Vdiç akademik prof.Fatos Mehdi Daci ,historiani dhe "mjeshtri i madh" i Dibrës

Me dhimbje të thellë njoftohet ndarja nga jeta e Fatos Mehdi Dacit, gazetari, historiani dhe Mjeshtri i Madh, një prej figurave më të shquara të kulturës, historisë dhe publicistikës dibrane dhe kombëtare. 

 I lindur në Lagjen Dacallarë, Njësia Administrative Sllovë, Dibër, Fatos Daci ia kushtoi jetën dijes, shkrimit dhe ruajtjes së vlerave identitare shqiptare. 

Ai ishte anëtar i përhershëm i Akademisë Amerikano-Shqiptare të Shkencave dhe Arteve, pjesëtar i Lidhjes së Shkrimtarëve të Shqipërisë dhe kryetar i disa shoqatave kulturore e atdhetare. 

 Në mbi 50 vjetë  krijimtarie, Fatos Mehdi Daci botoi më shumë se 60 vepra historiko-enciklopedike me mbi 15.000 faqe, dokumentoi jetën, historinë dhe traditat e Dibrës dhe të mbarë shqiptarisë, dhe realizoi mijëra portrete, emra e fotografi historike të rralla.

 Si gazetar dhe publicist, ai drejtoi e themeloi gazeta të ndryshme, përfshirë “Dibra”, dhe realizoi qindra artikuj, reportazhe, studime dhe 23 dokumentarë televizivë. Ishte redaktor përgjegjës i revistës shkencore të AAAS-it "Dituria".

 Fatos Mehdi Daci ishte gjithashtu organizator i dhjetëra veprimtarive përkujtimore dhe kulturore në Tiranë, Dibër, Bulqizë dhe më gjerë, duke promovuar vazhdimisht historinë dhe vlerat kulturore të Dibrës.

 Për kontributin e tij të jashtëzakonshëm, ai u nderua me titullin “Mjeshtër i Madh” dhe shpesh u shpall “Qytetar Nderi” nga Bashkia Peshkopi, Komuna Dibër e Madhe, Maqedoni dhe disa komuna të tjera të Dibrës. 

 Homazhet do të zhvillohen në Pallatin e Kulturës, Peshkopi, më 8 dhjetor 2025, nga ora 9:00 deri në 11:00, ndërsa varrimi do të mbahet në vendlindje, Lagjja Dacallarë, ora 13:00.

Pritja para varrimit do të bëhet në Shtëpinë Funerale “Ija”, Rruga “Kujtim Laro”, Tiranë, më 7 dhjetor nga ora 14:00 e në vijim. 

Një automjet do të jetë në dispozicion për transportin drejt Peshkopisë.

 Pritje të tjera do të mbahen më 9 dhjetor 2025 nga ora 08:00 e më tej. Familja e tij shpreh mirënjohje për gjithë ata që do të nderojnë kujtimin e tij dhe shkruan: “Fatos Daci largohet nga jeta, por jo nga kujtesa jonë. 

Ai lë pas një pasuri të pamatë shpirtërore e dokumentare, që do t’i shërbejë brezave përjetësisht. I paharruar qoftë kujtimi i tij.”

1.Akademik Prof.dr.Skender Kodra, Kryetar i AAAS -it  

2.Akademik Prof.dr.Mehdi Hyseni, Nënkryetar i AAAS -it  

3.Akademik Prof.dr. Flori Bruqi, Drejtor për mardhënie më publikun pranë AAAS 

New York, Tiranë, Prishtinë, Shkup, 07.12.2025.