Në ambientet e Bibliotekës “Hivzi Sylejmani”, në Prishtinë, u përuruan katër veprat më të reja poetike të autores, Prof. Naxhije Doçi: “VARGËZIM MBI GJURMË”, “JEH MOTESH”, “PANDEMIA 2020” dhe “SI HARK YLBERI”. Me këtë rast drejtori i kësaj biblioteke z. Munish Hyseni shpalosi biografinë e shkrimtares Naxhije Doçi. Drita Kosumi Syla prezantoi recensionin e z. Mervete Dreshaj- Baliu e cila veçoi faktin se Naxhije Doçi po u prezanton brezave pasardhës një krijimtari të pasur artistike.
Shkrimtari, Prend Buzhala, lexoi disa poezi nga përmbledhja “Jeh Motësh”, ndër të tjera tha se, te poezitë e shkrimtares Naxhije Doçi, bashkëjetojnë ende gjurmët e luftës.
Ramë Oraca redaktor i librit, “Pandemia 2020”, shpalosi para të pranishmëve rëndësinë e kësaj përmbledhjeje.
Rudi Berisha lexoi disa poezi të librit ‘Si hark Ylberi” dhe bëri një rezyme të librit.
Shkrimtari, Dibran Fylli vlerësoi lartë krijimtarinë dhe veprat e botuara të autores Naxhije Doçi. Ai porositi të rinjtë të lexojnë veprat letrare të autores.
Bashkëshortët: Naxhije e Rexhep Doçi ditë më parë, bibliotekës “Hivzi Sylejmani”, në Prishtinë, i kishin dhuruar 400 tituj librash nga Biblioteka personale, me ç’ rast sot drejtori Munish Hyseni në shenjë nderimi e respekti iu ndau “Mirënjohje”.
Në fund të këtij përurimi autorja Naxhije Doçi përshëndeti të pranishmit dhe i falënderoi për pjesëmarrjen e tyre në përurimin e veprave.
