“Shejza” kthen Gjokajn në Tiranë

Piktori i njohur shqiptar, Gjelosh Gjokaj, kthehet me ekspozitë në Tiranë. “Shejza” është titulli i ekspozitës e hapur të martën në mbrëmje në Galerinë Kombëtare të Arteve. Gjokaj me ketë ekspozitë kthehet para artdashësve në kryeqytetin shqiptar pas një viti pauzë. Vitin e kaluar ai ka qenë i ftuar special në ekspozitën ndërkombëtare "Onufri '09", ku u prezantua me dy piktura pa titull që i takojnë kohës së fundit të krijimtarisë së tij. Disa vite më parë ai ka hapur një ekspozitë personale. Me “Shejza”, Gjokaj sjell 38 vepra të punuara në teknikën e akuatintit, akrilikut në letër, akrilikut në pëlhurë, si dhe një cikël grafikash dhe vizatimesh. Punimet janë realizuar prej vitit 1992 deri më 2010 dhe i përkasin ciklit "të abstraksionit lirik". Në hapje të ekspozitës ka qenë i pranishëm edhe vetë Gjokaj.




“Ekspozita ‘Shejza’ vjen me këtë titull falë mikut tim që është dhe kurator i ekspozitës Parid Teferiçi, i cili e ka gjetur këtë titull falë një reviste shqiptare me titull ‘Shejza’ të Ernest Koliqit. Në atë kohë kur unë kam jetuar në Romë, janë botuar dhe shumë piktura të miat në atë revistë. Ky titull për mua i përshtatet shumë bukur kësaj ekspozite. Në këtë ekspozitë janë 50 punime, janë disa formate të mëdha dhe disa në të vogla, por ka dhe një pjesë figurative. Për mua kjo pjesë që është figurative, lidhet me ngjyrën, një inspirim ku dhe dalin pikturat abstrakte”, ka thënë Gjokaj, raportojnë mediat shqiptare. Sipas vetë autorit, ekspozita do të hapet edhe në Prishtinë.

“Trashëgimia kulturore pa kufij” në kërkim të shtëpisë gjysmëshekullore

Dukagjinasit mund të nisin të mendojnë se si mund të bëjnë biznes duke shfrytëzuar objektet e moçme kësaj treve. Para se ta bëjnë këtë, Peja, Deçani ose Juniku duhet të gjejnë një shtëpi, jo më të re një gjysmëshekulli. Selia në Kosovë e organizatës suedeze “Trashëgimia kulturore pa kufij” (CHwB) është vënë në kërkim të një shtëpie tradicionale në këto tri komuna. Krahas kësaj, ajo që CHwB-së i duhet të bëjë përmes projektit që e ka titulluar “Shihemi n’Dukagjin” është që të identifikojë potencialet turistike të këtyre tri komunave, t’i trajnojë bizneset dhe komunitetin atje.
Sali Shoshi, drejtor i Degës së CHwB-së në Kosovë, ka thënë se “produkti turistik” do të përfshijë atraksionet kulturore dhe natyrore. Ndër to ai ka numëruar kullat, shtëpitë qytetare, xhamitë, kishat, muzetë, vendet arkeologjike, çarshitë, festivalet, shfaqjet, tregjet, restorantet, bjeshkët, lumenjtë e liqenet.
“Operatorët turistikë lokalë do të jenë në gjendje që të marrin përgjegjësinë e pritjes së turistëve, akomodimit, transportit dhe udhërrëfyesit”, ka thënë Shoshi.
Shtëpia tradicionale, për të cilën është i hapur konkursi i CHwB-së, po i duhet për të ndërtuar në të Qendrën Turistike të “Shihemi n’Dukagjin”. Në të do të koordinohen aktivitetet turistike. Por shtëpia e re nuk dot ketë vetëm këtë rol.
“Planifikojmë që shtëpia të jetë e dizajnuar në atë mënyrë që të përshtatet për nevojat e turizmit dhe kulturës, duke u dhënë hapësirë ngjarjeve kulturore, ekspozitave, seminareve, punëtorive, shfaqjeve, panaireve, festivaleve në mënyrë që vete shtëpia të jetë një lloj produkti turistik i Dukagjinit”, ka thënë Shoshi.
Në bazë të konkursit, i cili i hapur do të jetë deri më 21 të këtij muaji, kërkohet që shtëpia të jetë jo më e re se 50 vjet.
“Ajo shtëpi do të rinovohet tërësisht. E tillë do t’i kthehet pronarit pas 15 vjetësh dhe për këtë arsye gjatë kësaj periudhe nuk do të paguhet qira”, ka sqaruar Shoshi.
Deri tash, ka treguar ai, janë rreth dhjetë aplikacione. Prandaj Shoshi nuk e sheh problematike gjetjen e një shtëpie të përshtatshme, ashtu siç është parashikuar.

Dy veprat e Omer Kaleshit “ruhen” në bodrum

Veprat që piktori i njohur me prejardhje shqiptare, Omer Kaleshi, ia ka bërë dhuratë Kosovës, Galeria e Arteve i ka vendosur në bodrum. “Çobani” dhe “Kokë në litar” - me të cilat Kaleshi u prezantua në konkursin më të madh në vend për arte pamore “Çmimi Muslim Mulliqi” - piktori i njohur vendosi t’ia falë institucionit më të lartë të artit pamor në vend. Por ky i fundit s’e ka gjetur zgjidhjen që për to të krijojë kushte më të mira. Ani pse për kreun e GAK-ut, Fahredin Spahija, dhurata e fundit ka pasuruar fondin e institucionit që drejton, ato kanë fatin e njëjtë të mbi 800 veprave sa numëron fondi. Në një ambient joadekuat - pos veprave të fundit që i janë bashkuar fondit - zënë vend “Patinazhisti” i Andy Warholit, veprat e Muslim Mulliqit, Nyret Salihamixhiqit e shumë punime të artistëve vendorë e botërorë.
Spahija pranon se vendi ku ruhen veprat e Kaleshit bashkë me të tjerat nuk është i përshtatshëm por shfajësohet. Por ai shfajësohet derisa thotë se kushte të tjera për ruajtjen e tyre s’mund të krijojë. Për të zgjidhja është ndërtimi i një objekti të ri. Në anën tjetër, artistët akuzojnë se nuk është bërë asgjë për të ruajtur veprat e fondit.

Për të parin e GAK-ut, akti dhurimit të veprave nga ana Kaleshit ishte fisnik. Të njëjtin ai pret që ta marrin si shembull edhe shumë artistë të tjerë. Spahija ka thënë se kështu duhet të ndihmohet Galeria Kombëtare e Arteve e Kosovës. Por e pranon që kushtet për ruajtjen e veprave të fondit nuk kanë ndryshuar në tri dekadat e fundit.
“Veprat e Fondit mbahen në po ato kushte që ishin tash e tridhjetë vjet”, ka thënë Spahija. Këtë gjendje thotë se është munduar ta ndryshojë me stafin e tij.
“Jemi përpjekur që t’i sistemojmë ato pak më mirë si dhe t’i evidentojmë tërësisht, ngase edhe në regjistrimin e tyre janë bërë shumë gabime dhe pasaktësi. Tani, secila vepër ka kartelën në të cilën, veç imazhit, ka edhe të dhënat për veprën si dhe numrin rendor të saj”, ka thënë Spahija.
Gjendjen jo të mirë të kushteve në të cilat ruhen veprat e fundusit të GAK-ut, nuk e ka mohuar as Sami Piraj, drejtor i Departamentit të Kulturës në MKRS.
Zgjidhja, sipas Pirajt, mund të gjendet kur institucioni më i lart i kulturës bëhet me ministër. Por MKRS-ja është pa ministër tash ketër muaj përderisa fundusi i GAK-ut ruhet në bodrum tash katër dekada.
“Besoj se Ministria e Kulturës do të ketë ndonjë fond emergjent për rastet e tilla”, ka thënë Piraj, teksa ka shtuar se kjo varet nga ministri i cili i cakton politikat e veta programore. Megjithëkëtë, Piraj nuk ia ka lënë krejt fajin veç Ministrisë së Kulturës.
“Konsideroj se një fond të tillë mund ta absorbojë edhe vet Galeria”, ka thënë Piraj.
Por Spahija nuk mendon njëjtë si shefi i tij. Ai ka shpresën se një ditë në krye të Ministrisë së Kulturës, siç thotë, do të emërohet një person më përgjegjësi dhe më pasionant për çështjet e kulturës.
“Problemin e objektit të ri të Galerisë apo Muzeut të Artit ta trajtojë më seriozisht”, ka thënë Spahija.
Ai është i bindur se vetëm me një objekt të ri zgjidhen përfundimisht ruajtja dhe trajtimi adekuat i vlerave të Fondit të Galerisë.


Piktori Rexhep Ferri thotë se i ka ardhur shumë mirë kur ka kuptuar që Omer Kaleshi do të vinte në Prishtinë, e edhe më shumë kur dy veprat e tij ai i ka lënë për fundusin e GAK-ut. Por Ferri është i mllefosur për mënyrën se si po “ruhen” veprat e fundusit, ku ka edhe vepra të tij. Ferri e ka një hall.
“Aty janë edhe veprat e Muslim Mulliqit, për të cilat nuk flet askush. Si nuk mundi të bëhej një mur për pikturat e tij, që presin tash 40 vjet, edhe të thuhet: ‘Ja, ky është muri i tij’”, ka shprehur shqetësimin Ferri.
Piktori akademik ka shprehur shqetësim edhe për faktin që nuk u bë kurrë Muzeu i Artit Modern, ani pse ai ka dekada që mban mend se është diskutuar për t’u bërë.
“Tri herë është bërë projekt për atë Muze. Njëherë shumë moti ishte paraparë që të bëhej te trekëndëshi, më vonë afër hotelit “Iliria’, e së voni afër GAK-ut”, kujton Ferri. “Asnjëherë nuk ka pasur vullnet për ta bërë atë”, ka shtuar ai.
Grafisti Shyqri Nimani, drejtori i parë i Galerisë së Arteve të Kosovës, kujton se dikur kishin një depo në Pallatin e Rinisë ku herë pas here mundnin të kujdeseshin për veprat e fundusit. Ai pranon se as atëherë ruajtja nuk ka qenë në nivelin e duhur.
“Drejtorët që kanë ardhur pas meje nuk kanë bërë atë që është dashur të bënin”, ka thënë Nimani.
Gjendjen aktuale të ruajtjes së veprave, ai e ka quajtur të mjerueshme.
“Punimet janë të mbështetura njëra mbi tjetrin, e në lagështi”, shprehet ai. E njëjtë, sipas Nimanit, do të mbetet kjo gjendje edhe për një kohë.
Projektin për Muzeun e Artit Modern, Nimani e ka quajtur ambicioz dhe kafshatë të cilën aktualisht Kosova s’mund ta kapërdijë.
“Është bërë projekt për hapësirë prej 14 mijë metra katrorë. Ai do të kushtonte miliona”, ka thënë Nimani. “Ndoshta bëhet pas 10 apo 15 vjetësh”, ka përfunduar ai.

Piktori Xhevdet Spahija hap ekspozitë në Suedi

Piktori Xhevdet Spahija të shtunën në mbrëmje ka hapur ekspozitë personale në galerinë e klubit të artistëve ”Mitt i centrum” në Götteburg të Suedisë. Spahija, profesor i artit në gjimnazin e Gjakovës, ka hapur disa ekspozita në vende të ndryshme, mirëpo kjo ekspozitë është paraqitja e parë para artdashësve suedezë.
“Shpresoj që vizitorët të ndiejnë kënaqësi duke i shikuar punimet e mia.


 Besoj se ata do të krijojnë një bindje më të mirë për artin shqiptar dhe për popullin tonë në përgjithësi”, ka thënë ai. Spahija në këtë ekspozitë po prezantohet me 30 punime. Të gjitha janë të realizuara në teknikën vaj në pëlhurë. Ekspozita do të qëndrojë e hapur deri më 3 mars. Spahija ka lindur në Pejë, ku ka marrë hapat e parë të pikturës, për të vazhduar më pas në Prishtinë, ku ka diplomuar në Fakultetin e Arteve. Ai është magjistër i pikturës dhe prej shumë vjetësh jeton dhe vepron në Gjakovë.

Zhduket animacioni 3D “Adem Jashari”

Animacioni 3D “Adem Jashari” ka gjasa të mos shfaqet fare. Traileri gjashtëminutash është tërhequr nga ueb-faqja youtube.com. Sipas burimeve të gazetës, një gjë e tillë është bërë me kërkesën e familjes së heroit kombëtar, ndërkaq prodhuesit e këtij filmi ende nuk e kanë marrë pëlqimin e Jasharëve për shfaqjen premierë të këtij filmi, i paralajmëruar për pesë mars.

Murat Jashari, të dielën, nuk ka pranuar të flasë për këtë çështje, me arsyetimin se “populli i Kosovës edhe ashtu është i lodhur dhe tema të tilla e ngarkojnë edhe më shumë atë”. Javën e kaluar, kur qe shfaqur inserti nga animacioni “Adem Jashari”, ai i pati thënë gazetës se nuk i pëlqen mënyra sesi është pasqyruar historia e luftës së familjes së tij, me aq sa kishte parë në gjashtë minuta, nga gjashtëdhjetë sa mendohej të zgjaste ky film. Prej pasqyrimit jo të drejtë të ngjarjes që ka ndodhur në Prekaz në mars të 1998-s, e deri te ngjyrimi fetar që përmbante traileri, Muratit i kishte ngjallur një mal dyshimesh. Më së shumti i kishte mbetur hatri që deri më sot kushdo që ka trajtuar në çfarëdo mënyre këtë histori është konsultuar paraprakisht me familjen Jashari. Këtë gjë, sipas Murat Jasharit, nuk e kishte bërë Fondacioni i Rinisë Islame në Zvicër, që me 50 mijë euro kishte mbështetur prodhimin e këtij filmi, e as kompania “Sira” - e regjistruar për shumë aktivitete, ndër to edhe aso fetare - e cila ka prodhuar këtë animacion.
Bashkim Avdiu, përfaqësues i kompanisë “Sira”, nuk ka gjetur kohë të dielën të japë asnjë sqarim për tërheqjen e trailerit nga interneti, aty ku ishte paralajmëruar animacioni “Adem Jashari”. Nuk ka dhënë përgjigje as në pyetjen nëse filmi do të shfaqet më 5 mars, ashtu siç kishin paralajmëruar më parë.
“Më telefono më vonë sepse jam i zënë”, ka thënë shkurt Avdiu, të dielën, pas telefonatës së parë. Pas disa përpjekjeve ai nuk u është përgjigjur më telefonatave të gazetës.
Por Basri Lushtaku, që në filmin e animuar “Adem Jashari” ka rolin e narratorit të ngjarjes, ka konfirmuar një detaj.


“Me sa di unë Jasharët janë takuar me producentët e filmit”, ka thënë Lushtaku.
Tashti ai ka bindjen se paraprakisht duhet të konsultohet me familjen, në mënyrë që të nxirret, siç thotë ai, yndyra e atij tregimi.
“Pikërisht ndoshta kjo ka munguar”, ka thënë ai, ani pse këtë e sheh si problem që mund të mënjanohet dhe animacioni në tërësi të shfaqet.
“Nëse Jasharët e shohin se diçka me të vërtetë nuk është në rregull, sigurisht se duhet respektuar, sepse është jomorale edhe prej nesh si artistë ta pasqyrojmë një ngjarje e cila nuk ka ndodhur ashtu”, ka thënë Lushtaku.
Megjithëse para një jave kishte deklaruar se “baca Shaban sa kishte qenë atdhetar aq kishte qenë edhe fetar”, tash Lushtaku ka tjetër qëndrim.
“Dihet se para së gjithash Jasharët kanë pasur besim në kombin”, ka thënë ai të dielën. Por megjithatë vazhdon të besojë se filmi në të cilin ai ka rrëfyer historinë nuk ka pasur për qëllim as përfitimin material e as përçimin e mesazheve fetare.
“Kompania, po besoj unë, është nisur prej parimeve të shëndosha sesi kanë qenë si familje Jasharët. Nuk ma merr mendja që ka qenë qëllimi që asaj t’i jepej konotacion fetar”, ka thënë Lushtaku.
Filmi i animuar “Adem Jashari” ishte paralajmëruar se do të shfaqej në kinemanë e vetme të kryeqytetit ABC, në 13-vjetorin e luftës heroike të Prekazit. Përveç që kjo kinema nuk ka mundësi teknike të shfaqë filmin në këtë format, ajo nuk ishte informuar fare që filmi do të shfaqet aty.
Menaxherja e kompanisë për distribuimin dhe shfaqjen e filmave “Genci”, Miradije Vllahiu, ka thënë se ende në adresë të tyre nuk ka një kërkesë që filmi të shfaqet më 5 mars.
“Ne e kemi të rezervuar programin deri në qershor të këtij viti”, ka thënë Vllahiu.
Të mbështetur nga Fondacioni i Rinisë Islame me seli në Zvicër me 50 mijë euro, kompania “Sira” ia kishte mësyrë të prodhonte 60 minuta animacion në 3D, ani pse kurrë më parë as që ka bërë film.
Gjashtë minutat e shfaqur të animacionit “Adem Jashari” portretizonin Adem, Hamëz e Shaban Jasharin teksa luftonin në një vend që nuk i përngjante aspak fshatit Prekaz në Skënderaj. Ngjyrimet fetare ishin të dukshme edhe në trailerin e filmit, ku në vetëm gjashtë minutat e filmit të tre heronjtë kombëtarë të familjes Jashari i luten Zotit.
Murat Jashari i kishte thënë gazetës se janë të interesuar që gjërat që bëhen për familjen e tij të mbajnë vulën e institucioneve të vendit.

Artistë pamorë shqiptarë “në luftë” me akuzat për plagjiaturë

Një ueb-faqe në të cilin pretendohet zbulimi i plagjiatëve të artistëve shqiptarë, ka dridhur skenën e artit pamor në Kosovë. Përpos që janë ndier të indinjuar, albaniancontemporaryart.wordpress.com ka bërë që dekani i Fakultetit të Arteve të Universitetit të Prishtinës, Adem Rusinovci, ta procedojë rastin në polici. Kjo e fundit e ka përcjellë rastin në Prokurorinë e Prishtinës, kryeprokurori i së cilës thotë të mos ketë marrë një lëndë të tillë. Autorët anonimë të ueb-faqes kanë futur në “listën e zezë” të plagjiatorëve artistë të njohur shqiptarë nga Kosova e Shqipëria. Olson Lamaj, Armando Lulaj, Gjovalin Delia, Endri Dani, Eltjon Valle, Heldi Pema, Dritan Hyska, Ardian Isufi, janë disa prej tyre. Jashtë listës nuk kanë mbetur as artistë të njohur si Sislej Xhafa e Anri Sala. Nga Kosova në këtë listë hyjnë Majlinda Kelmendi, Driton Hajredini e Flaka Haliti. Dy të parët thonë se autorët që pretendojnë se kanë zbuluar plagjiaturat e tyre, nuk kanë haber se çfarë është arti.


Majlinda Kelmendi nga albaniancontemporaryart.wordpress.com, “akuzohet” për dy vepra plagjiaturë. Me fotografinë e realizuar në vitin 2010, ku paraqitet një njeri i pështjellë me konop, sipas këtij sajti, del që Kelmendi ta ketë kopjuar veprën “Doubt” të Misha Gordin e realizuar më 1995. Shikoni fotografitë nga Misha Gordin.

Një tjetër fotografi e Kelmendit e titulluar “War With the Death”, performancë e vitit 2007, në sajt është cilësuar si plagjiaturë e veprës “Nude with Skeleton” të artistes serbe Marina Abramoviq e realizuar më 2002.


                     Olson Lamaj


Kelmendi ka hedhur poshtë këtë, duke thënë se vepra e parë që përthekon burokracinë ballkanase, është përzgjedhur nga pesë kuratorë ndërkombëtarë. Ajo thotë se ka argumente për të hedhur poshtë edhe akuzën për veprën e dytë që cilësohet si plagjiat.

“Tema e jetës, e vdekjes dhe e dashurisë është trajtuar gjithmonë, por jo që nga koha e artistes Marina Abramoviq në vitin 2004, por që nga viti 1518, kur për herë të parë e realizoi artisti Hans Baldung Grien me titull ‘Vajza dhe vdekja’. Pra i bie që edhe Marina Abramoviq ka kopjuar. Koncepti vetëm është zhvilluar tutje”, ka thënë Kelmendi. Sipas saj, përmes këtij sajti po luftohet arti pamor shqiptar.
Driton Hajredini, i futur në listën e plagjiatorëve, ka thënë të mos i ketë bërë përshtypje ajo çfarë autorët ueb-faqes pretendojnë të kenë zbuluar. Në këtë sajt piktura e Hajredinit “Kofera” krahasohet me veprën “Filter” të Joseph Beuys e realizuar në vitin 1983.

“Aty ka gjëra jorelevante”, ka thënë Hajredini tek ka shtuar se valixhja nuk mund të monopolizohet.
“Atë mund ta bëjë gjithkush”, ka thënë Hajredini. Por për të është e pakuptimtë se si kjo çështje ka përfunduar në polici. “Sa për mua as që duhet të merremi me këtë punë. Nuk po kuptoj përse duhet të merret policia me këtë gjë”, ka thënë ai

Çdo gjë kishte filluar kur një e-mail i nënshkruar nga Vesa Deda, ka shpërndarë linkun në më se 70 adresa. Njërës prej atyre që ka pranuar këtë e-mail, dhe më pas ka komentuar ueb-faqen në të njëjtën adresë, një gjë e tillë i ka kushtuar. Ish-studentja e Fakultetit të Arteve, Qëndresa Deda, ka përfunduar përballë policisë.
“E tëra ka ndodhur të mërkurën e javës së kaluar, kur më kanë kërkuar që të shkoj në Fakultetin e Arteve. Kanë qenë dy policë dhe më kanë pyetur nëse e njoh Vesa Dedën të cilën nuk e njoh”, ka thënë Deda.
“Gjithashtu më kanë pyetur se përse ia kam kthyer e-mailin”, ka shtuar ajo.

Rastin e kanë konfirmuar edhe Policia e Kosovës.
Brahim Sadriu, zyrtar informimi në Policinë e Kosovës, ka thënë se Fakulteti i Arteve ka lajmëruar një rast me të cilin është marrë policia. “Rasti është trajtuar nga policia e krimeve ekonomike, njësia në Prishtinë. Ka pasur ndjekje penale, janë kryer hetimet dhe rasti është dërguar Prokurorinë Publike të Prishtinës”, ka thënë Sadriu, pa dashur të flasë më shumë se çfarë është hetuar. Kryeprokurori i Prokurorisë Komunale në Prishtinë, Haki Geci, ka thënë të mos jetë i informuar saktësisht, nëse kjo lëndë ka arritur në zyrën e tij.
Dekani i Fakultetit të Arteve në Prishtinë, Adem Rusinovci, në një bisedë për gazetën i ka ikur përgjigjes në pyetjen se përse rastin e ka proceduar në polici.

                              Adem Rusinovci 

Për më shumë se shtatë minuta, Rusinovci nuk është përgjigjur në pyetjen e gazetës, por ka mbajtur ligjëratë se si duhet të shkruhet një raport. Madje ka kërkuar që të “sulmohen” autorët e ueb-faqes.
“Po hyn në disa gjëra të cilat nuk të takojnë ty”, ka thënë ai. “Pse nuk shkruan për ata që fyejnë artistët më të mëdhenj shqiptarë”, ka shtuar Rusinovci. Megjithatë, gati krejt në fund të bisedës, ka komentuar ueb-faqen. Tërthorazi ka pranuar se ka qenë ai që ka proceduar rastin në polici.
“Jam kundër etiketimit të njerëzve që janë artistë të paktë me përmasa botërore. Kushdo që të jetë personi që e ka bërë atë sajt nuk ka absolutisht të bëjë me artin”, ka theksuar Rusinovci. Hapjen e një ueb-faqeje të tillë ai e cilëson vepër penale.
“Normalisht që jam në mbrojtje të artistëve shqiptarë që nderojnë kombin. Prandaj të gjithë ata njerëz që bëjnë etiketime të tilla normalisht që duhet të merren me drejtësinë”, ka thënë Rusinovci.
Duke mos dashur që në mënyrë direkte ta pranojë atë që ka ndodhur në Fakultetin e Arteve të mërkurën e kaluar, ai ka dhënë vetëm një prononcim.

“Kjo që ka ndodhur është rast shumë i turpshëm”, ka thënë ai.
Kolegia e Rusinovcit, Majlinda Kelmendi, profesoreshë në Fakultetin e Arteve në Prishtinë, ka thënë se ky rast është paraqitur në polici pikërisht nga institucioni ku ajo punon.
“Me këtë punë janë duke u marrë organet kompetente. Institucioni ynë e ka dërguar këtë rast tek njësia e krimeve ekonomike dhe me këtë punë po merren personat adekuatë”, ka thënë Kelmendi. Kjo e fundit ka dhënë deklaratë për policinë.
“Më kanë thirrur si person i atakuar, se çfarë mendoj për këtë. Më kanë thënë që duhet të flasim për një padi që është bërë nga Fakulteti i Arteve. Kam dhënë qëndrimin tim se kjo që shfaqet në sajt është vulgare”, ka theksuar Kelmendi.

Halil Budakova me filmin “Azem Galica” thyen rekordin e shikueshmërisë

Halil Budakova thyen rekordin e shikueshmërisë me filmin “Azem Galica”, duke lënë pas vete filmin shqiptar “Koha e Kometës”. Tematika historike e filmit ka tërhequr publikun thonë kritikët, të cilët me gjithë suksesin e Budakovës e quajnë “regjisor popullor”.

 Menaxherja e kinemasë ABC, thotë se filmat e Halil Budakovës, vazhdimisht kanë zgjuar interesimin e publikut. Kritiku i filmit Jeton Budima, i cili ka shkruar për shumicën e filmave të Budakovës, thotë se stili budakovian është popullor, prandaj dhe është afër me publikun marrë parasysh dhe tematikën historike që ka trajtuar.