. Edhe sot e kësaj dite, veprat e Fawkes konsiderohen legjendare, ndërsa Anglia e feston zbulimin e Komplotit të Barotit më 5 nëntor me zjarre, fishekzjarre dhe djegie efigjish të konspiratorit

Christopher Hill rikujton se pesë vende të BE-së “kanë Kosovat e veta”, e ai e do të pavarur

Christopher Hill rikujton se pesë vende të BE-së “kanë Kosovat e veta”, e ai e do të pavarur

Fjalët për ndryshim kufijsh janë vetëm “simptome” të problemit të Kosovës. Kështu i ka thënë Deutche Welles në gjuhën serbe ish i dërguari special amerikan për Kosovën. Christopher Robert Hill.

“Më vjen keq që në vitin 2019 ende janë pesë vende të BE-së të cilat ende nuk e kanë njohur pavarësinë e Kosovës. I kuptoj arsyet, sepse secila e ka Kosovën e vet”, është shprehur Hill.

“Por, nëse më pyetni për qëndrimin tim, unë e dua Kosovën që është bërë shtet i pavarur, meqë njerëzit e saj kanë dashur që ajo të jetë e pavarur, por që ky shtet i pavarur të jetë i pranueshëm për fqinjët dhe gjithë Europën. Ka ende shumë punë”, ka shtuar ai,

“Mendoj se çështja e Kosovës mbetet çështje që ndan Europën nga qëllimi i saj që të bëhet e tërë dhe në paqe”, është shprehur Hill.

Christopher Hill (66) sot është profesor i praktikës diplomatike në Universitetin e Danverit, i cili përvojën diplomatike e ka nisur që kur ishte 26 vjeç, kur u dërgua të shërbejë në Ambasadën amerikane në Beograd.

Bënte pjesë në treshen për Kosovën, bashkë me të deleguarin europian Wolfgang Petrichin, dhe atë rus – Boris Mayorskin.

Migjen Kelmendi: Mediat në Kosovë udhëhiqen nga politika dhe bizneset

Kosova sipas raportit të ri të organizatës “Reporterët pa Kufij” është renditur në vendin e 75 në botë sa i përket lirisë së shtypit.

Për Ballkani.info publicisti dhe gazetari i njohur Migjen Kelmendi, që është edhe pronar i mediumit “Rrokum Tv”, ka thënë se liria e shtypit në tërë Ballkani është duke u degraduar, pasi sipas tij mediet janë duke u kontrolluar nga fuqitë e mëdha.

E në Kosovë, sipas Kelmendit kanë mbetur tepër pak mediume që duhet t’u besohet, pasi sipas publicistit nuk ka treg të rregulluar medial dhe ka dështim të rregullatorit medial.

“Mungesa e tregut medial dhe dështimi i rregullatorit medial bënë që në media të keq ndikim të njerëzve të pushtetit nga sfera politike dhe ajo e bizneseve”, ka pohuar Kelmendi.

Sipas tij gazetaria dhe liria e shtypit është edhe më keq në Shqipëri dhe vendet përreth.

“Në vendet fqinje çështja ka filluar të bëhet qesharake nëse ti ke ambicie me fillu me ba një media të pavarur”, shtoi Kelmendi për Ballkani.info.

Raporti nga “Reporterët pa Kufij” flet edhe për Malin e Zi ku ka renditjen më të ulët për Lirinë e Shtypit, pasi organizata e ka renditur në vendin e 104.

Vendet tjera të rajonit kanë këtë renditje: Bosnjë dhe Hercegovina në vendin e 63, Kroacia 64, Serbia 90 dhe Shqipëria në vendin e 82.

Ndërkaq, Kosova është radhitur më mirë se Shqipëria dhe Serbia, duke zënë kështu vendin e 75-të.

(Migjen Kelmendi (lindur më 12 shtator 1959) është autor dhe publicist nga Kosova. Për herë të parë, ai u bë i njohur si këngëtar i rock grupit muzikor "Gjurmët". Në vitet 1978-1983 studioi dhe kreu Fakulteti juridik në Universitetin e Prishtinës. Nga viti 1988 deri më 1990 ishte redaktor përgjegjës i programit të Kontaktit të Radio Televizionit të Prishtinës. Në vitin 1991, Kelmendi ishte themelues i gazetës javore "Epoka". Në vitin 1996 ishte bashke themelues i revistën mbi teoritë e letërsisë "MM".[nevojitet citimi]

Në periudhën mars-shtator 1996 ka qenë kryesues i prodhimit në televizionin amerikano-shqiptar “Victoria” në Nju Jork. Në vitet 1997-1999 ishte emëruar nga qeveria e Kosovës ne Ekzil si Kryeredaktor i programit satelitor në gjuhën shqipe, edicioni kosovar, qe emitohej nga Televizioni Shqiptar (TVSH). Ka specializuar në fushën e menaxhimit të medias në "Concordia University" (Montreal, Kanada, 2000). Në vitet 2000-2001 ishte drejtori i pare shqiptar i Radio Televizionit te Kosovës. Që nga viti 2001 është themelues dhe botues i gazetës javore "Java", e cila ne vitin 2008 kalon dhe vazhdon t; botohet online. Ne vitin 2006 lëshon televizionin e parë kabllo dhe internet në Kosovë në bashkëpunim me operatorin kabllor "Kujtesa" - RROKUM. JAVA edhe RROKUM janë të vetmet media ne hapësirën mbarëshqiptare qe kultivojnë dhe përdorin Gegërishten si medium.)

Veprat:

"Gryka e Kohës" ("Dukagjini", Peje, 1994)

"Na dutz Na ho Utz - P'ej shpije"

("MM", Prishtine, 1996)

"Carere Patria - Mungesa e Atdheut" ("Çabej", Tirane, 1997)

Ka përkthyer veprat "Një varr për Boris Davidoviçin" 

dhe "Enciklopedia e të vdekurve" të shkrimtarit Danilo Kis.

Freedom House: Liritë dhe mediat në vitin 2019

Raporti ofron një vlerësim të lirisë së mediave në Kosovë, zbatimin e kornizës ligjore në fuqi që siguron lirinë e shprehjes dhe të medias, qasjen në informacion, mbrojtjen e burimeve të gazetarëve, standardet profesionale të raportimit dhe nivelit të vetë-cenzurës / cenzurës në media, përfshirë kërcënimet dhe frikësimet e gazetarëve. Raporti gjithashtu vlerëson punën e institucioneve të medias në mbrojtjen e lirisë së medias. Raporti ngritë dy çështje kryesore: e para në lidhje me sfidat dhe shkeljet e lirisë së medias dhe sigurinë e gazetarëve në Kosovë, dhe e dyta kërkon përgjigjet ndaj shkeljeve dhe sfidave të lirisë së shprehjes dhe të medias dhe sigurisë së gazetarëve.(OSCE).

Organizata, Freedom House, me seli në Shtetet e Bashkuara, thekson në raportin e saj të publikuar të mërkurën se në demokraci sikurse edhe në shtetet autoritare, udhëheqësit që synojnë konsolidimin e pushtetit, po gjejnë mënyra të reja për të shtypur gazetarinë e pavarur.



Në raportin mbi “Liritë dhe mediat në vitin 2019”, thuhet mes tjerash se udhëheqësit antidemokratik në demokracitë e brishta, kanë provuar të trembin mediat duke përdorur mjete ekonomike, ligjore dhe joligjore për të heshtur gazetarët kritik dhe për të forcuar mediat ‘miqësore’.

Raporti thekson ndikimin botëror të retorikës kundër mediave të përdorur nga presidenti amerikan Donald Trump. Gazetarët gjithandej në botë kanë më pas arsye të besojnë se Uashingtoni do t’u vijë në ndihmë nëse shkelen të drejtat e tyre themelore.

Sipas të dhënave të Freedom House, liria e medies është përkeqësuar në mbarë botën gjatë dekadës së fundit, me forma të reja të shtypjes që zbatohen si në shoqëritë e hapura edhe në shtetet autoritare.

Trendi është më i shprehur në Evropë, më parë një fortesë e lirive dhe në Euro-Azi e në Lindjen e Mesme, ku janë të përqendruara shumë nga diktaturat më të mëdha në botë.

Në disa prej demokracive më me ndikim në botë, thuhet në raport, shtresa të mëdha të popullsisë nuk marrin më lajme dhe informacione të paanshme. Kjo nuk ndodhë se gazetarët janë futur në burg, siç mund të ndodhë në shtetet autoritare. Në vend të kësaj, thuhet në raport, mediet kanë rënë pre e përpjekjeve për të mbytur pavarësinë e tyre. Metodat e zakonshme përfshijnë mes tjerash edhe trysninë ligjore e financiare, çështjet e pronësisë dhe denoncimet publike të gazetarëve të ndershëm. Qeveritë gjithashtu kanë ofruar mbështetje për mediet ‘miqësore’ përmes masave të tilla si kontrata shtetërore fitimprurëse, vendime të favorshme rregullatore dhe qasje preferenciale në informacionin shtetëror. Qëllimi është që shtypja t’u shërbejë atyre që janë në pushtet në vend të publikut, thuhet aty.

Në raport përmenden qeveria e Viktor Orbanit në Hungari dhe administrata e presidentit të Serbisë, Aleksandër Vuqiç, që kanë arritur “sukses” në heshtjen e gazetarisë kritike. Të dy udhëheqësit, thuhet në raport kanë përqendruar pronësinë mbi mediat, në duart e miqve të tyre.

Të dyja këto vende kanë nga 2 pikë në një matje nga 0 deri ne 4 ku rezultati 0, përfaqëson shkallën më të vogël të lirisë dhe ai 4, shkallën më të lartë të lirisë.

Shqipëria dhe Kosova, po ashtu kanë nga 2 pikë sikurse edhe të gjitha vendet tjera të Ballkanit Perëndimor.

Ivica Daçiqi po e poshtëron dollarin amerikan.

Në Serbi së fundmi ka filluar një aksion në rrjetet sociale për sipas tyre “kthimin e Kosovës në Serbi” nëpërmjet rrugës paqësore.

Ky aksion është duke u zhvilluar në një mënyrë pak të çuditshme ashtu që ata po shkruajnë “Kosova është Serbi” në kartëmonedhën 100 euro, dollarëshe e valuta të tjera.

Këtë veprim e ka bërë edhe Ivica Dacic, i cili në një foto që po qarkullon në media shihet me këtë kartmonedhë me mbishkrimin në fjalë.

Ndaj kësaj ka reaguar deputeti i AAK-së, gjenrali i luftës dhe Heroi i Paqës ,zt.Daut Haradinaj, i cili në një postim në Facebook ka shkruar se Ivica Daçiqi po e poshtëron dollarin amerikan.

Haradinaj e ka porositur  picimulin Ivica Daçiç që  të vajtoj dhe të ruaj atë që e kanë më të mirën.

“Daçiqi po e poshtëron dollarin Amerikan. Këtu ishit dhe ju turpëruam. Ai dollari që ti po e fyn, ta tregoi vendin në 99’. Tash vajto . Ruajeni atë që e keni më mirë për ju”.

Më poshtë postimi i Haradinajt:

Daçiqi po e poshtëron dollarin Amerikan.

Këtu ishit dhe ju turpëruam.

Ai dollari që ti po e fyn, ta tregoi vendin në 99’

Tash vajto se tjetër nuk ju ka mbetë.

Ruajeni atë që e keni më mirë për ju.




Për këto fjalë të  gjenralit Daut Haradinajt ka reaguar  picimuli serb Ivica Daçiq.

“Nuk është e çuditshme kur Daut Haradinaj, Ramushi dhe të tjerët paraqiten si avokat të Amerikës. E kam ditur këtë. Ata duhet t’ju tregojnë shefave të tyre”, ka thënë  picimuli i Millosheviqit ,Ivica Daçiq.

“Do të dëshiroja që ai 100 dollarësh të arrijë në duart e Haradinajve, Ramushit ose Dautit, kur t’ju arrijë paga nga Perëndimi dhe ta kuptojnë se Kosova është Serbi”, ka thënë tutje ai.

Ai tutje ka thënë se është “mësuar me këto kërcënime”, duke shtuar se “Haradinaj duhet ta ruaj mirë atë që e ka”.

“Sa i përket kërcënimeve, e kam ditur se do të ketë dhe mundem vetëm të them: ‘Qentë lehin, era i merr’. Çfarë të pritet tjetër nga ata, Haradinaj, Thaçi… 

Janë shumë nervoz, nuk po ju ecën siç e kanë menduar”, ka thënë në fund nxenësi i  kriminelit serb Sllobodan Millosheviqit.

F.B