Si do të qeveriset SHBA nën administratën e re Donald Trump?

 

Shkruan Flori Bruqi 

Pas Kamala Harris, presidenti amerikan Joe Biden ka telefonuar presidentin e sapozgjedhur, Donald Trump, për ta uruar për fitoren e tij në zgjedhje dhe për ta ftuar në Shtëpinë e Bardhë. 

 Sipas raportimeve për mediat, ftesa e Biden për Trump lidhet me diskutimin e kalimit të pushtetit. Sipas AP, Biden po planifikon t’i drejtohet kombit për rezultatet e zgjedhjeve, të cilat do të kenë implikime të mprehta për pasardhësin e tij. 

 Biden mësohet se foli gjithashtu me Zëvendës Presidenten Kamala Harris, për ta uruar atë për fushatën e saj.

 Pas fitores në zgjedhje e gjithë vëmendja tashmë është përqendruar tek Presidenti i sapozgjedhur Donald Trump dhe tek mënyra se si ai do të qeverisë. 

Mbështetësit e tij thonë se edhe amerikanët që nuk votuan për ish-presidentin do të shohin përmirësim të jetës së tyre. “Mendoj se shumë njerëz, edhe ata që kanë besuar disa pretendime të rreme për Donald Trumpin do të befasohen për të mirë kur të shohin se do të paguajnë më pak taksa. Çmimet do të ulen dhe kufiri do të jetë i sigurt”, thotë ish-kandidati republikan për President, Vivek Ramaswamy. 

Me zgjedhjen e Susie Wiles si shefe të kabinetit të Trump, administrata e presidentit të zgjedhur tashmë po merr formë. 

Në fundjavë Trump sqaroi në platformën e tij të mediave sociale “Truth”, se ish-ambasadorja amerikane në OKB, Nikki Haley dhe ish-sekretari i Shtetit Mike Pompeo, nuk do të marrin pozitë në kabinetin e ri të tij. 

 Ndërkohë janë ngritur pikëpyetje nëse Trump do t’u qëndrojë disa deklaratave që bëri gjatë fushatës për t’u hakmarrë ndaj kundërshtarëve të tij politikë dhe atyre që kanë ngritur padi kundër tij.

 “Do t'u tregoj atë që Donald Trumpi e ka thënë shpesh; hakmarrja jonë do të jetë suksesi, e suksesi do të jetë hakmarrja jonë”, thotë Ramaswamy.

 Për ata që mbështetën kandidaten demokrate Kamala Harris, kjo është një kohë reflektimi. 

 “Klasa punëtore e këtij vendi është e zemëruar dhe jo pa arsye. Falë ekonomisë sot, ata që janë të pasur po jetojnë jashtëzakonisht mirë, ndërsa 60% e popullatës mezi ia dalin të mbyllin muajin”, tha për rrjetin CNN senatori i pavarur Bernie Sanders. 

 Ndërsa vlerësoi arritjet e administratës së Presidentit Biden, senatori Sanders tha se ka ende shumë punë për të bërë. 

 “Ne kemi nevojë për një plan që i thotë klasës punëtore se do të krijojmë një ekonomi dhe një qeveri që punon për ju. Por kjo nuk mund të ndodhë nëse nuk hiqni donatorët e mëdhenj, ata me shumë para nga politika”, tha senatori Sanders.

 Presidenti Joe Biden ka premtuar se do të ketë një transferim paqësor të pushtetit më 20 janar 2025. 

Biden i telefonoi Presidentit të zgjedhur Trump për ta uruar pas fitores së tij në zgjedhje. Të dy do të takohen të mërkurën në Shtëpinë e Bardhë.