Vladimir Putini tenton të ndajë Europën

Teksa komuniteti ndërkombëtar pret t’i jepet fund njëherë e përgjithmonë gjakderdhjes në Ukrainën juglindore, vizita e Vladimir Putinit në Hungari ka shkaktuar debate të mëdha si në Rusi ashtu edhe në Perëndim. Analistët e huaj tashmë janë të bindur se Putini po përpiqet të ndajë Bashkimin Europian, duke gjetur në Europë miq të rinj të Kremlinit për të demostruar se, pavarësisht pretendimeve të liderëve europianë dhe atyre amerikanë, izolimi ndërkombëtar i Rusisë nuk është gjë tjetër veçse mashtrim. Siç thekson edhe Owen Matthews i “Newsweek”, Putini përdor joshjen, një dozë të lehtë anti-amerikanizmi, ideologjinë konservatore familjare dhe natyrisht paratë, për të blerë miqtë e tij të rinj europianë. Ndërkohë, “Washington Post” citon një diplomat anonim, i cili ka paraqitur prova që tregojnë se Rusia është duke i bërë vërtetë këto manovra në Europë.
“Rusët po përpiqen të copëtojnë unitetin e Europës dhe janë duke vënë në shinjestër vendet më të dobëta”, thotë një diplomat perëndimor, i cili merret me politikën e Hungarisë. “Hungaria dhe Bullgaria kanë nevoja energjetike. Greqia ka nevoja të dëshpëruara financiare. Gjithçka është e pjesë e strategjisë së vjetër ruse”. Pjesa më e madhe e komentatorëve perëndimore mendojnë se lideri hungarez Viktor Orban është i gatshëm të bashkëpunojë me BE-në edhe kundër Rusisë. Megjithatë, Orban vazhdon të konsiderohet si “Kali i Trojës në BE” apo si “Hugo Chavez i Europës.

Jo më i izoluar nga gjithë Europa

Fakti që Putini është vërtet i interesuar të heqë qafe sanksionet dhe po përpiqet të rrisë numrin e vendeve të gatshme të punojnë pro Rusisë është i padiskutueshëm. Është mëse logjike që lideri rus ka shanse më të mëdha që t’i gjejë aleatët e tij në radhët e vendeve ish-ballkanike, në Greqi dhe në Europën Lindore. Gjatë ditëve të fundit, një sërë përdoruesish të mediave sociale në Rusi janë tërhequr së tepërmi nga politikanja joshëse polake, Magdalena Ogórek. Ogorek është një kadidate presidenciale e krahut të majtë dhe nëse fiton zgjedhjet, është e gatshme menjëherë të përmirësojë marrëdhëniet me Rusinë.

Është e vërtetë që shanset e saj janë tepër të ulëta, pasi nuk ka eksperiencën e nevojshme politike dhe ndjenja anti-ruse është tepër e përhapur në popullin polak, megjithatë, shtypi rus e ka shpallur Magdalenën “kandidaten presidenciale më seksi në botë”. Sjellja e Putinit në politikën e Jashtme dhe veçanërisht në Ukrainë mund ta kenë çuar Rusinë drejt izolimit, por tashmë duket qartë se, lideri i vendit po përpiqet të gjejë miq të rinj dhe është i gatshëm të përdorë të gjitha avantazhet ekonomike që mund të ofrojë shteti. Një trend që duhet theksuar është që në radhët e “miqve të rinj të Kremlinit”, renditen përfaqësuesit e majtë dhe ato të djathtës ekstreme.

Basti hungarez i Putinit

Pas refuzimit të Rusisë për të ndërtuar Rrjedhën e Jugut, Hungaria mbeti e varuar vetëm nga gazsjellësja e Ukrainës. Për këtë arsye, vendi ndihet i kërcënuar veçanërisht nga pasiguria e situatës në Juglindje të Ukrainës dhe nga përkeqësimi i marrëdhënieve ndërmjet Kievit dhe Moskës.
Në rastin më të keq, furnizimi i Europës Perëndimore me gazin rus nëpërmjet Ukrainës mund të vihet në diskutim, siç ka ndodhur edhe më parë gjatë viteve të fundit si pasojë e konflikteve më pak të rënda ndërmjet këtyre dy vendeve. Kjo bën që Hungaria, e cila është 80 për qind e varur nga energjia e importuar, mëse të gatshme të reduktojë sado pak këtë varësi.

Telefoni spijun në xhepin tuaj

“Telefonët e zgjuar” e kanë transformuar jetën tonë në mënyrë të jashtëzakonshme. Ato na lidhin me botën e jashtme nëpërmjet postës elektronike dhe rrjeteve sociale, na drejtojnë kur kemi humbur rrugën dhe na sugjerojnë një mori dyqanesh, restorantesh dhe shërbimesh që ndodhen afër nesh. Gjithçka është vetëm një klikim larg. Por ky lehtësim i madh i jetës tonë ka një kosto jo të ulët, një kosto që shumica prej nesh sapo ka filluar ta kuptojë.

Në një botë, ku privacia në rrjet po bëhet gjithnjë e më shqetësuese, ekspertët e sigurisë thonë se, bindja që identiteti ynë është i fshehtë dhe se duhet të ndihemi të sigurtë në anonimitet është e gabuar. Provat në fakt tregojnë se sa pak nevojitet që të zbulohet identiteti i një personi. Javën e kaluar një studim mbi kartat e kreditit tregoi se si mjaftonin vetëm katër pjesë informacioni për të lidhur identitetin e një personi me të dhënat “sekrete” të kartës së tij të kreditit dhe një prej këtyre informacioneve ishin koordinatat GPS që mund të gjenden në çdo telefon celular. Por cilat janë ato pjesë informacioni që përbëjnë rrezikun më të madh për privacinë tonë dhe si mund të mbrojmë të dhënat tona personale?

Të dhënat më të rrezikshme

Data, ora, vendndodhja gjeografike dhe numri serial i telefonit celular (IMEI) janë informacionet që bëjnë të mundur përgjimin dhe identifikimin e të gjitha lëvizjeve tuaja. Të njohura si “metadata” në gjuhën e teknologjisë, ose dosjet EXIP të telefonëve celularë, këto fragmente informacioni mund të lidhen sëbashku për të formuluar identitetin tuaj.

Ekspertët sot mendojnë se, “tag-u” gjeografik, që nuk është gjë tjetër veçse rrëfimi i vendndodhjes tuaj në një moment të caktuar, është kërcënimi më i madh i ditëve të sotme, pasi shumica e aplikacioneve në celular e përdorin këtë informacion si të dhënë markentingu, duke reklamuar vendndodhjen tuaj. Në Facebook, pozicioni gjeografik i përdoruesit ofrohet si një shërbim automatik (nëse nuk e keni ç’aktivizuar), i cili vihet menjëherë në lëvizje, kur postoni një foto, status apo mesazh privat në “Messenger”.

Identifikimi i vendndodhjes gjeografike të përdoruesve përdoret edhe në aplikacione të tjera si Instagrami dhe Twitteri. Ky është një shërbim që, duke u bërë automatik nga çdo telefon celular dhe kompjuter personal, shumë pak përdorues ishin të ndërgjegjshëm për ekzistencën dhe rrezikun potenacial që përbënte, madje ku publikon vendndodhjen e përdoruesve, kur ata mendojnë se askush nuk është duke i parë.

A mund të zbulohet se çfarë po bëj?
Në fillim të këtij viti, një hajdut i quajtur Ashley Keast u arrestua, pasi kishte postuar një foto nga një telefon celular që kishte vjedhur. Pavarësisht faktit që kishte ndryshuar kartën Sim të celularit të vjedhur përpara se të postonte foton e tij në “WhatsApp” , miqtë e viktimës së grabitur kishin parë vendndodhjen e telefonit dhe kishin njoftuar policinë.

Të përgjuar nga të përgjuarit!

David Von Drehle, TIME

Privatësia nuk është gjë tjetër veçse një iluzion, i cili na lejon të jetojmë të qetë, jo të paralizuar nga vetëdija jonë. Iluzioni i privatësisë na jep mundësinë të jemi zot të vetvetes, të vëmë në rrezik intimitetin tonë dhe të bëjmë gabime. Megjithatë, në ditët e sotme, vija ndarëse ndërmjet hapësirës publike dhe asaj private është pothuaje inekzistente. Një çift dashnorësh futen fshehurazi në një hotel: a po i ndjek njëri?

Një adoleshent lë mësimin për të shkuar në një qendër tregtare: a do ta shohë dikush që njeh prindërit e tij? Sikur të ishim fëmijë që mendojnë se po të mbyllin sytë do të bëhen të padukshëm, ne mendojmë se askush nuk i sheh apo dëgjon momentet tona private dhe kemi të drejtë, derisa del dikush që fillon të na përgjojë.
Kjo ka qenë e vërtetë shumë kohë përpara se Agjencia Kombëtare e Sigurisë (NSA) të fillonte të mblidhte të dhëna të telefonave dhe internetit nga kompanitë e teknologjisë dhe komunikimit dhe shumë kohë përpara se Kongresi të votonte sërish me një avantazh të ngushtë prej 12 votash vazhdimin e këtij programi. Ishte e vërtetë shumë kohë përpara se një gjykatë ushtarake të shpallte ushtarin Bradley Manning fajtor për spiunazh për rolin e tij në çështjen Wikileaks – por e liroi me akuzën e ndihmës për armikun – në 30 korrik. Cilësia iluzive e privatëcisë është një temë e përsëritur e letërsisë që e ka origjinën që në kohën e Biblës së Hebrenjve. Mendoni të bukurën Batsheba, e cila zhvishet për të bërë një banjë në librin e dytë të Samuelit, një tekst i lashtë, por që ndesh në vështrimin plot epsh të Mbretit David, i cili e sheh që nga maja e çatisë.
Apo Hamletin, biseda private e të cilit me të ëmën dëgjohet prej Poloniusit, që rri fshehur prapa perdeve. Regjisori i madh Alfred Hitchcock ishte i magjepsur pas sekreteve që nuk mund të rrinin të fshehur dhe realizoi një kryevepër, “Dritarja e pasme”, nisur nga premisa që jetë të tëra (dhe vdekje) dalin hapur prapa dritareve të pambuluara të qyteteve anonimë, thjeshtë në pritje të vëzhguesit që t’i dekriptojë.
Por zbulimi i programeve të mbledhjes masive të informacionit prej NASA-s nga një punonjës privat me kontratë, Eduard Snouden, e ka bërë të qartë se, ngjitja e teknologjisë e ka shkërmoqur edhe iluzionin e privacisë. Kjo ka ndodhur pothuajse brenda natës, dhe me shumë pak reflektim: SHBA dhe shtete të tjerë kanë bërë që peshorja të anojë nga ana e atyre që vëzhgojnë. Po hedh rrënjë një shoqëri e mbikëqyrjes. Videokamerat regjistrojnë vazhdimisht prej shtyllave të ndriçimit dhe vitrinave të dyqaneve. Satelitët dhe avionët me telekomandë çajnë qiejt. Telefonat celularë ofrojnë informacione pa fund në lidhje me përdoruesit e tyre. Kamerat e targave dhe të korsive të shpejtësisë gjurmojnë lëvizjen e makinave, duke mbajtur të dhëna të detajuara mbi shpejtësinë dhe vendndodhjen e tyre. Ndërkohë, mbi autostradën e informacionit, çdo ndalesë nga çdo udhëtar vihet re dhe regjistrohet prej ofruesve të internetit si Google, Verizon dhe Comcast. Shitësit me pakicë skanojnë, kujtojnë dhe analizojnë çdo blerje të çdo konsumatori. Televizionet inteligjentë e dinë se çfarë ne shohim – shumë shpejt do të kenë sy për të parë ne që i shohim – dhe matësit inteligjentë do të dinë nëse kemi fikur dritat.
Dhe ato pak barriera teknike që kanë mbetur, po bien njëra pas tjetrës përpara forcës së jashtëzakonshme të magjisë dixhitale binare që është edhe motori i ndryshimeve revolucionarizues. Deri kohët e fundit, ka patur limite të fortë fizikë për numrin e fotografive që mund të laheshin, videokasetave që mund të regjistroheshin, të dhënave të kompanive celulare që mund të shtypeshin apo fotokopjoheshin dhe futeshin në kuti – e jo më të analizoheshin. Tani, vetë ideja e limiteve po shkrihet, po zhduket.

Tom Doshi: Atentatori im i tregoi Tahirit porositësin

“I porosituri për të kryer krimin i ka shkuar në zyrë vetë ministrit të Brendshëm dhe drejtorit të Policisë të Shtetit dhe i ka treguar për porosinë dhe porositësin”. Kështu deklaron Tom Doshi, deputeti shkodran pak orë pas përjashtimit të tij nga grupi i PS-së.

Përmes një postimi në Facebook, Doshi zbardh gjithashtu dhe se në mbledhjen me dyer të mbyllura në selinë e PS, Rama i kishte kërkuar prova për akuzat që ky i fundit ka bërë në drejtim të Ilir Metës si “urdhëruesi dhe paguesi i vrasësit të tij”.

Tom Doshi shton se, kishte 5 muaj që ka qenë në pritje të zbardhjes së organizimit të atentatit, por kishte marrë vetëm heshtjen, megjithatë sqaron se reagimi i tij nuk ka lidhje me ‘rrezikun e eliminimit të tij fizik, por me mos mbajtjen e premtimeve të elektoratit.

“Për mua nuk ishte e papritur kjo që ndodhi. Ka kohë që unë jam në pritje të zbardhjes të organizimit të atentatit ndaj meje dhe askush nuk lëvizi për plot 5 muaj. Ku na çon ky fakt? Në mbrojtjen e krimit. Kjo është Rilindja?

 Unë bëj pjesë në grupin e njerëzve që e besuan Rilindjen, por si ta besoj më, kur unë kam 5 muaj që kam informuar Prokurorin e Përgjithshëm, ministrin e Brendshëm, Kryeministrin dhe vetë Ilir Metën për faktin dhe përgjigja ishte vetëm heshtje dhe mbulim. E thërrita vetë Ilir Metën dhe ia thashë në sy, sepse unë nuk kam asgjë që mund të më heqi guximin të përballem me këdo.

Sot, më kërkoi Edi Rama prova, në fakt mesa duket Kryeministri nuk e njeh rendin e punëve, provat duhet t’i gjejë shteti jo unë edhe pse unë i kam ofruar çdo informacion që kisha dhe prova (i porosituri për të kry krimin) i ka shku në zyrë vetë ministrit të Brendshëm dhe drejtorit të Policisë të Shtetit dhe i ka treguar për porosinë dhe porositësin.

Këto janë të vërtetat e mia të nderuar miq, dhe me gjithë këtë problem mbi kry pata durimin për të prit në heshtje.

Edhe reagimi im në media nuk u lidh me faktin e eliminimit tim fizik. Reagimi im erdhi si rezultat i problematikës në zonën time. Unë kam një problem, kontrata me qytetarin, e cila është thy. Unë tashmë nuk bëj më pjesë në grupin parlamentar socialist, por ama jam kryelartë përballë të gjithë bashkëqytetarëve të mi që më besuan, kryelartë, sepse të paktën sot të gjithë jemi në një stad, të zhgënjyer. Unë nuk kam hyrë në politikë për t’i bë lajka drejtuesit të radhës, por për të mbajt premtimet e bëra. Megjithatë, unë për ju të nderuar bashkëqytetarë do të jem gjithmonë një derë e hapur”, shkruan Doshi në një postim në Facebook.

Zvicra i kërkon Erion Veliajt transparencën mbi fondin 3.3 milionë euro

Pas publikimit të skemës ku ministri Erion Veliaj duket qartë se ka ndikuar në shpërndarjen e parave të shtetit zviceran në mënyrë abuzive, ambasada e Zvicrës shprehet për mediat se do t’i shkonte kësaj çështjeje deri në fund. Përse nuk u bë një garë e ndershme mes mediave shqiptare për të përfituar nga fondi zviceran, por 75 mijë eurot e projektit Risi Albania shkuan në favor të Shqiptarja.com, Top Channel dhe Club Fm? Risi Albania nuk pranon të tregojë, se cilat ishin mediat e tjera që garuan dhe 4 mediat që nuk fituan. Sipas “Lapsi.al” fondi për një projekt që synon të ndihmojë në punësimin e 11 mijë të rinjve shqiptarë kap vlerën e 3.3 milionë eurove. Pjesë e këtij financimi është edhe projekti “Risi Albania”. Ai synon informimin e të rinjve nëpërmjet mediave, për mundësitë e punësimit. Ky projekt po zbatohet nga Partners Albania, një OJF që drejtohet nga Juliana Hoxha, ish-nënkryetare e G99 në kohën kur kjo parti, e klonuar nga Edi Rama, kishte për kryetar ministrin aktual të Mirëqenies Sociale, Erion Veliaj dhe kandidate e saj në Tiranë në zgjedhjet e 2009.Fondi i “Risi Albania” për mediat arrin në shumën e 75 mijë eurove. Dhe në ndarjen e tij duket se nis edhe pazari me paratë e ambasadës zvicerane. Partners Albania, përmes projektit “Risi Albania”, që ka për drejtuese Edlira Muhedinin, ua ka shpërndarë këto para televizionit “Top Channel” dhe gazetës “Shqiptarja.com” të Carlo Bollinos. Në projekt është përfshirë edhe radio lokale “Club FM” sa për t’u dukur se këto para janë ndarë në mënyrë “të drejtë”. “Club FM” ka marrë rreth 15 mijë euro nga projekti, ndonëse ka transmetuar çdo javë nga dy orë program me informacione mbi punësimin e të rinjve. Dy mediat e tjera kanë ndarë mes tyre pjesën më të madhe, plot 60 mijë euro. “Top Channel” transmeton 10 seri prej 45 minutash të programit “T’i mundesh”, ndërsa “Shqiptarja.com” suplementin “Drejt punës” që e boton çdo të enjte. Vetëm për këto transmetime e botime, këto dy media, që nuk e kanë për herë të parë favorizimin qoftë nga paratë publike qoftë nga ato që ofrohen nga taksapaguesit europianë falë bujarisë së qeverisë dhe ministrave të veçantë si Veliaj, kanë përfituar thuajse të gjithë fondit e projekit zviceran për mediat.

Edi Rama- Ilir Meta, presion kryeprokurorit

Ish-Kryeministri Sali Berisha e ka cilësuar presion thirrjen e Prokurorit të Përgjthshëm në zyrën e Edi Ramës për t’u takuar me dy ndër personat e akuzuar për vrasjen e dyfishtë. “Këshilli i vrasjeve me porosi në krye të Parlamentit dhe ekzekutivit, Meta-Rama-Tahiri-Braho, thërrasin sot në Kryeministri Prokurorin e Përgjithshëm me temën: Hajde dhe na heto po deshe!”, shprehet Berisha. Me anë të një postimi në Facebook, Berisha theksoi se kjo ngjarje makabre e organizuar nga sistemi kriminal qeverisës do të zhyste vendin në një konflikt civil të paparë. Ndaj Berisha i bëri thirrje Presidentit Nishani për të garantuar një veprimtari normale të Prokurorisë dhe kjo e fundit të zbardhë dhe të nxjerrë para ligjit të gjithë zyrtarët e implikuar në këtë ngjarje. “I bëj thirrje Presidentit të Republikës të marrë çdo masë për të garantuar veprimtarinë normale të Prokurorisë së Përgjithshme, në kushtet kur kupola e krimit po bën çdo gjë të destabilizojë vendin. I bëj thirrje prokurorit të Përgjithshëm që në këto momente kritike për shoqërinë shqiptare të hetojë dhe të ndjekë penalisht të gjithë ata zyrtarë të lartë të implikuar në një projekt”, shkruan Berisha. Gjithashtu ish-Kryeministri i bëri thirrje qytetarëve të ngrihen fuqishëm për të shpëtuar vendin, shoqërinë tonë nga krerët e krimit që drejtojnë sot Parlamentin dhe qeverinë e Shqipërisë!
Në një postim tjetër, Berisha theksoi se dëshmia e djeshme e Tom Doshit është ndër me tronditëset që mund të dëgjojë njeriu, akuza publike më e rëndë në 25 vitet e fundit. “Në këtë dëshmi dy janë aspektet më të shëmtuara, më kriminale. Sot më shumë se kurrë vendi, shoqëria, ne dhe fëmijët tanë i nevojitet guximi, përkushtimi për të nxjerrë sa më parë vendin nga tentakulat e krimit qeveritar që rrënon çdo orë, çdo ditë, sigurinë, paqen, stabilitetin, të ardhmen tonë. Kërkesë kjo e bazuar në hetimin e vendosur e të gjithanshëm të krimit më të lartë shtetëror, dënoj çdo formë presioni ndaj Prokurorisë së Shtetit. Të dashur qytetarë, sot shoqëria jonë është kokë e këmbë në kthetrat e pamëshira të krimit të mazhorancës së qelbësirave”, shprehet ai. Sipas tij krimi ka kapur majën kur kryetari i Parlamentit, Ilir Meta, porosit dhe paguan në emër të mazhorancës vrasjen e një deputeti të PS dhe një deputeti të PD.
Për skenarin e vrasjes së dyfishtë u informua menjëherë Rama dhe Tahiri, nënvizon Berisha, por dhe ata në vend që të ndërhynin urgjentisht për zbardhjen e akuzës publike më të rëndë në 25 vitet e fundit e fshehën apo heshtën “pra zbatuan kodin e heshtjes të mafies për skenarin e krimit monstruoz, sikur në këtë vend të mos ekzistonte shtet, por shpellë mafieje dhe vetëm shpellë mafieje, çka tregon se ata ishin ose porositësit ose së paku miratuesit e skenarit”. Më pas Berisha vijon duke theksuar se, “Për Ramën dhe mazhorancën, qëndrimet e Doshit ndaj vetë Ramës, Saimir Tahirit, u bënë të rrezikshme, kërcënuese, të padurueshme. Tirana i di mirë përleshjen e Doshit me Ramën për qeverinë, policinë, postet më të larta në administratë, di mirë përplasjen e egër të Doshit me Saimir Tahirin në një lokal, në mos gaboj ‘Il Gusto’, në prani të Gramoz Ruçit dhe dy deputetëve të tjerë, si dhe të klientëve që po drekonin, rebelimin e Doshit me 5 deputetë të tjerë për ditëlindjen e mikut të vet”.
Gjithçka duket si një pazar i fëlliqur bazuar në një marrëveshje krimi që Rama nuk mund ta kapërdinte kur shikonte afrimitetin e Doshit me Metën. Një marrëdhënie shantazhimi kriminale funksionon midis Ramës dhe Metës, të cilët lidhjen e vetme midis tyre kanë krimin dhe epshin pakufij për pushtet. Për të bërë të mundur këtë, thekson Berisha, Meta ftoi Ramën në ekzekutimin fizik të Doshit dhe kështu do ta kishte gjithmonë një skllav të tijin duke bërë pjesë edhe vrasjen e deputetit të PD, Mhill Fufi.
“Doshi ndërkohë kishte marrëdhëniet më miqësore me Metën, i cili drekonte dhe darkonte çdo fundjavë me të dhe nxitej nga ky i fundit për të krijuar një grup sa më të gjerë në PS për të bërë Metën pse jo edhe Kryeministër de fakto.
Kështu, Ilir Meta forcoi pozitat shumë me Doshin. Por ai ishte përsëri një skllav i mjerë i Ramës, i cili sapo kthehej nga Brukseli, Berlini apo ndonjë kryeqytet tjetër, lajmin e parë që i jepte Metës ishte se partnerët i kishin kërkuar arrestimin e tij. Meta sëmurej, nuk dilte për tre ditë nga shtëpia. Meta për t'u çliruar nga skllavëria e Ramës i duhej të lidhej me Ramën në lidhje krimi, vrasje. Vetëm kështu ai nuk do të ishte më skllav i Ramës, por do të kishte Ramën skllav të tij. Ai kërkoi miratimin e Edit që të shpëtonte njëherë e mirë Ramën nga Doshi, sikundër ai duhet të simetrizonte vrasjen me deputetin e PD, Mhill Fufi. Kjo jo për hir të simetrisë, por për motive të ulëta primtive personale”, thekson Berisha.

Edi Rama- Tom Doshit: Do t’ja tregojmë vendin Ilir Metës!

Deputeti Tom Doshi ka zbardhur dje bisedën e zhvilluar mes tij dhe Ramës në zyrën kryeministrore, ku deputeti socialist ka informuar Kryeministrin se ishte shënjestruar për t’u eliminuar nga një person i paguar nga Ilir Meta. Duke zbardhur këtë bisedë të zhvilluar rreth 6 muaj më parë në zyrën e Ramës, deputeti Doshi bën të ditur se gjatë atij takimi Rama përveçse kishte shprehur solidaritetin ndaj Doshit e kishte drejtuar atë tek ministri i Brendshëm që të bënte denoncimin dhe më pas “t’ja tregonin vendin Metës”. Doshi më pas tregon se duke ndjekur udhëzimet e Ramës, ai kishte takuar ministrin e Brendshëm, Tahiri dhe drejtorin e Përgjithshëm të Policisë, Artan Didi dhe se në këtë takim, kishte marrë me vete edhe personin që ishte paguar nga Meta për eliminimin e dy deputetëve, i cili bëri para dy autoriteteve deponimin. Pas kësaj, Doshi bën të ditur se për ngjarjen e rëndë kishte njoftuar edhe Prokurorinë e Përgjithshme. Por pas denoncimeve të bëra, nga zyra e Kryeministrit, në zyrën e Tahirit dhe atë të Prokurorisë së Përgjithshme, asnjë nga institucionet në fjalë nuk reaguan në lidhje me ngjarjen.
“Në datën 30 gusht, në një takim me Edi Ramën, ai më ka thënë: ‘Të ka shpëtuar Zoti Tomë. Çoje të penduarin tek Saimir Tahiri të bëjë denoncimin dhe t’ja tregojmë vendin Metës’. Unë e çova të porositurin për krim në takim me ministrin dhe drejtorin e Përgjithshëm të Policisë, i cili me dorën e tij ka mbajtur shënim çdo deponim që u bë. Saimiri më deklaroi që edhe kanë inçizuar bisedën. Nuk e di se çfarë ndryshoi më pas. Nuk e di pse Rama, Tahiri apo Prokurori nuk vepruan. Nuk e di çfarë pazari i ka ofruar Ilir Meta këtyre për të mosvepruar. Mosveprimi për të parandaluar apo hetuar një krim është i dënueshëm nga Kodi Penal dhe ligji duhet të jetë i barabartë për të gjithë”, shprehet Doshi në një reagim të tij.
Doshi deklaron se Ilir Meta sot e ka vënë Edi Ramën në një pozitë kriminale. “Të mbrojë krimin ose t’i bjerë qeveria? Është zgjedhje shumë e lehtë, po të mos kesh synim pasurimin me çdo kusht. Elektorati socialist në të gjithë Shqipërinë e urren Ilir Metën. Nëse Rama do të kishte guximin dhe ndershmërinë të shkonte në zgjedhje të reja, pa Ilir Metën në krah, do të fitonte sërish, pavarësisht një doze zhgënjimi që ekziston sot në popull. Populli e di që Rama i ka pasur krahët të lidhur nga LSI e bandat e tyre dhe do të dijë të orientojë votën siç duhet. Unë i bëj thirrje Edi Ramës të gjejë forca dhe të distancohet nga kthetrat e Ilir Metës dhe të mos shkruajë për telenovela në Facebook. Partia Socialiste është e fortë dhe e pastër dhe nuk ka nevojë të marrë në mbrojtje njerëz të implikuar në vrasje”, shprehet ai.