Kryeministri i Kosovës, Albin Kurti, është takuar me admiralin Stuart B. Munsch – komandant i Komandës së Forcave të Përbashkëta Aleate të NATO-s në Napoli, gjatë Konferencës së Sigurisë në Mynih.
Kurti ka përmendur kontributin e NATO-s në parandalimin e gjenocidit në Kosovë gjatë këtij takimi. Po ashtu, Kurti ka shtuar se NATO është pjesë jetike e sigurisë në Kosovë derisa ka përmendur edhe pjesëmarrjen e Kosovës në manovrën gjigande ushtarake të NATO-s “Defender Europe”
“Nga ndalimi i gjenocidit në ’99 deri tek mbështetja e sigurisë së Kosovës, NATO është një pjesë jetike e së shkuarës, së tashmes dhe së ardhmes sonë. Siç diskutova me Admiralin Munsch, ne jemi gati të kthejmë të mirat. Edhe këtë vit Kosova do të jetë edhe një herë pjesëmarrëse dhe vend pritës i Defender Europe 23.”, ka shkruar ai në Twitter.
Ndryshe, Presidentja e Kosovës, Vjosa Osmani, po ashtu në kuadër të Konferencës në Mynih, është takuar me admiralin Stuart B. Munsch- komandant i Komandës së Forcave të Përbashkëta Aleate të NATO-s në Napoli.
Zyra e Presidencës njofton se Osmani ka shprehur mirënjohje për punën e NATO-së në Kosovë.
Gjithashtu, në takim është “diskutuar për zhvillimet e fundit në fushën e sigurisë, me ç’rast u potencua rëndësia e bashkëpunimit të ngushtë përderisa ballafaqohemi me këto sfida në rajonin tonë dhe përtej”.
