azhdojnë reagimet për skandalin që LDK krijoi me Donika Gërvallën

Skandali që krijoi Lidhja Demokratike e Kosovës me anëtaren e saj, Donika Gërvalla, e cila nuk është lejuar të hyjë në mbledhjen e Këshillit të përgjithshëm të LDK, po vazhdon të komentohet me tone reaguese ndaj udhëheqjes së LDK-së.

Donika Gërvalla nuk është lejuar të hyjë në sallë. E kanë nxjerrë zvarrë nga hapësirat ku po mbahej mbledhja e Këshillit të Përgjithshëm të LDK-së, ka qenë lajmi që është publikuar në media për këtë ngjarje skandaloze, që askush nga udhëheqja e LDK-së nuk po skuqet se lere më t’i shkoi dikujt mendja për të dhënë përgjegjësi publike për një akt të tillë tejet të turpshëm ndaj një veprimtareje pikërisht të LDK-së dhe bijës së patriotit Jusuf Gërvalla.

Ky ishte skandali i dytë i LDK-së me Donika Gërvallën, e cila vitin e kaluar bashkë me përfaqësues të Degës së së LDK-së të Gjermanisë nuk ishte lejuar të merr pjesë në Kuvendin Zgjedhor të LDK, kur kryetar i partisë u rizgjodh Isa Mustafa pa asnjë kundërkandidat.

Deputeti i Lidhjes Demokratike të Kosovës, Arben Gashi, i cili e ka cilësuar si të gabuar sjelljen ndaj Donika Gërvallës dhe ndalimin e saj që të hyjë në një mbledhje të kësaj partie.

“Burra, gabuat me Donika Gërvallën”, shkruan deputeti Gashi në llogarinë e tij në Facebook, duke rikujtuar tërheqjen zvarrë të veprimtares nga sigurimi që qëndronte në hyrje të sallës ku mbahej takimi.

Edhe deputeti i Lidhjes Demokratike të Kosovës, Shpejtim Bulliqi, me anë të një postimi në llogarinë e tij në Facebook ka reguar ndaj përjashtimit dhe tërheqjes zvarrë të zonjës Donika Gërvalla nga mbledhja e Këshillit të Përgjithshëm të LDK-së.

Bulliqi i ka quajtur pamjet si të turpshme dhe ka bërë një ndërlidhje me kohërat e kaluara kur mbretëronte totalitarizmi.

“Pamjet e turpshme që pamë para dyerve ku mbahej tubimi i Këshillit të Përgjithshëm të LDK-së, na e përkujtuan një periudhe jo të largët, të një diktature totalitare që vepronin njëjtë, si sot me Donika Gërvallën ndaj mendimit dhe fjalës së lirë.

Një lidership i tillë mosdurues dhe jo tolerant ndaj fjalës se lirë dhe mendimit ndryshe të anëtarëve të vetë si dhe injorant dhe mosbesues në profesionalizmin dhe ekspertizën e njerëzve të vetë është i prirë drejtë vetëshkatërrimit dhe tkurrjes dhe rrugës drejt autokracisë klanore“, ka shkruar Bulliqi në Facebook.

Kryetari i Degës së LDK-së në Prizren, Haxhi Avdyli, ka reaguar ndaj partisë së tij, për sjelljen që ka treguar me Donika Gërvallën. Ai thotë se me këtë veprim, LDK-ja i ka shkaktuar dëme shumë vetvetes.

“Ne nuk guxojmë të lëndojmë besimin e elektoratit besnik në vlerat që përfaqëson LDK-ja. Ne nuk guxojmë të nëpërkëmbim kontributin 25-vjeçar të veteranëve të LDK-së, sidomos elektoratin e diasporës. Ne jemi aty për ata. Ne duhet të dëgjojmë zërin e tyre”, ka thënë ai.

Sjelljen ndaj saj e ka dënuar më herët edhe deputetja e LDK-së, Vjosa Osmani, kryetarja e Komunës së Gjakovës, Mimoza Kusari-Lila, si dhe shoqëria civile, veçmas Rrjeti i Grupit të Grave të Kosovës.

Sipas kryetares së Gjakovës, Kusari-Lila, skenat e tërheqjes zvarrë të Donika Gërvallës nga Këshilli Përgjithshëm i LDK-së janë aq të trishta sa të sjellin mosbesim se mund të jenë të vërteta. Ajo nënvizon se kishte mbetur e mpirë teksa shikonte raportimet mediale lidhur me atë skenë dhe shton se dikush që e urdhëron atë skenë është përgjegjës.

Njohësi i rrethanave politike, Halil Matoshi, e rastin me Donika Gërvallën e ka quajturskandal të paparë deri më tash, ndërsa Lidhjen Demokratike të Kosovës e ka cilësuar si një parti neveritëse, duke theksuar se kjo parti nuk përfaqëson demokracinë.

KFOR-i ndihmon dezinfektimin dhe dezinfektimin në Deçan

Javën e ardhshme fillon dezinfektimi dhe dezinsektimi i hapësirave dhe objekteve publike në territorin e Komunës së Deçanit. Ky projekt është mundësuar nga komuna në bashkëpunim me KFOR-in italian.

Dezinfektimi dhe dezinsektimi i hapësirave dhe objekteve do të bëhet nga një ekip i certifikuar nga KFOR-i pas trajnimeve të mbajtura.

KFOR-i po ashtu ka dhuruar pajisje në vlerë mbi 7000 € për kryerjen e këtij projekti, si çizme, pompa gome, uniforma për dezinfektim, maska kundër gazit, filtra, doreza, trakë sinjalizuese, pompë për spërkatje krahu, etj.

Lajmin e ka konfirmuar zyrtarja për marrëdhënie me publikun në Kuvendin Komunal të Deçan, Yllarta Thaqi, e cila ka treguar se realizimi i këtij projekti do të fillojë nga java e ardhshme, ndërsa nuk dihet saktësisht kur do të përfundojë pasi nuk ka ndonjë afat të caktuar.

Edhe pse Deçani është rajon malor, ai nuk ka pasur probleme me insekte të rrezikshme, si rriqrat, në krahasim me disa komuna të tjera në Kosovë.

“Deçani nuk ka probleme me rriqra. Problemet me rriqra mund të jenë raste të rralla, por as me insekte tjera të rrezikshme”, thotë drejtori për Shëndetësi dhe Mirëqenie Sociale në Komunën e Deçanit, Dr.Haki Shehaj.



Instruktori Maurro Arcamone nga Grupi Shumëkombësh – Perëndim i KFOR-it vlerëson se kjo është një nismë në të mirë të komunitetit dhe të tilla do të ketë edhe në të ardhmen duke marrë parasysh se ekipi i përzgjedhur ka përfunduar trajnimin me sukses.

Ekipi i certifikuar për të bërë dezinfektimin dhe dezinsektimin në territorin e Komunës së Deçanit do të nis punën javën e ardhme, së pari në kopshtin e fëmijëve “Fatosat’’ në Deçan.

Higjiena në burgjet e Kosovës, sipas KMDLNJ-së, në gjendje të mjerueshme

Këshilli për Mbrojtjen e të Drejtave dhe Lirive të Njeriut në një raport të tij ka vlerësuar se higjiena në burgjet e Kosovës është në gjendje të mjerueshme.

Sipas këtij raporti, banjat në Qendrën Korrektuese në Dubravë janë të vendosura nëpër dhoma bashkë me tualete dhe gjendja e tyre është jashtë çdo standardi, kurse disa pavijone i kanë banjat dhe tualetet të përbashkëta për secilin krah, por pastërtia e tyre nuk është në nivel të duhur.

Raporti i KMDLNJ-së thekson se në këtë qendër nuk ka ujë të ngrohtë rregullisht, pos dy herë në javë dhe si pasojë e kësaj të dënuarit janë të detyruar të improvizojnë metoda të rrezikshme për ngrohjen e ujit.

Të burgosurit kanë ankesa në cilësinë e produkteve higjienike. Higjiena e dhomave dhe rrobave është e pamundur të mbahet për shkak të problemeve me lagështi. Si dhe në shumicën e pavijoneve nuk ka çarçafë dhe mbulesa për jastëk që disa muaj.

Në Qendrën Korrektuese për të Mitur dhe Femra në Lipjan banjat në pjesën e femrave janë të përbashkëta, ndërsa tualetet janë nëpër dhoma dhe janë të hapura, por në shumicën e tualeteve ka rrjedhje të ujit. Nëpër dhoma dhe korridor ka lagështi dhe mbajtja e pastërtisë është e vështirësuar.

Furnizimi me ujë të ngrohtë është i kënaqshëm. Çarçafët ndërrohen dhe pastrohen çdo 15 ditë, ndërsa rrobat pastrohen në lavatriqe çdo javë. Furnizimet me mjete higjienike janë në nivel, por cilësia është shumë e dobët.

Në pjesën ku janë të miturit banjat janë të përbashkëta, por në shumicën e tualeteve tavani është i mykur nga rrjedhja e ujit, ndërsa pastërtia nuk është në nivel. Furnizimi me ujë të ngrohtë është i kënaqshëm dhe të miturit pastrohen 3-4 herë në javë.

Mbulesat ndërrohen dhe pastrohen çdo 15 ditë, ndërsa rrobat pastrohen në lavanderi çdo javë. Furnizimet me mjete higjienike janë në nivel, por cilësia është e dobët, thuhet në raport.

Edhe në Burgun për Siguri të Lartë në Gërdoc, sipas KMDLNj-së, të gjitha dhomat-qelitë janë të pajisura me banjo, të cilat nuk janë të ndara nga hapësira tjetër e dhomës. Banjot e pastrimit janë të përbashkëta dhe i kanë të ndara ditët e pastrimit.

Demarkacioni me Malin e Zi, hendek në politikë

Përfaqësuesit e banorëve të brezit kufitar mes Kosovës dhe Malit të Zi, vazhdojnë t’ju bëjnë thirrje autoriteteve të vendit që të gjejnë një zgjidhje tjetër për shënjimin e vijës kufitare me shtetin fqinj.

Ata thonë se marrëveshja e arritur vitin e kaluar në Vjenë, ndërmjet përfaqësuesve të Kosovës dhe Malit të Zi, nuk është e pranueshme, pasi që siç deklarojnë banorët, një pjesë e madhe e tokave të Kosovës mbete jashtë territorit të Kosovës.

Ali Lajçi, përfaqësues i banorëve të fshatrave të brezit kufitar me Malin e Zi, thotë për Radion Evropa e Lirë, se para se ekzekutivi i vendit të procedojë Projektligjin për ratifikim të marrëveshjes për demarkacionin e kufirit me Malin e Zi, duhet të arrijë një pajtim gjithëpërfshirës me banorët e asaj ane dhe me partitë politike.

“Pa një konsensus [marrëveshja] nuk duhet të shkojë në Kuvend. Nëse nuk ka konsensus nga të gjitha grupet, nuk është në rregull të shkojë në Kuvend e të bëhen përçarje e kriza politike. Nëse, zgjatet procesi i liberalizimit të vizave, nuk bëhet kiameti. Kushtëzimi është jashtëzakonisht i dëmshëm dhe jo korrekt nga ana e faktorit ndërkombëtar. Kjo punë duhet të zgjidhet ngadalë, e me kujdes. Ai variant [ ekzistuesi] nuk shkon”, thotë Lajçi.

Qeveria e Kosovës nuk e ka proceduar ende në Kuvendin e Kosovës Projektligjin për ratifikim të marrëveshjes për demarkacionin e kufirit me Malin e Zi.

Partitë politike opozitare thonë se marrëveshja si e tillë, pa ndryshime, nuk mund të kalojë në procedurë të ratifikimit.

Pal Lekaj, nënkryetar i AAK-së, njëherësh deputet në Kuvendin e Kosovës, thotë për Radion Evropa e Lirë se pavarësisht disa takimeve që janë zhvilluar, nuk ka ndonjë përafrim për të arritur ndonjë marrëveshje me Qeverinë e Kosovës që marrëveshja, si e tillë të ratifikohet.

“Ne qëndrojmë në pozitat e njëjta. Dhe, përkundër asaj që kemi pasur takime të dyanshme, tri-anshme me ndërkombëtarët, mirëpo derisa Qeveria nuk lëviz pozitivisht që të anulojë marrëveshjen dhe ta rinegociojë, ta shkarkojë komisionin që ka kryer punën e demarkacionit, ne qëndrojmë në të njëjtat pozita dhe me të njëjtën kërkesë”, shprehet Lekaj.

Ndërkaq, Frashër Krasniqi nga Vetëvendosje, për Radion Evropa e Lirë shpjegon se ky subjekt politik është i interesuar që çështja e demarkacionit me Malin e Zi të zgjidhet, por jo në dëm të territorit Kosovës.

“Nuk do të pranojmë dhe nuk do të lejojmë ratifikimin e kësaj marrëveshje dhe do të angazhohemi maksimalisht për parandalimin e saj”, deklaron Krasniqi.

Zyrtarët e Larët të Qeverisë së Kosovës, por edhe ata të Kuvendit të Kosovës, në vazhdimësi u kanë bërë thirrje partive politike opozitare që paraprakisht të ulen dhe të gjejnë një pajtim para se Kuvendi të procedojë ratifikimin e demarkacionit me Malin e Zi.

Ratifikimi i kësaj marrëveshjeje mbetet çështja kryesore për fillimin e zbatimit të liberalizmit të vizave për Kosovën.

Komisionari për Politikë Evropiane të Fqinjësisë dhe Negociata për Zgjerim, Johannes Hahn, pas një takimi që ka zhvilluar gjatë kësaj jave me krerët e partive në pushtet dhe atyre në opozitë, ka deklaruar se pa zgjidhjen e çështjes së demarkacionit kufitar me Malin e Zi, nuk do të ketë liberalizim të vizave për qytetarët e Kosovës.

Lidhja e Historianëve të Kosovës “Ali Hadri”, Dega në Deçan, ka shpallur tradhtare të popullit kryetarenGjykatës Kushtetuese të Kosovës, ArtaRama – Hajrizi

Kryetarja  e Gjykatës Kushtetuese të Kosovës, Arta Rama-Hajrizi, ka shërbyer për një kohë të gjatë si anëtare e grupit punues për themelimin e Gjykatës Kushtetuese të Kosovës. Ka qenë  asistente e lartë e të drejtës kushtetuese në Fakultetin Juridik të Prishtinës ku dhe i ka përfunduar studimet e larta. Hajrizi ka përfunduar magjistraturën për drejtësi dhe qeverisje në Washington College of Law, American University në Washington DC.

Arta Rama Hajrizi në vitin 2012 ka shërbyer si gjyqtare në Gjykatën Kushtetuese.

Rama Hajrizi më 12 shtator 2014 është emëruar zëvendës-anëtare e komisionit të Venecias ku ka përfaqësuar Kosovën.

Ajo njihet edhe si themeluese e Konsullatës së pergjithshme të Republikës së Kosovës në Nju Jork në të cilën shërbeu gjatë viteve 2008-2012. Kryetarja e Gjykatës Kushtetuese ka qenë pjesë e ekipit të ekpertëve në komisionin për hartimin e Kushtetutes së Republikës së Kosovës.

Arta Hajrizi ka punuar në disa projekte të USAID-it në Kosovë për reformimin e sistemit të drejtësisë dhe të atij gjyqësor. Njihet si ekperte në zbatimin e shumë projekteve në ngritjen e vetëdijësimit për respektimin dhe për mbrojtjen e të drejtave të njeriut.

Aktualisht është duke ndjekur doktoraturën në Universitetin e Prishtinës, është e martuar dhe ka një djalë.

Gjyqtarja Arta Rama-Hajrizi ka  marrë postin  e Kryetarës së GJK më  dt.26 qershor 2015, atëherë kur i përfundojë   mandati i  kryetarit  të Gjykatës Kushtetuese të Kosovës,Prof.dr. Enver Hasani.

Mandati i kryetarit të Gjykatës Kushtetuese të Kosovës është tri vjet.(Floripress)

Lidhja e Historianëve të Kosovës “Ali Hadri”, Dega në Deçan, ka shpallur tradhtare të popullit kryetarenGjykatës Kushtetuese të Kosovës, ArtaRama – Hajrizi, pas dhënies së aktgjykimit në lidhje me çështjen kontestuese në mes të Ndërmarrje shoqërore “Apiko” dhe “Iliria” dhe Manastirit të Deçanit, ku të gjitha pronat kalojnë në pronësi të Manastirit të Deçanit.

Në një komunikatë për media LHK “Ali Hadri,Dega në Deçan, aktgjykimin e nënshkruar nga Rama – Hajrizi e konsideron se është bazuar në vendimet e kohës së Sllobodan Millosheviqit, duke kërkuar që Rama – Hajrizi të jap dorëheqja nga të qenit kryetare e Gjykatës Kushtetuese.

“Vendimi i Gjykatës Kushtetues Nr. ref. AGJ 943/16, i nënshkruar nga Arta Rama-Hajrizi si kryetare e Gjykatës është akt tradhtie dhe i pa precedent, ngase është në kundërshtim të plotëme Kushtetutën e Republikës se Kosovës dhe në kundërshtim të plotë me interesin e përgjithshëm të popullit shqiptare të Kosovës. Kryesia e LHK“Ali Hadri” dega në Deçan, për hire të korrektësisë i rikujton Kryetares se Gjykatës Kushtetuese të Republikës se Kosovës Arta Rama-Hajrizi, se vendimi i gjykatës që ajo drejton është i bazuar në vendimet e kohës se masave të dhunshme të kohës se krimineli Sllobodan Millosheviq. Ne, mbesim të habitur se si mund të jetë e pajtueshme me këtë vendim Kryetarja Rama-Hajrizi, kur dihet se i ka lëne turp të keq dhe njollë të zezë vetës dhe familjes se saj. Në këto rrethana, asaj nuk i mbetet gjë tjetër vetëm që më turp të japë dorëheqje nga detyra e Kryetares se Gjykatës Kushtetuese të Republikës se Kosovës dhetë shkoj në shtëpi kokë ulur”, thuhet në komunikatë.

Kërkesën për dorëheqjen e Rama – Hazirit, LHK “Ali Hadri”,dega në Deçan e mbështet në disa arsyeje.

“Vendimi i Gjykatës Kushtetues Nr. ref. AGJ 943/16, i nënshkruar nga Arta Rama-Hajrizi, është shkelje e Kushtetutës se Republikës se Kosovës. Vendimi i Gjykatës Kushtetues Nr. ref. AGJ 943/16, i nënshkruar nga Arta Rama-Hajrizi, është i bazuar në vendimet e kohës se Sllobodan Millosheviqit, vendime të cilat në Kosovës janë të pa zbatueshme dhe për popullin shqiptarë të Kosovës janë të pa pranueshme.Vendim i i Gjykatës Kushtetues Nr. ref. AGJ 943/16, i nënshkruar nga Arta Rama-Hajrizi, është marrë për Sava Janjiqi dhe Manastirin e Deçanit, të cilët nuk e pranojnë realitetin e ri të Kosovës, ata janë kundër shtetit tonë dhe kanë lobuar kundër pranimit të Republikë se Kosovës nga shumë shtete dhe kundër pranimit të vendit tonë në shumë organizma siç ishte rasti me UNESCO-n”, janë arsyejet e dhëna përmes komunikatës.

LHK “Ali Hadri”,Dega në Deçan u bëjnë thirrje organeve komunale, partive politike dhe organizmave të tjera që të i bashkërendojmë aktivitetet me ne, për të kundërshtuar këtë vendim të dëmshme dhe anti-kombëtare.

Mali i Zi ka nënshkruar protokollin për anëtarësim në NATO

“Nëse Mali i Zi anëtarësohet në NATO, Podgorica hyn në kategorinë e caqeve potenciale të Rusisë”, është shprehur Andrej Klimov.

Një Mal i Zi perëndimor, e thyen edhe ëndrrën e ndikimit serb në regjion dhe e zbeh edhe rolin e Beogradit zyrtarë që të paraqitet si faktor stabiliteti në Ballkan.

Ushtria e Malit të Zi përbëhet nga tre forca; ato tokësore, ajrore dhe detare. Shërbimi i detyruar është hequr qysh në vitin 2006, kurse në ditët e sotme Ushtria e Malit të Zi është ushtri profesionale dhe tashmë ka në gjirin e saj 1950 trupa aktiv. Pothuajse i tërë arsenali ushtarak i ushtrisë së këtij vendi është i trashëguar nga Forcat e Armatosura të konfederatës Serbi-Mali i Zi. Kjo konfederatë ishte krijuar pas shpërbërjes së ish Jugosllavisë.

Mali i Zi ka nënshkruar javën e kaluar, protokollin e anëtarësimit në NATO, që do t’i mundësojë pjesëmarrjen në të gjitha takimet e Aleancës, si vend vëzhgues ose i ftuar. Pasi ta kenë ratifikuar protokollin të gjitha vendet anëtare të NATO-s, Mali i Zi do të bëhet vendi i 29-të anëtar i saj.

Protesta e orkestruara kundër anëtarësimit në NATO

Pak ditë para se t’i jepet drita e gjelbërt këtij vendi për të hyrë në Aleancë, në vend kishin shpërthyer protestat nga partitë serbe, ku qëllimi fondamental i këtyre protestave ishte që të paraqesin Malin e Zi si një shtet jostabil dhe vendimi i NATO-së të shtyhet. Këto protesta pastaj u pa se ishin të orkestruara nga Beogradi dhe Moska

Ramadan Avdiu: Prej vitit 1988-të, Kadri Veseli ishte pjesë aktive e aksioneve çlirimtare

Ramadan Avdiu

Institucionet nuk kanë pasur as minimumin e komoditetit për punë. Përfshirja e disa komandantëve të njohur në agjendën e Vetëvendosjes, i trimëroj këta të fundit dhe i ashpërsuan metodat e kundërshtimit politik. Skenat e dhunës në parlament dhe ato kundër policisë dhe institucioneve shtetërore e kanë dëmtuar rëndë imazhin e Kosovës.
Me presidentin Hashim Thaçi dhe kryetarin e PDK-së njihet që 27 vjet dhe thotë se gjithnjë e kanë plotësuar shumë mirë njëri-tjetrin. Flet për Indeksonline, njëri prej themeluesve të Partisë Demokratike të Kosovës, Ramadan Avdiu, tash i angazhuar në diplomaci.
Indeksonline: Ju keni qenë ndër themeluesit dhe drejtuesit e Partisë Demokratike të Kosovës. Edhe pse tanimë jeni shkëputur e jeni i angazhuar në diplomaci ju jeni politolog dhe njohjes i mirë i realitetit politik kosovar. Cilat janë përshtypjet tuaja mbi zhvillimet e fundit politike në Kosovë dhe bojkotin e opozitës?
Ramadan Avdiu: Shikuar nga prizmi i një vështruesi të situatës, mund të them se përshtypjet i kam bukur të zymta. Praktikisht nga përfundimi i zgjedhjeve të fundit të vitit 2014, institucionet e Republikës nuk kanë pasur as minimumin e komoditetit për punë. Kjo është reflektuar fuqishëm, si në të gjitha segmentet e funksionimit të shtetit, ashtu edhe në jetën e përditshme të qytetarit. Humbja e kohës rreth konsolidimit të institucioneve, pastaj tentimi për të ndërtuar koalicion dhe mosrealizimi i tij, kanë ndikuar që opozita të mos i përfillë qëndrimet e Qeverisë së koalicionit PDK-LDK.
Partitë opozitare tentuan të reagojnë të bashkuara. Duke pasur parasysh se agjenda opozitare kryesisht diktohej nga Lëvizja Vetëvendosje dhe në atë agjendë u futën edhe disa komandantë të njohur në luftën çlirimtare, drejtues dhe deputetë të Lëvizjes Vetëvendosje paksa më të trimëruar ashpërsuan metodat e kundërshtimit, madje duke përdorur dhunë kundër institucioneve publike, e duke mos kursyer edhe pronën private, radikalizuan skajshëm format e kundërshtimit të vendimeve të Qeverisë dhe paralizuan punën në Kuvend, rrjedhimisht edhe punën e Qeverisë. Jemi dëshmitarë se, gjatë kësaj periudhe sa pak ligje janë proceduar në Kuvend, sa pak vendime ka arritur të marrë Kuvendi.
Opozita për mendimin tim e ndikuar nga pjesëmarrja e qytetarëve në protesta ka rënë në grackë të mashtrimeve optike, duke menduar se kanë përkrahje absolute në objektivat e tyre, kundërshtimin e demarkacionit të kufirit me Malin e Zi dhe kundërshtimin e Asociacionit të komunave me shumicë serbe. Ajo, këto dy çështje në fillim i shfrytëzojë si pretekste të kundërshtimit, por që gradualisht synojë t’i shndërrojnë në kauzë. Madje edhe rreth këtij preteksti që synohej të kthehej në kauzë, opozita nuk mundi të qëndrojë e bashkuar.
Indeksonline: Ku e shikoni daljen nga kjo krizë?
Ramadan Avdiu: Pas tërë asaj që ka ndodhur, partitë opozitare nuk arritën ta ruajnë homogjenitetin e tyre. Ato gradualisht po i kthehen normalitetit dhe për mendimin tim do të duhet të ndjekin rregullat e lojës së demokracisë që vetë i kanë pranuar. Ata kanë marrë pjesë në zgjedhje dhe janë përfshirë në institucione. Synimet e tyre politike duhet t’i realizojnë përmes bindjes dhe ndikimit, si tek institucionet, ashtu edhe tek qytetarët. Mbase ky viti i fundit do të mbahet në mend si testi më i rëndë për demokracinë në Republikën e Kosovës. Tashmë është qartë për të gjithë se, synimi i disa partive politike që aktualisht janë në opozitë, është të shkohet në zgjedhje të parakohshme. Por, dilema është se çka nëse sërish i humbin zgjedhjet dhe sërish mbesin opozitë? A do të ndryshojnë qasjen karshi institucioneve dhe atyre partive që do të krijojnë koalicion? Janë krijuar precedente jo të mira…
Mendoj se si pozita, ashtu edhe opozita, duhet të fokusohen në problemet e përditshmërisë në vend, sepse vetëm duke i trajtuar dhe zgjidhur ato mund të synojmë zgjidhjen e problemeve më të mëdha, si zhvillimin ekonomik dhe integrimin e shtetit të Kosovës në sistemin e marrëdhënieve ndërkombëtare.
Indeksonline: Shikuar prej së largu nga këndvështrimi i diplomatit, çfarë kostoje ka pasur kjo krizë politike në Kosovë për sa i përket imazhit dhe sfidave ndërkombëtare që ka Kosova?
Ramadan Avdiu: Sa i përket imazhit, kostoja nga kriza në fjalë nuk mund të llogaritet. Është shumë e lartë. Sidomos skenat e dhunës në parlament, ato kundër policisë dhe institucioneve shtetërore e kanë dëmtuar rëndë imazhin e Kosovës. Edhe fakti se në Kosovë shumë më shumë flitet se sa realisht luftohet korrupsioni ka bërë që të krijohet perceptimi se në Kosovë ka shkallë të lartë korrupsioni. Kjo edhe është përdorur në maksimum nga kundërshtarët e shtetit tonë, për të proklamuar atë tezën e njohur të tyre se kosovarët nuk mund të mbajnë shtet. Përkundër kësaj, Kosova ka arritur disa suksese, si nënshkrimi i marrëveshjes me BE për Stabilizim-Asociim, rekomandimi nga Komisioni Evropian për liberalizimin e vizave, anëtarësimi i Kosovës në UEFA dhe FIFA dhe të tjera. Megjithatë, pas skenave të manifestuara në parlament dhe në rrugët e Prishtinës, imazhi i Kosovës në botë është cenuar rëndë.
Indeksonline: Si mund të riparohet dëmi i shkaktuar?
Ramadan Avdiu: Dëmi i shkaktuar mund të riparohet vetëm me punë. Ne para botës duhet të promovojmë vlerat tona të mirëfillta, kulturore, kombëtare, shtetërore, etike, humane sportive, politike, demokratike e evropiane. Shoqëria jonë ka shumë vlera që i mbajmë vetëm për vete. Bota është duke na parë më shumë ashtu siç realisht nuk jemi. Bota deri tash na njeh sipërfaqësisht. Duhet të na njoh më mirë. Ne nuk jemi ngatërrestarë, nuk jemi të dhunshëm, jemi shembull për bashkëjetesë dhe tolerancë ndërkonfeksionale dhe ndëretnike, njësoj duhet të kemi tolerancë dhe respektim të diversitetit politik në mes të subjekteve politike. Nuk predikojmë radikalizëm fetar, jemi shtet sekular dhe shoqëri me civilizim të lashtë, me një trashëgimi të jashtëzakonshme kulturore, por që një pjesë e konsiderueshme e saj na është tjetërsuar. Ne duhet ta promovojmë identitetin tonë, evropian, kombëtar e shtetëror dhe për këtë duhet angazhim edhe i pozitës, edhe i opozitës.
Për të dinamizuar zhvillimin ekonomik, zbutjen e papunësisë dhe luftën kundër korrupsionit dhe krimit të organizuar, nevojitet angazhim edhe i pozitës, edhe i opozitës.
Por, edhe për të dëshmuar se perceptimi për dukuritë negative është shumë më i madh se sa realisht ato janë të pranishme në shoqërinë tonë, duhet angazhim i të gjithëve. E jo siç po ndodhë, që për qëllime më shumë politike, shumica e akterëve e kualifikojnë njëri-tjetrin si të korruptuar ose të inkriminuar. Kjo për mendimin tim është bukur irracionale dhe po na jep hije të keqe si shoqëri dhe si shtet në botë. Ka kohë që ne e kemi shpërqendruar vëmendjen dhe ne vend se të angazhohemi të gjithë për të dëshmuar se në Kosovë ka ndodhur gjenocid i ushtruar nga ana e pushtuesve serbë kundër popullit shqiptar, në vend se të ndriçojmë luftën heroike të popullit tonë për çlirim, më shumë flasim për inkriminimin e saj. Kjo është absurditeti më i madh që po ndodh në shoqërinë tonë. Vlerën më të madhe që e kemi krijuar si popull, UÇK-në dhe luftën çlirimtare po e zvetënojmë më së shumti vetë ne, për shkak të meskiniteteve politike. A nuk është absurde kur heroi kualifikohet si antihero, çlirimtari si kriminel… Duhet të rikthejmë sistemin e vlerave, i cili është përmbysur. Në këtë drejtim duhet të angazhohet pozita e opozita, por edhe institucionet shkencore, shoqëria civile dhe mediat të cilat edhe nuk mund të amnistohen për situatën e krijuar në vend.
Indeksonline: Çfarë mendoni për zhvillimet e fundit brenda Partisë Demokratike të Kosovës?
Ramadan Avdiu: Sikurse shumica e partive politike jo vetëm në Kosovë, por në tërë regjionin e Evropës Juglindore, edhe PDK-ja identifikohet më së shumti me liderin. Pas zgjedhjes së ish-kryetarit të PDK, Hashim Thaçit, president i vendit, si dhe largimit të tij nga kreu i PDK-së, natyrisht se është pritur zgjedhja e kryetarit të ri të PDK-së.
Siç e kemi parë, zgjedhja e kryetarit të ri të PDK-së ka shkuar qetë dhe nuk është manifestuar ndonjë tendencë fragmentimi apo mospajtimi me rrjedhën e ngjarjeve brenda partisë, madje nuk ka pasur as kandidatë të interesuar që të kandidojnë për kryetar. Unë kam pritur se do të jenë disa kandidatë dhe zgjedhja të bëhej përmes votës së fshehtë. Por, meqë ishte vetëm një kandidat, delegatët në Konventën e PDK-së janë përcaktuar që zgjedhja të bëhej me aklamacion. Pra, përgjithësisht, zhvillimet në PDK janë normale dhe brenda rregullave të kornizuara në statutin e partisë.
Indeksonline: Si do të ndikojë largimi i presidentit Thaçi dhe zëvendësimi i tij nga Kadri Veseli në konventën e PDK-së?
Ramadan Avdiu: E ceka edhe më herët se partitë politike tek ne identifikohen me liderin. Ish-lideri, Hashim Thaçi, ka qenë sinonim i PDK-së. Natyrisht që një kohë, edhe anëtarësia dhe mbështetësit e PDK-së do të vazhdojnë që presidentin ta shohin si lider, jo vetëm shtetëror, por edhe partiak. Aq sa kam mundur të vërej edhe kryetari i sapozgjedhur i PDK-së është pritur me entuziazëm nga anëtarët, mbështetësit dhe elektorati i PDK-së. Konsideroj se nuk do të ketë turbulenca të brendshme dhe kryetari i ri do ta dinamizojë aktivitetin e strukturave të PDK-së në terren. Shumë do të varet nga ekipi operativ që do të merret me aspektin organizativ dhe ristrukturimin e partisë. PDK është parti e organizuar mirë dhe me elektorat mjaft stabil. Pavarësisht se ka tri legjislatura që është parti në pushtet, ajo edhe në zgjedhjet e ardhshme, qofshin ato të parakohshme apo të rregullta, për mendimin tim mbetet favoritja kryesore.
Indeksonline: Ju jeni ndër drejtuesit kryesor dhe më të hershëm të Lëvizjes Popullore për Republikën e Kosovës. Kur jeni njohur për herë të me Kadri Veselin?
Ramadan Avdiu: Me Kadri Veseli për herë të parë jam njohur në vitin 1989. Më saktësisht, më 29 mars 1989 i kam takuar për herë të parë Kadri Veselin dhe presidentin e tashëm, Hashim Thaçin. Atëbotë kanë qenë studentë të vitit të dytë dhe kanë ndarë të njëjtën banesë në Prishtinë. Dy muaj më herët, unë isha liruar nga burgu. Presidentin Thaçi dhe Kadri Veselin i kam njohur përmes shokut tim të burgut, Sabit Veseli, i cili ishte familjar i z. Kadri Veseli. Më kujtohet se atë ditë e patëm shpërndarë një trakt dhe pas aksionit jemi takuar në shtëpinë ku banonin ata.
Indeksonline: Si është përfshirë Veseli në këtë lëvizje?
Ramadan Avdiu: Kadriu nga viti 1981 ka pasur anëtarë të familjes të arrestuar dhe të dënuar për veprimtari çlirimtare. Vëllai dhe djali i axhës së Kadriut kanë qenë të dënuar. Kjo ka ndikuar edhe në formimin e tij si i ri. Ai, pas lirimit nga burgu të Sabit Veselit, tash hero i Kosovës, gjithmonë ka qenë afër tij. Praktikisht, nga viti 1988, në të gjitha aksionet çlirimtare, demonstratat dhe manifestimet e tjera të protestës, por edhe në aksione të shpërndarjes së materialeve klandestine, Kadri Veseli ka qenë pjesëmarrës aktiv. Ishte ndër themeluesit e bërthamave të para të UÇK-së. Kontributi i tij gjatë luftës çlirimtare dhe pas saj, tashmë është i qartë, jo vetëm për opinionin tonë, por edhe më gjerë.
Indeksonline: Ju i keni njohur prej një kohe të gjatë nga afër, si Thaçin, ashtu edhe Veselin, ku mendoni se ngjajnë për nga karakteri dhe personaliteti, si dhe ku dallojnë?
Ramadan Avdiu: Si presidenti Thaçi, ashtu edhe kryetari i tashëm i PDK-së, Kadri Veseli, shquhen për karakter të fortë. Kanë shumë energji, vullnet për punë dhe angazhime për avancimin e proceseve. Si njëri, ashtu edhe tjetri, kur e nisin një punë dëshirojnë t’i shkojnë deri në fund. Si dy personalitete që në një kontekst historik kanë pasur përgjegjësi të mëdha janë treguar shumë komplementarë. Për mrekulli e kanë plotësuar njëri-tjetrin. Besoj se sërish do të mund të funksionojnë shumë mirë si bartës të institucioneve më të rëndësishme të vendit. Për një nuance mund të dallojnë në temperament, njëri është paksa më temperament se tjetri.
Indeksonline: Cilat mendoni se janë sfidat kryesore me të cilat ballafaqohet sot Partia Demokratike e Kosovës dhe si mendoni se mund të përballen më së miri këto sfida?
Ramadan Avdiu: Partia Demokratike e Kosovës e ka provuar edhe opozitën, edhe pozitën. Ka pasur koalicione të mëdha PDK-LDK, por edhe koalicione më të vogla PDK-AKR dhe partitë e tjera minoritare. Pra, ka kaluar nëpër procese të ndryshme dhe ka krijuar një eksperiencë të mirë. Duke qenë se kohë të gjatë është në pushtet dhe mbanë pushtet në nivelin lokal në shumë komuna, sfidë për të do të jetë ruajtja e pozitave që aktualisht ka në shoqëri dhe menaxhimi i pakënaqësive, sepse në shoqërinë tonë, jo vetëm tek PDK-ja, por tek të gjitha partitë nganjëherë aktivistët partiakë presin dhe çdo ditë e më shumë kërkojnë zgjidhjen e problemeve individuale. Sfidë tjetër mendoj se do të jetë edhe absorbimi i kuadrove të reja, si dhe familjarizimi i anëtarësisë me programin e PDK-së, e me aq sa kam parë nga objektivat e kryetarit Veseli, ai më së shumti do të përqendrohet tek realizimi i programit ekonomik për zhvillimin e vendit. Konsideroj se PDK nuk e ka të vështirë të përballet me sfidat që theksova, sepse në strukturat dhe lidershipin e saj nuk ka ndryshuar asgjë, pos legjitimimit të kryetarit të partisë, i cili paraprakisht kishte filluar të akceptohet si lideri i ri i PDK-së
- See more at: http://lajmi.net/avdiu-prej-vitit-1988-te-kadri-veseli-ishte-pjese-aktive-e-aksioneve-clirimtare/#sthash.6sgXiRV9.dpuf