Po vazhdon hallakama me listat e veteranëve, të cilat po publikohen njëra pas tjetrës.
Komisioni qeveritar për verifikim ka pranuar me mijëra ankesa nga personat të cilët pretendojnë të kenë qenë kontribuues në UÇK, por nuk u është dhënë statusi i veteranit.
Parregullsi janë vërejtur sidomos në listën e fundit të Shtabit të Përgjithshëm të UÇK’së. Pjesë e kësaj liste është edhe ish-shefi i Shërbimit të Inteligjencës Shqiptare, Fatos Klosi.
Komisioni nuk ka bërë të ditur se cili ka qenë kontributi i Klosit në UÇK.
Udhëheqësi i Zyrës për Verifikimin e Veteranëve, Faik Fazliu në përgjigjen për Express ka thënë shkurt se është pranuar aplikacioni nga Klosi, i cili i ka plotësuar kushtet dhe është aprovuar nga komisioni, transmeton gazetaexpress.
“Fatos Klosi ka aplikuar për status të veteranit. Me të shqyrtuar aplikacionin, i cili i ka plotësuar kushtet, Klosi është bërë pjesë e listës së veteranëve të UÇK’së”, ka thënë Fazliu.
Në pyetjen se cili ka qenë kontributi i Klosit në UÇK, Fazliu është përgjigjur: “Sigurisht që ka dhënë kontribut, për atë arsye edhe është bërë pjesë e listës së veteranëve”, ka thënë Fazliu, duke mos dashur të shtojë më shumë.
