Më shumë se 1.500 rebelë janë arrestuar pas grushtit të dështuar të tyre ushtarak që vrau të paktën 90 persona dhe plagosi më shumë se 1000 të tjerë.
Mediat ndërkombëtare raportojnë se presidenti turk Rexhep Tajip Erdogan bëri rikthimin e tij triumfues përsëri në Stamboll, pasi forcat e tij shtypën grushtin e shtetit të premten në mbrëmje, transmeton gazeta Kosova Sot Online.
Tanket dolën në rrugë dhe u bënë simbol i një puçi shteti.Mijëra njerëz iu përgjigjën thirrjes së presidentit Recep Tayyip Erdogan për të mbrojtur vendin, duke u ngritur kundër ushtrisë.
Tre videot e mëposhtme shpjegojnë atë që ndodhi dje në Turqi.Në videon e parë shihet një tank që shtyp një taksi, e cila ka njerëz brenda.Në videon e dytë shihet se si civilët marrin kontrollin mbi një tank.Ndërsa video e tretë është videoja simbol e përfundimit të grushtit të shtetit. Ajo tregon ushtarët që dorëzohen përpara tankeve të tyre.
Fraksioni rebel i ushtrisë, që e quna veten "Këshilli i Paqes" - tha se ata ishin duke u përpjekur për të rrëzuar qeverinë për të "mbrojtur të drejtat e njeriut" dhe për të rivendosur demokracinë nga Partia e Erdoganit, AKP, e cila është përballur vazhdimisht kritika nga grupet e të drejtave të njeriut dhe aleatët perëndimorë mbi goditjen e tij brutale mbi protestuesit anti-qeveritarë.
Autoritetet në Turqi thonë se tashmë 90 përqind e puçit ushtarak ka përfunduar, por presidenti i vendit, Recep Tayyip Erdogan druhet se mund të ketë një tjetër tentativë.
Kryeministri i vendit, Binali Yildirim theksoi se pas grushtit të shtetit qëndron kleriku Fethullah Gulen, dikur mik i ngushtë i Erdogan.
Por teksa Gulen ka mohuar këto pretendime, Yildirim ka sugjeruar se mund të ketë dënime me vdekje për pjesëmarrësit në puçin e shtetit.
Ndërkohë raportohet se një helikopter turk me tetë persona ka mbërritur në Greqi, duke kërkuar azil politik.
Burimet greke thonë se puçistët kanë marrë nën kontroll një fregatë në bazën Golçuk, ndërsa kanë peng kreun e flotës turke.
Informacionet mbeten kaotike, kurse gazeta gjermane Bild thotë se njeriu që gatoi grushtin e shtetit është Akin Oztuerk, ish-komandant i Flotës Ajrore turke.
Ai mbështetet nga gjeneral/lejtnant Metin Iyidil.
Ata akuzohen për tradhti të lartë.
Erdogan nga ana e tij sheh diçka të mirë tek ky puç.
Tashmë është momenti që ai të pastrojë ushtrinë, duke e marrë nën kontroll të plotë.
Që prej vitit 2002, ai ka bërë përpjekje për të vendosur ushtrinë nën kontroll, thotë eksperti Anthony Skinner.
Gjatë kohës së puçit, mendohet se Erdogan ishte me pushime në resortin Marmaris.
Fadi Hakura i Chatham House thotë se ky grusht shteti ishte amator, pasi nuk kishte mbështetjen e shumicës së ushtrisë.
Avionët ushtarakë F-16 u ngritën në ajër dhe sulmuan disa nga tanket e rebelëve.
Ndërkohë rrjeti po zien nga spekulimet për shkak se Erdogan akuzon Gulen për grushtin e shtetit. Ky i fundit jeton prej kohësh në azil në SHBA.
A ka dorë Perëndimi dhe përse nuk po i dënon me forcë puçistët, është pyetja që haset në formën e teorive konspirative.
