Gjykata Speciale e votuar në Kuvendin e Kosovës, pritet që së shpejti të fillojë me aktakuzat e para.
Në media janë përfolur emra të ndryshëm, sidomos emri i presidentit Hashim Thaçi dhe data se kur mund të fillojnë aktakuzat e para, mirëpo nga Gjykata Speciale ende nuk ka asgjë zyrtare në lidhje me këtë.
Por, sa është e mundur që nga Specialja të bëhen aktakuza për persona që mund tu lihet në gjysmë karriera politike, për shkak të angazhimeve të tyre në këtë fushë.
Gjoshi: Nëse presidentit apo kryeministrit i hiqet mandati, shkohet në zgjedhje
Duke komentuar në lidhje me këtë, avokati Adrian Gjoshi, ka thënë se Specialja do të merret me ish-ushtarët e UÇK-së që kanë pozita në institucione, andaj sipas tij, do të ketë nevojë për zëvendësime.
Adrian Gjoshi
Ai ka theksuar se të vetmit pozita që mund të përjashtohen nga Specialja, do të jetë ajo e presidentit dhe e kryeministrit.
Por, sipas tij, në rast se edhe këtyre të dyve do t’iu hiqej mandati, vendi do të shkonte pashmangshëm në zgjedhje të reja.
“Duke qenë që Gjykata Speciale është e dizajnuar në atë mënyrë që, ndër të tjera, për subjekt të aktakuzës t’i ketë ish-ushtarët e UÇK-së, e meqë këta të fundit kanë pasur pozita kyçe në institucione, sigurisht që mund të vijmë në situatën ku këto pozita do të kërkonin zëvendësime ose edhe vota të reja! Përjashtuar presidentin dhe kryeministrin, të gjitha pozitat tjera mund të zëvendësohen. Deputetët zëvendësohen nga deputetët tjerë të cilët janë në rend menjëherë pas humbësit të mandatit; ministrat zëvendësohen nga formatori i qeverisë. Ndërsa, për shkak se pozita e presidentit dhe kryeministrit nuk mund të zëvendësohet në mënyrë permanente, në rast se ndonjërës prej këtyre pozitave do t’i hiqej mandati – zgjedhjet e reja do të ishin të pashmangshme. Në këtë drejtim, aktivizimi i Gjykatës Speciale, sigurisht, do të ketë reperkusione politike dhe sociale”, është shprehur Gjoshi.
Se si mund të shihet kjo gjendje në Kosovë, kur vendi sapo ka dalë nga zgjedhjet, Gjoshi ka thënë se jopaarsyeshëm nga shumë komentues ky aktivizim shihet si ndryshim në strukturën politike të Kosovës dhe kërkohet maturi e gjakftohtësi qytetare.
