24 mars 2007
Albin Kurti, Burgu i Pejës
https://floart-press.blogspot.com/2007/03/albin-kurti-burgu-i-pejs.html
Dikur politikanët e Kosovës e mbronin autonominë. Tash, politikanët e Kosovës po e mbrojnë pakon e Ahtisaarit. Dikur politikanët e Kosovës besonin se autonomia është mundësi për republikë dhe një hap drejt saj. Sot, politikanët e Kosovës deklarojnë se pakoja e Ahtisaarit është mundësi për pavarësi dhe një hap drejt saj. Autonomia e Kushtetutës së ’74-shit ishte bërë pikërisht që të mos bëhej republika. Pakoja e Ahtisaarit është ofruar pikërisht që të mos bëhet pavarësia. Ajo Serbisë ia ndërton mundësinë e pamundësimit të pavarësisë së Kosovës. Serbia drejtpërdrejtë do të financojë strukturat qeverisëse të 10+1 komunave me shumicë serbe në Kosovë.
Edhe në rastin më të mirë pavarësia e Kosovës nuk do të mund t’i ngërthejë territoret e atyre komunave. Mirëpo, edhe ky rasti më i mirë nuk është i mundur sipas pakos së Ahtisaarit. Modeli i shumicës së dyfishtë në Kuvendin e ardhshëm të Kosovës është më se i mjaftueshëm që deputetët serbë ta bllokojnë kurdoherë shpalljen e pavarësisë dhe çfarëdo amandamentimi të Kushtetutës që nuk iu levërdisë atyre. Kjo pako e bën karakterin e sovranitetit të Kosovës etnik dhe bipolar (shqiptaro-serb) dhe realisht ia dorëzon atë Misionit Civil Ndërkombëtar i cili e zëvendëson dhe trashëgon UNMIK-un duke e pasur fjalën e fundit të autoritetit suprem dhe pushtetin intervenues të politikës policore. Ndërkohë, sovranitetin nominal të Serbisë mbi Kosovën kjo pako e lë të paprekur pikërisht duke mos e përmendur.
Pakoja e Ahtisaarit nuk është zgjidhje. Ajo sajon probleme të reja, ndërsa të vjetrat veçsa i ngrin. Sikur Kosova të ishte tashmë shtet i pavarur dhe sovran, implementimi i kësaj pakoje do t’ia zhbënte asaj pavarësinë dhe sovranitetin. Asnjë shtet i pavarur dhe sovran nuk do ta lejonte realizimin e një pakoje të tillë. Neve na e sjellin dhe shtyejnë këtë pako sepse s’jemi shtet dhe që të mos bëhemi shtet.
Negociatorët kosovar flasin vetëm në përgjithësi për pakon e Ahtisaarit në mënyrë që ta shmangin vëmendjen nga detajet e tmerrshme të saj. Njëkohësisht, ata e keqinterpretojnë pakon duke e paraqitur statusin e Kosovës si diçka që ndodhet jashtë pakos. Kësaj i ka kontribuar edhe vetë Ahtisaari duke premtuar se rekomandimi i tij për KS të OKB-së lidhur me termin që përkufizon statusin e Kosovës vjen në fund. Përmes kësaj ndarjeje artificiale, Ahtisaari ua ka hapur shtegun anëtarëve të KS të OKB-së që ta pranojnë pakon e tij përveç asaj fjalie shtesë që erdhi në fund! Nëse fjala pavarësi do të ndodhej brenda pakos së Ahtisaarit, atëherë pakoja do të bëhej kontradiktore. Prandaj, fjalia që besohet ta përmbajë fjalën pavarësi, e që u zbulua si premtim (i negociatorëve kosovar) i premtimit (të Ahtisaarit) është lokalizuar jashtë pakos dhe është spostuar për fund, ashtu që në fund të mund të përjashtohet krejtësisht. Njoftimet për dy dokumente të ndara brenda pakos vetëm sa shpërfaqin dokumentin e dytë si ndajshtesë.
Fjalia e pavarësisë tregon pavarësinë vetëm nëse vjen në fillim. Pavarësia në fund është pavarësi në fund të pusit. Nuk është e rastësishme që lëvizja gjithëpopullore dhe antikolonialiste në Indi, e të cilës i printe Gandhi, për parullë kryesore kishte thirrjen “Pavarësi tash!”. Mbase ishin lodhur e mërzitur duke dëgjuar shumë shpesh dhe tepër gjatë se si pavarësia do të vie së shpejti, në fundin e afërm të procesit që assesi s’mbaron.
From : Vedat Xhymshiti
Sent : Saturday, March 24, 2007 11:55 AM
To : "Vedat Xhymshiti"
Subject : Nje Shkrim i Albin Kurtit
| | | Inbox
--------------------------------------------------------------------------------
Attachment : AlbinKurti.doc (0.03 MB)
Te bashkengjitur ne atachment e keni nje shkrim te aktivistit te burgosur politik, Albin Kurti, shkrim te cilin e ka shkruar nga Burgu i Pejes.
Ju lutem ta shperndani ne adresarin tuaj elektronik, dhe ta botoni ne web faqet tuaja te mundshme.
Sinqerisht!
Vedat Xhymshiti
Tiranë, 24 mars '07
--
====================================
Vedat Xhymshiti - Lëvizja VETËVENDOSJE!
Tiranë: +355 / 68 - 33 60 432
Tel +377 (0) 44 / 679 – 357
www.vetevendosje.org
www.vudi.multiply.com
====================================
njerëz në lëvizje
gjeneratë me shpjegim të ri
komunitet që refuzon të nënshtrohet
drejt vetëvendosjes dhe deri në vetëvendosje!
====================================
Lëvizja VETËVENDOSJE! është komunitet i njerëzve që refuzojnë të nënshtrohen. Ajo synon arritjen dhe realizimin e vetëvendosjes për popullin e Kosovës. Lëvizja VETËVENDOSJE! angazhohet edhe për ndryshime radikale shoqërore e politike që do të mundësonin respektimin e të drejtave të njeriut, të drejtave civile dhe drejtësisë sociale për të gjithë dhe secilin në Kosovë pa kurrfarë diskriminimi.
