Hashim Thaçi zgjedhet president i Kosovës pas raundit të tretë të votimit

 81 deputet ishin në seancë gjatë votimit të tretë për President të Kosovës. 10 fletëvotime u shpallën të pavlefshme, ndërsa për Thaçin President votuan 71 deputetë. Hashim Thaçi do të jetë president i Kosovës për pesë vjet të ardhshme.

Nën masa të rrepta të sigurimit për brenda ashtu edhe jashtë Kuvendit, përherë të parë Kosova shpalli një president në tension.

Thaçi do të marri pozitën e shefit të shtetit me datë 7 prill, një datë pasi t’i përfundoj mandati presidentes aktuale Atifete Jahjaga.

Kryetari i PDK-së është zgjedhur tek në raundin e tretë President i Republikës së Kosovës. Në të dyja raundet e para Thaçi nuk arriti t’i merrte votat e nevojshme. Zgjedhja e Thaçit u vu në pikëpyetje në votimin e parë, pasi 27 prej fletëvotimeve ishin të pavlefshme.

Seanca për zgjedhjen e presidentit të vendit po vazhdon me procesin e votimit të raundit të tretë.

Deputetët janë mbledhur në sallë për të filluar votimin.

Në dy raundet e para pretendenti kryesor për president Hashim Thaçi nuk ka marrë votat e mjaftueshme ashtu siç kërkohen në bazë të procedurave për zgjedhjen e presidentit.

Në raundin e parë Thaçi ka marrë vetëm 50 vota ndërsa në të dytin ka marrë 14 vota më shumë, 64 vota të deputetëve.

Në seancë po marrin pjesë 82 deputetë të Kuvendit të Kosovës. Në seancë është edhe deputeti i VV-së Fisnik Ismajli i cili ka dominuar për anëtar të komisionit të votimit Ilir Dedën.

Ai në raundin e parë ishte anëtar i komisionit ndërsa në raundin e dytë është tërhequr.

Thaçi merr 14 vota më shumë se në raundin e parë

Lideri i PDK-së, Hashim Thaçi ka dështuar edhe në raundin e dytë të votimeve për postin e presidentit.

Ai ka marr 64 vota, kundërkandidati i tij Rafet Rama ka marr 2 vota. Kurse, 15 vota të deputetëve kanë qenë të pavlefshme.

Thaçit tani i ka mbetur vetëm edhe një mundësi për tu zgjedhur president i vendit në raundin e tretë ku edhe i duhen më pak vota.

Thaçi mora vetëm 50 vota në raundin e parë ndërsa në raundin e tretë i duhen të paktën 61 vota.

Nëse Thaçi nuk i siguron 61 vota në raundin e tretë atëherë vendi do të shkoj në zgjedhje të jashtëzakonshme në një afat prej 45 ditëve.

Në seancën e Kuvendit ka filluar procesi i votimit të raundit të dytë për zgjedhjen e presidentit të Kosovës.

Në raundin e parë kandidati Hashim Thaçi ka marrë vetëm 50 vota, ndërsa për Rafet Ramën kanë votuar katër deputetë.

27 deputetë votën e tyre e kanë bërë të pavlefshme.

Nëse as në këtë raund Thaçi nuk merr 80 vota ashtu siç parashihet me Kushtetutë, atëherë do të votohet për të tretën herë ku në këtë raund nevojiten votat e shumicës së thjeshtë të deputetëve që i bie që presidenti mund të zgjedhet me 61 vota të deputetëve.

Seanca po mbahet pa deputetët e opozitës.

Raundi parë: 50 vota për Hashim Thaçin, Rafet Rama 4 vota dhe 27 të pavlefshme
Hashim Thaçi nuk ka mundur të marrë votat e mjaftueshme për t’u zgjedhur president në raundin e parë.

50 deputetë kanë votuar për Hashim Thaçin, 4 për kundërkandidatin e tij Rafet Rama ndërsa 27 deputetë votën e tyre e kanë bërë të pavlefshme.

Pas këtij raundi duhet të votohet edhe një raund tjetër. Nëse as në raundin e dytë nuk merr votat e 80 deputetëve përsëritet raundi i tretë ku kërkohen 31 vota për t’u zgjedhur president i Kosovës.

Ka dështuar votimi i parë për Hashim Thaçin si president të vendit.

Nga 82 deputet të pranishëm tashmë 4 vota janë të pavleshfme dhe e bëjnë të pavlefshëm këtë raund të votimit pasi duhen 81 vota pro.

Tani pritet që të zhvillohet edhe raundi i dytë ku edhe në këtë raund nevojiten 81 vota pro që të zgjidhet presidenti i vendit.

****

Nisi raundi i parë i votimit për president të Republikës së Kosovës.

Në sallë të Kuvendit ndodhen 82 deputet, kuorum i mjaftueshëm për procedurë të rregullt në zgjedhjen e të shefit të shtetit.

****

Seanca e Kuvendit të Kosovës ka filluar me tentimin e deputetes së Vetëvendosjes, Shqipe Pantina për ta ndezur gazin lotsjellës, megjithatë i menjëhershëm ka qenë reagimi i sigurimit, duke mos lejuar që ajo ta ndezë lotsjellësin.

Seanca po vazhdon.

Deputetët kthehen në Kuvend, pas pauzës

Deputetët e pozitës kanë filluar të kthehen në sallën e Kuvendit të Kosovës, që pritet të nisin procedurat për votimin e Hashim Thaçit president.

Sërish gazlotsjellës, largohen me dhunë deputetët e opozitës
Deputetëve të opozitës iu është sjell vendimi për përjashtimin nga seanca e sotme.

Një vendim të tillë e ka marr edhe Visar Ymeri, i cili është larguar i pari me dhunë nga sigurimi.

Pas 10 minutash mbledhja e Kryesisë
Seanca e Kuvendit është ndërprerë prapë nga gazi lotsjellës i hedhur nga deputetë të Opozitës. Pas, kësaj kryetari i Kuvendit Kadri Veseli ka dhënë pauzë prej 10 minutash, ndërsa ka thirr përfaqësuesit e grupeve parlamentare në një mbledhje të Kryesisë së Kuvendit.

Kryesia do të mblidhet në sallën 301.

Sërish gazlotsjellës
Opozita sërish ka hedhur gaz lotsjellës në sallën e Kuvendit, ndërsa kryetari i Kuvendit Kadri Veseli ka kërkuar pauzë dhjetë minutëshe. Ai ka kërkuar nga 6 deputetë të opozitës që të lëshojnë sallën pasi Kryesia e Kuvendit ka marrë vendim që ta të përjashtohen.

Seanca ka shkuar sërish në pauzë 10 minutëshe, pas hedhjes së gazit lotjsellës.

Kryesia e Kuvendit ka përjashtuar 6 deputetë të opozitës, ka njoftuar Blerim Latifi, këshilltar i Kadri Veselit:

Pas zhvillimeve të sotme në Kuvendin e Kosovës, Kryetari i Kuvendit, në mbështetje të nenit 67.7 të Kushtetutës së Republikës së Kosovës dhe të nenit 41, paragrafi 3, pika c. të Rregullorës së Kuvendit, lidhur me sjelljen dhe veprimet e disa deputetëve të opozitës, në seancën plenare me 256 shkurt 2016, të cilët penguan zhvillimin e punimeve të seancës plenare, Kryesia e Kuvendit ka marrë vendim që deputetët e Kuvendit të Republikës së Kosovës, Ismail Kurteshi, Pal Lekaj, Teutë Haxhiu, Time Kadriaj, Bali Muharremaj dhe Faton Topalli të largohen nga pjesëmarrja në seancën plenare me 26 shkurt 2016 për shkak se me sjelljet dhe veprimet e tyre e pamundësuan zhvillimin e punimeve të seancës plenare.

​Deputetët fillojnë të kthehen në sallë

​Deputetët e pozitës kanë filluar të hynë në sallën e Kuvendit të Kosovës. Aty ka hyrën grupi parlamentar i LDK-së, por jo edhe ata të PDK-së.

Ndryshe, aty janë edhe deputetët e opozitës dhe një pjesë e kabinetit qeveritar.

Bali Muharremaj hedh gazin, lëndohet një deputet i Vetëvendosjes, ndërpritet seanca

Deputeti Bali Muharremaj ka pranuar se ka hedhur gazin lotsjellës.

"Unë e kam gjuajtuar gazinlotsjellës dhe jo Teuta Haxhiu", tha ai para mediave.

Ai menjëherë është shoqëruar nga Policia e Kosovës.

Akterët e gazit, Faton Topalli dhe Teuta Haxhiu?

Faton Topalli dhe Teuta Haxhiu e kanë gjuajtur gazin lotsjellës pak minuta më herët.

Gazi u gjuajt derisa deputeti Pal Lekaj ishte duke folur gjatë seancës. Lekaj ishte deputeti u fundit që kishte për të diskutuar rreth zgjedhjes së presidentit.

Para tij kanë folur deputetë tjerë nga opozita të cilët kanë akuzuar rëndë Thaçin

Opozita dhe sigurimi po qëndrojnë në sallë

Të vetmit që po qëndrojnë në sallën plenare të Kuvendit të Kosovës janë shumica e deputetëve e opozitës.

Aty janë Albin Kurti, Fisnik Ismaili, Ismail Kurteshi dhe Aida Dërguti dhe Rexhep Selimi.

Në seancë janë edhe një numër i madh i sigurimit. Ndërkohë, një person nga sigurimi po diskuton me opozitën.

Zhbogar dhe ambasadorët e huaj presin për vazhdimin e seancës
Përfaqësuesi special i BE-së në Kosovë, Samuel Zhbogar qetësisht ka dal nga salla e Kuvendit dhe është duke qëndruar në një pjesë të hollit.

Përfaqësuesi special i BE-së në Kosovë, Samuel Zhbogar qetësisht ka dal nga salla e Kuvendit dhe është duke qëndruar në një pjesë të hollit.

Në dhomën ngjitur me kabinën e mysafirëve janë duke qëndruar edhe disa nga ambasadorët e vendeve të huaja në Kosovë, përfshirë edhe ambasadorin amerikanë.

Shtohen forcat e Policisë
Derisa në seancë është hedhur gaz lotsjellës numri I policëve jashtë është rritur.

Forcat speciale kanë rrethuar ndërtesën e Kuvendit ndërsa protestuesit po brohorasin kundër zgjedhjes së presidentit.

Numri i protestuesve nuk është edhe aq i madh.

Në Kuvend ka arritur edhe autoambulanca ndërsa një deputet ka kërkuar ndihmë mjekësore për shkak të gazit lotsjellës.

Gazlotsjelles ne Kuvend

Sërish është hedhur gazlotsjellës në Kuvend dhe është ndërprerë seanca e Kuvendit.
Si pasojë e gazit është lënduar një deputet i Vetëvendosjes.

Kryekuvendari Veseli ka bërë thirrje të lajmërohet emergjenca.

Shtohet sigurimi në seancë

Sigurimi i Kuvendit ka hyrë në dy portat kryesore të sallës së seancave. Ata po qëndrojnë në gjendje gatishmërie për intervenime në rast të nevojës.

Opozita ende nuk ka reaguar me bllokim të seancës, ashtu si e paralajmëruan gjatë paradites së sotme.

Selimi- Thaçit: Të dua për president aq sa të donë familja e Adem Jasharit
Deputeti i VV-së, Rexhep Selimi ka thënë se masa protestuese e kanë thënë fjalën e vet, e këtë duhet ta thonë edhe deputetët që janë votuar nga kjo masë.

Selimi ka thënë se kjo mazhorancë e ka humbur legjitimitetin dhe se qeveria është ilegale.

Ai ka shtuar se Thaçi nuk do të duhej të ishte kandidat për president, duke thënë se nuk është unifikues.

Selimi ka thënë më pas se unë të dua ty për president aq sa të donë familja e Adem Jasharit.

Limaj: Nga sot parlamenti do të jetë përgjegjës për thellimin e krizës
Lideri i Nismës për Kosovës, Fatmir Limaj ka thënë se në rrethana normale po të ishte vendi sot do të ishte një seancë normale.

“Sot jemi në një situatë jonormale, në një situatë të vështirë, në një situatë krize të thellë politike. Shkaktari i të gjitha krizave që i kemi parë në parlament ka qenë qeveria. Parlamenti sot e ka një zgjidhje a do ta zgjidh krizën apo do ta thellojë krizën”, ka thënë Limaj.

Limaj ka shtuar se parlamenti sot mundet ta qojë vendin në zgjedhje.

Daut Haradinaj-LDK-së: Kush ja u la mbi dhe Ibrahim Rugovën. Qu Agim Çeku fol!
Deputeti i AAK-së, Daut Haradianj duke iu kundërpërgjigjur Melihate Tërmkollit i ka thënë se kush e la Ibrahim Rugovën pa e futur në dhe.

“Qu Agim Çeku fol, çka ke thënë”, ka thënë Daut Haradinaj.

Haradinaj ka goditur edhe Hashim Thaçin e Isa Mustafën. “Ju deputetë të Dukagjinit dilni thonë se ku është kufini, mos t’ju vjen marre”, ka thënë Haradinaj.

Ai ka thënë se nuk është marrë me e votu Hashim Thaçin president.

“Kurrë nuk do të jetë Hashim Thaçi president i unitetit. Ky president do të jetë i këtij koalicioni”, ka thënë ai.

Haradinaj ka kërkuar që të tregojnë se ku u vra babi i presidentit, Ibrahim Rugova, Uka.

Haradinaj: Thaçi do të mbetet president i këtij koalicioni, por jo i popullit

Deputeti i AAK-së, Daut Haradinaj ka replikuar ndaj deklaratës së Melihate Tërmkollit.

Haradinaj i është drejtuar me fjalët: “Faleminderit shumë Melihate më vjen mirë për qëndrimin tënd”

Ai ka shtuar se nuk ka asgjë kundër Thaçit, por ai nuk është president i unitetit.

“Zgjedhne por do të ballafaqoheni sërish me popullin”, ka thënë Haradinaj.

Melihate Termkolli opozitës: Mshelne gojën, sdu me ja ni zanin

Deputetja e Lidhjes Demokratike të Kosovës, Melihate Tërmkolli ka deklaruar se sot kjo parti është me shtetin dhe jo me kaosin, e as me ata që thonë se nuk e duam Amerikën.

“As nuk pranoni shtetin, as nuk pranoni simbolet, as asgjë. Sot duhet të vendosim a duam me Amerikën apo me Rusinë, jo është turpi që ju thoni, ne jemi me shtetin dhe nuk jemi me kaosin”, ka thënë ajo.

Deputetja e LDK-së, Melihate Termkolli ka folur në seancën e Kuvendit dhe ka reaguar rëndë ndaj opozitës.

Ndërsa kur opozita ndërhynte ne fjalët e saj ai iu drejtua me fjalët “Mshelne gojën, s’du me ja ni zanin”.

Ajo mori shumë duartrokitje nga pushteti

Zafir Berisha: Thaçi po dëshiron të fillojë luftë të re

Zafir Berisha, i cili ka folur në emër të Nismës ka akuzuar rëndë ish-shefin e tij Hashim Thaçi për siç tha ai krim dhe korrupsion.

Derisa Berisha doli në foltore që të flas në emër të partisë së tij, nga jashtë dëgjoheshin brohoritjet e protestuesve kundër Thaçit. Zafir Berisha i tha Thaçit se po dëshiron të fillojë luftë të re.

Berisha ia ka përkujtuar Thaçit shokët e tij të luftës dhe fëmijët e dëshmorëve.

​Kadaj-Bujupi: Hashim tërhiqu, populli nuk të do

Shefja e Grupit Parlamentar të AAK-së, Donika-Kadaj Bujupi iu drejtua kryeministrit Isa Mustafa, duke e pyetur se në kohën e Rrahman Morinës a ka pas kaq shumë policë, ndërsa zëvendëskryeministrit Hashim Thaçi iu drejtua me “A po ju vjen marre”.

Kadaj-Bujupi theksoi se të gjitha dokumentacionet tregojnë se Kosova i ka falë tokë Malit të Zi.

Ajo po ashtu tha se me prezencën e Listës Serbe në Kuvend po shihet se Thaçi sërish ka bërë kompromis me ta.

Kadaj-Bujupi, iu tha deputetëve se mos të bëjnë diçka për të cilën do të pendohen.

“Njeriu që po pretendon të bëhet president na quajti njerëz me bisht”, tha Kadaj-Bujupi.

Ymeri në Kuvend: Thaçi president me bekimin e Vuçiqit, por kurrë president i Kosovës

Lideri i Vetëvendosjes, Visar Ymeri në emër të Grupit Parlamentar të kësaj lëvizje ka folur para deputetëve në sallën e Kuvendit.

Ymeri përshëndeti protestuesit që po protestojnë sipas tij kundër kësaj qeverie, zaptuesve të shtetit që sot po dëshirojnë ta zaptojnë majën e saj presidencën.

Ai shtoi se e mori fjalën në emër të grupit Prlamentar pasi që Glauk Konjufca ndodhet në burg që nga 16 shkurti.

Ymeri më pas foli për nënshkrimin e marrëveshjeve në Bruksel për çfarë edhe opozita ka bllokuar në vazhdimësi punën e Kuvendit.

“Thaçi e nisi “Zajednicën” e Mustafa e kururzoi atë. Thaçi e nisi dhe e përfundoi Demarkacionin me Malin e Zi”, ka thënë Ymeri.

Ymeri ka shtuar se Hashim Thaçi nuk mund të zgjidhet president i Kosovës pa ia dhënë bekimin Aleksandër Vuçiq.

Raporti i Komisionit: Thaçi dhe Rama i plotësojnë kushtet për t’u zgjedhur President

Pas pauzës 15 minutash, ka rinisur seanca e Kuvendit për zgjedhjen e presidentit të vendit.
Komisionit për Verifikimin e Mandateve ka dhënë raportimin e verifikimit për dy kandidatët e nominuar për President, Hashim Thaçin dhe Rafet Ramën.

Pas shqyrtimit të dokumentacionit, ky komision ka verifikuar se Thaçi dhe Rama i plotësojnë kushtet me dispozitat e Kushtetutës së Kosovës për tu zgjedhur President i Kosovës.

Rifillon seanca

Ka rifilluar seanca për zgjedhjen e presidentit, pas 15 minutash pauzë që kryeparlamentari Kadri Veseli kërkoi këtë pauzë t’i dhënë kohë Komisionit për Verifikimin e Mandateve për dy kandidatët për President.

Formohet Komisioni Votues

Në seancën e Kuvendit të Kosovës për zgjedhjen e të parit të vendit pasi u dhanë arsyetimet për dy kandidatët , Hashim Thaçin e Rafet Ramën, u zgjodh edhe Komisioni Votues.

15 minuta pauzë, verifikojnë mandatet e kandidatëve për President

Kryetari i Kuvendit, Kadri Veseli, ka dhënë 15 minuta pauzë për t’i dhënë kohë Komisionit për Verifikimin e Mandateve për dy kandidatët për President.
Veseli ka thënë se posi të paraqitet raporti i Komisionit do të nisë votimi për President.

Musliu prezanton kandidatin për president Rafet Ramën
Deputetja Ganimet Musliu ka prezantuar kandidatin e dytë për president, Rafet Ramën, i cili sipas saj është një kandidat i denjët dhe është dëshmuar në periudha të ndryshme për vendin

Grabovci nominon Thaçin për president të Kosovës

Shefi i Grupit Parlamentar të PDK-së Adem Grabovci duke bërë kandidimin e Hashim Thaçit për president të Kosovës tha se sot është një ditë e shënuar për Kosovën.

Ai duke përmendur nenin 86 të Kushtetutës dhe të gjitha procedurat e kërkuara ka nominuar Thaçin për president të Kosovës.

Grabovci bëri thirrje të gjithë deputetëve që të japin votën e tyre.

Fillon seanca

Ka filluar seanca e Kuvendit. Kryekuvendari Kadri Veseli ka konfirmuar se në Kuvend janë të pranishëm 104 deputet.

Deputetët e LDK-së arrijnë në sallë

Tashmë në sallën e Kuvendit kanë filluar të hyjën edhe deputetët e LDK-së.

Sadri Ferati, Besa Gaxherri, Bardhyl Metaj, Teuta Rugova, Nuredin Ibishi, Ali Sadriu, Teuta Sahatqija, etj kanë hyrë në sallë ku pritet që të votohet për presidentin e Kosovës.

Deri më tani zyrtarisht katër deputetë të LDK-së kanë konfirmuar se nuk do të marrin pjesë në seancë, ndërsa ende nuk ka ardhur Armend Zemaj, Alma Lama, etj.

***

Në seancën ku pritet të zgjidhet president lideri i PDK-së, Hashim Thaçi, në bazë të marrëveshjes së koalicionit me LDK-në, do të jenë prezentë edhe deputetët opozitarë, të cilët kanë thënë se do ta bllokojnë seancën.

Disa prej tyre tanimë kanë hyrë në seancë.

Protesta zhvendoset te sheshi “Adem Jashari”

Protestuesit që deri më tani janë duke protestuar në sheshin “Skënderbeu” tashmë janë zhvendosur në anën tjetër, në sheshin “Adem Jashari” ku është edhe hyrja tjetër e Kuvendit të Kosovës.

Një aktivist I këtyre partive ka ftuar protestuesit që të shkojnë te ajo pjesë afër ndërtesës së komunës së Prishtinës për të kundërshtuar zgjedhjen e Hashim Thacit president.

Tashmë në sallën e Kuvendit ku së shpejti pritet të fillojë seanca për zgjedhjen e presidentit, kanë arritur edhe deputetet, ambasadorët dhe përfaqësuesit e BE-së.

Në sallë tashmë ndodhen ambasadori i Amerikës, Greg Delawie, përfaqësuesi i BE-së, Samuel Zhogar, ambasadori i Francës dhe ai i Turqisë.

Deputet e grupit Parlamentar të PDK-së, tanimë kanë hyrë në sallën plenare të Kuvendit të Kosovës, ku do të mbahet seanca për zgjedhjen e presidentit.

Deputeti i Vetëvendosjes, Ismajl Kurteshi dhe Ilir Deda janë të parët nga opozita që ka hyrë në sallën. Janë edhe disa deputet të LDK-së, partive minoritare dhe ministra që kanë arritur në sallë. Ndërkohë, ende nuk kanë arritur deputetët e listës serbe

Arrin ambasadori i Norvegjisë në Kuvend

Ambasadori i Norvegjisë, Jan Braathu ka qenë ambasadori i parë që ka hyrë në sallën e Kuvendit të Kosovës.

Braathu tashmë ka kaluar sistemin e sigurisë dhe është nisur për në sallën e Kuvendit ku pritet të zgjedhet president, Hashim Thaçi.

Ka mbetuar edhe pak minuta që nga fillimi i protestës së opozitës para Qeverisë së Kosovës. Ndërkohë, në shesh janë qindra protestues.

Ka mbutuar edhe pak minuta që nga fillimi i protestës së opozitës para Qeverisë së Kosovës. Ndërkohë, në shesh janë qindra protestues.

Policë nga gjithë rajonet e Kosovës tanimë janë në Prishtinë, ku numri më i madh i tyre ka rrethuar Qeverinë dhe Kuvendin e Kosovës.

Ndërkohë, simpatizantë të opozitës nga disa komuna janë nisur drejt Prishtinës për në protestën e orës 10:00, siç kanë thënë ata kundër marrëveshjeve të dëmshme, kundër qeverisjes antikushtetuese dhe kundër zgjedhjes se Thaçit president.

Policia i ka vendosur mjetet e blinduara përballë protestuesve për të qenë në gjendje gatishmërie në rast të eskalimit të situatës.

Forca të shumta të policisë “blindojnë” Kuvendin
Dita e sotme pritet të jetë më e “nxehta” sa i përket zhvillimeve politike që do të ndodhin.

Tashmë kanë mbetur edhe pak orë deri tek nisja e protestës së opozitës, dhe tri orë deri tek zgjedhja e presidentit të ri të Kosovës.

Momentalisht shihen vetëm një numër i madh i njësisë speciale te policisë se Kosovës brenda rrethojave tëkuvendit, kurse numri i protestuesve është shume i vogël të cilët do te protestojnë sot për te pamundësuar zgjedhjen e Hashim Thaçit president.

A do të jetë Thaçi presidenti i parë që zgjedhet nën tymin e lotsjellësit?

Me një protestë të paralajmëruar për orën 10:00, opozita sot do të mundohet që ta parandalojë, siç thonë liderët e saj, kontrabandimit e kryetarit të PDK-së, Hashim Thaçit president.

Marrë parasysh se deputetët opozitarë kanë të drejtën e pjesëmarrjes në këtë seancë, Thaçi mund të jetë president i parë në botë që zgjedhet nën tymin e gazit lotsjellës.

Kryesia e Kuvendit ditë më parë paralajmëroi seancën e jashtëzakonshme për zgjedhjen e presidentit sot në ora 11:00, në ndërkohë që një presion i madh kundër kësaj seancë është duke u përgatitur nga tabori opozitar, me aktivitete kundërshtuese brenda Kuvendit dhe protesta jashtë Kuvendit.

Mbrëmë u pa një numër i shtuar që iu bashkuan opozitës, ndërkohë që Hashim Thaçi, pretendenti për president, bëri thirrje që simpatizantët e tij, në rast zgjedhjeje president, të rrinë dhe të festojnë nëpër shtëpitë e tyre për të evituar dhunën në rrugë.

Thaçi, problemin nuk e ka vetëm me opozitën. Ai nuk i ka të sigurtë edhe votat e deputetëve të partisë me të cilën ka koalicion, LDK-së , si dhe Listës Serbe, e cila po ashtu është e përfshirë në këtë koalicion.

Megjithatë, Thaçi vazhdimisht ka thënë se marrëveshja e koalicionit do të zbatohet dhe ai do të bëhet president i Kosovës në mënyrë transparente dhe në bazë të afateve kushtetuese.

Ministri i Finacave , Avdullah Hoti, flet nga Londra për zgjedhjen e presidentit. Ja çka tha

Ministri i Financave, Avdullah Hoti, tha per Lajmet Qendrore te Televizionit Rrokum, permes linjes direkte telefonike nga Londra, se Kosova ka nji agjende te pasun me Banken Europiane per Zhvillim, BERZH.
Ministri Hoti tha se gjindet ne Londer, ne Samitin e rregullt te vendeve anetare te BERZH, ku bashke me te merr pjese edhe Kryeministri Isa Mustafa, sepse takimi zhvillohet ne nivel te Kryministrave.

Ne pyetjen cfare perfitimesh ka Kosova nga takimi i sotem ne Londer, ne konferencen e BERZH, dhe a asht bisedu konkretisht per projekte me Kosoven, Ministri Hoti tha se jane disa projekte te nenshkrume ma heret si, linja hekurudhore prej Maqedonie qe kalon neper Kosove dhe lidhet me Serbi, ne vlere prej 32 milion euro; mandej marreveshja per rruge regjionale ne vlere 29 milion euro, etj.

Ne pyetjen e moderatores Nikolla, se ne takimin e Kryeministrit Mustafa me zyrtarin e nalte te Departamentit te Shtetit Hoyt Yee, a asht bisedu per zgjedhjen e Presidentit, zoti Hoti tha se ne takim asht ritheksue mbeshtetja e plote e Departamentit per institucionet dhe asht garantue perkrahja, tue evitue pergjigjen konkrete. E ne pyetjen se a ka me u zgjedhe presidenti sa te kthehen nga Londra, Ministri Hoti tha se mbrenda afatit ligjor do te zgjidhet edhe kjo çashtje.

Tensione në prag të zgjedhjes së presidentit

Në Kosovë, parlamenti pritet të mblidhet të premten për të zgjedhur presidentin e ri mes tensionesh të larta politike

Parlamenti i Kosovës pritet të mblidhet të premten për të zgjedhur presidentin e ri, me gjithë kundërshtimin e partive opozitare, të cilat që nga e marta janë vendosur në sheshin përballë qeverisë dhe parlamentit për të kundërshtuar këtë zgjedhje për dhe të kërkuar rrëzimin e qeverisë.

Opozita ka bërë thirrje për protestë në kohën kur pritet të mbahet seanca, ndërsa degë të Partisë Demokratike kanë paralajmëruar kremtimin e zgjedhjes së presidentit, duke shtuar kësisoj edhe shqetësimet për zhvillimet e së premtes.

Kryetari i Aleancës për Ardhmërinë e Kosovës, Ramush Haradinaj, tha se nuk ka asnjë arsye për shqetësim nga protestat e opozitës.

Posti i presidentit i takon Partisë Demokratike të Kosovës, sipas marrëveshjes për bashkëqeverisje me Lidhjen Demokratike të Kosovës. Kandidatë për president janë kryetari i Partisë Demokratike të Kosovës, Hashim Thaçi, dhe Rafet Rama, po ashtu nga kjo parti.

Zgjedhja e presidentit sipas kushtetutës kërkon të paktën dy kandidatë dhe për të mund të konkurrojë çdo qytetar i Kosovës i moshës mbi 35 vjeç dhe që siguron nënshkrimet e 30 deputetëve. Një deputet mund të nënshkruaje vetëm për një kandidat. Kushtetuta parasheh tri mundësi votimi të njëpasnjëshme. Në dy të parat fituesit i duhen 80 vota përkatësisht dy të tretat e votave të 120 deputetëve. Në raundin e tretë ai mund të zgjidhet me shumicën e thjeshtë, përkatësisht me 61 vota.

Përveç partive opozitare edhe disa deputetë të partive në pushtet e kundërshtojnë kandidaturën e zotit Thaçi për president dhe kanë paralajmëruar bojkotimin e seancës për të pamundësuar kuorumin e kërkuar për zgjedhjen e presidentit.

Lidhja Demokratike e Kosovës, nëpërmjet një komunikate, tha të enjten se pret që të gjithë deputetët e kësaj partie të veprojnë në përputhje me marrëveshjen politike të përkrahur nga strukturat e LDK-së, në mënyrë që t’i shërbejnë siç thuhet, funksionalizmit të plotë të institucioneve të Kosovës.

Zgjedhja e presidentit të ri që sipas Kushtetutës duhet të ndodhë deri më 7 mars, përkon me krizën më të thellë politike që ka përjetuar Kosova që nga shpallja e pavarësisë së saj. Opozita u hodh në protesta në parlament dhe jashtë tij për të kundërshtuar marrëveshjet e arritura para një gjysmë viti për krijimin e asociacionit të komunave me shumicë serbe dhe shënimin e kufirit me Malin e Zi.

Por, krahas këtyre dy çështjeve, partitë opozitare akuzojnë partitë në pushtet edhe për gjendjen e rëndë ekonomike në vend, korrupsionin dhe dështimet në politikën e jashtme.

Qeveria kërkon nga opozita që shqetësimet e saj të debatohen në institucione, ndërsa akuzon atë për përpjekje të marrjes së pushtetit me dhunë.

Protesta e paralajmëruar nga tre partitë opozitare për datën 27 shkurt, do të mbahet nesër me fillim prej orës 10:00.

Opozita edhe një herë u ka bërë thirrje qytetarëve që nesër, nga orët e para të ditës, të mblidhen në kryeqendër të Prishtinës për të kundërshtuar zgjedhjen e Hashim Thaçit president dhe për të kërkuar zgjedhje të parakohshme. Në një konferencë për media liderët e opozitës ftuan të gjithë qytetarët e Kosovës për një protestë paqësore.

Kryetari i Lëvizjes Vetëvendosje, Visar Ymeri me insistim kërkoi që të ketë zgjedhje të parakohshme, pasi sipas tij, Kuvendi nuk ka legjitimitet për të marrë vendime.

Ymeri: Insistojmë në zgjedhje të reja

“Nesër bëhen 6 muaj që kur është shkruar marrëveshja e demarkacionit dhe personi që e ka nënshkruar këtë dhe i ka falur tokën e Kosovës Malit të Zi, nesër pretendon të bëhet president. Po ashtu nesër bëhen gjashtë muaj kur është nënshkruar marrëveshja e themelimit të ‘Zajednices’ dhe ai person është duke shpresuar të bëhet president. Ne jemi kundër kësaj dhe insistojmë që Qeveria të ketë zgjedhje të lira. Ky Kuvend dhe kjo Qeveri nuk kanë legjitimitet për të marrë çfarëdolloj vendimi”, tha ai.

Ai ftoi qytetarët që t’i bashkohen protestës së nesërme, siç tha ai, për të ngritur zërin kundër kësaj Qeverie dhe zgjedhjes së Thaçit president.

Ndërsa, kreu i NISMË-s për Kosovën, Fatmir Limaj tha se janë shumë të vendosur në qëndrimet e tyre për të kundërshtuar Qeverinë.

Limaj: Ftoj të gjithë qytetarët për të kundërshtuar këtë regjim

“Ju ftoj gjithë qytetarët e Republikës që nesër të jenë në shesh për të kundërshtuar këtë regjim dhe këto regjime testojnë dhe provojnë popullin sa është i qëndrueshëm dhe ne duhet të dëshmojmë, si kemi dëshmuar qe gjashtë muaj. Po aq sa ata janë të vendosur për të mos i lëshuar karriget e tyre me gjithë të këqijat aq jemi të vendosur edhe ne” tha ai.

Sipas tij, zgjidhja e vetme për të dalë nga kriza janë zgjedhjet e parakohshme, dhe çdo gjë tjetër është thellim i krizës.

Për kryetarin e Aleancës për Ardhmërinë e Kosovës (AAK), Ramush Haradinaj ato që u përfolën në opinion se nesër mund të ketë dhunë dhe festime, nuk qëndrojnë.

Haradinaj: Nesër ora 10 fillon protesta

“Nesër në ora 10 fillon protesta e opozitës, pa marr parasysh çka thonë pushtetarët. Ata kanë paralajmëruar konflikte fizike, është rrenë... rreziqe kush e di fare... kanë paralajmëruar që është festë dhe që është rrenë, dhe e kanë qëllimin që të pengojnë qytetarët të dalin në shesh. Dhe ne themi që i vetmi kuorum legjitim që ka Kosova tani është qytetari dhe populli. Dhe ata janë të vetëdijshëm që nëse vijnë nesër shumë qytetarë atëherë ne jemi kuorumi legjitim”, tha ai.

Opozita e bashkuar, po ashtu, tha se nesër i ftojnë të gjithë qytetarët të protestojnë edhe për gjendjen e rëndë ekonomike dhe mosrespektimin e rendit dhe ligjit.

Ata deklaruan që protesta do të jetë paqësore dhe se janë të v endosur për të kundërshtuar seancën e nesërme ku pritet të zgjidhet presidenti i vendit.

​Ymeri: Njeriu që para 6 muajve nënshkroi “Zajednicën”, synon presidencën
Në konferencën e thirrur për mediat nga tri partitë opozitare, është bërë thirrje edhe njëherë për pjesëmarrje masive në protestën e nesërme në kundërshtim të zgjedhjes së kryetarit të PDK-së, Hashim Thaçi president.

Visar Ymeri i Vetëvendosjes tha se qytetarët duhet të marrin pjesë në këtë protestë, siç tha ai, për të parandaluar kapjen e shtetit.

Ymeri tha se nesër bëhen gjashtë muaj që nga nënshkrimi i marrëveshjes për Zajednicën dhe marrëveshja është nënshkruar pikërisht nga njeriut që pretendon të zgjedhet president.

Ambasadori britanik Ruairí O'Connell: Unë nuk mund ta ndali kandidaturën e Hashim Thaçit për President të Kosovës

Në komunikimin me miqtë në Facebook, Ambasadori britanik është pyetur edhe rreth kandidaturës së Thaçit për President. Pyetjes direkte se “Gjykata Speciale është krijuar për Thaçin dhe pse ai lejohet të kandidoj për President” diplomati britanik ka thënë se ai nuk pyetet se kush është kandidati për President. Ja çfarë thotë Ambasadori britanik.

Ruairí O'Connell Pse lejoni? Cili mendoni qe është roli im? A mendoni qe njerëzit me pyesin mua kush do te jete kandidat për president? Kosova është e pavarur. Deputetet tuaj janë përgjegjës për zgjedhjen e presidentit, nëse nuk pajtoheni me vendimet qe ata marrin, dhe jo vetëm për presidentin, mos votoni per ta.

Ligjvënësi amerikan Eliot Engel, thirrje politikanëve në Kosovë të heqin dorë nga dhuna

Një ditë përpara seancës në parlament për zgjedhjen e presidentit të ri, ligjvënësi amerikan Eliot Engel i bën thirrje politikanëve në Kosovë të heqin dorë nga dhuna. Përdorimi i dhunës e bën më të vështirë për Shtetet e Bashkuara që ta mbështesin shtetin e ri për t’u anëtarësuar në institucionet më të rëndësishme ndërkombëtare. Në një intervistë me shefin e shërbimit tonë Arben Xhixho, zoti Engel tha se ai nuk mban anë në argumentet mes palëve dhe u bëri thirrje udhëheqësve të Kosovës të kuptojnë se asnjë individ i veçantë nuk është më i rëndësishëm se vendi. Ligjvënësi nga Nju Jorku prej kohe është një ndër mbështetësit më të fortë të Kosovës në Kongresin amerikan. 

Zëri i Amerikës: Kosova po kalon sot një krizë që filloi para gjashtë muajsh dhe që askush nuk e di si do të përfundojë. Sa i shqetësuar jeni ju nga situata në Kosovë?

Eliot Engel: Jam i shqetësuar, dhe ja përse. Le t’i hedhim një sy historisë së fundit, në Ballkan ose në Kosovë: Gjërat filluan të ndryshojnë më 1999 kur NATO-ja ndërhyri për t’i dhënë fund luftës. Qysh atëherë, Kosova po ndërton demokracinë dhe shumë nga mbështetësit e saj në Uashington, si unë, argumentojnë se ajo duhet të jetë në Bashkimin Evropian, një ditë edhe në NATO. Unë besoja dhe ende besoj tek këto. Megjithatë është bërë shumë e vështirë të argumentosh, ose të bindësh të tjerët se Kosova duhet të jetë pjesë e këtyre dy institucioneve, kur ata shohin tensionin politik që ekziston atje. Nuk më shqetësojnë çështjet për të cilat debatohet, pasi njerëzit mund të mbajnë qëndrime të ndryshme, mund të jenë dakord ose jo me marrëveshjet me Serbinë, ose me kufirin me Malin e Zi, por në demokraci këto mos-pajtime trajtohen në mënyrë demokratike, pra jo me rrugën e dhunës. Dhe dhuna që kam parë në Kosovë, në parlament me gaz lotsjellës, djegia e makinave dhe e zyrave, nuk është e mirë për Kosovën. Kur njerëz si unë mbrojmë Kosovën, duke thënë se ajo është një demokraci dhe duhet ta mbështesim, ka të tjerë që mendohen dhe thonë: por dhuna nuk tregon se ai vend është demokraci. Prandaj dhe jam i shqetësuar. 

Zëri i Amerikës: Para disa ditësh, ju bëtë thirrje përmes një artikulli, për ta mbajtur Kosovën në rrugën e demokracisë. A po rrëshqet prapa Kosova?   

Eliot Engel: Shpresoj që jo. Por kjo varet nga banorët e Kosovës dhe nga politikanët e zgjedhur prej tyre. Ditët, javët dhe muajt e ardhshëm do të jenë shumë të rëndësishëm. Unë nuk mbaj ndonjë anë në mosmarrëveshjet politike. Në artikull përmenda rastin e zgjedhjeve të kontenstuara të vitit 2000 në Shtetet e Bashkuara, kur George W. Bush, u zgjodh president, ndërkohë që shumë prej nesh, duke më përfshirë mua, mendonim se në fakt kishte fituar Al Gori. Ne mbetëm të zhgënjyer nga vendimi i Gjykatës së Lartë, që me rezultatin e ndarë në linja partiake 5 me 4 ia dha presidencën George Bushit. Ne nuk ishim të kënaqur me këtë vendim. Por ne nuk filluam dhunën, nuk dogjëm ndërtesa dhe nuk dolëm për të bërë dhunë nëpër rrugë. Ne e lamë demokracinë të triumfonte. Pikërisht këtë dua të shoh unë në Kosovë. Udhëheqësit e Kosovës duhet të ulen dhe ta kuptojnë se asnjë individ i veçantë nuk është më i rëndësishëm se vendi. 

Zëri i Amerikës: Ju jeni mbështetës i Kosovës prej një kohe tepër të gjatë, duke lobuar për të, siç e përmenët më lart. Por, çfarë ndikimi kanë tek përpjekjet tuaja lobuese  zhvillimet e fundit në Kosovë?

Eliot Engel: Nuk ndikon tek përpjekjet e mia lobuese, pasi unë e dua Kosovën dhe popullin e saj dhe unë përherë do ta mbështes Kosovën. Por kur unë përpiqem të argumentoj në favor të Kosovës tek  Bashkimi Evropian për shembull, që procesi të vazhdojë dhe që të merren masa që, nëse Serbia bëhet vend anëtar, ajo të mos jetë në gjendje të bllokojë anëtarësimin e Kosovës, kjo bëhet e vështirë, pasi zyrtarët në BE, kur shohin dhunën në Kosovë, shtrojnë pyetjen, a është ky vend vërtet demokratik? A është ky një vend që ne vërtet duam ta pranojmë në radhët tona? Pra, dhuna t’i heq argumentet në favor të saj, se në Kosovë është duke u ndërtuar një demokraci e re, në një vend të ri. Përsëri e theksoj se nuk mbaj qëndrim për çështjet që po debatohen, ato janë çështje politike legjitime, me të cilat njerëzit mund të mos jenë dakord, problemi është tek taktikat që po përdoren, kjo më shqetëson. Dhuna nuk është zgjidhja në një demokraci. Kjo e dëmton Kosovën. Udhëheqësit e Kosovës duhet të ulen në mënyrë paqësore dhe demokratike e të përpiqen t’i zgjidhin mosmarrëveshjet që dhuna të mos përsëritet më.

Zëri i Amerikës:  Kritikët në Kosovë thonë se pas dy marrëveshjeve, sidomos pas asaj për krijimin e asociacionit të komunave serbe, Serbia fitoi, sepse u hapën negociatat. Po vetë Kosova a fitoi ndonjë gjë? 

Eliot Engel: Këto janë çështje legjitime, që kërkojnë përgjigje legjitime, por nuk mund të përdoret dhuna për të fituar argumentin. Prandaj e them që unë nuk mbaj qëndrim për çështjet e kontestueshme, por mbaj qëndrim për mënyrën se si njerëzit po e shprehin kundërshtimin e tyre. Çështja duhet parë më gjerë: a do të pranohet Kosova në OKB? A do të hyjë Kosova në gjirin e komunitetit të vendeve dhe të njihet nga të gjitha ato? Pati një tërheqje, kur Kosova nuk arriti të anëtarësohet në UNESCO për vetëm pak vota. Para dy-tri vitesh Kosova u përpoq të anëtarësohet në Bankën Evropian për Rindërtim dhe Zhvillim dhe ne ishim në gjendje të ndikonim tek vende të ndryshme, duke siguruar votat e duhura që Kosova të pranohej dhe ky ishte një hap i madh përpara.  

Zëri i Amerikës: Le të ndalemi tek roli i Shteteve të Bashkuara. Opozita në Kosovë është izoluar nga Shtetet e Bashkuara dhe vende të tjera perëndimore. A mendoni se kjo është një strategji e mirë?  A mos duhet angazhuar ajo në bisedime? 

Eliot Engel: Po, duhet angazhuar në bisedime, por ata duhet të ndalin taktikën e dhunës. Arësyeja që nuk po bisedohet me ta është se dhuna nuk mund të shpërblehet. Ata kanë ngritur çështje serioze dhe legjitime, por mënyra se si po veprojnë, mendoj se e minon oreksin për pranimin e Kosovës në organizatat shumëkombëshe.

Zëri i Amerikës: Prova e vërtetë do të jetë nesër, kur parlamenti të përpiqet të zgjedhë presidentin e ri. Cili është mesazhi juaj për popullin e Kosovës një ditë përpara seancës.

Eliot Engel: Mesazhi im do të ishte ky: shpresoj që ky votim të bëhet me drejtësi; shpresoj që cilido që e humbet votën nuk do ta kotestojë atë përmes dhunës. Shpresoj që procesi të funksionojë. Shikoni: Kosova ka një kushtetutë, ka një Deklaratë të Pavarësisë, që unë e kam edhe në mur. Ajo duhet të sillet si vend demokratik. Nëse atje ka dhunë, atëherë për të gjitha palët do të jetë keq, siç thotë edhe shprehja që ne kemi në anglisht: A plague on both your houses (mortaja në shtëpinë time është edhe në tënden). Pra, të gjithë duhet të jenë përgjegjës, sepse askush nuk do të ndihmojë, nëse populli i Kosovës nuk ndihmon veten. Unë ndihem zemërthyer, sepse unë besoj me gjithë shpirt që Kosova do të jetë një ditë anëtare e Bashkimit Evropian, e NATO-s dhe e Kombeve të Bashkuara. Shtetet e Bashkuara gjithnjë do ta mbështesin Kosovën. Unë gjithnjë do ta mbështes Kosovën. Por puna jonë bëhet më e vështirë nëse njerëzit përdorin dhunë. Kaq mund të them.

VOA: Kosova ndeshet edhe me një sfidë tjetër, atë të qytetarëve të saj që i janë bashkuar grupit ISIS. Kosova ka numrin më të madh të atyre që i janë bashkuar ISIS-it për frymë popullsie mes vendeve evropiane. Pas ndihmës që mori Kosova nga Shtetet e Bashkuara dhe perëndimi për pavarësinë, si shpjegohet ky radikalizëm që bie ndesh me vlerat perëndimore?

Eliot Engel: Është një pyetje e vështirë, që të gjithë ne përpiqemi t’i përgjigjemi. Përse të rinj, që vijnë nga familje të klasës së mesme, nga familje të respektuara, tërhiqen nga një organizatë terroriste si ISIS? Nga një organizatë që vret njerëz të pafajshëm e që kryen akte terori? Nuk dua të barazoj atë që ndodh në Kosovë me ISIS, por përsëri do të theksoja se asnjë kauzë nuk mund të justifikojë aktet e dhunës.  ISIS është një organizatë e rrezikshme. Gjithë bota duhet ta luftojë atë.  Kosova që unë njoh ka shumë njerëz, myslimanë ose jo, që respektojnë besimin e tjetrit, fenë e tjetrit, që janë laikë. Ne duhet të kuptojmë nga tërhiqen ata që radikalizohen. Kosova mund të ketë për frymë numrin më të madh, por ky është një problem me të cilin ndeshet edhe vende të tjera, përse të rinj që janë rritur në një mjedis relativisht të qetë i bashkohen ISIS-it?  Për fat të keq në Kosovë, por edhe në vende të tjera, papunësia është e lartë, të rinjtë e kanë të vështirë të gjejnë punë, kur të rinjtë nuk kanë ç’bëjnë shtohet rreziku të merren me gjera që nuk duhet të merren. Disa bien pre e propagandës. Prandaj ne duam ta ndërtojmë Kosovën. Në se të rinjtë kanë punë dhe në se ju dëgjohet zëri për demokracinë në vendin e tyre, do të pakësoheshin shanset që t’i bashkoheshin organizatave si ISIS, apo të imigronin nga vendi i tyre. Kosova po ndeshet edhe me rrjedhjen e trurit. Të rintë po largohen drejt Evropës dhe vendeve të tjera. Për çdo të larguar, Kosova humbet një njeri të mirë. Këto janë çështje që zyrtarët e zgjedhur duhet t’i diskutojnë me njeri tjetrin për të gjetur zgjidhje e jo të hyjnë në këto situata të tens

Nesër zgjidhet presidenti i Kosovës z.Hashim Thaçi

Policia ushtarake amerikane, në qendrën e trajnimit në Gjermani, po përgatitet t’u ofrojë mbështetje misionin paqeruajtës në Kosovë, thuhet në një njoftim të Ushtrisë së SHBA-ve.

Mediat shkruajnë se bëhet fjalë për batalionin 527 të ushtrisë policore e cila, së shpejti do të vendoset në kampin e ushtrisë amerikane të Bondsteel-it në Kosovë.

Mes tjerash, këto njësi janë të stërvitura për intervenim në rastet e prishjes së qetësisë publike, në objekte në të cilat mund të ketë ndonjë incident, etj.

Organizatat e dala nga lufta e Ushtrisë Çlirimtare të Kosovës nëpërmjet një komunikate për media druan se nesër mund të ketë përplasje qytetare në mes simpatizantëve të opozitës dhe atyre të PDK-së.

OVL e UÇK-së këtë fakt e bazon në atë se për nesër janë ftuar dy manifestime, njëri manifestim proteste dhe tjetri manifestim për festë, në të njëjtën kohë dhe të njëjtin vend.

“Druajmë nga një përplasje qytetare e cila do të ishte e dëmshme për popullin”, thuhet në komunikatën e UÇK-së.

Prandaj, Organizata e Veteranëve të Luftës së UÇK-së, fton dy taborët politike, që të jenë maksimalisht të kujdesshëm me qëllim që të evitohet çdo përplasje e mundshme.

Edhe dega e Partisë Demokratike të Kosovës në Pejë është përgatitur për të festuar nesër në Prishtinë zgjedhjen e Hashim Thaçit president.

Kjo degë ka përgatitur edhe një poster gjigant me autor Berat Thaqin.

Deputeti i Lëvizjes Vetëvendosje (LVV), Albin Kurti, në emisionin “Info - Box”, ka bërë të ditur se protesta e opozitës së bashkuar, për të kundërshtuar zgjedhjen e Thaçit si President i Kosovës, do të fillojë të premten, në ora 10:00.

Sipas tij, pushteti po përpiqet ta kontrabandojë për president të Kosovës, një person që e ka pranuar Demarkacionin dhe Asociacionin e komunave me shumicë serbe.

"Në Kosovë nuk pati seancë të jashtëzakonshme për arsim, shëndetësi, për veri. Pushteti e ka thirr një seancë të jashtëzakonshme për ta bërë President, një njeri që dështoj në krye të Ministrisë së Punëve të Jashtme (MPJ), duke mos e anëtarësuar Kosovën në UNESCO, duke dështuar në procesin e liberalizimit të vizave”, ka theksuar Kurti.

Ai ka thënë se protesta është gjithëpopullore, dhe se sipas tij, kjo protestë e ka tejkaluar opozitën e bashkuar.

Këtu ka njerëz pa parti, duke shtuar se “unë jam këtu në cilësinë e qytetarit të Republikës, që nuk ka atdhe tjetër përveç Kosovës”.

“Ne kemi marrë leje nga Komuna e Prishtinës për tu vendosur tendat në dy sheshet në kryeqytet. Ne lejen e kemi për të qëndruar deri më 8 mars”, ka shtuar Kurti.

Samuel Zbogar së fundmi ka thënë se shtetet anëtare të BE-së, do të mendojnë dy herë para se të miratojnë liberalizimin e vizave për Kosovën.

Por, pyetja shtrohet, se a duhet të përbëjë alarm ky sinjal i BE–së, për politikën e Kosovës? Gjithsesi, vendi po kalon procese të vështira, të cilat fare në fund, në njëfarë mënyre edhe po minojnë rrugëtimin e Kosovës drejt integrimeve evropiane, kurse në rastin konkret mund të ketë pasoja të drejtpërdrejta, sa i përket procesit të liberalizimit të vizave.

Kosova është i vetmi vend i Evropës Juglindore, që mbetet i izoluar në raport me Zonën Shengen, gjë që po sjell jo vetëm pasoja politike dhe ekonomike, por edhe vështirëson përditshmërinë e qytetarëve, të cilët kanë mundësi fare të kufizuar të lëvizjes.

Politologu z.Florent Hajrizi, është i mendimit se deklarata e Zbogarit vjen si rezultat i obstruksioneve institucionale që po ndërmerren nga ana e subjekteve politike opozitare.

Lidhja Demokratike e Kosovës nëpërmjet ka dërguar një komunikatë për media me anë të së cilës shfaq bindjen e vet se deputetët e kësaj partie të premten do të votojnë në bazë të marrëveshjes politike ndërmjet PDK-së dhe LDK-së.

Partia e Isa Mustafës përkrah funksionimin e institucioneve pjesë e së cilës është edhe LDK-ja.

Komunikata e LDK-së:

Lidhja Demokratike e Kosovës, ditët e fundit, ka zhvilluar takime dhe konsulta shteruese me strukturat e LDK-së, ku është diskutuar për zhvillimet politike në Republikën e Kosovës.

Gjatë takimeve të Kryesisë së LDK-së, të Grupit Parlamentar si dhe me kryetarët e degëve të LDK-së, ka dominuar plotësisht qëndrimi dhe ka qenë konkluzion i përbashkët se Lidhja Demokratike e Kosovës duhet të vazhdojë me përkushtim të plotë kontributin e saj shtetndërtues në institucionet e Republikës së Kosovës.

Anëtarët e të gjitha strukturave të LDK-së, kanë kërkuar pa ekuivok nga përfaqësuesit e saj në institucionet qendrore që LDK-ja si parti me traditë të gjatë institucionale dhe me kontribut vendimtar në themelimin dhe ndërtimin e shtetit të Kosovës, t’i përmbahet parimeve të saj, duke përmbushur obligimet politike e kushtetuese të dala nga marrëveshja për krijimin e institucioneve në këtë mandat qeverisës, duke përfshirë zgjedhjen e Presidentit të Kosovës, sipas kësaj marrëveshjeje.

Duke iu referuar gjendjes aktuale në vend, të gjitha strukturat e LDK-së kanë kërkuar që LDK-ja, si gjithnjë, të luaj rol konstruktiv në funksionalizmin e plotë të institucioneve të shtetit dhe krijimin e kushteve për realizimin e prioriteteve dhe objektivave nacionale.

Hashim Thaçi djeg deputetin Rafet Rama, përgatit terrenin për vete

Hashim Thaçi e Rafet Rama, të premten do t`i nënshtrohen votave të Deputetëve të Republikës së Kosovës, si kandidat për postin e Presidentit. Rafet Rama, po konsiderohet si kundër kandidat i Thaçit, vetëm sa për sy e faqe. Ndërkohë, ndonëse me disa deputetë që nuk e duan Thaçin për President, LDK-ja nuk ka caktuar një kandidat të vetin.

Leon Duhanaj nga Fraksion plus vlerëson, se kandidati i dytë nuk është më shumë se sa një figurë e djegur në shërbim të Hashim Thaçit.

“Në këtë rast, dihet qartë se në bazë të marrëveshjes paraprake politike mes PDK-së dhe LDK-së, kandidati i përbashkët është z. Hashim Thaçi. Në këtë kontekst, duhet kuptuar se kandidati i dytë nuk është më shumë se sa një figurë e djegur në shërbim të tij. Prandaj, nuk do të mund të pritej një kandidaturë nga ndonjë kandidat i subjektit në koalicion, në këtë rast nga LDK-ja, sepse një sakrificë të tillë nuk do ta bënte asnjëri”, thotë Leon Duhanaj

Kryetarët e degëve, anëtarët e Kryesisë dhe deputetët e LDK-së kanë kërkuar që LDK-ja, përmes udhëheqjes së Qeverisë dhe deputetëve të saj në Kuvend të vazhdojë përkushtimin maksimal për zhvillim ekonomik, ndërtim të institucioneve demokratike dhe proceset integruese euroatlantike.

Kandidati për president të Kosovës nga radhët e Partisë Demokratike të Kosovës, Rafet Rama, i cili është kundërkandidati i Hashim Thaçit në seancën e nesërme, nuk i frikësohet garës.

Rama i cili është deputet i Kuvendit të Kosovës ka thënë se seanca e paralajmëruar për nesër në ora 11, gjatë të cilës do të zgjedhet presidenti i ri i Kosovës mund të mos jetë e qetë.

“Nuk i frikësohem kandidaturës së Thaçit për president, sepse derisa i kam hyrë garës, nuk kam nevojë të frikësohem. Nuk besoj që seanca e nesërme do të jetë e qetë, mirëpo mbes me shpresën që të jetë e qetë dhe pa tensione”, ka thënë Rama.

Duke folur për qytetarët të cilët do të mblidhen nesër në shesh nga ora 11, disa për të festuar ër presidentin e ri, e disa për të kundërshtuar zgjedhjen e presidentit të ri, Rama ka thënë se edhe jashtë nuk ka nevojë që të ketë tensione apo konflikt mes dy palëve.

“Jashtë në sheshe do të ketë protestues të opozitës dhe qytetarë që do të dalin të përkrahin presidentin e ri të Kosovës, mirëpo nuk e besoj që do të ketë konflikt mes tyre”, ka theksuar Rama.

Lidhja Demokratike e Kosovës, më këtë rast, thekson përkushtimin e saj të plotë për realizimin e synimeve dhe aspiratave t ë qytetarëve për ndërtimin shtetit të Kosovës, në miqësi të përhershme me Shtetet e Bashkuara të Amerikës dhe vendet tjera mike.

Ky vizion nacional, sot, mund të realizohet përmes punës së përbashkët, dialogut institucional dhe në koordinim të plotë me partnerët perëndimorë dhe jo përmes veprimeve anarkiste anti-perëndimore.

Lidhja Demokratike e Kosovës pret që të premten të gjithë deputetët e LDK-së në Kuvendin e Kosovës të veprojnë në përputhje me marrëveshjen politike të përkrahur nga strukturat e LDK-së, në mënyrë që t’i shërbejnë funksionalizmit të plotë të institucioneve të Kosovës.

Kryetari i PDK-së, Hashim Thaçi ka anuluar ardhjen e simpatizantëve të PDK-së në Prishtinë për të festuar zgjedhjen e tij si president i vendit.

Burimet e RTV Dukagjinit kanë rrëfyer se kjo është bërë në mënyrë që të shmangen ballafaqimet me protestuesit e tri partive opozitare.

Por festa do të mbahet në të gjitha komunat e Kosovës.

“Ftoj të gjithë simpatizantët, aktivistët dhe strukturat e PDK-së që të festojnë nëpër komunat e Kosovës pas votimit të Presidentit të Kosovës”, u ka thënë shefi i PDK-së, strukturave të larta të partisë.

Sipas të njëjtit burim, shefi i PDK-së ka kërkuar nga strukturat që ky mesazh të përcillet tek secili simpatizantë, duke kërkuar një festë të madhe dhe të qetë.

Një ditë para votimit në Kuvendin e Kosovës për Presidentin e ri të vendit, Lidhja Demokratike e Kosovës ka bërë me dije se pas konsultimeve me struktura të partisë përfshirë edhe grupin parlamentar do ta votojë Hashim Thaçin President. Por, disa deputetë të LDK’së tashmë janë deklaruar se nuk do ta votojnë Thaçin për President, pavarësisht marrëveshjes LDK-PDK.

Partneri i koalicionit qeverisës, Lidhja Demokratike e Kosovës ende nuk ka arritur t’i bindë të gjithë deputetët e vetë që nesër ta votojnë Hashim Thaçin e PDK’së për President të vendit, pavarësisht se në një njoftim për media të LDK’së thuhet që ky subjekt është dakorduar që t’i përmbahet marrëveshjes.

Kundër Thaçit President, po vazhdojnë të jenë edhe me tutje deputetët, Adem Salihaj, Vjosa Osmani, Arben Gashi, Armend Zemaj.

Një qëndrim kundër Thaçit por jo përfundimtar e kanë dhënë edhe Alma Lama e Doruntinë Maloku.

Po ashtu edhe deputetja Melihate Tërmkolli nuk e ka dhënë ende një mendim përfundimtar se a do ta votojë ose jo Thacin.

Derisa, Fatmir Rexhepi, gjithashtu është njëri nga deputetët e LDK-së që nuk ka votuar Qeverinë e koalicionit PDK-LDK në nëntor të vitit 2014, ndërsa nuk është deklaruar asnjëherë nëse do të votojë Thaçin për president siç e parasheh marrëveshja e koalicionit.

E, partia që aktualisht drejtohet nga Isa Mustafa, LDK gjatë ditës së sotme ka lëshuar një njoftim për media me anë të së cilës shfaq bindjen e vet se deputetët e kësaj partie të premten do të votojnë në bazë të marrëveshjes politike ndërmjet PDK’së dhe LDK’së.

Mirëpo, në këtë njoftim LDK nuk ka treguar askund se a do të jenë edhe deputetët që janë deklaruar kundër Thaçit pjesë e këtij votimi.

“Anëtarët e të gjitha strukturave të LDK-së, kanë kërkuar pa ekuivok nga përfaqësuesit e saj në institucionet qendrore që LDK-ja si parti me traditë të gjatë institucionale dhe me kontribut vendimtar në themelimin dhe ndërtimin e shtetit të Kosovës, t’i përmbahet parimeve të saj, duke përmbushur obligimet politike e kushtetuese të dala nga marrëveshja për krijimin e institucioneve në këtë mandat qeverisës, duke përfshirë zgjedhjen e Presidentit të Kosovës, sipas kësaj marrëveshjeje”.

Duke iu referuar gjendjes aktuale në vend, të gjitha strukturat e LDK-së kanë kërkuar që LDK-ja, si gjithnjë, të luaj rol konstruktiv në funksionalizmin e plotë të institucioneve të shtetit dhe krijimin e kushteve për realizimin e prioriteteve dhe objektivave nacionale.

Lidhja Demokratike e Kosovës në fund të këtij njoftim ka thënë se pret që të premten të gjithë deputetët e LDK-së në Kuvendin e Kosovës të veprojnë në përputhje me marrëveshjen politike të përkrahur nga strukturat e LDK-së, në mënyrë që t’i shërbejnë funksionalizmit të plotë të institucioneve të Kosovës.

Thirrja e seancës, mund të provokojë dhunë

Njohës të çështjeve juridike thonë se kryetari i Kuvendit, Kadri Veseli së bashku më anëtarët e Kryesisë do të jenë përgjegjës në rast të eskalimit të situatës në seancën e së premtes, e cila ka për qëllim zgjedhjen e presidentit.

Ata thonë se caktimi i seancës për të premten për zgjedhjen e presidentit, dhe thirrja e përkrahësve të PDK-së në sheshin ” Zahir Pajaziti” për të festuar zgjedhjen e Hashim Thaçit president, paraqet një rrezik të madh për konfrontim me protestuesit e opozitës.

Nga ana tjetër, Haki Abazit, drejtori i Rockefeller Brothers Fund, thotë për “Bota sot”, se fjalimet e Hashim Thaçit dhe të Kadri Veselit janë thirrje për gjakderdhje.

“Fjalimet e Thaçit dhe te Kadri Veselit janë fjalime që thërrasin dhe paralajmërojnë gjakderdhje. Kërcënimet e tyre dhe demonstrimi i forcës nëpërmjet arrestimeve janë metoda, që i kemi pare në vitet 90-ta, para rënies së murit të Berlinit, gjakderdhja e mundshme është përgjegjësi e plotë e udhëheqësve të institucioneve dhe ministrive përkatëse”, thotë Abazi.

Dega e Vetëvendosjes në Komunën e Skënderajt ka akuzuar Partinë Demokratike të Kosovës se po organizon në mënyrë të detyruar banorët e Skënderajt nisjet me autobusë për të festuar zgjedhjen e Thaçit president.

“Në organizimet e më hershme të aktiviteteve të PDK-së, i gjithë mekanizmi i kontrollit i shërbente pushtetit. Nxënësit liroheshin nga shkolla me urdhër që të i bashkëngjiten aktiviteteve të PDK-së. Autobusët detyroheshin që të ndalonin qarkullimin në mënyrë që të gjithë qytetarët të mbesin në shërbim të partisë. Policët i shpërndanin tregtarët që të mos i kishte aktivitete tjera përveç aktivitetit të partisë. Duke e parë që drenicasit nuk i shërbejnë një qeverie anti-kushtetuese në asnjë mënyre, regjimi ka ndërruar metodat e detyrimit. Autobusëve që zakonisht nuk u lejohej të nxjerrin drenicasit nga Skenderaj, tash janë vënë në shërbim të regjimit. Ky regjim për nesër ka caktuar që nga shumica e fshatrave të Skenderajt të ketë nisje të organizuar. Kjo formë e detyrimit me lista për të festuar kinse, tregon se deri ku mund të shkojë egoja e një njeriu për pushtet, ata të cilët nuk janë nesër në autobusin e partisë, futen në listën e linçimeve dhe shtypjes”, thuhet në komunikatë.

Ndërkaq, sipas Vetëvendosjes, se Thaçi nuk ka respekt për drenicasit tregon fakti se ai ka kandiduar për president deputetin nga partia e tij, Rafet Rama.

“Se sa shumë e çmon edhe e respekton Hashimi Thaçi Drenicën dhe drenicasit, tregon fakti që për ditën në të cilën e sheh veten si president, ka vendosur që për kurban ta këtë një drenicas. Duke i përdhosur dinjitetin, të cilin zor ta këtë kur i shihen 1 (njishat) në ditar Rafet Ramës i cili fatkeqësisht është nga fshati legjendë, Prakazi. Se sa gëzon respekt Hashim Thaçi në Skenderaj, tregon dera e mbyllur për të në kullën e Jasharajve, tregojnë shokët e tij neper burgje, tregojnë grafitet e fundit ku haptazi akuzohet së ka tradhtuar vlerat e luftës”, thuhet tutje.

Sipas Vetëvendosjes, ky regjim i ka shndërruar disa individ në servil ë, duke u dhënë benificione të cilat nuk i meritojnë, dhe që ata servilë të vazhdojnë t’i kenë ato benificione duhet të vrapojnë pas çdo aktiviteti të partisë.

Rast konkret se si partia i ka krijuar këta servilë, sipas Vetëvendosjes, është fryrja e listave të veteranëve, e që veteranët e 2015 janë në gjendje të bëjnë çdo gjë që u kërkohet të tregojnë zellin ndaj partisë.

“Premtimin dhënë me 1998 “DRENICË JEMI ME TY” qytetarët e Kosovës kanë mundësi që ta realizojnë nesër, duke mos lejuar realizmin e planeve të një regjimi shtypës, i cili do të vazhdonte të paktën edhe për 5 vitet e ardhshme që drenicasit t’i bënte të ndjehen fajtor për atë së çka po u ndodhë. Nesër, ora 10:00 sheshi Skënderbeu, mundësia më e mirë për t’i thënë këtij regjimi BOLL MO! Nuk ka individ ma të rëndësishëm se shteti!”, thuhet në fund.

Kryetari i Partisë Demokratike të Kosovës, partisë më të madhe në vend, Hashim Thaçi nesër pritet që të votohet për president të vendit. Opozita ka paralajmëruar protestë për ta penguar zgjedhjen e tij, por në anën tjetër ekziston një organizim i cili po pretendon se në Prishtinë do t'i sjellë mijëra njerëz për ta festuar zgjedhjen e liderit të PDK-së president.

Zgjedhja e Thaçit president duket se ka entuzjasmaur përkrahësit e PDK-së dhe të vet Thaçit, të cilët po përgaditen për të festuar këtë ditë.

Thaçi i cili vjen nga Buroja e Skenderajt, ka pasur një mbështetje të fuqishme nga qytetarët e Skenderajt dhe rajonit të Drenicës në përgjithësi.

E drenicaktët tashmë kanë filluar organizmin për të festuar zgjedhjen e liderit të PDK-së, President të vendit.

Në shumë faqe të rrjeteve social janë shpërndarë njoftime që në mënyrë të organizuar nesër të mblidhen në Prishtinë për ta festuar këtë ditë.

Internimin e madh të qytetarëve në Skenderaj për ta festuar këtë ngjarje e konfirmojë edhe zyrtarë të PDK-së në Skenderaj.

Ndonëse ata thonë se kjo degë nuk ka bërë ndonjë organizim për të festuar zgjedhjen e Thaçit President, pohojnë se ka intersim të madh nga qytetarët për ta festuar këtë ngjarje.

Dega e PDK së ne Skenderaj nuk është organizatore e festimeve me rastin e zgjedhjes së Presidentit te Kosovës, mirëpo elektorati i PDK së ne Skenderaj ka shfaqur interesim te madh për te festuar spontanisht me këtë rast”, ka thënë Hajriz Koci zëdhënës i degës së PDK-së në Skenderaj.

Ai ka thënë se kjo degë mbështet fuqishëm zgjedhjen e Thaçit President, pasi sipas tyre, ai është personalitet i dëshmuar.

“Z. Hashim Thaçi është personaliteti me i dëshmuar dhe me meritor ne proceset e lirisë, Pavarësisë dhe shtetndërtimit të Kosovës, prandaj zgjedhja e tij është me shume se legjitime. Skenderaj gjatë historisë i ka dhënë vendit shume personalitete te shquara. Skenderaj po i jep Kosovës Presidentin e vendit si njeriun me te votuar ne Kosovës. Skenderaj mbështet fuqishëm zgjedhjen e Hashim Thaçit President i Republikës së Kosovës, ka thënë ai.

Organizime të veçantë nuk ka bërë as dega e PDK-së në Drenas, e cila njihet si një tjetër bastion i PDK-së.
Zyrtarë të kësaj partie në këtë komunë kanë thënë se festa për të festuar ka ardhur nga niveli qendror dhe se ata nuk do të organizojnë as transporte ose ndonjë aktivitet, pasi e tëra mbetët në vullnet të qytetarëve, raporton lajmi.

Seanca për zgjedhjen e Presidentit të vendit, do të mbahet të premten nga ora 11:00. Kandidat për këtë post janë Hashim Thaçi e Rafet Rama, të dy nga radhët e PDK-së.

Opozita për ditën e nesërme ka paralajmëruar protestë gjithë popullore e cila do të fillojë në orën 10:00 të ditës së nesërme.Lëvizja vetëvendosje ka bërë publike edhe orarin e autobusëve që do ti sjellin protestuesit në Prishtinë.

Policia e Kosovës i ka bërë të gjitha përgatitjet për ruajtjen e sigurisë publike gjatë ditës së premte kur është thirrur seanca e Kuvendit të Kosovës për zgjedhjen e presidentit të Republikës së Kosovës.

Zëdhënësi i Policisë së Kosovës Daut Hoxha tha se Policia i ka marrë të gjitha masat e nevojshme për ta ruajtur sigurinë e qytetarëve të Kosovës gjatë ditës së nesërme kur pritet të zgjedhet edhe i pari i vendit.

Daut Hoxha: Policia e gatshme ta ruaj sigurinë
“Policia e Kosovë bazuar në detyrat dhe autorizimet e saj ligjore ka bërë përgatitjet e nevojshme për garantimin e sigurisë së përgjithshme si dhe mbajtjen e rendit dhe qetësisë publike qoftë për mbajtjen apo qoftë për zhvillimin e situatës së seancës që do të zhvillohet nesër për zgjedhjen e presidentit të shtetit, gjithashtu dhe për garantimin e sigurisë s përgjithshme gjatë protestës që parashihet të mbahet nesër nga partitë tjera”, tha Hoxha.

Hoxha u shpreh se detyrat dhe përgjegjësitë e Policisë së Kosov ës janë të përcaktuara me Ligjin për Policinë dhe Kushtetutën e vendit, derisa theksoi se Policia e Kosovës çdo herë kur ka raste të tubimeve i bënë planet operacionale të nevojshme për të garantuar sigurinë e përgjithshme dhe për të ndërmarr masat e nevojshme për të garantuar një siguri të përgjithshme në vend.

Ndërsa, i pyetur nëse Policia ka kapacitete të nevojshme ta menaxhojë situatën vet apo do të kërkojë ndihmën e EULEX-it dhe KFOR-it, Hoxha tha se policia ka kapacitete të mjaftueshme për ta menaxhuar situatën, mirëpo shtoi se kjo e fundit ka plane fleksibile për të reaguar në çdo rast.

Daut Hoxha: Jemi të gatshëm të reagojmë konform situatës
“Policia e Kosovës ka kapacitete të mjaftueshme për të menaxhuar me situata të ndryshme që ndodhen në vend dhe natyrisht planet tona janë fleksibile dhe jemi të gatshëm për të vepr uar konform situatës së paraqitur”, tha Hoxha.

Gjatë ditës së premte (nesër) pritet të zhvillohet seanca e jashtëzakonshme e Kuvendit për zgjedhjen e presidentit të Kosovës.

Për ta kundërshtuar një gjë të tillë, aktivistë të partive opozitare kanë paralajmëruar protestë para ndërtesës së Kuvendit si dhe në sheshet e Prishtinës ku edhe janë duke qëndruar protestuesit që nga dita e martë. Nga ana tjetër po në sheshet e Prishtinës edhe simpatizantë të PDK-së kanë paralajmëruar se do të festojnë për zgjedhjen e presidentit të Kosovës.